ilumut perkusersuíssusek kingunekardluarnerussarpa?

INUIT perĸusersuitsut únerĸarigsutdlo perĸuserdlungneĸ silarssuarme takussartik ârdleritsautigât. ilaisalo agdlât nangmingneĸ perĸuserdlungnitik ârdleritsautigalugit. arnaĸ agdlagpoĸ: „uvanga . . . pakatsingâtsiaĸaunga malugileravko ilumũssusera aseroriartortoĸ.“ avdla oĸarpoĸ: „malugaunga uvdlune kingugdlerne ajornángínerussut ingerdlaviginiartardlugit.“

kisiáne perĸuserdlugtûssariaĸarnerpugut avdlat taimainere malĩnardlugit? nâgga. sule inoĸarpoĸ perĸuserdlugkumángitsunik; ilaitdlo perĸuserdlugtûsimagaluartut avdlángorsimáput. sumile perĸusersuítuínarnigssamut túngaviuvdluartoĸ silarssuarme perĸuserdlugfiussume matumane nanisínauvarput? bîbilime.

bîbilip ikiorpâtigut perĸusersuitsûnigssamut, Jehova Gûtimit, tamanit tatiginarnerpaussumit, isumagssarsiarititaugame. imalo kajumigsârpâtigut: „[Jehova] isumavdluarfigûk ũmatigkut ilũngardlutit.“ (ússatit 3:5) misiligtagkat erssersítarpât Gûtimut isumavdluarneĸ únersũssutai maligdlugit tamatigut ajúngitsumik kinguneĸartuáinartoĸ, sôrdlo perĸusersuínermut túngassumik.

ĸanoĸ ilivdlune perĸusersuíneĸ takutíneĸartartoĸ

uvane atuariaruk Gûtip oĸausia perĸusersuíneĸ pivdlugo. takordlôriarugdlo ĸanoĸ silarssuaĸ issíkoĸarsínáusassoĸ kíkut tamarmik sujúnersûtit máko maligkaluarpatigik.

„taimáitumik sagdlúsaerdluse tamavse ilumôrtumik inoĸativsínut oĸalugitse.“ — Evfisumiut 4:25.

inûneĸ ĸanoĸ ísagaluarpa kíkut tamarmik ilumôrtuínarmik oĸalugtaraluarpata? âp, tauva perĸuserdlugtumik nâlagkersuissumik ingerdlatsissoĸásángíkaluarpoĸ, perĸuserdlugtuliortoĸásángíkaluarpoĸ, âp, inoĸámik ûmigssortumik mamardlîssoĸartásángíkaluarpordlũnît!

„tigdligtartoĸ tigdlísaerdle.“ — Evfisumiut 4:28.

pisiniarfingne tigdlingnerínáungitsut pîainiardlunilo sãssússiniarnerínáungitsut, ãmátaordle kúkussumik akilerârnermut nalunaerutit tigdlingnerúput, akiligagssanut akilîumángínerit, sulivfingmilo pinik sunigdlũnît akuerineĸarnane angerdláussineĸ ãmalo pissariaĸartíngisamik ikiûtinik piumassaĸarnerit. U.S.A.-me migssiliût maligdlugo inuit tamarmik nâlagauvfingmit tigdlísaeraluarpata nâlagauvfiup aningaussat isertitai atortitailo naligîgdluínangajásagaluarput.

„ússersaivfît perĸuserdlûtit [Jehovap] maujugai.“ — ússatit 11:1.

ĸanoĸ igísagaluarpiuk pisiniarnitit tamaisa únerĸarigsumik pineĸartaraluaruvit? takordlôriaruk silarssuaĸ tamane nalorninartunik niuverniartoĸángivfiussoĸ, silarssuaĸ atornikumik bîlisivfigisínaussat imalũnît igdlumik nutâmik pisivfigisínaussat perĸusersiorfigineĸarnigssat ánilângaginago!

„inuit tamarmik nâlagkersuissunut akimanernut nâlagtûgilit.“ — Rûmamiut 13:1.

súkássusigssat kigdlinginik ĸângîneĸ, ĸutdlît augpalugtitdlugit ingerdláinarnerit, akilerârutinut nangmineĸ nalunaerutine perĸuserdlungnerit ãmalo pikunik avĸusinĩnarmut igitsinerit, táuko sisamat periauserpagssuit pissortanut nâlagtigitíngitsôrtarnerit ilagait. ĸanoĸ avdlautigísagaluarpa iluamik tamarmik „nâlagkersuissunut akimanernut“ nâlagtigitítaraluarpata!

„kinalũnît suliumángíkune nerísángitsortaoĸ.“ — 2 Tásalûníkamiut 3:10.

eĸiasungneĸ perĸuserdlungnermut pinerdlugtuliornermutdlo píssutaussut angnerit ilagât. kristumioĸ suliumatûssariaĸarpoĸ avdlanit pilersorneĸarnigssane nautsorssûtiginago.

„[áiparîngneĸ] tamane kángunáikile, [áiparîtdlo] ínarfiat minguíkile.“ — Eprîarit 13:4.

taineĸarêrsumik misigssuinerne katísimassut aperineĸartut agfangajaisa misiutigíngilât avdlasiorsimavdlutik. ajornángivigsumik takusínauvarput ĸanoĸ avdlautigísagaluartoĸ inuit akornáne perĸússut tamána malingneĸartûgaluarpat.

malingneĸarsínáupat?

pâsinarpoĸ maleruagagssiat tamáko iluartûssut. uvdlumíkutdle malingneĸarsínáupat? akíssutâ tássa âp. Gûtip perĸunaviángilâtigut malingneĸarsínáungitsumik imalũnît uvavtínut ajoĸutausínaussumik. erĸarsautigerĸigsâriákit perĸusersuínerup iluaĸutausínaunerisa ilaminernge.

sujugdlerpâmik perĸusersuínerup ilerasutsailivâtigut, tamánalo pingâruteĸángitsũngilaĸ. uniorĸutitsissarnerit ilerĸuliutĩnardlugit ĸugsalaitdlisimángíkuvta, nalúsángilarput kúkussumik iliorângavta, ilerasûtigissarparputdlo. perĸusersuíkângavtale erdloĸíssutigissavtínik ilerasúsángilagut.

ãmátaoĸ perĸusersuíkuvta perĸuserdlungnernik pitdlarneĸásángilagut. inuk agssuarnaitsoĸ ángiordlune niorĸutigssiortutut, akilerârutinut únerĸaserdlugtutut imalũnît pîainiardlune sãssússissartutut erssersitsineĸ ajorpoĸ.

ilángúsínauvarputdlo perĸusersuíkuvta inûneĸ atoruminarníngortísagigput uvdluínarne ilagissartagkavtínut. tamána táukuátaoĸ perĸusersuitsûnigssamingnut iluaĸutigísavât. niuvertarfigssûp sulissuine misigssuerêrdlutik atuagagssiame Psychology Today-me nalunaerutigineĸarpoĸ: „sulissut isumaĸarunik sujulerssuissut ĸutdlersat perĸusersuitsûssut, isumaĸásáput perĸusersuitsûnigssartik nautsorssûtigineĸartoĸ . . . kisiáne sulissut (erĸortumik erĸúngitsumigdlũnît) isumaĸarunik sujulerssuissut ĸutdlersat perĸuserdlugtûssut, nangmingneĸ perĸuserdlungnermingnut pissũssuteĸángitsutut píngitsûterĸajânerussarput.“ amerdlanerpaussugut niuvertarfigssûp sujulerssuissuisut agtigissumik avatangîssivtínut súniuteĸartigíngilagut, tamavtale avatangîssivut ilâtigut súniuteĸarfigâvut. únerĸarigkuvtalo ajúngitsumik súniuteĸarfigísavavut.

ãmátaoĸ perĸusersuíkuvta avdlanit atarĸineĸautigísavarput. kristumiup Liberiame tingmissartûtileĸatigît agdlagfiáne sulissup tamatuma ilumũssusia misigâ. telefoníkut nâlagkane oĸalũniarneĸarmat, táuna tássanĩngínerarĸungmat, navsuiáupâ sagdluliorsínaunane. kamagpoĸ ingmíkôrtortamutdlo avdlamut nûgtitdlugo. erininarseriángitsoĸ nâlagartâvata ĸínuvigâ aningaussivingme amigartôrutit angnertúngitsut issertorĸuvdlugit. taimailiorumángilardle, tauvalo ãma táuna kamalerpoĸ. uvdlutdle ikigtúnguit kingorna aningaussanik, krûninik tûsinterpâlungnik nalilingnik, aningauseriviliáussissugssamik atorfigssaĸartitsíput. kina tauva torĸarneĸarpa? tássame suleĸat perĸusersuitsoĸ! ĸutdlersaisa perĸusersuíneragut atarĸigaluarsimavât. uvdlune ajornartorsiorfiussune kristumiut perĸusersuitsut sulivfigssarsissarsimáput avdlat sulivfigssarsisínáungínerine.

ajúngeĸaoĸ atarĸineĸardlune, ilerasûtigssaĸarnane ãmalo ilagissartagkavta inûnerat atoruminarníngortitdlugo. pingârnerussumigdle perĸusersuitsûnigssavtínut patsisigssaĸarpugut.

perĸusersuínigssamut patsit pingârnerussoĸ

bîbilip oĸalugtũpâtigut Gûte sagdlusuitsûssoĸ. (Títuse 1:2) âp, Jehova Gûte perĸusersuípoĸ, ãmalo perĸusersuitsûnigssarput ilimagâ. Gûtip ûmigissaisa ilait taineĸarput „oĸaĸ sagdlutôĸ“ ãmalo „nalunaiaissoĸ sagdlussoĸ sagdluvdlune oĸalugtoĸ“. (ússatit 6:16-19) Gûtip ûmigâ inuit sagdlussarângata akilerârutinut akilînikíniáinardlutik, sulisitsissumingnit tigdlingniardlutik imalũnît súkutdlũnît avdlat erĸúngitsumik iluanâruteĸarfiginiáinardlugit.

ímaĸa ãma ivdlit taimáitut ûmigâtit. taimailioruvit nuánârutigísavat tusardlugo Gûtip perĸuserdlungnerit iliûseĸarfigisínauvdlugitdlo iliûseĸarfigiumârmagit. ernĩnaĸ iliûseĸásaoĸ. neriorssûtâ imáipoĸ: „Ajortummi [perĸuserdlugtut ilángutdlugit] piiagaasussaapput, [Jehovamutdle] neriuttut nuna kingornutissavaat. Guutiitsoq erniinnaq peeruttussaavoq.“ — Tussiaat 37:9, 10.

nunarssûp perĸuserdlugtumik aĸúneĸartuarnigssâ Jehovap akueriumángilâ. perĸuserdlugtuáinartut pinerdlugtuliortutdlo avdlat tamaisa ilángutdlugit pîásavai. perĸusersuitsutdle únerĸarigsutdlo Gûtivdlo perĸussânik iliorniardlutik ilungersortut sujunigssaĸ pivdluarnartoĸ erinigisínauvât. tugsiausiortoĸ aperivoĸ: „[Jehova], kina ininni najugagssarsisinnaava, qaqqanni illernartumi inissarsisinnaalluni?“ akíssutâ ĸanoĸ ípa? „Tassa taanna peqqusersuitsumik inuuseqartoq, innarluitsumik iliortoq ilumoortumillu oqaluttoq uummamminit, oqaasipalaanik angallassinngitsoq, tullimi ajoqutissaanik iliunngitsoq.“ — Tussiaat 15:1-3.

uvdlumíkut perĸusersuitsûniarneĸ tamaviârdlune norĸáissutigissagssauvoĸ. ússerniarneĸaraluartitdlutigdlũnît perĸusersuítuínarumassut Gûtip ujarpai. táukua ’ĸilagssane nutâne nunagssamilo nutâme iluarssuseĸarfigssane’ neriorssûtâ nâpertordlugo ilimagissavtíne inigssaĸarnigssât tugdluardluínásaoĸ. (2 Pîtruse 3:13) uvdlumíkut Jehova Gûtimut kivfartortut ilumôrdlutigdlo maligagssiainik nãmagsingningniartut amerdlaĸaut. sôruname kristumiut táuko nãmagdluínartũngitdlat. ’nunagssaĸ nutâĸ’ iluarssuseĸarfigssaĸ pivdlugo Gûtip neriorssûtâ ugperât, mãnákutdlo inũssautsimíkut takutípât ilumôrtumik kigsautigigigtik ’nunamut nutâmut’, tássa nuname ínugtaoĸatigîngnut nutânut’, ilaorusugdlutik.

ivdlit nangmineĸ perĸusersuíneĸ pingârtíkugko, sôrme tauva inuit táuko ilisariniángiligit? atuagagssiamik uvánga naĸiterisitsissut táukunúnga atássuteĸarfigitíkumaĸãtit. (wD 15/4 84)

[Qupp. 3-mi issuagaq]

bîbilimik ilisimassaĸarneĸ perĸusersuíssutsimut agdlisautauvoĸ, Gûtivdlo perĸusersuíneĸ tipaitsûtigâ

[Qupp. 4-mi issuagaq]

perĸusersuíneĸ malingneĸarsínauvoĸ — ĸanordle iliorníkut?

[Qupp. 4-mi issuagaq]

perĸusersuitsoĸ atarĸíngitsûgagssáungilaĸ

[Qupp. 5-mi issuagaq]

perĸusersuitsûnigssamut patsit suna pingâruteĸarnerpauva?