Tamatigut assuarnaatsutut iliortaritsi
’Isumalluarpugut sumik ilerasuutigisaqarnata, tamatigut assuarnaatsutut iliorniaratta.’ — EPRÎARIT 13:18.
1, 2. (a) Nalitsinni peqqusersuinneq qanoq oqaatigineqarsinnaava? (b) Inuit qanoq ittut peqquserluttuliortarpat?
UTOQQASAAT eqqaamasinnaavaat qanga inuit illumik matui parnaartariaqanngimmatigik. Inoqatitik tilliffigissallugit imaluunniit peqqusersiorfigissallugit eqqarsaatiginngilaalluunniit. Aningaasanik taarsigassarsigaangamik utertitsillutik akiliinissartik pinngitsuugassaanngitsutut isigisarpaat. Oqaatsitillu eqqortinngitsoorneq ajorpaat. Peqqusersiortoqartaraluarpoq, kisiannili annertuvallaanngilaq. Ullumikkulli tillinniarneq, sallusarneq peqqusersiortarnerlu silarsuarmi tamarmi nalinginnaapput. Peqqusersiortartullu ilarpassui ileqqorissutut isigisaasarput, illoqarfiit ilaanni ataqqinartut najugarinerusaanni najugaqarlutillu suliffeqartut, atisarissartut, immaqa naalagiartartut, innuttaalluartutullu imminnut isigalutik. Ullumikkummi naalakkersuisut atorfikkaat niuertorsuillu ilaat unneqqarissuunngivipput.
2 USA-mi ukiut tamaasa pinerlunnerit sualunnerusut peqqusersiornerusut 11 millionit sinnerlugit politiinut nalunaarutigineqartarput, ukiullu tamaasa akileraartarnikkut peqqusersiornerit dollarinik 250 milliardit sinnerlugit naleqartarput. Illorpassuaqarfimmi New Yorkimi ullut tamaasa inuit 100.000-it missaat qimuttuitsuni nunap iluatigoortuni akiliinatik ilaasarput. Atorfillit ilaat oqarsimavoq akiliinngitsoortut tamarmik eqqartuussassanngortinneqaraluarpata ’eqqartuussisut tamarmik qaammatit arlallit eqqartuussassat allat suliarissallugit piffissaqarnavianngitsut’. Japanimi akileraartartut akornanni misissuinikkut paasineqarsimavoq ilaat 95 procentii — eqqartuussissuserisut tamarmik 92 procentiinik ilallit — aningaasat akileraarusigassat nammineerlutik nalunaarusiornerminni eqqunngitsumik nalunaarsuisartut. Qaammammilu ataasiinnarmi inuit 16.000-it paasineqarput qimuttuitsunut akiliisimanatik ilaasarsimasut.
3. Aappariinni peqquserlunneq qanoq ililluni annertusiartuinnarpa?
3 Aappariinnermissaaq ilumuunnginneq annertusiartuinnarpoq. Ukiut arlallit matuma siornagut misissuinikkut paasineqarpoq Amerikami arnat uillit 30 procentii „aappariinnerup avataatigut kinguaassiuutitigut atoqateqartartut“. Qaninnerusukkut arnat uillit 100.000-it sinnerlugit apersorneqarnermikkut affaasa misiutiginngilaat „minnerpaamik ataasiarlutik uisoqarsimallutik“. Paasiniaasoq oqarpoq „angutit nuliallit immaqa 90 procentii pallillugit“ allasiortartut.
’Ullut kingulliit’
4. Peqquserlunnerit amerliartuinnarnerat suna pillugu tupaallaatiginngilarput?
4 Ilumuunngitsuliornerit amerliartuinnartut Jehovap kiffaasa tupaallaatiginngilaat. Nalunngilaat ’ullunut kingullernut’ makkununnga nalunaaqqutit tamakku ilagissagaat. Guutip oqaasiani siulittuutigineqarpoq uagut nalitsinni inuit inuujumaartut ’imminnik asasut, aningaaserituut, ilumoorfigeqatigiinngitsut, imminnut naalakkersorsinnaanngitsut, ajunngitsunik nuannarisaqanngitsut, Guutimik mianerinninneq ileqqorisuusaarlugu tamaviaarukkumanaguli, ajoriartorsinnartullu’. (2 Timûtiuse 3:1-5, 13, NW) Immikkut ilisimasallit suleqatigiiusut miserratiginngilaat silarsuarmi tamarmi inuit „suna ajunngitsuusumik sunalu ajortuusumik maligassat ileqquugaluartut annertusiartuinnartumik soqutigiunnaartaleraat tarnillu nalunngissusia sumiginnarlugu“.
5. Pissutsit ullumikkut atuuttunut assingusut itsarsuaq Israelimi naggueqatigiit qulit naalagaaffiani atuukkallarmata sunik pisimasoqarpa?
5 Ullumikkut silarsuarmi pissutsit atuuttut ukiuni Jehovap itsarsuaq naalagaaffimmut Israelimut naggueqatigiit qulit piannut eqqartuussumminik naammassinninnerata siunitsiannguagut atuuttunit ajornerupput. Pissutsit taamani atuuttut Húsia 4:1-3-mi ima allaatigineqarput: ’Jehovap nunamiut saqitsaatilerpai; ilumoortoqaranilu isumassuisoqaranilu Guutimik ilisarsisoqanngimmat nunami. Uppernarsaasut sallusut toqutsisullu tillittullu angunnuneqartullu amerliartoqaat, aammillu kuisinerit malittuinnaapput. Tamanna pillugu nuna aliasussaaq, tumanngussappullu tamarmik tassani nunaqartut.’ Jehovap ajorneraalluni eqqartuussutaa ukiumi 740-mi u.n.a.s. naammassineqarpoq, Assyriamiut Israelimik tiguaanerat nunallu inuinik aallarussinerat ilaginnarmagit.
6. Suna pissutigalugu Guutip pissutsit aaqqissuussaanerannut maannakkut atuuttunut eqqartuussunni naammassiumaarpaa, naammassineqarnissaalu qanoq qularnaatsigaa?
6 Jehovap silarsuaq ilumuunngitsulisoq manna aamma ’saqitsaatilerpaa’. Bibelimi erseqqissumik takutinneqarpoq Jehovap silarsuarmut matumunnga eqqartuussunni nalunaarutigisimagaa, taamaattumillu silarsuaq manna ’tumanngussaaq’, tassa: aserussaaq. ’Qilaat nunalu maannakkut ittut taassuma oqaasiagut uninngagallartitaapput, ikuallattussaallutik toqqorsimasut ulloq inuit iluaatsut eqqartuutiffissaat aserorfissaallu nalliutserlugu.’ (2 Pîtruse 3:7) Tamatuma eqquunnissaa ima qularnaatsigigami, Guutip oqaasiani eqquutereersimasutut allaaserineqarpoq: ’Ata, Jehova iluartortani tuusintilippassuit ilagalugit aggersoq, tamaasa eqqartuukkiartorlugit iluaatsortaallu tamaasa pillariartorlugit iluaatsuliortarnerminni suliaat tamaasa pillugit.’ — Jûtarse 14, 15.
7. Jehovap pissutsit aaqqissuussaanerannik ajortunngorsimasumik naggasiinissaata tungaanut, kiffaasa suut noqqaassutigisariaqartassavaat?
7 Kisiannili Guutip silarsuarmik peqquserluttumik matuminnga naggasiinissaata tungaanut, kiffaasa allatut ajornartumik inuuffigisariaqarpaat. Kristumiut ’silarsuarmiipput’, kisiannili, soorlu Jesus oqarsimasoq, ’silarsuup inuisa ilaginngilaat’. (Juánase 17:11-14) Taamaattumik ullut tamaasa peqqusersuinnerup tungaatigut ileqqussat naapertorlugit aalajangiisariaqartarput, suliffimminni, atuarfimmi, ilaqutariinni imaluunniit ikinngutiminnik ilagisaqarnermi. Nalunngeqatiginnissusertik Bibelimi najoqqutassiarineqartut najoqqutaralugit perorsagaasoq qanoq misilinneqassagaluarpalluunniit, Jehovap kiffai apustili Paulusitut oqarsinnaarusupput: ’Isumalluarpugut sumik ilerasuutigisaqarnata, tamatigut assuarnaatsutut iliorniaratta.’ — Eprîarit 13:18.
Peqqusersuinneq imaaginnanngilaq kinguneqarluarnerusartoq
8. Suna pissutigalugu Jehovap kiffaasa peqqusersuinneq ileqqoraat?
8 Oqartoqarpoq ’peqqusersuinneq kinguneqarluarnerusartoq’. Tassa imaappoq: peqqusersuinneq imminut akilernerusartoq. Kristumiulli tamannaannaq pissutiginngilaat. Qanoq kinguneqassagaluarpalluunniit kristumiut peqqusersuitsumik iliortassapput. Jehovap kiffarimmatik pinngitsoornatik silarsuup nunguttussaasup matuma inui peqquserlunneratigut malissanngilaat — suna pissutaassagaluarpalluunniit. Qanoq iliornermikkut tamatigut Guutip inatsisai najoqqutaralugit sulisassapput. Peqqusersuinnerlu pillugu inatsisai allanngorsimanngillat.
9. Jehovap itsarsuaq Israelikkunnut inatsisaani peqqusersuinneq qanoq ittumik pingaartinneqarpa?
9 Soorlu imaattut: Itsarsuarli Jehovap Israelikkut oqarfigai: ’Arnaaneqassanngilatit [allasiussanngilatit]. Tillissanngilatit. Tullit nalunaajaassutigissanngilat sallullutit. Suulluunniit tullivit pigisai pileritsaatigissanngilatit.’ (2 Môrsase 20:14-17) Tamatumunnga assingusumik Môrsasip agdlagaisa pingajue 19:11, 12-imi allassimavoq: ’Tillissanngilasi sallussanasilu peqquserluttumillu iliorfigeqatigiinnasi. Sallullusi uppernarsaassanngilasi atera taallugu, massami Guutivit aqqa nalinginnaatissanngilat; uanga tamassa Jehova.’
10. Aamma kristumiut peqqusersuitsooqqusaanerat qanoq erseqqissarneqarpa?
10 Inatsisit taamaattut kristumiunut taaqqinneqarsimapput. Guutip oqaasiani allassimavoq: „Naluisiluunniit iluaatsut Guutip naalagaaffia kingornussarissanngikkaat? Tammaqinasi. Kinguaassiuutitigut kanngunartuliortulluunniit guutipilussiortulluunniit allasiortulluunniit angutilluunniit pinngortitat pissusiannut akerliusumik atortittut, angutilluunniit anguteqatiminnik atoqatiginnittut, tillittulluunniit piumatuulluunniit imerajuttulluunniit mitaatilliisulluunniit iluanaarniapiluttulluunniit Guutip naalagaaffia kingornussarissanngilaat.“ Aammattaaq ’sallunernik ileqqorinnittut’ taakkua ilagaat. (1 Korintumiut 6:9, 10, NW; sarĸúmersitat 22:15) Guutip pissutsinik aaqqissuussinissaani nutaassami inoorusuttut tamarmik taassuma pissusii, soorlu ’sallusuitsuunera’, ersersittariaqarpaat. (Títuse 1:2; Eprîarit 6:18) Peqquserlunnerit assigiinngitsut tamarmik Satan, ’sallunerit ataataat’, aallaavigaat. — Juánase 8:44.
11, 12. (a) Suna pissutigalugu maannakkumiit peqqusersuinneq sungiuttariaqarparput? (b) Suna pissutigalugu Guutip peqatigiissortaani takussaasuni toqqissisimasutut misigivugut?
11 ’Nunassaq nutaaq’ Guutip neriorsuutigisaa ’iluarsuseqarfiussammat, ’inuit najugaanni nunallit iluartumut sungiussileraraat’. (2 Pîtruse 3:13; Isaia 26:9) Taamaattumik paratiisimi nunamiittumi innuttaajumaartussat amerliartuinnarasuartut ’Jehovap aqqutigeqqusaanik’, aammattaaq peqqusersuinnermik, maanna ajoqersorneqartarput. (Isaia 2:3, 4) Soorlu Guutip oqaasiani ilitsersuunneqartugut: ’Salluffigeqatigiinnaveeritsi, inutoqaq ileqqui tappullugit iperarassiuk.’ (Kulorsamiut 3:9) Aammattaaq allassimavoq: ’Tillittartoq tillissaarli, suliniarlunili assamminik ajunngitsuliorli, ajorsartunut tunniussassaqaqqulluni.’ — Evfisumiut 4:28.
12 Jehovap kiffai tamatigut peqqusersuittariaqarput. Aaqqissuussaanissami nutaami inuusut tamarmik taamaattariaqassammata, Guutip innuttai maannakkut taamaattariaqarput. Ila nuannissusia peqatigiit nunanit tamalaaneersunik ilaasortallit arlalinnik millionilinnik amerlassuseqartut peqqusersuinnermik ineriartortitsisut ilagisinnaagatsigik! Ila toqqissisimaarnassusia anersaakkut ittumik paratiisimiikkatta Guutip anersaavata iluartup sunniissuseqarluartuusup, ’Guutip naalatsiminut tunniussaata’, pilersitaani. (apustilit suliait 5:32) Ila allaalluinnassusia anersaamit peqqiitsumit ’pissutsit aaqqissuussaanerata matuma guutia’, Satan Diaavulu, naalagaralugu silarsuarmut matumunnga tamarmut sunniisumit. — 2 Korintumiut 4:4, NW; Galâsiamiut 5:19-24.
Peqqusersuinnerput malugineqartartoq
13, 14. Jehovap innuttaasa peqqusersuinnerat peqatigiiffiata avataaniittut qanoq oqaatigisimavaat?
13 Guutip innuttaasa peqqusersuinnerat inunnit allanit malugineqartarpoq. Assersuutigalugu aviisimi Italiami saqqummersartumi Il Piccolo-mi atuartartut allagaat uku saqqummersinneqarput: „Qutsavigerusuppara arnaq Jehovamut Nalunaajaasuunerartoq maligassaalluartumillu peqqusersuinnermik takutitsisoq aviisi una aqqutigalugu aningaasarpassuit katassimasakka utertikkamigit.“ USA-mi aviisimi The Indianapolis Star-imi aappariit dollarinik 4000-inik nassaarsimasut piginnittuannullu utertitsisut allaaserineqarput. Aviisimi allassimavoq aappariit qanoq iliortariaqarnissaminnik nalornisuunngitsut. Sooq? Oqarput: „Aningaasat tiguinnarsinnaanngilavut. Uagut Jehovamut Nalunaajaasuuvugut.“
14 Missourimi oqaluussisartut ilaat dollarinik 9500-nik nassaarmat politiinullu tunniullugit, politiip oqaasii aviisimi imannak issuarneqarput: „Qaqutigoortorujussuuvoq aningaasat taama amerlatigisut nassaarineqaramik tunniunneqarnerat. Siornatigut taamatut pisoqarsimaneranik uanga eqqaamasaqanngilanga. Tupinnaqaaq.“ Ilanngutassiami eqqartorneqarpoq Nalunaajaasup „aningaasat tiguinnarnissaat eqqarsaatiginngikkaaluunniit“. Politeeq paarsisuusoq oqarpoq oqaluussisartup „uppilerseqqikkaani suli peqqusersuitsunik inoqarneranik“. Nalunaajaasoq akivoq: „Inuiattut isigineqarluta tamatigut peqqusersuitsuunerput pingaartingaarparput.“
15, 16. Misigisimasat suut takutippaat minnertigut allaat peqqusersuinneq malugineqartartoq?
15 Amerlasuutiguinnaq peqqusersuittariaqanngilagut, aammattaarli minnertigut. (Lúkarse 16:10) Soorlu ilaqutariit Nalunaajaasuusut Floridami illusisarfimmi illusisimagamik, ernerata akitsip puua uinequtinilu paarlaakkamigit akitsip puua poortuuttoorpaa. Ilaqutariit illusisarfimmut utertippaat, kingusinnerusukkullu illusisarfiup pisortaata allaffigai: „Qutsavigingaarusuppassi peqqusersuitsuunissinnut. Akitsip puua utertikkassiuk immaqa ileqqussitut iliorpusi; uagulli nersornarluinnartuutipparput.“ Aappariillu Nalunaajaasuusut illusisarfimmit Georgiamiittumit kuglepenni tigusoorsimallugu utertillugu nassiummassuk, pisortap allaffigai: „Qutsavigerusuppassi kuglepenni pigisasi ilanngullugit portuuttoorsimasarsi pisarissersuutigalugu utertikkassiuk. Allakkassinnik, inuit peqqusersuitsut unneqqarissullu allagaannik, allagarsilluni kajumissinaqaaq!“
16 Nukappiaraq Jehovamut Nalunaajaasuusoq 5. klassemi atuartuusoq atuarfimmi baseballerpoq. Nalorninarpoq „anisimanersoq“, namminerli nalunngilaa „anisimalluni“. Holdeqatigisaasa „isersimanerarpaat“. Taava akerarisaasa ilaat oqarpoq suna piviusuusoq qularnaatsumik paasineqarsinnaasoq. Oqarpoq: „Apereriarsiuk anisimanersoq isersimanersorluunniit. Nalunaajaasuuvoq, Nalunaajaasullu salluneq ajorput.“ Nukappiaqqap ulluinnarni ileqqorissuunera inunnit allanit malugisaavoq. Guutip najoqqutassiai maleruarutsigik, ’naalungiarsuit qarninit’ allaat Jehova nersorneqarsinnaavoq. — Matîuse 21:16.
17, 18. Jehovap peqqusersuinneq pillugu najoqqutassiai inunnut ajunngitsumik uummatilinnut qanoq kinguneqarluarsinnaappat?
17 Nigeriami Nalunaajaasup ataatsimeersuariarnissaa uiata assortortorujussuuaa. Taamaattumik ataatsimeersuarnermut malippaa eqqissiviilliortitsiniarlunilu. Oqalugiarnerit kingornisigut angut oqarpoq: „Ilissi Nalunaajaasuususi misilinniarpassi.“ Isigisoqannginnerani aningaasat pappiaraasut kaasarfimminit amuai, nalunaaqqutserlugit, eqiterlugit nunamullu igillugit. Kingusinnerusukkut oqarpoq aningaasaatini katassimallugit. Oqarfigineqarporli isumakuluutigeqqunagu, aningaasat utertinneqassammata. Aningaasaatiminik igitsiffigisaminut uterpoq, peqanngillalli. „Aarit,“ oqarpoq, „paasivassi peqquserluttuliortusi!“ Taava oqarfigineqarpoq aningaasat nassaat qimanneqaannarnavianngitsut, kisianni katanneqarsimasunik nassaanik tunniussisarfimmut tunniunneqarsimassasut. Tassami, aningaasat nalunaaqqutsigaasut tassaniipput, piginnittuannullu utertinneqarlutik. Tamanna misigereersimagamiuk nuliami upperisaanik misissuerusulerpoq, ullumikkullu nammineq Jehovamut Nalunaajaasuuvoq.
18 Arnap Jehovamut Nalunaajaasuunngitsup Jehovap Nalunaajaasuisa qullersaqarfiat New Yorkimiittoq allaffigaa panimmi atuarfimmi misigisimasaa oqaluttuariumallugu. Niviarsiaraq hestimut supissaammik akisuumik tilliffigineqarsimavoq. Ukiut marluk qaangiummata allagarsivoq imaattumik allassimasunik: „Asasara Lili! Aajuku supissaataatitit ukiut marlussuit matuma siornagut ilinnit tillitat. Tillikkaluarakkinukua, maannali Jehovamut Nalunaajaasunngorsimavunga, nutaamillu nalunngeqatiginnissusertaarsimagama tigummiinnarsinnaajunnaarpakka. Utoqqatseraluaqaanga. Isumakkeerfiginnga-aat.“ Aap, Jehovamut kiffaajumasut ’sumik ilerasuutissaqannginniartariaqarput, tamatigut assuarnaatsutut iliorniaramik’. — Eprîarit 13:18.
Peqatigiiffimmik minguitsuutitsiniarneq
19. (a) Kristumiu peqquserluttuliorsimassaguni, qanoq iliortariaqarpa? (b) Ilavut peqquserluttuliortuaannarunik, qanoq pineqassappat, sunalu pissutigalugu?
19 Guutip kiffaasa ilaat peqquserluttuliortuussaguni, paasileriaruniuk imaluunniit paasitinneqaleriaruni erniinnaq eqqunngitsuliorsimanini anigorniarlugu aaqqinniartariaqarpaa. Ilavut Bibelimi najoqqutassiarineqartunik pingaartitsiunnaassagunik peqquserluttuliortuaannarlutillu, Guutip innuttaanik mingutsitsinissaat ilaginnarneqassanngilaq. Ilagiinnut ilaasortaajunnaarsinneqassapput. (1 Korintumiut 5:11-13) Inuit ilagiinnut ilaasortaajunnaarsitsinermikkut qilammiunit tapersersorneqartarnissaat naatsorsuutigisinnaavarput, Jesusimi siulittuivoq: ’Inuup ernerata inngilini aallartikkumaarpai, taakkualu aserorsaarutit tamaasa iluaatsuliortullu naalagaaffianit katersorumaarpaat . . . taava iluartut seqinertut qaamatigissapput ataatamik naalagaaffiani.’ — Matîuse 13:41-43.
20. Suna pillugu isumalluarluta qanilaartut kaammattorsinnaavavut ilagaluta Jehova pallorfigiartoqqullugu?
20 Tassuuna Jehovap peqatigiissortai minguitsuutitaapput. Minguitsuutitaagamik naaralaartitsivittut inuit peqqusersuitsumik uummatillit ornigassaattut qaamasuupput, peqatigiiffimmut tassunga kajungersissallugit. Taamaattumik isumalluarluta nunap inui qanilaartut oqarfigisinnaavavut: ’Qaa, majuarta Jehovap qaqqaanut [eqqortumik guutisiornerup inissiffianut akitsisitaasumut] . . . aqqutigeqqusaminik ajoqersoqqulluta aqqusernisigullu ingerlaqqulluta.’ — Migga 4:2. (wD 15/11 86)
Apeqqutit uteqqitassat
□ Nalitsinni peqqusersuinneq qanoq oqaatigineqarsinnaava?
□ Peqqusersuinnerup pisariaqarnera Guutip oqaasiani qanoq eqqartorneqartarpa?
□ Aaqqissuussinissamut nutaassamut isinngikkallarnitsinni allaat suna pillugu peqqusersuinneq sungiuttariaqarparput?
□ Misigisimasat suut takutippaat peqqusersuinnerup naleqassusia?
□ Peqqusersuinnerup akornatsinniittuartitaanissaa suup uppernarsarpaa?
[Qupp. 15-mi assiliartaq]
Ullumikkut Guutip aaqqissuussinissaanut nutaassamut innuttaajumaartussat Jehovap peqqusersuinnermik aqqutigeqqusaanik ajoqersugaapput