ajokersuiningne ajokersugak ũmatâgut súnerniaruk

1, 2. (a) Jehova najorĸutagssiailo pingârtingârĸuvdlugit inungnik avdlanik ikiuiniarnigssamut suna pissariaĸarpa? (b) suna pivdlugo silatússutsíkut ilisarssíssut kisime nãmángila?

SIVISÚNGITSUMIK igdluaraĸ sananeĸarsínauvoĸ, igdlússârssuardle únuap ingerdlanerínâne sananeĸarsínaunane. ajoĸersugángortitsinertaoĸ taimáipoĸ. Jehova najorĸutagssiailo pingârtingârĸuvdlugit inungnik avdlanik ikiuiniarneĸ oĸitsũngeĸaoĸ. taima ítunik „igdlússârssualiornigssaĸ“ pivfigssarssuaĸ atortariaĸarpoĸ pigínáussuseĸardluarnerdlo pissariaĸardlune.

² tamána nãmagsiniásagáine, ilisarssíssúmik túniússĩnarnigssaĸ nãmángilaĸ. sôrdlo ússatit 3:1-ime agdlagsimassoĸ: „ernínguara, inatsisíka puiornavêrigit, inássutíka ũmápit maleruardligit.“ atuartitavut bîbilip ĸanoĸ oĸarneranik ajoĸersortariaĸarpavut. tamánáináungilardle; ãmátaoĸ ajoĸersûtit ilumôrtut bîbilimĩtut ũmatáinut íkúneĸartariaĸarput. âp, ũmataisigut súnerniartariaĸarpavut ajoĸersugkavut ikuatdlajaitsunik píssusilersúsaguvtigik, ikiordlugit Jehova Gûtimut sángisûmik píssuseĸalerniarneráne.

3. (a) inuk ũmatâgut súnersínáusaguvtigo suna pivdlugo ajoĸersuitdlarĸíssuseĸ pissariaĸarpa? (b) sujúnersûtit atordluarsínaussut sangmititdlugit kíkut erĸarsautigissariaĸarpavut?

³ oĸáinarneĸ nãmagsissaĸarnigssamit ajornángíneruvoĸ. ũmataisigut súnersínáusaguvtigik „igdluliornerme“ sanâgssat erĸortut pissariaĸartĩnángilavut, ãmátaordle ajoĸersuitdlarĸíssuseĸ pissariaĸartitdlugo. (2 Timûtiuse 4:2) nãmángilaĸ atuartitavut sagdlusuíssúmik ilisimatĩnardlugit. ajoĸersuitdlarĸíssuseĸ atordlugo ikiorniásavavut erĸarsarnigssãnut ilíkagkatigdlo túngavigalugit erĸarsarĸigsârnigssãnut. imáingilaĸ uvagut píkoríssutsivta imalũnît ajoĸersueriautsivta anersãkut ineríkiartortísagait; Gûtip pivdluarĸussinerata ineríkiartortísavai. (1 Korintumiut 3:5, 6) taimáikaluartordle sujúnersûtit atuartitavta ũmataisigut súnerniarneráne ikiûtausínaussut matuma kingulîne sangmineĸásáput. sujúnersûtigissat tamáko sangmititdlugit atuartitatit — bîbilimik atuaĸatigissatit ĸitornatitdlo — erĸarsautigisínauvatit.

maligagssiuivdluarneĸ

4. (a) inungnik ũmataisigut súnîniarnermigut suna ilâtigut píssutigalugo Jesus taima angussaĸardluartigâ? (b) inungnik ajoĸersuinerme suna pivdlugo maligagssiuivdluarneĸ taima pissariaĸartigâ?

⁴ inungnik avdlanik ũmataisigut súnîniarníkut Jesus Kristusip maligagssiânit pitsaunerussumik maligagssaĸarsínáungilagut, ilâ? inungnik ũmataisigut súnîniarnermigut suna píssutigalugo taima angussaĸardluartigissarpa? ilâtigut píssutigalugo Jesusip ajoĸersûtigissaminik maleruainera, aulajaitsumik maligagssiuivdlune ajoĸersugkame maligagssãnik. (Juánase 13:15; 1 Pîtruse 2:21) taimáitumik sujúnersût sujugdleĸ imáipoĸ: maligagssiuivdluarit. túngaveĸardluartumik erĸarsarnerúngínerpa oĸásavdlune uvagut atauartugssamik píssuseĸásassugut kristumiorpalugtûssunik inuit avdlat ineríkiartortísagait kigsautigissavtínik? sôrdlo Jesusip navsuiarâ: „kinalũnît ajoĸersugauvdluartoĸ ajoĸersortimisut íkumârpoĸ.“ — Lúkarse 6:40, The New Berkeley Version.

5. bîbilime ĸanoĸ takutíneĸarpa maligagssiuivdluarnerup inungnigdlo avdlanik ũmataisigut súnîsínaunerup ataĸatigîngnerat?

⁵ bîbilime ĸavsêriardlune takutíneĸartarpoĸ maligagssiuivdluarnerup inungnigdlo avdlanik ũmataisigut súnîsínaunerup ataĸatigîngnerat. ássersûtigisigo: Môrsasip agdlagaisa tatdlimáine 6:6-ime takutitsiarneĸarpoĸ Jehovamik asangningneĸ angajorĸât „ũmámiugi“ssariaĸarât ĸitornamingnut ũmámiugerĸuvdlugo puiugaunavêrsârsínáusaguníko. (ússatit 20:7) tamatuma akerdlerdluínânik Jesusip farisîarit ilumôrtûssârniartut ukiune táukunane inûssut navêrpai ’oĸaraluardlutik taimailiortaríngingmata’. tauva tupingnángilaĸ inuiait táukua ũmatait „kivdligagssaujungnaer“mata, ilâ? — Matîuse 23:3; 13:13-15, NW.

6. ajoĸersûtigissatit maleruardlugit inûnigssat sôĸ taima pingârtigâ? (Rûmamiut 2:21-23)

⁶ taimáitumik ajoĸersuissup ajoĸersûtigissai ĸanoĸ-iliornerilo ingmingnut nâpertũtariaĸarput. una ássersûtigisigo: ivdlit kigsautigigagko atuartitavit ĸitornavitdlo Jehova asásagât táussumúngalo iluarinartíkusúsassut, tauva ĸinunigkut, oĸalungnigkut suliagkutdlo malugisínáusángínerpât ivdlítaoĸ Jehova asagit táussumúngalo iluarinartíkusugtutit? bîbilime najorĸutagssiat aulajangiutdlugit maleruaerĸigsârusungneĸ ũmámiugísagât kigsautigigagko, takorĸãsángínerpât ivdlit oĸautsigkut suliagkutdlo najorĸutagssat táuko uniorĸutíniartaríngínagkit? ajoĸersugkavta, pingârtumik ĸitornavta, suliavut maluginerussarpait oĸautsivut malugíngíneruvdlugit. atuartitavta takusínaugpatigut uvagut ajoĸersûtigissavut nâpertordlugit inûniartugut, tauva ũmataisigut súnersínaunerúsavavut.

aperĸutinik aperissarit

7, 8. (a) inungnik avdlanik ũmataisigut súnîsínaunigssavtínut suna angnertûmik aulajangîssûva? (b) suna pivdlugo aperĸutinik aperissarneĸ inuk ũmatâgut súnerniardlugo iluaĸutaussarpa?

⁷ sujúnersûtit áipât — Jesusip ajoĸersuinermigut angussaĸardluautigissâ — tássauvoĸ aperĸutinik aperissarneĸ. inungnik erĸarsalersitsinermut túngaveĸardluartumigdlo erĸarsarĸigsâlersitsinermut Jesus pitdlarĸivigsûvoĸ. (Matîuse 17:24-27) atuartitavtínik ũmataisigut súnîniarnivtíne angussaĸardluásanersugut aperĸutinik atuinigssarput aulajangîssûvoĸ. suna pivdlugo?

⁸ sujugdlermik, aperĸutinik aperissarníkut pâsisínauvarput atuartitavta ilíniagkane pâsivdluarnerai. imáikame: pâsíssutigssat pâsíngíkunigit ilagsinagitdlo, ĸanorme tauva ũmámiugisínáusavai? (Lúkarse 8:15) áipagssâ: ũmatâgut súnersínáusaguvtigo, suna ũmatânĩtoĸ pâserĸârtariaĸarparput. isumai aulajangiuterîgaussut ugperissailo kúkussut ímaĸa ũmatânut aulajaitsumik kisarsimáput. uvagut suna ũmatânĩtoĸ takusínáungínavtigo, aperĸutinik aperissariaĸarpugut bîbilimik atuartoĸ ũmámigut misigissane nangmineĸ oĸautsine atordlugit oĸautigerĸuvdlugo. matuma kingulînĩtut uko ássersûtigisigik.

9, 10. atuartup isumâta ĸanoĸ aperĸutigineĸarsínaunigssâ navsuiaruk.

⁹ oĸarta atuagkame pâratîsime nuname nâgssáungitsumik inûsínauvutit-mea kapitale 10, „anersâpiluit píssauneĸangârtut“-mik ĸuleĸutalik, atuarigse. ĸúpernerme 97-ime ingmíkôrtumut 18-imut kigdligpuse, aperĸutdlo naĸitigaĸ imáipoĸ: „anersârsiornermut atássuteĸarungnaerusugkune, kristumiut sujugdlît Efesusimĩtut maligagssiât suna maligkuniuk inuk silatusãsava?“ ingmíkôrtume agdlagsimassoĸ íssuardlugo ímaĸa atuartitarpit erĸortumik akísavâ, ilumigutdle ĸanoĸ misigâ? ímaĸa ukiorpagssuarne anersârsiortarpoĸ, anersârsiornerdlo ugperivdluínardlugo. taimaigpat, tauva mãnákut pâsivdluarnerpâ atássuteĸarfigiungnaertariaĸarine? ímaĸa aperissariaĸarpat: ’ivdlit tamána ĸanoĸ isumaĸarfigaiuk? pâsíssutigssat tamáko nangmineĸ inûningne ĸanoĸ iliordlutit maleruarsínauvigit?’ akíssúmigut ímaĸa erssersísavâ pâsíssutigssat ĸanoĸ angnertutigissumik ũmáminut súniuteĸarnerat.

¹⁰ avdla ássersûtigalugo oĸarta ĸitornat atuaĸatigigit atuagkame tássane kapitale 26, „erĸortumik iliornigssamut ilungersorneĸ“-mik ĸuleĸutalik, atuardlugo. ĸúpernerme 220-me ingmíkôrtup 8-p aperĸutertâ „b“ imáipoĸ: „isúmamik angutip inûsugtup oĸautigissânik sumik uvagut silatũsaguvta isumaĸásaugut?“ ímaĸa ĸitornat ingmíĸôrtup oĸausertai íssuaivfigĩnardlugit akerĸãsaoĸ, ĸamûna isúmane erssersíniarnago. ímaĸa itinersiortariaĸásautit aperalutit: ’ivdlíme? tamána ĸanoĸ isumaĸarfigaiuk? inûsugtup táussuma isumâ ivdlit isumatûtípiuk?’ imalũnît pisínaussoĸ taisínauvat: ’oĸarta atuarfingme inûsugtoĸatitit pujortartut ivdlitdlo pujortarĸugâtit. oĸarta takungnigtut ardlaliussut, pujortarumángínavitdlo ĸuiagssuautigilerâtit? ĸanoĸ iliúsagaluarpit?’ ĸajagssũssissumik misigingneĸataussumigdlo isumaliortauseĸardlutit, aperĸutit taimáitut ikiûtigalugit suna ĸitornarpit ũmatânĩtoĸ pâsiniarsínaussarpat.

11. (a) aperĸutinik aperissarnivtíne suna mianerssûtigissariaĸarparput? (b) suna pivdlugo pingârtumik angajorĸâjussut mianerssortariaĸarpat ĸitornamik kúkussumik isumaĸarnertik erssersíkângatigik? (Kulorsamiut 3:21)

¹¹ mianerssûtigssaĸarpordle. taima ítunik aperineĸarângamik ilâtigut akíssuteĸartásáput angajorĸâvisa tupâtdlautigissãnik imalũnît pakatsíssutigissãnik. tauva? pineĸartoĸ isumaĸatigĩngíssúmik kinguneĸarĸajâssarpat, ímaĸa pitsaunerúsaoĸ mêraĸ píngitsailiniarnago erĸortumik pâsingningniarnigssânut, oĸáinardlunile: ’ingerdláinaratdlarta. ardlãne tamána utísavarput.’ (Juánase 16:12) pingârtumik angajorĸât tamána mianerssûtigissariaĸarpât. ĸitornavse kúkussumik isumaĸarnitik erssersíkângatigik, misigíssutsise nunussariaĸarpase. ingmivsínut oĸalûtdluartarnerse aserornavêrsiuk. ĸitornarpit misigíssutsine isúmanilo erssersíniardlugit ĸunugilerpago, suna ũmatânĩtoĸ ĸanoĸ pâsiniarsínáusaviuk ikiorniardlugo?

Gûtip inatsisai maleruartásavdlugit ilisimássutaungmat ersserĸigsaruk

12, 13. (a) Gûtip inatsisainik maleruaivdlune ilisimássutaunera pâsiguniuk, suna pivdlugo atuartup ũmatânut súniuteĸásava? (b) suna pissariaĸásava atuartoĸ pâsitísaguvtigo Jehovamut nâlangnigssap silatusârnerunigssânik?

¹² sujúnersûtit pingajuat tássauvoĸ atuartitat ikiorĸuvdlugo Gûtip inatsisai maleruartásavdlugit silatússutaussoĸ pâserĸuvdlugo. (5 Môrsase 4:5, 6; 10:12, 13) tamána ũmatânut súniuteĸarsínauvoĸ. ĸanoĸ ilivdlune? pâsileruniuk Jehovap inatsisainik maleruaigune nangmineĸ iluaĸutigísagine, ímaĸa kivdlingneĸásaoĸ Gûte asásavdlugo táussumúngalo iluarinartíkusugdlune. — Tussiaat 112:1.

¹³ atuartitatit ĸanoĸ ikiorsínauvigit Gûtip inatsisai maleruartásavdlugit silatússutáussusianik pâsingningnigssãnut? tamána erssersísínauvarput Jehovap inatsisai agdlagartanut „isertoĸásángilaĸ“-mik agdlagsimassunut ássersûtdlugit. agdlagartap oĸausertai nangmingneĸ mianerssorĸússutaugaluarput; oĸásángínerpitdle mianerssorĸússúmut suna píssutaussoĸ agdlagsimagaluarpat nâlagkuminarnerúsassoĸ? ássersûtigalugo agdlagartame agdlagsimagpat „isertoĸásángilaĸ — elektricitetip sarfâ sákortôrujugssuaĸ“, tauva uniorĸutitsivdlune iserniaraluartup navianartorsiorsínaunigssane pâsilerdlugo mianerssorĸússut maleruarumanerúsavâ.

14. (a) ĸanoĸ oĸardlutit atuartitat túngaveĸardluartumik erĸarsartíniarsínauviuk pâsitíniardlugo ĸanoĸ-iliornigssap aulajangersimassup silatusârnerunigssânut imalũnît silaitsunerunigssânut píssutaussumik? (b) agdlagsimavfît sût takutípât pissariaĸássusia ĸanoĸ-iliornigssap ajúngíneranut ajorneranutdlũnît suna píssutaussoĸ taissásavdlugo?

¹⁴ Gûtip inatsisáisaoĸ taimatut navsuiarneĸarsínáuput. atuartitat oĸarfigĩnásángilat bîbile nâpertordlugo sût erĸortûssut sûtdlo erĸortũngitsut; ikiúsavat pâserĸuvdlugo suna píssutigalugo ĸanoĸ-iliornigssaĸ aulajangersimassoĸ silatusârnerúsassoĸ silaitsunerúsavdlunilũnît. túngaveĸartumik erĸarsartíniaruk Gûtip inatsisainik maleruainigssaĸ ĸanoĸ iluaĸutigísagâ. ikiorniaruk pâserĸuvdlugit piumassanik tamákunínga sumigínainigssap kingunigssaralue. ĸanoĸ-iliornerup kingunigssaralue bîbilime ĸavsîtigut erĸartorneĸartarput. nangmineĸ atuariákit ússatit 22:24, 25; 23:4, 5; 24:15, 16, 19, 20. malugeriaruk tamákunûnatigut tamatigut ĸanoĸ-iliornerup ajúngitsûnigssânut ajortûnigssânutdlũnît suna píssutaussoĸ taineĸartarmat.

15. aperĸutit bîbilimilo agdlagsimavfît atuarĸussat ingmíkôrtume uvanĩtut atordlugit perĸuserdlungneĸ kángunartuliornerdlo pivdlugit Gûtip oĸausînik maleruainigssap silatússutaunera navsuiaruk.

¹⁵ tamána ersserĸingnerussumik navsuiarniardlugo, erĸarsautigeriaruk aperĸutit agdlagsimavfîtdlo atuarĸussat matuma kingulînĩtut Gûtip inatsisainik maleruainigssap silatússutaunera ĸanoĸ ersserĸigsarât.

sagdluneĸ, tigdlingneĸ: suna píssutigalugo perĸuserdlungneĸ ajoĸutauva? (ússatit 15:27; 20:10; sarĸúmersitat 21:8) inungnut avdlanut iliûserissartagkavtíne perĸusersuíneĸ suna pivdlugo ingminut akilersínauva? (ússatit 3:3, 4; 12:19; Eprîarit 13:18)

kángunartuliorneĸ: kángunartuliorneĸ ĸanoĸ ajoĸutigisínauvarput? (ússatit 5:9; 7:21-23; 1 Korintumiut 6:18) inungnut avdlanut ĸanoĸ ajoĸutausínauva? (1 Tásalûníkamiut 4:6; 1 Korintumiut 5:6; Eprîarit 12:15, 16) bîbilime ilerĸugssatigut najorĸutagssat maleruarugkit sutigut iluaĸutigísaviuk? (ússatit 5:18, 19; Eprîarit 13:4)

taimailiorníkut atuaĸatigissat ikiorniarêrugko bîbilime inatsit túngaveĸartumik erĸarsautiginigssânut, aperisínauvat: ’isumaĸarpit Jehovap uvavtínut iluaĸutaunerpaussugssaĸ soĸutigigâ? isumaĸarpit Gûtip inatsisaisa ajúngitsumik sumigdlũnît arsãngíkâtigut?’

16. taimaisiorníkut túngaveĸardluartumik erĸarsarneĸ atuartitangnut sumik súniuteĸarsínauva?

¹⁶ atuaĸatigîgtitdluse aulakôrneĸ, akilerârneĸ, pujortartarneĸ, auk pivdlugo aperĸut taimaeĸataitdlo pivdlugit Gûtip inatsisai túngaveĸartumik erĸarsautigissarsigik. taimailiorníkut atuartitat imalũnît ĸitornat pâsitíneĸásaoĸ Gûtip inatsisaisa tamarmik uvavtínut iluaĸutaunigssãnik. imáingilaĸ Gûtimut nâlangnigssamut patsisaussunik tamatigut navsuiáuneĸartariaĸásassoĸ. ilâtigutdle tamákunínga navsuiáuneĸartarune ũmámigut súnerneĸásaoĸ, kivdlingneĸásavdlunilo Gûtimut iluarinartíkumanigssaminut. tauva „ingneĸ“ nagdliutilerpat, tássa misilingneĸalerune, Gûtip oĸausînik maleruainigssamut piarêrsimásaoĸ. — 1 Korintumiut 3:13.

ikiúkit Gûte ilisarerĸuvdlugo

17. ãma suna sujúnersûtigineĸarpa atuartitangnik ũmatâgut súnîniarningnut ikiûtausínaussoĸ?

¹⁷ sujúnersûtit sisamât imáipoĸ: atuartitat ikiorniaruk Gûte ilisarerĸuvdlugo. (Juánase 17:3) Jehovap piunerínânik ateĸarnerínânigdlo pâsitíniarnago, ãmátaoĸ atuartitat ikiorniaruk Jehova nangminêrsumik ilisarerĸuvdlugo. tamána ũmatânut súniuteĸásaoĸ, Jehovamingme ilisarssissup ãmátaoĸ asásavâ.

18. atuaĸatigîgtitdluse ĸanoĸ ilivdlutit Jehovap píssusê uparuartorsínaussarpigit?

¹⁸ atuartitat ĸanoĸ ikiorsínauviuk Jehova nangminêrdlune ilisarerĸuvdlugo? kinalũnît asasínáungilarput kisiáne píssusê avĸutigissailo ilisimaguvtigik aitsât. tauva atuaĸatigîgtitdluse atuartitat Jehovap píssusînik naleĸángitsunik uparũssoruk. suna oĸalûserineĸaraluarpatdlũnît tamáko uparuarneĸartarsínáuput. ássersûtigalugo: utertitsíssut oĸalûserititdlugo tugdluarpat unigkatdlarsínauvutit aperĸutigalugulo: ’utertitsíssúmik sulíssutigingningnerup Jehovap uvavtínik asangningârnera ĸanoĸ erssersípâ?’ imalũnît: Gûtip ajússutsimik atûtititsinerata oĸaloĸatigĩssutigineĸarneragut, aperĸutigisínauvat: ’inuit ajússusiata atũnerane Jehovap kamagingningârnine ĸanoĸ ilivdlugo erssersípâ?’ imalũnît: ’Edenime pikigtitsinermut agtûmássuteĸartumik Jehovap naleĸángitsumik ilisimatússutse ĸanoĸ erssersípâ?’ taimatut túngaveĸardluartumik erĸarsarniarníkut atuartitat ikiorneĸásaoĸ Jehovamik ĸamûna asangningneĸ ineríkiartorterĸuvdlugo. Jehova isumaĸarfigiartúsavâ kináussusiligtut asanartunik kajungernartunigdlo píssusiligtut.

19, 20. (a) ãma suna pissariaĸásava Jehova nangminêrdlune ilisariniarnerane? (b) misigisimassap ingmíkôrtume oĸalugtuarineĸartup ĸanoĸ takutípâ ĸinuníkut maligagssiuivdluarnigssap pissariaĸássusia?

¹⁹ tamatuma saniatigut, kinalũnît ilisarivdluarsínáungilat ĸanordlũnît iliorníkut atássuteĸarfigíngíkugko. taimatut atuartitat Jehovamut nangminêrdlune píssuseĸarsínáungilaĸ atássuteĸarfigineĸ ajoruniuk. tamána nalúngínagko, atuartitat ajoĸersortariaĸarpat ĸanoĸ ĸinusínaunigssânik. pâsitíniaruk ássigĩngitsorpagssuarnik nalerĸútumik ĸínutigineĸarsínauneranik. (1 Juánase 5:14) pingârtitsilersíniaruk Jehovap ĸínutinik tusarsínáussusianik nãmagsingnigsínáussusianigdlo. (Tussiaat 65:3) kajumigsâruk ilordlíkut misigíssutsine erssersítarĸuvdlugit, ’ũmáne Jehovamut angmarĸuvdlugo’. — Tussiaat 62:9.

²⁰ tamatumûnákútaoĸ ivdlit maligagssiat pingâruteĸarpoĸ. Gûtimik asangningârnerit ĸinunigkut erssersítarpiuk? taimailiortaruvit atuartitangnut, ãmátaoĸ ĸitornangnut, iluaĸutauvdluínartumik súniuteĸarsínauvoĸ. misigisimassaĸ matuma kingulîne agdlauserineĸartoĸ erĸarsautigeriaruk.

ukiut ardlagdlit matuma sujornagut áiparît kristumiut ernertik pingasunik ukiulik ajoĸersorpât ĸanoĸ ĸinusínaunigssânik. únuit ilãne, Jehova ĸínuvigerêramiuk anânane atâtanilo pivdluarĸorĸuvdlugit, nukagpiarĸap Jehova ĸínuvigâ „Wally“ pivdluarĸorĸuvdlugo. „Wally“ kinauva? angajorĸâvisa naluvât, nukagpiarĸavdlo „Wally“ ĸínútuáinarpâ! kîsalo, tupigusûtigingâtsiarêrdlugo, suna pisimassoĸ pâsilerpât. nukagpiarĸap ĸatángutit Malawimĩtut (taimanime malerssugaungmata) ĸínútarpai, tainerdlugdlugule taissarpâ „Wally“. una píkunartortarâ: nukagpiarĸap angajorĸâne taimatut ĸínússissut tusartarpai, maligagssiuivdluarneratdlo maligdlugo. angajorĸâvisa nuánângãssusiat takordlôriaruk!

tamatumûna ersserĸigsarneĸángínerpa maligagssiuivdluarnerup ĸanoĸ pingâruteĸássusia inuit avdlat ĸanoĸ ĸinúsassut ajoĸersorneráne?

akigssarsiagssaĸ

21. (a) Korintumiunut agdlagkat sujugdlît 3:14, 15 nâpertordlugo, ivdlit sanassutut kristumiutut sumik neriûtigssaĸarsínauvit? (b) „akigssarsiagssaĸ“ tássauva Gûtip ârĸigssũssinigssâne nutâme inûneĸ nâgssáungitsoĸ? navsuiaruk.

²¹ taimáitumik inungne avdlane píssutsinik ikuatdlajaitsunik ineríkiartortitsísaguvta, ikiordlugit Jehovamut ajúngitsumik píssuseĸarniarneráne, ũmataisigut súnertariaĸarpavut. oĸitsũngíkaluarpoĸ, akigssarsiagssamigdle nagsásavdlune. Paulusip tamána takutitsiarpâ oĸarame: „kialũnît suliâ tássunga ĸarmagâ atagpat táuna akigssarsísavoĸ; kiale suliâ ingnermit nungúneĸarpat [sananerdlugkame, sanâgssat ikuatdlajaitsut atornagit] táuna angilugtorumârpoĸ [tássa, ĸarmagâ „ingnerme“ nungúsaoĸ]; nangminerdle ánásavoĸ, kisiáne sôrdlo ingníkut.“ „akigssarsiagssaĸ“ sunauva? Paulusip pínguatsiarpâ Gûtip ârĸigssũssinigssâne nutâme akigssarsiagssamit inûnigssamit nâgssáungitsumit avdlaussoĸ, malugeriarungme sananerdlugsimassoĸ angilugtorumârtoĸ, nauk nangmineĸ ímaĸa ánagkumârdlune „ingníkut“ angussigune. — 1 Korintumiut 3:14, 15.

22, 23. (a) ĸatángutine kristumiut Thessalonikamĩtut pivdlugit apustile Paulusip suna akigssarsiarâ? (b) „akigssarsiagssaĸ“ suna ivdlit kigsautigingârpiuk, ĸanordlo ilivdlutit pisínauviuk?

²² tauva „akigssarsiagssaĸ“ sunauva? Paulusip Thessalonikamĩtut agdlagfigigamigit erĸartugâ pâsíssutigssîsínauvoĸ. kristumiut malerssugaussut tássane najugaĸartut agdlagfigalugit Paulus oĸarpoĸ: „kiname-una neriûtigssarput tipaitsûtigssarputdlũnît niaĸorutigssarputdlũnît usornautigssaĸ? ilivsísaoĸ taimáingínerpise Nâlagkavta Jîsusip Kristusip sâne tikiuvfigssâne? ilivsime atarĸinautigalusilo tipaitsûtigâvse [usorssisimârutigalusilo tipaitsûtigâvse, Today’s English Version].“ (1 Tásalûníkamiut 2:19, 20) thessalonikamiut táuko Paulusip sagdlusuíssutip avĸutânut avĸutigssiũsimavai. ãmalo nauk autdlartínermingníngãnîtdle malerssugaugaluardlutik, aulajáiput. Paulusip akigssarsiarâ nauk malerssugaugaluardlutik aulajaitsûssut takuvdlugit tipaitsûtigalugo. tamána erssiutauvoĸ Paulusip sanavdluarsimaneranut.

²³ uvavtíne taimáipoĸ. ũmatíkut ilũngardlutit kigsautigíngiliuk atuartitatit ikiorumavdlugit píssutsit kristumiorpalugtut atauartugssat ineríkiartorterĸuvdlugit ússerniarneĸarnigssamingne tatineĸarnigssamingnilo aulajáinigssamingnut ikiûtausínaussut? akigssarsiap ila angíssusia bîbilimik atuartitavut ĸitornavutdlo takúsavdlugit ingníkutdlusôĸ misilingneĸarnermingne aulajaitsut! tamána sanavdluarsimanermut erssiutauvoĸ. tamána akigssarsiaritigo erĸortoĸ túngavigalugo sanâgssatdlo ikuatdlajaitsut atordlugit sanavdluta, Jehovamut utarĸivdluta ilungersornivtínik pivdluarĸussinigssâ ilimagalugo! (wD 1/11 84)

inuk ũmatâgut súnerniardlugo pissariaĸartut uko erĸaimavigit?

□ suna pivdlugo maligagssiuivdluarneĸ pingâruteĸarpa?

□ aperĸutit ĸanoĸ ítut iluaĸutaussarpat, sunalo pivdlugo?

□ Gûtip inatsisai maleruartásavdlugit ilisimássutaungmat suna pivdlugo atuartup tamána pâsissariaĸarpâ?

□ suna pivdlugo atuartup ĸinusínaunigssaĸ ilíniartariaĸarpâ?

[Quppernerup ataani ilanngussaq]

[Qupp. 13-mi assiliartaq]

Gûtimik asangningârnerit ĸinuningne erssertarpa? tamána ĸitornarpit ũmatânut súniuteĸarsínauvoĸ