Jesusip inuunera ajoqersuineralu

Jerusalemimukartarnerit

UPERNALERPOQ. Piffissanngorpoq Josefip ilaqutaasalu, ikinngutitik eqqarlitillu ilagalugit, pisarnermissut poorskisioriartorlutik Jerusalemimukarnissaannut. Kilometerit 100-t sinnilaarlugit isorartutigisoq angalaffigissallugu aallaramik tamarmik pisarnermissut pissangarrapput. Jesus, taamani 12-inik ukioqarluni, poorskisioriartornissartik qilanaareqaa, immikkut pissuteqarluni.

Tassami Jesusimut ilaqutaanullu poorski ulloq ataasiinnaanngilaq. Aamma ullut arfineq-marluk tulliuttut Jerusalemimiikkallartarput, ulluni seernaqanngitsunik timiusartorfiusuni, poorskimut atasutut isigisaminni. Najukkaminnit, Nazaretimit, Jerusalemimut utimullu angalanerat aammalu Jerusalemimiinnerat sapaatip akunnerisa marluk missaanni sivisussuseqarajuttarpoq. Kisianni ukioq manna Jesusimut pisimasoq pissutigalugu sivisunerulaarpoq.

Jerusalemimit angerlamut aqqutaani ajornartorsiut saqqummerpoq. Josefip Mariallu naatsorsuutigaat Jesus ikinngutit ilaquttallu angalaqataasut akornanniissasoq. Kisianni unnuissallutik unillatsiarneranni Jesus takkutinngilaq. Taamaattumik angalaqatimik akornannut ujarlugu aallartipput. Kisianni nanisinnaanngivippaat. Taamaattumik Josef Marialu ujarniarlugu Jerusalemimut utertariaqarput.

Ulloq tamaaviat ujaraluarpaat, naninaguli. Aqaguani aamma naninngilaat. Kiisamili ullut pingajussaanni naalaffissuarmut iserput inillu ilaanni Jesus nanillugu. Juutit ajoqersuisuisa akornanni issiavoq tusarnaajutigaluni aperisarlunilu.

„Ernera, sooq taama pivisigut?“ Maria oqarpoq. „Ataatavit uangalu erloqilluta ujarpatsigit.“

Sumiinnini nalusimagaat paasileramiuk Jesus assut tupaallappoq. „Sooq ujarpisinga?“ aperai. „Nalugassinga ataatama pii najussagikka?“

Jesusip tupigusuutigaa angajoqqaami sumiinnini naatsorsuutigisinnaasimanngimmassuk. Soorunamili angalaqatigivai pisarnermisullu naalallugit. Ilisimassutsimigut timimigullu alliartuinnarpoq aammalu Guutimit inunnillu iluarisaanera siuariartorluni. Aap, meerannguunerminiilli Jesus maligassiuilluartuuvoq. Anersaakkut tunngasunik ujartuinermiguinnaanngitsoq aammali angajoqqaaminut ataqqinninnermik takutitsinermigut. Lukas 2:40-52; 22:7. (wD 15/8 85)

◆ Upernaat tamaasa Jesus ilaquttani ilagalugit sumut angalaartarpat, qanorlu sivisutigisarpa?

◆ Jesus 12-inik ukioqartoq taamatut angalaneranni susoqarpa?

◆ Ullumikkut inuusuttunut Jesus sukkut maligassiuiva?