Nakussatsippugut qasusoornatalu
’Qasusoq nukittorsartarpaa, piginnaanngitsullu nukingi amerlisittarai.’ — Isaia 40:29.
1, 2. Marathonimi arpattut kristumiullu suut assigiissutigaat?
1984-IMI oktoberip ulluisa ilaanni ullaakkut inuit 16.000-it immatut isillutik New Yorkip aqqusernginut isaasorsuupput unammillutik arpaliukkiartorlutik. Arpaliunneq taanna marathonimik taaneqartartoq kilometerinik 42-t sinnilaarlugit takissuseqarpoq. Ukiup taamaalineranut naleqqiullugu ukiap ulluisa ilaanni tassani pissusissamisuunngitsumik kiappoq. Kiangaarneq silaannaallu isugutaneqangaarnera arpattut nukeerussutigaat, arpattuarsinnaassusiatalu sakkortuumik misilinneqaatigaa. Arpattartut sungiussisimanersaasa allaat arpaliunneq taanna ilungersuutigalugu nukillaarutigaat. Ilarpassui qasusoorput arpakkunnaarlutillu; ilaasa 2000-ingajannik amerlassusillit arpaliunneq naammassinngitsoorpaat. Arpaliunneq naallugu arpattut pissutsit artornaqisut anigorniartariaqarpaat.
2 Aamma kristumiut arpaliupput. Akissarsiassaq sunaava? Inuunissaq naassaanngitsoq. Marathonimilu arpaliuttartut assigalugit taakku killiffissaq tikiutserlugu ilungersortuaannartariaqarput. Qasusuittariaqarput. Nakuussusertik attattuartariaqarpaat nukillaarnaveersaartariaqarlutillu. Arpaliunneq inuunermik akissarsiassaliusoq isorakitsuunngilaq, taassaaneruvorli ungasissumut arpanneq. Paulusip uppeqatini Korinthimi najugaqartut ima allaffigai: ’Arpaliuttarfimmi arpattut ilisimanngilisigik tamarmik arpakkaluartut, ajugaasulli pisassaa ataatsip pisaraa? Taama arpagitsi pisaariumallugu.’ (1 Korintumiut 9:24) Kristumiut arpattarput ilungersornartumik arpanneq naammassiumallugu. — Lúkarse 13:24.
3. Qanoq iliorunik aatsaat kristumiut arpaliunnerup naammassinissaata tungaanut tamaviaartuarsinnaassappat?
3 Immaqali una eqqarsaatigivat: ’Inoqarnerpa taama tamaviaartigisumik arpattuaannarsinnaasumik arpaliunnerup naanissaata tungaanut?’ Arlaannarpulluunniit nammineq nakuussuserput nakuussutigalugu taamaaliorsinnaanngilaq. Akissarsiassaq angussagutsigu tamanik nakuussutissiisoq nukissaqartitsisorlu, Jehova Guuti, pissaateqarfigisariaqarparput. — Jûpe 36:22; Tussiaat 108:13 .
Jehova — tamanik nakuussutissiisoq nukissaqartitsisorlu
4. Pruffiitip Esajasip oqaasii naapertorlugit, Jehovap kiffaminik napatitsisinnaassusia suna pillugu qularissanngilarput?
4 Qularutissaanngivissumik Jehovap kiffani atatissinnaavai. Pruffiitiutitani Esajas oqalutsillugu, Ajugaqanngitsup piginnaassutsimi killeqanngissusii suliamilu angingaartut naleqanngissusii oqaluutigai. ’Isisi aarlortissigik qummut takuniarlusilu,’ oqarpoq. ’Kia makku pinngortippai perpassui anisittarlugit amerlassusiisigut? Tamaasa aqqisigut taasarpai; piginnaanera angingaarmat, nukingalu pissaangaarmat, maqaasinartoqanngillat. . . . Ilisimanngilatit? Tusanngilatit? Isuanit Guutiuvoq Jehova nunap isuinik pinngortitsisoq; qasusinnaananilu nukillaarsinnaanngilaq, siuneqarsusia siunersineqarsinnaanngilaq.’ — Isaia 40:26-28.
5, 6. Jehovap killisissaanngitsumik pissaaneranut ersiutaasut ilaat taakkit.
5 Pinngortitat minnerpaartaanniit annerpaartaannut Jehovap pinngortitsinermut pissaaneqassusianik mianernangaartumik ersersitsipput. Eqqarsaatigeriartigik sananeqaatit piusut tamarmik uaguttaaq sananeqaatigisavut — atomit. Ima mikitigigamik kuseriarneq ataasiinnaq 100 trillioninik atomertaqarpoq. Uppernanngitsuusaaraluarpalluunniilli atomit tangertaat ima tangeqartigipput ataatsikkut anillatsinneqaraluarunik qaartitsisinnaasunik nunamilu itersarsuanngortitsillutik 100 meterinik itissusilimmik aammalu 400 meterinik atitussusilimmik, soorlu ilaani taamatut pisoqarsimasoq.
6 Angissutsit isuata illuani seqineq taasinnaavarput. ’Atomip nukinga atorlugu nukissiorfik’ angisupiloorujussuup tonsinik arlalinnik milliardilinnik oqimaassusillup taassuma ullorissat seqineqarfitsinniittut tamaasa kissassarpai. Seqernup nukissaq atominit mikisuarannguusunit aniasoq ikummatigaa. Naak nunami uumassusillit — naasut, uumasut inuillu — tamarmik nukissaq nukissiorfiup angisupiloorujussuup qilammiittup taassuma pilersittuaannagaa pinngitsoorsinnaanngikkaluaraat, seqernup nukiliaata ilamininnguaannaa nunamut annguttarpoq. Tamannali uumassusillit uumassuseqartuarnissaannut naammappoq. Atuakkiamini Astronomy-mi ullorissanik ilisimatooq Fred Hoyle ima allappoq: „Seqernup nukiliaata ilamininngua annikitsuaraq nunamut annguttartoq — hundredbillioninngorlugu aggornernut tallimanut missiliuunneqartoq — nukingup silarsuup suliffissuini tamani atortup angissusianit 100.000-eriaammik angineruvoq.“
7. Pissaaneq Jehovap pinngortitaani ersiutaasoq eqqarsaatigeqqissaareerlugu, Jehova qanoq isumaqarfigissavarput?
7 Kisiannili ulloriaqatigiippassuit ataatsimoortut nunap matuma ilagisaasa, tassa qilaap silliata, ulloriartaasa arlalinnik milliardillit seqineq ilaannaraat — ullorissanulli allanut naleqqiullugit seqineq angivallaanngilaq. Aammalu, ullorissanik ilisimatuut missiliuussineri naapertussagaanni, silarsuup avataani ilisimaneqartumi ulloriaqatigiippassuit ataatsimoortut 100 milliardinik amerlassuseqarput. Tamanna paasineqarsinnaanngingajappoq. Tupinnanngilaq Job, Jehovap qanoq ’kisimi qilak isuitikkaa’ eqqarsaatigeqqissaareeramiuk, oqartoq Jehova ’malunnangaartuliortartoq siunersissaanngitsunik tupinnartuliorlunilu kisissaanngitsunik’. — Jûpe 9:8-10.
Jehovap pissatsissinnaavaatigut
8. (a) Kikkut kisimik Jehovap pissaanera tamakkiisumik pissarsiffigisinnaavaat, sunalu pissutigalugu? (b) Suna pillugu neriorsuut Isaia 40:29-31-mi allassimasoq uppernikkut nakussatsinnarpa?
8 Jehovap pallorfiginnittaasa ilumoortut nakuussutissiisoq nukissaqartitsisuusorlu tamanik pinngortitsisoq atatitsisorlu taanna akornuserneqarnatik tamakkiisumillu pissaaneqarfiginiarsinnaavaat. Jehovap kiffai ’anersaavagut iluartukkut nukittortinneqarsinnaapput’, nukissaqarnermilu ajornartorsiuteqarnissaq siooragisariaqarnagu. (Evfisumiut 3:16; Tussiaat 84:5, 6) Imaakkami: inuussutissaq anguniarlugu arpaliunnermi apuulluarsinnaavugut aatsaalli tatiginnilluinnarutta Guutip assaata pissaanilissuup killiffissamut apuulluartissinnaagaatigut. Taassuma inuummarissarsinnaavaatigut. Soorlu pruffiitip Esajasip Jehova oqaatigigaa: ’Qasusoq nukittorsartarpaa, piginnaanngitsullu nukingi amerlisittarai. Inuusuttuaqqat qasusarput nukillaarlutillu, nukappissallu aqullaarluinnartarput; Jehovamilli utaqqisut nukisik nutaanngortittarpaat, qutsissiartortarput nattorallup suluinillusooq, arpapput nukillaassanatik, ingerlapput qasussanatik.’ (Isaia 40:29-31) Oqaatsit taakku atuaannaraluarlugit anersaatsigut qiimmallaatigisinnaavavut!
9. Ajornartorsiuteqaraangatta ’qaqqatut’ angitigisunik, Jehovap qanoq ililluni ikiorsinnaavaatigut?
9 Ajornartorsiuteqaraangatta anigorneq ajornartutut isumaqarfigineqarsinnaasunik eqqortumillu guutisiornermik ilungersussusitsinnik akornusiisinnaasunik, pissaanikitsutut pingaanngitsutullu misigisinnaavugut. Isumatsassanngilagulli. Ataatarput qilammiusoq ajugaqanngitsoq saaffigisinnaavarput. Taassuma neriuffigisi tamaasa nukittorsartarpai. Atomimik Pinngortitsisup innuttani nakuussutissamik nukissaqartissinnaannginnerpai ajornartorsiutinik qaqqatut angitigisunik anigortitsiniarnissamut naammattumik? Ilaana! — Mákorse 11:23.
10. (a) Kristumiut arpattut suut qasussutigisinnaavaat? (b) Satanip qanoq iliortikkumavaatigut?
10 Aappaatigulli kristumiut ilaasa silarsuarmiut ileqqoreqqusanik kristumiorpaluttunik saqqumisumik sumiginnaasut tatisineri akiorniarlugit ullut tamaasa ilungersortuaannarnertik ima qasussutigisimatigigamikku assoroorunnaarsinnaapput, immaqaluunniit inuunissaq anguniarlugu arpaliunnermi arpakkunnaarluinnarsinnaallutik. Napparsimaneq, aningaasatigut ajornartorsiorneq, ilaqutariinni ajornartorsiutit, kiserliorneq, imaluunniit ajornartorsiutit allat nikalluutaasinnaapput. Kristumiullu nikallorsimaneq nukeerussutiginasuarsinnaavaa, soorlu marathonimi arpattup kiangaarneq nukeerussutiginasuarsinnaagaa. Akerarsuup, Satanip Diaavulup, taamaattut sakkugisarpai Jehovamik kiffartuussisutut assuarnaassuserput aserorniarlugu. (1 Pîtruse 5:8) Taamaaliorniarneragut Diaavulu iluatsitsisinnaveeruk! Ulloriaqatigiippassuarnik ataatsimoortunik kisissaanngitsunik qilammiittunik Pinngortitsisoq saaffigisaruk taanna anersaakkut nukittorsarfigalugu. Jehovap atatissinnaavaatit. — Tussiaat 37:17; 54:6.
11. Davidip ajornartorsiutiminik aniguiniarnera sumik ilinniarfigisinnaavarput?
11 Ajornartorsioraangami Davidip Jehova nakussatsissutissarsiorfigisarpaa. Anersaamit iluartumit inuummarissagaagaangami Davidip assortorneqarneq qanoq ikkaluartorluunniit anigorluarsinnaasarpaa. Oqarpoq: „Illit ikiuinikkut qarmat aseruavakka, guutima ikiuineragut qarmaliat pitoraaffigaakka.“ David oqarportaaq: „Guutip ilagippatigut ajugaassaagut, akeqqavut tummaarissavai!“ (Tussiaat 18:30; 60:12) Illittaaq pillutit Jehova taamaaliorsinnaavoq.
Anersaakkut qasusoorneq akiorniaruk
12. (a) Suna pillugu anersaakkut qasusoorneq erniinnaq akiorniarneqartariaqarpa? (b) Anersaakkut qasusoornerup suut malunniunnerai? (c) Anersaakkut qasusoortut uummarissarneqarnissaannut Jehovap suut periareersareersimavai?
12 Anersaakkut qasusoornerup malunniunneri maluginasuartariaqarpavut, taavalu erniinnaq iliuuseqarniarluta akiorniarlugit. Suna pillugu? Amerlanngitsummi ’isertarfikkut nerukitsukkut iserumallutik assoruunniartut’, tassa arpattartut unammisuni killiffissamik qaangiisut, kisimik akissarsiassaq inuuneq naassaanngitsoq pissavaat. (Lúkarse 13:24; Filípimiut 3:12, 13) Ungalusami matumaniittumi qulequtalimmi „Anersaakkut qasusoorneq qanoq akiorniarneqarsinnaavoq“-mi allassimasut misissoriartigit. Malunniunnerit ilaat ilinni eqqarlivilluunniit ilaanni malugisimavigit? Taamaappat, erniinnaq iliuuseqalerit aaqqiissutissaa sulissutiginiarlugu. Anersaakkut uummaarissutsit tigoqqinniaruk Jehovap periarfissiai pissatsissutigalugit.
13, 14. (a) Kikkut maligassiaat qiviarutsigit anersaakkut nukittorsinnaassaagut? (b) Jehovamik sivisuumik kiffartuussisimasuusup siunnersuutai suut malikkutsigit arpattuarsinnaassaagut?
13 Qasusoorajunneq akiorniarsinnaavat Guutip kiffaasa ajugaasimasut Bibelimi oqaluttuarineqartut maligassiaat malinniarlugit. Angutit arnallu, inuusuttut utoqqaallu, inuunertik naallugu aalajaatsut amerlaqaat. Taakku pillugit Allakkani Illernartuni, soorlu Eprîarinut agdlagkane 11:4-40-mi, atuarsinnaavutit. Aammalu ukiuni nutaanerusuni qatannguterpassuaqarpugut asaneqartunik angutinik arnanillu Jehovamik qasusuillutik kiffartuussiuartunik.
14 Kristumiutut qasusoornani arpattuartutut taaneqarsinnaavoq George, USA-p kujataata tungaani najugaqartoq. Inuuneq naassaanngitsoq anguniarlugu ukiut 50-it arpareerluni, suli arpaleruttorpoq. Sumik siunnersorumavaatigut?
„Ilungersuillunga oqarusuppunga: Kattuffissuaq attavigeqqissaarsiuk. Eqqaamaniarsiuk Jesus Kristus, Jehovamit toqqagaagami, Kattuffissuarmik aqutsisuusoq. Taamaattumik qanittumik eqqarliusoq ikinngutaasorluunniit tunussissappat, nikalloqinak. Paasilluanngisaqaruit imaluunniit upperiuminaatsoqarlutit, aaqqinneqarumaartoq isumalluarit. Jehovap peqatigiissortaasa manna tikillugu ingerlatilluarpaatigut. Aaqqissuussinissamut nutaamut apuulluartissagaatigut tatigikkit.“ — Juánase 6:66-68.
15. Inuit allat maligassiuilluartut qanoq ililluta ilinniarfigisinnaavavut anersaakkut inuummarissiniarluta?
15 Immaqa sivisuumik Nalunaajaasuusimasut ilumoortut ilaat ilissi ilagiississinniipput — imaluunniit ataatsimeersuarnerni naapinniarsinnaavatit. Oqaloqatiginiartigit. Ilinniarfiginiartigit. Qatanngutit angutit arnallu ilumoortut ilaasa inuunermi misigisaat Årbogen-imi, Napasuliaq Alapernaarsuiffik-mi aammalu Vagttårnip peqatigiiffiata naqitertitaani allani saqqummersinneqartarput. Oqaluttuat taamaattut atuartarniakkit. Inuit allat misigisimasaat qanoq pissatsissutigisinnaaneritit eqqarsaatigiuk.
Utoqqaanertaasusi pissatsitsisaritsi
16. (a) Ilagiinni utoqqaanertat qanoq ilillutik kristumioqatitik ikiorniarsinnaavaat nukittoqqullugit? (b) Utoqqaanertat kajumissaarinerminni unnersuussinerminnilu suna mianersuutigisariaqarpaat?
16 Pingaartumik ilagiit utoqqaanertaat ilagiinnut ilaasortat qasusoorajuttut ikiorniarlugit piareersimasariaqarput. Isaia 35:3-mi unnersuussuteqarluarpoq: ’Pissatsissigik assaat nukillaartut, seeqqullu aqullaartut nakussatsissigik.’ Illit utoqqaanertaasutit qanoq ilillutit taamaaliorsinnaavit? Alapernaarsuilluartarit. Ilungersorunnaariartornermut suna pissutiviusoq paasiniaruk. Bibelimik tunngaveqartunik, atorluarsinnaasunik, inummut ikiorniakkannut tulluartunik siunnersuuteqarniartarit. Mianersorilli. Qatanngutit kajumissaarniassavat, sapiissuseerutinniarnagu.a Illit tarnikkut nalunngeqatiginnissutsit naapertorlugu suut ajunngitsuusut suullu ajortuusut maleruaqqullugit inanniaqinagu; inuk ikiorniakkat pinngitsaaliniarnaveeruk aaqqiissutissaq illit iluarisat atoqqullugu; illit nammineq isummat ilassiumanngippagu kristumiutut inersimalluartuunngitsuunerarnaveeruk. Utoqqaanertat siunnersuutitik kajumissaarutitillu Bibelimut tunngaveqartittariaqartarpaat. Arpaqatitik kigaallisikkumanavianngilaat ilagiit tungaanninngaanniit malittarisassarpassuarnik pisariaqanngitsunik nanertorlugit. — Matîuse 11:28, 29; Matîuse 23:2-4-mut naleqqiuguk.
17. Satanip kristumiut tamaviaarunnaarsinniarlugit periaasii akiorniarlugit utoqqaanertat qanoq iliorsinnaappat?
17 Kristusimik malinnittutut utoqqaanertat maligassiuilluarsinnaapput ilagiinnut ilaasortat nersualaartarlugit. Misigitikkit atorfissaqartinneqarluartut pingaartinneqartullu! Satanip aaqqissuussineranut atasut piareersimattuinnarput misigitinniassallugit naammanngitsut. Inuunissaq anguniarlugu arpaliunnermi matuma nalaani qatanngutitta isornartorsiorneqarneq pisariaqartinngilaat, atorfissaqartippaalli ikinngutit apuulluarnissaannut kaammattuisartut tamaviaaqqusisartullu. Una assersuutigisigu: Qatanngut arnaq utoqqasaaq pioneriujunnaartariaqarami, uummammigut iluunngarluni pionerinngoqqikkusuppoq. Aningaasatigulli ajornartorsiorneq pissutigalugu tamanna ajornaqaaq. Naak ajunngitsumik siunertaqaraluarluni, utoqqaanertat ilaata isorinnippalulluni aperivaa: „Qaqugumitaava pionerinngoqqinniarpit?“ Arnap nakkorerpiarnagu akissutaa: „Uima ineqarnerput akilersinnaalerpagu,“ utoqqaanertap tupaallaatigaa. Utoqqaanertap paasinngikkaluarpaa, kingornagulli paasilerlugu, qatanngutip arnap uimi akissarsiaa pissutiginerullugu pioneriusinnaasimasoq. Uiatali sulisitsisuata suliassat kristumiumut sulissutigissallugit ilerasuutissaasinnaasut amerlisittuinnarmagit, tarnimigut ilerasuuteqarumannginnami aalajangerpoq allamik suliffissarsiniassalluni. Utoqqasaagamili allamik suliffissarsiniarneq piuminaappoq. Taamaattumik suliffik akissakinnerusoq naammagisariaqarpaa; taamaammallu nulia ulloq naallugu sulisariaqalerpoq.
18. Qanoq ilillutik utoqqaanertat pissatsissutaasinnaappat?
18 Misigisaq tamanna eqqarsaatigalugu, imatut paasisariaqarpa utoqqaanertat kristumioqatitik unnersuunniarlugit tuaviorpallaassanngitsut? Naagga. Kisiannili unnersuunneqarneq kajumissaarneqarnerluunniit pisariaqaraangata, utoqqaanertat pissutsit qatanngutit atugarisavii paasiniaqqaartariaqarpaat, qalliinnakkut pissusii qiviaannarnagit. (Jâko 2:15, 16) Taamaalillutik utoqqaanertat ilagiissiminnut ’tuppalliutaasinnaapput’. — Kulorsamiut 4:11.
19. Illit qanoq iliorsinnaavit pionerit ikiorniarlugit qasusooqqunagit?
19 Naalagaaffimmik oqaluussisartut amerliartuinnartut sulerulunnerulersimapput pionerinngorlutillu. Inuppassuit isiginnaartut tamaviaaqqusillutik nillianerat marathonimi arpattut nakussatsissutigisinnaavaat. Taava illit qanoq iliortarpit pionerit ilagiississinniittut apuulluarnissaannut tamaviaaqquniarlugit? Doug Joannelu allamik atorfeqaratik oqaluussisartuuneq kiserluinnaq inuunermi siunertaraat. Nikallornarsinnaavoq aperineqaraangata: „Qaqugumitaava meerartaarniarpisi?“ imaluunniit: „Qaqugumitaava najugaqavinniarpisi?“ Qanorli misigisarpaat Nalunaajaasoqatimik ileqqussatigut nakussatsinniaraangatik, oqarlutik: „Nersornaqaasi — taamaasiuinnaritsi. Ilagiissitsinni pioneriugassi qujanaqaaq“? Anersaakkut qasunngitsuuginnaratik aammattaarli pioneriullutik kiffartuussinerminni nattoralittut qutsissiartortarsinnaalerlutik! — Naleqqiuguk Isaia 40:31.
Pionerit qanoq ilillutik nukittuujuarsinnaapput
20, 21. Allamik atorfeqaratik oqaluussisartut ilaat qanoq iliortarpat nukittorniarlutik?
20 Aappariit Frederick Marianilu naalaariakkit. Taakkua nalunngilaat qanoq ilillutik nukittorsinnaallutik. Tamarmik ajoqersuiartortitaapput Amerikami Qiterlermi kiffartuussillutik, tamarmillu 70 sinnerlugit ukioqarput. Frederick 1946-mi ajoqersuiartortitatut aallartippoq, Marianilu 1950-imi. Jehovamik kiffartuussinerminni suna qasusuissutigaat? Frederick akivoq: „Jehovamik asanninneq inunnullu allanut ikiuukkusunneq taassanngikkaanni, anguniakkamik inuunermik naassaanngitsumik eqqarsaatiginnittuaanarneq napassutigaarput.“ Nulia nangilluni oqarpoq: ’Guutip neriorssuutai napassutigaavut.’ Qanoq iliorpat qasusoornaveerumallutik? „Sumilluunniit suliassaqartitaagaluaruit, taanna ulapissutigiuk,“ Frederick siunnersuuteqarluni oqarpoq. Marian oqarpoq: „Suliassat teokratiimut attaveqartut tutsuviginartumik sulissutigikkit,“ nangillunilu oqarpoq: „Utoqqaliartortilluni naammasserusutanik tamanik naammassinninniarneq ajornarsisarpoq. Tamanna ugguutigigaluarpara, qinullungali Jehovamut oqaatigisarpara.“ Frederiup siunnersuutaalluartoq una naggasiissutigaa: „Unnuit tamaasa Jehova qinnuigisarparput ikioqqulluta.“ — 1 Pîtruse 4:7.
21 Lavonia 67-inik ukioqarpoq ukiullu kingulliit 20-t nalinginnaasumik pioneriulluni. Ukiumi qaangiuttumi ullut 15-it napparsimmavimmi uninngavoq, maannakkullu uummanni pillugu nakorsaatitortarluni. Eqqarlimi ilaasa, aammalu uimi ataatamilu, toqunerat misigissutsitigut nukillaarutigigaluarpaa. Ilungersortuaannarporli. Qanoq ililluni nukissaqartuarpa? „Sivisunerusumik oqaluussisinnaanngorama iluaqutaalluarpoq,“ Lavonia oqarpoq, „inuimmi allat Jehova pillugu oqaluttuussinnaagaangakkit, ajornartorsiutikka isumakkeertarsinnaavakka, isumakkullu eqqissisimaarutigaara nuannaarutigalugulu inuunermik naleqarnangaartumik.“ Pioneriulluni soraassamaanngilaq, akerlianilli oqarpoq: „Inuit allat Jehovamik ilisarsisut siunertaanillu nuanningaartunik ilinniartut takullugit ima nuannaarutigitigigakku pioneritut soraarnissara eqqarsaatigiumanngilaraluunniit.“ — apustilit suliait 20:35.
22. Inuunissaq naassaanngitsoq anguniarlugu arpaliunneq naammassissagutsigu, qanoq iliortuartariaqarpugut?
22 Matuma nalaani pioneriusinnaagaluarutta pioneriusinnaanngikkaluaruttaluunniit, tamatta nakuussutissiisoq nukissaqartitsisorlu, Jehova, qanittumik atassuteqarfiginiarsinnaavarput taassumalu peqatigiissortai attavigalugit. Guutitsinnik ilumoortumik kiffartuussilluta nukittortuarta. Taava Habakkukitut oqarsinnaassaagut: ’Jehova naalagaasoq pissaatigaara, taassuma isikkakka kulavaat piisut itissavai.’ (Hâpakuk 3:19) Taava qasussanngilagut nukillaassanataluunniit. Eqqaamaniaruk arpaliunneq naammassileripput. Killiffissaq qanippoq! (wD 15/1 86)
[Quppernerup ataani ilanngussaq]
a Soqutiginarpoq malugissallugu Filípimiut 2:1-imi oqaaseq ’oqaaqqissaarut’ aammalu Eprîarit 6:18-imi oqaaseq ’tuppalliut’ nagguvigigaat grækerisut oqaluut isumaqartoq „oqaatsit atorlugit saamasumik sunniiniarneq“ imaluunniit „eqqortumik asannittumillu oqaluussineq“.
Apeqqutit uteqqitassat
□ Kikkut kisimik Jehovap pissaanera tamakkiisumik pissarsiffigisinnaavaat?
□ Anersaakkut qasusoornerup suut malunniunnerai?
□ Jehovap periarfissiai suut iluaqutigalugit nukittorsinnaavugut?
[Qupp. 11-mi ungalusaq]
Anersaakkut qasusoorneq qanoq akiorniarneqarsinnaavoq
Qasusoornerup malunniunneri
◻ Nerinikkut, imernikkut, nuannaarsarnikkullu imminut naalakkersorsinnaannginneq
◻ Sallusuissummik aallussilluarunnaarneq, imminut naammagilluarluni isumaqarneq
◻ Sualuttumik sivisuumillu qularuteqarneq
◻ Ilagiit ataatsimiinnerinut najuutinngitsoortarneq
◻ Oqaluussinermut aallussinnginneq nuannaannginnerlu
◻ Utoqqaanertanik Kattuffissuarmillu ingasattumik isornartorsiuineq
Qsusuissutaasinnaasut
◻ Anersaakkut iluartukkut ikioqqulluni qinusarneq — Lúkarse 11:13; Galâsiamiut 5:22, 23; 1 Pîtruse 4:7
◻ Nammineerluni atuaqqissaartarneq — Tussiaat 1:1, 2
◻ Bibelimut tunngasunik eqqissisimaarluni eqqarsaatiginnittarneq — Tussiaat 77:13
◻ Ataatsimiinnernut ataatsimeersuarnernullu najuuttarneq — Nĩmia 8:1-3, 8, 10; Eprîarit 10:23-25
◻ Oqaluussinermut peqataasarneq — apustilit suliait 20:18-21
◻ Ilagiinni utoqqaanertanit nakkutilliisunillu angalasartunit anersaakkut ikiorneqarneq — Rûmamiut 1:11, 12; Eprîarit 13:17