Jehovap qasusoq nakussatsittarpaa
„[Jehovamik] neriuffiginnittut nukineqqissapput, sulunissapput nattoralittut.“ — JESAJA 40:31.
1, 2. Jehovap imminut tunaartarinnittut qanoq pisarpai, suullu massakkut sammissavavut?
NATTORALLIT timmissanut nukittunerpaanut ilaapput. Sulutik aalatinnagit isorartoorujussuaq aarsaarfigisinnaavaat. Nattoralissuaq, „Timmissat kunngiat“, suluni ilanngullugit 2 meterisut takitigisoq, „nattoralinnit tamanit maluginiarnarnerpaavoq; qattorngit narsarsuillu qulaateriarlugit qaqqap quassugai qulaallugit nalunaaquttap-akunnerpassuini timmisinnaavoq taamaaleriarlunilu qullarsarluni qilammi toorninnguatut isikkoqalernissani tikillugu“. — The Audubon Society Encyclopedia of North American Birds.
2 Nattorallip timmisinnaassusia eqqarsaatigalugu Esajas ima allassimavoq: „[Jehovap] qasusoq nakussatsittarpaa, nukillaangasoq pissatsittarpaa. Inuusuttut qasulersaraluarput nukillaalersarlutillu, inuutsaruttortut allaat naakkiuttarput. Kisianni [Jehovamik] mianerinnittut nukineqqissapput, sulunissapput nattoralittut. Arpassapput nukillaarnatik, ingerlassapput qasussanatik.“ (Jesaja 40:29-31) Tuppallernaqaaq paasillugu Jehovap imminut tatiginnittut ingerlaannarnissaannut nakussatsittarai, nattorallip aarsaartup suluisut qasuneq ajortuusaatut ittunik sululerlugillusooq! Qasusut nakussatsinneqarnissaannut taassuma ikiuutissarititaasa ilaat sammeriartigik.
Qinunerup kimia
3, 4. (a) Jesusip ajoqersukkani qanoq kajumissaarsimavai? (b) Jehovap qinnutivut qanoq akissagai ilimagisinnaavarput?
3 Jesusip ajoqersukkani oqaaqqissaarsimavai ’qasusuillutik qinuttuinnarnissaannik’. (Lúkarse 18:1) Uummammiunik Jehovamut aniatitsineq ilumut nukineqqissutigisinnaavarput inuunermilu tatineqarnerit artornarluinnaleraluartut nakkaannannginnissatsinnut iluaqutigisinnaavarput? Aap, eqqaamasassaqarpugulli.
4 Jehovap qinnutitsinnik qanoq akisinissaa piviusorsiortumik ilimasuffigisariaqarparput. Kristumiu isumatsarujussuartarsimasoq kingorna ima oqaluttuarsimavoq: „Ullumikkut Jehova tupinnartuliorneq ajorpoq, isumakkullu nappaatinik ajorunnaarsitsineq ajorluni. Aaqqissuussaanermili matumani pisinnaasaq naapertorlugu nappaatip nammannissaanut ikiortarpaatigut.“ Sooq qinuneq taama iluaqutaatigisoq ima nassuiarpaa: „Ulloq unnuarlu tamaat Jehovap anersaava illernartoq qinnutigisinnaavara.“ Inuunermi tatineqarnernik nanertisimatitsisinnaasunik Jehovap eqqortinnaveersaarneq ajorpaatigut, kisianni ’qinusut anersaaminik illernartumik tunisarpai’! (Lúkarse 11:13; Tussiaat 88:2-4) Guutip anersaavata illernartup tatineqarnerit misilinneqarnerillu suulluunniit nammassinnaanissaannut piginnaassuseqalersittarpaatigut. (1 Korintumiut 10:13) Pisariaqarpat ’pissaanermik angingaartumik’ immikkut ittumik pigisaqalersissinnaavaatigut, Guutip naalagaaffiata qanittukkut, silarsuassami nutaami, ajornartorsiutinik tatineqassutigisatsinnik atuukkunnaarsitsinissaata tungaanut nikallujuittuaannarsinnaatilluta. — 2 Korintumiut 4:7.
5. (a) Qinnutivut akineqassappata suut marluk pingaartuuppat? (b) Timikkut sanngiissummik akiugaqarutta qanoq qinusinnaavugut? (c) Qinnutitsinni aalajangersimasut taasarutsigik qinnutigiuarlugillu Jehovamut suna nalunassanngila?
5 Qinusarnitsinni aalajangersimasut taasarnissaat qinujuarnissarpullu pingaaruteqarpoq. (Rûmamiut 12:12) Assersuutigalugu, timikkut sanngiissummik akiugaqarneq pissutigalugu ilaannikkut qasulersoortaraanni iluaqutaasinnaavoq ullup aallartinnerani Jehova qinnuigissallugu sanngiissummut ullup ingerlanerani nakkaannannginnissamut ikioqqulluni. Aamma ullup ingerlanerani unnukkullu innalernermi qinusarneq pitsaasuuvoq. Nakkaannartooraanni Jehova isumakkeerfiginneqqullugu qinnuigisariaqarpoq, qinunermilu eqqaallugu suna pissutigalugu nakkaannartoorluni siunissamilu pinaveersimatinniarlugu qanoq iliorniarluni. Kipisuitsumik aalajangersimasumillu taasaqarluni qinusarnikkut akiuunnermi ajugaarusunneq ’qinnutinik tusartartumut’ takutinneqassaaq. — Tussiaat 65:3; Lúkarse 11:5-13.
6. Sooq eqqortumik naatsorsuutigisinnaavarput Jehovap qinnutivut tusassagai, taassumunnga qinunissatsinnut qinngaqqunnartutut misigigaluaruttaluunniit?
6 Qasulersoorsimasut ilaannikkut misigisinnaasarput Guutimut qinunissaminnut qinngaqqunnarlutik. Arnaq kristumiu taamatut misigisimasimasoq ima oqaluttuarpoq: „Taamatut eqqarsarneq ulorianartorujussuuvoq, takutippaami imminut eqqartuuttugut, tamannali uagut suliassarinngilarput.“ Aap, ’Guuti tassaavoq eqqartuussisoq’. (Tussiaat 50:6) ’Uummatitta pillagassaatikkaluarpatigut’, Biibilimi neriorsoqqissaarneqarpugut ’Guuti uummatitsinnit annerusoq suullu tamaasa ilisimallugit’. (1 Juánase 3:20) Tupallernaqaaq nalunagu naak misigigaluarluta qinunissatsinnut qinngaqqunnarluta, ilimananngimmat Jehova taamatut isumaqartoq. Taassuma uagutsinnut tunngasut ’suut tamaasa ilisimavai’, ilaatigut pissutsit qinngaqqunnartutut misigilernitsinnik kinguneqartut. (Tussiaat 103:10-14) Naakkinnissutsi paasinningaarninilu pissutigalugit qinnutit ’uummammit peqqissimisumit artorsaateqangaartumillu’ pisut tusarnaartarpai. (Tussiaat 51:19) Qanormi aamma „piitsut nillianerannik tusaajumanngitsoq“ nammineq assuarereerlugu ikioqqulluta nillianivut tusaajumassanngilai. — Ussatit 21:13.
Qatanngutigiissuit asaqatigiinnerat
7. (a) Nutaamik nukissaqaleqqulluta Jehovap aamma sumik tunivaatigut? (b) Sooq qatanngutitta allat qanoq atugaqarnerannik ilisimanninnerput nakussatsissutigisinnaavarput?
7 Nutaanik nukissaqaleqqinnissatsinnut ikiuutigisinnaasarput alla tassa kristumiutut qatanngutigiiussuseq Jehovap pilersissimasaa. Nunarsuaq tamakkerlugu qatanngutigiissuarnut ilaaneq immikkut pisinnaatitaaffissuuvoq! (1 Pîtruse 2:17) Inuunermi tatineqarnerit nanertisimassutigigaangatsigik qatanngutigiittut asaqatigiinnerup nutaamik nukissaqartilersinnaasarpaatigut. Qanoq ililluni? Misilinneqarnerni nikallornaveersaarniarsarinitsinni kisimiinnginnitsinnik ilisimanninnerinnarput nakussatsissutaasinnaasarpoq. Qatanngutitta angutit arnallu ilaat qularnanngitsumik tatineqarnernik misilinneqarnernillu uagutsitut nalaataqarsimapput uagutsitullu misigisimallutik. (1 Pîtruse 5:9) Tuppallernaqaaq nalunagu atukkavut immikkorluinnaq ittuunngitsut misiginerpullu qaqutigoortuunngitsoq.
8. (a) Suup takutippaa qatanngutitta akornanni assut ikiorneqarlutalu tuppallersarneqarsinnaasugut? (b) Illit ikinngummit qanoq ikiorneqarnikuuit imaluunniit qanoq tuppallersarneqarnikuuit?
8 Qatanngutigiit asaqatigiissut akornanni ikinngutitaarsinnaavugut aliasukkaangatta pisariaqartitatsinnik ikiuisinnaallutillu tuppallersaasinnaasunik. (Ussatit 17:17) Ilaannikkut inussiarnersumik oqarfigilaarneqarnerinnaq imaluunnit isumassorneqalaarnerinnaq naammattarpoq. Kristumiu atorsinnaanngitsutut misiginermik sorsugassaqarsimasoq ima oqaluttuarpoq: „Ikinngutit ilaasa imminut ajortumik eqqarsaatigisarnerma ajugaaffiginissaanut ikiorniarlunga ajunngitsortannik eqqaasittarpaannga.“ (Ussatit 15:23) Qatanngutip arnap panimminik toqukkut annaasaqarsimasup ataatsimiinnerni Naalagaaffiup erinarsuutaanik, ingammik erinarsuutinik makititaanissamut tunngasunik, erinarsoqataanissani aallaqqaammut ajornakusoortissimavaa. Oqaluttuarpoq: „Ilaanni qatanngutip arnap qiasunga takoriaraminga ornippaanga, eqeriarlungalu erinarsoqatigilerlunga. Qatanngutinnut angutinut arnanullu asanniummeqaanga, nuannaarpungalu ataatsimiigiarsimagatta, takusinnaavarami ikiuutissaq tamaaniittoq, naalagaaffilersaarfimmi.“
9, 10. (a) Qatanngutigiit akornanni asanninnerup atuunnissaanut qanoq suleqataasinnaavugut? (b) Kikkut ingammik ineriartornartunik peqateqarnissartik pisariaqartippaat? (c) Qiimmassarneqartariaqartut ikiorniarlugit qanoq iliorsinnaavugut?
9 Soorunami kristumiutut qatanngutigiit akornanni asanninnerup atuutsinnissaanut tamatta immikkut akisussaaffeqarpugut. Taamaattumik pingaartorujussuuvoq uummaterput ’neruttortissallugu’ qatanngutivut angutit arnallu tamaasa inissaqartillugit. (2 Korintumiut 6:13) Alianassaqaaq qasusut misigissappata qatanngutit asannissuseqarpianngitsut. Kristumiulli ilaat oqartarput kiserliorlutik qaangiinnarneqartarlutillu. Qatanngut arnaq sallusuissummut akerliusumik uilik ilungersorluni ima oqarsimavoq: „Kinami ineriartornartunik ikinnguteqarnissaminik, qiimmassarneqarnissaminik asannittunillu peqateqartarnissaminik kissaateqarnanilu pisariaqartitsinngila? Qatanngutit angutit arnallu eqqaasilaarisigik atorfissaqartippavunngooq!“ Aap, ingammik artornartunik atugaqartut — uppinngitsumik uillit, angajoqqaat kisimiittut imaluunniit katsorsarneqarsinnaanngitsumik nappaateqartut, utoqqaat allallu — ineriartornartumik peqateqartarnissartik atorfissaqartippaat. Imaassinnaannginnerpa ilavut tamatuminnga eqqaasinneqartariaqartut?
10 Ikiuiniarluta qanoq iliorsinnaavugut? ’Neruttorniarta’ asanninnerpullu ersersillugu. Qiimmassarneqarnissaminnik atorfissaqartitsisunik pulaartitsisarnissarput puiornaveertigu. (Lúkarse 14:12-14; Eprîarit 13:2) Pissutsit atukkatik pissutigalugit aggersinnaannginnissaat ilimagiinnarnagu sooq qaaqquinnassanngilavut? Taava namminneq aalajangiissapput. Aggersinnaanngikkaluarunilluunniit allanit eqqarsaatigineqarnertik nuannaarutigissavaat. Immaqa tamannarpiaq nutaamik nukissaqaleqqinnissaminnut pisariaqartippaat.
11. Nikallungasut qanoq ikiorneqarnissartik atorfissaqartissinnaavaat?
11 Nanertisimasut aamma allatigut ikiorneqarnissartik atorfissaqartissinnaavaat. Assersuutigalugu, anaanap kisimiittup atorfissaqartissinnaavaa qatanngutip inersimalluartup ernerminik ataataqanngitsumik samminninnissaa. (Jâko 1:27) Qatanngutip angutip arnalluunniit peqqiilliortup pisiniunneqarnissani illumiluunniit suliassanik ikiorneqarnissani atorfissaqartissinnaavaa. Immaqa utoqqaat kiserliorput oqaluussiartornissaminnilu ikiorneqarnissaminnik atorfissaqartitsillutik. Taamatut ikiorneqarnissamik pisariaqartitsiuarneq pineqarpat ’asannissutsitta iluameerneranut misilinneqaataassaaq’. (2 Korintumiut 8:8) Piffissaajarneqarusunnginneq pisarissersorneqarusunnginnerlu pissutigalugit ikiorneqartariaqartut tunuarsimaarfiginissaannut taarsiullugu allat pisariaqartitaannik eqqumaffiginninnitsigut ikiuinissatsinnullu piumassuseqarnitsigut kristumiutut asanninnikkut misilitsinneq angusiffigilluarniartigu.
Guutip oqaasiata kimia
12. Guutip oqaasiata qanoq ililluni nutaamik nukissaqalersissinnaavaatigut?
12 Nerisarunnaarutta sivitsunngitsoq nukillaariartulissaagut. Taamaattumik Jehovap ingerlaannarnissatsinnut nakussatsittarpaatigut anersaakkut inuussutissanik inuussutissartaqarluartunik pilersorluta. (Jesaja 65:13, 14) Anersaakkut inuussutissat tamakku suuppat? Pingaarnerpaamik taassuma oqaasia, Biibili. (Matîuse 4:4; naleqqiuguk Eprîarinut agdlagkat 4:12.) Oqaasiata qanoq ililluni nutaamik nukissaqalersissinnaavaatigut? Tatineqarneq ajornartorsiutillu nukissatsinnik nungusaaleraangata nukissaqaleqqissinnaavugut Biibilip nalaani angutit arnallu misigisimasaat ajornartorsiutillu akiorsimasaat pillugit atuarnitsigut. Naak uagutsitulli inuttut sanngiissuteqaraluarlutik qanoq ilillutik assuarnaassutsiminnik attassiinnarsimanerat eqqarsaatigissallugu pitsaassaaq. (Jâko 5:17; apustilit suliait 14:15) Misilinneqarnerit tatineqarnerillu uagut nalaattakkatta assingi atortarsimavaat. Ilaat sammeriartigik.
13. Biibilimi qanoq takutinneqarpa Biibilip nalaani angutit arnallu aalajaatsut uagutsitulli misigisaqartarlutillu misigissuseqartarsimasut?
13 Ataataanerpaap Abrahamip makititaanissaq upperigaluarlugu nuliami toqunera assut aliasuutigisimavaa. (1 Moses 23:2; naleqqiuguk Eprîarinut agdlagkat 11:8-10, 17-19.) Davidip ajortuliani assut peqqissimissutigisimavai, taamaakkaluartorli misigisimalluni ajortuliami Jehovamut kiffartornissaminut qinngaqqunnarsisissimagaanni. (Tussiaat 51:13) Moses naammanngitsutut imminut misigisimavoq. (2 Moses 4:10) Epafroditus nikallorujussuarsimavoq ilisimaneqalermat perululluni napparsimanini ’Kristusip suliareqqusaanik’ naammassinninnissaminut akornutigigini. (Filípimiut 2:25-30) Paulusip timi ajortilik akiugassarisimavaa. (Rûmamiut 7:21-25) Evodia Syntykelu, qatanngutit arnat tanitaasut Filippimi ilagiinniittut, aaqatigiinngivissimagunarput. (Filípimiut 1:1; 4:2, 3) Qiimmaallannarporli paasillugu angutit arnallu aalajaatsut tamakkua uagutsitulli misigissuseqarlutillu ajornartorsiuteqartarsimasut, taamaakkaluartorli nakkaannarsimanatik! Aammalu Jehovap immineersimanngilai!
14. (a) Suna aqqutigalugu Jehovap oqaatsiminit nakussatsinneqarnissarput isumagisarpaa? (b) Sooq Napasuliaq Alapernaarsuiffik-mi Iteritsi!-milu inuttut atugarisatigut, ilaqutariinni misigissutsikkullu ajornartorsiutit sammineqarsimappat?
14 Jehova inussiaq aalajaallunilu silatooq atorlugu piffissaq eqqorlugu anersaakkut inuussutissanik nakussatsinnartunik pilersuiuarsinnarpoq. (Matîuse 24:45, NV) Inussiap aalajaatsup atuagassiat Napasuliaq Alapernaarsuiffik aamma Iteritsi! ukiorpassuarni atortorisimavai, taakkunani Biibilip uppernassusia illersortarlugu Guutillu naalagaaffia inuiaat neriuutissatuaattut oqaluussissutigisarlugu. Ingammik ukiuni kingulliunerusuni atuagassiani taakkunani Biibili aallaavigalugu ilanngutassiat inuttut atugarisatigut, ilaqutariinni misigissutsikkullu ajornartorsiutinut, ullumikkut Guutip innuttaasa akornanni ilaatigut aamma atugaasartunut, tunngasut saqqummiunneqartarsimapput. Sooq „inussiaq aalajaallunilu silatooq“ ilanngutassianik taama ittunik saqqummiussisarpa? Ajornartorsiutinik tamakkuninnga eqqugaasut Guutip oqaasianit nakussatsinneqarnissaannik qiimmassarneqarnissaannillu ikiorniarlugit. Taamatullu qatanngutitta angutit arnallu akiugassaannik ilanngutassiani paasisaqarnerulersinneqartarpugut, Paulusillu oqaasii uku maleruarsinnaanerulersarpavut: ’Nikallortut tuppallersarsigik, sanngiitsut illersorsigik, tamanullu kamajuillusi.’ — 1 Tásalûníkamiut 5:14.
Utoqqaanertat ’anorersuarmut oqquiffiit’
15. Esajasip utoqqaanertat qanoq siulittuutigisimavai, tamannalu taakkununnga qanoq akisussaaffiliiva?
15 Jehovap qasuleraangatta ikiortissatsinnik allanik aamma tunisimavaatigut, tassa utoqqaanertanik. Pruffiitip Esajasip taakku ima allaaserisimavai: „Tamarmik assigissavaat anorersuarmut oqquiffik sialussuarmullu oqqiffik, inoqajuitsumi kuunnguit kuuttut, nunami imissaaleqisumi qaarsorsuup alanngortaa.“ (Jesaja 32:1, 2) Utoqqaanertat pillutik Jehovap siulittuutigisimasaanik eqqortitsinissaminnik akisussaaffeqarput. Allanik tuppallersaasinnaasariaqarput, sapiissuseqalersitsisinnaasariaqarlutik allallu ’nanertortigisaannik [imaluunniit: „erloqissutigisaannik“; toqqaannartumik: „oqimaaqutaannik“] ersoqatiginissaannut’ piareersimasariaqarlutik. (Galâsiamiut 6:2) Qanoq ilillutik taamaaliorsinnaappat?
16. Guutimut qinunissaminnut qinngaqqunnartutut misigisut ikiorniarlugit utoqqaanertat qanoq iliorsinnaappat?
16 Soorlu oqaatigereeripput qasulersoq qinunissaminut qinngaqqunnartutut misigisinnaavoq. Taamaappat utoqqaanertat qanoq iliorsinnaappat? Qinoqatigisinnaavaat qinnussinnaallugulu. (Jâko 5:14) Qinoqatigiinnermi Jehova qinnuigineqarpat qasusumut asanninnerminik allallu taassumunnga asanninnerannik nalunaatsumik ersersitsinissaanik, tuppalliutaassaqaaq. Utoqqaanertamik ilungersorluni qamanngalu pisumik qinusumik tusarnaarneq aliasuttup imminut tatiginermigut nakussatsissutigisinnaavaa. Nammineq pilluni qinnutigineqartut Jehovap akiumaarai utoqqaanertat qularinngippassuk qinnunneqartoq taamatut tatiginnilersinnaavoq.
17. Sooq utoqqaanertat misiginneqataallutillu tusarnaartariaqarpat?
17 ’Inuk kinaluunniit tusarasuarluni pili oqalukkumaarnertullunilu,’ Jâko 1:19-imi allassimavoq. Qasusoq nutaamik nukissaqaleqqinnissaanik ikiorniarlugu utoqqaanertat allanut tusarnaaraangamik misiginneqataasuusariaqarput. Ilagiinnut ilaasortaasut ilaat ajornartorsiutinik tatineqarnernillu, pissutsit aaqqissuussaaneranni matumani aaqqinneqarsinnaanngitsunik, ilaatigut akiugassaqarsinnaasarput. Taamaakkaangat atorfissaqartitaat tassaaneq ajorpoq ajornartorsiummut aaqqiissutissaq ’tamanut atuuttoq’, kisianni tusarnaarneqarneq, qanoq misigisariaqaraluarnerannik oqaluttuunnagit avoqqaarlerpalunnanili tusarnaarlugit. — Lúkarse 6:37; Rûmamiut 14:13.
18, 19. (a) Qasusut nammagaat oqimaannerulersinnaveersaarlugit utoqqaanertat qanoq iliorsinnaappat? (b) Utoqqaanertat misiginneqataanerat qanoq kinguneqartarpa?
18 Ilissi utoqqaanertat, tusarnaarumatunissigut qasusup nammagaanik oqimaannerulersitsinaveersaarnissarsi eqqumaffiginiarsiuk. Assersuutigalugu, qatanngutip angutip arnalluunniit ataatsimiigianngitsuullattaalersimaguni imaluunniit oqaluussisarnini annikillisissimaguniuk oqaluussinerulernissaminik ataatsimiigiakulanerulernissaminilluunniit kajumissaarneqarnissani atorfissaqartippaa? Immaqa. Pissutsilli tamaasa nalunngiligit? Peqqiilliulersimava? Ilaqutariinni pisussaaffii qanittukkut amerlisimappat? Pissutsinik allanik nanertisimassuteqarpa? Eqqaamasariaqarpoq pineqartoq immaqa iliuuseqarnerusinnaannginnini pissutigalugu imminut ajorisorujussooreermat.
19 Qatanngut angut arnarluunniit qanoq ikiorneqarsinnaava? Inerniliitinnani unnersuussitinnanilu tusarnaaqqaartariaqarpoq! (Ussatit 18:13) Naleqquttunik aperisarneratigut misigissusii ilorliunerpaat qaffatsinneqarsinnaapput. (Ussatit 20:5) Misigissutsit taamaattut tunuartinneqassanngillat taamatulli misiginera akuerineqartariaqarluni. Immaqa Jehovap uagutsinnik soqutiginninneranik pissutsillu atukkatta ilaannikkut killiliisarnerannik paasinninneranik uppernarsaavigineqarnissani qasusup atorfissaqartippaa. (1 Pîtruse 5:7) Utoqqaanertat misiginneqataanermik taama ittumik ersersitsisarpata qasusut ’tarnimikkut qasuerfissarsissapput’. (1 Pîtruse 3:8; Matîuse 11:28-30) Nutaamik nukissaqaleqqikkunik iliuuseqarnerulernissaminnik kajumissaarneqartariaarutissapput; uummatiminnit killinneqarlutik sapinngisartik tamaat Jehova kiffartuukkusulissavaat. — Naleqqiuguk Korintumiunut agdlagkat áipait 8:12; 9:7.
20. Kinguaariit ajortut suujunnaarsinneqarnissaat taama qanitsigitillugu suna aalajangiusimaannartariaqarparput?
20 Inuiaat oqaluttuarisaaneranni piffissami ajornakusoornerpaami inuuvugut. Naggatissaq qanilliartuinnartillugu Satanip silarsuaani tatineqarnerput annertusiartuinnassaaq. Pingaartorujussuuvoq puiunngisaannassallugu Diaavulu qamajuarmat qasulerlutalu nakkaannarnissarput utaqqigaa ajornannginaarluta pisariumalluta. Jehovap qasusunik nakussatsitsisarnera qujamasuutigisinnaavarput. Ingerlaannarnissamut nakussatsinniarluta iluaqutissarititai tamaasa atorluarniarniartigik. Nattorallip sulussuinillusooq tunisinnaavaatigut. Ullumikkut kinguaariit ajortut suujunnaarsinneqarnissaat taama qanitsigitillugu piffissaanngilaq inuuneq naassaanngitsoq akissarsiassaralugu arpannermi uniinnarnissamut. — Eprîarit 12:1. (wE 1/12 95)
Qanoq akissavit?
□ Jehovap qinnutitsinnut akissutitut qanoq iliornissaa ilimasuutigisinnaavarput?
□ Kristumiutut qatanngutivut qanoq nakussatsissutigisinnaavavut?
□ Guutip oqaasiata qanoq nutaamik nukissaqalersissinnaavaatigut?
□ Qasusut nutaamik nukissaqalersinniarlugit utoqqaanertat qanoq iliorsinnaappat?
[Qupp. 17-mi assiliartaq]
Qiimmassarneqartariaqartut pulaarsartarnissaat puiornaveertigu
[Qupp. 18-mi assiliartaq]
Qasusut qanoq asaneqartiginerannik paasiteqqullugit utoqqaanertat Jehova qinnuigisarsinnaavaat