Jehovap tipaatsungaar-figeqqusaa — uagut nuannaarfigaarput
’Illernartissavarsilu ukioq tamanna ukiut 50-innguutaat ukioq iperarneqarfissaq nunami torlulaatigalugu tamanut tassani nunaqartunut; tipaatsungaarfigissavarsi ukioq tamanna . . . taava nuna terlillusi nunagiumaarparsi.’ — 3 Môrsase 25:10-12, 18.
1. Iperarneqarfiup Siarnga sumik allagartaqarpa, oqaatsillu taakku sumit tigusaappat?
SUMI najugaqaraluaruilluunniit tusaamasimassagunarpat Iperarneqarfiup Siarnga tusaamasaq Pennsylvaniami, USA-mi Philadelphiamiittoq. The World Book Encyclopedia-mi allassimavoq sianeq taanna „julip 8-anni, 1776-imi, oqaluffiillu siarngi allat sianertinneqartut Attaviitsuussutsimik Nalunaarutip atortussanngortitaanera nalunaarutigalugu. Siarngup allagartai: ’Iperarneqarfissaq nunami torlulaatigisiuk tamanut tassani nunaqartunut,’ Bibelimeersuupput (3 Môrsase 25:10).“
2. Iperarneqarsinnaaffissaq kiffaanngissuseqarnissarlu illit qanoq misigissuseqarfigaagit, ajornartorsiutilli suut takkussinnaassappat?
2 Iperarneqarneq kiffaanngissuseqarnerlu suli kajungernangaarput, ilaa? Nuannaassannguatsiarputit neriuutissinneqaruit iperarneqarluarnissamik kukkusumik eqqarsaatinit, naalakkersuisut tungaanninngaanniit naqisimaneqarnermit qunutitaanermillu, utoqqalinerup nappaateqarnerullu kingunipiluinit, toqumik kinguneqartartunit. Taamaappat, taava maanna nuannaarutissaqarluarputit, ungasinngitsukkullu suli annerusumik nuannaarutissaqassallutit. ’Qanoq ililluni tamanna pissava?’ immaqa aperiumassaatit. Tamanna eqqarsaatigeqqajaanarpoq, mannami tikillugu naalakkersuisut kikkulluunniit tamatigut iperarneqartitsisinnaasimanngillat, ilisimatuulluunniit nakorsalluunniit utoqqalineq, napparsimaneq kiisalu toqu pitsaaliorsinnaanngilaat. Uterparpulli: iperarneqarluarsimanermik nuannaarutiginninnissamut pissutissaqarpoq. Tamanna paasiumagukku tunulequtaasut pingaaruteqartut ilinnut maanna siunissamilu sunniuteqarsinnaasut eqqarsaatigeriakkit.
3. Tipaatsungaarfik sunaava, ingerlaneranilu suut pisarpat?
3 Matuma qulaani issuagaq oqaatsimik „tipaatsungaarfik“-mik ilaqarpoq. Tipaatsungaarfik ukiumik ataatsimik sapaataasumik sivisussuseqartarpoq Israelikkut nunaanni atortuusoq. Ukiut arfineq-marlukkuutaarlugit naasorissaanikkut sapaataasartut arfineq-marluk katillugit ukiuni 49-ni ingerlasartut naagaangata ukioq Tipaatsungaarfik nalliuttarpoq. Ukiut 50-innguutaat, tassa Tipaatsungaarfik, nunamut sapaatit tulleriiaartut taakkua pingaarnersaraat. Nuna taanna Jehovap innuttaminut tunniussimavaa, siuaasaannut Abrahamimut, ’Jehovap ikinngutaa’nut, neriorsuutini eqqortillugu. (Jâko 2:23, NW; Isaia 42:8) Ullormi Tipaatsungaarfiusumi iperarneqarfissaq nunami tassani nunaqartunut tamanut torlulaatigineqartarpoq. Tassa imaappoq: Israelikkut akiligassaqarnertik peqqutigalugu akigitissimasut tamarmik iperarneqartussaasut. Tipaatsungaarfimmi pisartut ilagaattaaq nunaatit pigisaagaluit kingornussaajuartussaasut (immaqa aningaasatigut atugarliorsimanerit pissutigalugit) tunineqarsimasut tamarmik utertinneqartarnerat. — 3 Môrsase 25:1-54.
4. Ullormi sumi Tipaatsungaarfik nalunaarutigineqartarpa, qanorlu ililluni?
4 Paasisat tamakku tunulequtaralugit paasinarsivoq suna pissutigalugu Tipaatsungaarfik ukiuusoq nalliuttorsiorpaluttoq iperarneqarfiusoq. Ullormi saammaannartitsivimmi qarlortaatip qarlortaatigineqarneratigut nalunaarutigineqartarpoq.a Soorlu Mosesip allaatigigaa Môrsasip agdlagaisa pingajuine 25:9, 10-mi: ’Taavalu tamaginni sulluartaassuarnik qarlortartitsissaatit qaammatit arfineq-aappaata ulluisa qulinganni, tassa ullormi saammaannartitsivimmi sulluartaassuarnik tamaginni qarlortartitsissaasi nunassinni tamarsuarmi. Illernartissavarsilu ukioq tamanna ukiut 50-innguutaat ukioq iperarneqarfissaq nunami torlulaatigalugu tamanut tassani nunaqartunut; tipaatsungaarfigissavarsi ukioq tamanna, tamatumanilu nungullusi nunaatit pigisaraluasi kingumut pigilissavasi nungullusilu eqqarlisi uterfigissallugit.’ Ukiumi 1473-imi u.n.a.s. Josuap Israelikkut Jordanip kuussuatigut ikaartippai nunamut neriorsuutigisamut isertillugit, tassanilu Tipaatsungaarfik nalliuttorsiutigisussaavaat.
Iperarneqaqqaarfik nalunaarutigineqartoq
5. Iperarneqarnermut Tipaatsungaarfimmullu tunngasut suut misissussavavut?
5 Tamatuma siuliini eqqartorneqartut itsarsuaq inuusimasut oqaluttuarisaattut uagut inuunitsinnut sunniuteqarpianngitsutut isumaqartinneqarsinnaapput, ingammik juutit nagguiginngikkutsigik. Taamaattorli Jesus Kristusip pissutissaqarluartippaatigut Tipaatsungaarfissaq siuliminit nuannernerusoq ilimageqqullugu. Tamannalu tunngavissaavoq uagut iperarneqarsimanermik, imaluunniit kiffaanngissuseqarnermik, nuannaarutiginninnitsinnut. Tunngavissiinera paasiumagutsigu, paaseqqaartariaqarparput qanoq Jesus ukiuni hundredilinni siullerni marlutsigut iperarneqartitsisoq. Taava kingusinnerusukkut misissussavarput qanoq taakku iperarneqarnernut marluusunut uagut nalitsinni pisunut, iperarneqarnernut annertunerungaartunut nuannaarnissatsinnullu sakkortunerungaartumik pissutissaasunut, naapertuuttut.
6, 7. (a) Isaia 61:1-7-imi ineriartornerit nuanningaartut suut siulittuutigineqarpat? (b) Jesusip qanoq ililluni takutitsiarpaa Esajasip siulittuutaa eqquutilereersimasoq?
6 Ukioq Tipaatsungaarfik itsarsuaq pisartoq toqqaannartumik taanngikkaluarlugu, iperarneqarnissaq piumaartussaq siulittuutikkut Isaia 61:1-7-imi eqqartorneqarpoq: ’Jehovap naalagaasup anernerata qulangerpaanga; taamaattumik Jehovap tanippaanga naalliuttut tusarnersumik oqaaqqullugit, aallartippaanga aserorsimasunik uummatillit mattuseqqullugit, aallarussaasut torlulaffigeqqullugit iperarneqarfissamik, parnaarussallu annivissamik, torlulaatigeqqullugu Jehovap ukiua saammaassivik, Guutittalu ullua akiniaaffik, aliasuttut tamaasa tuppallersaqqullugit. . . . Tipaatsuut soraajuitsoq pissaraat.’ Siulittuulli taanna qanga qanorlu ililluni eqquuppa?
7 Ukiumi 30-mi u.n.a.k. poorskisiornerup kingornagut, Jesus Kristus sapaammi naalagiartarfimmut iserpoq. Tassani Esajasip siulittuutaata ilaa atuarpaa imminullu tunngatillugu. Tamanna Lúkarse 4:16-21-mi ilaatigut allaatigineqarpoq: ’Allakkat mapperamigit ima allassimasoq eqqorpaa: Jehovap anersaata qulangerpaanga, taamaattumik tanippaanga iivangkiiliu piitsunut oqaluutigeqqullugu; aallartippaanga aallarussaasut torlulaffigeqqullugit iperarneqarnissamik, tappiitsullu tappissinissamik, naalliutsitaasullu aallarteqqullugit pineqassaarsillugit, torlulaatigeqqullugu Jehovap ukiua saammaassivik. . . . Taava pilerpoq oqarfigalugit: Ullumi allakkat tamakku tusaatillusi eqquupput.’
8. (a) Jesusip iperarneqartitaaneq aallaqqaataannaasoq suna pisinnaanngortippaa? (b) Tamanna Juánase 9:1-34-mi qanoq takutinneqarpa?
8 Tusagaq nuannersoq Jesusip tusarliussaa juutinut ilassinnittunut anersaakkut iperarneqartitsivoq. Eqqortumik guutisiornerup pingaaruteqarnera guutisiorumasullu sumik piumaffigineqarnerat takusinnaaqqullugit tappissisitaagamik, amerlasuunik paasinerluinermit iperarneqarput. (Matîuse 5:21-48) Iperarneqarsimaneq tamanna Jesusip timikkut ajorunnaarsitsinerinit naleqarneroqaaq. Taamaattumik, naak Jesusip angutip tappiilluni erniusimasup isai uisikkaluarai, angutip taassuma ataavarnerusumik iluaqutigisimavaa Jesusip pruffiitiuneranik Guutimeersumik paasinninnini. Angutip taassuma nutaamik kiffaanngissuseqarnerata upperisarsiornerup tungaatigut pisortat kinguaariinni ajoqersuutigineqartuartunut kukkusumillu upperisaminnut inussiaasut pissusiat akerleraa. (Juánase 9:1-34; 5 Môrsase 18:18; Matîuse 15:1-20) Kiffaanngissusiali allaqqaataannaavoq utaqqiisaannaallunilu. Ukiuni hundredilinni siullerni allaat iperarneqarnermik allatut ittumik Tipaatsungaarfimmut itsarsuaq Israelikkunni pisartumut assingusumik periarfissiortussaavoq. Suna pillugu taama isumaqassalluni naleqquppa?
9. Anersaakkut inussiaajunnaarsitaagaluartut sumut inussiaajuarpat?
9 Jesusip angut tappiikkaluartoq oqarfigaa: ’Silamut matumunnga pivunga eqqartuussinissaq pillugu, tappiitsut tappisseqqullugit tappissullu tappiilleqqullugit.’ Taava farisiiarit oqaluttuuppai: ’Tappiikkussi ajortuliaqanngeqqajaqaasi, imminilli tappinnerarassi ajortuliarsi aalassanngilaq.’ (Juánase 9:35-41) Aap, ajorti toqumik kinguneqartussaq taamani suli sakkortuumik ajornartorsiutaavoq, soorlulu maanna ajornartorsiutaajuartoq. (Rûmamiut 5:12) Aamma juutit, apustilit ilanngullugit, iperarneqaqqaarnermik, tassa anersaakkut iperarneqarnermik Jesusip atortuulersitaanik, iluaqutiginnittut allaat inuttut naammalluinnanngitsuujuarput. Ajortimut toqumullu ajortip kinguneranut inussiaajuarput. Jesusip tamanna allanngortissinnaanerpaa? Allanngortikkumassavaa? Taamaappallu, qaqugumitaava?
10. Aamma sumut inussiaajunnaarsitsiumaarluni Jesus neriorsuiva?
10 Siusinnerusukkut Jesus oqarsimavoq: ’Oqaatsikka attavigiuarussigik ilumut ajoqersugarissavassi; sallusuissullu ilisarissavarsi, sallusuissutillu inussiaajunnaarsissavaasi.’ Tusarnaartaasa juutiusut akivaat: ’Abrahamip kinguaaraatigut, inussiaatigineqanngisaannarpugullu; soormi taava oqarpit: inussiaajunnaassaasi?’ Jesusip akivai: ’Ilumut, ilumut oqarfigaassi: Ajortimik ileqqulik ajortip inussiaatigaa. Inussiarlu illumiittuinnaraanngilaq, ernerli illumiittuinnararaaq.’ (Juánase 8:31-36) Taamaattumik Abrahamimik uinikkut siuaasaqarnerisa juutit ajortimut inussiaajunnaarsissinnaanngilai. Inussiaajunnaarsitsineq pillugu nalunaarut pingaartoq tamanna Jesusip nalunaarutigaa atuutilerumaartussaq Israelikkullu Tipaatsungaarfinni suniluunniit misigisimasaannit annerungaartussaq ilisimatitsissutigiumallugu.
Kristumiut Tipaatsungaarfiat aallartittoq
11. Kristumiut Tipaatsungaarfiat eqqarsaatigalugu, suna pissutigalugu ukioq 33 u.n.a.k. uagut immikkut soqutigaarput?
11 Juutit paasinngitsoorpaat angeruseq tunngavigalugu Mosesip inatsisai naapertorlugit Tipaatsungaarfik Tipaatsungaarfissamut annertunerusumut assersuutaannaasoq. (Kulorsamiut 2:17; Evfisumiut 2:14, 15) Kristumiut Tipaatsungaarfianni ’sallusuissut’ inunnik inussiaajunnaarsitsisinnaasoq — ’erneq’, Jesus Kristus, qitigalugu sallusiussutaasoq — pingaarutilissuuvoq. (Juánase 1:17) Tipaatsungaarfik annerusoq ajortimit taassumalu kingunerinit allaat inussiaajunnaarsitsisinnaasoq qangamiit nalliuttorsiutigineqaleqqaarpa? Ukiup 33-p u.n.a.k. upernaaneranit, piinsip ulluanit. Tassaavoq ullut qulit qaangiummata Jesusip pilliummi nalinga Jehovamut Guutimut tunniukkiartorlugu qilaliarneraniit. — Eprîarit 9:24-28.
12, 13. Jesusip toqunerata kingornagut sumik pisoqarpa ajoqersugaasa naleqanngitsumik misigisimasaannik kinguneqartumik?
12 Jesusip siornatigut inoqarsimanngisaannarpoq toqusunit makititaasumik naassaanngitsumik inuujuartussaasumik. (Rûmamiut 6:9-11) Tamarmilli toqullutik sinippaarput inuiaallu makiffissaata tungaanut sinippaartuassallutik. Guutip pissaaneratigut makititaagami Jesus Kristus imaattunngorpoq, soorlu Allakkani Illernartuni isumassarsiarititaasuni taaneqartoq, ’sinippaartunut naaqqaataasoq’. — 1 Korintumiut 15:20.
13 Makititaanermi kingornagut ullut 50-issaanni Jesusip Kristusip makititaasup qilammut isersimanera inuttullu naammalluinnartutut pilliummi nalinga nassarlugu Jehovap saanut sassarsimanera inuiaallu pillugit pilliumminik atortuulersitsisimanera uppernarsipput. Tamanna pivoq ukiumi 33-mi u.n.a.k. piinsip ulluani. Jesusip peqqussutaa naalallugu ajoqersukkat 120-t missingi Jerusalemimi naapeqatigiipput. Taava Kristusip anersaamik iluartumik ajoqersukkat taakku kuivai, Jûîtdle 3:1, 2-mi allassimasoq eqquutillugu. Oqqat innerusullusooq niaqquisa qulaanni takutipput, oqaatsillu ilisimanngisatik atorlugit oqalulerput. (apustilit suliait 2:16-21, 33) Tamanna uppernarsaataavoq Jesusip Kristusip makititaasup qilammut isersimaneranut Guutillu saanut sassarsimaneranut inuttut naammalluinnartutut pilliummi nalinga nassarlugu inuiaat pillugit atortuulersitsinissaanut.
14. (a) Angerutsit eqqarsaatigalugit Kristusip ajoqersugai qanoq pissuseqarpat? (b) Angerusisaap pilluaqqusaaneq naleqanngitsoq suna kingunerisussaavaa?
14 Tamanna ajoqersukkanut qanoq sunniuteqarpa? Ataaseq taassagaanni, angeruseq tunngavigalugu Mosesip inatsisaanit aniguisinneqarput; Guutip angeruseq tamanna inuiaqatigiinnut uinikkut Israelikkunnut atortuulersissimavaa, nappakkamulli Jesusip naalliutsitaaffianut paagukkamiuk atortuujunnaarsippaa. (Kulorsamiut 2:13, 14; Galâsiamiut 3:13) Angeruseq tamanna angerutsimit nutaamit taarserneqarpoq, angerusisaarlu inuiaqatigiinnut uinikkut Israelikkunnut atortulersinneqanngilaq, kisianni ’inuiaqatigiinnut’ nutaanut anersaakkut Israelikkunnut atortuulersinneqarluni. (Eprîarit 8:6-13; Galâsiamiut 6:16) Angerusisaaq tamanna, Jerimia 31:31-34-mi siulittuutigineqarsimasoq, akunnermiliuttukkut pruffiitimit itsarsuaq inuusimasumit Mosesimit annerusumit aaqqissuunneqarpoq. Matumuuna iperarneqarnissaq immikkut soqutigigatsigu, angerusisaamut tunngasut ilaat aalajangersimasoq immikkut malugisariaqarparput. Apustilip Paulusip tamanna uparuarpaa, allakkami: ’Ullut makkua kingornatigut imanna angerfigissavakka, . . . ajortaallu iluaatsuliornerilu eqqaajunnaassavakka. Tamakkuli isumakkeerneqaraangata ajortit pillugit pilliutissaqarunnaararaaq.’ — Eprîarit 10:16-18.
15. Suna tunngavigalugu oqarsinnaavugut ukiumi 33-mi u.n.a.k. piinsimi tanitat eqqarsaatigalugit kristumiut Tipaatsungaarfiat aallartittoq? (Rûmamiut 6:6, 16-18)
15 Jesusip ajortimit iperarneqarnissaq uparuarpaa oqarami: ’Ernerup inussiaajunnaarsippasi inussiaajunnaarluassaasi.’ Tamanna eqqarsaatigeriaruk — Kristusip pilliutaa tunngavigalugu ajortimit iperarneqarsinnaanngortut! Piinsip ullua aallarnerfigalugu, Guutip uppertut iluartuutippai taavalu anersaakkut ernersiaralugit qilammi Kristus naalakkersueqatigissagaat neriuutissillugit. Paulus nassuiaavoq: ’Ilissimi kiffaasutut anersaaqartitaanngilasi kingumut siooraleqqullusi, kisianni qitornaasutut anersaaqartitaavusi; . . . qitornaaguttali kingornussisussaavuguttaaq, Guutimit kingornussissalluta Kristusilu kingornusseqatigissallugu.’ (Rûmamiut 8:15-17) Qularnaatsumik kristumiut tanitaasut pillugit kristumiut Tipaatsungaarfiat aallartereersimavoq.
16. Kristumiut Tipaatsungaarfiannik nalliuttorsiutiginnittut aammalu pilluaqqussutissanut sunut ilangeeqataasussaappat, sumillu neriugisaqarlutik?
16 Taava ukiumi 33-mi u.n.a.k. piinsip ulluani inuiaqatigiit nutaat anersaakkut Israelikkut pinngorput. Inuiaqatigiit taakku tassaapput inuit Kristusip aava pilliutigisaq tunngavigalugu ajortiminnik isumakkeerfigineqarsimasut. (Rûmamiut 5:1, 2; Evfisumiut 1:7) Arlaannattaluunniit miserratigisinnaanerpaa anersaakkut Israelikkut angerusisaaq tunngavigalugu angerfigineqartut siulliit taakkua iperarneqarneq nuanningaartoq atugarigaat ajortiminnik isumakkeerfigineqaramik? Guutip imaattunngortippai ’eqqarleriit qinikkat, palaseqatigiit kunngiusut, inuiaat iluartut, innuttarisassarsiat, taakkuninnga taartumit qaamasumut tupinnartumut piminut qaaqqusisup ajunngingaarutai nalunaarutigissallugit’. (1 Pîtruse 2:9) Soorunami uinikkut timaat suli naammalluinnanngitsuupput toqusussaallutillu. Guutilli iluartuutimmatik anersaakkullu ernersiarimmatik uinikkut toqunissaat ’aallarnerinnartut’ issaaq, toqunerisalu pisinnaatissavaa Kristusip ’naalagaafianut qilammiittumut’ makitinneqarnissaat. — 2 Timûtiuse 4:6, 18.
17, 18. Suna pissutigalugu kristumiut Tipaatsungaarfiatigut inussiaajunnaarsitaaneq kiffaajunnaarsitaanermit utaqqiisaannaasumit Jesusip nalunaarutigisaanit naleqarneruva?
17 Juutit uppertut paasinerlukkaminnit kukkusumillu ileqqorisartakkaminnit aniguisinneqarnerat alloriarneruvoq aallaqqaataannaasoq utaqqiisaannaasorlu naleqangaaraluartoq. Paasereersimavarpulli Jesusip anersaakkut kiffaajunnaarsitaaneq tamanna killiffiginngikkaa. Ukiumi 33-mi u.n.a.k. piinsimiilli inuit uppertut ’ajortip toqullu inatsisaannut’ kiffaajunnaarsittarpai. (Rûmamiut 8:1, 2) Tamatumuunakkut kristumiut tanitaasut pillugit kristumiut Tipaatsungaarfiat aallartippoq. Iperarneqarfik tamanna siuliminit naleqarneroqaaq, qilammimi Kristus kingornusseqatigissallugu inuunissamik neriuutissiivoq.
18 Matuma tungaanut kristumiut inussiaajunnaarsitaanerannut tunngasut ilaat marluk ukiuni hundredilinni siullerni kristumiut atugaat, miserratigisassaanngitsumik nuannaarutissaasut, misissorpavut. Uppertullu ukiuni hundredilinni siullerni inuusut nuannaarluarput. (apustilit suliait 13:44-52; 16:34; 1 Korintumiut 13:6; Filípimiut 4:4) Pingaartumik kristumiut Tipaatsungaarfiannut ilangeeqataanertik nuannaarutigaat, tamannami qilammi naassaanngitsumik pilluaqqusaanissaannik pisinnaalersitsivoq. — 1 Pîtruse 1:3-6; 4:13, 14.
19. Kristumiut anersaamit ernersiarineqanngitsut eqqarsaatigalugit suna suli apeqqutaava, suullu takutitsiarpaa Guutip iperarneqartitsinissaanut ilangeeqataassasut?
19 Ullumikkulli kristumiut amerlanersaat iluartuutitaannginnamik anersaamillu iluartumit tanitaannginnamik tamakkununnga sumut inissinneqarpat? Kristumiut Tipaatsungaarfiannut atatillugu kisissaanngitsut taakkua iperarneqarfissaat ilimagissallugu Bibelimik tunngaveqartumik pissutissaqarpoq. apustilit suliáinik agdlagkane 3:20, 21-mi allassimasoq eqqaaniaruk: ’Kristus Jesus, taassuma qilak inigissagaa ullut suut tamarmik kingumut iluarsivissaat nalliutserlugit, tamakku Guutip itsarsuarmit pruffiitimi iluartut qarnisigut oqaatigai.’ (Naleqqiuguk apustilit suliáinik agdlagkat 17:31.) Tamatumunnga naapertuuttumik Johannes, apustili tanitaq kristumiut Tipaatsungaarfiannik nuannaarutiginnilereersimasoq, Jesus Kristus pillugu allappoq: ’Taannalu ajortitta matoorneqaatigaat, uaguinnaangitsummi, silarsuarmiuttaaq tamarmik.’ (1 Juánase 2:2) Tamanna ima paasisariaqarpa ullumikkut kristumiorpassuit ilumoortut qilammi inuunissamik neriugisaqanngitsut kristumiut iperarneqarsimanerannik nuannaarutiginnissinnaasut? Tamanna siunissami aatsaat nuannaarutigisinnaalissanerpaat, imaluunniit nuannaarutigisinnaalereersimanerpaat? Tamanna paasiniarsinnaavarput kristumiut iperarneqarnerata Tipaatsungaarfimmullu tunngasut ullumikkut eqqortumik guutisiortunut immikkut pingaaruteqartut misissorutsigit. (wD 1/1 87)
[Quppernerup ataani ilanngussaq]
a Nalliussivik ukiumoortoq ulloq saammaannartitsivik epræerit qaammatisiutaat najoqqutaralugit qaammatip tisjrip qulinganni pisarpoq, uagut qaammatisiutivut najoqqutaralugit septemberi-oktoberimut naapertuuttoq.
Illit uku qanoq eqqarsaateqarfigaagit?
□ Itsarsuaq Israelikkut Tipaatsungaarfik qanoq iluaqutigisarpaat?
□ Iperarneqarnissaq aallaqqaataannaasoq Jesusip qanoq ililluni nalunaarutigaa, suullu pineqarpat?
□ Kristumiut Tipaatsungaarfiat qanga aallartippa, sunalu tunngavigalugu isuma tamanna inerparput?
□ Suna pissutigalugu qilanaarisinnaavarput kristumiut anersaamit tanitaanngitsut millionilippassuit iperarneqarnissaat?
[Qupp. 14-mi issuagaq]
’Iluartut ingerlaviata assigaa qaamasoq akisuttoq, qaammarissiartortoq ulloq naammatsitserlugu.’ (ússatit 4:18) Najoqqut tunngaviusoq tamanna najoqqutaralugu ilanngutassiami uani tulliuttumilu Tipaatsungaarfik annertunerusumik pitsaanerusumillu nassuiarneqassaaq.
[Qupp. 16-mi assiliartaq]
Ukiumi 30-mi u.n.a.k. Jesusip iperarneqarnissaq nalunaarutigaa
[Qupp. 19-mi assiliartaq]
Kristumiut Tipaatsungaarfiat ukiumi 33-mi aallartippoq