Kristumiut tipaatsungaarfiata ukiuni tuusintilinni naalagaaffiusumi pingaarnerpaaffini angussavaa
1. Kunngiitsuuffimmi Israelimi juutit suna atulerseqqinniarsimanngilaat, sunalu pissutigalugu?
KUNNGIITSUUFFIMMI Israelimi (1948-mi tunngaviligaasumi) allaat juuterpassuit Mosesip inatsisaasa ataanniisorisut ukiup Tipaatsungaarfiup nalliuttorsiutigineqartarnera atulerseqqissimanngilaat. Atulerseqqinniassagaluarpassulli ajornakusoortorujussuussagaluarpoq. Illunik nunaatinillu piginnittussaassutsit apeqqutaassammata aningaasatigut sakkortoqisunik ajornartorsiuteqassagaluarpoq. Kunngiitsuuffiup Israelip nuna itsarsuaq naggueqatigiit arqaneq-marluusut najugarisaat tamaat ilaginngilaa. Aammalu naalaffeqanngilaq Levikkut naggueqatigiissortaanneersumik palasiunertalimmik, naggueqatigiit ilaqutariinnut nalunaarsuiffiit tammarsimammatigik.
2. Kristumiut ilaasa qanoq ilillutik Tipaatsungaarfik itsarsuaq Israelikkut Tipaatsungaarfiannut assersuunneqartoq nalliuttorsiutigilereersimavaat?
2 Taamaammat Tipaatsungaarfimmik nalliuttorsiutiginninnerup pilluaqqussutissartai suut neriugisinnaavavut? Eqqaamavarput itsarsuaq Tipaatsungaarfik ukiuusoq nalliuttorsiorpaluttoq iperarneqarfiusoq — Israelikkut inussianngorlutik akigitittut iperarneqarput, nunaatillu pigisaagaluit kingornussaajuartussat utertinneqartarput. (3 Môrsase 25:8-54) Ilanngutassiami matuma siulianiittumi paasivarput aaqqissuussaaneq tamanna angeruseq tunngavigalugu Mosesip inatsisai ilanngullugit ukiumi 33-mi u.n.a.k. atortuujunnaarsitaasoq. (Rûmamiut 7:4, 6; 10:4) Taava angeruseq nutaaq atortuulersitaavoq, tamannalu tunngavigalugu Guutip uppertut ajortaannik isumakkeerfigisinnaavai, anersaamik iluartumik tanissinnaallugit, ernersiarisinnaallugillu qilaliartussanngortillugit. (Eprîarit 10:15-18) Angerutsimilli aaqqissuussaanermik nutaamik tamatuminnga iluaqutiginnittut ’savarpannguupput’ 144.000-inik amerlassusillit ’nunamit pisiaasut’. Taava kristumiut ilumoortut millionilippassuit allat qanoq iperarneqarsinnaassappat, soorlu ukiumi Tipaatsungaarfimmi taamatut pisoqassasoq allaaserineqarsimasoq? — Lúkarse 12:32; sarĸúmersitat 14:1-4.
Pilliut tamanut atortoq!
3. Jesusip pilliutaa qanoq kinguneqarluartigaa, qanorlu sivisutigisumik atasussaava?
3 Kristumiut nalaata siornatigut ullup saammaannartitsiviusup ukiumoortup iluaqutissartai ukiumut ataasiinnarmut atortuusarput. Naalakkap Jesus Kristusip pilliutaata utertitsissutaasup iluaqutissartai ataavartussaapput, soraajuitsuullutik. Taamaammat palasiuneq illua-tungiliuttoq, Jesus, inunngoqqittariaqanngilaq, inuunini tunniuteqqillugu, taavalu qilammut uterluni, pilliutimi nalinga ukiut tamaasa illernarnerpaami Jehova Guutip piani sassaattarlugu. Soorlu Bibelimi allassimasoq: ’Kristus toqusunit makititaasoq ilisimagatsigu kingorna toqunaveersoq, toqu taassumunnga naalajaajunnaarpoq.’ — Rûmamiut 6:9; Eprîarit 9:28.
4, 5. (a) Ukiumi 33-mi u.n.a.k. piinsimiilli Jesusip pilliutaata atorneqarnerata suna kinguneraa? (b) Suup takutitsiarpaa pilliutip tamatuma annertunerusumik atorneqarumaarnissaa?
4 Taamaattumik, ukiumi 33-mi u.n.a.k. piinsimiilli ukiut qaangiussortut, uppertut Naalakkamut Jesusimut naalannarsisitamut ajoqersugaallutik anersaakkut iluartukkut ernersiarineqarnerminniilli, kristumiut Tipaatsungaarfiat nalliuttorsiutigilersarpaat. ’Ajortip toqullu inatsisaannut kiffaajunnaarsitaagamik’ pissaanermik nakuussusermillu immerneqarput. (Rûmamiut 8:1, 2) Aammattaaq kristumiut tusarliussassaat tusarliuttarpaat inuit allattaaq ajortiminnik isumakkeerfigineqarsinnaaqqullugit, taninneqarsinnaaqqullugit Guutimullu anersaakkut ernersianngorsiinnaaqqullugit. Tassali imaappa inuk katersanut 144.000-inut killilikkanut ilaasuunngikkuni, tipaatsunnartumik iperarneqarnissamik angusaqarsinnaanngikkallartoq?
5 Tamatumunnga atatillugu apustilip Paulusip oqaasii Rûmamiunut agdlagkane 8:19-21-mi allassimasut malugisariaqarput: ’Pinngortitammi kipisallutik neriuttut Guutip qitornaasa saqqummersitaanissaat utaqqivaat; pinngortitammi naalatsigititaapput piunngitsumut [ajortiliugamik ajortilu atorunnaarsissinnaannginnamikku].’ Taava Paulusip erseqqissarpaa neriuutissaqartoq ’pinngortitattaaq aserujasumut kiffaasut kiffaajunnaarsinneqarumaartut Guutip qitornaasa kiffaanngissusiata naalannaataat pigilerlugu’. Tassa: kiffaanngissutsimik tamatuminnga piginnittut tassaannaanngillat ’Guutip qitornai’ qilammiittussat. Oqaatsit ilisimaneqarluartut Juánase 3:16-imiittut tamanna uppernarsarpaat. Aammalu, soorlu taareeripput, apustili Johannes tanitaq oqarpoq Kristus toqusoq ajortivut pillugit, ’uaguinnaanngitsummi, silarsuarmiuttaaq tamarmik’ ajortaat pillugit. — 1 Juánase 2:2.
1919-imi iperarneqarallarneq
6, 7. 1919-imiilli iperarneqarneq qanoq ittoq nalunaarutigineqartarpa, sunalu pissutigalugu pingaartumik taamanerniilli?
6 Ukiuni nutaanerusuni sinneruttut tanitaasut kristumiut Tipaatsungaarfiannik nalliuttorsiutiginnittut pingaartumik 1919-imiilli tusagassaq nuannersoq kiffaajunnaarsitsissutaasoq tusarliuttarpaat. Inuusunneruguit immaqa eqqarsaatigeqqajarpat soormi taamanerninngaanniit pisimava? Tamanna pasiniariartigu, nalunnginnatsigu illit iperarneqarnissat apeqqutaasoq.
7 Tamatuma siunersuatigulli Jehovap tanitaasa ajoqersuutit ilumoortut Bibelimeersut atuaganngorlugit naqitertittarpaat, soorlu atuakkani nangeqattaartuni ilisimaneqarluartuni Studies in the Scriptures (Allakkanik Illernartunik atuaqqissaarutit) (1886-1917). Aammattaaq atuagaaqqat naqitigaaqqallu paasissutissallit amerlaqisut agguartarpaat. Sorsunnersuup siulliup nalaani assortorneqalerput, misiligaanernik atugaqarlutik pitsaanersiorneqarlutillu, suliassartillu tuaviuukkunnaarlugu. 1919-imili sinneruttut tanitaasut aallussilluarnerigaluartik peqqissimallugu aallarput ajoqersuutit Bibelimeersut nalunaarutigiartorlugit. Soorlu Jesus ukiumi 30-mi u.n.a.k. oqarsinnaasimasoq tanitaalluni ’aallarussaasut torlulaffigeqqullugit iperarneqarnissamik, tappiitsullu tappissinissamik’, ullumikkut tanitat taamatuttaaq oqarsinnaapput. 1919-imi septemberip siullianniit 7-iat tikillugua pissanganartumik ataatsimeersuareeramik, pissaanermik ilungersornermillu peqarlutik sulilerput sallusuissut inunnik kisissaanngitsunik inussiaajunnaarsitsisoq oqaluussissutigalugu.
8, 9. Amerlasuut qanoq isumalimmik iperarneqarsimappat, suullu sakkugalugit iperarneqarneq tamanna nalunaarutigineqartarpa?
8 Assersuutigalugu taasigu Bibelimik atuaqqissaarnermut ilinniut The Harp of God (Kukkilattariaq Guutip pia) (1921). Tassani Bibelimi ajoqersuutigineqartut pingaarnerit kukkilattarissap noqartaanut quliusunut assersuunneqarput. Atuakkami miserratigineqanngilaq „inuit ilarpassuisa Bibeli atuaqqissaarumanngikkaat“ annilaarutigigamikku ajoqersuut „iluaatsut pillaatisiassarissagaat . . . naassaanngitsumik naalliutsitaaneq anniartitaanerluunniit anniarfimmi innermik qamiuitsumik ikuallassaammillu ikualasumi“. Atuakkamik taassuminnga 6.000.000-ingajanngorlugu naqiterneqartumik atuartut paasivaat ajoqersuut taanna „ilumoorsinnaanngitsoq pissutit minnerpaamik sisamat immikkoortut erseqqarissullu pissutigalugit: (1) tunngaveqartumik eqqarsarnermut naleqqutinnginnami; (2) naapertuilluarnermik eqqarsarnermut akerliulluinnarami; (3) asanninnermik najoqqutassamut akerliugami; aammalu (4) Bibelimik tunngaveqanngilluinnarami“. Takorloorsinnaavarput inuit anniarfimmi naassaanngitsumik anniartitaanissaq imaluunniit eqqiarfimmi naalliutsitaanissaq ersissutigalugit meeraanerminniilli inuusimasut tamanna qanoq eqqissiallaatigitigigaat!
9 Aap, tanitat taakkua Bibelimi ajoqersuutigineqartunik ilumoortunik aallussilluarlutik oqaluussissutiginninnerata silarsuarmi tamarmi inuit ajoqersuinerluutinut, upperisapalaanut ileqqunullu Bibelimik tunngaveqanngitsuusunut (soorlu siuaasaminnik pallorfiginninnermut, aliortukkanut imaluunniit anersaapilunnut ersinermut, palaseqatigiinnillu aningaasatigut atornerlugaanermut) inussiaagaluartut inussiaajunnaarsippai. Bibelimik atuaqqissaarnermik ilinniutit ilaasa taaguutaat inunnut millionilippassuarnut inussiaajunnaarutaasumik sunniinerannut malunnaataapput.b Taamaattumik Jesusip oqaasii eqquupput, oqarami ajoqersugaasa suliarisimassami ’angeqqingiluunniit suliariumaaraat’. (Juánase 14:12) ’Aallarussaasut torlulaffigalugit iperarneqarnissamik’ Jesusip anersaakkut inussiaajunnaarsitsineranut aqqutissiuisuusumut naleqqiullugu, Guutip kiffaasa ullumikkumeersut annertuneroqissoq suliarisimavaat — silarsuarmi tamarmi inuit millionilippassuit angusimagamikkik.
10. Suna pillugu ilimagisinnaavarput kingumut annertunerusumillu iperarneqarnissap nalliunnissaa?
10 Eqqaamaniarulli ukiuni hundredilinni siullerni iperarneqarneq allaasoq ukiumi 33-mi piinsimi aallartittoq. ’Savarpannguit’ ajortiminnik isumakkeerfigineqarnertik tunngavigalugu qilammi ’Guutip qitornaanik’ taaneqartussat eqqarsaatigalugit kristumiut Tipaatsungaarfiat taamani aallartippoq. Ullutsinnimi? Kristumiut tunniulluinnartut millionillit allat ajortimut inussiaajunnaarsinneqarsinnaappat Tipaatsungaarfillu nuanneqisoq nalliuttorsiutigilerlugu? Aap, apustilillu Peterip tamanna takutitsiarpaa eqqartoramigit ’ullut suut tamarmik kingumut iluarsivissaat Guutip itsarsuarmit pruffiitimi iluartut qarnisigut oqaatigisai’. — apustilit suliait 3:21.
Millionillit Tipaatsungaarfissaat
11. Môrsasip agdlagaisa pingajuisa kapitaliisa 25-anni allassimasup suup takutitsiarpaa anersaakkut Israelikkuinnaanngitsut iperarneqarnissaat qilanaarisinnaagipput?
11 Malugisariaqarpoq Môrsasip agdlagaisa pingajuisa kapitaliisa 25-anni, Israelikkut marloriarlugu eqqaasinneqartut Jehovap isumaa naapertorlugu taassuma ’kiffarigaatik’ Ægyptenimit anisitai. (Versit 42 aamma 55) Kapitalimi Tipaatsungaarfimmik eqqartuiffiusumi tassani ’illusisitaat’ aamma ’ilinni takornartaasut’ eqqartorneqartarput. Taakkununnga illua-tungiliuttut ullumikkut tassaapput ’amerlangaartut’ anersaakkut Israelikkut suleqatigalugit kristumiut tusarliussaannik nuannersumik nalunaarutiginnittut.
12. 1935-miilli sumik pilluarnartumik ineriartorneqarpa?
12 1935-miilli ’paarsisup ajunngitsup’ Jesus Kristusip taasani ’savat allat’ sinneruttunut tanitaasunut suleqatigisippai. Oqarsimavoq taakku ’aggiussassarigini’, tassaassasullu ’savaatit ataatsit’ ’paarsisup ataatsip’ ataaniillutik. (Juánase 10:16) ’Savat allat’ arlalinnik millionilinngorsimapput. Amerlangaartut pilluartut taakkua ilagippatsit, Guutip ikinngutaasa ilagimmatsit iluartutut naatsorsuunneqareersimavutit, pinngortitallu inuit ilagimmatsit qilanaarisimassavat ’aserujasumut kiffaajunnaarsinneqarnissat’ nunami ’ullut suut tamarmik kingumut iluarsivissaat’ nalliuppata. Tamanna neriuutigalugu neriulussinnassanngilatit. — Rûmamiut 8:19-21; apustilit suliait 3:20, 21.
13. Pilluaqqusaaneq immikkut ittoq annikilliornartussap angisuup kingornatigut piumaartussaq suna malugisariaqarparput?
13 144.000-it qilammi inuunissamik neriugisaqarlutik kristumiut Tipaatsungaarfiannik nuannaarutiginnittut takoreeramigit, apustili Johannesip ’amerlangaartut’ oqaatigai, oqarluni: ’Tassaaku annikilliornartumit angisuumit pisut, atisatillu takisuut savaaqqap aavanik errorpaat qaqorsarlugillu. Tamanna pillugu Guutip issiavissaarsuata saaniipput naalaffiutaani kiffartuullugu ullukkullu unnuakkullu.’ — sarĸúmersitat 7:14, 15.
14, 15. Suna pissutigalugu ’amerlangaartut’ ingammik maannakkut tipaatsuffissaqarpat?
14 Maannakkut annikilliornartussap siornatigut allaat, taakkua Kristusip aava kuisaq suliaqarlutik upperfigaat, taamaattumillu pilliutitut toqunera iluaqutigalugu. Aammattaaq nuannaarput Babylonimit angisuumit aniguisitaagamik, Jehova Guutip isaani ilerasuuteqannginnamik immikkullu pisinnaatitaaffigigamikku Matîuse 24:14-imi allassimasup eqquunneranut peqataaneq, naalagaaffimmik tusagassaq nuannersoq naggatissap nalliutinngikkallarnerani oqaluussissutigigamikku.
15 Amerlangaartulli ajortimit inunnguutsimit pigisaminnit naammalluinnanngissutsimillu iperarneqarsinnaanissaat qanoq oqaatigineqarsinnaava? Qanippa? Jesus Kristusip siulittuutigisimavaa inuit kinguaariissortaasa ilaat aalajangersimasut toqussanngitsut piumaartussat siulittuutigineqartut tamaasa naammassisinnagit. Kinguaariit taakkua ilaasa suli inuusimanissaat upperissallugu pissutissaqarluarpugut. (Matîuse 24:34) Taamaammat ’pissutsit aaqqissuussaanerata naalerfissaata’ naammassinissaa pissanganaqisoq qanillisimassaaq.
Kristumiut Tipaatsungaarfiata pingaarseruttuutigisai alutornartut
16. Guutip siunertaasa naammassiartorneranni sumut killippugut, suullu atugassaraavut?
16 ’Sorsunnissaq Guutip ajugaqanngitsup ullussarsuani piumaartoq’ qanillinasuarpoq, ’savarpannguillu’ sinneruttut iligisaasa unneqqarissut ilumoortullu ’amerlangaartut’ Jehovamut assuarnaassusertik aalajangiuttuassavaat Guutimillu sernissugaanissartik qilanaaralugu. (Hâpakuk 2:3) Jehovap akeqqaminik iligiiusunik tamanik ajugaaffiginninnissarujussua pissangallutik utaqqivaat, tassuunami Guuti qilammi nunamilu tamarsuarmi kisimi oqartussaasutut akitsisinneqassaaq. Kristumiut kiffaanngissutsiminnik nuannaarutiginninnerata tamanna pingaarseruttuutigissavaa! — sarĸúmersitat 16:14; 19:19-21.
17. Tipaatsungaarfimmi nuanningaartumi inuit suli millionillit qanoq ilillutik iperarneqassappat?
17 Tamatuma kingornagut kunngi ajugaasoq Jesus Kristus nunamut minguersagaasumut naalagaassaaq, Jehovap qilammi nunamilu tamarmi kisimi oqartussaanera uppernarsarneqaqqissimatillugu, Jesusilu Kristus kunngit kunngiattut naalakkallu naalagaattut nunamik tamatigut naalakkersuissuutillugu. Taamanikkussaq pilliummi iluaqutissartaa toqqaannartumik atorumaarpaa inuit millionilippassuit, toqusut makititaasut ilanngullugit, suliaqarlutik uppertut Guutillu Kristus aqqutigalugu ajortinik isumakkeerfiginninneranik ilassinnikkumasut iluaqutissaannut. Tamanna malunnartinneqassaaq Guutip ’qulliit tamaasa isaannit allarterumaarmagit, toqulu peqarunnaassaaq, aliasuttoqarunnaarlunilu nilliasoqarunnaarlunilu anniartoqarunnaassaaq’. (sarĸúmersitat 21:3, 4) Tamanna tassaassannginnerpa piviusumik iperarneqarneq?
18. Soorlu itsarsuaq Tipaatsungaarfimmi pisartumut assersuunneqartoq, aaqqissuussinissami nutaassami nuna qanoq pineqassava?
18 Aammattaaq nuna inunnit ataasiakkaanit, suliffissuaatileqatigiinnit naalakkersuisunillu piumatuunit naalakkersorneqassaassaaq, mingutsinneqassaasallunilu asiutinneqassaassallunilu. (sarĸúmersitat 11:18) Nunali eqqortumik pallorfiginnittunut utertinneqassaaq. Nuannaarutigalugu suliassinneqassapput Esajasip siulittuutaanik eqquutitsinissamut peqataanissamik: ’Illuliorumaarput inigalugillu; viinnequtinik ikkussuiumaarput paarmaallu nerillugit. Illuliussanngillat allap inissaanik, ikkussuissanngillallu allap nerisassaanik . . . Asuliinnaq erloqissanngillat, ernissanngillallu toqussutissamik; Jehovap pilluaqqusaasa kinguaat tassaammata.’ (Isaia 65:21-25) Ukiut tuusintit naalakkersuinerup naanissaani ajortimut kingornussaasumut naammalluinnanngissusermullu malunnaatit tamavimmik piiarneqarsimassapput, Guutillu ilumoorfiginnittaasa nunamiittut Tipaatsungaarfiup naammassiseruttorfia nalliuttorsiutigissavaat. Tamatumuuna aniguisitaaneq Tipaatsungaarfimmut assersuunneqarsimasoq naammassineqarsimassaaq. — Evfisumiut 1:10.
Tipaatsungaarfiup pingaarseruttorfiata kingornagut
19, 20. Satanip inngilipiluillu qanoq ilillutik ukiuni tuusintilinni Tipaatsungaarfiup pilluaqqussutissartai akornuserniassavaat, sunali kinguneralugu?
19 sarĸúmersitat 20:1-3-mi siulittuutigineqarpoq Satan Diaavulu, inngilipiluit naalagaat, ukiuni tuusintini Kristusip inuiannut naalagaaffiani peqassanngitsoq. Ukiut tuusintit naanissaanni Diaavulu inngilipiluilu sivisunngitsumik iperagaagunik, anersaat ajortut taakkua peerneqaramik nuna takusimasamittut inngitsoq kisianni nunarsuaq tamakkerlugu paratiisitut kusanaffarissutut ittoq takussavaat. Nuna tamakkerlugu ’amerlangaartunik’ ilumoortunik aammalu toqungagaluartunik makissimasunik arlalinnik milliardillit Jesus Kristusip pilliutitut utertitsissutaasutut toqussutigisaanik inoqartoq takussavaat. Naalagaaffiup ukiunik tuusintinik sivisussusillup naanissaani kristumiut Tipaatsungaarfiata siunertaa naammassissaaq, siunertaa taassaammat inuiaat ajortip kingunerinit aniguisinneqarluinnarnissaat. (Rûmamiut 8:21) Pissutsit pitsaalluinnartut taakkua aserorterniassallugit uuminassusissaa kanngunassusissaalu! Guutilli ajugaqanngitsup akuersineratigut Diaavulu naggataarluni taamaaliorniassaaq, uumissuillunilu narrujuummingaarluni saassussiartussaaq. Taamaaliornissaa sarĸúmersitat 20:7-10-mi allaatigineqarpoq imannak:
20 ’Ukiullu taakku tuusintillit naammatsippata Satan qilerussaarneqassaaq parnaarussivimminit peerluni. Aniumaarporlu inuiaqatigiit nunap teqeqquini sisamani tammartinniassallugit, Gogilu Magogilu, sorsunnissamut katersorniassallugit, immap sioraasut amerlatigisut. Majuarpullu nunap inituneragut, iluartullu tammaarfiat illorpassuaqarfillu asasaq iluaat, innerlu qilammit Guutimit nakkarpoq nungutillugillu. Diaavululu taakkuninnga tammartitsisoq tatsimut innerusumut ikuallassaataasumut . . . igitaavoq.’
21. Ukiut tuusintillit naammatsinneragut kristumiut Tipaatsungaarfiat naammatsippat, Guutip ernerisa qilammiut oqaasii suut Jûpe 38:7-imi allassimasumut eqqaanassappat?
21 Piviusumik kiffaanngissuseqarneq, Tipaatsungaarfimmik aaqqissuussaakkut naammassineqartoq, tamatigut atuukkumaarpoq; pinngortitat tamarmik kiffaanngissuseqassapput taannalu kisimi Jehovamik atilik ataqqissallugu. (Tussiaat 83:18) Pissuseq tamanna atuuttuaannassaaq Jehovap siunertani qilammi nunamilu tamarsuarmi naammassiniartuartillugu. Nunap pinngortinneqarneranut atatillugu, inoqanngikkallarmat, takorannersoq takuleramikku ’qaasiutit qiimmattaqatigiipput, Guutip erneri tamarmik tipaatsungaarput’. (Jûpe 38:7) Suli annerusumik taamaaliussannginnerpat nuna angutinik arnanillu Guutimut ajugaqanngitsumut tunniulluinnarnerminnik assuarnaassutsiminnillu takutitsisimasunik uppernarsaasimasunillu inoqartoq takulerunikku?
22. Uagut qanoq isumaqartariaqarpugut, kajumissaarut Tussiaat 150:1-6-imi allassimasoq najoqqutaralugu?
22 Qaamangaarneq alutornangaartoq maannakkut Allakkanut Illernartunut qaammarsaataasoq qaammaqqutigalugu suut tamaasa eqqarsaatigigutsigit, qilammiut ingiaqatigalugit qimmatsanngitsoorsinnaanngilagut, oqarluta: Halleluja! Tussiaatit uatsinnut kajumissaarut tamanna naggasiutigaat: „Halleluja. Erinalimmik unnersiutigisiuk Guuti illernartuummi pigisaani, erinalimmik unnersiutigisiuk qilaani angingaaqisumi. Erinalimmik unnersiutigisiuk suliai angingaartut pillugit, erinalimmik unnersiutigisiuk angingaassusia pillugu! Erinalimmik unnersiutigisiuk sulluartaatip nipaanik, erinalimmik unnersiutigisiuk kukkilattarissamik sianaamillu, erinalimmik unnersiutigisiuk qilaatinik, kaaffallusilu, erinalimmik unnersiutigisiuk noqartilissorlusi qarlortarlusilu, erinalimmik unnersiutigisiuk avilortunik sianaalasunik, erinalimmik unnersiutigisiuk kanngussammik sianaartumik! Anerneqartut tamarmik Naalagaq erinalimmik unnersiutigissavaat! Halleluja.“ — Tussiaat 150:1-6. (wD 1/1 87)
[Quppernerup ataani ilanngussat]
a Taamani atuagassiaq saqqummersartussaq saqqummersinneqaqqaarpoq, tassaassasoq „soorlu nipi ularussinerup puilasuitsortaani tutsiuttartoq, siunertarigamiuk ullut pilluarnangaartut atuutilerfissaat nalunaarutigissallugu“. Ullumikkut Vågn op!-imik taaguuteqarpoq.
b Millions Now Living Will Never Die (Millionillit maannakkut inuusut toqunngisaannassapput) (1920); Deliverance (Aniguisitaaneq) (1926); Freedom for the Peoples (Inuiaat iperarneqarnissaat) (1927); Liberty (Iperarneqarnissaq) (1932); „The Truth Shall Make You Free“ (’Sallusuissutip inussiaajunnaarsissavaasi’) (1943); What Do the Scriptures Say About „Survival After Death“? („Toqup kingornagut inuujuarnissaq“ Bibelimi qanoq oqaatigineqarpa?) (1955); Life Everlasting — In Freedom of the Sons of God (Inuuneq naassaanngitsoq — Guutip qitornaasa kiffaanngissusiatigut) (1966); The Truth That Leads to Eternal Life (1968) (sagdlusuíssut inûnigssamut nâgssáungitsumut sangmissoK, kalaallisuunngortitaq); The Path of Divine Truth Leading to Liberation (Sallusuissutip Guutimeersup aqqutaa iperarneqarnissamut sammisoq) (1980).
Illit uku qanoq akissavigit?
□ Ukiumi 33-mi u.n.a.k. piinsimiilli Jesusip ajoqersugai sumit iperarneqarpat, tassuunalu taakku pillugit suna aallartippa?
□ Suna pillugu iperarneqarnermit ukiuni hundredilinni siullerni pisimasumit annerusoq ilimagisinnaavarput?
□ 1919-ip kingornagut iperarneqarneq suna piva?
□ Qanoq ilillutik qaqugulu ’savat allat’ Tipaatsungaarfik nuanningaartoq iluaqutigissavaat?
[Qupp. 22-mi assiliartaq]
’Savat allat’ ukiuni tuusintilinni Tipaatsungaarfimmut ilangeeqataapput