Imigassaq kristumiup qanoq isigisariaqarpaa?

„KIKKUT anniartarpat? Kikkut uumitsattarpat? Kikkut saqitsaattarpat? Kikkut isumanerluuteqartarpat? Kikkut asuliinnaq ikilerneqartarpat? Kikkut nukillaangasunik iseqartarpat? Viinnimik sammisaqartuartut.“ (ússatit 23:29, 30, NV) Aap, Bibelimi misiutigineqanngilaq aalakoornartunik imigassartortarneq kingunipiloqarsinnaammat: takorruuisalerneq, ileqqorluttunngorneq, isumakkut nappaateqalerneq, peqqiilliulerneq, ilaqutariinni ajornartorsiuteqalerneq aammalu piitsunngorneq.

Malugiulli allassimaffiup matuma siulianiittup eqqartormagit „viinnimik sammisaqartuartut“, tassa ileqquliutiinnarlugu imerajuttut! Taamaattunut imigassaq toqunartutut sunniuttarpoq, timikkut isumakkullu anniaatinik malitseqarajulluni. (ússatit 23:32-35) Inuit aalakoornartunik imerpallaartut imminnut naalakkersorsinnaassuseerussinnaasarput iliuutsillu siornatiguusuuppat kanngusuutigisimasassaraluatik iliuuserisalersarlugit. Taamaattumik Bibeli ima mianersoqqussuteqarpoq: „Viinnimik imerajuttut ingasattumillu neqitortartut akornanneeqinak, imerajuttut nerivallaartullu piitsunngussammata, aramasorlu alittorsimasunik atisaqassammat.“ (ússatit 23:20, 21, NV) Aamma imerajuttuuneq, ’uinngup suliaanut’ ilaavoq, taamaattumillu Guutip naalagaaffianut isernissamik akornusiisinnaalluni. — Galâsiamiut 5:19, 21; 1 Korintumiut 6:10.

Imigassaq pillugu Bibeli qanoq oqarpa?

Tamanna ima paasisariaqarpa kristumiut imigassartoqqusaanngilluinnartut? Palasimmi Nigeriamiup oqaasii, ilanngutassiami matuma siulianiittumi issuarneqartut, tassa ’angut silatuujuguni viinnimik iminngisaannartoq’? Taassuma ússatit 20:1-imi allassimasoq eqqarsaatiginnguatsiarpaa, tassa: ’Viinni mitallersorsuuvoq, imigassaq silaarunnartoq perpaluttartorsuuvoq; tassunga tammartut ilisimatuunngussanngillat.’ Tassanili Bibelip pinngilai inuit viinnimik imertut — pivaali ’tassunga tammartut’! Silatuujunngitsut tassaapput „viinnimik sammisaqartuartut“ aamma „viinnimik imerajuttut“.

Isaia 5:11, 22 aammattaaq misissoriartigu, allassimammat: ’Eqqanaq ullaakkut makiaartut imigassaq silaarunnartoq piniarlugu mulullutillu taarsitserlugu, viinnimut kissatsitserlutik; eqqanaq viinnisornermut pissaasut, silaarunnartumik imissiullaqqissut.’ Esajasip sunaana assuarigaa? Tassaannginnerpa killeqanngitsumik imerneq, ullaamiit ’taarsitserlugu’ imerneq?

Atuarparput Guutip kiffai ilumoortut — soorlu Abraham, Isak aamma Jesus — killilimmik viinnisortarsimasut. (1 Môrsase 14:18; 27:25; Lúkarse 7:34) Aammattaaq Bibelimi viinni taaneqarpoq tassaanerarneqarluni Jehovamit pilluaqqussutit ilaat. (1 Môrsase 27:37, NV; 5 Môrsase 11:14; Isaia 25:6-8) Allaammi Bibelimi taaneqarpoq viinni ingasaassinngitsumik pisarlugu iluaqutaasumik sunniuteqarsinnaasoq. Viinni, „inunnik nuannaalersitsisoq“, tussiaasiortoq oqarpoq. (Tussiaat 104:15) Aamma apustili Paulusip Timoteus ima siunnersorpaa: ’Imiinnarmik [mingutsitamik] imissaarlutit viinnimik pitsiartarniarit nasserisaravit ajukuluttaravillu.’ — 1 Timûtiuse 5:23.

Viinni imaluunniit viinnissat tunguat?

Inuit ilaasa oqaatiginiartarpaat viinni allassimaffinni taama ittuni eqqartorneqartoq tassaaginnartoq viinnissat tunguat akusaanngitsoq. Kisianni McClintockimit Strongimillu Cyclopedia-mi erseqqissarneqarpoq „Bibelimi viinnit aalakoornartortallit viinnillu aalakoornartortaqanngitsut immikkoortinneqanngitsut aammalu immikkoortitsinermut taama ittumut unnersuussuteqanngisaannarluni“. Taamatullu Bibelimi viinni imigassatut aalakoornartutut eqqartorneqarpoq, aammalu ’imigassamut silaarunnartumut’ atatillugu eqqartorneqarluni. — 1 Môrsase 9:21; Lúkarse 1:15; 5 Môrsase 14:26; ússatit 31:4, 6.

Tamatumunnga atatillugu assut soqutiginarpoq Jesusip siullerpaamik tupinnartuliorami imeq viinninngortimmagu. Bibelimi oqaluttuaq imaappoq: ’Nerliiassalerisulli imeq viinninngorsimasoq ooqattaaramiuk sumillu pisoq nalugamiuk, . . . taava nerliiassalerisup uissaq qaaqquaa oqarfigalugulu: „Inuit tamarmik viinni pitsaaneq siulliullugu sassaalliutigisarpaat, inuillu aalakuuleraangata pikkunaanneq pisarpaat; illit viinni pitsaaneq manna tikillugu toqqorpat.“’ (Juánase 2:9, 10) Aap, ’viinni pitsaaneq’ Jesusip sanaava viinniviuvoq.

Upperisarsiortut siulittaasuisa ilumoortuusaarniartut Jesusip nalaani inuusut Jesus uparuarpaat ilaannikkut viinnisortarmat. Taamaattumik Jesusip ima oqarfigai: ’Johannesimi kuisisoq tikiummat timiusamik nerinani viinnimillu imernani, oqarpusi: „Anersaapiloqarpoq.“ Inuup ernera tikiummat nerillunilu imerlunilu, oqarpusi: „Takuarsi inuk una nerrersooq viinnimillu imertorsuaq.“’ (Lúkarse 7:33, 34) Taava Jesusip Johannesillu suna assigiinngissutigissagaluarpaat Jesus viinnissat tunguanniinnaq aalakoornartortaqanngitsumik imersimagaluarpat? Eqqaamajuk Johannes pillugu ima allassimasoqarmat: ’Viinnimillu imigassamillu silaarunnartumik imissanngilaq.’ — Lúkarse 1:15.

Taamaattumik ersarippoq Jesusip killilimmik aalakoornartortalimmik imertut assuarinngikkai. Taamanikkut poorskisioraangamik viinnisortussaasarput, taamatullu aamma Naalakkap unnukkorsiortitsineranik eqqaaniaanermi, poorskip taartigisaani, viinnivik atorneqartuassalluni.a

Siuneqassuseq pisariaqarpoq

Tassa Bibelimi aalakoornartortalinnik imerneq inerteqqutigineqanngilaq. Taamaattumillu amerlanertigut inuup nammineq aalajangigassaraa aalakoornartortalinnik imissanerluni imissannginnerluniluunniit. Bibelimili imerajuttuuneq nerivallaarnerlu sakkortuumik assuarineqarput: „Viinnimik imerajuttut ingasattumillu neqitortartut akornanneeqinak, imerajuttut nerivallaartullu piitsunngussammata.“ (ússatit 23:20, 21, NV) Taamaattumik kinaluunniit ingasaassiniartuunanilu imminut naalakkersinnaasariaqarpoq. ’Putumanartumillu viinnisoqinasi taamaalluni qussalaatsunngornartarmat [tassa: inuunerluttunngornartarmat]; anersaamilli ilumioqangaaleritsi.’ Eqqaamajuk imminut naalakkersinnaaneq Guutip anersaavata inerititaasa ilagimmassuk. — Evfisumiut 5:18; Galâsiamiut 5:19-23, NV.

Ilumoorpoq aalakuulerneq sioqqullugu allaat imigassamit navianartorsiortinneqalersoqarsinnaammat. Atuagassiannguami paasisitsiniutaasumik USA-mi Ikiaroornartunik Atornerluineq pillugu Nationalinstitutip naqitertitaani ima allassimasoqarpoq: „Imeraanni taava imigassap aalakoornartortaa aqajaqqumeeriarluni aammut ingerlasarpoq taavalu qaratsamut anngukkasuartarluni. Qaratsami eqqarsarsinnaassutsimik misigissutsimillu aqutsisut nukillaariartuaartittarpai. Inuup akornutigisani katattarpai ittuunnginnerulerlunilu.“ Taamatut ’akornutigisanik katatsinermik’ misigineq kanngunartuliornermik kinguneqarsinnaavoq.

Navianartorsiortitsilersinnaasup aappaa tassaavoq aqqusinermi angalanissaq sioqqullugu aalakoornartortalimmik imerneq. USA-mi imigassamik peqquteqartumik aqqusinermi ajutoornermi inuit ajunaartut missiliuunneqarsimapput ukiumut 25.000-inut. Inuit ilaasa aalakoornartup sianissutsiminnut sunniuteqangaarnera sumiginnartannguatsiarpaat. Kisianni inuuneq kristumiunit Jehovap tunissutaatut isigineqarpoq. (Tussiaat 36:10) Tamanna eqqarsaatigalugu eqqortuunerpa sianissutsit aalakoornartumit nukillaangatitaaneranni biilerluni nammineq allallu inuunerat navianartorsiortissallugu? Kristumiut amerlasuut aalajangersimapput biilissagaangamik aalakoornartortalimmik iminngilluinnassallutik.

Aammattaaq kristumiup eqqarsaatigisariaqarpaa nammineq imeriaatsini inunnut allanut sunniuteqartarmat. Tamannarpiaruna pissutigalugu ilagiinnik nakkutilliisut, ilagiinni kiffartortut arnallu utoqqaat kajumissaarneqartut ’viinnisorajussanngitsut’. (1 Timûtiuse 3:2, 3, 8; Títuse 2:2, 3) Naak immaqa kristumiut ilaasa aalakuulernatik imingaatsiarsinnaagaluarlutik taamaattoq mianersortariaqarput killilimmillu imertariaqarlutik, inunnut allanut ajortumik sunniuteqannginniassagamik. Kristumiuttaaq inuk aalakoornartortalimmik imerusunngitsoq imeqqullugu pinngitsaaliniassanngilaa. Bibelimi allassimavoq: ’Neqitunngikkuit viinnisunngikkuillu qatannguppilluunniit naakkiussutigisassaanik iliunngikkuit iluarpoq.’ — Rûmamiut 14:21.

Allaat ilaatigut siunnersuutigineqarsinnaavoq aalakoornartortalimmik iminngilluinnarnissaq — soorlu naartunerup nalaani. International Herald Tribune-imi Parisimi saqqummersumi misissuineq North Carolinami, USA-mi, universitetimit suliarineqarsimasoq saqqummiunneqarpoq, ilaatigut ima oqaasertaqartoq: „Arnaq naartusoq naartunermi qaammataanni siullerni ataasiaannavilluniluunniit aalakoornartutorujussuarpat meeqqap timimigut eqqarsartaatsimigullu ajoquserneqaatigerujussuarsinnaavaa.“ Taamaattumik arnat naartusut naartunerup nalaani imigassartornerup navianaateqarsinnaanera eqqarsaatigeqqissaartariaqarpaat.

Siornatigut imerajuttuusimasut imaluunniit imigassamik atuinerminnik killileerpiarsinnaasimanngitsut immaqa aamma pitsaanerutissavaat imigassamik taamaatitsilluinnarunik.b Taamaattumik pitsaanerpaajugunarpoq imerajuttunngorsimasumik imaluunniit tarnip nalunngeqatiginnissutaa naapertorlugu imerusunngitsunik akornatsinniittoqaraangat imigassamik sassaallinngivinnissarput. Aammattaaq assuarnartuuvoq kristumiut ataatsimiinnerinukannginnermi imaluunniit oqaluussiartunnginnermi imigassamik aalakoornartortalimmik imernissaq. Itsaq Levikkuusut tamatumuuna maligassiuipput, tassami taakku illernartuummi kiffartunnginnerminni imigassamik attuineq ajoramik. — 3 Môrsase 10:8-10.

Kiisalu nunap inatsisai ataqqisariaqarput. Nunat ilaanni aalakoornartortalinnik imernissaq inerteqqutaalluinnarpoq. Nunallu ilaanni inersimasut taamaallaat imigassamik pisinnaatitaasarput. Tamatumanilu kristumiut ’naalakkersuisunut akimanernut’ naalattariaqarput. — Rûmamiut 13:1.

Tassa aalakoornartortalimmik imertassanerluni imaluunniit imertassannginnerluni aammalu imertaraanni qanoq annertutigisumik pisassanerluni inuup nammineq aalajangigassaraa. Siuneqassusermik imminullu killilersinnaassusermik ersersitsigutta, taamaaliornitta Guuti ataqqinartissavaa. Taamaattumik silatuumik ingerlasaritsi ’nerigaangassiluunniit imeraangassiluunniit sugaangassiluunniit Guuti naalannarseqqullugu pisartaannaritsi’. — 1 Korintumiut 10:31. (wD 1/8 87)

[Quppernerup ataani ilanngussat]

[Qupp. 6-mi assiliartaq]

Allat tarnimik nalunngeqatiginnissusiat pissutigalugu kristumiu immaqa aalakoornartortalimmik imerumassanngilaq