Imigassat aalakoornartortallit Guutip isaanit isigaagit?

UKIUT 20-t matuma siorna itsarnisarsiuut Iranimi illoqarfiup Urmiap eqqaani illukut itsarnitsat assaaffigaat. Tassani nassaaraat qummuattaq marrarmik sanaaq ilisimatuut oqarnerattut ukiunik tuusintilikkuutaanik pisoqaassusilik, itsarujussuaq inuit najugaqarfigisimasaanneersoq. Qanittukkut qummuattaq teknologii atorlugu misissorneqarpoq. Ilisimatuut viinniliortarsimanermut takussutissanik pisoqaanerpaanik qummuattap iluani nassaarnertik tupaallaatigaat.

Aammattaaq Biibilimi ersarissunik takussutissaqarpoq itsarsuarli viinni, immiaaqqat imigassallu aalakoornartortallit allat imerneqartarsimanerannut. (1 Moses 27:25; Nalunaajaasup oqaasii 9:7; Nahumi 1:10) Soorluttaaq inuussutissat allat eqqarsaatigalugit Jehovap inuttut ataasiakkaatut nammineq aalajangiisinnaatippaatigut — aalakoornartortalinnik imerusukkutta taamaaliussaagut imaluunniit imerusunngikkutta taamaaliussanngilagut. Jesus nerinermini iggisigalugu viinnisortarsimavoq. Johannesili Kuisisoq taamaaliortarsimanngilaq. — Matîuse 11:18, 19.

Ingasattumilli imigassartorneq Biibilimi inerteqqutigineqarpoq. Iminngerneq Guutimut ajortuliorneruvoq. (1 Korintumiut 6:9-11) Taamaammat Jehovap nalunaajaasuisa killeqanngitsumik imigassartortartut peqqissiminngitsut ilagiinnut kristumiunut ilaaginnarnissaat akuerineq ajorpaat. Ilagiinnut kristumiunut ilaasut imigassanik aalakoornartortalinnik pisartut killilimmik taamaaliortariaqarput. — Títuse 2:2, 3.

Isuma guutiitsorpalaartoq

Ullumikkut inuppassuit imigassat aalakoornartortallit Guutip isaanit isiginngilaat. Nalunanngeqaaq Satanip itsarli atugaasumik tamatuminnga atuinerlunneq siuarsaraa. Assersuutigalugu, immap Manerassuup kujataatungaani qeqertat ilaanni angutit ileqqoraat nammineq immiukkamik erngunniarluni naapeqatigiittarneq. Taamatut naapeqatigiittarneq nalunaaquttap-akunnerpaalunnik sivisussuseqartarpoq akulikitsumillu pisarluni — angutit ilarpassuisa ullut tamaasa tamanna ileqqoraat. Inuit ilaasa taamaaliortarneq kulturimut ilaaginnartutut isigaat. Immiaaqqat imigassallu kimittuut immiamut nammineq sanaamut taarsiullugit, imaluunniit tapertaralugit, imerneqartarput. Tamatuma aalakoorneq kingunerigajuttarpaa.

Nunami Manerassuarmiittumi allami angutit ingasaannagu imigassartorneq naluaat. Tamaani ileqquusutut imigassartorniaraangamik aalakoorniarlutik imertarput. Ullormi aningaasarsiffimmi angutit eqimattat ataatsimoorlutik karsinik arlalinnik, tamarmik puujaasanik 24-nik imalinnik, immiaararsisarput. Immiaararsiamik nungunnissaata tungaanut ernguttarput. Tamatuma kingunerisaanik tamaani iminngerneq nalinginnaaqaaq.

Immialiat, soorlu palminit viinniliat immiukkallu allat, nunani Afrikamiittuni imigaagajupput. Ileqqutoqqat ilaanni piumasarineqarpoq pulaartunut inoroorsaarnermi imigissamik sassaalliuteqarnissaq. Pulaartitsisup inoroorsaarumatuup pulaartumi imersinnaasaat sinnerlugit sassaalliutigisarpai. Sumiiffiit ilaanni pulaartumut ataatsimut immiaaqqat aqqaneq-marluk sassaalliutigineqartarput.

Japanimi suliffeqarfiit ilarpassui sulisuminnik bussimik asiartitsisarput. Imigassarpassuit aalakoornartortallit taquarineqartarput. Suliffeqarfiit ilaasa aallaarsimaartitsisarneri sapaatit-akunnerini marlunnik pingasunilluunniit sivisussuseqartarput. Atuagassiaq Asiaweek naapertussagaanni Japanimi „qaqorteqqasunik naatitsisartunit naalakkersuinermik suliaqartunut pisuunut, angutaalluassuseq nalilerneqartarpoq aalakoornartortalimmik qanoq imertigisinnaaneq naapertorlugu“. Ileqqut tamatumunnga assingusut nunani Asiamiittuni allani aamma atuupput. Asiaweek-imi oqaatigineqartutut „ullumikkut Korea-Kujallermiut nunarsuarmiunut allanut naleqqiullutik imernerujussuanngorsimapput“.

USA-mi atuarfinni annerni erngunneq assut ileqquulersimavoq. Atuagassiaq The Journal of the American Medical Association naapertussagaanni „ernguttartut imminnut imerajuttutut isigineq ajorput.“a Tamanna tupaallaataasariaqanngilaq nunat ilarpassuini imigassartorneq pissanganartutut, nuannaartunartutut akimarpaluttutullu ussassaarutitigut saqqummiunneqartarmat. Ussassaarinerup tamatuma ingammik inuusuttut eqqortarpai.

Tuluit-Nunaanni immiaarartorneq ukiut 20-t ingerlaneranni marloriaammik annertusisimavoq, imigassanillu kimittuunik atuineq pingasoriaammik annertusisimalluni. Imertalerneq siusinnerujartuinnarpoq, arnallu amerliartuinnartut imertalersimapput. Pissutsit tamatumunnga assingusut nunani Europap kangianiittuni Latin-Amerikamiittunilu atuupput. Tamanna imerajuttut aqqusinermilu ajunaarnerit aalakoornartutorsimanermik pissuteqartut amerliartuinnarneratigut erseqqissarneqarpoq. Qularutissaanngitsumik nunarsuaq tamakkerlugu aalakoornartumik atuinerlunneq annertusiartuinnarpoq.

Qanoq atsigisoq ingasappallaarpa?

Imigassat aalakoornartortallit Biibilimi oqimaaqatigiissumik isigineqarput. Tassani oqaatigineqarpoq viinni tassaasoq Jehova Guutip tunissutaa „inunnik nuannaalersitsisartoq“. (Tussiaat 104:1, 15) Aammali ingasaassineq avoqqaarineqarpoq, ’imerajunneq’, ’viinnisorpallaarnerit imerpallaarnerillu’, ’viinnimut uerineq’ kiisalu ’viinnisorajuttut’ assuarineqarlutik. (Lúkarse 21:34; 1 Pîtruse 4:3; 1 Timûtiuse 3:8; Títuse 2:3) ’Viinnisorpallaarnerli’ qanoq paasisariaqarpa? Kristumiup qanoq ililluni paasisinnaavaa Guuti imigassanut aalakoornartortalinnut qanoq isiginninnersoq?

Aalakoorneq malugiuminaatsuunngilaq. Tamatuma kinguneri Biibilimi ima allaatigineqarput: „Kikkut suaartartarpat ’alianaq’, kikkullu suaartartarpat ’eqqanaq’? Kikkut saqitsaattarpat, kikkullu naammagittaalliortarpat? Kikkut pinngitsoorsinnaasaraluaminnik ikeqalersarpat, kikkullu eqiannisunik iseqartarpat? Taamaattarput unnuarsuarmut ernguttut, aggertartut viinnimik kimittuumik najorsiartorlutik. . . . Taava takorruukkanik isigisaqalissaatit, paatsiveqanngitsunillu oqalulissaatit.“ — Ussatit 23:29-33.

Aalakoornartutorpallaarneq paatsiveerutitsisarpoq, takorruuilersitsisarluni, artulersitsisarluni allatigullu isumakkut timikkullu ajoqutaasarluni. Inuk aalakoortilluni pissusilersornermigut imminut aqussinnaajunnaarsinnaavoq, imminut allanullu ajoqutaasumik. Iminngersut naluneqanngillat kusanaatsulioriartarlutillu peqqarneeriartarlutillu kanngunartumik ilioriartartut.

Aalakuulernissaq tikillugu imerneq qulaani eqqartorneqartutut kinguneqartoq tassarpiaavoq imerpallaarneq. Inulli killilersimaarnissamik ajornartorsiuteqarsinnaavoq imerajussutsimut malunnaatinik ersersitsinngikkaluarluni. Taamaattumik imerpallaarneq qanoq paasisariaqarnersoq assortuussutigineqarsinnaavoq. Ingasaassinaveersaarnerup ingasaassinerullu killingat sumiippa?

Eqqarsarsinnaassutsit sernissoruk

Imigassamik aalakoornartortalimmik qanoq annertutigisumik imersinnaatitaanersugut Biibilimi oqaatigineqanngilaq. Imigassap sunniuttarnera inummiit inummut assigiinngilaq. Biibilimili najoqqutassiat kristumiunut tamanut atuupput, Guutillu imigassanut isiginninneratut isiginnilernissatsinnut iluaqutigisinnaavavut.

Jesusip oqarneratut inassut siulleq imaappoq: ’Jehova Guutit asassavat uummatikkut iluunngarlutit tarnikkullu iluunngarlutit isumakkullu iluunngarlutit.’ (Matîuse 22:37, 38) Aalakoornartoq isumamut toqqaannartumik sunniuttarpoq, ingasaassinerullu inassutit annersaannik tamatuminnga malinninniarneq ajornakusuulersissinnaavaa. Siuneqassutsimik pitsaasumik, ajornartorsiutinik aaqqiisinnaassutsimik, imminut naalakkersinnaassutsimik isumamilu ingerlaatsinik pingaartunik allanik annertuumik ajoqusiisinnaavoq. Biibilimi ima oqaaqqissaarneqarpugut: „Silatussuseq isumatussuserlu annaanaveersaarniakkit alartaaserlugillu. Taakku ilinnut inuussutaassapput qungatsinnilu ujamiullutik kusanangaartut.“ — Ussatit 3:21, 22.

Apustilip Paulusip kristumiut ilungersorluni ima qinnuigai: ’Timisi tunniussigik pilliutitut uumasutut iluartutut Guutip iluarisassaatut, tassaassammat siuneqartutut Guutimut kiffartuutersi.’ (Rûmamiut 12:1) Kristumiu ’Guutimut iluarisaassanerpa’ ’siuneqassutsimi’ katannissaata tungaanut imertaruni? Killeqanngitsumik aalakoornartutortartoq imigassamit sunnerneqarnissaminut maattutsikkiartuaartarpoq. Nammineq isummani naapertorlugu isumaqarsinnaavoq imerpallaartarnani. Imigassanilli aalakoornartortalinnik pinngitsuuisinnaajunnaariaannaavoq. Inuup taamaattup timini ’pilliutitut uumasutut iluartutut’ tunniussinnaassanerpaa?

Aalakoornartoq imikkat ima annertutigippat ’silatussutsinnik isumatussutsinnillu’ sanngiillisitsilluni, taava ingasappallaartutut kristumiutut isumaqarfigissavat.

Suna tunngavigalugu imigassamik isiginnippit?

Kristumiup nalilerniartariaqarpaa imigassartornermut isiginninnini qanoq atsigisumik ileqquusunit ileqqutoqaasunillu sunnerneqarsimatiginersoq. Imigassat aalakoornartortallit eqqarsaatigalugit aalajangiinitit inuit nalinginnaasumik ileqquinik ussassaarutinilluunniit tunngaveqartinngilluinnartariaqarpatit. Nammineq imigassamut isiginninnerit nalilerniarlugu imminut ima aperisinnaavutit: ’Inuiaqatigiinni nalinginnaasumik akuerisaasumit sunnerneqarsimava? Imaluunniit imigassartortarnera Biibilimi najoqqutassianit aqunneqarpa?’

Jehovap nalunaajaasui inuiaqatigiinni ileqquusunut akerliuniaannartuunngikkaluarlutik nalunngilaat iliuutsit ullumikkut nalinginnaasumik akuerisaasut ilarpassui Jehovap iluarinngikkai. Inuiaqatigiit ilaanni naartuersinneq, aalersortinneq, anguteqatinoortarneq arnaqatinoortarnerlu arlalinnillu aappaqarneq akuerisaapput. Kristumiulli Guutip tamakkuninnga isiginninnera naapertorlugu iliortarput. Aap, kristumiut Guutimik mianerinnittumik isumaqarfiginninnertik pissutigalugu iliuutsit taamaattut allanit qanorluunniit isigineqaraluarpata ajorisariaqarpaat. — Tussiaat 97:10.

Biibilimi eqqaaneqarput ’Guutimik nalusut piumasaat’, tassaasut ’viinnisorpallaarnerit’ aamma ’imerpallaarnerit’. Oqaatsimi ’imerpallaarnerit’-mi pineqarput annertuumik erngunniarluni katerisimaarnerit. Biibilip nalaani aalakuulinngikkaluarlutik imerujussuarsinnaanerminnik tulluusimaarutiginnittut allanut unammisarsimapput, imernikkaaneqqisaallutik. Ileqqut taama ittut apustilip Peterip ’ileqqussaanngitsut’-nik taavai kristumiut peqqissimisut ileqqoriunnaagaat. — 1 Pîtruse 4:3, 4.

Silatusaarnerussava kristumiu isumaqassappat sumiluunniit, qaqugukkulluunniit imaluunniit qanorluunniit annertutigisumik imeraluaraanni ajunngitsoq, taamaallaat aalakuulernaveersaaginnarluni? Aperisinnaavugut tamanna isumaanersoq Guutimik mianerinnippaluttoq. Biibilimi allassimavoq: ’Nerigaangassiluunniit imeraangassiluunniit sugaangassiluunniit Guuti naalannarseqqullugu pisartaannaritsi.’ (1 Korintumiut 10:31) Immaqa angutit kikkut tamarmik takkuanni erngunniarlutik katersuuttut tamarmik aalakuulinngikkaluarput, kisianni iliuusiat Jehovamut naalannaatissaava? Biibilimi ima oqaaqqissaarneqarpugut: ’Silap matuma inui ileqqoqatigeqinasigik, allanngoritsili isumassigut nutaanngorlusi, sianigileqqullusiuk sunaasoq Guutip peqqusaa ajunngitsoq iluarisassarlu naammalluinnartorlu.’ — Rûmamiut 12:2.

Allanut naakkiussutaanaveersaarit

Soqutiginarpoq allaat inuiaqatigiinni annertuumik aalakoornartutortarnermik akaarinnittuni Guutimut kiffaanerartoq assut imertarpat ippigineqartarpoq. Inuiaqatigiinnguani Manerassuup kujataata tungaaniittuni ima oqartoqarsimavoq: „Nersorpassi. Sallusuissut oqaluussissutigaarsi. Ajornartorsiulli takusinnaasarput tassa angutitassi imerpallaarnerat.“ Ataasiakkaanngooq aalakuulertanngikkaluarput, kisianni tamanna avataanniittunut malunnarpallaarsimanngilaq. Takunnittut qularutissaanngitsumik isummertarsimapput tamaani angutit ernguttartut allat assigalugit aamma nalunaajaasut aalakuulertartut. Kristumiutut kiffartortoq ernguteqataasartoq tusaamasaalluarsinnaassanerpa oqaluussillunilu kiffartornini ’siooranngilluinnarluni pitsaalineqarnanilu’ ingerlassinnaassanerpaa? — apustilit suliait 28:31.

Europami nunat ilaanni nalunaarutikkut erserpoq ilaannikkut qatanngutit angutit arnallu ilaat naalagaaffilersaartarfimmut tikiuttartut imigassarsunneqalutik. Tamanna allat nalunngeqatiginnissutaannut ajoqutaasimavoq. Biibilimi ima oqaaqqissaarneqarpugut: ’Neqitunngikkuit viinnisunngikkuillu qatannguppilluunniit naakkiussutigisassaanik iliunngikkuit iluarpoq.’ (Rûmamiut 14:21) Imigassanut aalakoornartortalinnut Guutimik mianerinnippaluttumik isiginnikkuni kristumiup inersimasup allat nalunngeqatiginnissutaat mianersuunniassavai, allaat pisariaqarpat pissutsini aalajangersimasuni imernaveersaarsinnaalluni.

Kristumiut paatsuugassaanngitsumik allaanerusussaapput

Ajoraluartumik silarsuarmi maani inuit Jehovamut ajuallaatissiisimapput taassuma inuiannut tunniussaanik ajunngitsunik atuinerlunnermikkut, soorlu imigassanik aalakoornartortalinnik atuinerlunnermikkut. Kristumiut tunniulluinnarsimasut tamarmik isummanik guutiitsorpalaartunik nalinginnaasunik ingalassimanninniartariaqarput. Taamaappat ’iluartut guutiitsullu assigiinngissutaat, Guutillu kiffartuussisaasa kiffartuussisiginngisaasalu assigiinngissutaat’ inunnit takuneqarsinnaassaaq. — Malaki 3:18.

Imigassat aalakoornartortallit eqqarsaatigalugit Jehovap nalunaajaasuisa silamiullu assigiinngissutaat paatsuugassaasariaqanngilaq. Aalakoornartortalinnik imerneq kristumiut ilumoortut inuuneranni qitiunngilaq. Imigassanik aalakoornartortalinnik qanoq atsigisumik imersinnaanertik misiligarneq ajorpaat, taamaalillutillu aalakuulernissamut imminnut aarlerinartorsiortissanatik; aammattaaq tarnikkut iluunngarlutik isumakkullu qaatusimallutik Guutimut kiffartornermik imigassanit aalakoornartunit sanngiillisinneqarnissaa arlaatigulluunniit akornuserneqarnissaa pinaveersimatittarlugu.

Jehovap nalunaajaasui ataatsitut isigalugit imigassanik aalakoornartortalinnik Guutimik mianerinnippaluttumik isiginnipput. Illimmi? Biibilimi unnersuussummik matuminnga maleruaatilluta Jehovamit pilluaqquneqarnissarput naatsorsuutigisinnaavarput: ’Guutimut naalanngitsuujunnaarluta silamiullu kajungerisaat atorunnaarlugit silami matumani inuuniassaagut piitaajuilluta iluartumillu ileqqoqarluta Guutilu mianeralugu.’ — Títuse 2:12. (wE 15/12 96)

[Quppernerup ataani ilanngussaq]

[Qupp. 24-mi ungalusaq/​assiliartaq]

Asasatit tusarnaakkit

Killeqanngitsumik imigassartortartup tamatuminnga ajornartorsiuteqarnini nassuerutigiuminaatsittarpaa. Qanigisat, ikinngutit kristumiullu utoqqaanertat asasaminnut imminnut killilersinnaanngitsunut ikiuinissamik neqerooruteqarnissartik nangaassutigisariaqanngilaat. Aammali tamatuminnga ajornartorsiuteqartup asasami iluarinninnginnertik ersersippassuk paasisariaqarpaa pissutissaqarsimagamik taamaaliortut. Oqaasii eqqarsaatigisariaqarpai. — Ussatit 19:20; 27:6.