Italiami meeqqat nalaatsornikkut oqaluussisut
GUUTIP siunertaanik nuannersunik pingaartitsisut nuannaarutigisarpaat inuit allat Naalagaaffimmik neriuummik ilinniartissinnaagaangamikkik. Tamanna anguneqarsinnaavoq periarfissat takkuttartut atorluarniartaraanni, soorlu Sardiniami pisimasut eqqartulikkatta ersersikkaat.
□ „Oqaluussisartoq aqqaneq- marlunnik ukiulik oqaluussiartoreersimalluni bussimut ilaalluni angerlamut ingerlavoq. Bussimi tassani aammattaaq angutit inuusuttut niviarsiarlu, tamarmik 18-it missaanni ukioqarunartut, ilaapput. Oqaluussisartoq niviarsissap eqqaanut ingippoq atuagassiarlu Vågn op!-imik taaguutilik atualerlugu, neriuutigalugu niviarsissap alapernaasilernissaa. Tassalumi atuagaa niviarsissap takuaa aperalugulu suna atuarneraa. Oqaluussisartup oqaluttuuppaa allaatigisap atuakkami imarigaa inuusuttut ajornartorsiutit naapittakkatik qanoq ilillutik aaqqinniarsinnaaneraat. Eqqaavaalu atuagassiap imarisai nammineq iluaqutissarsiffigisimallugit, aammalu niviarsissap iluaqutigisinnaagai. Qujassutigalugu atuagassiaq tiguaa.
Oqaloqatigiinnerat angutit inuusuttut marluk tusarnaarsimavaat, oqaluussisartumullu atuagassianik piumapput. Atuagassianut akiliiniarlutik aningaasaatitik passutileraallu bussimik ingerlatitsisup saappai oqarfigalugillu aningaasaatitik iluaqutaanngitsunut atulussinnassanngikkaat. Angutillu inuusuttut akivaat namminneq eqqarsarluarsinnaallutik aammalu atuagassiat soqutiginartikkitik. Taamatut oqarmata bussimik ingerlatitsisup bussi aqquserngup sinaanut ingerlatippaa unitsillugulu, oqarlunilu atuagassiani suna taama soqutiginartiginersoq paaserusullugu. Taannattaaq atuagassianik arlalinnik pivoq.
Oqaluussisartoq inuusuttoq tamatuminnga misigisaqarsimasoq ima oqarpoq: ’Nuannaarutigeqaara bussimi oqaluussisimagama.’“
□ Oqaluussisartup inuusuttup allap atuarfimmi oqaluussinissamut periarfissarsilluarsimanini ima oqaluttuaraa: „Ilinniartitsisutta ilinniatitseriaatsimik nalinginnaanngitsumik ilinniartippaatigut. Siullermik suliassarput eqqarsaatigeqqissaassavarput, taavalu imaqarniliussallugu pingaarnersiorlugu pingaannginnersiorlugulu, naggataatigullu allattukkavut malinnaaffiginagit oqalugiaatigalugu.
Periaaseq tamanna uanga ilisimalluarpara. Tassaavoq atuakkami Håndbog for den teokratiske skole-mi (Mappersagaq Teokratiimik Ilinniarfimmut atortoq) siunnersuutigisaasoq. Sivitsunngitsoq ilinniartitsisutta malugaa kisima periaatsip tamatuma eqqortumik atornissaa ilisimagiga. Uanga suliama atuaqatimalu suliaasa sooq taama assigiinngitsiginerat apeqqutigaa. Oqaluttuupparalu periaaseq tamanna Teokratiimik Ilinniarfimmi ilinniarsimallugu. Ilinniartitsisoq iluarusuttorujussuuvoq qinnuigalungalu Mappersagaq Teokratiimik Ilinniarfimmut atortoq ikiortigalugu periaatsimik tamatuminnga atuaqatikka ilitsersuuteqqullugit. Taamaaliorpungalu.
Angerlarama ilaquttakka susoqarsimaneranik oqaluttuuppakka. Ataataga, Jehovamut Nalunaajaasuunngitsoq, oqartuaannarsimavoq Jehovamut Nalunaajaasuuneq atuarfimmi ajoqutaasartoq, kisianni misigisimasara tusareerlugulu isummani allanngortittariaqarsimavaa.“
Tamatsinnut, meeqqanut, inuusuttunut inersimasunullu, pisinnaatitaaffiuvoq nuanningaartoq Jehovap aqqa ilungersuullugu ilisimaneqalersissinnaagatsigu! — Tussiaat 148: 12, 13. (wD 1/12 87)