Guuti neriutsitsisoq ataqqisigu
’Oqarpoq Jehova: . . . Ataqqinnitsikka ataqqissavakka, asiginnartikkalu sussarineqassanngillat.’ — 1 Sâmuale 2:30.
1. Jehovamik ataqqinnikkusunnitsinnut sumik pissutissaqarpugut? (1 Timûtiuse 1:17; sarĸúmersitat 4:11)
BIBELI aqqutigalugu Guutip uatsinnut neriuutigititai eqqarsaatigalugit, naleqqulluinnarpoq tulluarluinnarlunilu ’Guuti neriutsitsisoq’ ataqqissagatsigu. (Rûmamiut 15:13) Qanorli ilillugu uagut inuinnaasugut mikisuaraasugut ajortillillu qilammik nunamillu taakkunaniittunillu tamanik Pinngortitsisoq ataqqinangaartoq ataqqiniarsinnaavarput? Aamma ilumoorpa taassuma akisilluni uagut ataqqissagaatigut?
2. Guutip ataqqinartinneqarnissaa Jesusip qanoq isumaqarfigaa?
2 Jesusimut pisimasut ilinniarfigisinnaavavut. Arlaannattaluunniit miserratiginavianngilaa Jesusip kissaatigiuaannaraa Ataatani ataqqineqassasoq, naalannartinneqassasoq. (Juánase 5:23; 12:28; 15:8) Jesusip farisiiarit allakkanillu ilisimasut ajornerarpai, ’Guuti qarluminnik ataqqisarmassuk, uummataasali ungasikkaat’. Malugeriaruk, Guuti ataqqinninnermik pinngilaat, naleqqulluartuunngitsunik pissuteqarlutillu suliaqaramik. (Matîuse 15:7-9) Oqartoqarsinnaavali Kristusip neriuuteqarnera Guutimik ataqqinninneranik pissuteqassasoq? Aamma Kristusip taamatut ataqqimmani, Jehova qanoq iliorpa?
3. Qanoq ililluta ilisimasinnaavarput Jesusip Jehova neriuffigigaa?
3 Tussiaat 16:10-mi Davidip oqaasii uku Jesusip uummammiuliuppai: „Tarniga Sheolimiiginnartissanngilat. Ilinnut unneqqarissumut iliveq takutissanngilat.“ (NW) Makititaanissaminik neriugisaqarami, Jesus Kristusip pinerluttoq eqqamini nappakkamut paagussimasoq oqaatsit qiimmassaataasut uku oqaaseralugit oqarfigisinnaavaa: „Ilumut, ullumi oqarfigaakkit: Paratiisimeeqatigiumaarparma.“ (Lúkarse 23:39-43, NW) Pinerluttoq taanna ulloq taanna toquvoq, taamaattumik ullut pingasut tamatuma kingornagut Jesusip makitinneqarnissaminik neriugisaata piviusunngornera takusinnaanngilaa. Takunnittulli ilaata imatut nalunaarutigaa: ’Jesus taanna Guutip makitippaa. Tamatuminnga tamatta ilisimannittuuvugut.’ (apustilit suliait 2:31, 32) Jesusip makititaanera ilumut pisimasuuvoq uppernarsagaalluartoq.
4. Jesus qanoq ataqqisassaava qanorlu ataqqiniarneqarsimalluni? (sarĸúmersitat 5:12)
4 Inuit nalinginnaat Jesusip oqaluussiffigisaasa ilarpassuisa nalunngilaat taanna ataqqisassaasoq naalannartitassaasorlu. (Lúkarse 4:15; 19:36-38; 2 Pîtruse 1:17, 18) Pinerluttuutitaallunili toqugami ataqqisassaajunnaarpa? Naagga, Guutimmi neriuffigisami iluarimmani. Taamaattumik Jehovap uummartippaa. ’Guutip neriutsitsisup’ Ernini makitikkamiuk anersaallu najugaanni toqusuissusermik atitikkamiuk Ataatap Ernerminik ataqqinnittuarnera uppernarsarneqarpoq. Paulus ima allassimavoq: ’Jesus isigaarput toqutitaanermigut naalannaammik ataqqinaammillu niaqorusersimasoq, Guutip saammaassineragut toqu ooqqattaassagamiuk tamaasa pillugit.’ — Eprîarit 2:7, 9; Filípimiut 2:9-11.
5. Jesus qanoq immikkut ataqqineqarpa, tassuunalu tamanna qanoq Guutip ataqqineqarneranik kinguneqarpa?
5 Jesusip, Jehovamik ataqqinnittup, qanoq Ataatap immikkut ittumik ataqqisimagaani taavaa. Ilaani apustiliminut ilumoortunut takutikkami oqarpoq: ’Qilammi nunamilu piginnaaneq tamarmi uannut tunniussaavoq. Taamaattumik aallaritsi, inuiaqatigiillu tamaasa ajoqersuganngortissigik, ataatap ernerullu anersaallu illernartup aqqanut kuillugit . . . Atalu, ullut tamaasa najorpassi silarsuup naggatissaanut allaat.’ (Matîuse 28:18-20) Taamaattumik Ataatap Erneq aamma ataqqivaa naleqanngitsumik piginnaaneqartikkamiuk. Piginnaaneq tamanna inuit Jesusip ataqqiumasaanut ataqqinartitsisumik suliaqartut iluaqutissaannut atorneqartussaavoq. Taava tamanna ima paasisariaqarpa uagut inuit naammalluinnanngitsut sukkut arlaatigut Ataataq ataqqisinnaagipput taassumanngalu ataqqineqarsinnaasugut?
Inuit Guuti ataqqigaat
6. Ataqqineqarusunneq iluarinarpa? Tamanna sumik navianaateqarpa? (Lúkarse 14:10)
6 Inuit amerlanersaasa Guuti salliutillugu ataqqinninniarnissartik eqqarsaatiginngilaalluunniit, soqutiginerugamikku imminut ataqqinartinniarnissartik. Allaallu oqartoqarsinnaavoq ataqqinartinniarneq pissusissamisoortuusoq. Tamanna ilaatigut ilumoorpoq, pissusissamisoornerugami ajunngitsumik oqaatigineqarumassalluni, tamanna ilaatigut ataqqineqaatigiumallugu. (1 Timûtiuse 3:2, 13; 5:17; apustilit suliait 28:10) Inunnilli ataqqineqarusunneq ingasaanneqaratarsinnaavoq. Tamanna takuneqartarpoq inuppassuarni qanoq naleqarnissaa soqutiginagu tusaamasanngortinniartuni, imaluunniit ataqqisaajunnaatsaaliorusunnermit ingasattuliortartuni.
7. Inunnit ataqqineqarluni sooq taama nalikitsigaa?
7 Eqqarsaatigigutsigu, inuit ataqqinartitsinerat annerpaarluunniit qaangiutiasuuvoq, tamarmik toqusussaammata. Ilumoorpoq sapiitsuliortorpaaluit aqqi ataqqineqarallarsinnaasut, ilarpassuili toqullutillu puiugaasarput. Inuit qassit aataqqiutimik aanaqqiutimillu aqqinik nalunngisaqarpat, imaluunniit nunaminni ukiut hundredit matuma siornagut kikkut pisortaasuusut nalunngilaat? Eqqortumik oqaatigissagutsigu, inuk aalajangersimasoq inuusimanersoq inuusimannginnersorluunniit soqutaanngilaq. Inuk ataaseq piffissap uuttuutaani pujoralaminerinnaavoq mikisuaraq, inuunerup kuuani kuseriarnerinnaalluni sussaanngitsoq. Toqunermilu kingornagut sivikitsumik ataqqisaagaluaruni sianiginngilaa. (Jûpe 14:21; 2 nalunaerssûtigdlit 32:33; akugdlîssup oĸausê 9:5; Tussiaat 49:12, 20) Kisiannili soqutaasutuaq tassaavoq Guutip neriuutigititaanik neriuuteqarluni, taassuminnga ataqqinnilluni, taassumanngalu ataqqisaalluni. Tamanna itsarsuaq Israelimi ataatsikkut inuusut marluk inuuneranni takuneqarsinnaavoq.
8. Ataqqinninnermut tunngatillugu Eli qanoq ililluni kukkusoorpa?
8 Aappaat Elimik ateqarpoq. Taanna ukiut 40-t naleqanngitsumik atorfeqarluni palasiunerulluni Guuti kiffartuuppaa, aammattaaq immikkut akuerisaalluni Israelimi eqqartuussisuuvoq. (1 Sâmuale 1:3, 9; 4:18) Taamaattorli ukiut ingerlaneranni ernini Hofni Pinehasilu pillugit sanngiissuteqalerpoq. Taakkua naak palasiugaluarlutik kiffartuutertik atornerluppaat pilliutit ilaannik tillittarlutik atoqatiginninnikkullu kanngunartuliortarlutik. Ataataata Elip sallaatsuinnarmik naveertarpai, taamaattumik Guutip oqarfigaa: ’Ernitit uannit ataqqineruatit.’ Jehova neriorsuisimavoq palaseqatigiit Aronikkunni atatikkumaarlugit, Elilli kinguaavisa akornanni kingumut palasiuneqaqqissanngitsoq aalajangerpaa. Suna pillugu? ’Ataqqinnitsikka ataqqissavakka, asiginnartikkalu sussarineqassanngillat.’ — 1 Sâmuale 2:12-17, 29-36; 3:12-14.
9. Samuel Jehovamik ataqqinninnissaminut qanoq ililluni periarfissinneqarpa?
9 Taassumannga allaalluinnartoq tassaavoq Samuel. Taanna suli nukappiarannguusoq angajoqqaavisa aggiuppaat tupermi naapittarfimmi Silomiittumi kiffartoqqullugu. Unnuat ilaanni Jehovap nukappiarannguaq oqaluffigaa. Oqaluttuaq tamanna Sâmualip agdlagaine sujugdlerne 3:1-14-imi atuassallugu nuannarissagunarpat. Takorlooriaruk nukappiaraq itersarneqartoq, nipittorujussuarmik pinnani kisiannili nipikitsunnguamik tusaramiuk Elimut nipigisorigaluarpaa. Taavalu takorlooriaruk qanoq siooratigisimassasoq meeqqap Samuelip palasiuneq utoqqarsuanngorsimasoq oqaluttuuttariaqalermagu Elikkormiut pillarniarlugit Guutip aalajangiussimagaa. Taamaattorli Samuel taamaaliorpoq; naalannermigut Guuti ataqqivaa. — 1 Sâmuale 3:18, 19.
10. Guutip qanoq ilillugu Samuel ataqqigini takutippaa?
10 Ukiorpassuit pruffiitiulluni Samuelip Jehova ataqqivaa, Guutillu taanna ataqqivaa. Taamaattoq Sâmualip agdlagaine sujugdlerne 7:7-13-imi malugeriaruk. Samuel qinnuteqarmat ikioqqulluni filisterit ajugaaffiginiassallugit, qinnutaa akillugu Jehova iliuuseqarasuarpoq. Illit taamatut Guutip ikiuineratigut isumagineqaraluaruit ataqqisaasutut misigissanngikkaluarpit? Samuelip ernerisa ataatamik maligassiaa maleruanngimmassuk, Guutip taanna taamaatinngilaa, soorlu Eli taamaatissimagini. Tamatumunnga pissutaannguatsiarpoq Samuelip sapinngisaq tamaat Guutimik ataqqinnittuunera. Guutimik ataqqinninnini takutillugu aamma Samuelip inuit inuttut kunngeqarnissaminnik qinnutaat ajoraa. (1 Sâmuale 8:6, 7) Samuel kiffaralugu Guutip Saul aamma David tanippai. Samuel toqummat Israelikkut aliasunnermikkut ataqqivaat. Pingaarnerusumilli, Guutip ataqqivaa Bibelimi allaatigineqartikkamiuk inunnut upperluartuusunut ilanngullugu, makititaanermikkut ajunngitsunillu Guutip taakkununnga pissamaarititaanik piumaarnissamikkut pilluaqquneqassasunut. (Tussiaat 99:6; Jerimia 15:1; Eprîarit 11:6, 16, 32, 39, 40) Tamatuma takutinnginnerpaa ’Guutimik neriutsitsisumik’ ataqqinninneq naleqangaartuusoq?
Illit ’Guuti neriutsitsisoq’ ataqqissaviuk?
11, 12. Jehovamik ataqqinninniarnerput pillugu suna eqqarsaatigisariaqarparput, ilaatigullu qanoq taamaaliorsinnaavugut?
11 Maligassiuisut Bibelimi eqqartugaasut ilaat marluinnaat taassagutsigik, Jesusip Samuelillu takutippaat inuit ’Guutimik neriutsitsisumik’ ataqqinninniarneq inuunerminni pingaarnerpaatillugu salliutissinnaagaat. Taakkua marluk takutippaattaaq taamaaliorutta Guutimit ataqqisaanissarput ilimagilluarsinnaassagipput misigissallugulu. Qanorli ililluta taamaaliorsinnaavugut qularinagu Guutip iluarissagaatigut, ataqqissagaatigut, Bibelilu tunngavigalugu neriugisarput piumaaripput?
12 Ilaatigut taamaaliorsinnaavugut Guutimut iluarisaannginnissarput peqqusersuitsumik ataqqinnittumillu annilaangassutigigutsigu. (Malakia 1:6) Qularnanngitsumik tamanna tamatta assortorsinnaanngilarput. Kisiannili, Elip erneri eqqaamaniakkit. Taakku aperisimagaluarukkit Guuti ataqqiumaneraat ataqqinnittumik mianeralugu, ilimanarpoq angersimassasut. Piuminaanneruvorli Guuti mianeralugu taassuminnga ataqqinnikkusunnerput ulluinnarni inuunitsinni timitalerniassallugu.
13. Assersuusiaq taallugu nassuiaruk qanoq Guuti mianeralugu taassuminnga ataqqinnikkusunnerput iluaqutigisinnaagipput.
13 Ussernartumik periarfissaqalerutta allanit ilisimaneqanngitsumik arlaatigut tillinniarnissatsinnut imaluunniit kanngunartuliornissatsinnut, Guutimik ataqqinnikkusunnerput qanoq iliorniarnitsinnut sunniuteqassanerpa? Isuma una ineriartortittariaqarparput: ’Ajortuliaq naak paasineqatsaalineqarsinnaassagaluartoq, ajortuliornera ’Guutimut neriutsitsisumut’ aqqagut taasiffigisannut narrunarsaataassagaluarpoq.’ Imaapporlu: Ajortuliaq paasineqatsaalisaajuarsinnaanavianngilaq, soorluttaaq Elip ernerisa ajortuliaat isertugaajuarsinnaasimanngitsut. ’Guutip eqqartuussinera naapertuilluartoq’ pillugu Paulusip oqaasiinit tamanna erseqqissarneqarpoq: ’Taassuma tamaasa akilerumaarpai suliaat naapertorlugit, imaattut: ajunngitsuliornermikkut nikallujuillutik naalannaammik ataqqinaammillu aserujuissummillu piniartut inuunermik naassaanngitsumik piumaarpai; namminissarsiortulli ilumoornermullu naalanngitsut iluaannermulli naalattut kamannermik narrutsannermillu piumaarpai.’ — Rûmamiut 2:5-8.
14. Aammalu qanoq ilillugu Guuti ataqqisinnaavarput, qanorlu immitsinnut aperisinnaavugut?
14 Akerlianilli Paulusip eqqartorpaa ’ajunngitsuliorneq’ Guutimut ataqqinaataasoq taassumanngalu ’naalannaammik ataqqinaammillu’ kinguneqartumik. Suliaq taama ittoq ullumikkut pingaarnerutitaasoq Jesusip eqqartorpaa Matîuse 28:19, 20-mi, oqarami: ’Inuit inuiaqatigiinnit tamaneersut ajoqersuganngortissigik, kuillugit ajoqersorsigillu ilissinnut peqqusakka tamaasa maleruaqqullugit.’ Nunarsuarmi tamarmi Jehovap Nalunaajaasui arlalinnik millionillit oqaluussisarnermik ajoqersuganngortitsinermillu sulinermut Guutimut ataqqinartitsisumut peqataapput. Ilarpassui ima aallussilluartigigamik allamik atorfeqaratik oqaluussisartuupput pioneriullutik, ilaat ataavartumik ilaallu sulinngiffimminni atuanngiffimminniluunniit taamaaliortarlutik. Tamanna eqqarsaatigalugu iluaqutaassaaq tamatta immikkut eqqarsaatigigutsigu sulinermut tamatumunnga qanoq peqataatiginerluta. Immitsinnut aperisinnaavugut: ’Uanga „Guuti neriutsitsisoq“ ataqqinerpara sapinngisara tamakkerlugu oqaluussinermut peqataallunga?’
15. Tamanut oqaluussisarnikkut Jehovamik ataqqinninneq pillugu kristumiut ilaat qanoq isumaqalersimappat?
15 Kristumioqarpoq ukiorpassuit oqaluussinermik aallussilluartuusimasunik kisiannili tamaviaarunnaariartorsimasunik. Ajoqersuganngortitsinermik sulinermut annikitsuinnarmik imaluunniit qaqutiguinnaq peqataaneq ileqqorilersimavaat. Tamatumuuna pinngilavut inuit timimikkut innarluutillit utoqqalinerullu kinguneri pissutigalugit kigaallisariaqarsimasut. Taakku taassanngikkaanni Nalunaajaasut assigiinngitsunik ukiullit akornanni aallussilluarunnaartoqarpoq. Soqutiginaraluartumik Paulusip immikkut ukiullit pinngilai kristumiut allaffigigamigit ’qasuleqqunagit’. Kisiannili, inuk qassinik ukioqaraluaruniluunniit, oqaluussinermut peqataasinnaassaguni ilungersortuartariaqassaaq. Soorlu Paulusip ulluini pisimanguatsiartoq, ullumikkut inoqarpoq imatut eqqarsartartunik: ’Uanga ukiuni pereersuni ilungersorlunga suleqataagama, maanna kristumiut inuusunnerusut ilungersorlit.’ — Galâsiamiut 6:9; Eprîarit 12:3.
16. Tamanna eqqarsaatigalugu immitsinnut misilinnissaq qanoq iluaqutigisinnaassavarput?
16 Taamatut eqqarsartut qujanartumik ikinnerussuteqarput, immitsinnulli aperisinnaavugut: ’Taamatut iliartorneq immini misigisimanerpara? Siornamut naleqqiullugu oqaluussinermik qanoq aallussitiginerpunga?’ Kigaallisimagaluartugut kigaallisimanngikkaluarlutaluunniit tamatta eqqaamasariaqarparput ’Guuterput neriutsitsisoq’ neriorsuisoq ’naalannaat ataqqinaallu eqqissinerlu ajunngitsuliortunut tamanut’ nalliussasut. (Rûmamiut 2:10) Tassani Paulusip atorpaa oqaaseq grækerisooq isumaqartoq „suliarinninneq, pilersitsineq, naammassinninneq“. Ila pisariaqarluinnassusia farisiiarit allakkanillu ilisimasut assigissanngikkivut, taakkumi qarluminnik taamaallaat Guutimik ataqqinninniarmata! (Mákorse 7:6; sarĸúmersitat 2:10) Akerlianilli, uummatitsigut iluunngarluta tamanut oqaluussinermut peqataasarutta, immitsinnut allanuttaarlu uppernarsarparput uumasumik neriunneqarluta. Tassuuna Pinngortitsiserput Inuunermillu Tunisiserput ataqqissavarput. Tassuunattaaq taassumannga ataqqisaassaagut, maannakkut naassaanngitsumillu. — Lúkarse 10:1, 2, 17-20.
Pisuussutitsinnik
17, 18. Aamma qanoq ililluta Guuti ataqqisinnaavarput, sunalu pillugu taamaaliornissatsinnut nangaassanngilagut?
17 Aammalu ’Guuterput neriutsitsisoq’ qanoq ilillugu ataqqisinnaagipput, ússatit 3:9-mi allassimavoq: ’Jehova naalannartissuk pisuussutivit ilaanik pissarsiavillu tamarmik siullersaasa ilaanik.’
18 Ilagiinni nalinginnaasuni kiffartuutillit ilarpassuisa ingasattumik piumatunertik ingasattumillu inuulluataarnertik tusaamasaanerluutigimmatigik, inuppassuit ilagiinnut upperisarsiornikkullu peqatigiinnut allaanngitsumik siunertaqartunut kisianni pisoorsuanngorusuttunut tapersersuillutik tunisiumanngillat. (sarĸúmersitat 18:4-8) Inuilli ilaasa atornerluinerisa ússatit 3:9-mi allassimasoq atortuujunnaarsinngilaat. Peqqussut Guutip sunniineratigut isumassarsiarititaq taanna najoqqutaralugu, uagut qanoq ililluta ’pisuussutivut’ atorsinnaanerpavut Jehova, ’Guuterput neriutsitsisoq’, ataqqiniarlugu?
19. Inuit ilaasa ússatit 3:9 qanoq maleruarniarsimagaat oqaatigiuk.
19 Jehovap Nalunaajaasuisa paasilerpaat Naalagaaffik pillugu tusarliussamik ilassisut amerliartuinnarmata ataatsimiittarfitik rigssalimik taaneqartartut allisarneqartariaqartut imaluunniit nutaat sananeqartariaqartut. Tamatumuuna aamma ’Jehova naalannartissinnaavat pisuussutivit ilaannik’. Inuusuttut utoqqaallu aalajangersimapput taamaaliussallutik, ilaatigut sanaartortitsinermut aningaasanut atugassanut namminneq tapiissuteqarlutik. Uummammigut aalajangigaq pinngitsoornani naammassissaguniuk imminut naalakkersortariaqassaaq, immaqalu imminut tunulliulluni tunisisariaqarluni, ingammik sanaartortitsinerup ingerlanera sivisunaassappat. (2 Korintumiut 9:6, 7) Pisuussutinilli tamatumunnga atuineq Jehovamut naalannaataalluarpoq, rigssalinimi kristumiut taanna pallorfigisarpaat, tassanilu kristumiut naapeqatigisartagaallu Guutimik ilisarsiniartarput. Jesusip oqaasiisa Matîuse 6:3, 4-mi allassimasut isumalluartippaatsigut Guutip taamaalillutik ataqqinnitsini akisilluni ataqqiumaarai.
20. (a) ússatit 3:9-mi allassimasumik maleruaanitsinni suna pillugu immitsinnut misilittussaavugut? (b) Apeqqutinik sunik immitsinnut aperilluarsinnaavugut?
20 Unali eqqarsaatigilaariaruk: Farisiiarit allakkanillu ilisimasut, Jesusip oqarnera naapertorlugu Guutimik ataqqinninnermik salliutitsinngitsut, namminneq siulliullutik pisuussutitik iluaqutigissagitik qulakkeerniartarpaat. Taava unnersuussut Matîuse 15:4-8-mi allassimasoq eqqarsaatigeqqaarlugu immitsinnut misilittariaqarpugut ’Jehova pisuussutitta ilaannik naalannartinneripput’. (Jerimia 17:9, 10) Assersuutigeriartigu kristumiu niuernermigut pisoorsuanngorsimasoq: immaqa namminissarsiulaartumik eqqarsarumassaaq pitsaanerussasoq piffissani tamaat suliuaruni. Immaqa ima isumaqassaaq: ’Allat pionerinngorlutik oqaluussisarput imaluunniit najukkamut oqaluussisartunik amigaateqarfiunerusumut nuullutik, uangali Guuti immikkut kiffartorfigisinnaavara aningaasarsiornikkut aningaasarpassuarnillu tunisisarnikkut.’ Tapersiilluni tunissutai immaqa iluaqutaasaqaat. Naleqqulluartumilli imminut aperisinnaavoq: ’Inooriaatsima ersersinnerpaa aningaasarsiortuaannarninni Guutimik ataqqinnikkusunnera pingaarnerusumik siunertarigiga?’ (Lúkarse 12:16-19; naleqqiuguk Mákorse 12:41-44.) Aammalu aperisinnaavoq: ’Namminerisamut tunngasut allanngortissinnaanerpakka suliassamut ullumikkut pingaarnerpaamut — ’tusagassamik nuannersumik’ tusarliinermut — annertunerusumik peqataaniarsinnaaqqullunga?’ Inuunermi qanoq atugaqaraluaruttaluunniit, tamatta pissutiginiakkavut iliuuserisartakkavullu misissorsinnaavavut immitsinnullu aperaluta: ’Uanga Inuunermik Tunisisiga „Guutigalu neriutsitsisoq“ annertunerusumik ataqqiniarlugu qanoq iliorsinnaavunga?’
21. Jehova maannakkut ataqqigutsigu sumik neriugisaqassaagut?
21 Jehovap pakatsisinnavianngilaatigut. Ila nuannerluinnassusia eqqarsaatigalugu maannakkut siunissamilu uagut pilluta oqarumassasoq soorlu Israelikkut ilumoortut pillugit oqarsimasoq: ’Erlinnaqigavit isinnut ataqqinarlutillu, uanga asavakkit’! (Isaia 43:4) Taannaavoq neriorsuutiginnittoq ’naalannaammik ataqqinaammillu piniartunut inuunermik naassaanngitsumik’. Taama neriorsorpai ’ajunngitsuliornermikkut’ nikallujuitsut. Ila ’Guutip neriutsitsisup’ naleqanngissusia! (wD 15/12 87)
Uku qanoq akissavigit?
□ Inuit Jehovamik ataqqinnissinnaanerat pillugu, Jesusip maligassiaa sumik ilinniarfigisinnaavarput?
□ Guutimik ataqqinninneq pillugu Eli Samuelilu qanoq assigiinngitsigippat?
□ Qanoq assigiinngitsutigut Guutimik ataqqinninniarnerit allisarsinnaaviuk, qanorlu aamma akineqassavit?
□ ’Guutitsinnik neriutsitsisuusumik’ ataqqinninniarnermik salliutitsisut siunissamut sumik neriugisaqarpat?