Jehova erneralu ataqqitigit
Apriilip 8-ani eqqaaniaalluni nalliuttorsiorfik qanoq pissarsiffigineqarluarsinnaasoq
1 Silarsuarmi inuit annertuumik naammassisaqarsimasut ataqqisaasarput. Iliuuserisimasaalli puigorneqapallaqqittarput. Inuiaammi tamarmik iluaqutissaannik iliuuserisat? Taakkunani suliarisimasat annersaat apriilip 8-ni 2001-mi seqernup tarrereernerani Naalakkap unnukkorsiortitsinera eqqaaniarlugu nalliuttorsiutiginiarparput.
2 Kina ataqqineqarnerpaasariaqarpa? Biibilimi ima akineqarpoq: „Illit, Naalagarput Guuterpullu, qinngaqqunnanngillat pigissallugit naalannaat ataqqinaallu pissaanerlu; illimmi suut tamaasa pinngortippatit, illit piumasakkut piulerput pinngortitaallutillu.“ (Saq. 4:11) Pinngortitsisutut Jehova silarsuarmi qilammilu tamani oqartussaaneruvoq. Naassaanngilluinnartumik ataqqineqarnissaminut qinngaqqunnanngilaq. — 1 Tim. 1:17.
3 Jiisusi Kristusi, Guutip ernera, inuit ataavartumik pilluaqqussutissaannik naammassisaqarpoq nammineq ataqqineqaatissaminik. Ataatani naammalluinnartumik ilaarsimavaa. (Joh. 5:19) Jiisusip naalalluinnarnerata aalajaallunilu kiffartornerata ’qinngaqqunnarunnaarsippaa pissallugit pissaaneq pisuussutillu ilisimassuserlu nakuussuserlu ataqqinaallu unnersiutiginnissullu naalannaallu.’ (Saqq. 5:12) Ataataata ataqqinartippaa kunngitut ivertikkamiuk. (Tuss. 2:6-8) Ataataq Ernerlu ataqqinartissavavut apriilip 8-ni 2001-mi Naalakkap unnukkorsiortitsinerata eqqaaniarneqarnerani najuukkutta.
4 Ajoraluartumik ukiut ingerlaneranni inuit ikittuinnaat Jehova erneralu ataqqinartissimavaat. Ilaannikkut allaat Israelikkut, itsaq Guutip innuttarisimasai, assersuutaannaasumik kiffartorfigisarsimavaat. Malunnavissumik ataqqinnissuseqanngillat. (Mal. 1:6) Naleqqulluartumik ataqqinninneq naalanermik nassataqartarpoq, Jehovap erneratalu pilluta iliuuserisimasaanut tamanut asanninnermik pingaartitsinermillu tunngaveqartumik. Jehova Jiisusilu ataqqissavavut Guutimik mianerinnikkutta ataqqinnikkuttalu qanorlu iliornitsigut tamatigut taakkua eqqarsaatigisarutsigit. Ilagiit kristumiut aamma allat taamaaliornissaannik ikiorniartarpaat.
5 Ataqqinninnissamut pissutissaq immikkut ittoq: Eqqaaniaalluni nalliuttorsiorfik Jehovap innuttaanut ukiut tamaasa katersuuffiuvoq pingaarutilik. Jehovamut kiffartorumasut ataqqinnikkumasut tamarmik najuuttariaqarput. (Luk. 22:19) Ilimagaarput Jehovap Nalunaajaasui 6 millioniusut soqutiginnittullu najuukkumasut ilanngullugit katillugit 14 millioniussasut. Ataatatsinnut qilammiusumut ataqqinninnissatsinnut pissutissaalluarpoq. Naak nalliuttorsiorneq Jiisusimut tunngagaluartoq naammassisai Ataatamut, aallartitsisaanut ataqqinaataapput. — Joh. 5:23.
6 Pisoq tamanna immikkut ittoq tapersersorniarlugu qanoq iliorsinnaavugut? Jiisusip nunarsuarmiikkallarami suliaata pingaarnersaraa Guutip naalagaaffia tusarliutissallugu sallusuissullu nalunaajaatigalugu. (Luk. 4:43; John. 18:37) Suliassaq tamanna pingaaqisoq suli naammassineqanngilaq. (Matt. 28:20) Taamaattumik Jiisusimut Jehovamullu ataqqinnissaagut periarfissat immikkut ittut atorluarutsigit, ullormi eqqaaniaalluni nalliuttorsiorfimmiinnaanngitsoq, aammattaarli apriili tamaat suliaata assinganik suliaqarluta ulapputeqarutta. Illit taamaaliorumavit?
7 Aammattaaq pisoq immikkut ittoq tapersersorsinnaavarput soqutiginnittut eqqaaniaalluni nalliuttorsiornerup pissarsiffigilluarnissaanut ikiorutsigit. Aggeqqullugit kajumissaarsigit, pisariaqarpallu aajumallugit neqeroorfigalugit. Oqalugiaatip isumaanik nassuiaassigit, allanillu ilassineqarnissaat isumagisiuk. Takusaata tusaasaatalu Jehovamut ataqqinneqatigiumalissavaatigut.
8 Ataatsimiinnerup sunniisinnaanera suusupageqinagu. Universitetimi ilinniartoq oqarpoq: „Oqaluffimmi arlaleriarlunga nerliiviliaqataasarsimavunga, mannali allaanerulluinnarpoq. Takusinnaavara tamanna Biibilimi allassimasutut ingerlasoq, upperaaralu sallusuissut pigigissi.“ Aalajangersimasumik ataatsimiigiaqataasalerpoq, sivitsunngitsorlu kuisilluni.
9 Soqutiginnittut siumukarnissaannik ikiorsigit: Eqqaaniaalluni nalliuttorsiornermi soqutiginnillutik najuuttut eqqumaffigisigit, oqalugiaatigineqartorlu nalliuttorsiornerlu pillugit oqaloqatiginiarlugit pulaaqqipallassigit. Ataatsimiittarnivut allat Biibilimik ilisimasaqarnerulersitsinnaasut pillugit oqaluttuullugit. ’Ilisarnermi’ kapitali 17-imi qulequtaq „Toqqissisisimaneq Guutip innuttaani naniuk“ iluaqutigalugu ilagiinni anersaakkut nerisassat taakkununngalu piareereersimasut nassuiarneqarsinnaapput. Aammattaaq videofilmit takutissinnaavatit, Jehovap innuttaasa akornanni ataasiussuseq, nuannaarneq ilungersuutiginninnerlu namminneq takuniassammatigit Jehovamut oqaasiinullu uppernerat nakussatsillugu.
10 Jiisusip pilliutaa kiffartorluta ajoqersukkatut immikkut pisinnaatitaaffik pingaartikkaangatsigit Ataataq ataqqinartinneqartarpoq allannullu pilluaqqussutaalluni. Jiisusi ima neriorsuivoq: „Kiffartortigisara Ataatap ataqqissavaa.“ — Joh. 12:26.