Jehova — pissatsissuterput
„Jah Jehova tassa pissatsissutiga nakuussutigalu.“ — Isaia 12:2, NV.
1. (a) Sooq Jehovamut Nalunaajaasut allanit allaaneruppat? (b) Jehovap innuttani pillugit qanoq iliorsimaneri Isaia 12:2-mi qanoq ersersinneqarpat?
JEHOVAMUT Nalunaajaasut ataatsimiittarfianni, rigssalimi, ataatsimiinnernut peqataasarpit? Tassani inuit inunnit allanit tamanit allaanerusut naapissinnaavatit! Kikkunuku, aamma sooq allaaneruppat? Guutip innuttaanut ilaapput, aammalu allaanerupput pissutigalugu aqqit tamarmik annerpaartaat — tassa pinngortitarsuarmik tupinnangaartuinillu tamanik Pinngortitsisup aqqa — atoramikku. Aap, aqqa uagut, kiffaasa, taagorneqaatigaarput. Tassa aqqagut katersuuttarpugut anersaakkut inuussutissat pitsaalluartut, peqatigiiffini aqqutigalugu „piffissanngoraangat“ tunniuttagai, nuannaarutiginiarlugit. (Lúkarse 12:42, NV) Jehovamut Nalunaajaasutut qujamasulluta aqqa asseqanngitsoq unnersiutigisarparput oqaatsit Isaia kapitali 12-imi versi 2-miittut atorlugit: „Aarit! Guuti annassutigaara. Isumalluarpunga ersinangalu; Jah Jehova tassa pissatsissutiga nakuussutigalu, taannalu annassutigaara.“ (NV) Misilinneqarnerpassuatsinnit Guutitta aniguisittareerpaatigut. Massakkullu annaanneqarnissavipput qanillivoq, aammattaaq tamanna Jah Jehovap assaaniippoq.
2. (a) Oqariaaseq „Jah Jehova“ qasseriarluni Bibelimi taaneqarpa, sumilu? (b) Isaia 12:2-mi oqaaseq „nakuussut“ aamma qanoq nutserneqarsinnaava, sunalu pillugu taamatut nutserneqarneri tulluarpat?
2 Oqariaaseq „Jah Jehova“, Guutip aqqa marloriarluni taaneqarluni, taamaallaat uani allassimaffimmi Isaia 26:4-milu atorneqarsimavoq. Bibelimi kalaallisut nutsikkami atortussaatitaasumi nutserisut tamanna ’Naalagaq’-mik nutsersimavaat. Ny Verden-ip nutsernera-ni tuluttuunngortitami qinerlerfissialimmi quppernerup ataani nassuiaasiullugu ilanngussami erseqqissaatigineqarpoq oqaaseq Isaia 12:2-mi „nakuussut“-mik nutserneqarsimasoq, aammattaaq „erinaq“-mik imaluunniit „unnersiutiginninneq“-mik nutserneqarsinnaasoq. Aap, ajugaqanngitsoq Jah Jehova, pallorfiginnitsiminik pissatsitsisartoq, erinarsornikkut unnersiutiginissaanut pissutissaqarluarpoq! — Isaia 40:28-31.
3. (a) Jah Jehovap uppertut sumik aqqutissiuussimavai, sunalu tunngavigalugu? (b) Rûmamiut 11:33-36-imi Paulusip oqaasiisa Jehovap Nalunaajaasui qanoq killittariaqarpaat?
3 Jehovap pissaanini atoraangamiuk pinngitsoorani ilisimassutsi, naapertuilluassutsi asannissutsilu akuutittarpai. Pissutsini taakku atorlugit Jah Jehovap inuit uppertut Jesusip utertitsissutissamik pilliutigineratigut annannissaannut aqqutissiuussimavai. Tamanna pillugu apustili Paulus ima allassimavoq: ’Ata, Guutip pisuussusiata ilisimaneratalu ilisarsineratalu itissusiat; eqqartuussinerisa killisissaanngissusii aqqutaasalu siunersissaanngissusii. Kiami Jehovap isumaa ilisaraa? Kinaluunniit isumalioqatigaa? Kialuunniit siulliulluni tunisimanerpaa akilerneqarsinnaanngoqqulluni? Taassumanngami taassumuunalu taassumunngalu suut tamarmik ipput. Taanna naassaanngitsumik naalannarsili. Amen!’ (Rûmamiut 11:33-36) Taamaattumik Jah Jehova, Guutitsitut ajugaqanngitsutut kisimilu oqartussaalluni Naalakkatsitut, tatiginnilluinnarnerput aalajangiullugulu oqaluussissutigisariaqarparput! — Naleqqiuguk Eprîarit 3:14.
4. (a) Suna pillugu pruffiiti Esajas pissutissaqarluarpa oqarnissaminut ima: „Isumalluarpunga ersinangalu“? (b) Maanna ukiut 2000-issaanni suna pillugu Jehovap innuttai pissutissaqarluarpat taanna isumalluarfigissallugu?
4 Esajas pissutissaqarluarpoq ima oqarnissaminut: „Isumalluarpunga ersinangalu.“ Kingorna pruffiiti taanna Guutip annaassissutaanik ilisimannillualerpoq. Jehovap neriorsuutini eqquutimmagu isiginnittuusimavoq, tassa Assyria kunngialu pingaakujuttoq, Sankerib, nikanarsarmagit. Unnuap ataatsip ingerlanerinnaani Assyriamiut sakkutuui 185.000-it inngilimit ataasiinnavimmit, Guutitsinnit ajugaqanngitsumit, Jehovamit, aallartitaasumit toqorarneqarput! Annaassinerup tamatuma misinnangaartup pissutaa tassaavoq kunngi Ezekiasip Judallu tamarmi Jah Jehova tatigilluinnarmassuk. (Isaia 37:6, 7, 21, 36-38) Aammattaaq massakkut ukiut 2000-issaanni Jehovap innuttani aniguisittarsimavai, naqisimaneqarnermit, oqaluusseqqusaannginnernit, malersugaanernit parnaarussaallutillu naalliutsitaanernit. Esajasip nalaani Assyriamiutut pingaakujuttutut nazistit siulersortaat Adolf Hitler kamattorsuulluni Jehovamut Nalunaajaasut pillugit ilaanni ima suaarsimavoq: „Taakkupalaakasiit Tysklandimi nungusarneqassapput!“ Kisianni nungutitaasut tassaapput Hitler nazisteqataalu. Taamanikkullu Nalunaajaasut arlaqanngitsuinnat Jehovamik tatiginnissimasut, maanna 121.200-it sinnerlugit amerlassuseqalersimapput! — Tussiaat 27:1, 2; Rûmamiut 8:31, 37.
5. Oqaatsit Isaia 12:3-5-imiittut ullumikkut Guutip innuttaanut tatiginnilluartunut qanoq ilillutik atuuppat?
5 Sumiluunniit malersuisoqalersillugu Jehovap innuttai tatiginnilluartut sallusuissutsip ernganik inuunartumik imernermikkut nakussatsinneqarlutillu nutaanngorsarneqartarput. Guutip pruffiitiata Isaia 12:3-5-imi oqarneratorluinnaq ippoq: ’Tipaatsullusi imertarumaarpusi annassutip puilasarfiinit. Oqarumaarpusilu taamanikkut: „Qutsavigisiuk Jehova, aqqagut torlorfigisiuk; inuiaqatigiinnut oqaatigisigik piliai, aqqa angingaartoq unnersiutigisiuk. Tussiaatigisiuk Jehova, inornartuliormat; tamanna nalunaajarneqarili nunani tamani.“’ Naalagaaffimmik sallusuissut immitsinniitittuartigu qujamasullutalu Naalakkatta kisimi oqartussaasup aqqa, Jehova, unnersiutigiuartigu. Taassumunnga tatiginnilluarluta ’oqaaseq oqaluussissutigisigu, piffissaasukkulluunniit piffissaanngitsukkulluunniillu suliuarta’. (2 Timûtiuse 4:2, NV) Assortuisut qanorluunniit saassussigaluarpata, Jah Jehovap asannittumik annannissamut siulersorumaarpaatigut!
„Inuiaqatigiit qunutitsisut illorpassuaqarfiat“
6, 7. (a) Suna pillugu Jehovap kiffaasa taanna unnersiutigisussaavaat, Isaia 25:1 naapertorlugu? (b) Illoqarfik aalajangersimasoq Isaia 25:2, 3-mi qanoq allaatigineqarpa? (c) Illoqarfik suna pruffiitip pinnguatsiarpaa? Akissutit uppernarsaruk.
6 Atagu massakkut Isaia kapitali 25 qimerlooriartigu. Versi 1-imi ima atuarpugut: „Jehova, Guutigaakkit. Illit angisuutippakkit, aqqit unnersiutigaara, tupinnartulioravit, qanga aalajangigaasut naammassivatit, ilumoorlutit, unneqqarillutit.“ (NV) Jehovap kiffaasa tatiginnilluartut akunnerminni tupinnartuliai pillugit unnersiutigaat. Esajasilu massakkut akerlianik saqqummiivoq, Jehovamut ima oqarluni. „Illit illoqarfiugaluaq qerruinnanngortippat, illorpassualik ungalusaq nungujartortoq illukuinnanngortippat; allanertat napasuliaat pallittaalisalik illoqarfiujunnaarpoq, qarmaqqinneqassanngilaq. . . . inuiaqatigiit qunutitsisut illorpassuaqarfiata illit [Jehova] qunugiumaarpaatit.“ — Isaia 25:2, 3, NV.
7 Illoqarfik sunaana „inuiaqatigiit qunutitsisut illorpassuaqarfiat“-nik taaneqartoq? Esajasip Moabimi illoqarfiit pingaarnersaat, Ar, Guutip innuttaanik akeqqersimajuaannartoq, eqqarsaatigisimasinnaavaa. Oqaaseqatigiilli Satanip peqatigiissortaasa immikkoortuata aappaanut tulluunnerugunarpoq — tassa Guutip innuttaanut akeravissuaq Babylon, kingorna Judamik Jerusalemimillu suujunnaarsitsisoq, Jehovamut pallorfiginnittarfimmik aseruisoq inunnillu sinneruttunik inussianngortillugit aallarussisoq. Babylonip kunngiata pingaakujulluni oqaaserisimasai Esajasip issuarpai: ’Qilammut qaqissaanga, issivissaarsuara qullarlugu Guutip ulloriaasa qulaannut, ingillungalu qaqqamut katisimaffimmut. . . . Qutsinnerussaartoq naligissavara.’ Jehovalli Kyros Persiameersoq pissaaneqalersippaa Babylon uppiteqqullugu Guutillu innuttai nunaminnut uterteqqullugit. Siulittuutigineqareersutut kingornagut Babylonip inigisimasaa ’qerruinnanngorpoq illukuinnanngorlunilu nungujartortoq’. — Isaia 14:12-14; 13:17-22.
8, 9. (a) Babylon alla suna Jehovap kiffaasa assortortariaqarpaat, taannalu qanoq pilersinneqarsimava? (b) Esajasip Babylon taanna qanoq taavaa, sunalu pillugu taaguut taanna tulluarpa?
8 Ukiulli 2500-t kingorna Babylonip uppititaaneranit, Jehovap kiffai Babylonimut allamut — ’Babylon Angisooq, uersartut maajunnartullu nunami pisartut arnaat’-nut — suli akiuuttuarput. (sarĸúmersitat 17:5) Babylon taanna tassaavoq eqqunngitsumik upperisarsiornerup silarsuarmi tamarmi naalagaaffissua. Tamanna pilerpoq Noap nalaani ulersuaqareernerata kinguninnguagut, Nimrodip Babylon siulleq, eqqunngitsumik aapakorniarpaluttumillu upperisarsiornerup aallaavigiligaa, illoqarfiliarimmagu. Jesusip apustiliisalu kristumiussutsimik tunngaviliinerata kingorna, tunussisut ’anersaapiluit ajoqersuinerinit’, Babylonimit guutipilussiorfiusumit aallaaveqartunit, maannalu kristumiuuneraqatigiit aallaavigisaannit, Bibelip sallusuissutaa mingutsinneqarpoq. (1 Timûtiuse 4:1) Kristumiussutsimik ilumoortumik issuaaneq tamanna maanna ’Babylon Angisuup’ immikkoortuisa nuimanersaraat, nunarsuarmilu tamarmi inuiannut assigiinngitsunut tamanut siammarsimalluni. Esajasip Babylon Angisooq taavaa „inuiaqatigiit qunutitsisut illorpassuaqarfiat“.
9 Ukiut 4000-it sinneqartut, Babylonitoqaq tunngavilerneqarmalli manna tikillugu, kisermaassillutik naalakkersuisut naakkittaatsut palasit qunutitsisut atorlugit inuinnarnik naqisimannillutillu anneruniarfiginnittuarsimapput. Aap, ’inuk inoqamminut pissaaneqartarallartillugu perlussiornartumik’. (akugdlîssup oĸausê 8:9) Jesusip inuppassuit tusarnaartini nalligingaarpai pissutigalugu upperisarsiortunik paarsisut ilumuunngitsut iluanngitsumik iliorfigisimammatigik, ’paarinerlugaallutillu isumakkiigaammata’. Ullumikkut assuarnarnerpaat tassaapput „inatsisaatsussutsip inua“, tassaasut kristumiuuneraqatigiinni palaseqatigiit imminnut nersortut aammalu Jehovamut Nalunaajaasunik akerlilersuinerpaallutillu malersuinerpaasut. — Matîuse 9:36; 2 Tásalûníkamiut 2:3, 4, NV.
10. (a) Isaia 25:3 naapertorlugu „inuiaqatigiit qunutitsisut illorpassuaqarfiata“ qanoq ililluni allatut ajornartumik Jehova naalannartittariaqarsimavaa qunugisariaqarlugulu? (b) Isaia 25:4, 5-imi ’nikanartut’ aammalu „qunutitsisut“ pillugit Esajasip Jehova qanoq oqaatigaa?
10 1919-imi Jehovap innuttani ilumoortut ’Babylon Angisuup’ qulangiisimaneranit aniguisippai. „Inuiaqatigiit qunutitsisut illorpassuaqarfiata“ taassuma allatut ajornartumik Jehova naalannartittariaqarsimavaa narrutsassimalluni takugamigit Jehovap „tupinnartuliai“, kiffani sunniisinnaalluartumik sulileqqinnissaannut makitimmagit. Aammattaaq eqqunngitsumik upperisarsiortunut ilaasortaasut allatut ajornartumik Jehova qunugisariaqalerpaat siunissami atugassartik eqqarsaatigalugu. Ukiuni hundredilippassuarni palasit qunutitsisut inunnut annertunerusumik ilinniagaqarsimanngitsunut nersugaritittuarsimapput. Maannali Esajas Jehova pillugu ima oqarpoq: ’Illit nikanartut pisaanaveerfigaatsit, ajorsartut pisaanaveerfigaatsit annikilliornerminni, qimaaffigisaraatsit siallersumi, alanngiffigaatsit kiattumi, angutaasersut [qunutitsisut] kamannerat sialussuartutut qarmanik nakkartitsisutut ikkaangat. Allanertat kamappaluat ukutittarpat kiannertut isillugu nunami panertumi; soorlu kianneq nuiap alanngileraangagu, taama nipaallisaraat angutaasersut [qunutitsisut] usorsitsaarneri.’ — Isaia 25:4, 5.
„Babylon“-imi nuannaarpaluttumik erinarsortoqanngilaq!
11. Suna pillugu ’Babylon Angisuup’ naalagaaffiani nuannaarpaluttumik erinarsortoqanngila, tamannalu upperisarsiortut assigiinngitsut aallartitaasa Assisimi katersuunneranni qanoq erserpa?
11 ’Babylon Angisuup’ naalagaaffiani tamani ullumikkut taamatorluinnaq ippoq. Tamaani nuannaarpaluttumik erinarsortoqanngilaq. Upperisarsiornermi siulersuisuisa naluaat guutit suut pallorfigisariaqarlugit. Tamanna qularnaalluinnartumik erserpoq Assisimi, oktoberip 27-anni 1986, silarsuarmi tamarmi upperisarsiortut assigiinngitsut aallartitaat katersuummata. Naalagaaffiit Peqatigiit Eqqissinermut Ukiorititaannut tunngatillugu paavi Johannes Paulip aappaata ’Babylon Angisuumi’ uppeqatigiit nuimanerusut siulittaasui aggersarsimavai. Tamarmik eqqissineq qinnutigaat, mattuttut angutit buddhasiortut ilaat allaat nalunaaquttap akunneri aqqaneq-marluk angullugit ullormi ataatsimi qinupput. Kinaliuna qinnuvigaat? Mariamut imaluunniit kristumiuuneraqatigiit illernartitaannut ataasiullunilu pingasuusumut? Imaluunniit hindusiortut upperisaannut ataasiullunilu pingasuusumut? Imaluunniit buddhasiortut guutiinut tuusintilippassuarnut? Imaluunniit Allahmut? Imaluunniit terianniamut shintosiortut pallorfigisaannut? Imaluunniit qinnutit Amerikamiup indianerip kinguaariinnit crow-meersup qinnutigisai akuersaarnarnerpaappat? Oqaatigineqarpoq, ’niaqormiuarsua ataqqinarpalullunilu kusanaqisoq’ pujortaanni eqqissinermut pigititani ikiitigalugu qinnutini „putsumut silaannarmut nillertumut tipigissaasusutut qullartumut“ annimmagit.
12. Upperisarsiornikkut siulersuisut taakkua Mikap Esajasillu oqaasii suut isumaqatigisinnaanngilaat?
12 Ataaserli qularutissaanngilaq: Upperisarsiornermi siulersuisut taakkua, buddhasiortut Dalai Lama-anninngaanniit „Ataqqinartorsuaq“ Methodiusimut grækerit ortodoksiusut ilagiinneersumut, arlaannaalluunniit Bibelimi oqaaseq Migga 4:5-imiittoq isumaqatigalugu atsiorumanavianngitsut: „Uagulli ingerlajumaarpugut Jehova Guutitta aqqa tunaaralugu soraajuilluta, naassaanngitsumik allaat.“ (NV) Aammattaaq isumaqatigisinnaanngilaat Guutimit isumassarsisinneqarnikkut oqaaseqaat Isaia, kapitali 42, versi 5 aamma 8-mi allassimasoq: ’Ima oqarpoq Guuti Jehova, qilammik pinngortitsisoq isuitillugulu, nunamik siaartitsisoq naalersitai tappullugit, anersaarnermik tunniussisoq inunnut qaaniittunut, anernermillu tassani angalasunut: „Uanga Jehova, tassa atera; naalannarsusera allamut tunniutissanngilara, unnersiutigisaaneraluunniit inuusalianut qiperukkanut.“’
13. Assisimi sunaana pisimasoq, taamaaliornerlu Jesusip nunamiikkallarami qanoq oqarluni ajornerarpaa?
13 Assisimi alutornangaartumik nalliuttorsiualaarpaluttumillu tamanut ammasumik isiginnaartitsineqarpoq, immikkut ittunik atisalersorsimallutik qinnutaallu uteqattaarinernik ulikkaarlutik. Tamakkorpiaalli Jehovap ernerata Jesusip maani nunamiikkallarami assuarai. Taamani upperisarsiornermut siulersuisut pillugit oqarpoq: ’Suliatik tamaasa suliarisaraat inunnut isigeqqullutik,’ toqqaannartumillu saaffigai oqarfigalugit ima: ’Eqqanaq ilissi allakkanik ilisimasusi farisiiarillu, ilumoortuusaarniartusi, qilammiup naalagaaffia inunnut parnaartarassiuk; ilissimi isissanngilasi, iserumasullu iseqqunngilasi.’ (Matîuse 23:5, 13; aamma takuuk Matîuse 6:1-8.) Qallikkut nalliuttorsiualaarnerit imaluunniit pallorfiginnittarfiit Guutip apeqqutaatinngilai. Soorlu Jesus oqartoq Guuti anersaajuvoq, ’taassuminngalu pallorfiginnittut anersaakkut ittumik ilumoortumillu pallorfigissavaat’. — Juánase 4:21, 24.
Eqqissinermik pilersitsisinnaasutuaq
14. (a) Silarsuup matuma uppeqatigiivisa eqqissinissamik qinnutiginninnerat suna pillugu ilumoortuusaarniarnerua? (b) Uppeqatigiit kristumiuunerartuusut Guutip eqqartuussutaanit sumik nalaanneqassappat?
14 Silarsuarmi upperisarsiornerup iluani paatsiveerunnersuaq qimerloortillugu, meerarpallannerussaaq upperissallugu upperisarsiornermut siulersuisortaasa qinnutaat silarsuarmi tamarmi eqqissinermik kinguneqarumaartut! Ukiuni hundredilinni arlaqartuni, naalagaaffiit sorsuunnerinut ilaajutigalutik, ilerfiarnernut ilaajutigalutik inunnullu allatut eqqarsartartunut angutaaserluni malersuinernut ilaajutigalutik, qinnutinik ilumoortuusaartunik qinusarsimapput. Jehovap pruffiitia aperisimavoq: ’Inuup qernertup amini allanngortissinnaanerpaa, milakulaalluunniit milani? [Taamaaliorsinnaappata, NV] ilississaaq ajunngitsuliorneq sapissanngilarsi, ajortumut sungiusartusi.’ (Jerimia 13:23) ’Babylon Angisuup’ — eqqunngitsumik upperisarsiornerup silarsuarmi tamarmi naalagaaffissuata — nuimanersaatut, kristumiuuneraqatigiit Guutip uuttortaavianut uuttortarneqarsimapput, paasineqarsimallutillu oqippallaartut. Nungutitaanissamut eqqartuunneqarsimapput! — Jerimia 2:34, 35, 37; 5:29-31; Dâniale 5:27.
15. Jehovap qanoq ililluni eqqissineq ittuinnartoq pilersikkumaarpaa, taassuminngalu tunaarinnittut qanoq ilillutik eqqissinissamut suliaqarpat?
15 Jehovap, ’Guutip eqqissisaasup’, eqqissineq ittuinnartoq pilersikkumaarpaa, aammik kuisisimasut kuiseqataasimasullu piiarnerisigut nunarsuullu inunnik sallusuissummik iluarsusermillu nuannarisaqartunik inulersorneratigut. (Filípimiut 4:9) Kunngi Davidip oqarnera naapertorlugu nunarsuarmik kingornussisussat ’eqqissinangaartumillu nuannarinnittussat’ tassaapput inuit qanilaartut, ’Jehovamut tunaarinnittut ajunngitsuliortullu’. (Tussiaat 37:3, 11) ’Jehovamut tunaarinnittut ajunngitsuliortullu’ eqqissinissaq pillugu suliartik inuit guutinut assigiinngitsorpassuarnut, guutipilunnut guutilianullu paatsiveqanngitsorpassuarnik qinusartut iliuuserisinnaanngisaannagaannik ingerlappaat. — Tussiaat 115:2-8; Isaia 44:14-20.
16. Jehovap qanilaartut katersuuttut ’inuiaqatigiillu qunutitsisut illorpassuaqarfiannit’ aniguisitaasut sumik nerersuartikkumaarpai?
16 Guutip nammineq innuttaasa neriugisaata qinnutaasalu aamma ’Babylon Angisuumut’ atasut neriugisaata qinnutaasalu assigiinngissutaat ila angimmat! Paasivarput ’nipaallisaraat angutaasersut [qunutitsisut] usorsitsaarneri’. (Isaia 25:5) Qanilaartulli katersuuttut „inuiaqatigiit qunutitsisut illorpassuaqarfiat“-nit aniguisitaasut pillugit Esajas ima nangippoq: ’Jehovap katersaarsuit Guutiata qaqqami matumani inuiaqatigiit tamaasa qassimiuaartikkumaarpai [tassa: nerersuartikkumaarpai] nerliummut orsuligatsiaamut viinnimik kitsersimasumik avalaalluni.’ (Isaia 25:6) Anersaakkut inuussutissat ullumi Jehovamut pallorfiginnikkiartorlutik aggersimasunut sassaalliutigineqartoq mamarlunilu qaarsillarnarpoq, ilumut nerersuarneq! Jehovap pilersitseqqinnissaminik nunarsuarmilu nutaami nerersuartitsinissaminik neriorsuutaanik ilimasulluta Jehovamut ilungersorluta kiffartoraangatta uummativut ingerlaannarnissamut nakussatsinneqartarput nuannaarnermillu peqangaalersarluta. — Tussiaat 104:1, 14, 15; Matîuse 19:28.
17. Jehova qanoq ililluni ’tupinnartuliussava’, tamannalu sumik kinguneqassava?
17 Ungasinngitsukkut Jah Jehova ’tupinnartuliorumaarpoq’ „Babylon Angisooq“ suujunnaarsiinnarnagu aammattaarli Adamip ajortuliornera pissutigalugu ulik inuit perloqqusaanikkut uligisaat peerumaarlugu. (Isaia 25:7) Aap, Jesusip pilliutaa tunngavigalugu Guutitta siulittuut Isaia 25:8-miittoq eqquutitikkumaarpaa: ’Toqu nungutikkumaarpaa nangittariaqanngitsumik, allarterumaarpaalu Jehovap naalagaasup qulliit kiinnani tamani ittut, innuttami narrugisaanerat peerlugu nunap tamarmi qaanit; Jehova taama oqalummat.’ Ila qanoq nuannertigissava ajorti toqulu Adamimit kingornussimasarput peerneqarpat aammalu asasavut toqumit utertinneqartut tikilluaqqulerutsigik! Taava Jehovap kiffaasa ilumoortut Jehovamut mitallersoq, Satan Diaavulu, naammassissutaasumik akisimalissavaat! (ússatit 27:11) Mitallerneqarunnaassapput, assuar- naassutsimikkut ajugaassagamik. ’Ilumoorluni, unneqqarilluni’ Jehovap siulittuutigisimasani tamaasa — „qanga aalajangigaasut“ — naammassisimassavai. Taamanikkussamut nunarsuaq tamarmi paratiisiujumaarpoq inunnik iluarsuseqartunik ulikkaartoq. Ila siunissami atugassatta alutornangaassusissaat!
18. Isaia 25:9 naapertorlugu qanoq iliussalluta aalajangersimavugut, naak tatisimaneqarneq atortariaqaraluaripput?
18 Maanna piffissami tarrajuttumi Jehova tatigilluinnarutsigu taava pinngitsoorata akissarsiassarput pisimalissavarput. Tatisimaneqarneq sunaluunniit ulluinnarni anigorniagassarigaluarutsiguluunniit — immaqa ilaquttatsinnik pilersuiniarnitsinni, atuarfimmi Bibelimi najoqqutarineqartunik maleruaaniarnitsinni imaluunniit oqaluus- siffigisassani „ajornakusoortuni“ — taamaattoq Jehova tamatigut tunaarisartigu. ’Qinnutinik tusartartoq’ qanittumik attaveqarfigiuaannarutsigu annannissamik kinguneqassaaq. (Tussiaat 65:3) Taamaattumik aalajangiusimajuartigu Isaia 25:9-mi ima oqartunut akuunissarput: ’Tassa una Guuterput utaqqisarput, annaappaatigut; tassa una Jehova utaqqisarput, qiimasulluta tipaatsutta annaassinera pillugu.’ (wD 15/1 88)
Apeqqutit uteqqitassat
□ Jah Jehova tassa pissatsissuterput nakuussuterpullu qanoq paasisariaqarpa?
□ „Inuiaqatigiit qunutitsisut illorpassuaqarfiat“ sunaava?
□ „Inuiaqatigiit qunutitsisut illorpassuaqarfiata“ qanoq allatut ajornartumik Jehova naalannartittariaqarlugulu qunugisariaqarpaa?
□ ’Babylon Angisuumi’ nuannaarpaluttumik erinarsortoqannginnera suup ersersippaa?
□ Innuttani pillugit Jehovap ’tupinnartuliat’ suut naammassiumaarpai?