Jah, Jehova, tatigisiuk!

„Jehova tamatigut tatigisiuk, tassami Jah, Jehova, qaarsoraarput qaqugumulluunniit aalassassanngitsoq.“ — Isaia 26:4, NV.

1, 2. Erinarsuut unnersiutiginnissut qiimmattartoq suna Isaia 26:1-6-imiippa, sumullu tunngava?

„INUIAQATIGIIT qunutitsisut illor- passuaqarfiat“-nik nikanarsaaneq ajugaasimaarluni erinarsornissamut pissutissiivoq! (Isaia 25:3, NV) Kisimi oqartussaalluni Naalakkamut Jehovamut erinarsuut nuannaarpaluttoq taama ittoq Isaia kapitali 26-mi, versit 1-imiit 6-imut nassaassaavoq. Maanna erinarsuut taanna atorneqarpoq ’Judap nunaani’. (Juda isumaqarpoq „unnersiutigisaq“.) Aammattaaq uani Bibelimi kalaallisuumi atortussaatitaasumi oqariaaseq „Jah, Jehova“ ’Naalagaq’-mik nutserneqarsimavoq, erinarsuutilli taassuma oqaasertai Ny Verden-ip nutsernera-ni tusarnernerujussuupput, tassami Guutip aqqa tassani allanilumi eqqortumik ilaatinneqarmat.

² Atagu erinarsuut taanna nipigissoq tusarnaariartigu: „Illoqarfeqarpugut pissaasumik. Annassut [Jehovap] qarmanngortillugulu ungaluliaatippaa. Isaaffiit ammarsigik, isersinnaaqqullugit inuiaqatigiit iluartut ilumoortumik ileqqoqarnerminnik aalajangiussisut. Aalajaatsumik isumalik eqqissinermik ataavartumik sernissussavat, tatigisaami tassaammat illit. Jehova tamatigut tatigisiuk, tassami Jah, Jehova, qaarsoraarput qaqugumulluunniit aalassassanngitsoq. Portusuumiittumi, illorpassuaqarfimmi qutsissumiittumi, inillit nakkakaatippai. Nikanarsarpaa, nunamut pisillugu nikanarsarpaa; issumut nallartillugu. Isikkap tummaatarissavaa, annikilliortup isigaasa, nikanartut tummarnerisa.“ (NV) Tassuminnga maanna erinarsortut isumalluarpaluttut — tassa Jehovamut Nalunaajaasut — akornanniilluni ila nuannissusia!

3. (a) „Inuiaqatigiit iluartut“ sunaava, kikkullu ’isaaffiisigut’ ammasutigut isaasimappat? (b) Naak akeqqamit avissaartinniarneqaraluarlutik Jehovap peqatigiissortai sooq peqatigiilluinnarlutik siumukartuarsinnarpat?

³ Jah, Jehovap, usorsisimaartut nikanarsassavai imminullu isumalluarfiginnittuaannartut aniguisissallugit. Israel anersaakkut ittoq maanna tassaalersimavoq ’inuiaat pissaasut’ — „inuiaqatigiit iluartut“ — naak siornatigut ’minne’rusimagaluarluni. Amerlangaartut 3 millionit sinneqartut Israelimik anersaakkut ittumik suleqatiginnikkusuttut, Jehovap peqatigiissortaasa illoqarfimmut assingusut ’isaaffii’ isaaffigisimavaat. Ataatsimut tassaapput nunarsuaq tamakkerlugu qatanngutigiiusut, amerlassusiisalu Naalagaaffiit Peqa- tigiit-nik taaneqartartut ilaasortaasa nunat ilaasa 57-it tamarmik immikkut inuttussusii qaangersimavaat. „Inuiaqatigiit“-ni Guutip pigisaani innuttaasut taakkununngalu ilanngussimasut, ilumut peqatigiilluinnarput. Nunarsuarmi sumi tamaaniikkaluarunilluunniit Guutip najoqqutassiai naapertuilluartut maleruarumavaat. „Inuiaqatigiit“ Guutip pigisaata ’qarmaat’ peqatigiinnerannut tunngasut sallusuissummik illersuinerminni ileqquminnik ilumoortumik maleruaanngitsoortinniarlugit Satanip ilungersuuteqarneranut assiaqutatut ipput. Guutip innuttaasa siumut ingerlaarnerat ilumoortoq akeqqap unitsissinnaanngilaa! ’Jah, Jehova, qaarsoq qaqugumulluunniit aalassassanngitsoq’ tatigiuarumavarput. — Isaia 54:17; 60:22.

4, 5. (a) ’Illorpassuaqarfik qutsissumiittoq’ sunaava, qanoq ilillutillu Jehovap innuttaasa assersuutaasumik tummaataraat? (b) Siulittuut Isaia 26:10-miittoq qaqugu qanorlu pingaarnerusumik eqquutissava? (c) Siulittuut taanna aamma sumut tunngatinneqarsinnaava?

⁴ Jehovap ’illorpassuaqarfimmik qutsissumiittumik’, „Babylon Angisooq“-mik, uppititsinissaanik mianersoqqussut annikkaangaangatsigu, qiimmatsiallannartarpoq takullugit nunami naalliuttut nikanartullu tusagassaq nuannersoq Naalagaaffimmut tunngasoq ilassilluaraat. (sarĸúmersitat 18:2, 4, 5) Aammattaaq ’illorpassuaqarfik qutsissumiittoq’ assersuutaasumik tummaataraat, aseruinerpiamik peqataanermikkuunngitsoq, kisiannili Jehovap pissutsit aaqqissuussaanerannik ajortumik akiniaaffissaanik ullormik oqaluussissutiginninnermut peqataanermikkut. (Isaia 61:1, 2) Jehovamut Nalunaajaasut maanna ukiuni qulikkaani amerlasuuni guutiitsut pulaarlugit Naalagaaffik pillugu tusarliussamik annassutaasumik oqaluussiffiginerisigut inussiarnernermik nittaavigisarsimavaat. Kisiannili Isaia 26:10-mi allassimasutut pisimavoq: ’Iluaatsut saammaanneqaraluarlutik iluartumut sungiussisarinngillat; isertuiuitsut [tassa: peqqusersuitsut] nunaanni iluaatsuliortarput, Jehovallu inornarsusia isiginngilaat.’

⁵ Atulerseqqitsinissamik siulittuut tamanna ullumikkut pingaarnerusumik eqquuppoq. Naak periarfissaqaraluartoq, ikittuinnaat inooriaasertik allanngortikkumavaat „peqqusersuitsut nunaanni“ (NV) Jehovamit iluarisaajumallutik. Jehovamut taassumalu Nalunaajaasuinut ilumoortunut mitallersut, ’Jehovap inornarsusia’ isiginavianngilaat, tassami sivisungaatsiartumik inuunaviannginnamik Jehovallu aqqa illernartinneqareerpat pilluaqqussutissat nuanningaartut inuit pisassaat angumerinaviarnagit. (Isaia 11:9) Aammattaaq siulittuummi pineqarsinnaapput inuit nunamut paratiisiusumut ilivermit makititaasussat. Guutip peqqussutaanik ’mappersakkani’, taamanikkussamut ammarneqarumaartussani, allassimasunik maleruaajumanngitsut aqqi ’mappersakkanut inuunerup piinut’ allanneqarnavianngillat. — sarĸúmersitat 20:12, 15; naleqqiuguk Hisĩkiale 33:11.

Jehovap innuttani eqqissinermik tunivai

6. Jehovap innuttai ilumoortut nuannaarlutik qanoq nillerpat, aammalu sooq?

⁶ Guutilli innuttaasa ilumoortut kissaatigaat Jah Jehova qutsillisinneqassasoq naalannarsisinneqarlunilu. Qinnuigaat ’eqqissinermik pississagaatik’, nuannaarlutillu nillerput: ’Inuiaat ilavatit, Jehova, inuiaat ilavatit naalannarsillutit; allisippatit nunap isui tamaasa.’ (Isaia 26:12, 15) Nunarsuaq tamakkerlugu nunani 210-ni Jehovap inuit savatut ittut inuiaqatigiinnut piminut anersaakkut ittumut eqqussorpai. Ilagiinnut ilannguteqqammersut hundredinik tuusintillit kuisittarput. Pionerit ikiortaasut, pionerit nalinginnaasut, pionerillu atorfinitsitaasut amerlanerpaagamik millionit affaat qaangersimavaat. Rigssalinik ataatsimeersuartarfinnillu sanaartorneqartuarpoq. Vagttårnip peqatigiiffiata allaffeqarfiisa angerlarsimaffiit Betelit naqiteriviillu allilertuarpaat maskiinanillu naqiterutinik pisiortortuarlutik. Aap, alliartorneq ingerlajuarpoq!

7. Jehovap peqatigiissortaasa illoqarfimmut assingusut alliartornerannut suna peqqutaava?

⁷ Alliartorneq tamanna pissuteqarpoq Guutip innuttaasa nunami sulinerat ’Eqqissinermut Naalakkamit’ siulersorneqarmat. Soorlu Esajas siusinnerusukkut siulittuutimini oqarsimasoq: ’Naalagaassusiata alliartornera eqqissinerlu soraarfeqassanngillat Davidip issiavissaarsuani naalagaaffianilu, tunngavilissagamiuk aalajangersarlugulu innarluissummik naapertuilluarnermillu, matumannga isuanullu allaat. Jehovap katersaarsuit Guutiata ilungersornerata tamanna naammassiumaarpaa.’ (Isaia 9:6, 7) Oqaatsit tamakkua ullumikkut tupinnarluinnartumik eqquupput. Jehovamut tatiginnittut eqqissineq, innarluissut naapertuilluarnerlu naalagaassutsip angingaartup tamatuma pigisai maannangaaq misigisalereerpaat. Ataasiussusermik asannippaluttumik taamaallaat Jesusip ajoqersugaasa ilumoortut akornanni nassaassaasumik tamatuma pigisaqartilersimavai. (Juánase 13:34, 35) Aammattaaq isumalluarlutik neriuutigaat erniinnaq Naalagaaffiup naalagaassusiata ’Jehovamillu ilisarsissutip’ nunarsuaq tamakkerumaaraat. — Isaia 11:9; Dâniale 2:35, 44, 45.

8. Isaia 26:20-mi Jehovap oqaasiata suna ersersippaa, aamma ’ininnguit ilorliit’ sunut tunngatinneqarpat?

⁸ Naalagaaffiup alliartornerata alliner- paaffissi angusimalerpagu, Jehovap kajumissaarutaa Isaia 26:20-mi allassimasoq tutsiukkumaarpoq: ’Iseriartoritsi, innuttakka, ininnguassinnut ilorlernut, matu parnaarlugu kingunissigut; toqqoritsi sivikitsunnguamik, uumitsanneq qaangiutserlugu.’ Qularutissaanngilaq siulittuummi eqqartorneqartut ’ininnguit ilorliit’ silarsuaq kaajallallugu Jehovap Nalunaajaasuisa ilagiissaannut, illoqarfinnut assingusunut 54.000-it sinneqartunut, tunngatinneqarmata. Jehovap suna siunertarineraa paaserusukkutsigu utaqqisariaqarpugut. Esajasip nalaani Assyriamiumik peqqarniitsumik ajugaaffiginninnermisut, Jehovap guutiitsut piialerunigit inuit imminik tatiginnittut sernissorumaarai qularissanngilarput. — Isaia 10:24-26.

Aniguisitaanissamik qulannginneq

9. (a) Kunngi Ezekiasip Jehovamut tunaarinninnini qanoq ilillugu ersersippaa? (b) Jehovamut uumissuisunit malersorneqaraangatta mitaatigineqaraangattaluunniit qanoq iliortariaqarpugut?

⁹ Ullumikkut Guutip kiffai kunngi Ezekiasip Jehovamut tatiginnissimaneratut ittumik peqarput. Jehova kisimi oqartussaalluni Naalakkamisut tatigilluinnarsimavaa. Taamaattumik Assyriamiut siooranarsilluinnarmata Jehovamut qinuvoq ima oqarluni: ’Jehova katersaarsuit Guutiat Israelip Guutia, keerubit qulaanni issiasutit, illit kisivit Guutiuvutit nunami naalagaaffinnut tamanut; illit qilallu nunalu pinngortippatit. Jehova, siutitit manikkit tusarlutillu; Jehova, isitit mappikkit takullutillu; Sankeribillu oqaasii tamaasa tusakkit, taassuma oqaasereqqusai Guuti uumasoq kanngusuutissioqqullugu.’ (Isaia 37:16, 17) Jehovamut uumissuisunit malersorneqaraangatta, mitaatigineqaraangatta asissorneqaraangattaluunniit, misigissannginnerpugut qinnummut taassumunnga assingusumik qinunissatsinnut kajumissisinneqarluta? Jehova tatigilluinnarlugu qinnuigissannginnerparput aqqata mitaatigineqarnera akornuseqqullugu? Taamatorpiaq Jesus misigisimavoq qisummi nappakkami naalliutsitaaffimmi toqunissi sioqqutitsiarlugu. Allaat qinnutigaa ermuseq erniinnaq imigassani peeqqullugu, pissutigalugu nalunnginnamiuk taanna Ataatami aqqata asissorneqarnissaanut pisuussasoq. — Matîuse 26:39-44.

10. (a) Ezekiasip suna pingaarnerusumik isumakuluutigigini qinnutimigut qanoq ersersippaa? (b) Harmagedonip siunitsiannguagut misilinneqarnernik nalaanneqaraangatta uagut kunngi Ezekiasip iliorneratut qanoq iliorsinnaassaagut?

¹⁰ Namminissarsiuinnarluni Assyriamiumit aniguisinneqarnissani Ezekiasip qinnutiginngikkaa qinnutaanit ersippoq. Kisiinnarmi annannissani kissaatiginngilaa. Isumakuluutigaali Jehovap aqqata illernartinngitsoorneqarnissaa kisimilu oqartussaanerata aalajangiutinngitsoorneqar- nissaa. Taamaattumik qinnutini oqaatsinik ukuninnga naavaa: ’Maannalu, Jehova Guuterput, annaatsigut assaanit, nunami naalagaaffiit tamaasa ilisimaleqqullugit illit, Jehova, taannaasutit kisivit.’ (Isaia 37:20) Harmagedonimi sorsunneq inaarutaasoq takkutinngikkallartillugu misilinneqarnernik nalaanneqaraangatta, eqqaamajuartigu nammineq annannissarput salliunnagu Jehovap aqqata illernarsisitaanissaa salliutissagatsigu. Soorlu Naalakkatta kisimi oqartussaasup pruffiitimigut Ezekielikkut 60-it missiliorlugit uppernarsartaqattaaraa: ’Taavalu misigissapput uanga tassaasunga Jehova.’ — Hisĩkiale 38:23.

11. (a) Sankeribip suna kukkussutigaa, Jehovallu tamanna qanoq oqaatigaa? (b) Sankeribimut pisimasut eqqarsaatigalugit, uagut tatiginnilluta suna qularissanngilarput?

¹¹ Ezekias Jehovamut qinoreermat, Esajasip kunngi Sankerib ilisimatippaa Jehovap taanna pillugu oqaaserisimasaanik. Guutimik mitalliisoq Assyriamiu taanna iluanngitsuliorujussuarpoq Guuti uumasoq mitalleramiuk! Esajas aqqutigalugu Jehova Sankeribimut ima oqarpoq: ’Kina kanngusuutissiorpiuk mitallugulu? Kimullu nipit anippiuk? Isitit aarlortingaarpatit Israelip Illernartua akerartorlugu.’ Unnuarlu taanna Israelip Illernartua akuliuppoq. Unnuaq taanna Assyriamiut sakkutuui, Sankeribip sakkutuuisa pingaarnersai, 185.000-iusut Jehovap inngiliisa ilaata ataasiinnaap toqorarpai. Kunngi pingaakujunniaqisoq imminut nikanartittariaqalerpoq Ninevemullu uterluni, ukiualunnguillu qaangiummata guutiliamut pallorfiginninnialeruttorluni ernerminit toqunneqarpoq. Jehova tatigisinnaavarput, qularinngilluinnarlugulu tamatumunnga assingusumik Satan malinnittaalu, guutimik mitaatiginnillutik Jehovap Nalunaajaasuinik asissuillutillu malersuiartut, pillarumaarai. — Isaia 37:23, 36-38.

Toqutat akiniunneqassapput

12. (a) Harmagedonimi ulloq eqqartuutiffissaq Isaia 26:21-mi qanoq allaatigineqarpa? (b) ’Toqutat’ Harmagedonip nalliutinnginnerani akiniunneqartussat kikkuuppat, akiniussinerlu qanoq ingerlassava?

¹² Taamani pisimasoq tupinnangaarluinnartuuvoq, ullorli eqqartuutiffissaq piffissami ’naalliunnartoqangaartumi’ pisussaq suli amiilaarnarnerungaassaaq. (Matîuse 24:21) Jehovap kajumissaarpaatigut toqoraanersuup annertussusia malugeqqullugu: ’Jehova najukkaminit aniumaarmat ata, nunamiut ajortuliaat taakkunani takusarlugit; taava nunap uleerumaarpaa aak imminut kuisaq immini toqutat kingorna matuussanagit.’ (Isaia 26:21) Siullermik Jehovap upperisarsiornermik ajoqersuinerluutit ilungersuutigalugit illersuisut naalakkersuinermik pissaaneqartunut eqqartuutitikkumaarpai. Ulloq taanna guutipiluliaasa annaassinnaanavianngilaat! Paavip ’Babylon Angisuup’ upperisarsiornermi siulersuisui assigiinngitsunik nassuerutillit qinoqatigiinnersuarnut katersortittarniannguarligit. Silarsuarmi ilagiit assigiinngitsunik nassuerutillit upperisarsioqatigiinniarnerannik illersuisut taakkua arlaannaataluunniit Guuti ilumoorlunilu uumasoq, Jehova, ataqqinngilaa. Ajoqersuutaat kukkusuupput Bibelimillu tunngaveqaratik, aammattaaq suliaat taamaapput. Ukiuni hundredilinni upperisaqatigiit imminnut toqoraattuarsimapput. Aammattaaq kristumiut sorsoqataanngitsut aavat kuutsittarsimavaat. Maani ukiut 2000-issaanni taakkua ilarpassuisa kisermaassillutik naalakkersuisut, Jehovamut Nalunaajaasunik eqqaassillutillu niaquersillutillu ineeqqanut gassimik ipititsisarfiusunut isertitsisarsimasut, tapersersortarsimavaat. Kisianni, soorlu Jehovap pruffiitimigut nalunaarutigereeraa, ’toqutat’ akiniunneqarumaarput. — 5 Môrsase 32:41, 43; Isaia 1:24; 63:4; sarĸúmersitat 17:15-18; 18:21, 24.

13. ’Jehovap ullua’ pillugu Esajasip suna siulittuutigaa, oqaasiilu kikkunnut oqaassutaappat?

¹³ Eqqunngitsumik upperisarsiornerit suujunnaarsinneqareerpata Kristusip naalagaaffianut akerliusut sinneruttut Jehovap akuliuffiginasuarumaarpai. Taakku aammalu „Babylon Angisooq“ tassaapput Guutip oqaasiata Isaia 13:6, 9-mi allassimasup saaffigisai: ’Nilliagitsi, Jehovap ullua pallilermat; perlussuartut Ajugaqanngitsumit pisutut aggerpoq. Aarit Jehovap ullua aggerpoq naakkittaatsumik, arrannerlu ninngannerullu katsungaassusia, nuna inuilaanngortissallugu ajortuliartuilu tassannga piiassallugit.’ Tussiaasiortup Davidip siulittuineratorluinnaq pissaaq: „[Jehovap] pigaappai asasini tamaasa, guutiitsulli tamaasa nungutissavai.“ — Tussiaat 145:20; sarĸúmersitat 19:11-21.

14. Esajasip oqaasii suut inuiaqatigiit silatusaarunik sianigissavaat, sunalu pillugu?

¹⁴ Silarsuarmi naalagaaffiit silatusaassapput Esajasip oqaasii kapitali 34, versit 1-8-mi allassimasut maluginiarunikkik: „Qanilligitsi, inuiaqatigiit ukorsii, tusarniarlusi; naggueqatigiillu ukorsii, tusarnaarluarniaritsi. . . . Jehova narrutsammat inuiaqatigiinnut tamanut, kamallunilu katersaannut tamanut. Nungutitaasussanngortippai; toqorarneqartussanngortippai. Toqutartaallu igitaajumaarput; timaasalu toqungasut tipersuat qangattarumaarpoq; aavallu qaqqat suujunnaarutigissavaat. . . . Tassami Jehova ullormik akiniaaffeqarmat.“ (NV) Naalakkersuinerup, suliffissuaqarnerup eqqunngitsumillu upperisarsiornerup iluanni peqquserluttuliorneq ileqqorlunnerlu ullumikkut atugaasorujussuupput. Jehovalli siunertaraa nunarsuaq salikkumaarlugu. Taamaattumik inuiaqatigiinnit immikkoortillugit katersorpai inooriaatsiminnik allannguiumasut naapertuilluarsutsikkullu imminut kiffartorumasut, taamaalillutillu aniguisussat. Allat tamarmik ullussami akiniaaffimmi tassani suujunnaarsitaajumaarput. — Jerimia 25:31-33.

Paratiisi eqqissineqangaarfiusoq

15. Isaia kapitali 35-mi suut allaatigineqarpat (a) uagut ulluvut pillugit? (b) siunissaq pillugu?

¹⁵ Isaia, kapitali 35-mi, Guutip pruffiitiata Guutip kiffaasa, ullumikkut Guutimut tatiginnittuartut, nutaanngorsagaasut akornanni pissutsit assersuutikkut kusanavissumik allaaserai. Anersaakkut paratiisimut eqqunneqarsimapput aammalu ’Jehovap naalannarsusia takullugu, Guutitta ataqqinarsusia’. Paratiisimi piviusumi inuulernissartik qilanaaraat aammalu neriorsuutip eqquunnissaata misiginissaa: ’Taava uisitaassapput tappiitsut isaat, tusilartullu siutaat ammarneqarumaarput; taava tusiattut pissikkumaarput tuttutut, oqajuitsullu oqaat qiimmattassaaq. Erngit puillarumaarmata puilasuitsumi, kuunnguillu narsami kuugaatsumi.’ (Isaia 35:1, 2, 5, 6) Aamma illit tamatuma misiginissaa qilanaaraajuk? Jehova tatigaajuk qularinagulu neriorsuutini eqquutikkumaarai?

16, 17. (a) Paratiisissamik allaatiginnitsilluni Esajasip suna kimittusaartumik oqaaqqissaarutigaa? (b) Jehovap innuttaasa oqaaqqissaarut taanna qanoq qisuariarfigissavaat?

¹⁶ Jehovamut tatiginnikkuit taava ilagiinnut ilannguteqqammersut imaluunniit uppeqatitit uppernermik nakussatsinneqarnissaannut pisariaqartitsisut ikiorsinnaavatit. Paratiisimik eqqartuinermi qeqqinnaani Esajasip atuartussaq ilungersortumik imatut kajumissaarpaa: ’Pissatsissigik assaat nukillaartut, seeqqullu aqullaartut nakussatsissigik. Oqarfigisigik uummatimikkut qussalasut: „Tuppalleritsi siooraqinasilu, takuarsi Guutersi aggersoq akiniaassalluni Guutip akiliutaanik; taanna aggerpoq annaakkumaarlusilu.“’ (Isaia 35:3, 4) Aap, kissaatigaarput peqqusersuitsut tamarmik Jehovamut tatiginninnertik sakkortusassagaat, taamaalillutik nunami paratiisiusumi inuuneq angusinnaaniassammassuk.

¹⁷ Taamaattumik assamminnik nukillaartitsisimasut nakussassarniartigik, ’oqaaseq inuussutaasoq aalajangiunniassammassuk’. Seeqqumikkullu aqullaartut ikiorniartigik, ’Jehovami ileqqorisariaqartoq naapertorlugu tamatigut iluarisassaanik saqilluarsinnaaqqullugit’. (Filípimiut 2:16; Kulorsamiut 1:10) Aap, nanertisimasut tamaasa tuppallersartarniartigik, aammalu misilinneqarnernik malersugaanernillu nalaanneqaraangatta immitsinnut qiimmassartuartarniarta ’annermik sapiilersinnaaqqulluta Guutip oqaasiata ersiorata oqaaserinissaanut’. (Filípimiut 1:14; 1 Tásalûníkamiut 5:14; Evfisumiut 5:15, 16) Taamaaliorutta taava qularissanngilarput Jehovamit pilluaqqussut misigissallutigu ullussami akiniaaffimmi ’aggerpat annaallutalu’. Ulloq taanna Jehovamit annaanneqarnissaminnut tatiginnittut akornanneerusuppit?

18. Jehovamut tunaarinnittut siunissamut sunik nuanningaartunik neriugisaqarpat, taamaattumillu qanoq iliussallutik aalajangersimappat?

¹⁸ Jehovamik tunaarinnittuaannartut siunissartik nuanningaartoq ullup taassuma kingorna pisussaq qilanaarisinnaavaat! Taakkunannga naqisimannissimasut taamanikkussamut peerussimassapput. Silarsuassami nutaami Jah, Jehovamik, asannittut erneranit naammalluinnassusermut utertinneqarumaarput. Taamanikkussaq erinigaajuk? Jehovamut tunaarinnikkuit illit nammineq taamanikkussaq nuanningaartoq misigiumaarpat. Aap, tamatigut Jehova tunaariuaruk, tassami tamanna annaanneqarnissamik kinguneqassaaq! (wD 15/1 88)

Apeqqutit uteqqitassat

□ Ajugaasimaarluni erinarsuutip Isaia kapitali 26-miittup qanoq ilioqquaatigut?

□ ’Illorpassuaqarfik qutsissumiittoq’ suna Jehovap uppitikkumaarpaa, uagullu qanoq ililluta tummaataraarput?

□ Sankeribip sioorasaarmani Ezekiasip qinnutaa uagut sumik ilinniarfigisinnaavarput?

□ ’Toqutat’ Isaia 26:21-mi eqqartukkat qanoq akiniunneqassappat?

□ Jah, Jehova, tatigigutsigu sumik kinguneqassava?