Sooq qujamasuttariaqarpa?

ATUAGASSIAP matuma saqqaa qimerlooriaruk. Ilaa alianaangaarami! Nunarsuarmi sumiluunniit ipertooqaqalunilu takussunartoqaraluaqisoq taamaattoq ilumoorpoq suli kusanartoqaqalunilu alianaatsoqaqimmat.

Alianaatsut nuannaarutigisannginnerpigit? Nuannaarutigisannginnerpiuk neriusaaq, assersuutigalugu, silarloreernerani ersarissunik kusanartunillu tulluariittunik qalipaateqarluni saqqummertartoq? Nuannaarutigisannginnerpigit kuussuaq ittuttuinnaq, nersut piaqqaminik pinnguaqateqartoq, qaqqarsuit aputitarasaartut imaluunniit imaq sikorasaaqisoq? Isigisat taama ittut inuppassuarnit immaqa ulluinnarpalaartutuinnaq isigineqalersimapput. Ilinnulli qanoq sunniuteqartarpat?

Soqutaanngitsutut isigineqarajupput

Misigisimasaq arlaleriarlugu misigeqqikkaanni nalinginnaasutut isigileriartornartarpoq — soqutaanngitsutullu isigeqqajaalernarsisarluni. Ingammik ukiuni hundredelinni atukkatsinni uisakajaarfiusuni makkunani tamanna malunnaqaaq. Inuit naammalluinnanngitsut pilluaqqusaanerit misigisatik qujamasunnissamullu pissutissiisut puioqqajaajuarsimavaat.

Taamaattoq tussiaasiortup Davidip qujamasunnini erinarsuutimigut ersersikkajuttarsimavai. Davidip tussiaasiaa matuma kingulianiittoq, isumassarsisitaanermigut allassimasaa, qujamasunnermut assersuutissaalluarpoq kusanartoq:

„Takugaangakkit qilak pigisat, assappit pinngortitaat,

qaammat ullorissallu tassani ivertitatit,

— taava inuk suummat eqqaasarpiuk?

Inuup qitornaa suummat isumagisarpiuk?

Naalaganngortippat assappit pinngortitaannut,

isigaasa ataannut pisippatit suusut tamaasa:

Savat ussigillu amerlaqisut,

makkumi aamma nunami nersutit nujuartat,

qilaap timmiai immallu aalisagai,

taakku imaani aqqutitigut ingerlaviusartutigoortartut.

[Jehova,] Naalagarput, naalannangaarmat ata aqqit tamarsuarmi nunami!“ — Tussiaat 8:3, 4, 6-9.

Qujamasunnerup eqqarsaatipiluit nigortittarpai

Pinngortitarsuarmik alianaatsumik qujamasuutiginninnini ikiortigalugu tussiaasiortup eqqarsaatipiluit, isigisanit nuanniitsunit imaluunniit pissutsinit ajornakusoortunit pilersinneqarsimasut, nigortinniartarpai. Aammattaaq illit taama iliorsinnaavutit. Qanoq ilillutit? Avatangiisivit alianaatsut sapinngisannik maluginiarnerisigut. Taamaalillutit illit nammineq inuunermik nuannaarutiginninnerit allisiinnassanngilat aammattaarli ilagisartakkavit nuannaarnerat allisisissinnaallugu.

Taamaattumik kusanassuseq tupinnartuliallu ulluinnarni takusartakkatit Pinngortitsisitsinnut tunisiumatuumut qujamasunninnut allissutaatinniakkit. Qujamasunnissamut pissutissat allat maanna sammeriartigik. (wD 1/7 88)