Guutip kiffai kikkorpiaappat?

„PIFFISSAMI aalajangiiffiusumi matumani sakkutuuvut katuullit kaammattorpavut Siulersuisorput [Hitler] naalallugu pisussaaffimminnik eqqortitseqqullugit.“ — Tysklandimi biskoppit katuuliusut, The New York Times-imi 25. septemberi 1939-mi saqqummersumi issuarneqartut.

„Timmisartutsinni inuttaasut ilaat katuuliuvoq, Tysklandimullu qaartartunik nakkaatitsiartuleraangatta taanna pilluaqqusarpat. Tysklandimili ilagiit katuullit taakkuusut tyskit timmisartuannut nunatsinni illoqarfinnik aserorteriartortumut inuttaasunik katuuliusunik pilluaqqusisarput. Taamaattumik ima apererusuppakkit: ’Guutip akerleriit arlaat kikkut tapersersorpai?’“ Sorsunnersuup aappaata nalaani tuluup silaannakkut sorsuutini sakkutuunut naalagaasup, David Walkerip, apeqqut tamanna palasimut katuuliusumut apeqqutigisimavaa.

Taakkunannga allaanerulluinnarlutik Jehovap Nalunaajaasui tuusintilikkuutaat Heil Hitler-imik oqarumannginnertik imaluunniit taassuma sakkutooqatigiivini sakkuligaasuni sorsoqataajumannginnertik pissutigalugu ukiorpassuit nazistit parnaarussiviini naalliutsitsiviusuni parnaarussaasimapput. Iligiit nunaanni Nalunaajaasorpassuit sakkutuunngorumannginnertik pissutigalugu parnaarunneqartarsimapput.

Guutip kiffai ilumoortut kikkuuppat, piumasanillu sunik naammassinnittariaqarpat?

Bibelimik upperinninneq

Guutip kiffaa ilumoortoq soorunami Bibelimik upperinnilluartuusariaqarpoq. Aammattaaq allanik ajoqersuisinnaanissaminut Bibeli ilisimalluartariaqarpaa. Kristumiuuneraqatigiinnili palasit ilarpassui piumasanik tunngaviunerusunik tamakkuninnga naammassinnissimanngillat. Afrika Kujallermi nakorsaq oqarsimavoq ilagiinni anglikanerini attavigisimasamini palasit Bibeli „annikitsuinnarmik“ atortaraat, aammalu oqaluutsiminni namminneq isumaminnik ersersitsisartut. Aammattaaq taanna isumaqarpoq palasit politikkimut akuliunnerat, biskoppiunerup Desmond Tutup Afrika Kujallermi Cape Townimeersup taamaaliorneratut, eqqunngitsuliornerusoq.

Taakkunannga allaanerulluinnarlutik Jehovap Nalunaajaasuisa aalajaatsut Bibeli upperilluinnarpaat, taassuminngalu atuaqqissaarnermut inunnullu allanut nassuiaassutigineranut piffissartik annertooq atortarlugu. Bibelimik soqutiginningaarnermit asanningaarnermillu assaannarmik allakkat hebræerisuut, aramæerisuut grækerisuullu tatigisat tunngavigalugit Bibelimik nutsigaq tunngavissaqarluartitaq eqqoqqissaartorlu, Ny Verden-oversættelsen af De Hellige Skrifter, suliarisimavaat. Nutsigaq tamanna aammattaaq oqaatsini arlaqartuni atuaqqissaarutissanngortillugu, quppernerit aterpiaanni nassuiaasiullugu ilanngussanik tapitaleriiaanillu unnersuussinernik tuusintilikkuutaanik, atuartut Bibelimik pitsaanerusumik paasiniaanissaannut allanullu nassuiaasinnaanissaannut iluaqutigisinnaasaannik, pilersugaq naqitertissimavaat. Bibeli nutsigaq tamanna ilaaluunniit manna tikillugu oqaatsini qulini naqitaavoq, nunarsuarmilu tamarsuarmi qulinik millionillit siaruarterneqarsimavoq.

Ileqqussat

Kinguaassiuutitigut ajortuliornerit qanoq ittulluunniit — allasiorneq, kanngunartuliorneq, angutit anguteqamminnik arnallu arnaqamminnik atoqateqartarnerat kiisalu inuup uumasumik atoqateqarnera — Bibelimi ajorluinnarnerarneqarput. (3 Môrsase 20:10-15; Rûmamiut 1:26, 27; Galâsiamiut 5:19) Oqaluussisartut kristumiut ilumoortut Guutip ileqqussatigut najoqqutassiai uummatikkut iluunngarlutik aalajangiuttarpaat. Taamaattumik Jehovap Nalunaajaasuisa Guutip inatsisai naalattariaqartutut isigaat. Tamakkuninnga peqqissiminatik ajortuliortartut ilagiissiminnut ilaasortaajunnaarsittarpaat, inuilli kanngunartuliorsimanerminnik ilumoorlutik peqqissimissutiginnittut Guutillu najoqqutassiaanik maleruaalersut naakkinnittuliorfigisarlugit. — 1 Korintumiut 5:11-13; 2 Korintumiut 2:5-8.

Afrika Kujallermi Cape Townimi provstiuneq ima oqarsimanerarneqarpoq: „Angutaannaallutik arnaannaallutillu atoqatigiittartut ilaat angutit arnallu atoqatigiittartut ilaannit pitsaanerusarput, taaneqartullu siulliit asannilluarnerat pissutigalugu Guutimut pilluaataanerunerat qularinngilara.“ Tamanna ilumuunngilluinnarpoq. Atoqatigiinnerit taamaattut Guutip maajugai. — 1 Korintumiut 6:9, 10.

Oqaluussisartut ilumoortut ilumoortunik ajoqersuuteqarput

Oqaluussisartut ilumoortut ajoqersuutit Guutip oqaasianik tunngaveqarluinnartut ajoqersuutigaat. Oqaluussisartut ilumuunngitsut ajoqersuutit Bibelimit tapersersugaanngivissut ajoqersuutigaat. Pingasuussutsimik ajoqersuut assersuutigeriartigu. The New Encyclopædia Britannica-mi ima allassimasoqarpoq: „Oqaaseq pingasuussuseq imaluunniit pingasuussutsimik ajoqersuut erseqqissumik nassuiagaalluni testamentitaami nassaassaanngillat; aammattaaq Jesusip ajoqersugaasalu Shemamik taaneqartartoq testamentitoqqamiittoq, tassa: ’Tusarnaarit, Israeliaa, Naalagaq Guuterput Naalagaq ataasiuvoq’ (5 Môrs. 6:4), assortorumanngilaat.“ Aatsaat ukiut 400-ssaanni pingasuussutsimik ajoqersuut pisortatigoortumik ilagiit nalinginnaat ajoqersuutaannut ilanngunneqarpoq. Eqqortumik oqaatigissagaanni ilaatigut Romamiut kaasariata Konstantinip ataqqisaassusia sunniisinnaassusialu pissutigalugit ilagiinni isumalioqatigiit ataatsimiinneranni ukiumi 325-mi Nikæami pisimasumi ajoqersuinerluut tamanna aaqqissuunneqalerpoq.

Pingasuussutsimik ajoqersuut pissutigalugu ilagiinnut nalinginnarnut ilaasortaasorpassuit sallusuissummik ujarlersut peqqusersuitsut palasitik tatigiunnaarsimavaat. Soorlu arnaq inuusuttoq Afrika Kujallermiu; taassuma upperisinnaanngilaa ilagiit attavigisami, Hollandimiut ilagiissaat iluarsaqqitat, taama paatsiveerunnartigisumik ajoqersuuteqarmata, aatsaalli Jehovap Nalunaajaasuisa ilaata allassimasukkut uppernarsarmagu paatsiveerunnartoq tamanna ilumut taakkunani, Hollandimiut ilagiissaanni, ajoqersuutigineqartoq, qularunnaarpoq! Eqqartuussissuserisup utoqqasaap soraarninngortup, aamma Afrika Kujallermiup, ilagiinnut ilaasortaajumajunnaarnini nalunaarutigaa „ajoqersuutit issuaannagaarpaluttut oqaluffinni ajoqersuutigineqartut aalajangersimasut kukkulluinnartuunerat paasinerluutaasinnaanerallu“ pissutigalugu.

Anniarfik ikualasoq kristumiuuneraqatigiit ajoqersuinerluutaannut ilaavoq. Naak oqaluussissutaanera upperineqarneralu siornatigutut annertutiginngikkaluartoq, ilagiit amerlanersaasa pisortatigoortumik ajoqersuutigiuarpaat. Tamatuminnga ajoqersuutiginnittut unnerput inuk toqugaangat timaa toqusartoq tarnaali, toqusuitsuugami, uumaannartartoq, ajortuliorlutillu inuusimasut innermi ikualasoqarfiusumi naassaanngitsumik anniartitaassasut. Illit tamanna upperaajuk? Sulilu pingaarnerusumik: Ilumoorpa? Bibeli naapertorlugu ilumuunngilaq, tassanimi allassimavoq: „Tarneq ajortuliortoq toqussaaq.“ (Hisĩkiale 18:4, 20, NV) Aamma apustili Paulus isumassarsisitaalluni ima allappoq: ’Ajortip akissarsiarititaa tassa toqu’ — tassaanngitsoq anniarfimmi ikualasumi naassaanngitsumik anniartitaaneq! — Rûmamiut 6:23.

Piumasat suut oqaluussisartut ilumoortut naammassisariaqarneraat maanna sammilaariartigu.

Oqaluussisartunut ilumoortunut Bibelimi piumasarisat

Oqaaseq „oqaluussisartoq“ maani atorneqartoq grækerit oqaasiannit „diaʹkonos“-imit, ilisimaneqarluanngitsumik nagguilimmit, nutsigaavoq. Tassani pineqarpoq allap, ingammik naalakkami, peqqussutaanik naammassinnittartoq. Taamaattumik oqaaseq tamanna isumaqarsinnaavoq kiffaq. Bibelimi atorneqaraangami tassaasarpoq maniguulluni aallussillunilu allat iluaqutissaannut kiffartuuteqartuaannartoq. Maniguulluni kiffartuussinerup taamaattup pisariaqarnera Jesusip erseqqissarpaa, soorlu matuma kingulianiittup ersersikkaa.

Ullut ilaanni, Jesusip qisummi naalliutsitsiviusumi toqunerata siunitsiannguagut, Jakobip Johannesillu anaanaata ornippaa oqarluni: ’Oqarna ernikka uku marluk naalagaaffinni issiaqqullugit arlaat talerpippit tungaani aappaalu saamippit tungaani.’ Ajoqersukkat allat tamanna narrutsaatigaat. Taava Jesusip ikinngutinnersumik pingaaruteqartumik ilinniagassippai. Imminut aggeqquai oqarfigalugillu: ’Ilissinni angisuunngorumasup kiffartuullisi. Ilissinnilu siulliujumasoq ilaminut kiffaannaagili.’ — Matîuse 20:20, 21, 24-27.

Tamanut oqalugiaatimi ineriartornartut Bibelimi allassimasut ilaanni Jesusip tusarnaartini allakkanik ilisimasunut farisiiarinullu mianersoqquai. Oqaluussisartut ilumuunngitsut, ilumoortuusaartut, kukkunerinik ingasattunik taakku uparuussorpai. Oqaatigai taakku pingaarniartooqisut, piumasaqartuaannartuusut nuimajumajuaannartuusullu. — Matîuse 23:1-7.

Ullumikkut palasit ilarpassui, ingammik ilagiinni katuullini, ilaatigullu ilagiinni anglikanerini, „Ataata“-mik taaqqusarput. Assersuutigalugu, ukiualunnguit matuma siornagut Moçambiquemi palasi anglikaneriusoq Jehovap Nalunaajaasuisa ilaannit aperineqarami sooq „Ataata“-mik taagorneqarnersoq, akivoq: „Taaguut tamanna tulluusimaarutigaara!“ Aamma tamanit naluneqanngilaq paavip Romamiittup „Ataataq Iluartoq“-mik taagorneqarnini nuannareqigaa — naak Jesus oqarsimagaluartoq: ’Nunamiusoq ataatassinnik taassanngilarsi, ataaseq ataatagigassiuk, qilammiittoq.’ Taama oqariarluni najoqqutassaq tunngaviusoq una Jesusip saqqummiuppaa: ’Akitsiniartoq nikanarsissaaq.’ — Matîuse 23:9-12.

Arnat oqaluussisartuusinnaappat?

Ukiuni kingullerni arnat palasinngortinneqartut amerliartuinnarsimapput. Paulusilli Timoteus ima ilitsersuuppaa: ’Akuerissanngilara arnaq ajoqersuiniartoq uiminullu [angummut, NV) naalagaaniartoq.’ (1 Timûtiuse 2:12) Tassa imaanngilaq arnaq kristumiu qitornaminik imaluunniit inuinnarnik ajoqersueqqusaanngitsoq, imaapporli ilagiinni ajoqersueqqusaanngitsoq.

Tassa imaappa kristumiut ataatsimiinnerini arnat oqaqqusaanngitsut? Naagga. Jehovap Nalunaajaasuisa sapaatip-akunneranut ataatsimiinnermik ilaanni Napasuliaq Alapernaarsuiffik atuaqqissaarutigisarpaat ilanngutassiat ilaasa apeqqutitaasa samminerisigut najuuttullu akisarnerisigut. Atuaqqissaaqatigiinnermik aqutsisup, tassaasartup oqaluussisartup angutip, ilagiinnut ilaasortat, aammattaaq arnat, apeqqutinut akissuteqarnissaannik kajumissaartarpai. Arnalli akisarnermikkut ajoqersuisutut taaneqarsinnaanngillat. Ilanngutassiami eqqarsaatit namminneq oqaatsitik atorlugit oqaatigiinnartarpaat. Aammattaaq meeqqat akinissaminnut kajumissaarneqartarput, akissutimikkullu naakkaluartukkut paasiuminartukkullu sammisap pingaartortaa eqqorluartarlugulu torrallavittarpaat.

Arnat pillugit Paulus aamma ima oqaaseqarpoq: ’Sumik ilinniarumagunik illuminni uitik apersorlisigik, arnaq ilagiinni katisimasuni oqaluttoq kanngunarmat.’ (1 Korintumiut 14:35) Tassa imaappoq: qatanngut arnaq ataatsimiinnermi atuarneqartut oqaluuserineqartulluunniit ilaannik paasinngisaqaruni isumaqatiginngisaqaruniluunniit, akerleriissutigineqarsinnaasumik ilagiit tutsaanni apeqquteqassanngilaq. Angerlarsimallutilli uini qinnuigissavaa nassuiaqqullugu.

Piffissaqartarporli arnat kristumiut angutinut oqaluussiffigisinnaasaannik. Jehovap Nalunaajaasuisa piffissaq annertooq atortarpaat illumit illumut angalaarlutik Naalagaaffik pillugu tusagassamik nuannersumik oqaluussissutiginnillutik. Oqaluussisartoq arnaq angummik naapitaqaraangami, utoqqatsiinnassava ingerlaannarlunilu? Soorunami naagga. Tamatumanimi ilagiiunngitsunut inummulli ataatsimut immaqa uppertuunngitsumut oqaluussissaaq. Aamma oqaluussisartup arnaasup ilaqutariit kristumiuunngitsut, naak ataataq najuukkaluartoq, Bibelimik atuaqqissaaqatigisinnaavai.

Jesus Kristus — maligassaalluartoq

Jesus tamatsinnut maligassiuilluarpoq. Nunami inuusimasuni tamani taannaavoq ajoqersuisut pitsaanersaat, oqaluussisartut pikkorinnersaat, sulisut aallussilluarnersaat siunnersuisullu asanninnersaat. Taassuma tumaanik atuaaneq immikkut pisinnaatitaaffiuvoq nalissaqanngitsoq. Illit taamaaliorniarlutit ilungersorpit?

Jehovap Nalunaajaasui millionilikkuutaat, naak naammalluinnartuunngikkaluarlutik, sapinngisaminnik taanna malinniarpaat. Taassuma periaasii ullumikkut palasit periaasiinit allaassuteqarluinnarput. Naak inuppassuit nammineerlutik ornittaraluaraanni, inuit imminnut ornigunnissaat utaqqiinnarlugu Jesus oqaluffiup siarnginik sianertitsineq ajorpoq. Akerlianilli nammineq inuit ornittarsimavai angerlarsimaffiini, illoqannginnersani, qaqqani kiisalu Galilæap Tasersuata sineriaani ajoqersortarlugit. Ilaatigut inuit tuusintilikkuutaat katersuussimasut oqalugiarfigisarpai, soorlu matuma ataani assilissami takutinneqartoq. — Matîuse 9:35; 13:36; Lúkarse 8:1.

Annikilliortunik ikiuineq

Ullumikkut inuit ikiortariaqartut qassiuppat? Arlalinnik hundredelinnik millioniliupput. Amerliartuinnarlutillu silarsuarmi pissutsit ajorsiartuinnarmata pissutsillu aaqqissuussaanerata maanna atuuttup Harmagedonimi akiuunissami naggatissavia qanilliartormat. (sarĸúmersitat 16:16) Ajunaarnersuit pinngortitanit pissuteqartut, kaannersuit nappaalanersuillu pigisanut aserorsaataapput inuillu naalliunnerannut ilasaataallutik. Kristumiut siulliit aamma ajornartorsiutinit taama ittunit nalaanneqartarsimapput. Ukiup 46-p missaani, Claudius Romami kaasariutillugu, annertuumik kaannersuaqarsimavoq. Ajoqersukkat qanoq iliorpat? ’Pilersaarput nungullutik sapinngisaminnik qatanngutigiinnut Judæami nunaqartunut ikiuutissanik nassitsiniarumallutik.’ — apustilit suliait 11:27-30.

Ullumikkut Jehovap Nalunaajaasui naalliuttunik ajorsartunilluunniit tunisiumatuullutik ikiuutissiisarput. Ungasinngitsukkut Moçambiquemi nunap inui imminnut sorsuummata — annertuumik nerisassaaleqinermik, atisassaaleqinermik, nakorsaatissaaleqinermik inuunermullu pisariaqartunik allanik pissaaleqinermik kinguneqartumik — Jehovap Nalunaajaasuisa nunami sanilerisami Afrika Kujallermi najugaqartut qatanngutitik annikilliortut ikiuutissippaat. Nerisassat, atisat allallu amerlasoorsuit katersorneqarput biilinilu assartuutini angisuuni illoqarfiit pingaarnersaannut, Maputomut, nassiunneqarlutik.

Bibelimi siulittuutit eqquuttut

Aap, ullumikkut Bibelimi siulittuutinik eqquutitseqataaneq Guutip kiffaasa ilumoortut immikkut pisinnaatitaaffigaat. Qanoq ilillutik? Ullut ilaanni ajoqersukkaminit aperineqarami: „Qaqugu tamakku taamaalissappat, sunalu najuunnissannut pissutsillu aaqqissuussaanerata naalerfissaanut nalunaaqutaassava?“ akissutimini Jesus oqarpoq ullussani silarsuaq tamakkerlugu sorsunneqarfiusuni, kaannersuaqarfiusuni, nunap sajuffigisaani inatsisaatsuliortoqangaarfiusunilu ’naalagaaffimmik tusagassaq nuannersoq tamanna nunarsuarmi inuit najugarisaanni tamarsuarmi oqaluussissutigineqassasoq’. (Matîuse 24:3, 14, NV) Paulus ’illumit illumut angalaarluni’ oqaluussisarnermigut oqaluussisartunut ilumoortunut tamanut maligassiuivoq. — apustilit suliait 20:20.

Oqaluussinermik aallussinertik Jehovap Nalunaajaasuisa silarsuarmi tamarmi tusaamasaassutigaat. Immaqa illit angerlarsimaffinnut orniguttarput. Unillutit qanoq oqaasissaqarnersut tusarnaaqqissaarsimavigit? Suli taamaaliorsimanngikkuit tulliani takkuppata tusarnaarniarigit. Immaqa tupaallaatigalugu nuannarissavat! (wD 1/3 89)

[Qupp. 4-mi suminngaanneernera]

U.S. Armyp assilisaa tunngavigalugu titartagaq