Guutip kiffai ilumoortut qanoq ilisarineqarsinnaappat?
1948-mi ullut ilaanni oqaluussisartut marluk, Jehovamut Nalunaajaasuusut, bussimut nutaanngeqisumut ilaallutik aqqut maneeqisoq ingerlavigalugu illoqarfimmit Spaniap avannaaniittumit qaqqat Pyrenæerit tungaannukarput. Oqaluussisartoq ilagiinnut attaveqanngitsoq tikeraariartorpaat. Bussit unittarfiannut oqaluussisartup nunaqarfigisaanut qaninnerpaasumut bussi unimmat takuaat siutituunni ilagalugu utaqqigaatik. Aammattaarli inuppaaluit nalinginnaanngitsut taassuma eqqaaniittut malugaat — sakkutuujusat sakkulisartut sisamat kiisalu „oqaluussisartoq“ allatut ittoq, tassa palasi! Oqaluussisartut Jehovap Nalunaajaasuineersut pingasuusut aqqutikkut sivingaqisukkut nunaqarfimmut sammisukkut majualersullu sakkutuujusat ilaata illuinnarsuunni amuaa suaarlunilu: „Manos arriba!“ (Assasi qullarsigik!) Oqaluussisartut tikeraat marluusut tigusarineqarput. Sooq? Palasip sakkutuujusat oqarfigisimavai tikeraat peqqarniisaarniartuusut — sallu ingasalluinnartoq! Tamatuma kinguneranik pingasuullutik tamarmik parnaarunneqarput.
Pisimasoq tamanna sumut takussutaava? Palasiunerartut oqaluussisartuunerartullu tamakkeratik Guutimut kiffaapput ilumoortut. Amerlasuutigut oqaluussisartut ilumoortut ilumuunngitsullu assigiinngissuteqartorujussuupput. Oqaluussisartut ilumoortut tunngaviunerusumik sumik piumaffigineqarpat?
Oqaluussisartunut ilumoortunut piumasat
Oqaluussisarneq kiffartuussineruvoq ikiuinerullunilu. Kristumiut oqaluussisartut upperilluinnartariaqarpaat Bibeli tassaasoq Guutip oqaasia taassuma sunniineratigut isumassarsiarititaq. (Juánase 17:17) Piumasamilli tunngaviunerusumik tamatuminnga naammassinninnerinnaq naammanngilaq. Aammattaaq Bibelimik ilisimasaqarluartariaqarput paasinnilluarsimasariaqarlutillu. Ilisimasalli namminissarsiortumik kisermaanniarnissaat eqqortuliornerussanngilaq. Kajumillutik iivangkiiliumik — Guutip naalagaaffia pillugu tusagassamik nuannersumik nunamilu paratiisiusumi inuunermik naassaanngitsumik neriugisamik — oqaluussissutiginnittariaqarput. — Juánase 17:3; Tussiaat 37:11, 29.
Jehovap Nalunaajaasuisa Naalagaaffik pillugu tusagassamik nuannersumik Spaniamiinnaanngitsoq silarsuarmili tamarmi oqaluussissutiginninnerat pissutsinik aaqqissuussaanitoqqap ajortup matuma naggatissaata nalaa pillugu Jesusip siulittuutaanik eqquutitsineruvoq. Taanna ima oqarsimavoq: „Naalagaaffimmillu tusagassaq nuannersoq tamanna nunarsuarmi inuit najugarisaanni tamarsuarmi inuiaat tamarmik nalujunnaarutissaannik oqaluussissutigineqassaaq; taavalu naggatissaq nalliutissaaq.“ — Matîuse 24:14 (NV), 33, 34.
Oqaluussisartut ilumoortut aammattaaq ’silamut ilaannginnissamik’ piumaffigineqarput; taamaattumik politikkimut akuliutissanngillat. (Juánase 15:19) Aammattaaq assut maniguuttariaqarput, asannittuusariaqarlutik ajorsartunillu ikiortariaqartunik ikiuinissamut piareersimajuaannartariaqarlutik. — 1 Korintumiut 13:1, 4; 1 Pîtruse 5:6.
Oqaluussisartunik ilumoortunik ilumuunngitsunillu immikkoortitsisinnaanissarput pingaartorujussuuvoq — tassami tamatumani inuuginnarnissarput apeqqutaavoq. Qaqqami oqaluutsimini tusaamasaasumi Jesus ima oqarsimavoq: ’Pruffiitioqqusersunut misissoritsi; taakkua savatut atisaqarlutik ornittarpaasi, ilumikkulli amaruupput kiisortut.’ — Matîuse 7:15.
Guutilli kiffai ilumoortut pisussaaffeqaannarnatik piumaffigineqaannarnatillu aammattaaq amerlasuunik immikkut pisinnaatitaaffeqarput. Ataatsimut isigalugit ullumikkut immikkut pisinnaatitaaffeqarnerpaallutik, iluatsitsisimanerpaallutik pilluarnerpaapput, soorlu ilanngutassiami tulliuttumi takussagipput. (wD 1/3 89)