Bibelimik atuarnermi pingaarnersat: Migga 1:1–7:20
Jehovap naapertuilluassusia aqqalu qutsissisinneqartut
PRUFFIITI Mika ukiut 800-ssaanni u.n.a.s., ukiuni guutipilussiornerup naapertuilluanngitsuliornerullu Israelimi Judamilu atugaangaarfigisaanni, inuusimavoq. Pissutsit taamanikkut atuuttut pissutsit ullumikkut atuuttut assigilluinnarmatigik Mikap oqariartuutai mianersoqqussutaalu ullutsinnut naleqqulluartuupput. Tusarliussaalu isumalluarnartut silarsuarmi Satanimit naalagaaffigineqartumi piviusumik neriuutissiipput. — 1 Juánase 5:19.
Mikap oqariartuutaa oqaaserisani pingasuni ukunani eqikkarneqarsinnaalluarpoq: ’Eqqanaq pinerlunnissamik isumaliortut.’ ’Suna Jehovap ilinnit piumavaa; imaattoq kisiat ilaa: eqqartuussisissaq [naapertuilluarneq] eqqortissagit, isumassuissasutillu asannillutit, Guutillu saqeqatigissagit makitanaveersaarlutit.’ „Uagulli ingerlajumaarpugut Jehovap Guutitta aqqa tunaaralugu . . . naassaanngitsumik.“ — Migga 2:1; 6:8; 4:5, NV.
Guutipilussiorneq avoqqaarineqartoq
Jehovap ajortuliortut soraajuitsumik ilaginnassanngilai. Guutipilussiorneq pikitsitsinerlu Israelimi Judamilu atugaangaarput. Taamaattumik Jehovap ajornerarlugit nalunaajaaffigai. Inuusaliaat aserorterneqassapput. Guutipilussiortut ’nattoraliusatut nujaarsimassapput nunavimminnillu aallarunneqassallutik’. — 1:1-16.
Jehova Guutiuvoq aalajaatsunut neriutsitsisoq. Siuttut naalaqqutuut peqqusersiorniartartut tillinniartutut ujajaasutullu assuarineqarput. Ajunaarnermit eqqorneqarumaarput. Kisianni ’Israelip amiakkui’ aniguisinneqarumaarnissaminnik neriorsorneqarput. ’Savaatitut isillugit inissiameeqatigiissikkumaarpakka,’ Jehova oqarpoq. — 2:1-13.
Innuttami akornanni akisussaassuseqartut naapertuilluartuliornissaat Jehovap naatsorsuutigaa. Israelimi siuttut peqquserluttuliortartut ima oqarfigineqarput: ’Eqqartuussisissat ilisimassagaluarpasi ilaa? Kisianni ajunngitsoq uumissorlugu ajortoq asavarsi; amiiarlugillu saarni neqaajartarpasi.’ Guutip taakkununnga eqqartuussutai Mikap ’Jehovap anersaavagut pissaaneqarlunilu iluunngarlunilu’ tusarliuppai. Siuttunngooq naapertuilluanngitsut eqqartuussisarput pajoqqullutik, Mika oqarpoq, palasii ajoqersuisarput akilersillutik, pruffiitertaallu eqquiniartarput aningaasarsiniarlutik. Tamanna pissutigalugu Jerusalem illukuinnanngussaaq. — 3:1-12.
Tusarliussaq neriunnartoq
Eqqortumik pallorfiginninneq nunarsuaq tamakkerlugu atuutilissaaq. ’Ullussani kingullerni’ inuit inuiappassuarneersut Jehovap aqqutigeqqusaanik ajoqersorneqarumaarnissaat Mikap siulittuutigaa. Guuti eqqartuussiumaarpoq, sorsunneqassaassaarlu. Eqqortumik pallorfiginnittut ’Jehovap Guutimik aqqa tunaaralugu naassaanngitsumik ingerlajumaarput’. Naak nunavimminnit anisitaagaluarlutik anniaraluarlutillu, innuttai akeqqamik assaannit aniguisinneqarumaarput. — 4:1-13 .
Guutip Aniguisitsisunngortitaa neriorsuutigisaq tatigisinnaavarput. Naalagassaq Betlehemimeersoq Jehovap pissaanera pigalugu paarsisuujumaarpoq. Assyriamiumit aniguisitaanissaq siulittuutigineqarpoq. Eqqortumik pallorfiginnittut amiakkuusut kanernertut inuummarissinartutut sialuttullu naammattutut ikkumaarput, eqqunngitsumillu upperisarsiornerit anersaapilussiornerillu tamarmik manngui ilanngullugit nutsunneqassapput. — 5:1-14.
Jehovap naapertuilluassusia ataavassaaq
Jehovap innuttami najoqqutassiaminik innarluissutaasunik naapertuilluartunillu maleruaanissaat naatsorsuutigaa. Jehova qanoq-una iliorsimagami kusananngitsumik pallorfigineqartartoq? Innuttani ajunngitsuinnarmik iliorfigisarsimavai. ’Jehovallu sumik piumaffigai kisianni naapertuilluarneq eqqortissagaat, isumassuissasut asannillutik, Guutertillu saqeqatigissagaat makitanaveersaarlutik?’ Iluaatsuliorlutik nakuusertuaannarunik allanillu iluanaarniarfiginnittuaannarlutik taamaallaat Jehovamit ajorisaallutik eqqartuunneqarnissartik ilimagisinnaavaat. — 6:1-16.
Jehovap naapertuilluartuunera naakkinninneralu tatigisariaqarpavut. Ilaquttavut allaat qinngarsuilersinnaapput. Mikali oqarpoq: ’Guuti annatsitsisiga neriugiuassavara; Guutima tusassavaanga.’ Jehovap naapertuilluartuunera pruffiitip tatigaa, nalunnginnamiuk Guutip ’kamannini naassaanngitsumik atatissanngikkaa, isumassuigajuttuugami’. — 7:1-20.
Ullutsinni ilinniagassat: Jehovap innuttami naapertuilluarnermik eqqortitsinissaat naatsorsuutigaa. Niuernikkut ileqqorisartakkani eqqarsaatigalugit kristumiu imminut ima aperisariaqarpoq: ’Minguitsuussanerpunga iluaatsunik ussersaaffeqaruma, oqimaaluttanillu peqquserluutinik pooqattarmioqaruma?’ ( 6:11) Ulluni kingulliusuni makkunani Jehovap innuttai tamarmik peqatigiissortaasa nunamiittut ataasiussuseqarnerannut allisaaqataasariaqarput Guutillu aqqutigeqqusaanik eqqissinartunik ajoqersorneqarumasariaqarlutik. Sapinngisarput tamakkerlugu Jehovap aqqa qutsissisinniartariaqarparput eqqortumillu pallorfiginninneq siuarsartariaqarlugu. — 2:12; 4:1-4. (wD 1/5 89)
[Qupp. 14-mi ungalusaq]
ALLASSIMAFFIIT PILLUGIT OQAASEQAATIT
○ 1:16 — Israelimi nujaatsuuneq kanngusunnermut, aliasunnermut isumaalunnermullu atatinneqartarpoq. (Isaia 3:24-26; 15:2, 3; Jerimia 47:5) Inuiaqatigiit Guutimik nalusuusut ilaat eqqarlimik toqusimaneranik aliasuutiginnikkaangamik nujaarullutik kissartarput. Mosesip inatsisai naapertorlugit pissusissamisoortumik nujaarussimaneq mingunnartutut isigineqanngilaq, Israelikkulli toqusimasumik aliasuuteqarnertik ersersinniarlugu nujaajaqqusaanngillat ’inuiaagamik illernartut Jehovap pigisai’. (5 Môrsase 14:1, 2) Kisiannili Mikap Israelikkut Judakkullu nujaarullutik kissaqquai, guutipilussiorlutik ajortuliorsimanertik pissutigalugu illernartuujunnaarsimammata, kinguaatillu ilagalugit tiguagassanngortariaqarmata. Hebræerisut oqaaseq tamatumani ’nattoraliusaq’-tut nutserneqartoq tassaasinnaavoq nattoraliusat ilaat gåsegribimik taaguuteqartoq, niaqqumigut taamaallaat qituttunik, qaqortunik qiviorpaalunnguaqartoq. Nattoraliviunngikkaluarluni nattoralinnut eqqarliusutut naatsorsuunneqartarpoq.
○ 2:12 — Oqaatsit tamakku ullumikkut anersaakkut Israelimut eqquussimapput. (Galâsiamiut 6:16) Ingammik 1919-imiilli sinneruttut tanitaasut Babylonimut Angisuumut upperisarsiornikkut inussiaajunnaarnissaminnut aqqutissiuunneqarput. (sarĸúmersitat 18:2) Soorlu Mikap siulittuutigisimagaa, ’savaatitut isillutik inissiameeqatigiissinneqarput, savatut unguukkatut isillutik mangiarfissaminniillutik’. 1935-miilli ’savanit allanit’ ’amerlangaartuusunit’ ilagineqalersimagamik ’inunnik ujameriappaluttumiilersimapput’. — sarĸúmersitat 7:9; Juánase 10:16.
○ 3:1-3 — Itsaq innuttami Mikap nalaani inuusimasut siuttuinit naakkittaatsunit Jehovap, Paarsisup avaaginnittup, allaalluinnarnera tamatumuuna allaaserineqarpoq. Siuttut taakkua naapertuilluarnermik eqqortitsillutik savaatit paarisussaasimagaluarpaat, kisiannili savanut assersuunneqartut naakkittaatsumik iluanaarniarfigisarpaat, kissaannarnagit aammattaarli ’amiiarlugit’ amaqqutut iliorlutik. Inuinnaat paarsisunit ajortunit pisinnaatitaaffiiarneqarput, ’aaviaaffigineqartarlutik’. ( 3:10) Eqqunngitsumik eqqartuussisoqartarneratigut inuit illersuutissaqanngitsut illuminnik inuussutissarsiutiminnillu arsaarneqartarput. — 2:2; naleqqiuguk Hisĩkiale 34:1-5.
○ 4:3 — ’Inuiaqatigiit amerlasuut’ aamma ’akimanngitsut [inuiassuit, NV]’ tassaanngillat inuiaat naalakkersuinikkut suleqatigiittut tamarmiusut. Tassaappulli inuit ataasiakkaat inuiannit tamaneersut, inuiaassutsiminnik pingaartitsivallaarunnaarsimasut Jehovallu qaqqaani, tassa eqqortumik pallorfiginninnermi, ataasiussuseqarlutik kiffartulersut. (Isaia 2:2-4) Uppertut Guutip naalagaaffianut aalajangiussisut pillugit Jehovap anersaakkut ittumik ’eqqartuussillunilu artornartut inerterpai [aalajangigassat aaqqittarpai, NV]’. ’Amerlangaartunut’ ilaasut taakkua Guutip eqqartuussutai maleruarpaat, panatik kaallugit assallatserummut savissanngortillugit, taamaalillutillu Jehovamut nalunaajaasoqatitik eqqisseqatigalugit.
○ 5:1 — Illoqarfiit Betlehemimik taaguuteqartut marluummata illoqarfik taanna Betlehem Efratamik taaneqarsimavoq. Illoqarfik Mikap eqqartugaa Judamiippoq, Jerusalemip kujataa-tunginnguaniilluni. Betlehemip aappaa avannaa-tungaaniippoq, Zebulonimiilluni. (Jôrsua 19:10, 15) Siusinnerusukkut Betlehemip Judamiittup, imaluunniit tamatuma eqqaata, „Efrata“ imaluunniit „Efrat“ taaguutigisimavaa. (1 Môrsase 48:7; Rúte 4:11) Taama eqqoqqissaartigisumik sumiissusiliisimanerup Guutip Messias pillugu neriorsuutaasa siulittuutaasut eqqorluinnassusiat erseqqissarpaa.
○ 6:8 — Tunissutit ajortinut matoorneqaataasut naleqarluassusiat Mikap pingaannginnerusutut oqaatiginianngilaa, Jehovalli isaani suut naleqarluinnartuunersut erseqqissarniarpai. (Naleqqiuguk Môrsasip agdlagaisa tatdlimait 10:12.) Tunissutai Jehovamit iluarineqassappata ajortuliortup naapertuilluassuseq, isumassuissuseq makitanaveersaarnerlu immini ersersittariaqarpai. Ullumikkut kiffartornitsinni taama ittunik pissuseqarnissarput Jehovap kissaatigaa. — 1 Korintumiut 13:4-8.
○ 7:4 — Kapinartut kakillarnaqutillu naasuupput atisanut naatigarlutillu alittuisartut aammalu amermik kigartuisartut. Nalimini inuiaqatigiit ileqqussatigut ajortunngorsimanerat Mikap tamatumuuna allaatigaa. Isumagisaa tassaagunarpoq Israelikkut uteriitsut allaat pitsaanerit qanillivallaaraanni kapinartutulli kakillarnaqutitullu annernartigisinnaallutillu ajoqutaatigisinnaasut.
[Qupp. 15-mi assiliartaq]
Jesusip sume inunngornigssaa Mikap siulittuutigaa