Jehovap aqqani inuujumavugut naassaanngilluinnartumik!
„Uagut inuujumavugut [Jehovami] Guutitta aqqani naassaanngilluinnartumik.“ — MIKA 4:5.
1. Mikap allagaani kapitalini 3-miit 5-imut qanoq tusarliussaqarpa?
JEHOVA innuttaminut oqaasissaqarpoq, pruffiitinilu Mika aqqutigalugu oqaaseqarpoq. Guutip eqqunngitsuliortut akuliuffiginiarpai; Israelikkut tunussisut pillarniarpai. Aterminili inuusut pilluaqquniarpai. Tamakku erseqqissumik tusarliunneqarput Mikap siulittuutaani kapitalini 3-miit 5-imut.
2, 3. (a) Israelimi siuttuusut qanoq iliortariaqaraluarpat, qanorli iliorpat? (b) Mika 3:2, 3-mi assersuut qanoq nassuiassaviuk?
2 Guutip pruffiitia ima oqarpoq: „Tusaagitsi, ilissi Jaakup siulersuisortai, ilissi Israelikkut naalagartaat! Ilissi tassaannginnerpisi eqqartuussinermik ilisimasaqartuusussat?“ Ilumut, siulersuisuusutut nalunngittariaqaraluarpaat suna eqqortuliornerunersoq naapertuilluartuliornerunersorlu. Qanorli iliorpat? Mika nangippoq: „’Kisianni ajunngitsoq uumigaarsi ajortorlu nuannaralugu. Inuit amiiartarpasi saarnilu neqaajartarlugit.’ Innuttama neqaat nerisarpaat, amiiartarlugit, saarni nallortarlugit neqiliugassatullu igamut ikisarlugit uullisat uutsivimmut issorarneqartarnerattut.“ — Mika 3:1-3.
3 Siulersuisut taamaaliortarput! Piitsut illersoriarsinnaanngitsullu naqisimasarpaat! Mikap oqaasiinik tusartut qularnanngitsumik siulittuutimini assersuusiaa ingerlaannaq paasivaat. Sava toqutaq nerisassiariniaraanni ameerneqaqqaartarpoq uullineqarlunilu. Ilaannikkut saarni nallorneqartarput patia piniarlugu. Taava neqaa saarnilu igarsuarmi uunneqartarput, siulittuummi allassimasutut. (Ezekieli 24:3-5, 10) Siuttuusut ajortut inunnik peqqarniitsuliorfiginninnerannik takorlooruminartumik allaatiginninneruvoq!
Jehovap naatsorsuutigaa naapertuilluartuliussasugut
4. Jehova Israelikkullu siuttui qanoq assigiinngissuteqarpat?
4 Paarsisoq asannittoq, Jehova, paarsisullu naakkittaatsut taakku assigiinnginneroqqissinnaanngillat. Paarsisut pisussaaffigaat savaatinik sernissuinissartik naapertuilluartuliortoqarnissaalu, pisussaaffitsilli sumiginnarpaat. Akerlianik namminissarsiorlutik ’savat’ atornerluttarpaat, eqqortuliorfigineqatsaalisarpaat aavallu kuisarlugu, Mika 3:10-mi allassimasutut. Tamanna sumik ilinniarfigisinnaavarput?
5. Jehovap innuttaminut siuttuusut qanoq iliornissaat naatsorsuutigaa?
5 Guutip naatsorsuutigaa innuttaminut siuttuusut allat naapertuilluartuliorfigissagaat, ullumikkullu Jehovap kiffaasa akornanni taamaattoqartarpoq. Tamannalu aamma Esaja 32:1-imi allassimasumut naapertuuppoq: „Kunngiusoq naalagaajumaarpoq iluartuulluni, naalagartallu naalakkersuiumaarput innarluitsumik.“ Mikalli nalaani pissutsit qanoq ippat? ’Ajunngitsumik uumigisaqartut ajortumillu nuannarisaqartut’ eqqartuussinerluttarput.
Kikkut qinnutaat tusarneqartarpat?
6, 7. Mika 3:4-mi pingaarutilik suna erseqqissarneqarpa?
6 Mikap nalaani inuit ajortut Jehovamit iluarineqarnissartik ilimagisinnaavaat? Naamerluinnaq! Mika 3:4-mi ima allassimavoq: „Taava [Jehova] nilliaffigissavaat, akissanngilaali. Kiinnani taakkununnga isertussavaa suliaat ajormata.“ Tassani pingaaruteqangaartoq erseqqissarneqarpoq.
7 Ajortulioqattaartarutta Jehovap qinnutivut akinavianngilai. Soorlu marloqiusamik inooriaaseqarutta, tassa Guutimut aalajaatsuusaajutigaluta isertortumik eqqunngitsuliortarutta, tusarnavianngilaatigut. Tussiaat 26:4-mi Daavi ima erinarsorpoq: „Sallutuut peqatigisarinngilakka, peqquserluttut ilagineq ajorpakka.“ Daavi inuit taamaattut akornanniikkusunngippalluunniit, Jehovap oqaatsiminik piaaralutik unioqqutitsisut qinnutaat tusaarusunnginnerungaassavai!
Guutip anersaavanit nakussatsinneqarneq
8. Mikap nalaani pruffiitioqqusersunut suna mianersoqqussutigineqarpa?
8 Israelikkut anersaakkut siuttui aalassaataasunik iliuuseqartarput! Pruffiitioqqusersut Guutip innuttaanik tammartitsisarput. Angutit piumatuut „eqqissinissamik torlulasarput“, kisianni „tamuaassiinngitsup sorsunnermik illernartumik saassunneqarnissaa suaarutigaat“. „Taamaattumik“, oqarpoq Jehova, „ilissinnut nalliutissapput unnuaq takorluuissaarfissarsi taarnerlu siulittuissaarfissarsi. Seqineq tarrissaaq pruffiitinut, ulloq taartuinnanngussaaq taakkununnga. Takorluuisartut kanngutsissapput siulittuisartullu mitannarsissallutik. Tamarmik kiinnatik assissavaat.“ — Mika 3:5-7a.
9, 10. ’Kiinnap assernera’ qanoq isumaqarpa, aamma sooq Mika taamaaliortariaqanngila?
9 Sooq „kiinnatik assissavaat“? Mikap nalaani inuit ajortut kanngusunnermit taamaaliussapput. Kanngusuutissaqarpullumi. Taakku ’Guutip akissuteqarfigissanngilai’. (Mika 3:7b) Inuit ajortut makitasuullu qinnutaat Jehovap tusaaneq ajorpai.
10 Mikalli ’kiinnani assertariaqanngilaa’. Kanngusuutissaqanngilaq. Qinnutai Jehovap tusartarpai. Mika 3:8-mi allassimasoq malugiuk, pruffiiti aalajaatsoq ima oqarpoq: „Uangali peqangaarpunga pissaanermik [Jehovap] anersaavanik iluarnermillu piginnaanermillu.“ Pruffiitip qujamasulluni kingumut eqqarsaatigisinnaavaa sivisuumik aalajaallunilu kiffartornini, tamatigut ’pissaanermik Jehovap anersaavanik peqangaarfigisani’! Tamatuma nukissaqalersippaa „Jaaku nalujunnaarsissallugu unioqqutitsineranik, Israelilu ajortuliaanik“.
11. Inuit Guutip tusarliussaanik oqaluussinissaminnut qanoq nukissaqalersinneqartarpat?
11 Mikap eqqartuussinissamik tusarliussaq Guutimeersoq oqaluussissutigissaguniuk inuit nukingannit annerusumik nakussatsinneqartariaqarpoq. Jehovap anersaava, imaluunniit pissaanera sulissutiginnittoq, pingaaruteqarluinnarpoq. Uagummi? Aamma uagut oqaluussisinnaavugut aatsaat Jehovap anersaaminik nukissaqalersippatigut. Ajortulioqattaartarluta oqaluussigaluarutta oqaluussiniarnerigaluarput maangaannassaaq. Taamaattoqartillugu oqaluussinissatsinnut nakussatsinneqarnissatsinnik qinnutivut Guutip tusarnavianngilai. Ataatatta qilammiusup eqqartuussinissamik tusarliussaa saqqummiussinnaanngilarput ’Jehovap anersaavata’ najunngippatigut. Qinnutivulli tusarneqarpata, anersaaq illernartullu najorpatigut, sapiissuseqarluta Mikatut Guutip oqaasia oqaluussissutigisinnaavarput.
12. Sooq ukiuni hundredelinni siullerni Jiisusip ajoqersugaasa ’Guutip oqaasia siooranngivillutik oqaatigisinnaavaat’?
12 Immaqa Apustilit Suliaat 4:23-31-mi oqaluttuaq eqqaamavat. Takorlooriaruk ukiuni hundredelinni siullerni Jiisusip ajoqersugaanut ilaallutit. Malersuisut ingasattajaarniartut ajoqersukkat nipangersinniarlugit suna tamaat iliuuseraat. Kristumiulli ilumoorfiginnittut Naalakkamut Kisimi Oqartussaasumut qamannga pisumik ima qinupput: „[Jehova], sioorasaarutaat arajutsinaveersaakkit, kiffatillu pisinnaatikkit oqaatsit siooranngivillutik oqaatigeqqullugu.“ Qanoq pisoqarpa? Qinoreermata katerisimaffiat sajuppoq, tamarmillu anersaaq illernartumik ilumioqangaalerput nakimaallutillu Guutip oqaasia oqaluussissutigaat. Qanortoq qinunikkut Jehova qanittuartigu tatigalugulu anersaaq illernartumik tunissagaatigut kiffartorsinnaaqqulluta.
13. Jerusalemi Samarialu qanoq pineqassappat, aamma sooq?
13 Mikap nalaa uterfigeqqeriartigu. Mika 3:9-12 naapertorlugu nunap eqqartuussisui, akilersillutik eqqartuussisartut, aammik kuisinermut pisuupput. Palasit akilersillutik ilinniartitsisarput, pruffiitioqqusersullu siulittuisarput aningaasarsillutik. Tassa Guuti pissutissaqarluarluni Judap illoqarfiisa pingaarnersaat, Jerusalemi, ’illukuinnanngortinniarlugu’ aalajangerpoq. Israelimilu aamma guutipilussiortoqangaarmat ileqqussatigullu ajortunngorsimasoqangaarmat, Samaria aamma ’illukuinnanngussasoq’ Mika isumassarsisinneqarluni mianersoqqusivoq. (Mika 1:6) Mika inuutillugu siulittuut eqquuppoq Assyriamiut sakkutuuisa 740-mi u.n.s. Samaria piuneerummassuk. (2 Kunngit 17:5, 6; 25:1-21) Jerusalemimut Samariamullu tusarliussat kimittuut taakku oqaluussissutigineqarsinnaapput aatsaat Jehovamit nakussatsinneqarluni!
14. Mika 3:12-imi siulittuutigineqartoq qanoq eqquuppa, uagutsinnullu qanoq isumaqarpa?
14 Juda Jehovap eqqartuussutaanik eqqartuunneqanngitsoorsinnaanngilaq. Mika 3:12-imi siulittuut naapertorlugu „Zioni assallatserneqassaaq narsaatitut, Jerusalemilu illukuinnanngussaaq“. Ullumikkut 2000-ikkunni nalunngilarput taamatut pisoqartoq ukiumi 607-imi u.n.s. Babylonimiut Juda Jerusalemilu aserormatigik. Ukiorpassuit tamatuma siorna Mika inuuvoq, siulittuutinili oqaatigigamigit piviusunngornissaat qularutiginngilluinnarpaa. Taamatulli qularutiginngitsigisariaqannginnerparput Jehovap ’ullussaa’ siulittuutigineqartoq nalliuppat pissutsinik aaqqissuussinerup ajortup matuma atorunnaarsinneqarnissaa? — 2 Petrusi 3:11, 12.
Jehova „eqqartuussissaaq“
15. Mika 4:1-4-mi siulittuut illit qanoq oqaluttuarissaviuk?
15 Mikap siulittuutaa uterfigeqqeriartigu, tulliullugu takussavarput neriuummik tusarliussaq pissanganartoq. Mika 4:1-4 atuarlugu qiimmaallannarpoq, ima ilaqarpoq: „Ullussani kingullerni qaqqaq [Jehovap] naalaffiata inaa aalajaalluni qaqqanit allanit portunerulerumaarpoq qattorngit tamaasa portussutsimigut akimussallugit. Tassunga inuiaat ornigutissapput. . . . [Jehova] eqqartuussiumaarpoq inuiappassuit akornanni; inuiaqatigiit pissaasut ungasissumiittut akornanni eqqartuussissaaq. Panatik saffiussavaat assallatserummut savissaliaralugit, qalugiusatillu saviliaralugit viinnequtilerissutit. Inuiaat panamik imminnut silugutissaassapput sorsunnissamullu sungiusarunnaassallutik. Tamarmik eqqissillutik inuussapput viinnequtaatimik figenequtaatimillu ataanni kimilluunniit peersinneqarnatik. Katersaarsuit [Jehovaat] nammineq oqaluppoq.“
16, 17. Mika 4:1-4 ullumikkut qanoq eqquuppa?
16 „Inuiappassuit“ aamma „inuiaqatigiit pissaasut“ uani eqqaaneqartut kikkuuppat? Silarsuarmi matumani inuiaat naalakkersuisulluunniit pineqanngillat. Naagga, siulittuummi pineqartut tassaapput inuit ataasiakkaat inuiannit tamaneersut upperisamut ilumoortumut ilanngussimasut ataasiussuseqarlutillu Jehovamik qaqqaani pallorfiginnittut.
17 Nunarsuaq tamakkerlugu Jehovap minguitsumik pallorfigineqarnissaanik Mikap siulittuutaa qanittukkut tamakkiisumik piviusunngussaaq. Ullumikkut „inuunermik naassaanngitsumik eqqortumik isumaqarfiginnittut“ Jehovap aqqutigeqqusaanik ilinniartinneqarput. (Apustilit Suliaat 13:48, NV) Anersaakkut ittumik ’Jehova eqqartuussivoq’ naalagaaffimminik aalajangiussisut iluaqutissaannik. Taakku „annikilliortitaangaarnermit“ aniguissapput ’amerlangaartunut’ ilaasutut. (Saqqummersitat 7:9, 14) Panatik assallatserummut saffioreeramikkik maannangaaq uppeqatitik allallu eqqissillutik inooqatigaat. Taakkununnga ilaalluni nuanneqaaq!
Jehovap aqqani inuujumallutik aalajangersimasut
18. „Viinnequtaatimik figenequtaatimillu ataanni“ inuuneq qanoq isumaqarpa?
18 Ullumikkut, nunarsuarmi siooranermik qulisimasutut ittumi, nuanneqaaq takullugu inuppassuit Jehovap aqqutigeqqusaanik ilinniartut. Inuit taakkua tamarmik Guuti asavaat, sorsunnissamillu sungiusarunnaarsimapput. Erinigaarput ulloq, maanna qanillisoq, „viinnequtaatimik figenequtaatimillu ataanni“ aamma taakku issiaffissaat. Figenequtit viinnequteqarfimmi naatinneqarajupput. (Lukasi 13:6) Nammineq viinnequtaatimi figenequtaatimilu ataani inuuneq eqqissisimanermut, pigissaarnermut toqqissisimanermullu assersuutaavoq. Guutip naalagaaffiata pissutsit taamaattut atulersippagit, sioorassutissaarutissaagut toqqissisimalluinnassallutalu. Maannangaarli Jehovamut attaveqarnitta isumatsigut eqqissisimatissinnaavaatigut anersaakkullu toqqissisimatilluta.
19. Jehovap aqqani inuuneq qanoq isumaqarpa?
19 Jehovamut iluarisaajumalluta aqqani inuusariaqarpugut. Tamanna Mika 4:5-imi kimittuumik oqaatigineqarpoq, pruffiiti ima nalunaarpoq: „Inuiaat allat tamarmik inuupput namminneq guutimik aqqanni; uagulli inuujumavugut [Jehovami] Guutitta aqqani naassaanngilluinnartumik.“ Jehovap aqqani inuuneq ima oqarnerinnaanngilaq: ’Taanna Guutigaarput.’ Kristumiut ataatsimiinnerinut peqataanerinnaanngilaq oqaluusseqataanerinnaananilu, naak taakku aamma pingaaruteqaraluartut. Jehovap aqqani inuugutta, taassumunnga tunniulluinnarsimasuussaagut isumarpullu tamakkerlugu aalajaalluta kiffartorfiginiarsaralugu. (Matthæusi 22:37) Aalajangiusimalluinnarparpullu Jehovap Guutitta aqqani naassaanngilluinnartumik inuunissarput.
20. Mika 4:6-13-imi suna siulittuutigineqarpa?
20 Mika 4:6-13-imi oqaatsit siulittuutaasut misissoriartigik. ’Zionip pania Babylonimut’ aallarunneqartariarpoq. Jerusalemimiullu ukiuni 600-kkunni ukiunik naatsorsuisalerfitta siorna taamatorluinnaq pineqarput. Mikalli siulittuutaani aamma uparuarneqarpoq amiakkuusut aniguisitaajumaartut Judamullu uterlutik. Zioni pilersinneqaqqippat Jehovap isumagissavaa akeraasa pujoralaannanngorlugit sequmisinneqarnissaat.
21, 22. Mika 5:1-imi siulittuut qanoq piviusunngorpa?
21 Mikap allagaani kapitali 5-imi pisussat pingaarutillit allat siulittuutigineqarput. Assersuutigalugu malugikkit versit 1-imiit 3-mut. Tassani Mikap siulittuutigaa Betlehemimeersumik naalaganngortoqarnissaa Guutimeersumik, taannalu „aallaaveqarpoq qangarsuarmit, itsarsuarmit“. Paarsisuussaarlu innuttaminut „[Jehovap] pissaanera pigalugu“. Naalagarlu taanna Israelimiinnaanngitsoq angingaassaaq „pissaanerami nunarsuup isuinut anngutissammat“. Kinaava? Silarsuarmi matumani nalinginnaasumik ilisimaneqanngikkaluartoq uagutsinnut paasiuminaatsuunngilaq.
22 Betlehemimi inunngorsimasut kina pingaarnerpaartaraat? Kina pillugu oqarsinnaavugut ’pissaanera nunarsuup isuinut annguttoq’? Allaasinnaanngilaq Missiarsi, Jiisusi Kristusi. Herodesersuup palasiunerit allakkanillu ilisimasut aperimmagit Missiarsi sumi inunngussanersoq, ima akipput: „Betlehemimi Judæamiittumi,“ aamma Mika 5:1 issuarpaat. (Matthæusi 2:3-6) Tamanna inuinnaat ilaasa aamma nalunngilaat, Johannesi 7:42-mi naapertorlugu ilaat ima oqarput: „Allakkani allassimannginnerpa Kristusi Daavip eqqarleriissortaanit Betlehemimit Daavip illoqarfeeraanit pissasoq?“
Sallusuissutinik inuummarissinartunik aatsineq
23. Mika 5:6-imi allassimasup eqquunneratut ullumikkut qanoq pisoqarpa?
23 Mika 5:4-14-imi eqqartorneqarpoq Assyriamiut nunami isaaffigisaminniinnissaat sivikitsuinnaassasoq, versinilu uparuarneqarpoq Guutip inuiaat imminut naalanngitsut akiniarumaarai. Mika 5:6-imi neriorsuuteqarpoq juutit amiakkuusut peqqissimisut nunaminnut uterumaartut, oqaatsilli ullumikkut aamma eqquupput. Mika ima nalunaarpoq: „Jaakup amiakkuisa inuiaqatigiippassuit akornanniittut assigiumaarpaat kanerneq [Jehovamit] pisoq sialullu naasunut nakkartoq.“ Mika taamatut assersuusiorpoq takutinniarlugu anersaakkut Jaakukkut, imaluunniit Israelikkut, amiakkui Guutimeersumik inunnut pilluaqqussutaajumaartut. Jiisusip ’savaataasa allat’, nunarsuarmi inuunissamik neriugisallit, nuannaarutigaat ’Israeli Guutip pigisaata’ amiakkuinik suleqatiginnilluarnertik, allanillu anersaakkut nukissaqalersitseqataapput. (Johannesi 10:16; Galatiamiut 6:16; Sefania 3:9) Pingaarutilimmik eqqaasippaatigut. Guutip naalagaaffianik oqaluussisartutut pingaartittariaqarparput qilalersunut inuummarissinartumik ’kanernermik sialummillu’ aatseqataanerup immikkut pisinnaatitaaffiunera.
24. Mikap allagaani kapitalini 3-miit 5-imut pingaarnerit suut killissutigaagit?
24 Mikap siulittuutaani kapitalini 3-miit 5-imut suut ilikkarpavut? Immaqa ilaatigut makku: (1) Guutip naatsorsuutigaa innuttaminut siuttuusut allat naapertuilluartumik pissagaat. (2) Jehovap qinnutivut akinavianngilai piaaraluta ajortuliortarutta. (3) Oqaluussisinnaavugut aatsaat Jehovap anersaani illernartoq aqqutigalugu nukissaqalersippatigut. (4) Jehovamut iluarisaajumalluta aalajangiusimannilluta aqqani inuusariaqarpugut. (5) Guutip naalagaaffianik oqaluussisartutut pingaartittariaqarparput qilalersunik sallusuissutinik inuummarissinartunik avitseqateqarsinnaanerup immikkut pisinnaatitaaffiunera. Soorunami aamma alla killissutigisimasinnaavat. Maannali Biibilimi atuakkap siulittuutaasup tamatuma kapitalii kingulliit marluk tikippavut. Sumik ilinniarfigisinnaavavut? Allaaserisami tulliuttumi misissussavarput Mikap siulittuutaata uppernikkut nakussatsinnartup immikkoortua kingulleq inuunitsinni qanoq iluaqutigisinnaaneripput.
Uteqqiinermi apeqqutit
• Innuttaminut siuttuusut qanoq iliornissaat Guutip naatsorsuutigaa?
• Sooq qinuneq aamma anersaaq illernartoq Jehovamut kiffartornitsinni pingaaruteqarluinnarpat?
• Qanoq ’Jehovap aqqani inuusoqarsinnaava’?
[Qupp. 21-mi assiliartaq]
Igaq pillugu Mikap assersuutaa nassuiarsinnaaviuk?
[Qupp. 22-mi assiliartat]
Mikatulli sapiilluta kiffartorpugut