Guutip oqaasii tusarnaarpigit?

BIBELIMI atuaraangatta erniinnaq malugissavarput ukiuni hundredelinni siullerni pissutsit inuit atugaat ullumikkut misigisatsinnut amerlanertigut assingusut. Taamanikkut kangunartuliorneqaqaaq unneqqaserlunneqaqalunilu, ingammik Israelikkut eqqaamiui inuiaat inuunerluttut akornanni kangunartuliorneq guutisiornerminni atortorujussuuaat. Inunnut piitsunut inuuneq nalorninaqaaq, aamma naalakkersuinikkut ajornartorsiuteqarluni. Ukiumi 66-imi juutit Romamiullu naalagaaffiata akornanni sorsuunneqalerpoq. Taamanikkut, ullumikkutut, inuit ikiorneqartariaqarput.

Aammattaaq upperisarsiornerup tungaatigut assigiissuteqaqaaq. Juutit upperisarsiornikkut pisortaat ilumoortuusaarniartuupput. (Matîuse 23:15; Lúkarse 20:46, 47) Juutiunngitsut akornanni upperisarsiornerit assigiinngitsorpassuarnik imaqarput, misigittaassutsimiit upperisapalaamut upperisarsiornikkullu pingaartitsiniarpallaarnermut. (Naleqqiutikkit apustilit suliáinik agdlagkat 14:8-13; 19:27, 28.) Allaat kristumiut ilagiissaasa pilersitaaqqammersut akornanni ajornartorsiuteqartarpoq, ukiummi hundredellit siulliata naalernerani apustili Johannes ima mianersoqqussuteqarpoq: ’Tammartitsisummi amerlasuut silarsuarmut anipput.’ (2 Juánase 7) Aap, taamanikkuttaaq inuit upperisarsiornikkut salloqqittarneqartarput. Kisianni aamma ikiuutissaq tutsuviginartoq nassaassaasimavoq.

Jesus tusarumasimassagaluarpiuk?

Jesus pitsaasunik unnersuussisarsimavoq. Oqaasii ima tunngaveqarluartigisimapput allassimalluni „ajoqersueriaasia pillugu inuit uissuummilluinnarput.“ (Matîuse 7:28, NV) Inuppassuilli taakku ilaasa ikittuinnaat oqaasii tusarnaavippaat. Jesus tupinnartuliortarlunilu Guutimik mianerinnilluni inuunermini maligassaalluarpoq. Kisianni upperisarsiornerup tungaatigut pisortat allaat, ilinniarluarsimasorsuusorisaasut, Jesusip oqaasii ilinniarfigiumanngivippaat. Sooq?

Amerlanertigut paqumisunneq pissutaavoq. Ilaasa Jesus Nazaretimeersuummat nikagaat. Allat ilassiumanngilaat atuarfimminni atuarsimanngimmat pisortaasullu attaveqarfiginngimmagit. (Juánase 1:46; 7:12, 15, 47, 48) Aammattaaq Jesusip ajoqersuineri tamakkernagit inunnit tusassallugit nuannaarineqarput. Sallusuissut oqaluussissutigisarpaa, farisiiarillu, assersuutigalugu, oqaasii kamassutigigajuppaat. (Matîuse 15:12-14) Ukiut pingasut affarlu oqaluussisareersorlu juutit upperisarsiornikkut pisortaasa toqutaatippaat. (Lúkarse 23:20-35) Taamaalillutik periarfissaq asseqanngitsoq, Jesusikkut ’oqaatsinik naassaanngitsumik inuussutilinnik’ ilangeeqataanissaq annaavaat. — Juánase 6:68.

Illit taamanikkut Jerusalemimi najugaqarsimagaluaruit upperisarisarsiornikkut pisortat malinnittaallu malissimassagaluarpigit? Imaluunniit ima paqumisutsigissanngikkaluarpit Jesusip oqaasiisa isumai paasisinnaallugit? Taamaappat arnatut malunnartutut Jesusip angalanermi ilaanni naapitaatut issaatit.

Tusarnaartoq

Jesusip arnaq taanna Samariakkut angalanermini naapippaa puilassuliami qasuersaarluni ingikkami. Arnaq imertariartorpoq. Aqqa naluarput, Bibelimili oqaluttuarineqarpoq naak qasugaluarluni Jesusip piffissaq iluatsillugu upperisarsiornermut tunngasunik oqaloqatigileraa. — Juánase 4:5-15.

Arnaq taanna Jesusimik ilassinnikkumannginnissamut arlalinnik pissuteqarsinnaagaluarpoq. Samariamiut upperisarsiornerat juutit upperisarsiornerannit allaammat uppeqatigiinnut allamut ilaasortaavoq. Aamma juutit Samariamiut nikagisarlugillu ilagiumaneq ajorpaat. Aammalu nalinginnaasuunngilaq angutip juutiusup arnamik nalusaminik oqaloqateqarnera. (Juánase 4:9, 27) Arnarlu Samariamiu kanngunartumik inuuvoq, qulaarneqarnissanilu avoqqaarineqarnissaniluunniit siooragalugu Jesus oqaloqatigiumanngissinnaagaluarpaa. — Juánase 4:18.

Taamatulli qisuarianngilaq. Jesusimit periaaserissumik soqutiginartumillu oqaluunneqalernini pissutigalugu silatuumik apersulerpaa. Oqaloqatigiitsillutik ajornartorsiut piuminaatsoq tikippaa, juutit samariamiullu akornanni upperisarsiornerup tungaatigut allaassuteqarneq eqqaagamiuk. Jesusip inussiarnersumik toqqaannartumilli arnaq akivaa oqarluni: ’Ilisimanngisarsi pallorfigaarsi; uagut ilisimasarput pallorfigaarput.’ (Juánase 4:19-22) Ajuallannanili paqumisujuilluni suli tusarusuppoq.

Taava Jesus pingaartumik oqaaseqarpoq: ’Ullulli nalliukkumaarput, maannakkummi nalliussimapput, taava pallorfiginnittut ilumoortut ataataq pallorfigissavaat anersaakkut ittumik ilumoortumillu; pallorfigisinimi taamaattut ataatap piumavai. Guuti anersaavoq, taassuminngalu pallorfiginnittut anersaakkut ittumik ilumoortumillu pallorfigissavaat.’ (Juánase 4:23, 24) Kingusinnerusukkut arnap taassuma paqumisujuitsup tusakkaminik pingaartitsineq takutippaa, ilungersortumik nunaqqatini oqaluussiffigalugit. Taakkualu Jesusimik tusarnaarnermikkut amerlanerusunik paasissutissaqalerput. — Juánase 4:39-42.

Tamanna sumik ilinniarfigisinnaavarput? Aap, ammip qalipaataatigut, inuiaqatigiissutsikkut imaluunniit upperisarsiornikkut paqumisuffiusumi najugaqarutta, immitsinnut aperisinnaavugut inuup allamik qalipaatillip, allamiup imaluunniit allamik upperisallip oqaloqatiginiarpatigut qanoq qisuariassanersugut? Apeqqutit uagut kukkunitsinnik ersersitsisut pineqarpata oqalukkumanngilluinnassanerpugut? Imaluunniit arnatut Samariamiutut tamatuma oqaloqatigiissutiginissaanut piumassuseqarpugut?

Paulus tusarnaarsimassagaluarpiuk?

Ukiuni hundredelinni siullerni pitsaasumik unnersuussisoq alla tassaavoq apustili Paulus. Paulus nammineq paqumisuttuusimagaluarpoq, miserratiginngilaalu: ’Uanga siornagut mitallersuullungalu qinuginnittartuullungalu angutaasersorsuugaluartunga; nallittorneqarpungali sianiginagu taamaaliorama uppinngitsuullunga.’ (1 Timûtiuse 1:13) Paqumisukkunnaarlunili Jesus Kristus pillugu sallusuissut ilassivaa. Paulusip maligassiaata takutippaa sallusuissutip Bibelimeersup uummatitsinni ’ippiliugarsuit aserortersinnaagai’ taakku inuulluarnitsinnut ajoqutaappata. — 2 Korintumiut 10:4.

Paulus kristumiunngoreerami ilinniarsimasani ajunngitsut pillugit nakimaalluarluni allat oqaluttuuttalerpai. Ilimagineqarsinnaasutut aamma paqumisuffigineqarpoq soorlu nammineq siornatigut taamaassimasoq. Inoqarporli taamaanngitsunik. Illoqarfimmi Berøami Grækenlandip avannaaniittumi inuit maniguuttut unnersuunneqarnerminnik ilassinninnermikkut maligassaalluartuusut nanivai. Paulusip oqaluussissutigisai ilumoorpasissuusut tusarsinnaavaat. Taamaattumik ’oqaaseq ilassivaat kajumigingaarlugu’. Paqumisujuinnerat pissutaavoq — uppiasuunngillat, tassami ’ullut tamaasa allakkat misissortarpaat tamakku taamaannersut misilikkumallugit’. (apustilit suliait 17:11) Tusakkatik nuannaarutigaat, kisianni akuerinnginnerani Allakkanut naapertuunnersut misissoqqaarpaat.

’Suut tamaasa misilissigik’

Ullumikkut Jehovap Nalunaajaasuisa piffissaq annertooq atorlugu inunnut uppeqatigiinnit allaneersunut Naalagaaffik pillugu tusagassaq nuannersoq oqaluussissutigisarpaat. Inuit qanoq qisuariartarpat? Inuppassuit inussiarnersut pulaartarnerat nuannaarutigisarpaat. Kisiannili aamma ilassinnikkumanngitsoqartarpoq, ilaasalu pulaartarnerat allaat kamassutigisarpaat.

Tamanna ajoraluaqaaq, Jehovap Nalunaajaasuisami kissaatigigaluarpaat tusarliussap Bibelimi ’tusagassaq nuannersoq’-mik taaneqartup oqaluttuarinissaa. (Matîuse 24:14, NV) Aammattaaq inunnut kajumissaaripput apustili Paulusip kajumissaarutaa maleqqullugu: ’Suut tamaasa misilissigik, ajunngitsorlu aalajangiussiuk.’ (1 Tásalûníkamiut 5:21) Naak namminerisamik isumaqaraluarluni, Berøamiutut arnatullu Samariamiutut paqumisujuilluni Guuti pillugu oqaloqatiginnikkumasariaqarpoq.

Sooq paqumisujuittariaqarpa?

Ukiut tamaasa inuit hundredelinnik tuusintillit paqumisujuinnertik takutittarpaat. Amerlasuut ilisimassuseq Bibelimeersoq ilinniarpaat inuunermik allanngorluinnarneranik kingunilimmik. Ilaat Janetitut issimapput, taanna ikiaroornartutortartuusimavoq imerajuttuusimallunilu naggataatigullu imminoriaraluarsimalluni. Ullumikkut Janet kristumiuuvoq pilluartoq. Bibelimik atuaqqissaarnermigut nakussatsinneqarpoq Paulusip unnersuussutaanik maleruaanissaminut: ’Immitsinnik eqqiarniarta uinngullu anersaallu mingui tamaasa piiarlugit.’ — 2 Korintumiut 7:1.

Vernon imerajuttuusimavoq, aappariinnerallu aseroqqajaavoq. Kisianni unnersuussutit Bibelimeersut maleruarnerisigut ileqqupiluni ajugaaffigaa nulianilu saammaateqatigalugu. (1 Korintumiut 6:11) Debra naggueqatiginngisaminik akaarinninngitsuusimaqaaq. Bibelimilli atuaqqissaarnermigut kristumiullu ilagissaannik ataatsimooqateqartarnermigut eqqarsaariaatsiminik allannguinissaminut ikiorneqarpoq. (apustilit suliait 10:34, 35) Kialu upperissagaluarpaa inuusuttoq Hollandimiu atortittartoq Jehovap Nalunaajaasuisa Bibelimik atuaqqissaaqatiginissaminik neqeroorutaat ilassereerlugu kingorna taama allanngorsinnaatigisoq? Pilertortumik kristumiunngorpoq kuisimasoq maannalu minguitsumik inooriaaseqarpoq meeqqanilu isumassorlugit.

Tamakku tassaapput misigisimasat ilaannai inuit Bibelimi allassimasunik tusareernermikkut qanoq ilisinnaanerannik takutitsisut. Amerlasuut ilimaginngilluinnarsimagaluarpaat inuunertik taama pitsaatigisumut allanngortinneqarsinnaassasoq. Aamma — pingaarnerusumillu — Guuti ima qanitsigisumik attaveqarfigilersimavaat ’Ataatarput qilammiusoq’-mik taasinnaalerlugu. (Matîuse 6:9) Taavalu siunissamut qularnaatsumik neriuutissaqalerput Jesusip oqaasiisa ilumuussusiat misigisimallugu: ’Tassaavoq inuuneq naassaanngitsoq: illit ilisaralutit kisivit ilumut Guutiusutit, aallartitallu Jesus Kristus ilisaralugu.’ — Juánase 17:3.

Tamanna tassaavoq Jehovap Nalunaajaasuisa inuit pulaaraangaamikkik oqaloqatigissutigerusutaat. Qularnanngitsumik qanittukkut illittaaq pulaassavaatsit. Taava paqumisujuillutit tusarliussassaat tusarnaassaviuk? (wD 1/8 89)

[Qupp. 7-mi assiliartaq]

Arnap Samariamiup paqumisujuilluni Jesus tusarnaarpaa. Illit taama paqumisujuitsigivit?