Jesusip inuunera ajoqersuineralu

Jesusip arnaq Samariamiu ajoqersoraa

JUDÆAMINNGAANIIT Galilæamut ingerlaartillutik Jesusip ajoqersugaasalu nunap ilaa, Samaria, aqqusaarpaat. Angalanerminnit qasullutik ualigaa puilasuliap eqqaani, illoqarfiup Sykarip qanittuaniittumi, unillatsiarput. Puilasuliaq taanna ukiut hundredellit arlaqartut tamatuma siornagut Jakobimit assanneqarsimavoq, sulilu ullumikkut atalluni, illoqarfiup Nablusip qanittuani.

Jesus tamaani qasuersaartillugu ajoqersugai nerisassaminnik pisiniariartorlutik illoqarfiliarput. Arnaq Samariamiu imertarluni takkummat Jesusip oqarfigaa: ’Immisinnga.’

Taamani juutit Samariamiullu imminnut susassareqatigiinneq ajorput; qangaaniilli immikkoortitsilluni ileqquusoq atalivissimasoq pissutaavoq. Taamaattumik arnaq tupaallalluni aperivoq: „Sooq juutiullutit uannut immiseqqusinnaavit, uangalu samariamiut ilagigaannga?“

Jesus akilluni oqarpoq kinaanini arnap nalunngikkaluaruniuk „imermik puilasuimmik“ qinnuigissagaluaraani. Imeq taanna, oqarpoq, „puilasunngorumaar[poq] puilaavassasoq inuunermut naassaanngitsumut“.

„Naalagaq, imermik tamatuminnga tuninnga,“ arnap oqarfigaa.

Taava Jesus oqarpoq: „Uiit qaaqqujartorallaak.“

„Ueqanngilanga,“ arnaq akivoq.

Arnallu oqarnera Jesusip uppernarsarpaa oqarluni: ’Ilumoorputit oqaravit: „Ueqanngilanga.“ Tallimanik ueqaraluaravit maanna pigisat uiginngilat.’

„Naalagaq! malugaakkit pruffiitiusutit,“ arnaq tupigusulluni pilerpoq. Arnap, oqarnermigut Samariamiut Garizimip qaqqaani pallorfiginnittartut juutilli Jerusalemimi pallorfiginnittartut, ersersippaa anersaamut tunngasunut soqutiginninnini.

Jesusip erseqqissarpaa sumi pallorfiginnittarneq pingaarnerpaanngitsoq. „Guuti anersaavoq,“ nassuiaavoq, „taassuminngalu pallorfiginnittut anersaakkut ittumik ilumoortumillu pallorfigissavaat.“

Arnaq tupigusuttorujussuuvoq. „Messias (tassa Kristusi) tikiuttussaq tusarsimavara,“ oqarpoq. „Taassuma tikiukkuni tamanik nalunaarfigiumaarpaatigut.“

„Uangaana oqaluffigisit,“ Jesus nalunaarpoq. Eqqarsaatigeriaruk! Arnaq taanna, immaqa arnat illoqarfimmi inuusaasini pillugu narruginnittut ingalassimaniaannarlugit, ualikkut imertarluni maannarsimasoq, nuanningaartumik Jesusimit ajunngisaarfigineqarpoq. Isertuarani inummut allamut oqaluttuarisimanngisani arnamut oqaluttuaraa. Tamanna sumik kinguneqarpa? Tamanna normumi tullermi sammissavarput. Johannes 4:3-26. (wD 1/1 86)

◆ Sooq arnaq Samariamiu tupaallappa Jesusip oqaluutilermani?

◆ Imeq puilasuik pillugu aamma sumi pallorfiginnittassasugut Jesusip arnaq sumik ajoqersorpaa?

◆ Qanoq ililluni Jesusip kinaanini arnamut nalunaarpaa, aammalu sooq uleersineq tamanna tupaallannarpa?