Inuiannut tamanut tusagassaq nuannersoq!
’INNGILI alla takulerpara qilaap missaagut timmisoq, iivangkiiliumik [tusagassamik nuannersumik] ittuinnartumik oqaatigisassaqartoq nunamiusunut tamanullu inuiaqatigiissunut immikkullu naggueqatigiissunut immikkullu oqaasilinnut immikkullu inuiaasunut.’ (sarĸúmersitat 14:6) Guutip sunniineratigut takusani siulittuutaasoq ullutsinnilu eqquuttoq apustilip utoqqarsuanngortup Johannesip taamatut oqaluttuaraa. Ukiuni pinerlunniarnerup annertusiartuinnarfigisaani, mingutsitsineqarfiusuni, peqqarniisaartoqarfiusuni, sorsunneqarfiusuni aningaasaqarnikkullu patajaffiusuni makkunani nuannersumik tusagassaqarnera ilisimallugu ila toqqissisimanassusia! Sunaliuna tusagassaq taama nuannertigisoq allaat inngilimit nalunaarutigineqartariaqarsimalluni? Aammalu tusagassaq suna taama qiimmannartigaa inuiaqatigiissunut, naggueqatigiissunut, immikkut oqaasilinnut aammalu inuiaasunut tamanut oqaluussissutigineqartariaqarluni?
Pisup allap inngilip tusagassamik nuannersumik tusarliussiffigisaata qimerloorneratigut tamakkununnga akissutissarsisinnaavugut. Ukiut 2000-it matuma siornanut, piffissamut ukiunik naatsorsuisarnitta aallartinnerata tungaanut ingerlasumut, qiviassaagut. Savanik paarsisut uumasuutitillu narsaatini Betlehemip eqqaaniittuni ipput inngili Jesusip inunngorneranik nalunaarutiginnikkiartorluni saqqummermat ima oqarluni: ’Ata, tipaatsunnartumik tusarlissavassi tipaatsungaarutissassinnik inuit tamarmik pissaannik; ilissinnummi ullumi erniuvoq annaassisoq, tassa Kristus Naalagaq, Davidip illoqarfiani.’ — Lúkarse 2:10, 11.
Jesusip inunngornera ilumut tassaasimavoq ’tusagassaq tipaatsungaarnartoq’. Jesus ineriartorpoq tassaalerlunilu Kristus Annaassisorlu neriorsuutigisaq inuit naapertuilluartumik nuannarisaqartut inuunermik naassaanngitsumik angusisinnaaqqullugit inuunerminik naammalluinnartumik tunniussisoq. Guutip naalagaaffiani kunngiusussaasimavoq, aap, ’Eqqissinermut Naalagaassalluni’, naalakkersuinerata nalaani inunnit kiisami eqqissineq naapertuilluassuserlu misigineqalissallutik. (Isaia 9:6; Lúkarse 1:33) Jesusip inunngornera ilumut tusagassaavoq ima nuannertigisoq allaat inngilimit nalunaarutigineqartariaqarsimalluni!
Jesus kunngiuvoq!
Guutip siunertarisaasa imminut tunngasut ilarpassui Jesusip ukiuni hundredelinni siullerni naammassereersimavai, taamanili Guutip naalagaaffiani kunngitut ivertinneqanngilaq. Soorlu atuagassiap matuma ersersikulasarsimaqigaa aatsaat 1914-imi tamanna pisimavoq. Siulittuutit eqquunnerisa ersarissumik ersersippaat ukiumi tamatumani Guutip naalagaaffia qilammi pilersinneqarsimasoq. (sarĸúmersitat 12:10, 12) Sorsunnersuup siulliup aallartinneranut atatillugu 1914-imi nutaarsiassat aarlerisaarutaasut akornanni tusagassat pitsaanerpaartaat, tassa Guutip naalagaaffiata pilersinneqarsimaneranut tunngasoq, tusarliunneqarpoq. Taamaattumik-una nalerput pillugu Jesus ima siulittuisimasoq: „Naalagaaffimmillu tusagassaq nuannersoq tamanna nunarsuarmi inuit najugarisaanni tamarsuarmi inuiaat tamarmik nalujunnaarutissaannik oqaluussissutigineqassaaq.“ — Matîuse 24:14, NV.
Jesusip siulittuutaa tamanna eqquussimava? Akissut aappiuvoq! Johannesip takusaa siulittuutaasoq aammattaaq eqquussimavoq. Ilumoorpoq inngili Johannesip takusaa uagut takusinnaannginnatsigu. Jehovap Nalunaajaasuili ’inuiaqatigiissunut, naggueqatigiissunut, immikkut oqaasilinnut inuiaasunullu’ tusagassamik nuannersumik inngilip tusarliussimasaanik oqaluussissutiginnikkaangata takuneqarsinnaasarsimapput. Nunani qeqertanilu 212-ini nipaat tusarsaavoq. Inuillu amerlasuut tamatumunnga ajunngitsumik qisuariartarput. Tamakkua ilaasa misigisimasaasa ersersippaat Guutip naalagaaffianik tusagassaq ilumut nuannersuusoq. (wD 1/1 90)