Anngigisaq illernartoq Guutimut-tunniusimanerup pia ilinniaruk
„Kristusissaaq anniarmimmat ilissi pillusi maligassaqartillusi, tumini atuaqqullusigik.“ — 1 PÎTRUSE 2:21.
1. Jehovap suna aalajangersimavaa „anngigisaq illernartoq Guutimut-tunniusimanerup pia“ pillugu?
„ANNGIGISAQ illernartoq Guutimut-tunniusimanerup pia“ anngiiarneqareerpoq! (1 Timûtiuse 3:16) Taamaalilluni eqqunngitsumik upperisarsiortut anngigisaannit — assersuutigalugu Guutip ataasiullunilu pingasuussusianit paasissaanngitsuusumit — allaanerulluinnarpoq, tassami tamakku suli anngigisaajuarput! Tamakku kimilluunniit paasineqarsinnaanngillat. Jehovali aalajangersimavoq „anngigisaq illernartoq Guutimut-tunniusimanerup pia“, Jesus Kristusikkut saqqummersitaasoq, sapinngisamik annertunerpaamik siaruartigaallunilu tamanut nalunaarutigineqassasoq. Guutip naalagaaffianik ilungersorluni oqaluussinermigut Jesus nammineq maligassiuivoq. Taassuma tusarliussarisimasaa oqaluusseriaasialu uagut ilinniarfigingaarsinnaavavut.
2. Sooq Jesusip kiffartuussinera utertitsissutissatut tunniussaanera sioqqullugu taaneqarpa? (Matîuse 20:28)
2 Tamanna eqqarsaatigiitigalugu Jesusip „uinikkut ilisaritinneqar“nera uterfigilaariartigu. ( 1 Timûtiuse 3:16) Matîuse 20:28-mi atuarpugut Jesus ’tikiutinngitsoq kiffartorfigeqqulluni, kisianni kiffartussalluni inuuninilu akissatut tunniussallugu amerlasuut utertinneqaatissaannik’. Jesusip ’kiffartussalluni’ tikiunnissaa utertitsissutissaq tunniussallugu tikiunnissaanit siulliutillugu allaat taaneqarpoq. Sooq? Aap, qangarsuarli Edenimi Jehovap inuiannut kisimi oqartussaanerata eqqortuunera pulateriaarsuup peqqusersuusup qularnarsisinniarsimavaa aammalu Guutip pinngortitai innarluuteqarnerarlugillu inuit kikkulluunniit misilinneqarnermikkut Qutsinnerussaartumut aalajaattuarsinnaannginnerarsimallugit. (Naleqqiuguk Jobimik allakkat 1:6-12; 2:1-10.) Jesusip inuttut naammalluinnartutut, ’Adamisut kingullertut’, assuarnaatsumik kiffartornerata ersersippaa Satan mitallersoq tassaasoq sallutooq ajoqusiiumatooq. (1 Korintumiut 15:45) Aammattaaq qularisariaqanngivissumik Jesusip uppernarsarsimavaa Guutip ’siulersuisunngortitaatut annaassisunngortitaatullu’ kiffartorsinnaalluni ’inuillu najugaat naapertuilluarluni eqqartuussinnaajumaarlugu’, taamalilluni Jehovap kisimi oqartussaanera aalajangiutissallugu. — apustilit suliáinik agdlagkat 5:31; 17:31.
3. Jesusip qanoq ililluni Satanip salluliutaa tunuartilluinnarpaa?
3 Satanip salluliutaa Jesusip tunuartilluinnarpaa! Inuiaat oqaluttuarisaaneranni nunami allamik inoqarsimanngilaq taassumatut tunniusimatigaluni kiffartorsimasumik, naak asissorneqaraluarluni iperartorneqaraluarlunilu, timikkut isummakkullu naalliutsitaagaluarluni. Naak Guutip ernerigaluaraani, Kristusip Guutimut mitalliutaasumik nikanarsagaanini kanngunarsagaaninilu qasusuilluni atortariaqarsimavai. Tamakkuli tamaasa atortillugit — allaat naalliungaarluni kanngunarsagaallunilu toqunini tikillugu — aalajaappoq Ataataminullu ilumoorluinnarluni. Filípimiunut agdlagkat, kapitali 2-mi versit 8-mi 9-milu Paulus allappoq Jesus ’toqumut allaat naalaannarami, massami qisummi naalliutsitaaffimi toqumut allaat, Guutip akitsingaartippaa ateqartillugulu aternit tamanit annerusumik’. Satan sallutuutut ajorluinnartutut Jesusip qulaarpaa.
4. Sooq Jesusip Pilatus oqarfigisinnaavaa sallusuissut nalunaajaatigissallugu nunamut pisimalluni?
4 Ukiut ikittut ingerlaneranni aallusilluarluni oqaluussisarnermi naalernerani Jesusip Pontius Pilatus nakimaalluni ima nalunaajaaffigisinnaasimavaa: ’Soorlu oqartutit, kunngiuvunga. Inunnguutigalugulu nunamut pissutigaara sallusuissut nalunaajaatigissallugu. Sallusuissummit pisup nipiga tusararaa.“ (Juánase 18:37) Jesus Palæstinami tamarmi Guutip naalagaaffia pillugu sallusuissummik oqaluussissutiginninnermigut Guutimut-tunniusimanermik pitsaalluinnartumik maligassiuivoq. Ajoqersukkanittaaq ilungersortuullutik oqaluussisartuunissaannik ilinniartissimavai. Maligassaalluarnerata asseqanngitsup tamatuma ullumikkut tumisiornissaanik kaammattorpaatigut!
Maligassarput
5. Jesusip qimerlooqqissaarneratigut Guutimut-tunniusimaneq pillugu sunik ilikkagaqarsinnaavugut?
5 Uaguttaaq Diaavulu sallutuusoq uppernarsarsinnaavarput — Guutimut-tunniusimalluta Jehovap peqqusaanik iliornitsigut. Qanorluunniit annikilliortitaagaluarutta anniartitaaneq nikanarsagaanerlu Jesusip atortariaqarsimasai anniartitaanitta nallernavianngilaat. Taamaattumik maligassatsitut angisuutut ilinniarfiginiartigu. Soorlu Eprîarit 12:1, 2-mi kajumissaarneqartugut ’nikallujuerluta arpanniarta assoruunnitsinni uatsinnut siunertarititaasumi uppernermillu aallarniisoq inerititsisorlu Jesus aarlorfigisigu’. Adamimit, Guutimut-tunniusimanermi misilinneqarnerani aniguinngitsoortumit, allaanerulluinnarluni Jesusip nunami inuttut kisimi misilinneqarneq tamanna naammalluinnartumik anigorpaa. Toqunini tikivillugu ’[ilumoorpoq], ajortuippoq, minguippoq, ajortilinnit immikkoortitaavoq’. (Eprîarit 7:26) Assuarnaalluinnarami akeqqani oqarfigisinnaasimavai: ’Kia arlassi nalujunnaarsissinnaavaanga ajorteqartunga?’ Satanip unammillernera akerlilersimavaa ima nalunaarluni: ’Silap matuma naalagaa . . . soqanngilaq uanni.’ Aamma killuutigineqarnini tigusaaninilu sioqqullugu ajoqersukkani oqarfigai: ’Tupalleritsi, silarsuarmut ajugaagama.’ — Juánase 8:46; 14:30; 16:33.
6. (a) Uagut inuit pisariaqartitavut Jesusip nalunngilluinnarai sooq qularissanngilarput? (b) Jesusip Guutimut-tunniusimanera qanoq annertuutigiva?
6 Jesus uinilittut nunamiikkallarami inuttut inuunerup qanoq paasisariaqarnera misigisimavaa, tassa ’inngilinit minnerutillatsiarneqarluni’. (Eprîarit 2:7) Inuttut sangiissuseqarneq paasisimavaa taamaattumillu ukiuni tuusintini inuiannut tamanut kunngitut eqqartuussisutullu kiffartussalluni piginaassuseqarluarpoq. Uagut inuit pisariaqartitavut Guutip ernerata nalunngilluinnarpai. Oqarpoq: ’Ornissinga tamassi erloqisusi nanertugaasusilu, qasuersissavassi.’ (Matîuse 11:28) Eprîarit 5:7-9-mi ima atuarpugut: ’Taanna uineqarnermini nillingaarluni qullilillunilu qinnutinik kutsiuutinillu aatsigami issumunnga toqumit annaassisigisinnaasaminut, qussalanerminilu tusarneqarami, ernerineqaraluarluni taamaattoq anniartitaanermigut naalannermik ilikkarpoq; inersimatinneqarmallu naalattaasa tamarmik annassimanermut naassaanngitsumut aallarniisigilerpaat.’ Jesus naakkiutinngilaq, naak pularteriaarsuup uumissuisup ’kimimmigut kiimmani’ inuttut toqup iguutaanit eqqorneqarnissani tikillugu nikallujuittariaqarsimagaluarluni. (1 Mosesimik allakkat 3:15) Qanortoq uagut, Jesusitut, tamatigut Guutimut-tunniusimajuarta, pisariaqarpat toqu tikillugu, Jehova Guutip qinnutitsinnik ilungersortunik tusarnissaa uatsinnillu annaassinissaa tatigalugu.
’Iluartuuniarluta inuuleqqulluta’
7. Pîtrusip agdlagai sujugdlît 2:21-24 naapertorlugu Jesusip sumik maligassiorpaatigut, tamatumalu qanoq sunnertariaqarpaatigut?
7 ’Uinikkut ilisaritinneqartilluni’ Jesusip anngigisaq illernartoq Guutimut-tunniusimanerup pia unneqqarilluni saqqummersippaa. 1 Pîtruse 2:21-24-mi atuarpugut: ’Kristusi anniarmimmat ilissi pillusi maligassaqartillusi, tumini atuaqqullusigik; taanna ajortilinngilaq salloqqittaamilluunniit qanermiugisaqarnani; taanna oqagaagami oqarninngilaq, anniarami sioorasaarinngilaq, eqqartuussilluartumulli peqquaa; taassuma nammineq ajortivut timimigut qisummut qaangattaappai, ajortitsinnik soraarussilluta iluartuuniarluta inuuleqqulluta.’ Jesusip inuunera tamaat eqqarsaatigeqqissaarutsigu taassumatut Guutmiut-tunniusimanermik piniarnissatsinnut, assuarnaassutsitsinnik attassiuarnissatsinnut ’iluartuullutalu inuunissatsinnut’ kajumissisinneqassaagut!
8. Qanoq ililluta Jesusitut iluartumik inuusinnaavugut?
8 Jesus ilumut iluartuuniarluni inuuvoq. Tussiaat 45:8-mi siulittuutaasumik taanna pillugu allassimavoq: „Eqqortumik iliorneq nuannaraat eqqunngitsuliornerlu uumigalugu.“ Apustili Paulusip oqaatsit takku Jesusimut tunngatippai, Eprîarit 1:9-mi allassimagami: ’Iluarneq asavat iluaannerlu uumigalugu.’ Maanna, ’anngigisamik illernartumik Guutimut-tunniusimanerup pianik’ paasinnileratta, Jesusitut, suut tamaasa iluartuusut asaniartigik ajortullu uumigalugit. Ullumikkut Satanip silarsuaanit kristimiut ileqqussaat sualuttumik saassusineqartarmata, aalajangiulluartigik, inuillu Guutip peqatigiisortaaniittut avataanniittullu Jehovap najoqqutassiaanik naapertuilluartuusunik malinninnitsigut ’iluartuuniarluta’ pissusilersorfigitigik. Guutip oqaasii atuaqqissaartuartigik, ilisimassut Guutimeersoq Diaavulumut nakkartitsiniaannerinullu akiuunnitsinni pisariaqartoq pigiliullugu.
9. Suna Jesusip kiffartornermini suli ilungersortuunerulissutigaa, paarsisunullu eqqunngitsumik upperisarsiortuusunut tamanna qanoq kinguneqarpa?
9 Kiffartornermini ilungersortuunissaminut Jesusip allattaaq kajumississutigaa. Suna? Matîuse 9:36-mi ima atuarpugut: ’Inuppassuit takugamigit nalligingaalerpai, paarinerlugaallutillu isumakkiigaammata savatut paarsisoqanngitsutut.’ Soorlu Mákorse 6:34-mi allassimasoq ’amerlasuunik ajoqersulerpai’. Ajoqersuinermini pinngitsoorani paarsisut eqqunngitsumik upperisarsiortuusut guutiitsuunerat inatsisaatsuliortuunerallu qulaartariaqarsimavai. Matîuse 15:7-9 naapertussagaanni Jesusip upperisarsiornerup tungaatigut pisortat taakkua ilaat ima oqarfigai: ’Taatuuku ilumoortuusaarniartut; Esajasip eqqorluarsimasumik takorluukkersaarutigaasi oqarami: „Inuit ukua qarluminnik ataqqisarpaannga, uummataasali ungasippaannga; asuliinnaq kiffartuuttaraannga, ajoqersuutit inuinnaat inatsisigisaat ajoqersuutigisaramikkik.“’
’Anngigisaq inatsisaannerup pia’
10. ’Anngigisaq inatsisaannerup pia’ eqqarsaatigalugu ullumikkut kikkut pingaarnersaappat, suullu pissuutitassaassutigaat?
10 Soorlu Jesusip upperisarsiornerup tungaatigut pisortat ilumoortuusaarniartut qulaartarsimagai, ullumikkuttaaq uagut isertugaq anngigisamit illernartumit Guutimut-tunniusimanerup pianit allaanerulluinnartoq qulaarsinnaavarput. Tásalûníkamiunut agdlagkat áipait 2:7-imi Paulusip tamanna taavaa ’anngigisaq inatsisaannerup pia’. Taamani suli anngigisaavoq tassami apustilit toqunerata kingunersuatigut aatsaat nalunaarutigineqartussaammat. Pineqartut tassaapput kristumiuuneraqatigiit palaseqatigiivi Guutip naalagaaffia naapertuilluartoq pillugu tusagassamik nuannersumik oqaluussissutiginninnerminnit politikkimik annerusumik aallussisartunut. Ilagiinni nalinginnaasuni kiffartuutillit ilarpassui ilumoortuusaarniartuupput. Ingasaginartunut assersuutitut taaneqarsinnaapput naaggaartut akornanni tv-kkut iivangkilistiusartut — tassaasut peqquserluttuliortut savaatimik aningaasaataannik arsaarisartut, iivangkiiliulerinertik iluanaarutigalugu aningaasaatilissuanngortut, arnanik akilersilluni atortittartunik kanngunartuusunik ilagisartagaqartartut, qulaarneqaraangamillu peqqissimisuusaaginnarlutik qullipittartut, kipissanatillu aningaasanik qinuloortuaannartut. Katuullit Romalerisut ilagiissaat pitsaanerunngivipput, tassami Vatikanimut atasut politikkilerisunik annilaangasutut nalornisoorutigisaqarneq ajortunik ilagisartagaqarnermikkut, alutornangaassuseqartarnermikkut kiisalu aningaaseriviit aqqutigalugit isertortukkut niueqateqapiluttarnermikkut naaggaartutulli kusanaatsigaat.
11. Kristumiuuneraqatigiit palaseqatigiivi Babylonilu Angisooq tamarmi qanoq pineqarumaarpat?
11 Tupinnanngilaq kristumiuuneraqatigiit palaseqatigiivi taaneqarmata „inatsisaatsussutsip inua“! (2 Tásalûníkamiut 2:3, [NV]) Babylon Angisuup arnatut inuunerluttutut ittup ilaa nuimanerusoq tamanna qulaarneqarluinnassaaq eqqunngitsumillu upperisarsiortut allat tamaasa ilanngullugit aserorneqassalluni. Soorlu sarĸúmersitat 18:9-17-imi atuarsinnaagipput politikkilerisut niuertullu (aningaaserivimmiortaat ilanngullugit) taamanikkussaq qiallutillu aliasussapput oqarlutik: ’Eqqanaq, eqqanaq illorpassuaqarfik angisooq.’ Babylon Angisooq isertukkani ilanngullugit qulaarneqassaaq anngigisamut illernartumut Guutimut-tunniusimanerup pianut attaveqartut tamarmik pineqarnerata akerlerluinnaanik.
12. Jesusip eqqortumik iliornermik asanninnerata qanoq iliornissaanik sumut killippaa?
12 Jesusip eqqortumik iliorneq nuannarigamiuk eqqunngitsuliornerlu uumigalugu sapinngisani tamaat eqqortumik pallorfiginninneq siuarsarpaa. Guutip erneratut tanitatut Jerusalemimeeqqaarnermini niuertut aningaasanillu taarsiisartut naalaffimmit anisippai oqarluni: ’Tamakku anissigik; Ataatama illua niuertarfinngorteqinasiuk.’ (Juánase 2:13-17) Kingusinnerusukkullu naalaffeqarfimmiikkami assortortimi juutiusut ilaat ima oqarfigai: ’Ataataq nagguigisarsi tassa Diaavulu, ataatassilu pilerigisai suliariniarpasi. Taanna pileqqaarnerminit inunnik toqutsisuuvoq, sallusuissullu aalajangiutinngilaa ilumigut sallusuissuteqannginnami. Sallulluni oqalukkaangami namminerminit oqaluttarpoq, sallutuugami sallunerillu ataatagimmanni.’ (Juánase 8:44) Upperisarsiornerup tungaatigut pisortat taakku sallutuujunerassallugit Diaavulumullu qitornarinerassallugit Jesus tatitusaartariaqarsimassaqaaq!
13. (a) Qanga Jesusip immikkut ittumik iluaannermik uumissuinini takutippaa? (b) Palaseqatigiit iluaatsuliortut sooq Jesusip farisæerinut eqqartuussineranut assingusumik eqqartuunneqartariaqarpat
13 Jesusip iluaannermik uumissuinera Matîuse kapitali 23-mi farisæerit allakkanillu ilisimasut sualuttumik assuarigamigit, erserluaqaaq. Tassani arfineq-marloriarluni ’eqqanaartorpoq’, pularteriaarsuit piaraannut ’ilivernullu marrartikkanut assersuullugit assigalugit — mingunnartunik nalinginnarnik, ilumoortuusaarniarnernik iluaatsuliornernillu imalissuunerarlugit!’ ’Jerusalem, Jerusalemiaa,’ oqarpoq, ’qassinimmi taava qitornatit katersorumagaluarikka, soorlu marloraap piaqqani sulummi ataanut katersortarai, piumanngilasili. Ata, illorsi ilissinnut qimagaassaaq inueruttoq.’ (Versit 37, 38-lu) Ullumikkuttaaq palaseqatigiit iluaatsuliortut assigisaanik eqqartuunneqartariaqarput ilaasortaammi 2 Tásalûníkamiut 2:12-imi oqaatigineqartutut immata, ’sallusuissummik upperinninngitsut iluaannermulli kajumittut.’ Taakkua iluaatsuliornerat Jesusip nunamiikkallarami ilumoorluni Guutimut-tunniusimaneranut akerliulluinnarpoq.
Guutip eqqartuussutai oqaluussissutigineqarput
14. Anngigisaq illernartoq Guutimut-tunniusimanerup pia pingaartikkutsigu qanoq iliortariaqarpugut?
14 Anngigisamik illernartumik Guutimut-tunniusimanerup pianik pingaartitsinitta Jesusip tumaanik atuaajuaannarnissatsinnut kajumissisittariaqarpaatigut. Taassumatut ilungersortuulluta oqaluussissutigisariaqarparput Jesaja 61:2-mi taaneqartoq ’Jehovap ukiua saammaassivik, Guutittalu ullua akiniaaffik’. Ilungersortuulluta sapinngisatsinnik ’aliasuttut tamaasa tuppallersartigittoq’. Jehovap eqqartuussutai, soorlu tusarliussat kimittuut ilanngutassiani siorna Napasuliaq Alapernaarsuiffik-mi saqqummiunneqartuni, atuakkamilu Åbenbaringen — Det store klimaks er nær!-mi (kalaallisut taaguuteqassagaluartumi ’sarĸúmersitat — Pingaarnerusortaat qaneqaaq!’) saqqummiunneqartuni oqaluussissutiginiassagutsigik Jesusip nalaanisut ullumikkuttaaq tatitusaartariaqarpugut. Nakimanata pissuserillutalu oqaluussisariaqarpugut. Naapertuilluassutsimik nuannarisaqartunut kajuminnartooqqullugit oqaatsivut ’tarajorsimasuusariaqarput’. (Kulorsamiut 4:6) Aap, piffissaq nalliuppat qanortoq Jesusitut nalunaarsinnaagisa — Jehovap uagutsinnut suliassarititaa naammassisimanerarlugu. — Matîuse 24:14; Juánase 17:4.
15. 1914-imiilli Guutip anngigisaa illernartoq qanoq ingerlasimava?
15 „Uinikkut ilisaritin“niarneqartilluni Jesus misinnangaartumik maligassiuivoq. Anngigisaq illernartoq Guutimut-tunniusimanerup pia taassumani erseqqissumik eqquutitaavoq, nakimanani Jehovap aqqa qutsissisimmagu. Assuarnaatsuuneralu pissutigalugu Ataataata akissarsiaqartingaarpaa. Kisianni „anngigisaq illernartoq“ Guutip pia aamma suli allamik ilaqarpoq. 1914-imiilli ’Naalakkap ulluani’ inuuvugut. (sarĸúmersitat 1:10) sarĸúmersitat 10:7-imi allassimasutut ’tusagassaq nuannersoq naapertorlugu anngigisap illernartup Guutip piata naammassineqarnissaanut’ piffissanngorsimavoq. (NV) Qilammi nipit angingaartut nalunaarutigisimavaat manna: ’Silamiut naalagaaffiat Naalakkatta [Jehovap] tanitaatalu pigilerpaat, taannalu kunngiussaaq naassaanngilluinnartumik.’ Jehovap Jesus issiavissaarsuarmut naalannangaartumut ingitissimavaa, kunngitut Messiasitut naalagaaqatigissammani.
16. Kunngip ivertitaaqqammersup, Jesus Kristusip, erniinnarluinnaq qilammissaaq Guutimut-tunniusimaneq pingaartikkini qanoq takutippaa?
16 Naalagaaffimmi atulersinneqartumi Guutimik naalakkersuisoqataalluni Jesus Mikael-imittaaq atserneqarpoq („Kina Guutisut ippa?“-mik isumaqartumik). Kinaluunniit pikititsiniartoq Guutisut ilisinnaanngilaq, soorlu kunngip ivertitaaqqammersup pularteriaarsutoqqap, Satanip, inngiliisalu nunamut iginneratigut erniinnaarluinnartumik takutikkaa. (sarĸúmersitat 12:7-9) Qilammittaaq Jesusip Guutimut-mianerinninneq pingaartingaarpaa, soorlu nunamiikkallarami Guutimut-tunniusimalluarnini takutilluarsimagaa. Jesus Kristus naalannarsisitaasoq eqqunngitsumik upperisarsiorneq tamaat aserortinnagu Satanillu peqatigiissortai takussaasut takussaanngitsullu tamaasa peersilluinnartinnagit unissanngilaq.
17. 1914-imiilli Matîuse 25:31-33 qanoq eqquussimava?
17 1914-imiilli Jesusip siulittuutaata Matîuse 25:31-33-mi allassimasup eqquunnerata „anngigisaq illernartoq Guutip pia“ qaammarsarsimavaa. Jesus tassani ima nalunaarpoq: „Inuup Ernera naalannassutsi atisimallugu tikiukkuni, inngilillu tamaasa ilagalugit, taava issiavissaarsuarminut naalannassutsimi pianut ingissaaq. Inuiaallu tamarsuarmik saanut katersorneqassapput, inuillu avissaartitissavai, soorlu nersutaatinik paarsisup savat savaasanit avissaartitertarai. Savallu talerpimmi tungaanut pisissavai savaasallu saamimmi tungaanut.“ (NV) Qilamminngaanniit kunngi naalannartitaq eqqartuussisorlu akiniaassaaq, siullermik „inatsisaatsussutsip inua“-nut taavalu Babylon Angisuup ilaanut allanut, tamannalu pereerpat Satanip peqatigiissortaanut ajortunut nunamiittunut atasunut savaasatullu ittunut sinneruttunut tamanut akiniaassalluni. Tamanna pereerpat Satan itinersuarmut iginneqassaaq. (sarĸúmersitat 20:1-3) Savalli, tassa ’iluartut’, inuunermut naassaanngitsussamut isissapput. (Matîuse 25:46) Illit, Guutimut-tunniusimanermik ilungersuutiginninnikkut, qanortoq taakkua akornanniikkina!
18. ’Anngigisaq Guutimut-tunniusimanerup pia’ eqqarsaatigalugu sumik immikkut pisinaatitaaffeqarpugut?
18 sarĸúmersitat 19:10-mi kajumissaarneqarpugut ’Guuti pallorfigeqqullugu’. Sooq? Allassimaffimmi ima nangippoq: „Jesusimimmi nalunaajaaneq tassaavoq siulittuinerup anersaava.“ (NV) Itsarsuarmiilli pruffiiterpassuit Guutip sunniineratigut isumassarsisitaallutik Jesus nalunaajaassutigisimavaat! Siulittuutigisaallu eqquukkiartortillugit „anngigisaq illernartoq Guutip pia“ aligortut qaammarissiartorsimavoq. Taamaattumik nuannaarutigaarput ilisimagatsigu „anngigisaq illernartoq Guutimut-tunniusimanerup pia“ Jesusimi inuttut takutinneqarsimammat. Immikkut pisinnaatitaaffigaarput asseqanngitsumik Guutip naalagaaffianut maniguuttutut kiffartortutut Jesusip tumai atuarsinnaagatsigik — aap, ataqqinaataangaarpoq „tusagassaq nuannersoq naapertorlugu anngigisaq illernartoq Guutip pia“ tamaat paasisaqarfigisinnaagatsigu! (wD 15/3 90)
Qanoq akissavit?
□ Jesusip Guutimut-tunniusimanera qanoq ilinniarfigisinnaavarput?
□ Jesusitut qanoq ililluta iluartumik inuulersinnaavugut?
□ Anngigisaq suna anngigisamit Guutimut-tunniusimanerup pianit allaanerulluinnarpa?
□ Anngigisamik Guutimut-tunniusimanerup pianik pingaartitsinitta qanoq iliornissatsinnut killittariaqarpaatigut?
[Qupp. 9-mi assiliartaq]
Guutimut-tunniusimanermik illersuisuulluni Guutillu naalagaaffianik oqaluussisartuulluni ilungersortoq Jesusip eqqortumik Pilatus oqarfigisinnaavaa: „Inunnguutigalugulu nunamut pissutigaara sallusuissut nalunaajaatigissallugu“
[Qupp. 11-mi assiliartaq]
Jesusip Guutimut-tunniusimanera ingammik erserluarpoq farisæerit allakkanillu ilisimasut assuarigamigit