Anngigisaq illernartoq saqqummersitaavoq
„Aap, anngigisaq illernartoq tamanna Guutimut-tunniusimanerup pia angeqaaq, tamanna nassuerutigisariaqarpoq.“ — 1 TIMÛTIUSE 3:16, NV.
1. Anngigisaq suna Timûtiusimut agdlagkat sujugdlît 3:16-imi allaatigineqarpa?
PAASISSAANNGITSUMIK eqqumiitsut orniginartippigit? Anngigisat sammissallugit soqutigaagit? Inuit amerlanersaat tamakkuninnga soqutiginnipput! Taamaammat anngigisat misinnangaarnerpaartaat — anngigisaq ukiuni tuusintilikkuutaani Guutip oqaasiani toqqortaasimasoq, maannakkut siunissamilu inuunitsinnut sunniinerpaasoq — misissoriartigu. Tassaavoq „anngigisaq illernartoq . . . Guutimut-tunniusimanerup pia“, Timûtiusimut agdlagkat sujugdlît 3:16-imi allaaserineqartoq. Jehova tassaavoq ’anngigisanik anngiiaasoq’, anngigisarlu misinnangaartoq tamanna uatsinnullu pingaaruteqarnera anngiiarsimammagu qutsavigingaartariaqarparput! — Daniel 2:28, 29.
2. (a) Qanga Jehova anngigisamik illernartumik eqqartueqqaarsimava, sumillu neriorsuilluni? (b) Apeqqutinut sunut akissutissaqarusuppugut?
2 Anngigisamik illernartumik Jehovap oqaatiginneqqaarpoq Edenimi pulateriaarsuup Eva salloqittareeraalu taannalu naalanngitsuliornerani Adamip peqatigilereeraalu. Tamanna pereersorlu ’kinguaassaq’, pulateriaarsuup niaquanik aserorteriumaartoq, Jehovap neriorsuutigaa. (1 Moses 3:15) ’Kinguaassaq’ taanna kinaava? Qanoq ililluni kinguaassap pulateriaarsuk ajugaaffigissavaa? Taamaaliornissaatigut Guutip naapertuilluassusia aalajangiunneqassanerpa nunamullu siunertaa naammassineqarlluni?
3. Siulittuutini Guutimeersuni kinguaassap kinaaneranik suliassaanillu sunik tikkuussisoqarsimava?
3 Ukiut ingerlaneranni Guutip siulittuutaasigut kinguaassap kinaanera siunissamilu suliassai assigiinngitsutigut tikkuussissutigineqartarsimapput. Abrahamip kinguaarissavaa, Davidip naalagaaffia kingornussarissavaa kiisalu Eqqissinermut Naalakkamik taaneqassalluni. „Naalagaaffia angissaqaaq eqqissinerlu ataavassalluni.“ (Jesaja 9:6, 7; 1 Moses 22:15-18; Tussiaat 89:36-38) Soorluli Rûmamiunut agdlagkat 16:25-mi oqaatigineqartoq, anngigisaq illernartoq tamanna ’ulloqaleqqaarneranit isertugaasimavoq’.
Anngigisaq paasineqalerpoq
4. Ukiumi 29-mi anngigisaq illernartoq qanoq ililluni saqqummeriartulerpa?
4 Kiisami, ukiut 4000-it qaangiutereersullu, qaammariartulerpoq! Qanoq ililluni? Ukiumi 29-mi Johannesip Jesus Nazaretimeersoq Jordanip kuussuani kuimmagu Guutillu nipaa qilammi tutsiulluni oqarmat: „Tassa ernera, asasaq, iluarisara.“ (Matîuse 3:17, NV) Kiisami kinguaassaq neriorsuutigisaq takkussimavoq! Anngigisaq illernartoq annikitsualuttai kusanangaartut tamaasa, aammattaaq Guutimut-tunniusimaneq, ilanngullugit maanna anngiiarneqalerpoq.
5. „Guutimut-tunniusimaneq“ sunaava, Guutimut-tunniusimasunullu qanoq sunniuteqartarpa?
5 „Guutimut-tunniusimaneq“ qanoq paasivarput? Kristumiut Allagaataat Grækerisuut-ni oqaaseq tamanna 17-eriarluni atorneqarpoq, taakkunanngalu qulit Paulusip Timoteusimut allagaani marluusuni ipput. Qinerlerfissiami Hjælp til forståelse af Bibelen-imi (Bibelimik paasiniaanermut ikiuutissiaq)-mi „Guutimut-tunniusimaneq“ nassuiarneqarluni tassaanerarneqarpoq „Guutimik ataqqinnilluni mianerinninneq, Guutimik pallorfiginninneq kiffartuussinerlu, taassuma kisimi oqartussaalluni naalagaassusianut ilumoortuunermik ilalik“. Guutip kunngisut qutsissuuneranik, naassaanngitsuuneranik pinngortitsinissamullu pissaaneranik angingaartumik ataqqinnilluni, kiisalu anersaap timillu piisigut tunissuterpassuarnik inunnut qujamasuttunut tunniuttagaanik pingaartitsilluni Guutimut qanillisoq uummammigut ataqqinnilluni mianerinnilersarpoq. Guutimut-tunniusimanermik piviusumik ersersitsisut tamarmik Tussiaat 104, versi 1-imi allassimasutut ilumoorlutik oqarsinnaapput: „Tarniga, nersoruk [Jehova]! [Jehova] Guutiga, tupinnaqaaq angingaarsutsit! Alutornassuseq naalannassuserlu atisaraatit.“
6. (a) Jehovamik pallorfiginnittut qanoq ilillutik kristumiuuneraqatigiit oqaluffiinut orniguttartunit allaaneruppat? (b) Rûmamiunut agdlagkat 11:33, 34-mi Paulus qanoq oqarpa, tamannalu pillugu sunik apeqqutissaqalerpa?
6 Guutimut tunniusimanerput qanoq-iliuutsitsigut ersertariaqarpoq. Tamatumuunakkut Guutimik ilumoortumik, Jehovamik, pallorfiginnittut kristumiuuneraqatigiit ilagiissaannut qajannarsiartortunut orniguttartunit allaanerulluinnarput. Inuppassuit — suli upperisarsiortuugunik — upperisarsiorneq ileqquusoq maliinnarlugu iliuutsitut isigaat, naak silamiutut ileqqupiloqartutut avatiminniittutut inooriaaseqaraluarlutik uligussatut iluartuusaarnialerlutillu atisartakkamissut isigaat. Guuti kinaanersoq naluaalluunniit. Inuit taama ittut Paulusip oqaasii apustilit suliáinik agdlagkat 17:23-miittut eqqarsaatigisariaqaraluarpaat. Athenimiut Guutimik nalusaminnik ataqqinnittut oqarfigai: ’Taanna nalusarigaluarlugu ataqqisarsi ilissinnut oqaatiginiarpara.’ Guuti taanna asseqanngitsoq pillugu Paulus Rûmamiunut agdlagkat 11:33, 34-mi oqarpoq: ’Ata, Guutip pisuussusiata ilisimaneratalu ilisarsineratalu itissusiat; eqqartuussinerisa killisissaanngissusii aqqutaasalu siunersissaanngissusii. Kiami [Jehovap] isumaa ilisaraa? Kinaluunniit isumalioqatigaa?’ Qanormi ililluta Guutip aqqutigisai ilisariniarsinnaavavut? ’Anngigisap illernartup Guutimut-tunniusimanerup piata’ paasiniarneratigut. Qanoq ililluta taamaaliorsinnaavugut?
7. ’Anngigisaq illernartoq Guutimut-tunniusimanerup pia angeqisoq’ qanoq paasisariaqarpa?
7 Timûtiusimut agdlagkat sujugdlît kapitali 3-mi, Guutip illuani, versi 15-imi ’Guutip uumasup ilagiissaani, ilumoornerup sukaralugulu tunngavigisaatut’ taaneqartumi, akisussaassuseqarlutik kiffaatitaasut sunik piumaffigineqarnersut siullermik Paulusip naatsumik oqaluttuaraa. Taava versi 16-imi nangilluni oqarpoq: „Anngigisaq illernartoq Guutimut-tunniusimanerup pia tamanna angeqaaq.“ Aap, angeqaaq, Jehovammi ernituani nunamut aallartissimavaa anngigisaq tamanna saqqummersikkiartoqqullugu — Guutimut-tunniusimanerup qanorpiaq isumaqarnera ersersikkiartoqqullugu aammalu eqqortumik pallorfiginninnermi tamatuma pisariaqarluinnassusia pingaaruteqassusialu erseqqissariartoqqullugu. Jesusip nunami inuunerata qimerloorneratigut anngigisaq illernartoq Guutimut-tunniusimanerup pia paasisinnaavarput. Jehovamik asannittut tamarmik uppernerminnut inuunerminnullu Kristus, Guutimut-tunniusimanermigut maligassiuisoq, tunngavigitittariaqarpaat. ’Anngigisap illernartup Guutimut-tunniusimanerup pia’ qanoq ilillugu Jesusip inuunerata paasinarsisippaa?
Immikkoortut arfinillit
8. (a) Anngigisap illernartup immikkoortui arfinillit suut Timûtiusimut agdlagkat sujugdlît 3:16-imi Paulusip allaatigai? (b) „Ilisaritinneqartoq“ kinaava?
8 Guutimit isumassarsisitaalluni Paulusip apeqqut tamanna akivaa. Anngigisap illernartup tamatuma immikkoortuisa ilaat arfinillit Timûtiusimut agdlagkat sujugdlît 3:16-imi (NV) allaaserai oqarluni: „[1] Uinikkut ilisaritinneqarpoq, [2] anersaakkut iluartuutinneqarpoq, [3] inngilinit takuneqarpoq, [4] inuiaat akornanni oqaluussissutigineqarpoq, [5] silarsuarmi upperfigineqarpoq, [6] naalannarsilluni pavunnartinneqarpoq.“ Kinaana ilisaritinneqartoq? Erseqqivissumik tassaavoq kinguaassaq neriorsuutigisaq, Jesus, Guutip piumasaa naammassiartorlugu tikiussimasoq. Taannaavoq anngigisami illernartumi inuttaasoq pingaarneq, taannalu pissutaalluni anngigisaq „angeqaaq“.
9. Sooq Timûtiusimut agdlagkat sujugdlît 3:16-imi allassimasussaanngila ’Guuti uinikkut ilisaritinneqartoq’?
9 Guutip ataasiullunilu pingasuussusianik ajoqersuummik upperisaqartut anngigisamik illernartumik paasisaq matoorniarpaat, oqarlutik Timûtiusimut agdlagkat sujugdlît 3:16-imi eqqartorneqartoq tassaasoq Guuti nammineq. Assersuutigalugu, King James-ip nutsigaa issuarpaat, tassani allassimammat: „Guuti uinikkut saqqummersitaavoq.“ Assaannarmilli allakkani grækerisuuni tatiginarnerpaasuni qanoq allassimava? Eqqortumik iliorlutik oqaaseq „taanna“ atorpaat, oqaaseq „Guuti“ atornagu. Allakkanik isornartorsiuisartut allassimasunik misissueqqissaartartut maanna isumaqatigiipput oqarlutik oqaaseq „Guuti“ allaqqiisut kukkuneratigut allassimaffimmi tamatumani ilanngunneqarsimasoq. Taamaattumik nutsikkani nutaanerusuni, soorlu Ny Verden-nutsikkami, ima allassimavoq: „Uinikkut ilisaritinneqarpoq.“ Aap, tassaanngilaq Guuti nammineq „uinikkut“ ilisaritinneqartoq. Tassaavoq ernera asanartoq, pinngortitaa siulleq, taannalu pillugu apustili Johannes allappoq: ’Oqaaserlu uininngorpoq akornatsinniilerlunilu, takuarpullu naalannassusia soorlu ernituap ataataminit naalannassuserisaa, saammaannermik sallusuissummillu ilumioqangaartoq.’ — Juánase 1:14.
„Uinikkut ilisaritinneqartoq“
10. (a) Jesusip imermi kuisinneragut anngigisap illernartup immikkoortortaa siulleq qanoq ililluni saqqummersinneqarpa? (b) Jesus sooq tassaalerpa ’Adam kingulleq’?
10 Jesusip kuisinnerani anngigisap illernartup immikkoortortaa siulleq saqqummersinneqarpoq: Jesus Guutip erneratut tanitatut „uinikkut ilisaritinneqarpoq“. Jehova Guutip ernermi inuunera qilamminngaanniit Mariap illiaanut nuussimavaa, Jesus uinikkut inuttut naammalluinnartutut inunngorsinnaaqqullugu. Soorlu Korintumiunut agdlagkat sujugdlît 15:45-47-mit paasineqarsinnaasoq Jesus taamaalilluni tassaalerpoq ’Adam kingulleq’, inuttut tarniulluni naammalluinnartoq Adamip siulliup naligilluinnagaa. Suna siunertaralugu? ’Adam kingulleq’ Timûtiusimut agdlagkat sujugdlît 2:5, 6-imi taaneqarpoq ’inuk Kristus Jesus, imminik tunniuttoq tamarmik utertitaassutissaannik’. Inuttut inuunerminik naammalluinnartuusumik pilliutitut tunniussinermigut inatsisit naapertorlugit tunngaviliussani najoqqutaralugu Jesus angerusisaamik, naalagaaffimmini kingornusseqatigisassaminik 144.000-iusunik angerfigeqatiginnissutaasumik, akunnermiliulluni pilersitsivoq. — sarĸúmersitat 14:1-3.
11. Aamma kikkut Jesusip pilliutaa utertitsissutaasoq iluaqutigissavaat?
11 Allattaaq Jesusip pilliutitut toqua iluaqutigiumaarpaat? Ilaana! Juánasip agdlagai sujugdlît 2:2-mi allassimavoq Jesus Kristus ’ajortitta [tassa kristumiut tanitaasut ajortaasa] matoorneqaatigaat, uaguinnaanngitsummi, silarsuarmiuttaaq tamarmik’. Jesusip pilliutaata utertitsissutaasup iluaqutissartaa kristumiut tanitaasut 144.000-iinnaanngitsut aammattaarli inuiaat tamarmik iluaqutigissavaat. ’Amerlangaartut’ maannakkut inuusut, aammattaaq paratiisimi nunamiittussami toqusunit makititaasussat milliardillit, Jesusip pilliutaanik utertitsissutaasumik upperfiginninnertik tunngavigalugu inuuneq naassaanngitsoq piumaarpaat. Soorlu sarĸúmersitat 7:9, 10-mi siulittuutigineqarsimasoq amerlangaartunut ilaasut atisatik takisuut erroreersimavaat Savaaqqallu, Jesus Kristusip, aavanik kuisaasumik upperfiginninnermikkut qaqorsarsimallugit. Guutip ikinngutaatut iluartutut naatsorsuunneqarput. Nuannaarutigaat anngigisap illernartup immikkoortortaanik assigiinngitsunik ilinniarnertik Jesusillu maligassiaa naapertorlugu Guutimut-tunniusimanermik ersersitsinertik.
Immikkoortut allat
12. Qanoq ililluni Jesus ’anersaakkut iluartuutinneqarpa’?
12 Taavami Timûtiusimut agdlagkat sujugdlît 3:16-imi eqqartorneqartup tullia? Tassani allassimavoq Jesus „anersaakkut iluartuutinneqar“toq. Tamanna qanoq ililluni pisimava? Tamanna pisimavoq Jehovap ernini aalajaatsoq assuarnaatsorlu anersaanngortillugu toqusunit makitimmagu. Imaappoq Guutip nalunaarutigigaa Jesus iluarluinnartuusoq, imaluunniit naapertuilluarluinnartuusoq, annerusunillu suliassinneqarnissaminut qinngaqqunnanngitsuusoq. Soorlu Rûmamiunut agdlagkat 1:4-mi allassimasoq Jesus ’toqusunit makikkami anersaakkut illernartitsisukkut pissaanermik nalunaarneqartoq Guutip ernerigaa’. Apustili Peterip tamanna uppernarsarpaa allakkamini siullerni, kapitali 3-mi, versi 18-imi oqarami: ’Kristus ataasiarluni ajortit pissutigalugit anniarpoq, iluartoq iluaatsut pillugit, Guutimut sassartikkumagamisigut toqutaagaluarluni uinikkut uummartitaallunili anersaakkut.’ Jesusip Guutimut-tunniusimanermik maligassiaata illit Guutimut sassartippaatit?
13. Inngilit ’Jesusimik takunnissimasut’ kikkuuppat, sumillu tusarlerpai?
13 Timûtiusimut agdlagkat sujugdlît 3:16-imi sammineqartut pingajuattut Paulus maanna oqarpoq Jesus „inngilinit takuneqar“simasoq. Inngilit taakku kikkuusinnaappat? Jesus, ’anersaakkut uummartitaasoq’, pillugu Peter allakkamini siullerni, kapitali 3-mi, versinilu 19-imi 20-milu nangilluni ima oqarpoq: ’Taassumuunattaaq anersaanut parnaarussivimmiittunut oqaluussiartorpoq, naalasseriitsunut taamani Guuti kamajuerluni utaqqimmat Noa inuugallartillugu.’ Jûtarsip agdlagai, versi 6, naapertussagaanni anersaat taakku tassaapput ’inngilit pissusereqqaagartik aalajangerfiginagu inigisaminnik’ qilammiittumik qimatsisimasut. Uinikkut timeqalersimapput nunami arnat inerteqqutaasumik kinguaassiuutitigut atoqatigisinnaajumallugit. Ulersuaqarnerani anersaat najugaannut pinngitsooratik utertariaqaleramik, Tartarosimut, nikanarsagaangaarnermut, pisinneqarput. (2 Pîtruse 2:4) Tassani Jesusip makititaasimasup oqaluussiffigiartorpai. Annassutissamik tusarlerpai? Naaggarluinnaq! Ajorsusiat Guutimut-tunniusimanerup akerlerluinnarisaa avoqqaaraa. Ullumikkut Guutip innuttaasa akornanni kinguaassiuutitigut kanngunartuliorusuttut tamarmik eqqartuussut inngilinut taakkununnga nalunaarutigisaasoq mianersoqqussutitut isigisariaqarpaat!
14. Qanoq ililluni Jesus ’inuiaat akornanni oqaluussissutigineqalerpa?
14 Timûtiusimut agdlagkat sujugdlît 3:16-imi sammineqartut sisamaat tassaavoq Jesusip „inuiaat akornanni oqaluussissutigineqar“nera. Tamanna qanoq ililluni eqquutinneqarsimava? Tigusarineqarnermi siunitsiannguagut Jesusip apustilit oqarfigai: ’Ilumut, ilumut oqarfigaassi: Suliat suliarisakka uannut uppertuttaaq suliariumaarpai; tamakkua angeqqingiluunniit suliariumaarpai; Ataatamummi aallassaanga.’ (Juánase 14:12) Tamatuma kingunitsiannguagut, ukiumi 33-mi piinsip ulluani, Jesusip anersaaq iluartoq ajoqersukkaminut kuivaa, nutaarsiassarlu tupaallannartoq tamanna — ’Jesus taanna Guutip makitissimagaa’ — juutinut oqaluussissutigineqalerpoq. Kingornagut Samariamiuttaaq Guutip oqaasianik ilassinnipput. (apustilit suliáinik agdlagkat 2:32; 8:14-17)) Ukiumilu 36-mi Peterip Kornelius allallu taassuma illuani katersuussimasut oqaluussiffigai. Taamaalilluni tusagassaq nuannersoq „inuiaat“, tassa juutiunngitsut, akornanni oqaluussissutigineqalerpoq, taakkuattaaq ilaat anersaamik iluartumik taninneqarput.
15. Kristumiut ukiuni hundredelinni siullerni inuusut ’anngigisaq illernartoq Guutmut-tunniusimanerup pia’ ilikkarluarsimagaat qanoq takuneqarsinnaava?
15 Soorlu apustilit suliáinik agdlagkat 12:24-mi eqqartorneqartoq ’Guutip oqaasia ajugaajartorpoq’. apustilit suliáinik agdlagkat 17:6-imi oqaluttuarineqarpoq Grækenlandip avannaani akerliusut qanoq nilliasut — soorluttaaq ullumikkut nunami tassani sallusuissummut akerliusut nilliasartut — ima: ’Inuit najugaata tamarmi inuinik killormoortitsisut tamaangattaaq pipput.’ Ukiut 30-t qaangiutsinnagit Paulus Romaminngaanniit allassinnaasimavoq tusagassaq nuannersoq ’pinngortitani tamani qilaap ataaniittuni oqaluussissutigineqarsimasoq’. (Kulorsamiut 1:23) Kristumiut taamani inuusut anngigisaq illernartoq Guutimut-tunniusimanerup pia ilikkarluarsimavaat. Ilikkakkamillu kingunera paasereersimallugu aallussillutik malippaat! Maannalu, Naalagaaffimmik oqaluussissutiginninnerup sakkortusinerpaaffissaata qanilliartornerani, uaguttaaq taamaaliorta!
16. Anngigisap illernartup immikkoortuisa tallimaat sunaava, suliniarnerlu suna ersarissisippaa?
16 Ukiuni hundredelinni siullerni oqaluussinerup kingunerisaanik, anngigisap illernartup Timûtiusimut agdlagkat sujugdlît 3:16-imi eqqartorneqartup immikkoortuisa tallimaat erseqqissivoq. Jesus „silarsuarmi upperfigineqarpoq“. Ajoqersuiartortitat ilungersortut Kristusitut Guutimut-tunniusimanerata tamanna kinguneraa. Angutit, soorlu Paulusip Timoteusillu, tusagassaq nuannersoq Asiaaqqami Europamilu, immaqalu allaat Spaniami, tusarliussimavaat. Ætiopiamiup kuisimasup oqaluussinerata kingunerisaanik tusarliussaq Afrika Kangillermuttaaq anngussimavoq tassanilu siuariartorsimalluni. Tamatuma nalaani Peter Babylonimi oqaluussisimavoq.
17. Qanoq ililluni Jesus ullumikkuttaaq silarsuarmi tamarmi upperineqalersimava?
17 Ullumikkummi? 1919-imiilli sinneruttut tanitaasut maligassaalluarlutik Guutimut-tunniusimapput. Uppernerup tunngavia Jesusip tunngavilersimasaa kristumiut tanitaasut taakkua qajannaatsumik sanaffigisimavaat. Ingammik 1935-miilli aammattaaq katersorpaat amerlangaartut, annikilliornartussami angisuumi aniguiumaarnissaminnik nunamilu paratiisiusumi naassaanngitsumik inuunissaminnik qilanaarlutik neriugisaqartut. (sarĸúmersitat 7:9, 14) Aap, Jesus pillugu tusagassaq nuannersoq silarsuarmi tamarmi maanna upperineqarpoq. Jehovamut nalunaajaasut Guutimut-tunniusimasut 3.700.000-init amerlanerusut nunarsuarmi tamarmi oqaluussillutillu siuariartorput!
18. Qanoq ililluni Jesus ’naalannarsilluni pavunnartinneqarpa’?
18 Anngigisap illernartup immikkoortortaasa arfernat eqqartorneqartoq tassaavoq: Jesus ’naalannarsilluni pavunnartinneqartoq’. ’Anersaakkut uummartinneqareerlunilu’ ulluni 40-ni Jesus timit uiniusut timigalugit ajoqersukkaminut takutittarpoq ’Guutillu naalagaaffiata piinik’ oqaluttuuttarlugit. Taava qilaliarpoq. (apustilit suliáinik agdlagkat 1:3, 6-9) Taamaalilluni qinnutaa Juánase 17:1-5-imi allassimasoq una akineqarpoq: ’Ataataq, . . . ernerit naalannarsisiguk, illittaaq Ernernut naalannarsiseqqullutit . . . Nunami naalannarsisippakkit . . . Maannalu, Ataataq-aa, ilinni naalannarsisinnga naalannassutsinnik silarsuaqanngikkallarmat ilinni pigisannik.’
19. Jesus qilammut utermat tappavani qanoq qisuariarsimanissaat takorloorsinnaavarput?
19 Jesus qilammut utermat tipaatsungaartoqarsimassaqaaq! Tamatuma siunerujussuatiguttaaq, Jehovap nuna tunngavilermagu, qilammi tipaatsungaartoqarsimavoq. Allassimammat ’Guutip erneri tamarmik tipaatsungaartut’. (Jobimik allakkat 38:7) Jehovap kisimi oqartussaaneranik illersuisoq ilumoortoq akunnerminnut utermat inngilit suli annerusumik tipaatsussimassapput!
20. Jesus sooq annerungaartumik atertaarpa, nunamiikkallaramilu tamatumunnga attuumassuteqartumik qanoq iliorsimava?
20 Eprîarinut agdlagkat 1:3, 4-mi Jesus ajugaasoq pillugu Paulus ima oqarpoq: ’Taanna ajortit piiagaanissaat suliarereeramiuk naalagaanersuup qutsinnermiittup talerpiata tungaanut ingissimavoq, inngilinit pingaarnerungaalerluni atertaarami taakkunannga annerungaartumik.’ Jesus Kristus, Guutip ernera, atertaarpoq naapertuilluanngissutsimut ajugaagami. Ilumut nunami Guutimut-tunniusimanermik aallarniisuusimavoq, inuunermillu naassaanngitsumik anguserusuttunut allanut tamanut maligassiuisimalluni. Qilammi Guutip talerpiata tungaanut taassuma naalannarsisinneqarneragut „anngigisaq illernartoq Guutimut-tunniusimanerup pia“ annikitsualuttai tamaasa ilanngullugit saqqummersinneqarpoq. (wD 15/1 90)
Qanoq akissavit?
□ „Guutimut-tunniusimaneq“ sunaava?
□ Jesus qanoq ililluni ’uinikkut ilisaritinneqarpa’, tamatumalu kingorna ’anersaakkut iluartuutinneqarluni’?
□ Jesus inngilinut kikkunnut takutippa, tusagassamillu sumik tusarlerpai?
□ Kristus qanoq ililluni ’inuiaat akornanni oqaluussissutigineqarpa’ ’silarsuarmilu upperfigineqarluni’?
□ Jesus qanga ’naalannarsilluni pavunnartinneqarpa’, tamatumalu siorna qanoq ililluni maligassiuisimava?