Jehovap ikioqqulluta noqqaassutivut tusartarpai

IKIORNEQARNISSAQ pisariaqartinneqaqaaq. Tamanna kunngimut immitsisup kiinaani aliasuppaloqisumi takuneqarsinnaavoq. Immitsisoq aperineqarami suna erloqissutiginerini, Jerusalemip taassumalu qarmarsuisa piuneerunnerannik aliasuutiginninnini oqaatigaa. Kunngi aperaaq: „Suna kissaatigaajuk?“ Immitsisoq, Nehemias, kingusinnerusukkut allappoq: „Taava qilaap Guutianut qinuvunga.“ Naatsumik nipaatsumillu qamannga pisumik Jehovamit ikiorneqarnissani qinnutigaa. Sumillu kinguneqarpa? Ingerlaannaq Perserit kunngiata, Artaxerxesip, Nehemiasip Jerusalemip qaarmasuinik qarmaaqqikkiartornissaa akueraa! — Nehemja 2:1-6.

Aap, Guutip asasami qinnutaat tusartarpai. (Tussiaat 65:3) Misilinneqarnerput sapersutut misigigutsigu tussiaasiortutut Daviditut, Tussiaat 70-imi Guutip ikiuinissaanik pisariaqartitseqaluni qinusimasutut, qinusinnaavugut. Tussiaatip tamatuma qulequtaata takutippaa ’eqqaasitsissutitut’ allataasimasoq.a Ikittuinnaat eqqaassanngikkaanni Tussiaat 40:13-17-mit uteqqiineruvoq. Kisianni uagut Jehovamut kiffaasugut qanoq ililluta Tussiaat 70-imit ikiorneqarsinnaavugut?

Aniguinasuarnissamik qinnut

Aallarniutigalugu David ima allassimavoq: „Saammaallutit qiviannga, Guuti, aniguisillungalu, pinasuarit, [Jehova], ikiunnga!“ (Tussiaat 70:2) Annikillioraangatta ikiorasuaqqulluta Guuti qinnuigisinnaavarput. Ajortumik Guutip misilittanngilaatigut, kisianni ’mianerinnitsini ussernartumit annaanneq nalussanngilai’. (2 Pîtruse 2:9; Jâko 1:13) Taavami Guutip misilinneqarnitta ingerlaannarnissaa akueriinnarpagu, immaqa ilinniarfiginiassagatsigu? Taava qasusuissinnaaqqulluta ilisimassummik qinnuigisinnaavarput. Upperluta qinugutta ilisimassummik tunissavaatigut. (Jâko 1:5-8) Guutip aamma nakuussutsimik annikilliornitsinni qasusuissinnaanissatsinnut pisariaqartitatsinnik tunisarpaatigut. Assersuutigalugu ’napparsimalluta nallavitsinni ikiortarpaatigut’. — Tussiaat 41:2-4; Eprîarit 10:36.

Ajortiliussuseq kingornussarput, ussernartorsiortinniarneqartuarnivut, Jehovamullu attaveqarnitsinnik Diaavulup aseruiniarnera eqqarsaatigalugit ullut tamaasa Jehovamit ikiorneqarnissarput qinnutigiuartariaqarparput. (Tussiaat 51:3-7; Rûmamiut 5:12; 12:12) Malugisariaqartuuvoq Jesus qinnummini najoqqutassaasumi ima qinusoq: ’Ussernartumut pisinnata; ajortumilli annaatsigut.’ (Matîuse 6:13) Guutimut naalanngitsuliornissatsinnut usserniarneqaraangatta nakkaannarnissarput akuereqqunagu Satanimillu, ’ajortumit’, pakasarneqarnissarput pinngitsoorteqqullugu qinnuigisinnaavarput. Guuti aniguisinneqarnissatsinnik qinnuigigaangatsigu ussernartorsiorfigisinnaasavut Satanillu tammartitsiniutai sapinngisamik ingalassimaniartariaqarpavut. — 2 Korintumiut 2:11.

Mitalliutinik suaartartut

Uppernerput pissutigalugu akerlilersuisunit asissorneqarutta misilinneqarnerit artornartut atorsinnaavavut. Taama pisoqarpat Davidip oqaasii eqqarsaatiginiarigit: „Kanngunarsisitaallutillu narrunarsisitaalit toqutsiniartut uannik! Taakku uannut ajortussamik kissaassisut narrunarsagaallutik tunuassapput. Mitalluitinik suaartartut kanngutsisitaallutik tunuaannassapput.“ (Tussiaat 70:3, 4) Davidip toqunissaa akerartortaasa kissaatigaat; ’taassuminnga toqutsiniarput’. Nammineq akiniaanissani eqqarsaatiginagu, Guutilli taakkuninnga kanngunarsisitsinissaa tatigilluinnarpaa. Davidip qinnutigaa akerartortini ’kanngunarsisitaassasut narrunarsisitaassasullu’ — peqqusiileqilissasut, paatsiveerullutillu pilersaarutipilutik ajortut taamaatiinnassagaat; aap, imminik toqutsiniartut ajunaartitsiniartullu narrunarsarneqassasut pilersaarutaallu akornuserneqassasut.

Akerartortitta ajortumik pineqarneri nuannaarutigisarutsigik Jehovap ajortuliornitsinnik akisussaatissavaatigut. (Ussatit 17:5; 24:17, 18) Kisianni akerartortitta mitaatigisaat tassaappata Guuti taassumalu innuttai, taava Jehova qinnuigisinnaavarput atini pillugu ’narrunarsarlugit tunuartissagai’ inuiaallu nuimaneruffigerusutamik takkuanni nikanarsisitaatissagai. (Tussiaat 106:8) Guuti akiniaasussaavoq; akerartortini, uaguttaaq akerartortigisavut, nikanarsarsinnaallugillu avissaartortissinnaavai. (5 Moses 32:35) Nazistit siulersortaat Adolf Hitler Jehovap nalunaajaasuinik Tysklandimiittunik nungutitsiniaanermini iluatsitsinngitsoorsimavoq, ullumilu nunami tamatumani naalagaaffimmik oqaluussissutiginnittut amerlaqaat!

Akerartortivut immaqa mitaatiginnillutik suaartarput. Kisianni Guutimik innuttaanillu mitaatiginnittuugamik ’kangutsisitaallutik tunuaannassapput’. Tamatuma pinissaanik qinusartilluta assuarnaassuserput attattuartigu Jehovallu uummataa nuannaartillugu Satanimut imminullu mitaatiginnittunut allanut akissutissaqaqqullugu. (Ussatit 27:11) Akeqqavut pingaakujuttut siooragisariaqanngilavut, ’[Jehovamik] tunaarinnittoq aarlerissutissaqanngimmat’. (Ussatit 29:25) Babylonimiut kunngiat Nebukadnezar pingaarniartoq Guutip innuttaanik aallarussisoq allaat nikanarsagaasimavoq akuerisariaqarsimallugulu qilaap Kunngiata ’anneruniartut makitanaveersarneq sapinngikkai’. — Daniel 4:37.

„Angingaarpoq Guuti!“

Uppeqativut ilagalugit Jehova unnersiutigiuartigu naak akeqqatsinnit ajornartorsiortitaasaraluarluta. Nikallornissamut Guutimillu unnersiutiginnikkunnaarnissamut taarsiullugu David ima oqarsimavoq: „Taakkuli ilinnik ujarlersut tamarmik qiimmattaatigalutillu tipaatsuutigissavaatsit. Annaassininnillu nuannarinnittut ima oqartuinnassapput: „Angingaarpoq Guuti!“ (Tussiaat 70:5) Jehovap innuttai nikallujuissinnaapput taassuminnga ’qiimmattaatiginnikkamik tipaatsuutiginnillutillu’. Jehovamik qanittumik ikinngutiginninneq tamanna taassuma nalunaajaasuisa tunniulluinnarsimasut kuisimasullu nuannaarutigeqaat. (Tussiaat 25:14) Ilumoortumilli oqaatigalugu inuinnaapput maniguullutik Guutimut atajuarumasut. Peqqussutai maleruarpaat taassuminngalu oqaasianillu itinerusumik paasisaqarniarlutik. — Nalunaajaasup oqaasii 3:11; 12:13, 14; Jesaja 54:13.

Jehovap nalunaajaasuisa tusagassaq nuannersoq oqaluussissutigigaangamikku ima oqartarpullusooq: „Angingaarpoq Guuti!“ Jehova tamanit qutsinnerutillugu unnersiutigisarpaat. Innuttaasa nuannaarlutik inuit sallusuissummik ujarlersut Guutimik ilisimasaqarnissaannut taassuminngalu qutsinnerpaatitsinissaannut ikiortarpaat. Ullumikkut silarsuup matuma inuulluataarniartuinut akerliusumik, ’annaassineranik nuannarinnipput’. (2 Timûtiuse 3:1-5) Ajortiliunerminnik kingornussaasumik akuerinnillutik Jehova Guutip annannissamik asannittumik aaqqissuussaa, ernerata asangaakkap Jesus Kristusip saammaanneqaatissamik pilliutaa aqqutigalugu naassaanngitsumik inuulernissaminnut periarfissiisoq, qujamasuutigingaarpaat. (Juánase 3:16; Rûmamiut 5:8; 1 Juánase 2:1, 2) Illit Guuti naalannartippiuk ’annaassineranillu nuannarinninnerit’ taassuma ilumoortumik kiffartorfigineratigut takutittarpiuk? — Juánase 4:23, 24.

Aniguisitsisit tatigiuk

Davidip tussiaammi tamatumani ikiorneqartariaqarluinnarnini ersersippaa. Oqarpoq: „Inukuluullungalu piitsuusunga ornikkasuannga Guuti. Illit tassa ikiortiga aniguisitsisigalu, piumaataaqinak [Jehova]! (Tussiaat 70:5) Uagut Guutimut kiffaasutut annikilliornartunik nalaataqaraangatta — assersuutigalugu malersorneqarluta, ussernartorsiortitaalluta Satanimillu saassunneqarluta — ’piitsuusorinarsinnaavugut’. Naak naammaannartunik pissaqaraluarluta, qinngarsortitta nangaassuteqanngivissut isaanni immaqa illersuutissaaruttutut issinnaavugut. Qularissanngilarpulli Jehovap kiffani ikioriartorsinnaagai ikiorusullugillu. — Tussiaat 9:17-20 .

Jehova tassaavoq pisariaqartikkaangatsigu ’aniguisitsisartoq’. Immaqa nammineq kukkussutivut pissutigalugit ajornartorsiulertarpugut. Kisianni ’sianiissutsitta orlutippatigut Jehova pisuutissanngilarput’. (Ussatit 19:3) Jehova tamatumunnga pisuunngilaq, uppernikkulli taassumunnga qinugutta ikiussavaatigut. (Tussiaat 37:5) Ajortuliornaveersaarniarnerpummi artorsaatigigutsigu? Taava tamanna qinunitsinni immikkut saqqummiussinnaavarput, Guutilu qinnuigalugu sammivimmi eqqortumiiginnarnissatsinnik ikioqqulluta. (Matîuse 5:6; Rûmamiut 7:21-25) Guutip qinnutivut qamannga pisut akissavai, anersaavanillu illernartumit siulersorneqartikkutta anersaakkut ineriartussaagut. — Tussiaat 51:19; Evfisumiut 4:30.

Uppernikkut misilinneqarnivut artornarpallaaraangata immaqa misigisarpugut sapilerluta. Uinipput ajortilik sanngiimmat tuaviinnaq aniguisitaarusuttarpugut. (Mákorse 14:38) Taamaattumik ima qinusarpugut: ’Piumaataaqinak, Jehova.’ Ingammik Guutip aqqa mitaatigineqaraangat pruffiiti Danielitut ima qinorusuttarpugut: „[Jehova-aa], isumakkeerfigitigut, [Jehova] naalaarit; nangaanallu qanoq iliuuseqarit illit nammineq ataqqinaatissannik, Guutiga. Tassami . . . innuttatit illit atikkut ilinnut pigitittaapput. (Daniel 9:19) Ataatatta qilammiusup piumaataarnissaa isumakuluutigisariaqanngilarput apustili Paulus ima neriorsueqqissaarmat: ’Taamaattumik siooranata sassarniarta saammaassisup issiavissaarsuanut, nallittorneqaqqulluta saammaanarseqqullutalu pisariaqarfiagut ikiorneqaatissatsinnik.’ — Eprîarit 4:16.

Puigornaveeruk Jehova tassaasoq ’aniguisitsisit’. Uatsinnut, taassumunnga kiffaasunut, pingaaruteqarpoq tamanna eqqaamassallugu, qinnullu qamannga pisoq Tussiaat 70-imiittoq puiornaveersaassallugu. Ilaannikkut ernumassuterput aalajangersimasoq pillugu arlaleriarluta qinusariaqartarpugut. (1 Tásalûníkamiut 5:17) Immaqa ajornartorsiut aaqqiissutissaqanngitsutut misigisarparput. Ataatattali qilammiusup nakussatsissavaatigut artukkatsinnillu usserneqarnissarput akuerinaviarnagu. Taamaattumik Kunngip naassaanngitsup issiavissaarsuanut qamannga pisumik qinunikkut qasusuilluta sassartuartariaqarpugut. (1 Korintumiut 10:13; Filípimiut 4:6, 7, 13; sarĸúmersitat 15:3) Uppernikkut qinusarit, Jehovalu tatigilluinnaruk, taassuma ilungersorluta ikioqqunivut tusartarmagit. (wD 15/5 91)

[Quppernerup ataani ilanngussaq]