Qanoq ililluni meeqqat kristumiutut pissuseqalersikkiartorneqarsinnaasut
WANDAP anaanaa, uiminit qimanneqarsimasoq, kristumiutut pissutsit panimminut pigiliutsinniarlugit assut suliniuteqarsimavoq. Ilinniartitsineq tamanna Wanda 12-nik ukioqartoq misilinneqartussanngorpoq. Tassami taanna aqqaluni nukkanilu ilagalugit ataataminut nuukkallarnissaminut pinngitsaalineqarpoq. Wandap ataataa uppertuunngilaq, Wandalu anaanami suluinillusooq paarineqarunnaarami qanormitaava pissuseqalissava?
Angajoqqaat tamarmik meeqqamik namminneerlutik aalajangiisariaqalerfissaat namminnerlu uppernerata misilitsittariaqalerfissaa misigiumaarpaat. Immaqa Wandap pisimaneratut meeqqat angajoqqaaminnit avissaartinneqassapput. Immaqa atuaqataasa kukkusumik iliortinniarsarissavaat, imaluunniit annertuumik ussernartorsiortitaassapput. Angajoqqaat kristumiuusut kissaatigalugulu qinnutigisarpaat tamakku nalliuppata qitornatik ima nukittutigisumik kristumiutut pissuseqaleersimassasut misilinneqarnitik nakkaannarfigissanagit.
Angajoqqaat qanoq ilillutik kristumiutut pissutsit nukittuut qitornaminni ineriartortissinnaavaat? Wandap qanoq pisimanerata eqqartunnginnerani apeqqut tamanna Bibelimut akitikkallartigu. Akissut apustili Paulusip kristumiunut Korinthimiittunut allagaaniippoq: ’Alla tunngaviliunneqarsinnaanngilaq kisianni tunngaviliuteriigaq taanna, tassa Jesus Kristus. Tunngavimmulli tamatumunnga kuultimilluunniit siilvimilluunniit ujaqqanilluunniit erlinnartunik qisummilluunniit ivikkanilluunniit karriiarnikunilluunniit qarmaasoqarpat taava kialuunniit immikkut suliaa ersissavoq, ullussap nalunaalliumaarmagu; innermimi saqqummerumaarpoq, kinaagaluartullu suliaa qanoq innersoq innerup misilissavaa.’ — 1 Korintumiut 3:11-13.
Tunngavik
Sooq Paulus taama allassimava? Korinthimiut ilaat kristumiutut pissuseqalersikkiartuaalersimagaluarpai, ajornartorsiuteqalersimappulli. Taakku soorunami nammineq qitornarinngilai. Aap, allaffigisai tassaapput oqaluussinerata kingunerisaanik kristumiunngorsimasut, anersaakkullu meeqqamisut isigisai. Taakkununnga oqaasii ullumikkut angajoqqaanuttaaq naleqartorujussuupput. — 1 Korintumiut 4:15.
Siusinnerulaartukkut Paulus Korinthimiissmavoq, taavanilu ilagiinnik kristumiunik pilersitsisimalluni. Oqaluussineranut ajunngitsumik qisuariartut inuttut pissutsimikkut annertuumik allannguisimapput. Ilaat kanngunartuliortartuusimagaluarput, tillittartuusimagaluarlutik, guutipilussiortuusimagaluarlutik imerajuttuusimagaluarlutillu. (1 Korintumiut 6:9-11) Paulusili qajannaatsumik tunngaviliisimammat kristumiutut eqqarsariartaaseqalerlutillu periaaseqalersimapput. Suna tunngaviliussimagamiuk? ’Alla tunngaviliunneqarsinnaanngilaq kisianni tunngaviliuteriigaq taanna, tassa Jesus Kristus.’ — 1 Korintumiut 3:11.
Korinthimi uppertunngorlaat taakku ajoqersortillugit Paulus qanoq ililluni tunngaviliisimava? Ima oqarpoq: ’Uangali tikikkassi, qatanngutikka, Guutip nalunaajaataa ilissinnut oqaatigalugu oqaatsikkulluunniit ilisimassutsikkulluunniit malunnarumallunga pinngilanga, isumaqannginnama suna alla ilissinni ilisimajumallugu kisianni Jesus Kristus taannalu qisummut anniartitsivimmut kikiattugaasoq.’ (1 Korintumiut 2:1, 2 NV; apustilit suliait 18:5) Paulus imminut malunnartinnianngilaq imaluunniit sallusuissut qarsupittumik ilisimaniarpaluttumilluunniit nassuiarniarnagu taamaalillunilu kimikillisarnagu. Aap, Jesus Kristus Guutillu taassumunnga suliassiissutai malunnartinniarpai.
Jesus kristumiut tunngaviliussassaraat pitsaalluinnartoq qajannaalluinnartorlu. Utertitsissummik pilliuteqarsimavoq qilammilu Kunnginngortitatut qanittukkut Harmagedonimi Guutip akerai suujunnaarsissallugit. Taava ukiuni tuusintini naalakkersuisuuffissamini Guutip naapertuilluassusia atuutitissavaa, Guutillu palasiunerutitaatut inuiaat naammalluinnartunngortikkiartuaartissallugit. Allamik pitsaanerusumik tunngaviliussassaqarnerpa?
Qitornatsinni kristumiutut pissutsit ineriartortinniarneranni Paulus ilaartariaqarparput, paasissutissanillu inuunermut pisariaqartunik pingaartitsilernissaat qulakkeerniarlugu. Meeqqat mikisunnguuneranniilli Jesusip uagutsinnut iliuusii iliuuserisimasaalu pillugit taassuminnga asannilernissaannik ilinniartittariaqarpavut. — 1 Pîtruse 1:8.
Sananermi atortut
Tunngavik atalluarsinnaasoq tamanna Paulusip tunngaviliussimavaa, illoqarfimmilli aallarmat „sananeq“ unittuupajaarsimavoq. (1 Korintumiut 3:10) Ullumikkuttaaq angajoqqaarpassuit taamatupajaaq misigisaqartarput. Meeqqatik kristumiut upperisaanni perorsartarpaat misigisarlutillu sallusuissut paasisimagaat. Meeqqalli ilaasa utoqqaaneruleraangamik sallusuissut qimakkiartortarpaat imaluunniit upperisaq ajattortarlugu. Sooq taama pisoqartarpa? Atortut angajoqqaat ’sananerminni’ atorsimasaat pissutaagajupput.
Paulus oqarsimavoq inuttut pissuseq atortussanik akisuunik soorlu kuultimik, siilvimik ujaqqanilluunniit akisuunik sananeqarsinnaasoq, imaluunniit atortussat akikitsut soorlu qisuk, ivikkat karriiarnikullu atorneqarsinnaasut. (1 Korintumiut 3:12) Sanasoq kuulti, siilvi imaluunniit ujaqqat akisuut atorlugit sanaguni kusanaqisumik naleqaqisumillu sanasimassaaq. Akerlianilli qisuk, ivikkat karriiarnikullu atorlugit sanaguni sanaava ataavartussaananilu akikitsuussaaq.
Anersaakkut atortussat qajannartut Korinthimi atorneqarsimannguatsiarput. Apustili Paulusip tunngaviligaanik nangitsisut atortussat akikitsut atorsimavaat, sanaavilu qajannarlutillu aserujasuupput. Kristumiut Korinthimiittut taakkua inunnik qummut isiginnilersimapput, akornannilu isumaqatigiinnginneqarlunilu sinngaqattaanneqarlunilu akerleriinneqarpoq. (1 Korintumiut 1:10-12; 3:1-4) Tamakku tamaasa qanoq ilillutik pinngitsoortissimasinnaagaluarpaat? Sananermut atortussat qajannaatsut pitsaalluartullu atornerisigut.
Atortussat tamakku tassaapput pissutsit kristumiutut pissusermut ilaasut pingaartut. Suut? Apustili Peterip ataaseq taavaa: ’Uppersusersi misiligaalluartoq kuultimit akisunerungaartoq.’ (1 Pîtruse 1:6, 7) Allat marluk, tassa ilisimassut siuneqassuserlu, Kunngi Salomonip eqqartorpai. Pissutsinik taakkuninnga pigisaqarneq „sølvip pissarsiarinissaanit pingaarneruvoq.“ (Ussatit 3:13-15) Aamma Kunngi Davidip eqqaasippaatigut Jehovamik mianerinninneq taassumalu inassutaanik pingaartitsineq ’kuultimit erlinnarnerusut’. — Tussiaat 19:10, 11.
Meeqqavut misilinneqarnerminni nikallujuissinnaaqqullugit kristumiutut pissuseqalersikkiartorniarneranni tamakku atortussallu akisuut allat atorsinnaavavut. Qanorli ililluta qulakkeersinnaavarput atortussat pitsaasut tamakku atornerlugit? Ilinniartitsinerput meeqqat uummataannut, minnerunngitsumillu uagut nammineq uummatitsinnut, anngussimanersoq misilittartarneratigut.
Sanaaq iluatsittoq
Sananermi tamatumani ataataasup anaanaasulluunniit uummataata pingaaruteqassusiat erserpoq Jehovap Israelitoqqami angajoqqaanut inassutaatigut: „Oqaatsit taakku peqqussutillu ullumi ilinnut tunniussakka uummammiugiuassavatit.“ Nangipporlu: „Qitornannut nangeqqittuartassavatit.“ (5 Moses 6:6, 7) Tassa arlaannik inunnut allanut pigiliutsitsiniassagutta uagut nammineq pigiliuteqqaarsimasariaqarparput. Oqaatsitsigut iliuutsitsigullu meeqqatta takulluarsinnaasariaqarpaat uagut pissuserput atortussanik eqqortunik sanaajusoq. — Kulorsamiut 3:9, 10.
Taava ilinniartitsinerput meeqqat uummataannut annguttariaqarpoq. Jesusip, inunnik allanik kristumiutut pissuseqalersitsiniaallaqqinnerpaasimasup, assersuutit apeqqutillu atorlugit inuit uummataat angusarsimavai. (Matîuse 17:24-27; Mákorse 13:34) Angajoqqaarpassuit paasisimavaat taamatut ilinniartitseriaatsit assut kinguneqarluartartut. Assersuutit atornerisigut kristumiutut ajoqersuutit ilumoortut meeqqanut minnernut kajungernarsisittarpaat, meeqqallu annerumaat qanorpiaq isumaqarnerat uummammioqarnerallu paasiniarlugu apeqqutit eqqarsaatigilluakkat atortarlugit. — Ussatit 20:5.
Taamani Mosesip israelikkut aalajaannissamik kissaateqalersinniarsarigamigit ima oqarsimavoq: „[Jehovap] peqqussutai ileqqoreqqusaalu ullumi ilissinnut tunniussakka maleruassa[vasi] ajunngitsunik atugaqarsinnaaqqullusi.“ (5 Moses 10:13) Aammattaaq angajoqqaat silatusaassapput meeqqatik Guutip najoqqutassiaanik oqaluttuuttarnerisa saniatigut paasitilluarniassallugit sooq unneqqarikkunik, ileqqussatigut minguikkunik ajunngitsunillu kammalaateqarunik imminnut iluaqutaassasoq.
Aammalu Jesus ima oqarsimavoq: ’Tassaavoq inuuneq naassaanngitsoq: illit ilisaralutit kisivit ilumut Guutiusutit, aallartitallu Jesus Kristus ilisaralugu.’ (Juánase 17:3) Meeqqat siusissukkut namminneq inuttut Jehova ilisarisimaleraangamikku, ajornartorsiutiminnik oqaloqatiginissaa ilikkaraangamikku misigalugulu qanoq ililluni qinnutitik akisarai, taava kristumiutut pissutsit pingaarnerpaartaat pigilersarpaat, tassa nammineq inuttut Pinngortitsisiminnut attaveqalerneq.
Inneq
Korinthimi Paulusip paasisimavaa sanaaq peqqissaanngitsumik suliarigaanni silamiorpaloriataartarnerit, soorlu immikkut upperusiornerit akerleriinnerillu, sorlaqalersartut. Tamanna ulorianartorujussuuvoq, soorlumi nassuiaraa: ’Kinaagaluartup suliaa qanoq innersoq innerup misilissavaa.’ — 1 Korintumiut 3:13.
Inneq taanna suua? Tassaasinnaavoq Satanip kristumiunut misiliuterpassuisa ilaat, soorlu ilagisartakkanit tatineqarneq, ussernartut, pigisalerituneq, malersugaaneq allaallu nalornineq eqqissiveerunnartoq. Misilinneqarnerit tamakku allatut ajornartumik naapitassaapput. ’Kialuunniit immikkut suliaa ersissavoq, ullussap nalunaalliumaarmagu; innermimi saqqummerumaarpoq.’ Taamaattumik angajoqqaat silatuut meeqqatik pissutsimikkut ineriartortinniassavaat misilinneqarnernik naapitaqartarnissaat naatsorsuutigalugu. Angajoqqaalli isumalluarput qitornatik misilinneqarnerminni Jehovap ikiuineratigut aalajaattuarumaartut. Angajoqqaat taama isumallit pilluaqquneqangaarumaarput.
Imminut akilersinnaavoq
Paulus ima oqarsimavoq: ’Kialuunniit suliaa tassunga qarmagaa atappat taanna akissarsissavoq.’ (1 Korintumiut 3:14) Apustili Paulus akissarsisimavoq. Kristumiut illoqarfimmi, aammattaaq suliffigisimasamini, Thessalonikamiittut ima allaffigisimavai: ’Kinamiuna neriuutissarput tipaatsuutissarpulluunniit niaqorutissarpulluunniit usornaatissaq? Ilississaaq taamaannginnerpisi Naalakkatta Jesus Kristusip saani tikiuffissaani? Ilissimi ataqqinaatigalusilu tipaatsuutigaassi.’ — 1 Tásalûníkamiut 2:19, 20.
Wandap anaanaata akissarsiaq taama ittoq nuannaarutigisinnaasimavaa. Wanda 12-inik ukiulik anaanani qimallugu nuutsitaagami unnuat tamaasa sinimmini qiasarsimavoq. Eqqaalerpaali anaanami siunnersuutaa, ajornartorsiutiminik Jehovamut saqqummiussisarnissaminik. Taamaattumik Jehovamut qinuvoq, erniinnarlu isumassarseriataarpoq oqarasuaatillit allattorsimaffiat misissorniarlugu, paasiniarlugu qanittumi Jehovap nalunaajaasuinik najugaqartoqarnersoq. Attaveqarfigisaminit paasitinneqarpoq ungasinngisaanni ilaqutariit najugaqartut. „Ila nuannaatsakkama!“ Wanda oqarpoq.
Ilaqutariinnit taakkunannga kajumissaarneqarluni tapersersorneqarlunilu Wandap isumagaa aqqalumi nukkamilu kristumiutut suliniutinut peqataasaleqqinnissaat. „Ataatsimiigiarnissatinnut piareersartarnissara akisussaaffigaara,“ oqarpoq. „Atisavut errortariaqartarpakka aammalu nujappittuunnginnissarput, ipiitsuunissarput takujuminartuunissarpullu isumagisarlugu.“ Tamanna niviarsiaqqamut taassumunnga suleruloornartuuvoq, naammassisassanili naammassisarpai. Ilaanni ataataata ataatsigiiartarunnaarsinniaraluarpai, meeqqalli kimigiiserfigiinnarmanni akueriinnarlugit.
Kingorna meeqqat anaanaminnut nooqqipput. Wanda 15-inik ukioqarluni kristumiutut kuisippoq, ajoqersuiartortitatullu kiffartulernissani maanna anguniagaraa. Aap, Wandap anaanaata suliaa misilinneqarami aniguivoq. Nuannaarutigeqaalu takusinnaagamiuk panini nammineq inuttut sallusuissummi aalajaalluinnartoq. Aap, qanortoq angajoqqaat tamarmik meeqqaminnik taamatut pissuseqalersitsiaanerminni iluatsitsilluarilit. (wD 1/7 91)
[Qupp. 27-mi ungalusaq]
Soorlu ilanngutassiami ersertoq angajoqqaat meeqqaminnik kristumiutut pissuseqalersitsiniaallutik ilungersorput, tamannali ima paasisariaqanngilaq meeqqat namminneq akisussaaffeqanngitsut. Kristumiut allat tamaasa assigalugit namminneq inuttut suliniartariaqarput. (Evfisumiut 4:22-24) Angajoqqaat tamatumani ikiuunnissaminnut periarfissaqaqaat, inulli nammineq aalajangiisussaviuvoq Jehova kiffartuukkumanerlugu kiffartuukkumannginnerluguluunniit.