Illit suliat innermi ataannassava?

’Kinaagaluartoq qanoq ittumik [tunngavimmut] qarmaasimanerluni sianiginiarli.’ — 1 KORINTUMIUT 3:10.

1. Kristumiut aalajaatsut ajoqersuganngortussat eqqarsaatigalugit suna neriuutigaat?

A APPARIIT kristumiut inoorlaajutertik isiginnaarpaat. Guutip naalagaaffianik oqaluussisartup Biibilimik atuaqqissaaqatimi kinaata isikkuani takusinnaavaa ilumoorluni soqutiginnittoq. Kristumiup utoqqaanertap oqaluttarfimmit ilinniartitsilluni malugaa najuuttut akornanni soqutiginnilerlaaq Biibiliutimini allassimaffinnik noqqaalluni qupperaarsuataartoq. Jehovamik kiffaasut aalajaatsut taakkua uummataat neriunnermik ulikkaarput. Ima eqqarsarput: ’Inuup taassuma Jehova asalerlugulu kiffartorfigilerumaarnerpaa — aalajaattuarlunilu?’ Tamanna soorunami nammineerluni pinavianngilaq. Sulissutigineqartariaqarpoq.

2. Apustili Paulusip qanoq ililluni hebriiarit kristumiuusut ajoqersuisarnerata pingaaruteqassusianik eqqaasippai, tamatumalu qanoq imminut misissornissatsinnut kajumissaarsinnaavaatigut?

² Apustili Paulusip nammineq ajoqersuillaqqissup ilinniartitsinerup ajoqersuganngortitsinerullu pingaaruteqassusiat erseqqissarpaa ima allalluni: ’Qangalimi ajoqersuisunngorunnarsissagaluarpusi.’ (Eprîarit 5:12) Kristumiut allaffigisai sivisuumik uppertuusimagaluarlutik siumukarpallaarsimanngillat. Suli allanut ajoqersuinissaminnut piukkunnarsisimanngillat, sallusuissutillu tunngaviunerusortaanik eqqaasinneqartariaqarlutik. Ullumikkut tamatta akuttunngitsumik ajoqersuisutut piginnaassuserput eqqarsaatigeqqissaartariaqarparput paasiniarlugu sutigut siumukarsinnaanerluta. Inuuneq pineqarpoq — uatsinnut allanullu. Qanoq iliorsinnaavugut?

3. (a) Apustili Paulusip ajoqersuganngortitsiniarneq sumut assersuuppaa? (b) Kristumiutut ’illuliortutut’ qanoq annertuumik pisinnaatitaaffeqarpugut?

³ Paulusip ajoqersuganngortitsineq illuliornermut assersuuppaa. Ima aallarniivoq: ’Uagummi Guutip suleqatigaatigut; ilissi tassa Guutip naatsiivia, Guutip illuliaa.’ (1 Korintumiut 3:9) Tassa inunnut tunngatillugit ’illuliaanut’ peqataavugut; inuit Kristusip ajoqersugaatut ineriartornissaannut ikiortarpavut. Taamaalilluta ’tamanik Piarersaasoq’ suleqatigaarput. (Eprîarit 3:4) Ila, immikkut pisinnaatitaaffiummat! Misissoriartigu qanoq ililluta Paulusip Korinthimiunut unnersuussutai isumassarsiarititaasut ikiortigalugit sulinermut tamatumunnga pikkorinnerulersinnaasugut. Ingammik ’ajoqersuiniarnerput’ misissussavarput. — 2 Timûtiuse 4:2.

Eqqortumik tunngaviliorneq

4. (a) Paulus qanoq ililluni kristumiutut ’illuliornermut’ peqataasarsimava? (b) Sooq oqartoqarsinnaava Jesusip ajoqersugaasalu tunngaviliornerup pingaaruteqassusia nalunngilluaraat?

⁴ Illu aalajaatsuussaguni atassagunilu tunngaveqarluartariaqarpoq. Taamaattumik Paulus nangilluni allassimavoq: ’Guutip saammaannera uannut tunniussaq missiliorlugu illuliortutut ilisimasutut tunngaviliivunga.’ (1 Korintumiut 3:10) Jesus assingusumik assersuusiorsimavoq illu illuliortoq tunngaviliorluarsimammat anorersuarmi uppinngitsoq pillugu. (Lúkarse 6:47-49) Jesusip tunngaviliornerup pingaaruteqassusia nalunngilluarpaa. Jehovammi nunarsuaq tunngavilermagu najuussimavoq.a (Ussatit 8:29-31) Jesusip tusarnaartaasattaaq tunngaviit pitsaasut naleqarnerat nalunngilaat. Palæstinami ilaannikkut qarsutsinersuit nunallu sajuttarneri pisarmata illut tunngaveqarluartut kisimik atasinnaasarput. Tunngavilli qanoq ittoq Paulusip eqqarsaatigaa?

5. Kina kristumiut ilagiissaannut tunngaviua, tamannalu qanoq ililluni siulittuutigineqarsimava?

⁵ Paulus allassimavoq: ’Allami tunngaviliunneqarsinnaanngilaq kisianni tunngaviliuteriigaq taanna, tassa Jesus Kristus.’ (1 Korintumiut 3:11) Jesus aamma tamatuma siorna tunngavimmut assersuunneqarsimavoq. Aap, Jesaja 28:16-imi ima siulittuuteqarpoq: „Taamaattumik ima oqarpoq Guuti [Jehovaasoq]: ’Ujarak misiligaasoq tunngaviliuppara Sionimi, ujarak inaarutaasoq, erlinnartoq.’“ Jehovap qangarsuarli siunertarisimavaa ernini kristumiut ilagiissaannut tunngaviussasoq. — Tussiaat 118:22; Evfisumiut 2:19-22; 1 Pîtruse 2:4-6.

6. Paulus qanoq ililluni kristumiuni Korinthimiittuni eqqortumik tunngaviliisimava?

⁶ Kristumiut inuttut ataasiakkaatut sumik tunngaveqarpat? Paulusip oqarneratut kristumiu ilumoortoq allamik tunngaveqarsinnaanngilaq kisianni Guutip oqaasiani tikkuarneqartumik — Jesus Kristusimik. Paulus ilumut taassuminnga tunngaviliisarsimavoq. Korinthimi, isumaliutersuutinik pingaartitsiffiusumi, silap piisigut ilisimassutsiminik inunnut kakkagitikkumanngilaq. Akerlianik Paulusip ’Kristus [nappakkamut, NV] kikiattugaq’, inuiaqatigiit ’sianiitsorpallassorisaat’ oqaluussissutigisimavaa. (1 Korintumiut 1:23) Paulusip ajoqersuutigisimavaa Jesus Jehovap siunertaani qitiusoq. — 2 Korintumiut 1:20; Kulorsamiut 2:2, 3.

7. Qanoq ilinniutigisinnaavarput Paulus tassaanerarmat ’illuliortoq ilisimasoq’?

⁷ Paulusip eqqaavaa ’illuliortutut ilisimasutut’ taamaaliorsimalluni. Taama oqarami usorsitsaanngilaq. Akueriinnarpaa Jehovamit nuannersumik tunineqarsimalluni — sulianik aaqqissuilluarsinnaanermik. (1 Korintumiut 12:28) Ullumikkut kristumiutut ukiuni hundredelinni siullerni inuusutut tupinnartuliornikkut piginnaassutsinik tunineqanngikkaluarpugut. Immaqalu ajoqersuillaqqissutsimik tunineqartutut misiginngikkaluarpugut. Kisianni ajoqersuisinnaanermik tunineqarpugut. Imaappoq: Jehovap ikiuinissatsinnut anersaaminik illernartumik tunisarpaatigut. (Naleqqiuguk Lúkarse 12:11, 12.) Jehova asavarput oqaasianilu ajoqersuutigineqartut tunngaviunerusut pillugit ilisimasaqarluta. Tamakku tassaapput tunissutit nuannersut allat ajoqersorneqarnissaannut atorneqartussat. Tamakku atorlugit tunngaviliinissarput aalajangiunniartigu.

8. Qanoq ililluta ajoqersuganngortussanut Kristusimik tunngaviliisinnaavugut?

⁸ Kristus tunngaviliukkaangatsigu inoorlaatut susinnaanngitsutut nersutaatit nerrivianniittutut, imaluunniit Guutip ataasiullunilu pingasuusup ilaatut Jehovap naligisaatut, saqqummiunneq ajorparput. Aap, takorluukkat Biibilimut naapertuutinngitsut tamakku eqqunngitsumik kristumiuussutsimut tunngaviupput. Akerlianik ajoqersuutigaarput Jesus tassaasoq inuit inuusimasut pingaarnerpaartaat, taassumalu inuunini naammalluinnartoq uagut pilluta pilliutigisimagaa, maannakkullu Jehovap kunnginngortitaatut qilammi naalakkersuisoq. (Rûmamiut 5:8; sarĸúmersitat 11:15) Aamma ilinniartitavut kajumissaarniartarpavut Jesus tumisioqqullugu taassumalu pissusii pissusereqqullugit. (1 Pîtruse 2:21) Taakkua Jesusip kiffartornermik ilungersuussisimaneranit, inunnut nikallungasunut qunutitanullu misiginneqataasimaneranit, ajortuliortunut peqqissimingaartunut nallittuisimaneranit aammalu misilinneqarnermini aalajaatsumik qunusuissimaneranit killinneqarnissaat kissaatigaarput. Aap, Jesus tassaavoq tunngavik pitsaalluinnartoq. Tamatumali kingorna suna pisariaqarpa?

Illuliornermi atortussat eqqortut

9. Naak pingaartumik tunngaviliisuugaluarluni Paulusip qanoq sallusuissummik oqaluussissutigisaminik ilassinnittut isumagisarpai?

⁹ Paulus ima allassimavoq: ’Tunngavimmulli taassumunnga kuultimilluunniit siilvimilluunniit ujaqqanilluunniit erlinnartunik qisummilluunniit ivikkanilluunniit karriiarnikunilluunniit qaarmaasoqarpat taava kialuunniit immikkut suliaa ersissavoq, ullussap nalunaalliumaarmagu; innermimi saqqummerumaarpoq, kinaagaluartullu suliaa qanoq innersoq innerup misilissavaa.’ (1 Korintumiut 3:12, 13) Paulus qanoq isumaqarpa? Oqaasiisa tunuliaqutai eqqarsaatigikkit. Paulus pingaartumik tunngaviliisuuvoq. Ajoqersuiartortitaalluni angalanermini illoqarfimmit illoqarfimmut angalasarpoq inuppassuit Kristusimik tusarsimanngisaannartut oqaluussiffigalugit. (Rûmamiut 15:20) Inuit sallusuissut oqaluussissutigisaa ilassigaangassuk ilagiit pilersinneqartarput. Paulusip uppertunngortut taakku isumagingaarsimavai. (2 Korintumiut 11:28, 29) Kisianni ingerlaqqittariaqartarpoq. Taamaattumik qaammatini 18-ini Korinthimi tunngavileereerami aallarpoq illoqarfinni allani oqaluussiartorniarluni. Taamaattoq allat suliarisimasani nangikkaangassuk tamanna soqutigingaartarpaa. — apustilit suliait 18:8-11; 1 Korintumiut 3:6.

10, 11. (a) Paulusip illuliornermut atortussat assigiinngitsut imminnut qanoq illua-tungiliuppai? (b) Korinthitoqqami qularnanngitsumik qanoq ittunik assigiinngitsunik illoqarsimava? (c) Illut qanoq ittut ikuallannermi atanerusinnaappat, oqaluussisartullu kristumiut assersuut tamanna qanoq ilinniutigisinnaavaat?

¹⁰ Paulusip Korinthimi tunngavileriigaanik nangeqqiisut ilaat sulilluarsimagunanngillat. Ajornartorsiut tamanna ersersinniarlugu Paulusip illuliornermut atortussat assigiinngitsut imminnut akerliusut eqqaavai: siullermik kuulti, siilvi ujaqqallu erlinnartut taavalu qisuk, ivikkat karriiarnikullu. Atortussat pitsaasut, ataavartut ikuallajanngitsullu atorlugit illuliortoqarsinnaavoq; imaluunniit atortussat ajortut qajannartut ikuallajasullu atorlugit illuliorasuartoqarsinnaavoq. Illoqarfissuarmi Korinthitut ittumi qularnanngitsumik qajannaatsumik qajannartumillu illoqarpoq. Naalaffissuaqarpoq ujaqqanik angisuunik akisuunillu sananeqarsimasunik, immaqa ilaatigut kuultimik siilvimillu qallersorneqarsimasunik.b Qularnanngitsumik illorsuit taamaattut illuikkat, illupalaannguit niuerfinnguillu qisunnik sananeqarsimasut ivikkanillu qallersorsimasut eqqaani ataqqinarpaloqalutik napapput.

¹¹ Ikuallattoqarpat illut taamaattut qanoq pissappat? Akissut ullumikkut Paulusip nalaanisulli nalunanngitsigaaq. Illoqarfik Korinth ukiumi 146-mi u.n.s. Romamiut sakkutuisa naalagaannit Lucius Mummiusimit ajugaaffigineqarlunilu ikuallanneqarsimavoq. Illorpassuit qisunnik, ivikkanik karriiarnikunillu sanaat ikuallallutik nungutinneqarluinnarsimassapput. Illorsuilli ujaqqanik sanaat kuultimik siilvimillu pinnersarneqartut? Qularnanngitsumik ataannarsimapput. Paulusimit ajoqersorneqarsimasut immaqa ullut tamaasa illorsuit tamakku — ajunaarnersuarni illut allat qajannarnerusut nungutitaasimaffiini aniguisimasut — saneqquttarpaat. Taamaalilluni Paulusip pingaartitani erseqqissarluinnarpaa! Uagut ilinniartitsigaangatta immitsinnut illuliortutut misigisariaqarpugut. Sapinngisamik atortussat pitsaanerpaat qajannaannerpaallu atorusuppavut. Taamaaliorutta sulinerput ataannassaaq. Atortussat qajannaatsut tamakku suuppat, sunalu pillugu tamakkua atornissaat taama pingaaruteqartigaa?

Suliat innermi ataannassava?

12. Kristumiut Korinthimiittut ilaat qanoq ilillutik peqqissaanngitsumik ’sanasarsimappat’?

¹² Ersarippoq Paulus isumaqartoq kristumiut Korinthimiittut ilaat peqqissaanngitsumik ’sanasartut’. Suna ajoqutaava? Soorlu allassimaffiit ataqatigissaanni takuneqarsinnaasoq ilagiinni avissaartuunneqarpoq, inuit aalajangersimasut qummut isiorineqartarput naak tamanna ilagiit ataasiussusiannut navianartuugaluartoq. Ilaat oqartarput: ’Uanga Paulusikkut ilagaannga’, allallu oqartarlutik: ’Uanga Apollosikkut ilagaannga’. Ilaasa ersarissumik namminneq ilisimassusertik pingaartippallaartarpaat. Taamaattumik tupinnanngitsumik ilagiinni eqqarsariaaseq uinimmut atasoq inersimalluannginnerlu atuupput, aamma ilagiinnittut ’annerussillutillu saqitsaattarput’. (1 Korintumiut 1:12; 3:1-4, 18) Isummat tamakku soorunami ilagiit ajoqersuisarneranni oqaluussinerannilu malunnartuusimapput. Tamatuma peqqissaanngitsumik ajoqersuganngortitsisarneq kinguneraa, atortussanik pitsaanngitsunik illuliornartut ittoq. Sulinerat ’innermi’ atasinnaanavianngilaq. Inneq suna Paulusip pivaa?

13. Paulusip assersuusiaani inneq sumut assersuutaava, kristumiullu tamarmik suna paasisariaqarpaat?

¹³ Tamatta inuunitsinni ’inneq’ aalajangersimasoq naammattuussavarput — uppernikkut misilinneqarnerit. (Juánase 15:20; Jâko 1:2, 3) Kristumiut Korinthimiittut nalunngittariaqarpaat, uaguttaarlu ullumikkut nalunngittariaqarparput, sallusuissummik ilinniartitavut tamarmik pinngitsooratik misilinneqarumaartut. Qarsupittumik ajoqersuisarutta alianartumik kinguneqarsinnaavoq. Paulus ima mianersoqqusivoq: ’Kialuunniit suliaa . . . qarmagaa atappat taanna akissarsissavoq; kiali suliaa innermit nungunneqarpat taanna angiluttorumaarpoq; namminerli annassavoq, kisianni soorlu innikkut.’c — 1 Korintumiut 3:14, 15.

14. (a) Kristumiut ajoqersuganngortitsinerminni qanoq ’annaasaqarsinnaappat’ aammali qanoq ilillutik ’annassinnaappat, soorlu innikkut’? (b) Qanoq ililluta annaasaqarsinnaanissap ilimanaataa millisissinnaavarput?

¹⁴ Oqaatsit tamakku eqqarsarianaqaat! Alla ajoqersuganngornissaanik tamaviaarluni ikioreerlugu ussernartumut imaluunniit malersorneqarnerminut nakkaannartoq naggataatigullu sallusuissutip aqqutaanit qimaguttoq takullugu annernartaqaaq. Paulusip tamanna akueraa oqarami pissutsini tamakkunani annaasaqarnartartoq. Misigisat taamaattut ima annernartigisinnaammata allassimavoq ’soorlu innikkut’ annassasugut — soorlu angut innermi pigisaminik tamanik annaasaqartoq namminerlu anigueqqarluni. Qanoq ililluta annaasaqarsinnaanissap ilimanaataa millisissinnaavarput? Atortussat anersaakkut ittut qajannaatsut atortariaqarpavut. Ajoqersuinitsinni ilinniartitatta uummataat angugutsigik, kristumiut pissuserisaannik, soorlu ilisimassutsimik, immikkoortitsisinnaanermik, Jehovamik miannerinninnermik, piviusumillu uppernermik, pingaartitsinissaannut ikiorlugit, taava ’illuliussaagut’ atortussat ikuallajanngitsut qajannaatsullu atorlugit. (Tussiaat 19:10, 11; Ussatit 3:13-15; 1 Pîtruse 1:6, 7) Inuit pissutsinik taamaattunik pigiliussisut Guutip piumasaatut iliortuaannassapput; taakku naassaanngitsumik inuunissaminnik qularnaatsumik neriuuteqassapput. (1 Juánase 2:17) Qanorli ililluta Paulusip assersuusiaa ulluinnarni atorsinnaavarput? Assersuutit ilaat eqqarsaatigeriakkit.

15. Qanoq ililluta qulakkeersinnaavarput soqutiginnittunik ilinniartitsinitsinni ’illuliortutut’ peqqissaannginnata?

¹⁵ Biibilimik ajoqersuigaangatta inuit Jehovamit pingaartinnerunngisaannassavavut. Siunertarinngilarput ilinniartitatta uagut ilisimassutsip pilerfiatut isigissagaatigut. Jehovamut, oqaasianut peqatigiissortaanullu siunersiueqqujumavavut. Taamaattumik aperineqaraangatta nammineq isumarput kisiat oqaatigisassanngilarput. Akerlianik, namminneq akissutinik ujarlernissaannik ajoqersortarpavut, Biibili naqitikkallu ’kiffap ilumoorlunilu silatuup’ pilersitai atorlugit. (Matîuse 24:45-47) Tamannalu pissutigalugu Biibilimik ilinniartitavut kisermaakkumanngilavut. Allat taakku soqutigileraangatigik nangaanata ilinniartitavut kajumissaartariaqarpavut uummatikkut ’neruttoqqullugit’ ilagiinniittut sapinngisamik amerlasuut ilisarileqqullugillu pingaarteqqullugit. — 2 Korintumiut 6:12, 13.

16. Utoqqaanertat qanoq ilillutik atortussat ikuallajanngitsut atorsinnaavaat?

¹⁶ Kristumiut utoqqaanertat aamma ajoqersukkanik ’illuliornermut’ immikkut pingaaruteqartarput. Ilagiit ajoqersoraangamikkik atortussat ikuallajanngitsut atorniartarpaat. Ilinniartitsisinnaaneq, misilittagaqarneq inuttullu pissuserisat eqqarsaatigalugit utoqqaanertat assigiinneq ajorput, assigiinngissutsilli tamakku iluaqutigalugit allanik malitsilersorniarneq ajorput. (Naleqqiuguk apustilit suliait 20:29, 30.) Naluarput sunarpiaq pissutigalugu Korinthimiittut ilaat oqartut ’uanga Paulusikkut ilagaannga’, imaluunniit ’uanga Apollosikkut ilagaannga’. Qularisariaqanngilarpulli utoqqaanertat aalajaatsut taakkua eqqarsariaaseq avissaartuussutaasoq tamanna siuartikkumanngikkaat. Paulusip isummat taamaattut usorsisimaassutiginngilai; ilungersortumilli assortorpai. (1 Korintumiut 3:5-7) Ullumikkuttaaq utoqqaanertat eqqaamajuarpaat ’Guutip savaataanut’ paarsisuullutik. (1 Pîtruse 5:2) Inuup kialuunniit savaatiginngilai. Taamaattumik utoqqaanertat aalajaallutik inuup ataatsip ilagiinnut utoqqaanertaqatigiinnulluunniit naalagaaniarnissaa assortussavaat. Utoqqaanertat maniguullutik ilagiinnut kiffartorusukkunik, inuit uummataat killittarunikkik ilagiinniittullu tarnikkut iluunngarlutik Jehovamik kiffartornissaannut ikiortarunikkik, atortussat ikuallajanngitsut atorlugit illuliortarput.

17. Angajoqqaat kristumiut qanoq ilillutik atortussat ikuallajanngitsut atorlugit ’illuliorniartarpat’?

¹⁷ Angajoqqaat kristumiuusut aamma tamanna ilumooruttarpaat. Kissaatigeqaat qitornatik naassaanngitsumik inuussasut! Taamaattumik Guutip oqaasiani najoqqutassiat meeqqaminnut ’nangeqqittuartarpaat’ uummammiuliunniassammatigik. (5 Moses 6:6, 7) Meeqqatik inatsisinik paasissutissanillu piinnarnatik, kisianni sallusuissummik, inooriaatsimik iluaqutaasumik pilluarnartumillu, ilisarsitikkusuppaat. (1 Timûtiuse 1:11) Meeqqatik Kristusimut aalajaallutik ajoqersuganngornissaannut ineriartortinniarlugit, angajoqqaat asannittut atortussat ikuallajanngitsut atorniarsaraat. Naammagittarlutik meeqqatik ajoqersortarpaat, ikiortarlugillu pissutsit Jehovap uumigisai nigorteqqullugit pissutsillu Jehovap nuannarisai ineriartorteqqullugit. — Galâsiamiut 5:22, 23.

Kikkut akisussaaffeqarpat?

18. Ilinniartup ajoqersuut peqqinnartoq taamaatippagu sooq ajoqersuisoq pisuussuteqartariaqanngila?

¹⁸ Maanna pingaartumik apeqquteqalerpoq. Inuk ikiorniagarput sallusuissummit qimaguppat tamanna isumaqarnerpa ilinniartitsisutut iluatsinngitsugut atortussanik qajannartunik sanasimalluta? Taamaattariaqanngilaq. Paulusip oqaasiisa eqqaasippaatigut ajoqersuganngortitsinermut peqataaneq akisussaaffiusoq annertooq. Sapinngisamik pitsaasumik ’illuliorusuppugut’. Guutilli oqaasiani peqquneqanngilagut akisussaaffik tamaat nammineq naammassagipput taamaalillutalu ilerasuuteqangaartutut misigissalluta ikiorniakkatta sallusuissut qimappassuk. Nammineq ’illuliortutut’ akisussaaffitta saniatigut aamma allanik pingaaruteqartoqarpoq. Assersuutigalugu, malugiuk ilinniartitsisoq ’illuliornermini’ iluatsissimanngitsoq pillugu Paulus allassimammat: ’Taanna angiluttorumaarpoq; namminerli annassavoq.’ (1 Korintumiut 3:15) Ilinniartitsisoq taanna naggataatigut annassappat — naak kristumiutut pissutsit ilinniartitamini ineriartortinniarsarisimasai misilineqarnikkut ikuallallutik nungussimagaluartut — taava qanoq isummertariaqarpugut? Ilinniartoq nammineq aalajaassanerluni aalajaassannginnerluniluunniit Jehovap akisussaaffeqartippaa.

19. Suna allaaserisami tulliuttumi sammineqassava?

¹⁹ Inuttut nammineerluni akisussaaffeqarneq immikkut pingaaruteqarpoq. Tamatsinnut pingaruteqarpoq. Biibilimi tamanna pillugu suna ajoqersuutigineqarpa? Allaaserisami tulliuttumi tamanna misissussavarput. (wE 1/11 98)

[Quppernerup ataani ilanngussat]

Qanoq akissavigit?

□ Kristumiu ilumoortoq sumut ’tunngavilerneqassava’, qanorlu ililluni?

□ Illuliornermut atortussat assigiinngitsut taaneqartut qanoq ilinniutigisinnaavavut?

□ ’Inneq’ sumut assersuutaava, ilaallu qanoq ilillutik tassuuna ’annaasaqarsinnaappat’?

□ Oqaluussisartut Biibilimik atuaqqissaaqatigiissitsisartut, utoqqaanertat angajoqqaallu qanoq ilillutik atortussanik ikuallajanngitsunik ’illuliorsinnaappat’?

[Qupp. 9-mi assiliartaq]

Itsaq illoqarfinni amerlasuuni illut qajannaatsut ujaqqanik sananeqartut innikkut atasinnaasut illut qajannartut ikuallajasut saninnguaniittarput