Nuannaarlutik tunisisartut Jehovap asavai
’Nungullutik uummatimik pilersaarutigisaannik tunisigilit uumitsannatik ajornartoortitaanatillu, kajumittumik tunisisoq Guutip asammagu.’ — 2 KORINTUMIUT 9:7.
1. Guutip Kristusillu nuannaarlutik tunisiumatussusertik qanoq ilillutik ersersissimavaat?
JEHOVA siullersaalluni nuannaarluni Tunisisuuvoq. Nuannaarutigisinnaasimavaa ernituani inuunermik tunisinnaasimagamiuk, kingornalu inngilinik inunnillu pinngortitsinermini ikiortigalugu. (Ussatit 8:30, 31; Kulorsamiut 1:13-17) Guutip inuunermik, inuussummik allanillu tamanik, tunivaatigut ilaatigut qilammit sialummik piffissanillu inerititaqarnartunik, uummativullu nuannaarnermik immerlugit. (apustilit suliait 14:17; 17:25) Aap, Jehova Guuti erneralu Jesus Kristus tamarmik nuannaarlutik namminissarsioratillu tunisisarput. Jehovap inuiaat silarsuarmiut ima asatigisimavai ’ernitui tunniullugu kinaluunniit taassumunnga uppertoq tammaqqunagu, naassaanngitsumilli inuussuteqaqqullugu’. Jesusillu nangaanani tarnini ’akissatut tunniussimavaa amerlasuut utertinneqaatissaannik’. — Juánase 3:16; Matîuse 20:28.
2. Paulusip oqaasii naapertorlugit Guutip innuttai tunissuteqaraangamik suna pissutigisariaqarpaat?
2 Taamaattumik Jehova Guutimut Jesus Kristusimullu kiffartortut tamarmik nuannaarlutik tunisisartuusariaqarput. Taamatununa tunisiumatussuseq apustili Paulusip Korinthimiunut allakkami aappaani, ukiup 55-ip u.n.k. missaani allassimasamini, kajumissaarutigigaa. Qularnanngitsumik kajuminnermit tunissutit Jerusalemimi Judeamilu kristumiut annikilliortitaasut ikiorniarlugit tunissutigineqarsimasut innersuussutigalugit Paulus ima oqarpoq: ’Nungullutik uummatimik pilersaarutigisaannik tunisigilit uumitsannatik ajornartoortitaanatillu, kajumittumik tunisisoq Guutip asammagu.’ (2 Korintumiut 9:7; Rûmamiut 15:26; 1 Korintumiut 16:1, 2; Galâsiamiut 2:10) Tunisiumatussutsimik ersersitsinissamut periarfissaqaleraangat Guutip innuttai qanoq qisuariartarsimappat? Paulusillu tamatumunnga atatillugu unnersuussutaa qanoq ilinniarfigisinnaavarput?
Uummammit kajumittumit killinneqartut
3. Illernartuutiliornermut atatillugu Israelikkut Jehovamik pallorfiginninneq qanoq annertutigisumik tapersersorsimavaat?
3 Guutip innuttaanut ilaasut uummammit kajumittumit killinneqarlutik imminnik pigisaminnillu Guutip siunertaanut naapertuuttunut siuarsaatissamik tunisiumasarput. Assersuutigalugu, Mosesip nalaani Israelikkut illernartuutiliornermut ikiuunnermikkut Jehovamik pallorfiginninnermik siuarsaasinnaanertik nuannaarutigisimavaat. Arnat ilaat uummatiminnit kajumissisinneqarlutik savaasat meqquinik qissisimapput, angutit sananermut ikiuuttut. Kuultimik, siilvimik, qisunnik, annoraaminernik atortussanillu allanik nuannaarlutik inuit kajumissutsimit ’Jehovamut tunissuteqarsimapput’. (2 Moses 35:4-35) Ima tunisiumatussuseqartigisimapput atortussat ’suliarisassanut tamanut naammassimallutik, allaammi sinneqarsimallutik’. — 2 Moses 36:4-7.
4. David allallu qanoq pissuseqarlutik naalaffimmut tunissuteqarsimappat?
4 Ukiut arlalinnik hundredellit tamatuma kingorna kunngi David ernermi Salomonip Jehovamut naalaffiliassaanut annertuumik tunissuteqarpoq. Davidip ’Guutiminut illuliassaq pingaartittorujussuuaa’ taamaattumillu ’atortussat nammineq pigisani’, guulti siilvilu, saniatigut tunissutigalugit. Naalakkat, qullersaasut allallu ’uummatimikkut kajumillutik Jehovamut tunissuteqarput’. Tamanna qanoq kinguneqarpa? „Siulersuisut tunisinissaminnut kajumissusiat inuit nuannaarutigaat, tassami [Jehovamut] tunissutitik uummatimikkut kajumillutik tunniummatigit.“ (1 Israelikkut 29:3-9) Tunisiumatussutsimik ersersitsisinnaanertik nuannaarutigaat!
5. Ukiut ingerlaneranni Israelikkut qanoq ilillutik pallorfiginninnermik ilumoortumik tapersersuisimappat?
5 Israelikkut ukiuni hundredelinni arlaqartuni siullermik illernartuummut kingornalu naalaffimmut, aammalu palasit Levikkullu tassani kiffartornerannut, tunissuteqarsinnaanermut immikkut pisinnaatitaaffeqarsimapput. Assersuutigalugu, Nehemiasip nalaani juutit aalajangersimapput pallorfiginninnermut ilumoortumut tapersiissutitut tunissuteqartarniarlutik, Guutip illua sumiginnarnaveersaajutigalugu. (Nehemja 10:32-39) Tamatumunnga assingusumik ullumikkut Jehovap nalunaajaasuisa ilinniartitsinermut atortunik pilersitsinernut atatitsinermullu kajuminnermit tunissuteqartarnermikkut pallorfiginninnermik ilumoortumik tapersersuisinnaanertik nuannaarutigaat.
6. Kristumiut siulliit qanoq ilillutik tunisiumatussutsiminnik ersersitsisarsimappat?
6 Kristumiut siulliit tunissuteqarsinnaanertik nuannaarutigisarsimavaat. Assersuutigalugu, Gajus ’ilumoorluni iliuuseqarsimavoq’ Naalagaaffimmut tunngasunik siuarsaaniarlutik angalasunut inoroorsaartarnermigut. Ullumikkuttaaq Jehovap nalunaajaasuisa nakkutilliisut angalasartut Vagttårnets Bibel- og Traktatselskabimit aallartitaasut inoroorsaarfigisarpaat. (3 Juánase 5-8) Taamatut qatanngutit angutit ilagiinnut aallartitaasarnerat inoroorsaarfigineqartarnerallu soorunami aningaasartuutaasarpoq, anersaakkulli pissarsissutaasaqaaq. — Rûmamiut 1:11, 12.
7. Filippimiut pigisatik qanoq atortarsimavaat?
7 Ilagiit tunisiumatussusertik ersersittarsimavaat pigisatillu Naalagaaffiup soqutigisaanut siuarsaatissatut atortarsimallugit. Assersuutigalugu, Paulus uppertunut Filippimiittunut ima allassimavoq: ’Thessalonikamiitillunga allaat ajorsaatigisannik ataasiarnasi pajuttarpassinga. Ima pinngilanga: tunissut piniariga; piniagarali tassa inerititat iluaqutissasi amerlangaaqqullugit.’ (Filípimiut 4:15-17) Filippimiut tunisiumatusimaqaat. Suulli taamatut tunisiumatunissamut kaammattuutaasarpat?
Tunisiumatulersitsisut
8. Sukkut takuneqarsinnaava Guutip innuttai taassuma anersaavanit tunisiumatussutsimut kajumissisinneqartartut?
8 Jehovap anersaavata illernartup imaluunniit nukiata iliuuseqartartup taassuma innuttai nuannaarlutik tuniserusulersittarpai. Kristumiut Judeamiittut annikilliulermata uppeqataat atortussatigut ikiuunnissaminnut Guutip anersaavanit kajumissisinneqarsimapput. Kristumiut Korinthimiittut tamakkununnga atatillugu sapinngisartik naapertorlugu tunisisarnissaannik kajumissaarniarlugit ilagiit Makedoniamiittut maligassiaannik Paulusip innersuussiffigisimavai. Naak uppertut Makedoniamiittut malersugaagaluartik piitsuugaluarlutillu allaat sapinngisartik qaangerlugu tunisisarnermikkut qatanngutinut asanninnermik ersersitsisarsimapput. Tunisiumatussutsimik ersersitsinissamut immikkut pisinnaatitaaffimmut peqataanissartik allaat ilungersorlutik qinnutigisimavaat! (2 Korintumiut 8:1-5) Suliassaq Guutip suliarititaa pigissaartut kisimik tunissutaannit tapersersorneqanngilaq. (Jâko 2:5) Tassami kiffaasa tunniulluinnarsimasut akornanni atortussatigut pigissaannginnerusut Naalagaaffik pillugu oqaluussinermut aningaasalersuinermut annerpaamik tapersersuisimapput. (Matîuse 24:14) Tunisiumatussusertillu pissakilliulissutigineq ajorpaat, Guutimmi innuttani suliami tamatumani pisariaqartitaannik isumassortuarmagit, suliaat anersaani ikiortigalugu siuarsaatigalugu.
9. Tunisiumatussuseq qanoq ililluni uppernermut, ilisimassummut asanninnermullu atassuteqarpa?
9 Tunisiumatussuseq uppernermit, ilisimassusermit asanninnermillu pilerfeqarpoq. Paulus ima allassimavoq: ’Soorlu tamatigut peqangaartusi [Korinthimiut] uppernikkut oqaatsikkullu ilisarsinikkullu piniaqqissaarnikkullu nalinginnakkut uatsinnullu asannissutsissigut, taamattaaq tunissutissanik tamakkuninnga tunisingaarniaritsi. Inatsiniarlunga oqanngilanga, kisianni allat piniaqqissaarneratigut ilississaaq asannissusersi iluameernersoq misilinniarpara.’ (2 Korintumiut 8:7, 8) Naalagaaffimmut tapersiissutitut tunissuteqarniaruni ingammik pigisakitsoq uppissuseqartariaqarpoq Jehova siunissami pisariaqartunik pilersuiumaartoq. Kristumiut ilisimassummik immertissimasut Jehovap siunertaa naapertorlugu kiffartornissartik kissaatigaat, taassuminngalu taassumalu innuttaanik asanningaartut pigisatik taassuma soqutigisaasa siuarsarnissaannut nuannaarlutik atortarpaat.
10. Jesusip maligassiaa qanoq ililluni kristumiut nuannaarlutik tunisisarnissaannik kaammattuiva?
10 Jesusip maligassiaata kristumiut nuannaarlutik tunisinissaannik kaammattortarpai. Paulusip Korinthimiut asanninnermit tunisisarnissaannik kajumissaareeramigit ima allappoq: ’Nalunngilarsimi Naalakkatta Jesus Kristusip saammaannera, pisuugaluarluni piitsunngormat pillusi piitsuunermigut pisuunngoqqullusi.’ (2 Korintumiut 8:9) Naak Jesus Guutip ernerinit allanit tamanit qilammi pigisaqarnersaagaluarluni pigisani tamakku tamaasa inunngorumalluni taamaatissimavai. (Filípimiut 2:5-8) Pigisaminilli namminissarsiornani taamaatitsinermigut Jesus Jehovap aqqata qutsissisinneqarnissaanut tapersiivoq inuuninilu inuit tamatuminnga ilassinnikkumaartussat utertinneqaatissaattut pilliutigalugu. Uaguttaaq Jesusip maligassiaa naapertorlugu inuit allat tunisiumatussuseqarluta ikiortariaqannginnerpavut Jehovallu aqqata qutsissisinneqarnissaanut tapersiilluta?
11, 12. Pilersaarusiorluarneq nuannaarluta tunisisarnissatsinnut qanoq ililluta iluaqutigisinnaavarput?
11 Pilersaarusiorluarneq nuannaarluni tunisinissamik ajornarunnaarsitsisarpoq. Paulus kristumiunut Korinthimiittunut ima allassimavoq: ’Sapaatip-akunnerisa ulluisa siullianni kinaluunniit ilarsi immini iluanaarnini missiliorlugu toqqorsilluni ilisisarili, tunioraatissat tikiukkuma aatsaat katersortariaqaqqunagit.’ (1 Korintumiut 16:1, 2) Taamatuttaaq ullumikkut kinaanertik nalunaarutiginngikkaluarlugu Naalagaaffiup sulinerata siuarsaatissaanik kajuminnermit tunissuteqarusuttut isertitamik ilaannik immikkoortitsiumassapput. Tassa pilersaarusiorluarnermikkut oqaluussisartut, ilaqutariit ilagiillu ataasiakkaat pallorfiginninnerup ilumoortup siuarsarnissaanut tunissuteqartarsinnaapput.
12 Tunissuteqarnissamik pilersaarutit piviusunngoraangata nuannaarneq allisarpoq. Soorlu Jesus oqarsimasoq: ’Tunisineq tigusinermit pilluarnarneruvoq.’ (apustilit suliait 20:35) Taamaattumik Korinthimiut tunissutinik Jerusalemimut nassiussinissamik pilersaarutiminnik piviusunngortitsinissaq eqqarsaatigalugu Paulusip siunnersuutaa maleruaramikku nuannaarneq suli annerusoq angusinnaasimavaat. ’Kajumittoqaraangammi sapinngisai missiliorlugit ilassiuminartarpoq, sapigai missiliorlugit pinnagu,’ Paulus allassimavoq. Pigisat naapertorlugit tunisisoqaraangat assut pingaartittariaqarpoq. Guuti tunaartarigutsigu, naligiissaasinnaavoq naammattunik pigisallit ingasattajaanngikkaluarlutik tunisiumatunerisigut, pigisakitsullu imminut kiffartornermut periarfissaasa millissutaannik amigaateqarpallaalinnginnerisigut. — 2 Korintumiut 8:10-15.
Tunissutinik nakkutilliilluarneq
13. Sooq Korinthimiut isumalluarsinnaasimappat Paulusip tunissutit isumannanngitsumik nakkutigissagai?
13 Paulusip tunissutinik nakkutilliinerata kingunerisimavaa uppertut piitsut atortussatigut ikiorneqarsinnaasimanerat taamaalillutillu oqaluusseqataanissaminnut nukissaqarnerulersinnaasimanerat. Paulusili allalluunniit tunissutit tamakkua ilaannik kiffartornerminnut akissarsineq ajorput. (2 Korintumiut 8:16-24; 12:17, 18) Paulus ilagiinnut aningaasatigut nanertuutaajumanani nammineq atortussatigut pisariaqartitani pissarsiariniarlugit sulisarsimavoq. (1 Korintumiut 4:12; 2 Tásalûníkamiut 3:8) Taamaalillutik Korinthimiut tunissutitik Paulusimut paarisassanngortikkaangamikkik Guutimut kiffaasumut unneqqarissumut ilungersorlunilu sulisumut nakkutigisassanngortittarpaat.
14. Tunissutit nassiunneqartut Vagttårnip Peqatigiiffiata qanoq nakkutigisarpai?
14 Watch Tower Bible and Tract Society 1884-imi pilersinneqarmalli tamatumunnga tunissuteqartartut uppernarsisinnaasarsimavaat peqatigiiffiup tamatuma tunissutit siunertaasumut atortarai: Jehovap naalagaaffiata soqutigisaanik siuarsaanermut. Peqatigiiffiup aalajangersakkani naapertorlugit ilungersorluni anguniartarpaa inuit pisariaqartitaasa pingaaruteqarnerpaartaannik, tassa anersaakkut pisariaqartitanik, tunioraanissani. Tamanna pisarpoq atuagassianik Bibelilersaarutaasunik naqiterisarnikkut qanorlu ililluni annannissamik angusinissamik unnersuussisarnikkut. Ullumikkut Jehovap inunnik eqqortuliorusuttunik peqatigiissortaminut alliartuinnartunut katersuineq pilertortumik ingerlatippaa. Nalunanngeqaarlu tunissutinik Naalagaaffiup sulineranut tapersiissutaasunik silatuumik atuineq pilluaqqugaa. (Jesaja 60:8, 22) Jehovap uppertut uummataannik tunisiumatussuseqartitsiuarnissaa tatigaarput.
15. Sooq atuagassiami matumani tunissuteqartarneq pillugu apeqqut ilaannikkut sammineqartarpa?
15 Atuagassiamik matuminnga atuartartut nunarsuaq tamakkerlugu oqaluussinermut atugassanik kajumilluni tunissuteqartarnermik immikkut pisinnaatitaaffimmik eqqaasinniarlugit Peqatigiiffiup atuagassiaq manna arlaleriarluni atortarsimavaa. Tamanna qinnuuloornerunngilaq kisianni ’Guutip iivangkiiliuanik iluartumik’ Guutip pilluaqqusinera naapertorlugu tapersersuerusuttunut eqqaasitsissutaaginnarluni. (Rûmamiut 15:16; 3 Juánase 2) Tunissutit tamaasa Peqatigiiffiup Jehovap aqqanik naalagaaffianillu oqaluussissutiginnilluni suliamut atorluaanerpaamik atortarpai. Tunissutit nassiunneqartut tamarmik qujassuteqarfigineqartarput Guutillu naalagaaffia pillugu tusagassamik nuannersumik siaruarterinermut atorneqartarlutik. Tunissutit tamakkua ilaat nunarpassuarni ajoqersuiartortitatut sulinermi aningaasartuutinut naqiterinermullu atortunik, Bibelimik ilisimanninnerup siaruarternissaanut pingaaruteqartorujussuarnik, allilerinermut aserfallatsaaliuinermullu atorneqartarput. Aammalu tunissutit nassiunneqartut bibelinik atuagassianillu Bibelilersaarutinik naqiterinermi aammalu kassettenik videobåndinillu sanaartornermi aningaasartuutinut alliartuinnartunut atorneqartarput. Tunisiumatuut Naalagaaffiup soqutigisaanik tamakkunuunatigut siuarsaaqataapput.
Pinngitsaalineqarnani
16. Sooq tunissutit annikikkaluartulluunniit pingaartinneqartarpat?
16 Jehovap nalunaajaasuisa akornanni ikittuinnaat pigisatigut pisuujupput. Naalagaaffiulli soqutigisaanik siuarsaanissamut tunissutit annikitsunnguugaluilluunniit malunnaataasarput. Jesus uillarneq piitsoq aningaasaaqqanik nalikitsunik marlunnik tunissutinik nakkaatitsivimmut ikisisoq takugamiuk ima oqarsimavoq: ’Uillarneq una piitsoq tamanit annermik ilisivoq. Taakku tamarmik sinnerutitamik ilaannik tunissutinut ilisimmata, uumali ajorsartuulluni inuutissarsiutissaraluani pigisani tamaasa ilivai.’ (Lúkarse 21:1-4) Annikitsuinnannguamik tunissuteqaraluarpoq, tunisiumatullunili tunissuteqarpoq — tunissutaalu pingaartinneqartorujussuuvoq.
17, 18. Korintumiunut agdlagkat áipait 9:7-imi suna pingaarnersaava, oqaaserlu griikerisooq ’kajumittumik’-mik nutserneqarsimasoq aamma qanoq isumaqarsinnaava?
17 Kristumiunut Judeamiittunut ikiuutinut atatillugu Paulus ima allassimavoq: ’Nungullutik uummatimik pilersaarutigisaannik tunisigilit uumitsannatik ajornartoortitaanatillu, kajumittumik tunisisoq Guutip asammagu.’ (2 Korintumiut 9:7) Qularnanngitsumik apustilip tikkuarpai oqaatsit Ussatit 22:8-mi Septuaginta-nutsigaq naapertorlugu ima nipeqartut: „Guutip nuannaarluni tunisisoq pilluaqquaa suliaasalu naammanngissutaat naammaatississallugu.“ (Septuaginta, tuluttut nutsigaq Charles Thomssonimit) Paulusip „pilluaqquaa“ ’asavaa’-mik taarsersimavaa, imminnulli ataqatigiipput, pilluaqqusinerimmi Guutip asanninnerata kingunerai.
18 Tunisiumatuup tunisisinnaanini ilumoorluni nuannaarutigisarpaa. Oqaaseq griikerisooq Korintumiunut agdlagkat áipait 9:7-imi ’kajumittumik’-mik nutserneqarsimasoq allaat eqqarsaammik qiimanermut imaluunniit qiimasunnermut tunngasumik imaqarpoq. Bibelimik paasiniaaqqissaartartup R. C. H. Lenskip versi tamanna ima oqaaseqarfigaa: „Guutip asavaa qiimalluni, nuannaarluni pilluarlunilu tunisisoq . . . tunisiumatussutsimik ersersitsinissamut periarfissaqaleraangat qungujunnermik ikitsisartumik uppersuseqartoq.“ Nuannaarnermik taama ittumik pigisalik pinaaserluni imaluunniit pinngitsaalineqarluni tunisineq ajorpoq, kisianni uummamminit tamarmiusumit kajumissisinneqarluni. Illittaaq Naalagaaffiup soqutigisaanik siuarsaanermut tunissuteqarsinnaanerit taama nuannaarutigitigaajuk?
19. Kristumiut siulliit qanoq ilillutik tunissuteqartarsimappat?
19 Kristumiut siulliit aningaasanik katersuisitsisarsimanngillat imaluunniit pissarsiamik qulinginik tunissuteqartarsimanatik. Tunissuteqartarsimapput namminnerluinnaq kajuminnerminnit. Tertullian, ukiup 190-ip u.n.k. missaani kristumiussutsimut isumataarsimasoq, ima allassimavoq: „Aningaasiveqarpat aningaasat ilaalernissamut akiliutitut katersorneqarsimanngillat, soorlulusooq upperisaq pisiarineqarsinnaasoq. Kinaluunniit qaammatip ingerlanerani ullormi aalajangersimasumi aningaasamininnguanik ilisisarpoq, imaluunniit piumalleraangami, imaluunniit kajumissuseqarsimaguni pisinnaaguniluuniit. Tassami pinngitsaaliisoqarneq ajorpoq, namminerli kajuminnermit akiliisoqartarpoq.“ — Forsvarsskrift for de kristne, kapitali 39,5, qupp. 83.
20, 21. (a) Guutip soqutigisaanik aningaasatigut tapersersuinermik immikkut pisinnaatitaaffik atuagassiap matuma normuisa siullerpaat ilaanni qanoq allaatigineqarsimava, soorlu tamanna suli naleqqulluarpa? (b) Pigissaarutitsinnik Jehova ataqqigaangatsigu qanoq kinguneqartarpa?
20 Ukiuni nutaanerusuni Jehovap kiffaasa akornanni kajuminnermit tunissuteqartarneq ileqquujuarsimavoq. Ilaannikkulli ilaqartarsimapput tunissuteqarnikkut Guutip naalagaaffiata soqutigisaanik siuarsaanissamik immikkut pisinnaatitaaffimmik atuinngitsunik. Assersuutigalugu, atuagassami matumani 1883-imeersumi ima allassimasoqarpoq: „Ilavut allat pillugit pigisatigut ima artukkerneqarsimatigipput sulivallaarnertik qasuallaarnertillu pissutigalugit pisinnaasaat annikillisimallutik, taamaalillutillu atorsinnaanerat annikillisimalluni. Tamannaannaanngitsorli, tassami . . . pissutsinik tamakkuninnga paasinnilluinnarsimanngitsut ajunaaruteqarsimapput tamatumani sungiussisimannginnertik pissutigalugu.“
21 Jehovap peqatigiissortaanut ullumikkut ilanngussuuttoqarnerujussua Europallu kangiani nunanilu allani siornatigut killilersuiffiusimagaluartuni Naalagaaffiup suliaanik annertusisitsiortortoqarnera pissutigalugit naqiteriviit atortorissaarutillu allat allilerneqarnissaat pisariaqartinneqaraluttuinnarpoq. Bibelit atuagassiallu Bibelilersaarutaasut suli amerlanerusut pisariaqartinneqarput. Suliniutit teokratiimut tunngasut arlaqaqisut aallunneqalereerput. Tamakkuli ilarpassui pilertornerusumik naammassineqarsinnaassagaluarput atortussat naammattuuppata. Soorunami tatigaarput pisariaqartitat Guutip isumagissagai, nalunngilarpullu ’pigisaminnik Jehovamik ataqqinaasiisut’ pilluaqquneqarumaartut. (Ussatit 3:9, 10) Aap, ’naammalluartunik siaruarterisoq naammalluartunik katersuiumaarpoq’, NV. ’Jehovap ’ajunngitsuliornernut tamanut pisuunngortissavaatigut’, ajunngitsuliornerullu, imaluunniit tunisiumatunerup, tamatuma inuppassuit Jehovamut qujaniartilerlugillu unnersiutiginnitsilissavai. — 2 Korintumiut 9:6-14.
Guutip tunniussaanut qujamasunnermik ersersitsigit
22, 23. (a) Guutip tunissutaa taassaanngitsoq suua? (b) Jehovap uagutsinnut tunissutai pingaartiitigalugit qanoq iliortariaqarpugut?
22 Qujamasungaarnerminit kajumissisinneqarluni Paulus ima allassimavoq: ’Guuti qujanarsili tunissutaa taassaanngitsoq pillugu.’ (2 Korintumiut 9:15) Jesus kristumiunut tanitanut inuiannullu tamanut ’ajortinik matoorneqaataagami’ Jehovap tunissutaanut taassaanngitsumut tunngaviullunilu akunnermiliuttuuvoq. (1 Juánase 2:1, 2) Tunissut tamanna tassaavoq ’Guutip saammaanera’ pisassarinngisaraluarput kiffaminut nunamiittunut Jesus Kristus aqqutigalugu naammattorsuarmik ersersittarsimasaa, taamaalilluni Jehovap nersornaatissaanut ataqqinaatsissaanullu annaanneqarnermik angusisinnaalersillugit. — 2 Korintumiut 9:14.
23 Jehovap tunissutaa taassaanngitsoq aammalu anersaap timillu piisigut innuttaminut tunissuterpassui allat qamuuna assorsuaq pingaartippavut. Ataatatta qilammiusup uagutsinnut ajunngisaassusia tupinnangaarmat oqaasertassaqartinngilarpulluunniit, tunisiumatuujunissatsinnullu tamanna kaammattuutigisariaqarluinnarparput! Taamaattumik Guutitta tunisiumatuup Jehovap soqutigisai siuarsarniarlugit qamuuna pingaartitsingaarluta sapinngisarput tamaat iliuuseqarniarta — Taassumami angissutsimigut tunisiumatussutsimigullu allat tamaasa qaangersimavai! (wD 15/1 92)
Eqqaamavigit?
□ Jehovap innuttai uummatiminnit piumassuseqartumit qanoq kajumissisinneqarsimappat?
□ Tunisiumatunissatinnut suup killittarpaatigut?
□ Tunissutit nassiunneqartut Vagttårnip Peqatigiiffiata qanoq atortarpai?
□ Qanoq pissuseqarluni tunisiumatuneq Guutip nuannaraa, taassumalu uagutsinnut tunissuterpassuinut qujamasunnerput qanoq ililluta ersersittariaqarparput?
[Qupp. 23-mi assiliartaq]
Illernartuut sananeqarmat Israelikkut eqiasuillutik sulisimapput tunisiumatullutillu Jehovamut tunissuteqarsimallutik
[Qupp. 26-mi assiliartaq]
Uillarnerup piitsup tunissutaatut ittut malunnaateqarput pingaartinneqarlutillu