’Kajumittumik tunisisoq guutip asavaa’
JEHOVA tukkortuuvoq. Biibilimi allassimavoq taanna ’tunissutinik tamanik ajunngitsunik tunniussanillu tamanik naammalluartunik’ Tunisisuusoq. (Jâko 1:17) Assersuutigalugu Guutip pinngortitai eqqarsaatigeriakkit. Nerisassanik mamartunik naasunillu qalipaatigissaartunik tunisimavaatigut, seqernullu tarrilernerinik alianaalluinnartunik takusassaqartittarluta. Pinngortitaani kusanaatsoqanngilaq avaanngunartoqarnaniluunniit; suut tamarmik asanninneranik tukkortuuneranillu ersersitsipput. (Tussiaat 19:2, 3; 139:14) Aammattaaq Jehova kajumittumik Tunisisarpoq. Kiffami iluaqutissaannik iliuuseqartarnini nuannaarutigisarpaa. — Tussiaat 84:12; 149:4.
Israelikkut Guutip tukkortuuneranik ilaarsinissaannik allanullu tamatuminnga ersersitsisarnissaannik kajumissaarneqarsimapput. „Uummatisi ima manngertitsigissanngilasi allaat assasi inoqatissinnut piitsumut matoqqatilerlugit,“ Mosesip oqarfigisimavai. „Nangaanasi piitsoq tunissavarsi, tunisinersilu ugguutigissanngilarsi!“ (5 Moses 15:7, 10) Israelikkut uummammit pisumik tunisisassapput tukkortuunerlu nuannaarutigisariaqarlugu.
Kristumiut assingusumik oqaaqqissaarneqarput. Jesus oqarsimavoq ’tunisineq pilluarnartuusoq’. (apustilit suliait 20:35) Jesusip ajoqersugai kajumilluni tunisinermi maligassaalluarput. Biibilimi oqaluttuarineqarpoq Jerusalemimi uppertunngortut tamarmik ’nunaatitik pequtitillu akigisaraat, tamanullu agguartaraat nungullugit ajorsaataat missiliorlugit’. — apustilit suliait 2:44, 45.
Juutilli taakku kingusinnerusukkut ajorsalersimapput. Biibilimi allaatigineqanngilaq sooq taamatut atugaqalersimanersut, ilisimattuulli ilaat isumaqarput kaannersuaq apustilit suliáinik agdlagkat 11:28, 29-mi eqqaaneqartoq pissutaasinnaasoq. Qanorluunniit pisoqarsimagaluarpat kristumiut Judæamiittut atugarliortorujussuupput, pisariaqartitaasalu matuneqarnissaat Paulusip qulakkeerniarsimavaa. Qanoq iliorluni?
Ajorsartunut katersuiniartitsineq
Paulusip allaat ilagiit Makedoniamisut ungasitsigisumiittut ajorsartunut ikiuinissaannik qinnuigisimavai, Judæamilu kristumiunut piitsunut katersuisitsineq aallartissimavaa. Paulus Korinthimiunut allassimavoq: ’Iluartunut tunioraatissat pillugit, soorlu ilagiit Galatiamiittut peqqugikka, taamattaaq ilissi ilioritsi. Sapaatip-akunnerisa ulluisa siullianni kinaluunniit ilarsi immini iluanaarnini missiliorlugu toqqorsilluni ilisisarili.’a — 1 Korintumiut 16:1, 2.
Tunissutit tamakku qatanngutinut Jerusalemimiittunut piaartumik nassiunneqartussaagaluarput, Korinthimiulli Paulusip ilitsersuutaa maleruarumaataarsimavaat. Sooq? Qatanngutimik Judæamiittut atugaat soqutiginnginnamikkik? Naagga, Paulusip nalunngilaa Korinthimiut ’tamatigut peqangaartut uppernikkut oqaatsikkullu ilisarsinikkullu piniaqqissaarnikkullu’. (2 Korintumiut 8:7) Ilimanarneruvoq Paulusip allakkamini siullerni eqqaasai pingaarutillit allat ulapputigigaat. Maannali Jerusalemimi pissutsit ilungersornarsilluinnarsimapput. Taamaattumik Paulusip allakkami aappaanni ajornartorsiut eqqaavaa.
Tukkortuunissamut kajumissaarut
Makedoniamiut, ikiuiumatussutsimikkut maligassaalluartut, pillugit Korinthimiut oqaluttuullugit Paulus aallarniivoq. ’Annikilliornartorpassuarnik misilinneqaraluarlutik tipaatsungaarsusertik piitsuussusertillu mikinngitsoq malunnarsingaarmat pisuutut tukkortunngorsimapput,’ Paulus allappoq. Makedoniamiut tukkortuunissaannut kajumissaarneqartariaqanngillat. Akerlianilli Paulus allappoq ’ilungersungaarlutik qinnuigigaatik iluartunut ikiuutissanik tuniseqataajumallutik’. Makedoniamiut kajumillutik tukkortuunerat maluginiarnartuuvoq, ’piitsuussusiat mikinngitsoq’ eqqarsaatigalugu. — 2 Korintumiut 8:2-4.
Makedoniamiut nersualaarnerisigut Paulusip Korinthimiut unammillerniartunngortinniarpai? Naaggarluinnaq, nalunngilaami taamatut iliorluni kajumissisinnaviarnagit. (Galâsiamiut 6:4) Nalunngilaattaaq Korinthimiut ajunngitsuliortinniarlugit avoqqaarisariaqanngitsut. Tatigaali Korintumiut qatanngutitik Judæamiittut ilumoorlutik asagaat ikiorusukkaallu. Ima allaffigai: ’Siorna sulineq kisiat piinnarnagu kajuminneq allaat aallarnerlugu siulliuvusi.’ (2 Korintumiut 8:10) Ikiuisarnerit arlaatigut Korinthimiut maligassaalluarput. ’Kajumissusersi nalunnginnakku Makedoniamiuni usorsitsaatigaara,’ Paulusip allaffigai, nangillunilu: ’Ilungersornissi amerlasuut kajumissaarpai.’ (2 Korintumiut 9:2) Maannali Korinthimiut ilungersornertik kajumissusertillu suliaqarnikkut takutittariaqalerpaat.
Taamaattumik Paulusip allaffigai: ’Nungullutik uummatimik pilersaarutigisaannik tunisigilit uummitsannatik ajornartoortitaanatillu, kajumittumik tunisisoq Guutip asammagu.’ (2 Korintumiut 9:7) Paulusip Korinthimiut pinngitsaalinianngilai, pinngitsaalisaasormi nuannaarluni tunisisinnaanngilaq. Ersarippoq ilimagisimagaa eqqortumik isumaqarneq pigineqareersoq ataasiakkaallu tunisinissaminnut aalajangereersimasut. Aammattaaq Paulusip allaffigai: ’Kajumittoqaraangammi sapinngisai missiliorlugit ilassiuminartarpoq, sapigai missiliorlugit pinnagu.’ (2 Korintumiut 8:12) Aap, kajumittoqaraangat — inuk asanninnermik pissuteqaraangat — tunissutaa qanorluunniit annikitsigigaluarpat Guutip nuannaarutigisarpaa. — Naleqqiuguk Lúkarse 21:1-4.
Ullumikkut kajumittumik ikiuineq
Judæami kristumiut ikiorneqarnerat nalitsinni maligassaavoq pitsaalluinnartoq. Jehovap nalunaajaasui silarsuaq tamakkerlugu oqaluussisarput, taamaalillutillu anersaakkut kaattut millionilikkuutaat pisariaqartitaat matusarlugit. (Jesaja 65:13, 14) Jesusip peqqussutaa naalallugu taamaaliorput: „Taamaattumik aallaritsi inunnillu inuiannit tamaneersunik ajoqersuganngortitsigitsi, . . . kuillugit, ajoqersorsigillu ilissinnut peqqusakka tamaasa maleruaqqullugit.“ — Matîuse 28:19, 20, NV.
Suliap tamatuma naammassinissaa oqitsuinnaanngilaq. Ajoqersuiartortitat angerlarsimaffii silarsuarmilu tamarmi immikkortortaqarfiit hundredenit amerlanerusut aserfallatsaalineqartariaqarput. Aamma Jehovamik pallorfiginnittut naleqquttumik ataatsimiittarfeqarniassammata kajumissaaqatigiillutillu, naalagaaffilersaarfinnik ataatsimeersuarfinnillu sanaartortoqartariaqarpoq. (Eprîarit 10:24, 25) Aamma ilaannikkut Jehovap Nalunaajaasui ajunaarnersuaqaraangat ikiuisarput.
Naqiterinermut aningaasartuuterpassuit aamma eqqarsaatigeriakkit. Sapaatip-akunneranut agguaqatigiissillugu Napasuliaq Alapernaarsuiffik 22.000.000-inngorlugu Iteritsi!-lu 20.000.000-inngorlugu naqiterneqartarput. Anersaakkut inuussutissanik akuttoqatigiissumik pilersuinermut tamatumunnga atuakkat, brochurit, kassettebåndit videobåndillu millionillit ilanngullugit ukiut tamaasa sanaartorneqartarput.
Tamakkorpassuarnut aningaasartuutit qanoq matuneqartarpat? Nammineq piumassutsimik tunissutinik. Tunissuteqartut ilisimaneqalerniarlutik namminissarsiortumilluunniit pissuteqarlutik taamaaliorneq ajorput, pallorfiginninnerli ilumoortoq siuarsarniarlugu. Namminissarsiunngitsumik tunisisoq nuannaalersarpoq Guutimillu pilluaqqusaasarluni. (Malaki 3:10; Matîuse 6:1-4) Allaat Jehovap nalunaajaasuisa meerartai kajumillutik tukkortuupput tunisinerlu nuannaarutigisarlugu. Assersuutigalugu USA-p ilaani anorersuup aserugai tusaramigit Allisonip, sisamanik ukiullip, 2 dollarit (14 koruunit missaat) tunissutigai. „Nakkaatitsivinni aningaasaatikka tassa tamarmik,“ allappoq. „Tusarsimavara meeqqat pinngussatik, atuakkatik inuusatillu annaasimagaat. Immaqa aningaasat uku atorlugit niviarsiaraq uattut ukiulik atuagarsissussinnaavarsi.“ Maclean, arfineq-pingasunik ukiulik, allappoq anorersuarmi qatanngummik toqusoqarsimannginnera nuannaarutigalugu. Nangipporlu: „Ataatagalu assakaasut atortuinik tuniniaanitsinni 118 koruuninik aningaasarsisimavunga. Aningaasaatikka allamut atorniarsimagaluarpakka, qatanngutilli eqqarsaatigilerpakka.“ — Aamma ungalusaq takuuk.
Jehovap uummataa nuannaartarpoq inuusuttut utoqqaallu imminik ’pigisaminnik ataqqinaasiinermikkut’ Guutip Naalagaaffiata soqutigisai siulliukkaat takugaangamiuk. (Ussatit 3:9, 10) Soorunami sukkulluunniit Jehova pisuungortissinnaanngilarput, suummi tamaasa pigisarai. (1 Israelikkut 29:14-17) Oqaluussinermilli tapersersuineq immikkut pisinnaatitaaffiuvoq Jehovamut pallorfiginnittumut taassumunga asanninnerminut ersersitsinissaminut periarfissiisoq. Uummammit kajumittumit taamatut iliortut tamaasa qutsavigeruisuppavut. (wE 1/11 98)
[Quppernerup ataani ilanngussaq]
a Paulus allammat ’peqqugikka’, isumaqanngilaq pinngitsaaliniarsarigai. Katersuisitsinerli ilagiinni arlalinni ingerlanneqartoq nakkutigiinnarpaa. Aamma Paulus oqarpoq kinaluunniit ’immini’ ’iluanaarnini missiliorlugu’ tunisissasoq. Tunissutit inuup namminerisaminik namminerlu kajumissutsini naapertorlugu tunniuttassavai. Kinaluunniit tunisinissaminut pinngitsaalisaanngilaq.
[Qupp. 26, 27-mi ungalusaq]
Nunarsuaq tamakkerlugu suliamut qanoq ililluni kajumissutsimit tunissuteqartoqartartoq
Amerlasuut aningaasanik naatsorsuutiminni nakkaatitsivimmut „Tunissutit Naalagaaffiup sulianeranut — Matîuse 24:14“-imik allagartalimmut nakkartitassaminnik immikkoortitsisarput. Tunissutigineqarsimasut qaammatip naanerani ilagiinnit Napasuliaq Alapernaarsuiffiup Peqatigiiffianut nassiunneqartarput.
Tunissutit: Aningaasat kajumissutsimit tunissutit toqqaannartumik nassiunneqarsinnaapput uunga: Vagttårnet, Stenhusvej 28, 4300 Holbæk, giro 640-3468. Pinnersaatit nalillillu allat aamma tunissutigineqarsinnaapput. Allagarsertariaqarpulli tunissutaanerannik nalunaartumik.
Sillimmasiissutit: ’Inuunermut sillimmasiissutit’ utoqqalinersiutissatulluunniit nammineq katersukkat Napasuliaq Alapernaasuiffiup Peqatigiiffianut pisassanngortinneqarsinnaapput. Taamaalisoqarniartillugu tamatigut Peqatigiiffik ilisimateqqaarneqartariaqarpoq.
Bankkontot, pappialat nalillit pigisallu aalaakkaasut: Bankkontomi uninngatitat, pappialat nalillit pigisallu aalaakkaasut tuniuminartut Napasuliaq Alapernaarsuiffiup Peqatigiiffianut tunniunneqarsinnaapput. Taamaalisoqarniaruni aamma Peqatigiiffik ilisimatinneqaqqaassaaq.
Kingornussassat: Aningaasaatit inatsisitigut atuuttumik testamentiliornikkut Napasuliaq Alapernaarsuiffiup Peqatigiiffianut kingornussassanngortinneqarsinnaapput. Pitsaassaaq Peqatigiiffik immaqalu ilagiit tamatuma kopiianik tunissallugit. Ilisimatitsissutigisinnaavarput Vagttårnets Bibel- og Traktatselskab kingornussassat akileraarutaannut akiliineq ajormat.
Periarfissat allat (pisussaasutut nalunaarutit allallu): Ilagiinni ilaaffigisanni utoqqaanertat tunissuteqarnissamut periarfissanik allanik paasiniaaffigisinnaavatit.
Jehovap Nalunaajaasuisa sulinerat kajumissutsimit tunissutaannarnik tapersersorneqarpoq soorlu ataani issuarneqartumi takuneqarsinnaasoq: „[Tamakku] . . . tamarmik kajumissutsiminnik sulisunit akissarsiaqarneq ajortunit suliarineqartarput, taamaalilluni aningaasartuutit sapinngisamik appasitsinneqarlutik. Illumiit illumut angalaarluni oqaluussisarneq atuagassianillu agguaassineq Jehovap Nalunaajaasuisa akissarsiaqaratik suliarisarpaat. Tamarmik [aningaasartuutitik] namminneq akilertarpaat. Utoqqaanertat ilagiinnik nakkutilliisut ilagiinnilu kiffartortut akissarsiaqaratik kiffartuussisarput. Kiffartuussinerminni aningasaajaatit tamaasa namminneq akilertarpaat.
Siulersuisoqatigiinni ilaasut allallu Biibilinik atuakkanillu Biibilimut ilinniutaasunik piareersarnermik naqiterinermillu taamaaqataannillu suliaqartut tamarmik allanik akissarsiaqanngillat kisianni akeqanngitsumik nerisaqarlutillu inigisaqarput namminerisaminnillu pisariaqartitaminnut anginngitsumik [ajunngitsorsiassaqartitaallutik]. Aammattaaq allamik atorfeqaratik nakkutilliillutik angalasartut taama ittumik isumagineqartarput. . . .
Jehovap Nalunaajaasuisa ataatsimiititsinerini tamani, ilagiissiminni aammattaaq ataatsimeersuarnerni, aningaasanut nakkaatitsiveqarpoq tunisiumasut nakkartitsiffigisinnaasaannik. Aningaasanik katersuisitsineqarneq ajorpoq. Pissarsiamik qulerarterutaannik akileraartaqqusaanngillat ilagiinnullu ilaasortatut akiliummik akileeqqusaanatik.“ — Brochurimit Jehovap Nalunaajaasui — Ataasiuussuseqarlutik Guutip peqqusaanik silarsuarmi tamarmi naammassinnittut-mit, qupernermi 28-mit, issuagaq.
[Qupp. 29-mi ungalusaq]
Aamma meeqqat kajumillutik tunisisarput!
Atuakkanik amerlanerusunik sanaanniassagatsigut aningaasat uku tunniukkusuppakka. Ataatama ikiortarneratigut akissarsiarisimavakka. Eqiasuillusi sulinissinnut qujanarsuaq. — Pamela, arfineq-marlunnik ukiulik.
Amerlanerusunik Naalagaaffilersaarfiliassassinnut tapertassatut 47,50 koruuninik nassippassi. Aasaq saftimik tuniniaasarlunga iluanaarutigisimavakka. — Selena, arfinilinnik ukiulik.
Kukkukuujutiga arnaviaq angutivissamik arnavissamillu piaqqitissimavara. Kingullerlu Jehovamut tunniunniarlugu aalajangersimavunga. Taannalu arnavissanik pingasunik piaqqisimavoq, taakkualu tunisimavakka. Akii Jehovap suliaanut nassiuppakka. — Thierry, arfineq-pingasunik ukiulik.
Aningaasaatikka tassa tamarmik! Atorluarisigit. Sipaarsimanerat oqitsuinnaasimanngilaq. Aajuku 145 koruunit. — Sarah, qulinik ukiulik.
Atuarfimmi sulianni akissarsiassaq anneq pisimavara taamaattumillu ajugaaniunnermi ingerlaqqissimallunga. Tassani aamma ajugaavunga naggataatigullu ajugaaniutivinnermi normu 2-nngorsimallunga. Akissarsiat tamarmik aningaasaapput. Aningaasat ilaat Peqatigiiffimmut tunniukkusuppakka. Isumaqarpunga Teokratiimi Atuarfimmi ilinniartitaalluarnera pissutaalluni ajugaasimasunga. Naliliisut saanni oqalunnissara annilaangassutigisimanngilara. — Amber, 6. klassimi atuartoq.
Aningaasat uku Jehovamut tunniukkusuppakka. Sumut atussanersut taanna aperissavarsi. Taassuma suut tamaasa nalunngilai. — Karen, arfinilinnik ukiulik.
[Qupp. 25-mi assiliartat]
Jehovap Nalunaajaasuisa sulinerat nammineq kajumissutsimit tunissutinik tapersersorneqarpoq