Imminut pilliutigeriaannaasutut pissuseqarit!

ROLFa suliffimmini iluarisaaqaaq. Kristumiutut kiffartornermini suliniuteqarnerulersinnaajumalluni affaannarmik sulilersinnaanerluni sulisitsisuni aperimmagu taanna assut akuersaarpoq. Taamaattumik nuannaarutigalugu Rolf ukiuni arlalialunni pioneriusinnaasimavoq. Ullulli ilaanni suliffiani pissutsit allanngorput. Rolf suliffimmini ima iluarisaatigaaq tuniniaanermut pisortanngornissaminik aningaasarsiamilu qaffangaatsiarujussuarnissaannik neqeroorfigineqarluni. Sulilu suliffimmi qaffartitaaqqinnissamut periarfissaqarluarpoq. Affaannarmik sulisinnaaneq maanna ajornartitaalerpoq.

Rolf nuliaqarami marlunnillu meeraqarluni aningaasat neqeroorutaasut atorfissaqartilluarsinnaagaluarpai. Neqeroorummulli qujaannarpoq allamullu suliffissarsiorluni, anersaakkut aningaasatigullu pisussaaffini tamaasa naammassisinnaajumallugit. Rolfip taamatut aalajangernera sulisitsisuata tupaallaatigeqaa, isumaalu allanngortinniarsarigaluarlugu suli annerusumik aningaasarsiaasa qaffannissaannik neqeroorfigalugu. Itigaramiulli sulisitsisua oqaannarpoq: „Upperisat unammillissallugu sapernarluinnaqaaq.“

Rolf uppernermik pigisaqaannanngilaq, aammali kajungernartumik pissuseqarpoq — tassa imminut pilliutigeriaannaassutsimik. Silarsuarmi namminissarsiorfiusumi maani pissuseq tamanna qaqutigoortuuvoq, inuunermilli siunertaqalersitsisarpoq nalerisimaarnartunngortitsisarlunilu. Kisianni imminut pilliutigeriaannaaneq qanoq isumaqarpa? Pissuseq tamanna sunik nassataqarpa? Qanorlu ililluta pissuseq tamanna pigiuaannarsinnaavarput?

Biibilimi piumasarisaq

Pilliuteqarneq tassaavoq arlaannik pigiunnaagaqarneq imaluunniit arlaannik akisuumik taamaatitsineq. Nalunaajaasup aalajaatsup siulliup, Abelip, „savaatimi piaqqeqqaataasa ilaannik“ Guutimut pilliuteqarneraniilli pilliuteqartarneq pallorfiginninnermut minguitsumut ilaajualersimavoq. (1 Moses 4:4) Noa, Jakob uppertullu allat maligassiamik tamatuminnga malinnissimapput. (1 Moses 8:20; 31:54) Nersutinik pilliuteqartarnertaaq Mosesip inatsisaanut ilaasimavoq pingaartoq. (3 Moses 1:2-4) Inatsisit taakku atuunneranni Guutip kiffai pimik pitsaanersaannik pilliuteqartarnissaminnut kajumissaarneqarsimapput. Nersutinik innarluutilinnik pilliuteqaqqusaasimanngillat. (3 Moses 22:19, 20; 5 Moses 15:21) Israelikkut tunussisut inatsit tamanna unioqqutikkaangassuk Guutip ilungersortumik ima oqaattarsimavai: „Nersutaatit tusiattut nappaateqartullu uannut sassaattarassigit tamanna assuarnannginnerpa? Nunamut naalagaatitaasumut aakkaluariassagisi! Isumaqarpisi iluaralusi ilassilluassagaasi? . . . Isumaqarpisi taamaattut sassaakkussigit iluaralugit assassinnit tigussagikka?“ — Malaki 1:8, 13.

Pilliuteqartarnerup tunngavia kristumiutut pallorfiginninnermi ingerlateqqinneqarpoq. Kristusilli utertitsissut naammalluinnartoq pilliutigereermagu nersutinik pilliuteqartarneq Guutimit iluarisaajunnaarpoq. Taavami kristumiut sunik iluarisaasunik pilliuteqarsinnaappat? Rûmamiunut agdlagkat 12:1-imi Paulus ima oqarpoq: ’Taamaattumik oqaaqqissaarpassi, qatanngutikka, Guutip nallittuissusia pillugu timisi tunniuteqqullusigik pilliutitut uumasutut iluartutut Guutip iluarisassaatut, tassaassammat siuneqartutut Guutimut kiffartuutersi.’ Allanngornerup ila angissusia! Pilliutinut toqungasunut taarsiullugu kristumiut imminnut pilliutitut uumasutut tunniutissapput, tassa nukitik, pigisatik piginnaanitillu pilliutigalugit. Soorlulu Israelitoqqami taamaassimasoq Jehovap pilliut ’nappaateqartoq’ imaluunniit affaannarmik uummateqarluni pilliut ilassiumanavianngilaa. Pitsaanerpaat pallorfiginnitsiminit piumasarai, tassa uummatikkut, tarnikkut isumakkullu iluunngarlutik nukitillu tamakkerlugit kiffartorfigissagaanni. — Mákorse 12:30.

Tassa imminut pilliutigeriaannaaneq tassaannaanngilaq kristumiut ataatsimiinnerinut najuuttarneq imaluunniit oqaluussisarneq. Annerusumilli tassaavoq qanorluunniit kinguneqassagaluarpat Guutip piumasaanik iliorniarluni aalajangerluinnarneq. Atoruminaatsunik annikilliornartunillu atugaqartarnissaq naatsorsuutigisariaqarpoq. ’Uannik malinnikkumasoq,’ Jesus oqarsimavoq, ’imminik isumakkiissavoq, napasorlu anniartitaaffini ersullugu malissavaanga.’ (Matîuse 16:24, NV) Kristumiup qaffanniarneq imaluunniit timip piinik katersuiniarneq inuunermini pingaarnerpaatinngilaa. Aap, Guutip naalagaaffia taassumalu naapertuilluassusia inuunermini pingaarnerpaatippai. (Matîuse 6:33) Pisariaqarpat ’napasoq anniartitaaffini ersukkiuteriaannaavaa’, tassa asissugaanerup malersugaanerullu, aap, allaat toqup, nikallujuilluni atornissaannut piareersimalluni!

Imminut pilliutigeriaannaaneq pilluaqqusaanarpoq

Imminulli pilliutigeriaannaanerup sulissutiginissaa imminut akilersinnaava, ingammik kingunerisinnaasai ilungersunartut eqqarsaatigalugit? Jehova Guutimik asannittut taassumalu aqqanik ataqqinartitserusuttut nalorninngillat. (Matîuse 22:37) Assersuutigalugu eqqarsaatigeriaruk Jesus Kristusip maligassiaa naammalluinnartoq. Nunamukanngikkallarami qilammi anersaajulluni qutsissumik atorfeqarsimavoq. Ajoqersukkaminulli ima oqarsimavoq: ’Piumasara pinnagu aallartitsisima [Guutip] piumasaa piniarpara.’ (Juánase 5:30, NV) Aap, ’pissutsi iperarpaa kiffap taattua atillugu inuillu assigilerlugit; inuttullu pissuseqarluni malunnarsigami imminik nikanarsarpoq naalaannarluni toqumut allaat, massami [napasumi anniartitsivimmi, NV] toqumut allaat’. — Filípimiut 2:7, 8.

Jesusip tamakkuninnga pilliuteqarnera asuliinnanngilaq. Kajumilluni ’ikinngutini pillugit inuunini iperaramiuk’ utertitsissutissaq pisariaqartoq akilersinnaasimavaa inuit naammalluinnanngitsut inuunermik angusisinnaalersillugit — qilammi toqusuitsuullutik imaluunniit nunami naassaanngitsumik inuullutik. (Juánase 3:16; 15:13; 1 Juánase 2:2) Assuarnaassutsimi naammalluinnartumik attatiinnarneratigut Guutip aqqa qutsissisitaatippaa. (Ussatit 27:11) Tupinnanngeqaaq taamatut imminut pilliutigeriaannaanera pillugu Jehovap pilluaqqummagu! ’Tamanna pillugu Guutip akitsingaartippaa ateqartillugulu aternit tamanit annerusumik.’ — Filípimiut 2:9.

’Guutimmiuna Jesus ernituarigamiuk taamatut pilluaqqusaatikkaa,’ immaqa eqqarsarputit, imalu aperalutit: ’Aamma allat imminut pilliuteqartut Guutip pilluaqqusarpai?’ Aap, itsaq nalitsinnilu pisimasutigut tamanna ersarilluinnarpoq. Assersuutigeriartigu Rut Moabikkuusoq Bibelimi oqaluttuarineqartoq. Uiata Israelikkuusup Jehova pillugu ilinniartissimagunarpaa. Uini toqummat aalajangertariaqagassaqalerpoq. Nunami inunngorfimmini inuit Jehovamik nalusut najuinnassanerpai imaluunniit sakini utoqqalisoq, No’omi, ilagalugu nunamut neriorsuutigisamut aallassanerpa? Rutip kingulleq qinerpaa, naak angajoqqaani qimattariaqassagaluarlugit immaqalu allaat uineqqinngitsuussagaluarluni. Rutilli Jehova ilikkarsimavaa, innuttaalu toqqagai peqatigalugit taassuminnga pallorfiginnerusussusiata No’omip aallaqatiginissaanut kajumissisippaa.

Rut imminut pilliutigeriaannaanini tamanna pillugu pilluaqqusaava? Aap. Nunaatilimmut Boazimik atilimmut katippoq, Obedilu ernertaaraa taamaalillunilu Jesus Kristusimut siuaasanngorluni. — Matîuse 1:5, 16.

Nalitsinni Guutip kiffai imminnut pilliutigeriaannaasut aamma pilluaqqusaasarput. 1923-mi William R. Brown, „Bibeli-Brown“-itut ilisimaneqarnerusoq, nuliani panitsillu ilagalugit angerlarsimaffimminnit Indiaaqqamiittumit nuuppoq Afrikap kitaani oqaluussinermut siuttuujartorluni. Kingorna Nigeriamut, oqaluussinerup kinguneqalerfigisaanut, aallarput. Qernertumik amilik Amerikamiu Vincent Samuels oqaluussisartorlu alla Indiaaqqameersoq, Claude Brown, peqatigalugit „Biibili-Brown“ Afrikap kangiani oqaluussisaleqqaarnermi assut pingaaruteqarsimavoq.

Ullumikkut Sierra Leonemi, Liberiami, Ghanami Nigeriamilu — tamarmik „Biibili-Brown“-ip ikinngutaasalu oqaluussinermik aallarniiffigisaanni — oqaluussisartut katillutik 187.000-init amerlanerupput. 1967-imi toqunini sioqqullugu „Biibili-Brown“ ima oqarsimavoq: „Angutit arnallu Guutip naalagaaffianik tusagassaq nuannersoq malillugu inuulersut takullugit assorsuaq nuannerpoq!“ Aap, imminut pilliutigeriaannaalluni inuunini pillugu pilluaqqusaangaarsimavoq.

Imminut pilliutigeriaannaanermik ersersitsiffigisinnaasavut

Uagut ullumikkut qanoq ililluta taamatut imminut pilliutigeriaannaanermik ersersitsisinnaavugut? Ilaatigut sapaatip-akunneri tamaasa illumiit illumut oqaluussinermut peqataasarnitsigut. (apustilit suliait 20:20) Tamanna oqitsuinnaaneq ajorpoq, ingammik sapaatip-akunnera naallugu silamiutut sulereernerup kingorna. Imminut naalakkersinnaaneq pilersaarusiorluarnerlu qularnanngitsumik pisariaqassapput. Pisarissersuutaasulli qaangerujussuarlugit nuannaarutissarsinartarpoq. Immaqa immikkut pisinnaatitaaffittut inummik ikiuivutit tassaalernissaanut ’Kristusip allagaa . . . allassimasoq pilikkiunngitsumik Guutillu uumasup anersaavanik, allaffissiamut ujaraanngitsumut allaffissiamulli uiniusumut uummammut’. — 2 Korintumiut 3:3.

Ilaat silamiutut suliffimminnit imaluunniit aliikkusersorfissaraluaminnik ’piffissamik pisinnaaffiusumik pisinermikkut’ oqaluussinermut peqataanerulersimapput. (Evfisumiut 5:16, NV) Ilaasa piffissartik aaqqissuussimavaat ukiumut minnerpaamik ataasiarlutik ikiorti-pioneriusinnaanngortillutik. Ilaat aalajangersimasumik ikiorti-pioneriusinnaapput imaluunniit pioneriusinnaallutik. Immaqalu oqaluussisartunik pisariaqartitsiffiunerusumut nuunnitsigut pilliuteqarsinnaavugut. Taamaaliorneq inuusaatsikkut allannguutinik annertuunik nassataqarajuttarpoq, aammalu pisarissersuuteqartariaqarnarlunilu kulturimut ileqqulersuutinullu nutaarluinnarnut sungiussiniartariaqarnarluni. Pilliutilli taamaattut imminnut akilersinnaalluinnarput, tassami inunnik allanik annaassiniarnermut annertunerusumik peqataanikkut pilluaqqusaanerpassuarnik sinnilimmik taarserneqartarput.

Tamanna John Cutforthip Canadami inunngorsimasup misigisimavaa. Vagttårnip Biibilimik atuarfiani Gileadimi atuareerluni Australiamut ajoqersuiartortitatut aallartussanngortinneqarpoq. „Kakkaak ungasimmat!“ qatanngut Cutforth eqqarsarsimavoq. Harmagedonip nalliutinnginnerani Canadamut uteqqissinnaassanerpunga angajoqqaakkalu ikinngutikkalu takoqqillugit? Aatsaallu aallaruma tamatumunnga akissutissarsisinaassaanga.“ Aallarporlumi, pilliutigisimasanilu peqqissimissutiginngeqai. Kingorna Papua Ny Guineami nalunaajaanermut siuttuuvoq, sulilu aallussilluaqaluni taavani kiffartorpoq, ukiuni 50-ini piffissani tamaat atorlugu oqaluussisartuusimalluni. Ilaanni ima oqarsimavoq: „Jehovap siulersuinera maleruarniartuaannaraanni suliassiissutaalu ilassiuaannaraanni nuannaarneq, pilluarneq, nalerisimaarneq ikinnguterpassuillu pineqarsinnaapput.“

Pissutsit assigiinngitsut, soorlu peqqinnginneq aningaasarsiornikkullu imaluunniit ilaquttat tungaatigut pisussaaffiit, soorunami qanoq annertutigisumik suliniuteqarnissamut killiliisinnaapput. Kikkut tamakkeratik pioneriusinnaapput imaluunniit ajoqersuiartortitaasinnaapput. Aalajangiusimalluinnartariaqarparpulli sapinngisatsinnik ataatsimiinnernut najuuttarnissarput sapinngisarpullu tamaat oqaluussinermut peqataanissarput, annikitsualunnillu, soorlu sila ajorpat, akornuteqarniartannginnissarput. (Eprîarit 10:24, 25) Immaqalu Guutip oqaasianik atuaqqissaarnissamut piffissaq annerusoq pilliutigisinnaavarput. Ilaqutariit ilaat TV-mik isiginnaarpallaarunnaarnermikkut tamatumunnga piffissaqarnerulersittarput. Immaqalu allaat sapaatip-akunneranut unnuk ataaseq TV-mik isiginnaanngiffiusussatut aalajangersimavaat imaluunniit TV-eqarunnaaginnarsimallutik. Nammineq atuaqqissaarnissamut piffissaqartittarutta ataatsimiinnerni oqaluussinermilu ’taassuma aqqanik nassuerutiginninnermut’ atatillugu ’pilliutigisartakkavut qujaniutaasut’ pitsaassutsimikkut qularnanngilluinnartumik qaffassapput. — Eprîarit 13:15.

Eqqaamajuk oqaluussinermik suliaq naammassingajalermat. Qanittukkut Guutip silarsuaq piumatuffioqalunilu namminissarsiorfioqisoq manna eqqartuutissavaa. (Sefanja 2:3) Guutimit iluarisaajuaannarnissarput kissaatigigutsigu imminut pisarissersornissarput tunuarsimaarfigisariaqanngilarput, ’timivulli tunniuttariaqarpavut pilliutitut uumasutut iluartutut Guutip iluarisassaatut’. (Rûmamiut 12:1) Taamaaliorutta pilluarneq nalerisimaarnerlu annertuut angusarissavavut. Oqaluussineq nuannarinerulissavarput Jehova Guutillu uummataa nuannaartissavarput! — Ussatit 27:11.

Taamaattumik imminut pilliutigeriaannaajuaannarit! Nangaanak allanut iliuuseqartarit imaluunniit Naalagaaffiup soqutigisaanik suliaqartarit. Apustili Paulus ima kajumissaarivoq: ’Puioqinasi avaaginnittassagassi tukkorlusilu, pilliutit taamaattut Guutip iluarimmagit.’ — Eprîarit 13:16. (wD 1/2 92)

[Quppernerup ataani ilanngussaq]

[Qupp. 28-mi assiliartaq]

Nammineq atuaqqissaarnissamut oqaluussinissamullu piffissaqarniarneq pilliuteqarnarsinnaavoq, imminulli akilersinnaavoq

[Qupp. 31-mi assiliartaq]

W. R. Brown John Cutforthilu imminut pilliutigeriaannaanerminnut pilluaqqusaangaarsimapput