Imminut pilliutigeriaannaavit?
1 Jesus Kristusip inuiannut namminissarsiorani iliuuserisimasaanut pingaartitsinitta imminut pilliutigeriaannaasumik piginnaanitsinnik, nukitsinnik nakuussusitsinnillu atuisittariaqarpaatigut. Biibilimi kajumissaarneqarpugut: ’Timisi tunniuteqqullusigik pilliutitut uumasutut iluartutut Guutip iluarisassaatut, tassaassammat siuneqartutut Guutimut kiffartuutersi.’ (Rûm. 12:1) Akuttoqatigiimmik imminut misissornerup periarfissat naapertorlugit taamatut anersaaqarnersugut takusinnaalersittarpaa.
2 Biibilimik atuaqqissaarninni: Akuttoqatigiimmik Biibilimik atuarnissannut atuaqqissaarnissannullu immikkoortitsisimavit piffissamik? Pilersaarusiat malittarpiuk? Ilagiit ataatsimiinnerinut piareersarluartarneq ileqquliussimaviuk? Ilaqutariinni qullersaaguit, taava ilaqutariit akuttoqatigiimmik atuaqqissaarnerat siulersortarpiuk? Taamaaliussagaanni TV-mut, qarasaasiamut allanulluunniit piffissaagaluit pilliutigineqartariaqarput. Pilliulli tamanna annikitsuararsuuvoq Guutip oqaasianik atuaqqissaarnissamut piffissaq atorneqartoq inuunermik naassaanngitsumik kinguneqarsinnaanera eqqarsaatigalugu! — Juá. 17:3.
3 Meeqqanik ilinniartitsinermi: Pitsaanerpaavoq meeraanermi imminut pilliutigeriaannaaneq ilinnialereeraanni. Meeqqatit ilinniartikkit pinnguarnissamut aamma sulinissamut teokratiimullu tunngasunik suleqataanissamut piffissaqartoq. (Evf. 6:4) Angerlarsimaffimmi iluaqutaasunik suliaqartitakkit. Akuttoqatigiimmik oqaluusseqatigiinnissarsi isumagiuk. Nammineq maligassiuilluarnikkut ilinniartitsisarit.
4 Ilagiit suliniarneranni: Ilagiinni pissarsinartaqaaq tamatta immikkut iluaqutissatsinnik pilliuteqarusussuseqaraangatta. (Epr. 13:16) Guutip naalagaffia pillugu oqaluussinermut ajoqersuganngortitsinermullu piffissaqarnerusinnaavit? Napparsimasut utoqqaalluunniit pulaarsinnaavigit ikiorlugillu immaqalu ataatsimiinnernut biiliullugit?
5 Jesusip ajoqersukkani ilinniartippai imminut tamakkiisumik pilliutigineq Guutip naalagaaffiata soqutigisaanik siunnerfigisaqarnissamut inuunermilu allanik tamanik tunulliussinissamut tunngaviusoq. (Mat. 6:33) Jehovamut kiffartorluni imminut pilliutigeriaannaaneq ilungersuutigigaanni pilluarnarnerullunilu nuannaarnarnerusinnaavoq.