Atuartartut apeqqutaat
Jehovap nalunaajaasuisa inuuissiortannginnerat itsaq inuuissiortarnerup upperisarsiornermut attuumassuteqarneranik pissuteqarpa?
Inuuissiortarneq upperisapalaanik eqqunngitsumillu upperisarsiornermik sorlaqarpoq, Jehovalli nalunajaasuisa inuuissiortannginnerannut tamannaannaq pissutaanngilaq.
Ileqqut itsaq upperisarsiornermut attuumassuteqarsimagaluit ullumikkut sumi tamaani taamatut isikkoqarunnaavissimapput. Assersuutigalugu, katittut assammiuat qanga upperisarsiornikkut isumaqartitaasimagaluarpoq, ullumikkulli taamaappianngilaq. Tamakkunatigut apeqqutaasarpoq ileqqoq upperisarsiornermut eqqunngitsumut qanoq attuumassuteqartiginersoq.
Inuuissiortarnerup upperisapalaanik upperisarsiornermillu naggueqarnera ujarlerfissiani amerlaqisuni qulaarneqartarpoq. The Encyclopedia Americana-mi ima allassimavoq: „Itsaq Egyptenimiut, griikerit, Romamiut Persiamiullu silarsuaanni guutit, kunngit pisoorsuillu inuuii nalliuttorsiutigineqartarsimapput.“ Aammali ima allassimavoq: „Naak itsaq israelikkunni innuttaasut angutit utoqqaassusii allattorneqartarsimagaluartut, taamaattoq inuuissiortarsimanerannut takussutissaqanngilaq.“ — 1991-imi saqqummersoq.
Ujarlerfissiat allat inuuissiortarnerup pilerfia sukumiisumik sammisimavaat: ’Inuuissiorluni nalliuttorsiortarnerit ukiorpassuit matuma siorna Europami pilersimapput. Inuit anersaanik ajunngitsunik ajortunillu upperisaqartarsimapput. Anersaat tamakku inuuissiortumik ajoqusiinissaat tamarmik annilaangassutigisarsimavaat, taamaattumillu inuuissiortoq ilaquttaminit ikinngutiminillu avatangerneqarsimasarluni. Taamaalilluni inuuissiortumik nalliuttorsiutiginninneq inuuissiortup ajortumut sernissorniarneranik ukiullu ajunngitsumik ingerlanissaata qulakkeerneqarnissaanik siunertaqartarsimavoq.’ — Birthday Parties Around the World, 1967.
Atuakkami tassani aamma inuuissiornermi ileqqulersuutaasartorpassuit nassuiarneqarput. Assersuut: „Naneruummik atuisarneq itsaq griikerinit Romamiunillu, naneruutip tupinnartuliorsinnaassutsimik pissaaneqarneranik upperisaqartunit, pilerfeqarpoq. Qinusoqarlunilu kissaateqartoqartarsimavoq naneruutit naaralaarneranit guutinut ingerlatinneqartussanik, taamaalillutillugooq guutit pilluaqqussutitik inunnut ammukartissavaat immaqalu inuit qinnutaat akillugit.“
Inuuissiortarnerilli upperisarsiornermut attuumassuteqarsimanerat imaluunniit suli attuumassuteqarnerat kisimi ullumikkut kristumiup inuuissiornernut qanoq isumaqarfiginninnissaanut aalajangiisuunngilaq. Kristumiut inersimalluartut Biibilimi tikkuartorneqartut tamaasa eqqumaffiginiassavaat.
Itsaq Guutip kiffaasa inuit ataasiakkaat inuuii tamaasa allattortarsimavaat, tamannalu tunngavigalugu inuit utoqqaassusiat naatsorsorneqarsinnaasarsimavoq. Soorlu ima allassimavoq: „Noap 500-nik ukioqarluni Sem, Kam Jafetilu ernertaarai.“ — 1 Moses 5:32; 11:10-26.
Meerartaarneq Guutip kiffaasa akornanni nuannaarutigineqarlunilu pilluaatigineqartarsimavoq. (Lúkarse 1:57, 58; 2:9-14; Juánase 16:21) Inuuiali nalliuttorsiutigisarsimanngilaat; ullunik allanik nalliuttorsiutiginnittarsimapput, inuuissiunngisaannarsimallutilli. (Juánase 10:22, 23) Atuakkami Customs and Traditions of Israel-imi tamanna pillugu ima allassimasoqarpoq: „Inuuissiortarneq inuiaat allat ileqquinit tigusaavoq, juutimmi akornanni ileqqoq tamanna eqqartorneqanngilaq, Biibilimi, Talmudimi ilisimasullu allagaanni kingusinnerusuni naami. Iluamimmi oqaatigalugu tassaavoq Egyptenimiutoqqat ileqquat.“
Inuuissiornernik aalajangersimasunik Biibilip eqqartugaatigut ersarilluarpoq ileqqoq tamanna Egyptenimut attuumassuteqartuusoq, inuuissiornerlu taanna pallorfiginnittut ilumoortut akornanni nalliuttorsiornerunngilaq. Faraop, Josefip Egyptenimiut parnaarussivianniinnerata nalaani naalagaasup, inuuianik nalliuttorsiutiginninneq pineqarpoq. Guutimik nalusut ilaasa qularnanngitsumik nalliuttorsiorneq tamanna nuannisarfigisimaqaat, nalliuttorsiornermili tamatumani Faraop iffiortuisa naalagaat niaquerneqarpoq. — 1 Moses 40:1-22.
Aamma Herodes Antipasip, Herodesersuup ernerata, inuuissiornerani nuanniitsumik pisoqarsimanera oqaluttuarineqarpoq. Nalliuttorsiorneq tamanna Biibilimi nuannannertut pissusissamisoortutut eqqartorneqanngilaq, tassanimi Johannes Kuisisoq niaquerneqarpoq. Taavagooq ’ajoqersugai tikiupput timaa tigullugu ilivermullu ilillugu; Jesusimullu oqaatigiartorlugu’. Jesusip tamanna tusaramiuk ’umiatsiaamik tassannga asimut inoqanngitsumut aallarsimavoq’. (Matîuse 14:6-13) Takorloorneqarsinnaava ajoqersukkat taakku Jesusilluunniit nalliuttorsiornerit tamakku iluarinartutut kajungernartutullu isigisimassagaat?
Inuuissiortarnerit pilerfiannik ilisimaneqartut, aammalu, pingaarnerungaartumik, ileqqumik tamatuminnga Biibilip nuanniitsumik eqqartuinera eqqarsaatigalugit Jehovap nalunaajaasui ileqqumik tamatuminnga ingalassimanninnissaminnut pissutissaqarluarput. Ileqqup silamiorpaluttup tamatuma atornissaa pisariaqartinngilaat, ukiummi ingerlanerani allarpassuartigut kajumissinartumik katerisimaarsinnaasarput. Tunisisussanngornertik pissutigiinnarlugu tunisineq ajorput, piumalleraangamilli sukkulluunniit piviusumik tuniserusussuseqarlutik tunniusimassuseqarlutillu tunisisarput. — Nalunaajaasup oqaasii 2:24; Lúkarse 6:38; apustilit suliait 9:36, 39; 1 Korintumiut 16:2, 3. (wD 1/9 92)