Atuartartut apeqqutaat
Jehovap nalunaajaasorpassuisa ulloq katiffitsik nalliussisarpaat. Inuuissorneq ullormik inuuimmik nalliuttorsiutiginninneruvoq. Sooq katiffissiortoqarsinnaava inuuissiortoqarsinnaananili?
Naatsumik oqaatigalugu piumanngikkaanni arlaannaalluunniit nalliussisariaqanngilaq. Imaanngilarli taakku marluk assigiimmik isumaqartut imaluunniit katiffissiornerit inuuissiornertut isigilissagivut.
Taakkunani marlunni ukiup ataasinngornera pineqarpoq, taamaattullu assigiinngitsorpassuusinnaapput — biilinik ajutoornermit ukiup ataasinngornera qaammatilluunniit pulaneranik takunnissimanerup ullua, ilaqutariit asiarnerannit ukiup ataasinngornera ilaallu ilanngullugit. Soorunami ullut nalliunneri tamaasa immikkut nalliuttorsiutigineq ajorpavut. Pisimasumut tunngasut assigiinngitsut eqqarsaatigisariaqarpavut taavalu nalliussissallugu tulluassanersoq aalajangerluta.
Assersuutigalugu Guutip Israelikkut immikkut peqqusimavai ukiumi 1513-imi u.n.s. Egyptenimi illuminnik Guutip inngiliata qaangiinera tamatumalu kingorna aallarnertik eqqaaniartassagaat. (2 Moses 12:14) Juutit, taakkununngalu ilaasup Jesusip, tamanna ukiut tamaasa eqqaaniartarsimavaat Guutip ilitsersuutai maleruarlugit, festernatilli tunioqqaannatilluunniit. Aammattaaq ulloq naalaffiup atoqqeqqaarfia immikkut eqqaaniartagassatut juutit isigisimavaat, naak Biibilimi nalliuttorsiorneqartussatut allassimanngikkaluartoq, Juánase 10:22, 23-milu allassimasut naapertorlugit tamanna Jesusip ajorisimagunanngilaa. Aammattaaq kristumiut ullormi Jesusip toquffiani immikkut ittumik katersuuttarput, taamaalillutik Guutip oqaasiani toqqaannartumik peqqussut naalallugu. — Lúkarse 22:19, 20.
Nunat ilaanni aappariit katiffissiortarnerat nalinginnaavoq. Aappariinnermi aaqqissuussineruvoq Guutip pilersitaa. (1 Moses 2:18-24; Matîuse 19:4-6) Nalunngilarput aappariinneq Biibilimi ajunngitsumik allaaserineqartoq. Aamma atuarsinnaavarput Jesus katittorsiortunut ilaasimasoq tamatuminngalu nuannersuutitseqataalluni. — Juánase 2:1-11.
Taamaattumik eqqumiissanngilaq aappariit katinnertik eqqaaniassappassuk aappariinnertillu attattuarniarlugu nakussatseqqillutik qanoq sulissutigisinnaanerlugu oqaloqatigiissutigissappassuk. Kisimiillutik taamaaliussanerlutik qanigisaminnilluunniit ikinngutiminnilluunniit qaaqqusillutik taamaaliussanerlutik namminneq aalajangigassaraat. Soorunami qanoq pisoqarneranut aqutsisoqarnani festersuaarnissamut tamanna patsisiginiartariaqanngilaq. Ulluinnarni najoqqutassiat maleruakkavut aamma katiffissiornerni siulersortigissavavut. Tassa katiffissiussanerluta katiffissiussannginnerlutaluunniit nammineq aalajangigassaraarput. — Rûmamiut 13:13, 14.
Inuuissiornermi? Inuuissiorneq pillugu Biibilimi allassimasoqarpa?
Ukiut hundredellit makkua aallartinneranni Biibilimik atuaqqissaartartut, Jehovap Nalunaajaasui taamani taama taaneqartut, inuuissiortarsimapput. Amerlasuut allat inuuii atuagaarannguami Daglig himmelsk Manna-mi ullormut allassimaffimmik imaqartumi allattugaatigisimavaat. Tassani assinik mikisunnguanik Biibilimik atuaqqissaartartut allat qaqugu inuuissiornissaannik eqqaasitsisunik ikkussuisarsimapput. The Watch Tower-imi 15. februaari 1909-moortumi atuarneqarsinnaavoq Jacksonvillemi Floridami ataatsimeersuarnermi qatanngut Russell oqaluttarfimmukaqquneqarsimasoq. Tassani oqarfigineqarpoq inuuissiornermini tunissutissiatut karsinik grapefrugtinik, ananasinik appelsiinanillu imalimmik nassinneqarsimasoq. Siornatigut qanoq iliortarsimanerannik tamatuma paasissutissilaarpaatigut. Aamma malugisariaqarpoq taamanikkut qatanngutitta decembarip 25-a Jesusip inuuiatut nalliussisarsimagaat, Brooklynimilu Betelimi juullisiorlutik nereqatigiittarsimasut.
Taamanikkorniilli anersaakkut qaamaneq Guutip innuttaani soorunami allisimavoq. 1920-kkunni sallusuissut qaammarfigineqarneruvoq, makkununngalu tunngasut qatanngutit paasisinnaalerpaat:
Jesus decembarip 25-ani inunngorsimanngilaq, ullorlu tamanna eqqunngitsumik upperisarsiornermut attuumassuteqarpoq. Biibilip paasitippaatigut ulloq Jesusip toquffia eqqaaniartassagipput inuuia allalluunniit inuuia pinnagu. Jesusip toquneranik eqqaaniaasarneq Nalunaajaasup oqaasii 7:1-imut naapertuuppoq, tassani inuup qanoq inuusimanera qanga inunngorsimaneranit pingaarnerusoq eqqaaneqarmat. Guutip kiffaasa aalajaatsut inuuimminnik nalliussisarsimanerannik Biibilimi allassimasoqanngilaq. Guutimik nalusut inuuissiortut kisiisa eqqartorpai tamatumunngalu atatillugu naakkittaatsuliortoqartoq. Inuuissiornerit tamakkua tunuliaqutaat misissoriartigu.
Inuuissiorneq siulleq Biibilimi eqqaaneqartoq tassaavoq Josefip nalaani Faraop inuuissiornera. (1 Moses 40:20-23) Tamatumunnga tunngatillugu Hastingsip atuakkiaani Encyclopædia of Religion and Ethics-imi oqaatsip „inuuissiorneq“-up ataani allassimavoq: „Ileqqoq tamanna, inuuissiortarneq, piffissamik naatsorsuisarnermut attuumassuteqarpoq aammalu imarisani naapertorlugu upperisarsiornikkut najoqqutassianut qutsinngitsunut attuumassuteqarluni.“ Nangillunilu qinerlerfissiami tamatumani Egyptenimiutoqqanik ilisimatooq sir J. Gardner Wilkinson issuarneqarpoq: „Egyptenimiutoqqat tamarmik ulloq tamanna, allaallu nalunaaquttap-akunnera inuuik, pingaartissimavaat; qularnanngitsumillu inuit tamarmik, Persiamiut assigalugit, inuuissiornertik nalliuttorsiutigisarpaat festerujoorlutik, ikinngutitik mamartunik assigiinngitsorpassuarnik nerersuarnermut qaaqqullugit.“
Biibilimi aamma Herodesip inuuissiornera Johannes Kuisisup niaquerneqarneranik kinguneqartoq eqqaaneqarpoq. (Matîuse 14:6-10) The International Standard Bible Encyclopedia-mi (1979-imeersumi) allassimavoq: „Griikeritoqqat guutit inuillu nuimasut inuuii nalliuttorsiutigisarsimavaat. Nalliuttorsiornerit tamakku griikerisut genéthlia-mik taaneqarsimapput, inuulli nuimasup toqoreersup inuuissiorneqarnera genésia-mik taaneqartarluni. Makkabæerinik allakkat aappaat 6:7-imi Antiochos IV-ip qaammammoortumik genéthlia-a eqqaaneqarpoq, juutillu tamatumani ’ pilliutinik nereqatigiinnernut peqataanissaminnut ’ pinngitsaalineqartarput. . . . Herodes inuuissiorami griikeritoqqat ileqqui malippai; griikeritoqqat nalaanni Israelimi inuuissiortoqartarsimaneranut takussutissaqanngilaq.“
Ullumikkut kristumiut ilumoortut ileqqutoqqat tamarmik sunik aallaaveqarsimanersut itsarlu upperisarsiornermut attuumassuteqarsimanersut paasissallugu pingaartutut isiginngikkaluarpaat. Illua’tungaatigulli tamakkununnga tunngatillugu paasissutissat Guutip oqaasianiittut sumiginnarusunngilaat. Inuuissiornerit marluk eqqaaneqartut tassaapput inuuissiornerit Biibilimi taaneqartutuat, tamarmik Guutimik nalusunit nalliuttorsiutigineqarput, tamakkunanilu marlunni naakkittaatsuliortoqarpoq. Ersarippoq inuuissiortarneq Biibilimi ajortumik eqqartorneqartoq, tamannalu kristumiut ilumoorusuttut sumiginnarumanngilaat.
Tassa kristumiut katiffissiussanerlutik namminneq aalajangigassaraat. Kristumiulli inersimalluartut pissutissaqarluarlutik inuuissiorneq ajorput. (wE 15/10 98)