Silarsuaq ajorteqanngiffiusoq — qanoq ililluni?

TOKYOMI inissiaqarfiit ilaanni eqqissisimanartumi ukiukkut ullaaralaaq nipaanneq ikiortissarsiortup nillianeranit tusaqqoornartumit kipitinneqarpoq. Inuit 20-t minuttini 5-10-ni aviisinik agguaasartup arnap savimmik arlaleriarluni kapoorneqartup nillianera kipiluttunartoq tusaavaat. Arlaannaalluunniilli susoqarneranik paasiniaalluni iliuuseqanngilaq. Arnaq aammik katatserujussuarnini pissutigalugu toquvoq. „Nillialermat arlaata politiinut nalunaarutigisimagaluarpagu,“ paasiniaasartoq oqarpoq, „inuunera annaanneqarsimasinnaagaluarpoq.“

Naak nillianermik tusartut uninngaannarsimagaluarlutik eqqortumik oqarsinnaappat pisooqataanatik? „Taamani tallimanngornermi toqutsineq tusaagakku ullup sinnera tamaat ilerasuppunga,“ angut nillianermik tusarsimasoq oqaluttuarpoq. Tamanna eqqarsaatigalugu ima aperisoqarsinnaavoq: Ajortuliorneq qanoq paasisariaqarpa?

Ajortuliorneq suua?

Hideo Odagiri, atuakkianik isornartorsiuisartoq Tokyomilu Hosei-universitetimi professori soraarneq, aviisimi Asahi Shimbun-imi ajortiliussutsimik misigineq pillugu ima issuarneqarpoq: „Assersuutigalugu namminissarsiussutsimut meeqqamiittumut, kanngunaannartumik sinnganermut terlinganiillu killuussinermut ajortiliussutsimik misigisakka eqqaamalluakkakka puiorsinnaanngilakka. Misigissususeq tamanna, meeqqat atuarfianni atuarallarama puiuikkiussimasara, suli isumakuluutigisarpara.“ Aamma illit misigissutsikkut akiuunneq, nalunngisannik eqqunngitsumik iliuuseqarsimallutit ilunnit avoqqaarineqarneq, misigisimaviuk? Naak immaqa toqqaannartumik pinerluttuliorsimanngikkaluarlutit isumakkut nuanniitsumik misigisarputit. Tassaana nalunngeqatiginnissutit sulisoq. Biibilimi ima oqaatigineqarpoq: ’Guutimik nalusut inatsiseqanngitsut inatsisit peqqusaat isumaminnik naammassisaramikkik, taava inatsiseqanngitsut taakku imminnut inatsisitut ipput, inatsisit suliareqqusaat uummatiminni allassimasut nalunaaramikkik, tarnimik nalunngissusiata nalunaajaaffigimmatik, eqqarsaataallu paarlaattarmata imminnik pasillersarlutik illersortarlutillu.’ (Rûmamiut 2:14, 15) Aap, inuit allasiorsimasut, tillissimasut sallusimasullu amerlanersaat pinngitsooratik qamuuna nuanniilliortarput. Nalunngeqatiginnissutaasa nalunaarfigisarpaat ajortuliortut.

Nalunngeqatiginnissutilli nipaa sumiginnarneqartualeruni sunniukkunnaartarpoq. Misikkarlussisarpoq mingutsitaallunilu. (Títuse 1:15) Suut eqqunngitsuuneranik misigissut atorsinnaajunnaartarpoq. Ullumikkullu inuit amerlanersaasa nalunngeqatiginnissutaat toqungavoq, imaluunniit ajortuliornermut misikkarluttuuvoq.

Nalunngeqatiginnissulli kisimi suup ajortuliaaneranut najoqqutassaava, imaluunniit suup ajortuliaaneranut suullu ajortuliaannginneranut allamik najoqqutassaveqarpa? Ukiut 3000-it sinnerlugit matuma siorna Guutip innuttani toqqakkani inatsisinik ataatsimoortitanik tunisimavai, tassani ’ajorti ajortisut ersersinneqarluni’. (Rûmamiut 7:13) Allaat iliuutsit siornatigut akuerineqarsinnaasutut isigineqarsimagaluartut pissusissamittut, tassa ajortuliatut, naqissuserneqarput. Qulaarneqarpoq Guutip innuttai toqqakkat, israelikkut, ajortiliusut taamaalillutillu perloqqussutip ataaniittut.

Ajortulianuku suut nalunngeqatiginnissutitta eqqaasitsissutigisarai Mosesillu inatsisaani allattorneqarsimasut? Oqaaseq ajorti, imaluunniit ajortuliaq, Biibilimi Pinngortitsisup najoqqutassiaanut sanioqqutitsisunut atorneqartarpoq. Taassuma pissusianut, ilioriaasianut, najoqqutassiaanut piumasaanullu naapertuutinngitsut tamarmik ajortuliaapput. Pinngortitaq najoqqutassiaminik ataqqinninngitsoq inuujuaannartissinnaanngilaa. Taamaattumik ukiuni hundredelinni siullerni inatsisinik ilisimannittoq kristumiunut hebriiarinut ima mianersoqqusisimavoq: ’Misissoritsi, qatanngutikka, ajortumik uppinngitsumillu uummateqartoqaqqunasi Guutimut uumasumut naalakkunnaarsumik.’ (Eprîarit 3:12) Aap, Pinngortitsisumut uppissuseqannginneq ajortuliaavoq annertooq. Tassa Biibili naapertussagaanni ajortuliat nalinginnaasumik ajortuliatut isigineqartunit amerlaneroqaat. Allaat Biibilimi ima allassimavoq: ’Tamarmik ajortuliorput Guutimi nersornaammik ajorsarlutik.’ — Rûmamiut 3:23.

Ajortip pilerfia

Tassa imaappa inuk ajortiliulluni pinngortitaasimasoq? Naamik, Jehova Guutip, inuup Pinngortitsisuata, inuk siulleq pinngortitatut naammalluinnartutut pinngortissimavaa. (1 Moses 1:26, 27; 5 Moses 32:4) Inuilli siulliit anguniagaq sanioqqussimavaat Guutip inerteqqutituaa unioqqutikkamikku, tassa ’orpiup ajunngitsumik ajortumillu nalujunnaarutaasup’ paarnaanik nerigamik. (1 Moses 2:17) Naak naammalluinnartumik pinngortitaagaluartik siunertarititaasoq, tassa Ataataminnut qilammiusumut naalalluinnarneq, sanioqqussimavaat. Ajortilinngorput taamaattumillu toqumut eqqartuunneqarlutik.

Oqaluttuaq qanganisaq tamanna ullumikkut ajortimut attuumassuteqarami? Biibilimi nassuiarneqarpoq: ’Taamaattumik soorlu inukkut ataasiusukkut ajorti silarsuarmut tikiuttoq ajortikkullu toqu tikiulluni, taamalu toqup inuit tamakkerlugit tikikkai, tamarmik ajortuliormata.’ (Rûmamiut 5:12) Tamavitta pinngitsoqarata ajorti kingornussimavarput taamaattumillu toqup perloqqussutaata ataaniilluta. — Nalunaajaasup oqaasii 7:20.

Inuit ajortimik peerseriaraluarneri

Ajortiliussutsini Adamip kinguaaminut kingornussaritissimavaa. Aammali nalunngeqatiginnissut Guutimit tunissutaasoq ingerlateqqissimavaa. Ajortuliorneq nuanniitsumik misigititsisinnaavoq. Soorlu taaneqareersoq misigissutsit tamakku ’nipaallisarniarlugit’ inuit misiliisarsimagaluarput. Qanorli kingunilimmik?

Kangiani kitaanilu inuit najoqqutaminnik allanngortiterinikkut imaluunniit ajortip piuneranik miserratiginninniarnermikkut ajortip sunniutaanik nungutitseriaraluartarsimapput. (1 Timûtiuse 4:1, 2) Inuk ajortilik napparsimasutut kissarneqartutut ippoq. Ajorti assersuunneqarsinnaavoq virusimut assigiinngitsunik malunniutilimmut nalunngeqatiginnissullu assersuunneqarsinnaalluni kissarneqarnermut nuanniitsumut. Kissarnersiut aseroraluaraanni soorunami napparsimasup kissarneqarnera allanngornavianngilaq. Taamatuttaaq ileqqussatigut najoqqutassiat maannakkut atuuttut atortussaajunnaarsinnerisigut — soorlu kristumiuuneraqatigiit ilarpassui taamaaliorsimasut — nalunngeqatiginnissutillu nipaata sumiginnaannarneratigut ajorti peerneqarsinnaanngilaq.

Ilerasunnermik qamisaaneq, assersuutigalugu shintosiortut minguersartarnerat ikiortigalugu, assersuunneqarsinnaavoq napparsimasup kissarneranik sikut atorlugit appartitsiniaaneq. Immaqami kissarnera appartikkallarsinnaagaluarpaa, kissarneqarneranulli pissutaasoq peersinnaanngilaa. Aamma Jeremiasip nalaani palasit pruffiitillu tamakkununnga assingusunik atortoqarlutik israelikkunnik ’ikiuiniartarsimapput’. Inuit anersaakkut ileqqussatigullu nappaataannik „ajornaateqanngivissutut katsorsarniartarpaat“ oqarlutik: ’Ajortoqanngilaq! Ajortoqanngilaq!’ (Jeremia 6:14; 8:11, An American Translation) Upperisarsiornikkulli ileqqulersuutit ’ajortoqannginneranillu’ neriulluarsaarutit ikiortigalugit Guutip innuttaasa akornanni ileqqussatigut nakkaassimaneq iluarsineqarsinnaasimanngilaq. Ullumikkuttaaq ’minguersarnerit’ inuit ileqqussatigut inissisimanerannik allanngortitsisinnaanngillat.

Nipaallisaatitornikkut kissarneq appartinneqarsinnaagaluartoq taamaattoq virusi timimiittuassaaq. Taamatuttaaq ippoq kungfutsesiortut eqqarsaataat, tassa ajoqersuinikkut ajorti piiarneqarsinnaasoq. Immaqami ajoqersuinikkut inuit iliuutsinik ajortunik taamaatitinneqarsinnaagaluarput, lilli maleruarneratigut ajortilittut periataartarnerit naqisimaneqaannartarput — inunnguutsimik ajortilittut ilioriataartarnerit ajortumik iliornernut pissutaasartut peerneqarneq ajorlutik. — 1 Moses 8:21.

Taavami buddhasiortut ajoqersuutaat, ajortilittut periaatsit tamaasa katannerisigut nirvana anguneqarsinnaasoq? Oqartoqartarpoq nirvanamut, „nungutitsineq“-mik isumaqarnerarneqartartumut — pilerissutsinik kissaatinillu tamanik nungutitsinermut — anngunneq nassuiarneqarsinnaanngitsoq. Ilaat oqarniartarput tassaasoq inuup kinaassusiata nunguffia. Tamatuma assigiinnannginnerpaa napparsimasumut kissarnilerujussuarmut oqarneq anniarunnaarumaguni toquinnassasoq? Aammalu nirvanamik angusineq ajornartorujussuartut, allaammi ajornarluinnartutut, isigineqartarpoq. Ajoqersuutip taama ittup inuk ilerasuuteqartorujussuaq ikiorsinnaanerpaa?

Ajortimit aniguisitaaneq

Ersarippoq inuit inuunermut ajortimullu isumaliutersuutaat annerpaamik taamaallaat ilerasunnermut ’nipaallisaataaginnarsinnaasartut’. Ajortiliussutsimik peersitsisinnaanngillat. (1 Timûtiuse 6:20) Arlaatigummi ajorti peerneqarsinnaava? Biibilimi ajortimit aniguisinneqarnissaq eqqartorneqarpoq. „Ajortuliasi aappillarissaatitut aappalutsigigaluarunik aputitut qaqortigilissapput; . . . Naalakkumagussi nunap ajunngitsuutai nerissavasi.“ (Jesaja 1:18, 19) Tassani Jehovap israelikkut, uffa taassumunnga innuttaallutik assuarnaassutsimut najoqqutassiaanik unioqqutitsisut, oqaluffigai. Tamannali aamma inuiannut tamanut tunngavoq. Ajortitsigut minguiarneqarumagutta — allatut oqaatigalugu ajortuliavut peerneqassappata — Pinngortitsisup uagutsinnut oqaasii tusarnaartariaqarpavut maleruarlugillu.

Inuiaat qanoq ilillutik ajortimikkut minguiarneqarsinnaanerat pillugu Guutip oqaasiani qanoq paasissutissaqarpa? Soorlu inuiaat inuup ataatsip ajortuliornera pissutigalugu ajortimit qulangerneqarsimasut, taamatut inuit naalattut inuup ataatsip naammalluinnartup Guutimut naalannera pissutigalugu aniguisinneqarsinnaapput. (Rûmamiut 5:18, 19) Qanoq ililluni? Aap, ’Guutip asannissutsi uatsinnut nalunarunnaarsippaa, suli ajortuliortilluta Kristusip toqussutigimmatigut’. (Rûmamiut 5:8) Jesus Kristusip naammalluinnartuulluni ajorteqaranilu inuusimagami taamaalillunilu Adam ajortuliunngikkallarmat naligalugu, inuiaat ajortiliussusiat peersinnaasimavaa. (Jesaja 53:12; Juánase 1:14; 1 Pîtruse 2:24) Jesusip qisummi ajortuliortutut toqutaagami inuiaat ajortimit toqumillu annaappai. Paulus kristumiunut Romimiittunut ima allassimavoq: ’Suli sanngiitsuutilluta nalliuffissaagut Kristusip iluaatsut toqussutigai. . . . Tassa soorlu ajorti toqukkut naalagaasoq, taamattaaq saammaanneq iluarnikkut naalagaassavoq inuunermut naassaanngitsumut Jesus Kristusikkut Naalakkatsigut.’ — Rûmamiut 5:6, 21.

Kritus inuiaat sinnerlugit toqusimavoq, tassa Adamip ajortuliornerata oqimaaqatigiikkunnaarsitaa oqimaaqatigiissikkamiuk. Taamaalilluni ’utertinneqaatissaq’ tunniussimavaa. (Matîuse 20:28) Tamanna virusimut kissarneqassutaasumut nakorsaammut assersuunneqarsinnaavoq. Jesusip utertitsissutitut pilliutaa iluaqutigalugu inuiaat atukkaminnit avaanngunartunit, aamma toqumit, ajortip kingunerisaanit ajorunnaarsinneqarnissaannut periarfissaqalersimavoq. Ajorunnaarsitsineq tamanna Biibilip atuagartaasa kingullersaanni assersuutitut eqqartorneqarpoq: ’Illuisa akornata qeqqani kuussuullu sinaani illugiinni ippoq orpik inuunartoq aqqaneq-marlunnik inerititsisartoq, qaammatit nungullugit inerititaqartartoq; orpiullu taassuma pilutai inuiaqatigiinnut katsorsaataapput.’ (sarĸúmersitat 22:2) Eqqarsaatigeriaruk! Kuussuaq assersuutaasoq inuunerup orpiisa akornisigut inuunerup ernganik kuutsitsisoq — inuiaat ajorunnaarsinneqarniassammata. Guutimit isumassarsisitaanikkut assersuusiat tamakku tassaapput inuiaat Jesusip utertitsissutitut pilliutaa tunngavigalugu makiteqqinnissaannut Guutip aaqqissuussai.

Takorruukkat siulittuutaasut sarĸúmersitat-niittut qanittukkut piviusunngussapput. (sarĸúmersitat 22:3, 7) Jesusip utertitsissutitut pilliutaata nalinga tamakkiisumik atorneqalerpat unneqqarissumik uummatillit tamarmik naammalluinnartunngortinneqassapput ’aserujasumullu kiffaasut kiffaajunnaarsinneqarlutik Guutip qitornaasa kiffaanngissusiata naalannaataat pigilerlugu’. (Rûmamiut 8:21) Biibilimi siulittuutit eqquunnerisa ersersippaat kiffaajunnaarsitaanissaq nuannersoq tamanna qanillisoq. (sarĸúmersitat 6:1-8) Guutip erniinnaq nunarsuaq ajussuseerutitissavaa, inuillu nunarsuarmi paratiisiusumi naassaanngitsumik inuulissapput. (Juánase 3:16) Taava silarsuarmi tamarmi ajorti peerneqassaaq! (wD 1/11 92)

[Qupp. 8-mi assiliartaq]

Jesusip utertitsissutitut pilliutaa pissutaalluni ilaqutariit ukutut ittut pilluarneq naassaanngitsoq misigisinnaalissavaat