Ajorti pillugu ilumoortoq

NAPPARSIMASUP kissarnersiutip aserorneratigut kissarneqannginnini uppernarsarsinnaavaa? Soorunami naamik! Inuppassuit Guutip ajortimut isiginnittaasia akuersaanngilaat, tamannali ajortip piunnginneranut uppernarsaataava? Taassuma oqaasiani, Biibilimi, tamanna pillugu allassimasorpassuaqarpoq. Ajorti pillugu Biibilimi qanorpiaq allassimasoqarpa?

Kikkut tamarmik kukkusarput

Ukiut 2000-it missiliorlugit matuma siorna apustili Paulusi nukillalaarpoq ‘ajunngitsoq piumasarigaluani iliuuserinngitsoortaramiuk ajortorli piumanngisani iliuuserisarlugu’. (Romamiut 7:19) Unneqqarissuugutta nassuerutigisariaqarparput aamma uagut taamaalluta. Immaqa Inatsisinik Qulinik ileqqussatigulluunniit najoqqutassianik allanik maleruaarusuppugut, tamattali kukkorusunngikkaluaraangattaluunniit kukkusarpugut. Imaanngilaq piaaraluta eqqunngitsuliortartugut — sanngiiginnarpugut. Sooq? Paulusi nammineq ima akivoq: “Piumasarinngisannik ilioruma taama iliortoq tassaajunnaarpoq uanga, tassaallunili ajorti ilunniittoq.” — Romamiut 7:20.

Paulusitut tamatta inunnguuseralugu sanngiissutit — kingornussamik ajorteqarnermut naammalluinnanngissutsimullu uppernarsaataasut — naalliuutigisarpavut. Apustili ima allappoq: “[Tamarmik] ajortuliorput Guutimit naalannassuseq pigiunnaarlugu.” Sooq taamaappa? Paulusi ima nangippoq: “Inukkut ataasiinnakkut [Adamikkut] ajorti silarsuarmut [tikiuppoq] ajortikkullu toqu tikiulluni, taamatut toqu inunnut tamanut annguppoq tamarmik ajortuliormata.” — Romamiut 3:23; 5:12.

Inuppassuit ajoqersuummik tamatuminnga — siuaasatta siulliit unioqqutitsinerata kinguneranik inuit Guutimit ungasillisimanerannik taamaalillutillu aallaqqaammut naammalluinnartuusimagaluarlutik naammalluinnartuujunnaarsimanerannik ajoqersuummik — akuerinninngikkaluartut, Biibilimi tamannarpiaq ajoqersuutigineqarpoq. Jiisusip Adamimik Evamillu oqaluttuaq upperaa, soorlu tamanna ersertoq Mosesimik allakkani siullerni kapitalit siulliit issuaavigimmagit. — 1 Mosesi 1:27; 2:24; 5:2; Matthæusi 19:1-5.

Tusarliussami Biibilimiittumi ajoqersuutit tunngaviusut ilaat tassaavoq Jiisusip nunarsuarmut pinera upperinnitsini ajortiliussusiannit utertinniarlugit. (Johannesi 3:16) Jehovap inuit qujamasuttut pissutsinit aqussinnaanngisaannit annaanniarlugit aaqqiissutaanik akuerinninnerput akuerinninnginnerpulluunniit siunissamut neriuutitsinnut aalajangiisuuvoq. Guutip isiginnittaasianit ajortip suunera ilisimalluanngikkutsigu, taassuma tamatumannga annaanniarluta aaqqiissutaa paasisinnaanagulu qujamasuutigisinnaanavianngilarput.

Jiisusip pilliutaa, aamma sooq pisariaqartoq

Jehovap angut siulleq, Adami, naassaanngitsumik inuunissamut periarfissaqartippaa. Aatsaat Guutimut pikitsitsiguni naassaanngitsumik inuunissamut periarfissaq nuanningaartoq periarfissariunnaassavaa. Adami pikitsitsivoq, pikitsitsigamilu ajortilinngorpoq. (1 Mosesi 2:15-17; 3:6) Adami Guutip piumasaanut akerliusumik iliorpoq, naammalluinnanngitsunngorluni Guutimullu attaveqarnerminik aseruilluni. Guutip inatsisaanik unioqqutitsinermigut ajortuliorami utoqqaliartulerpoq naggataatigullu toqulluni. Alianaraluartumik Adamip kinguaavi tamarmik — tassa inuit tamavimmik — ajortiliullutik inunngorput taamaattumillu toqusussaallutik. Sooq?

Apeqqummut tamatumunnga akissut paasiuminarpoq. Angajoqqaat naammalluinnanngitsut naammalluinnartunik meerartaarsinnaanngillat. Adamip kinguaavi tamarmik ajortiliullutik inunngorput, aamma soorlu apustili Paulusi allattoq: “[Ajortip] akissarsiarititaa tassa toqu.” (Romamiut 6:23) Versilli tamatuma naggataatungaani ima neriuutissinneqarpugut: “Guutilli saammaannermit tunissutaa tassaavoq inuuneq naassaanngitsoq Kristusi-Jiisusimi Naalakkatsinni.” Tassa imaappoq, Jiisusip pilliutitut toquneratigut inuit qujamasuttut Guutimut naalattut Adamip ajortuliaanit sunniuteqarfigineqarunnaarnissamut periarfissaqalerput.a (Matthæusi 20:28; 1 Petrusi 1:18, 19) Tamanna pillugu qanoq misigisariaqarpit?

Kristusip asanninnerata “pinngitsaalivaatigut”

Apustilip Paulusip apeqqummut qulaaniittumut Guutip akissutaa isumassarsisitaalluni allappaa. Ima allappoq: “[Kristusip] asanninnerata pinngitsaalivaatigut isumarput tassaammat ataatsip tamaasa toqussutigimmagit . . . Taassumalu tamaasa toqqutigai inuusut imminnik pillutik inuujunnaaqqullugit, imminnilli toqqutiginnittoq makissimasorlu pillugu inooqqullugit.” (2 Korinthimiut 5:14, 15) Jiisusip pilliutaa ajortip sunniutaanit aniguissutaasinnaasoq paasigaanni — tamatuminngalu qujamasuutiginninnermik ersersitsiumagaanni — Guutip piumasaanut naapertuuttumik inuunissaq anguniartariaqarpoq. Taamaaliornermut ilaavoq Guutip qanoq piumasaqarneranik paasinninneq, najoqqutassiat Biibilimiittut malillugit nalunngeqatiginnissummik ilinniartitsineq najoqqutassianullu taakkununnga naapertuuttumik inuuneq. — Johannesi 17:3, 17.

Eqqunngitsulioraangatta, tamanna Jehovamut Guutimut attaveqarnitsinnut ajoqutaasarpoq. Kunngip Daavip Batsebamut allasiorlunilu taassuma uia toqutaatikkamiuk qanoq ingasatsigisumik ajortuliorsimalluni paasigamiuk qularnanngitsumik kanngusungaarsimassaaq. Pissutissaqarluarlunili isumakuluutiginerpaavaa Guutimut aamma ajortuliornini. Peqqissimingaarluni Jehovamut ima nassuerpoq: “Ilinnut, ilinnuinnaq, ajortulisimavunga illillu isinni ajortunik iliorsimallunga.” (Tussiaat 51:6) Aamma Josefi kinguaassiuutitigut inuunerlunnissamut usserneqarami, nalunngeqatiginnissutini pissutigalugu ima aperaaq: “Qanoq taama kanngunartigisumik iliussaanga Guutimut ajortuliorlunga?” — 1 Mosesi 39:9.

Tassa ajorti eqqunngitsuliornitta paasineqarneranik kanngusuutiginninnermut tunngassuteqaannanngilaq. Aamma arlaannik anguniagaqannginnerput pissutigalugu allanut innuttaaqatigiinnulluunniit nassuertussaanitsinnut tunngassuteqaannanngilaq. Guutip kinguaassiuutitigut ileqqussanut, unneqqarissaarnermut, ataqqinninnermut, pallorfiginninnermut allanullu tunngatillugu inatsisai unioqqutikkaangatsigit, taassumunnga attaveqarnerput ajoqusertarparput. Piaaraluta ajortuliortuartarutta imminut Guutimut akeranngortissaagut. Tamanna eqqarsaatigeqqissaartariaqarparput. — 1 Johannesi 3:4, 8.

Taava ajortimut tunngatillugu suna allanngorsimava? Ajorti allanngorsimanngilaq, inuit-uku tamatumunnga isiginnittaasiat allanngorsimasoq. Inuit ajorti allanik taaguutilerlugu atortaliinnarsimavaat ilumoorussassaarpalunnginneruniassammat. Inuppassuit nalunngeqatiginnissutiminnik misikkarlussisitsisimallutilluunniit sumiginnaasimapput. Guutimit iluarisaarusuttut tamarmik taamaaleqqajaajumanatik akiuuttariaqarput. Soorlu paasereeripput, ajortip akissarsiarititaa tassaaginnanngilaq nikanarsagaasutut misigineq kanngusunnerluunniit, aammali tassaavoq toqu. Ajorti inuunermut toqumulluunniit aalajangiisuuvoq.

Jiisusip pilliutaata saammaanneqaatissatut nalinga iluaqutigalugu ajortuliavut ilumoorluta peqqissimissutigigutsigit iliuuserisarunnaarutsigillu isumakkeerfigineqarsinnaanerput nutaarsiassaavoq nuannersoq. Paulusi ima allappoq: “Pilluarput unioqqutitsinerminnik isumakkeerfigineqartut, ajortuliaminnik matooriffigineqartut. Pilluarpoq inuk [Jehovap] ajorteqartinngisaa.” — Romamiut 4:7, 8.

[Quppernerup ataani ilanngussaq]

[Qupp. 10-mi ungalusaq/​assiliartaq]

Teologiimut tunngatillugu allanngortoqariataartoq

Limbomik isumaliutersuut katuullit amerlanersaannut paasissaalluanngitsuujuarsimavoq. Ukiuni qulikkuutaani kingullerni ajoqersuut taanna pingaaruteqarunnaariartuinnarsimavoq — ima pingaaruteqarunnaartigisimalluni katekismuusini allassimajunnaarluni. 2007-imi ilagiit katuullit limbomik ajoqersuut pisortatigoortumik atuukkunnaarsippaat allagaqarlutik “teologiimut naalagiartitsinermullu tunngasut tunngavigalugit naalungissat kuisissimanatik toqusut annaanneqarsinnaanerata naassaanngitsumillu pillualersinnaanerata neriuutiginissaanut pissutissaqarluartoq”. — International Theological Commission.

Sooq teologiimut tunngatillugu isummamik taamatut allanngueriataartoqarpa? Ilagiit tamanna aviisiliortup franskip Henri Tincq-ip “kingornussarsiamik artornartumik ukiunit akullerniit 1900-kkut tikillugit ilagiinnit uukapaatitsiniartunit, angajoqqaat meeqqaminnik sukkanerpaamik kuisitsitsisinniarlugit limbo pillugu sioorasaarummik atuilluartunit, illersorneqartumik” taasaanit avissaarnissamullusooq periarfissaqalissutigaat. Limbomilli ajoqersuummik atorunnaarsitsineq allanik apeqqutissaqalersitsivoq.

Oqaluttuarsiaq ajoqersuulluunniit Biibilimik tunngavilik? Limbomik ajoqersuut 1100-kkunni innermik eqqiarfimmik teologiimut tunngatillugu eqqartuinerup kinguneranik pilerpoq. Ilagiit katuullit tarneq toqup kingorna ingerlaqqittarnerarpaat, taamaammat meeqqat tarningi kuisissimannginnertik pissutigalugu qilaliarsinnaanngitsut aammali anniarfimmukartariaqanngitsut qanoq pineqartarnersut nassuiartariaqarpaat. Limbomik ajoqersuut taamaalilluni pilerpoq.

Biibilimili allassimanngilaq toqunermi inuup ilaata takussaanngitsup timi qimattaraa arlaatigullu inuuinnarluni. Toqunganerli ilisimannginnertut eqqartorneqarpoq; sininnermut assersuunneqarpoq. (Oqaluussisartup oqaasii 9:5, 10; Johannesi 11:11-14) Timi toqugaangat arlaannik inuuinnartoqartanngimmat limboqarsinnaanngilaq.

Biibilimi erserpoq Guutip meeraaqqat kristumiunik angajoqqaallit illernartutut isigigai. (1 Korinthimiut 7:14) Taamatut allassimasoqarnera siunertaqassanngikkaluarpoq naalungissat annaanneqarsinnaajumallutik kuisittariaqartassappata.

Limbomik ajoqersuut Guutimut narrunarsaataalluinnarpoq. Ajoqersuut tamanna pissutigalugu taanna naakkittaalluni qunutitsisutut isigineqalerpoq, naak Biibilimi Ataatatut naapertuilluartutut asannittutullu allaatigineqaraluartoq. (5 Mosesi 32:4; Matthæusi 5:45; 1 Johannesi 4:8) Tupinnanngilaq kristumiut eqqortuliorusuttut isumaqartuaannarsimammata ajoqersuut Biibilimik tunngaveqanngitsoq tamanna silaqassutsimut naapertuutinngilluinnartoq!

[Qupp. 9-mi assiliartat]

Guutip oqaasia naapertorlugu inuugutta, tamanna Guutimut tullitsinnullu attaveqarlualernitsinnik kinguneqassaaq