„Pissarsiat qulingi ilanngarnagit aattarniarsigit naalaffiup toqqorsiviinut“
„Taamaalillusi misilinniarsinga, . . . Taava qilaap suppivii ammassavakka pilluaatissiissutinillu killiligaanngitsunik kueraaffigissallusi.“ — MALAKI 3:10.
1. (a) Ukiunik naatsorsuisalerfitta siorna ukiut hundredellit tallimassaanni Jehovap innuttani qanoq kajumissaarsimavai? (b) Ukiunik naatsorsuisalerfitta kingorna ukiuni hundredellit siullerni Jehovap naalaffimmut tikiunnera sumik nassataqarsimava?
UKIUNIK naatsorsuisalerfitta siorna ukiut hundredellit tallimassaanni israelikkut Jehovamut ilumuunngitsuliortarsimapput. Pissarsiamik qulingi tunniutinngitsoortarsimavaat uumasunillu pitsaanngitsunik naalaffimmut pilliisarsimallutik. Jehovalli neriorsorsimavai pissarsiamik qulingi tamaasa tunniuttarpatigik pilluaqqussutissanik sinnilissuarnik kueraavigissallugit. (Malaki 3:8-10) Ukiut 500-t missaanniittut qanngiummata Jehova sinnerlugu Jesus aallartitatut angerfigeqatigiissitsisussatut eqqartuussiartorluni Jerusalemimi naalaffimmut tikiuppoq. (Malaki 3:1) Israelikkut inuiattut iluarisaanngitsutut tunuartitaapput, inuilli ataasiakkaat Jehovamut utertut naammangaartumik pilluaqqusaapput. (Malaki 3:7) Jehovap anersaakkut ernerisut, pinngortitatut nutaatut, ’Israelitut Guutip piatut’, taninneqarput. — Galâsiamiut 6:16; Rûmamiut 3:25, 26.
2. Malaki 3:1-10 qaqugu aappassaanik eqquuttussaasimava, tamatumunngalu atatillugu qanoq kajumissaarneqarpugut?
2 Ukiut 1900-ngajaat qaangiummata, 1914-imi, Jesus Guutip qilammi naalagaaffiani kunngitut issiavissaarsuarmut ivertitaavoq, taamanilu oqaatsit Malaki 3:1-10-miittut aappassaanik eqquunissaannut piffissanngorpoq. Pisimasumut pissanganartumut tamatumunnga atatillugu ullumikkut kristumiut kajumissaarneqarput pissarsiamik qulingi ilanngarnagit naalaffiup toqqorsiviinut ilisassagaat. Kajumissaarut tamanna maleruarutsigu sinnilissuarmik pilluaqqusaassaagut.
3. Aallartitaq Jehovap aqqutissaanik piareersaasussaq kinaasimava (a) ukiuni hundredelinni siullerni? (b) sorsunnersuup siulliup pinnginnerani?
3 Naalaffimmut tikiunnini pillugu Jehova ima oqarsimavoq: „Inngiliga aallartissavara aqqutissara siunikkut iluarsaqqullugu.“ (Malaki 3:1) Siulittuut tamanna ukiuni hundredelinni siullerni eqquuppoq Johannes Kuisisoq Israelimut pimmat ajortillu isumakkeerneqaatissaattut isumataarnissaq oqaluussissutigalugu. (Mákorse 1:2, 3) Jehovap aappassaanik naalaffimmut tikiunnissaanut atatillugu aamma piareersataasumik sulisoqarsimava? Aap, sorsunnersuup siulliup siorna ukiut qulikkaat ingerlaneranni Biibilimik atuaqqissaartartut saqqummilersimapput Biibilillu ajoqersuuta minguitsut ilinniartitsissutigalugit, kiisalu sallut Guutimut mitalliutaasut, soorlu ataasiullunilu pingasuussutsimik anniarfimmillu ikualasumik ajoqersuutit, qulaarlugit. Mianersoqqussutigisimavaallu Guutimik nalusut ullussaat 1914-imi naajumaartut. Qaammaqqusersuisut taakku sallusuissummik nalunaajaasut amerlasuunit tusarnaarneqarput. — Tussiaat 43:3; Matîuse 5:14, 16.
4. Apeqqut suna Naalakkap ulluani aalalajangerneqartussaasimava?
4 1914-imi Biibilimi taaneqartoq ’Naalakkap ullussaa’, pingaaruteqartut pisalerfissaat, aallartippoq. (sarĸúmersitat 1:10) Ilaatigut „inussiaq aalajaallunilu silatooq“ kinaassusersineqartussaasimavoq ’Naalakkamilu pigisaanut tamanut paarsisunngortitaassalluni’. (Matîuse 24:45-47) 1914-imi upperisarsioqatigiippassuaqarsimavoq kristumiuunerartunik. Sorliimmita Naalakkap, Jesus Kristusip, inussiamisut aalajaallunilu silatuutut akuerissavai? Jehova naalaffimmut tikiuppat apeqqut tamanna akineqassaaq.
Jehova anersaakkut naalaffiutiminut tikiuppoq
5, 6. (a) Naalaffik suna Jehpovap eqqartuussiartorluni tikiuffigisimavaa? (b) Kristumiuuneraqatigiit Jehovap qanoq eqqartuussassanngortippai?
5 Naalaffilli sorleq tikiuffigaa? Naalaffivik Jerusalemimiittoq tikiuffiginngilaa. Naalaffik kingulleq ukiumi 70-imi u.n.k. aserorneqarsimavoq. Annerusumilli, Jerusalemimi naalaffik atorlugu siulittuutigineqartumik, Jehova naalaffiuteqarpoq. Naalaffik annerusoq taanna Paulusip eqqartorsimavaa ersersissillugulu qanorpiaq angitigisoq, qilammi illernartumik inissisimaffeqartoq nunamilu maani silarleqarluni. (Eprîarit 9:11, 12, 24; 10:19, 20) Tassa naalaffimmut anersaakkut ittumut angisuumut tassunga Jehova eqqartuussiartorluni tikiussimavoq. — Naleqqiuguk sarĸúmersitat 11:1; 15:8.
6 Qanga tamanna piva? 1918-imi pisimaneranut takussutissaqarluarpoq.a Qanoq kinguneqarpa? Jehovap paasivaa kristumiuuneraqatigiit assaat aammik kusersut, upperisarsiornikkut aaqqissuussaasut ajortunngorsimasut silarsuarmut matumunnga atortittartuullutik. Taamaaliorput pisuunik peqateqarnermikkut piitsunillu naqisimanninnermikkut, minguitsumillu pallorfiginninnissamut taarsiullugu Guutimik nalusut ajoqersuutaannik ajoqersuuteqarnermikkut. (Jâko 1:27; 4:4) Malakias aqqutigalugu Jehova mianersoqqusilluni ima oqarsimavoq: „Piaarlunga unnerluutigiumaarpakka angakkuarnittartut allasiortullu sallullutillu uppernarsaasartut, sulisartut akissarsiassaannik tunniussinngitsoortartut, takornartat uillarnerillu iliarsuillu naapertuilluartumik pineqarnissarigaluannik mimitsisut.“ (Malaki 3:5) Tamakku tamaasa, sulilu ajornerusut, kristumiuuneraqatigiit iliuuserisimavaat. 1919-p missaani nalunarunnaarpoq kristumiuuneraqatigiit Babylon Angisuumut, silarsuaq tamakkerlugu upperisarsiornerit ilumuunngitsut ataatsimut isigalugit, ilaalluni suujunnaarsitaasussanngortitaasimasut. Taamanimiit inunnut eqqortuliorusuttunut tamanut manna kajumissaarutaalerpoq: ’Taassumannga anigitsi, innuttakka.’ — sarĸúmersitat 18:1, 4.
7. Jesusip kikkut inussiamisut aalajaallunilu silatuutut akuerai?
7 Kinami taava inussiaava aalajaallunilu silatooq? Ukiuni hundredelinni siullerni inuppaalunnguit eqimattat Johannes Kuisisumut ’aallartitamullu angerfigeqatigiissitsisussamut’, Jesus Kristusimut, ajunngitsumik qisuariartut ataatsimut tassaasimapput inussiaq aalajaallunilu silatooq. Ukiunilu hundredelinni uagut nalitsinni inussiaq aalajaallunilu silatuumut ilaasut tassaasimapput inuit tuusintilippaaluit ukiuni 1914-p tungaanut Biibilimik atuaqqissaartartut oqaluussinerannut ajunngitsumik qisuariartut. Sorsunnersuup siulliup nalaani sakkortuumik malersugaasimapput, takutissimavaalli uummatertik Jehovamut sammisuusoq.
Minguiaaneq
8, 9. Sooq inussiaq aalajaallunilu silatooq 1918-imi minguiarneqartariaqarsimava, tamatumunngalu atatillugu Jehova qanoq neriorsuisimava?
8 Allaalli aamma taakku minguiarneqartariaqarsimapput. Taakkununnga ilanngussimasuugaluit ilaat paasineqarput uppernermut akeraasut taamaattumillu peersinneqartariaqarsimallutik. (Filípimiut 3:18) Ilaallu akisussaaffimmik Jehovamut kiffartornerup nassatarisaanik tigusinissaminnut piumassuseqarsimanngillat, tunuariartuaarsimallutillu. (Eprîarit 2:1) Aammalu ileqqut Babylonimiorpaluttut piiarneqartariaqarsimapput. Peqatigiiffeqarnerlu eqqarsaatigalugu inussiaq aalajallunilu silatooq minguiarneqartariaqarsimavoq. Taassumunnga ilaasut paasisariaqarsimavaat silarsuarmi pissutsinut akuliusimannginnissap qanoq paasisariaqarnera. Silarsuarlu ajornerujartuinnartillugu ilagiit anersaakkut ileqqussatigullu minguitsuutinniarlugit sakkortunerujartuinnartumik akiuuttariaqarsimapput. — Naleqqiuguk Jûtarse 3, 4.
9 Tassa minguiaanissaq pisariaqarsimavoq, kunnginngortitaasorli, Jesus, pillugu Jehova asannittumik ima neriorsuisimavoq: „Ingikkumaarpoq aatsitsissalluni sølvimillu akuiaassalluni. Levikkut eqqiarumaarpai kuultitut sølvitullu akuiarlugit iluartumik [Jehovamut] pilliisinnaaqqullugit.“ (Malaki 3:3) 1918 aallarnerfigalugu aallartitaq angerfigeqatigiissitsisussaq aqqutigalugu Jehovap neriorsuunni tamanna eqquutsillugu innuttani minguiarsimavai.
10. Guutip innuttai sunik pilliuteqartarsimappat, Jehovamillu qanoq kajumissaarneqarsimappat?
10 Kristusip qatanngutaasa tanitaasut amerlangaartullu kingorna taakkuninnga Jehovamut kiffartoqatiginnilersut tamarmik Jehovap minguiaanera akuiaaneralu iluaqutigisimavaat. (sarĸúmersitat 7:9, 14, 15) Peqatigiiffittut ’iluartumik pilliisarsimapput’, sulilu taamaaliortarlutik. Pilliutaallu ’Jehovamut nuannarinartuupput itsartut’. (Malaki 3:4) Taakkuupput Jehovap siulittuutaasumik ima kajumissaagai: „Pissarsiat qulingi ilanngarnagit aattarniarsigit naalaffiup toqqorsiviinut, uanga illunni nerisassamaateqaqqullugu. Taamaalillusi misilinniarsinga, oqarpoq katersaarsuit [Jehovaat]. Taava qilaap suppivii ammassavakka pilluaatissiissutinillu killiligaanngitsunik kueraaffigissallusi.“ — Malaki 3:10.
Pilliutit pissarsiallu qulingi
11. Sooq Mosesip inatsisaani pilliutigineqaqquneqartut atorunnaarsimappat?
11 Malakiasip nalaani Guutip innuttai pivinnik pilliisarsimapput pissarsiamillu qulinginik tunisisarsimallutik karrinik, naatitanik uumasuutinillu. Aamma Jesusip nalaani israelikkut aalajaatsut pivinnik naalaffimmi pilliisarsimapput. Jesusilli toqunerata kingorna tamakku tamarmik allanngorput. Mosesip inatsisai atorunnaarsinneqarput, ilaatigut aalajangersimasunik pilliisarnissaq pissarsiallu qulinginik tunisisarnissaq pillugit inatsisit. (Evfisumiut 2:15) Mosesip inatsisaasa atuunnerata nalaani pilliutit siulittuutaasumik Jesusimut tikkuartuisuusimapput. (Evfisumiut 5:2; Eprîarit 10:1, 2, 10) Taavami ullumikkut kristumiut qanoq ilillutik pilliillutillu pissarsiamik qulingi tunissutigisarsinnaavaat?
12. Pilliutit anersaakkut ittut suut kristumiut pilliutigisarpaat?
12 Kristumiut pilliutissaat anersaakkut ittuinnaapput. (Naleqqiugk Filípimiunut agdlagkat 2:17; Timûtiusimut agdlagkat áipait 4:6.) Assersuutigalugu, oqaluussineq Paulusip pilliutitut eqqartorsimavaa ima oqarluni: ’Taamaattumik soraarata taassumuuna pilliutinik qujaniutinik Guuti aatsivigisigu, tamassa qarlut taassuma aqqanik nassuerutiginnittut anitaannik.’ Aamma pilliutit allatut ittut tikkuarpai ima oqarami: ’Puioqinasili avaaginnittassagassi tukkorlusilu, pilliutit taamaattut Guutip iluarimmagit.’ (Eprîarit 13:15, 16) Angajoqqaat meeqqatik pionerinngornissaannik kajumissaaraangatigik oqaatigineqarsinnaapput Jehovamut pilliuteqartut, soorlu Jeftap panini Guutimut, imminik ajugaatitsisumut, ’ikikkagassatut pilliutigisimagaa’. — Eqqartuussisut 11:30, 31, 39.
13. Sooq kristumiut iluamik oqaatigalugu isertitamik qulerarterutaannik tunniussisarnissaminnut pisussaanngillat?
13 Pissarsiat qulinginik tunisisarneq qanoq isigisariaqarpa? Kristumiut, ullumikkut kristumiuuneraqatigiit ilaasa pisarnerattut, isertitamik qulerarterutaannik Jehovap peqatigiissortaanut tunissuteqarnissaminnut pisussaatitaappat? Naamik. Allassimaffinnik taamaattussaaneranik ersersitsisunik nassaassaqanngilaq. Paulus Judeami ajorsartunut katersuiniartitsigami oqarsimanngilaq procentimik aalajangersimasumik tunisissasut. Imali oqarpoq: ’Nungullutik uummatimik pilersaarutigisaannik tunisigilit uumitsannatik ajornartoortitaanatillu, kajumittumik tunisisoq Guutip asammagu.’ (2 Korintumiut 9:7) Immikkullu kiffartuuteqartut eqqartoramigit Paulus oqarpoq naak taakku ilaat piumassutsiminnik tunisiumasunit tapersersorneqartaraluartut tamannalu kukkusuunngikkaluartoq, taamaattoq nammineq imminut pilersorniarluni sulinissaminut piareersimalluni. (apustilit suliait 18:3, 4; 1 Korintumiut 9:13-15) Tamatumunnga atatillugu pissarsiat qulinginik akiliisarnissamik piumasaqarfigitittoqanngilaq.
14. (a) Pissarsiat qulinginik tunissuteqarneq sooq tassaanngila Jehovamut tunniulluinnarneq? (b) Pissarsiat qulinginik tunniusisarneq sumut assersuutaava?
14 Nalunanngilaq pissarsiat qulinginik tunisisarneq kristumiunut atatillugu arlaannut assersuutaasoq imaluunniit sinniisuusoq. Qulingi pineqarmata kisitsillu qulit Biibilimi nunami pissutsinut atatillugu tamakkiissutsimut assersuutaasarmat, taava aperisinnaavugut pissarsiat qulinginik tunisisaqqusineq assersuutaannginnersoq Jehovamut tamakkiisumik pigitinnissatsinnut. Naamik, Jehovamut tunniulluinnaraangatta tamannalu takutiniarlugu imermi kuisikkaangatta taassumunnga tamakkiisumik pigitilertarpugut. Jehovamut tunniulluinnareersimagaangatta Jehovap pigeriinngisaanik peeruttarpugut. Pigisattali nammineq atornissaannut kiffaanngissuseqartippaatigut. Taamaattumik pissarsiat qulinginik tunisineq assersuutaavoq pigisatta ilaannut Jehovamut tunniussatsinnut imaluunniit taassumunnga kiffartornitsinni atukkatsinnut. Taassumunnga asanninnitsinnut taassumalu uagutsinnik piginninneranut akuerinninnitsinnut ersersitsiniutaavoq. Pissarsiat qulingi ullumikkut tassaasariaqanngillat pissarsiatta qulerarterutaat. Ilaatigummi minnerusinnaapput, ilaatigullu annerusinnaallutik. Tamatta immikkut uummatitta kajumissusia sapinngisarpullu naapertorlugit tunisisarpugut.
15, 16. Pissarsiat qulinginik anersaakkut ittunik sunik tunissuteqarsinnaavugut?
15 Pissarsiat qulingi anersaakkut ittut taakku suuppat? Jehova ilaatigut piffissatsinnik nukitsinnillu tunisarparput. Piffissaq ataatsimiinnernut, ataatsimeersuarnernut oqaluussinermullu atugarput tassaavoq Jehovamut tunissut, pissarsiatta qulinginut ilaavoq. Taamatuttaaq oqaatigineqarsinnaavoq piffissaq napparsimasunut pulaarnermut allanillu ikiuinermut, imaluunniit ataatsimiittarfitsinnik sananermut, aserfallatsaaliinermut eqqiaanermullu atortagarput.
16 Pissarsiatta qulinginik tunissutitsinnut aningaasanik tunissuteqarneq ilaavoq. Ukiuni kingulliunerusuni Jehovap peqatigiissortaasa tupinnaannartumik amerliartorsimanerat pissutaalluni aningaasatigut pisussaaffiit annertusisimapput. Ataatsimiittarfinnik, immikkoortortaqarfinnik ataatsimeersuartarfinnillu nutaanik pisariaqartitsisoqarpoq, kiisalu pigeriikkatta aserfallatsaaliornissaannut. Aamma immikkut kiffartuuteqartunut kajumillutik ilaasut inuttullu annertuumik pilliuteqarsimasut tapersersorniarnerat suliassaavoq annertooq. 991-imi ajoqersuiartortitat, angalallutik nakkutilliisut specialpionerillu tapersersorniarnerinnaannut 40 millioner dollarsit atorneqarsimapput, aningaasallu tamakku tamarmik kaumissutsimik tunissutaapput!
17. Pissarsiat qulinginik anersaakkut ittunik qanoq annertugisunik tunissuteqartariaqarpugut?
17 Pissarsiat qulingi anersaakkut ittut qanoq annertutigisut tunissutigisariaqarpavut? Jehova procentimik aalajangersimasumik killiliisimanngilaq. Jehovamilli qatanngutitsinnillu asanninnerput, akisussaasutut misigisimanerput kiisalu suliap nukinginnartuuneranik inuillu inuunerannik annaassissutaasinnaaneranik ilisimanninnerput kajumississutigisariaqarparput pissarsiatta qulingi anersaakkut ittut tamaasa naalaffiup toqqorsiviinut tunissutiginissaannut. Misigivugut sapinngisamik annertuumik Jehova kiffartuukkusullugu. Erlittuujugutta uatsinnillu tunisisarnissarput pingaartinngikkutsigu assigissavaa ’Guutimit tillittugut’. — Malaki 3:8; naleqqiuguk Lúkarse 21:1-4.
Pilluaqqussutit sinnilissuit
18, 19. Jehovap innuttai pissarsiamik qulinginik tamanik naalaffiup toqqorsivianut tunniussisarnertik pissutigalugu qanoq Jehovamit pilluaqqusaasimappat?
18 1919-imiilli Jehovap innuttai oqaluussinermik suliaq tapersersorniarlugu piffissamik, nukinnik aningaasanillu tukkorlutik tunissuteqartuartarsimapput. Ilumut pissarsiamik qulingi ilannganngivillugit tunissutigisarsimavaat. Tamatuma kingunerisaanik Jehovap neriorsuutini eqquutsillugu pilluaqqussuterpassuarnik kueraaffigisimavai. Tamanna minnerunngitsumik ersersimavoq amerliartornerujussuisigut. 1918-imi Jehova naalaffimminut tikiummat tanitat tuusintialunnguanik amerlassuseqartut ima amerliartorsimatigipput ikiortitillu, savat allat, ullumikkut nunani assigiinngitsuni 211-ni 4 millioninit amerlanerulersimallutik. (Jesaja 60:22) Pilluaqqusaanerannut ilaavoq sallusuissummik paasinnikkiartuinnarnerat. Oqaatsit siulittuutaasut aalajangiunnerujartuinnarpaat. Jehovap siunertaasa eqquunnissaannut tatiginninnerat nukittornerujartuinnarpoq. (2 Pîtruse 1:19) Tassaapput inuiaat ’Jehovamit ajoqersorneqartut’. — Jesaja 54:13.
19 Pilluaqqussutissat aamma allat Jehovap Malakias aqqutigalugu eqqartorsimavai: „Taava [Jehovamik] mianerinnittut oqaloqatigiipput, [Jehovalu] naalaarpoq tusarnaarlunilu. Atuakkallu allanneqarput [Jehovap] aqqanik ataqqinnittut [Jehovamit] eqqaaneqaatissaannik.“ (Malaki 3:16) Upperisarsioqatigiinnit kristumiuunerartunit tamanit Jehovap Nalunaajaasui kisimik Guutip aqqanik eqqarsaatiginnittuarlutillu inuiaat akornanni unnersiutiginnipput. (Tussiaat 34:3) Pilluarput neriorsoqqissaarneqaramik aalajaannertik Jehovap eqqaamagaa.
20, 21. (a) Kristumiut ilumoortut qanoq ittumik Jehovamut attaveqarpat? (b) Assigiinngissut suna ersarinnerujartuinnarpa?
20 Sinneruttut tanitaasut Jehovap immikkut ittumik innuttarai, amerlangaartullu ilanngussortut ilagalugit pallorfiginninnerup minguitsup pilluaqqussutissartaanik katersuipput. (Sakarja 8:23) Malakias aqqutigalugu Jehova ima neriorsuisimavoq: „Ullormi iliuuseqarfissanni taakku erligisattut pigissavakka. Qajassuutissavakka, soorlu ataatap ernini kiffartortini qajassuuttaraa.“ (Malaki 3:17) Jehovap taakkuninnga asanningaarluni isumassuinera taakkununnga pilluaqqusaaneruvoq annertooq!
21 Kristumiut ilumoortut ilumuunngitsullu assigiinngissutaat ersarinnerujartuinnarpoq. Jehovap innuttai taassuma najoqqutassiaanik ilungersorlutik maleruaaniartut, kristumiuuneraqatigiit silarsuup marulluanut minguttuumut morsukkiartuinnarput. Paasinarsisimavoq Jehovap oqaasii uku ilumoortut: „Taava kingumut malugiumaarparsi iluartut guutiitsullu pineqarneri qanoq assigiinngitsigisut, Guutillu kiffartuussisaasa kiffartuussisiginngisaasalu atugaqartitaaneri qanoq assigiinngitsigisut.“ — Malaki 3:18.
22. Pissarsiatta qulingi tamaasa naalaffiup toqqorsiviinut tunissutigisarutsigik suna qularutigissanngilarput?
22 Kristumiunut ilumuunngitsunut eqqartuutiffissaq ungasinngitsukkut nalliutissaaq. „Maanna nalliutilerpoq ulloq uutsitsivittut ikumasutut ittoq. Soqqusaatsut guutitsutullu iliortut karriiarnikutut ilissapput; ullussallu piumaartussap ikikkassavai sorlannik avalequtinillu amiakkuerullugit, oqarpoq katersaarsuit [Jehovaat].“ (Malaki 4:1) Jehovap kiffaasa nalunngilaat taamanikkussamut asattuukkumaaraatik, soorlu inuiaat anersaakkut ittut ukiumi 70-imi u.n.k. asattuussimagai. (Malaki 4:2) Neriorsoqqissaarneqarnertik tamanna assorsuaq pilluaatigaat. Taamaattumik tamanna pitinnagu pissarsiatta qulingi ilanngarnagit naalaffiup toqqorsiviinut tunniuttarnerisigut Jehovamik pingaartitsinerput asanninnerpullu ersersittuartigik. Taamaalioruttalu qularutigissanngilarput pilluaqqussutinik sinnilissuarnik queraaffigissagaatigut. (wD 1/12 92)
[Quppernerup ataani ilanngussaq]
a Tamatumunnga paasissutissat allat Vagttårnet 15. juni 1987-imi, quppernermi 14-20-mi nassaassaapput.
Nassuiarsinnaaviuk:
□ Uagut nalitsinni qanga Jehova aallartitanilu angerfigeqatigiissitsisussaq naalaffimmut tikiussimappat?
□ Inussiaq aalajaallunilu silatuumut ilaasut kikkuuppat, 1918-illu kingorna qanoq minguiarneqartariaqarsimappat?
□ Pilliutit anersaakkut ittut suut kristumiut ilumoortut Jehovamut pilliutigisarpaat?
□ Pissarsiat qulingi kristumiunut naalaffiup toqqorsiviinut tunissutigisaqquneqartut suuppat?
□ Guutip innuttai pissarsiat qulinginik anersaakkut ittunik tunissuteqartarnertik pissutigalugu qanoq pilluaqqusaappat?
[Qupp. 18-mi assiliartaq]
Pissarsiat qulinginik anersaakkut ittunik tunissuteqarsinnaavugut rigssaliliornernut atatillugu nukitsinnik pigisatsinnillu tunissuteqartarnitsigut
[Qupp. 20-mi assiliartaq]
Jehovap innuttaminik pilluaqqusinera pissutaalluni ilaatigut rigssalerpassuarnik ataatsimeersuartarfippassuarnillu sanaartornissaq pisariaqarsimavoq