Jehovap pilluaqqusinera pisuunngortitsisarpoq
’Jehovap pilluaqqusinera pisuunngortitsisaraaq, erloqinartumillu ilasarinngilaa.’ — ÚSSATIT 10:22.
1-3. Suna akuerisariaqarpa, naak pigisanik isumakuluuteqartoqaraluaqisoq?
INUIT ilaasa aningaasat — aningaasanilluunniit amigaateqarnertik — kisiisa oqallisigisarpaat. Ajoraluartumilli ukiuni kingullerni assut oqallisigisassaqarsimapput. 1992-imi nunat killiit pisuujugaluit aningaasatigut ajornartoortarsimapput, inuillu qaffasissumik atorfillit sulisartullu suliffimminnik annaasaqartarsimapput. Inuppassuit isumaliutigisarpaat aningaasatigut patajaatsumik ingerlaleqqittoqarsinnaassanersoq.
2 Pigisat tungaatigut isumakuluuteqarneq kukkunerua? Naamik, ilaatigut pissusissamisoorpoq. Pisuussutilli eqqarsaatigalugit ilumoortoq tunngaviusoq akuerisariaqarparput, tassa timikkut pigisat tamarmik iluamik oqaatigalugu Pinngortitsisumit pisut. Taanna tassaavoq „Guuti [Jehova] qilammik pinngortitsisoq isuisillugulu, nunamik siaartitsisoq inerittuilu pinngortillugit, inuinut anersaarnermik tunniussisoq tassaniittunillu inuuneqalersitsisoq“. — Jesaja 42:5.
3 Jehovap siumut aalajangereersimanngilaa kikkut pisuujussasut kikkullu piitsuussasut, ’nunarsuarmilli inerittuinillu’ pisimasatsinnik qanoq atuinerput tamatta akisussaaffigisariaqarparput. Pigissaarutivut inoqatitsinnut naalagaaniarnermut atorutsigik Jehovap akisussaatissavaatigut. Pisuussutinullu inussiaataasup Jehovamillu illersuinngitsup kialuunniit misigissavaa ’pisuussutiminnik toqqamaveqartut orlusussaasut’. (Ussatit 11:28; Matîuse 6:24; 1 Timûtiuse 6:9) Pigissaaraluarluni uummatikkut Jehovamut naalatsigitinngikkaanni iluamik oqaatigalugu pigisat naleqarneq ajorput. — Nalunaajaasup oqaasii 2:3-11, 18, 19; Lúkarse 16:9.
Pigissaarneq pingaarnerpaaq
4. Sooq anersaakkut pigissaarneq timikkut pigissaarnermit pitsaanerua?
4 Timikkut pigissaarutit saniatigut Biibilimi aamma anersaakkut pigissaarutit, nalunanngitsumik naleqarneroqisut, eqqartorneqarput. (Matîuse 6:19-21) Anersaakkut pigissaarneq ilaatigut tassaavoq Jehovamut attaveqarneq pisuunngornartoq naassaanngitsumik atasinnaasoq. (Nalunaajaasup oqaasii 7:12) Guutip kiffai anersaakkut pisuujusut timikkuttaaq pilluaqqussutisianik amigaateqarneq ajorput. Silarsuassami nutaami anersaakkut pigissaarneq timikkut pigissaarnermut atassaaq. Aalajaatsut nunap piisigut toqqissisimaneq, ullumikkutut unammillernikkut nuanniitsukkut imaluunniit peqqinnerup pilluarnerullu pilliutigineratigut angusaanngitsoq, nuannaarutigisinnaassavaat. (Tussiaat 72:16; Ussatit 10:28; Jesaja 25:6-8) Misigissavaat ’Jehovap pilluaqqusinera pisuunngortitsisartoq, erloqinartumillu ilasanngikkaa’. — ússatit 10:22.
5. Timikkut pigisat pillugit Jesus qanoq neriorsuisimava?
5 Allaat ullumikkut anersaamut tunngasunik sallerpaatitsisut timip piisigut toqqissisimaneq misigisarpaat. Soorunami akiligassatik akilersinnaajumallugit ilaquttatillu inuussutissaqartikkumallugit sulisariaqartarput. Immaqa ilaasa allaat aningaasatigut ajornartorsiorfiup nalaani suliffitik annaasarpaat. Isumakulutsitsisinnaasulli tamakku nikallussutigineq ajorpaat, Jesusip neriorsuutaa manna tatigigamikku: ’Taamaattumik isumakulussanngilasi oqarlusi: Suna nerissavarput? Suna imissavarput? Suna atissavarput? . . . Ataatassili qilammiusup ilisimavaasi tamakkuninnga tamanik pisariaqartusi. Guutilli naalagaaffia iluarnerlu taassuma pia piniaqqaarsigik, taava tamakku tamaasa ilanngullugit piumaarpasi.’ — Matîuse 6:31-33.
Ullumikkut anersaakkut pigissaarneq
6, 7. (a) Guutip innuttaasa anersaakkut pigissaarnerat nssuiaruk. (b) Siulittuut suna ullumikkut eqquuppa, suullu apeqqutaalerpat?
6 Taamaattumik Jehovap kiffaasa Naalagaaffiup soqutigisaanik inuunerminni salliutitsinissartik qinersimavaat, tamannalu pillugu pilluaqqusaasarput. Ajoqersuganngortitsiortornerminni iluatsitsisaqaat. Jesaja 60:22) Jehovamit ajoqersorneqarput ’inussiarlu aalajaallunilu silatooq’ aqqutigalugu anersaakkut tuniorartittuarlutik. (Matîuse 24:45-47 (NV); Jesaja 54:13) Aammalu Jehovap anersaavanik pisarput, tamannalu iluaqutigalugu nunarsuaq tamakkerlugu qatanngutigiissuanngorsimapput takujuminartut. — Tussiaat 133:1; Mákorse 10:29, 20.
7 Tamanna ilumut tassaavoq anersaakkut pigissaassuseq, aningaasanik pisiarineqarsinnaanngitsoq. Jehovap neriorsuutaata eqquuteqqissaarneraa: „Pissarsiat qulingi ilanngarnagit aattarniarsigit naalaffiup toqqorsiviinut, uanga illunni nerisassamaateqaqqullugu. Taamaalillusi misilinniarsinga, oqarpoq katersaarsuit [Jehovaat]. Taava qilaap suppivii ammassavakka pilluaatissiissutinillu killiligaanngitsunik kueraaffigissallusi.“ (Malaki 3:10) Neriorsuutip tamatuma eqquunera ullumikkut misigisimavarput. Soorli Jehova, pisuussutit tamarmik pilerfiat, pissarsiat qulinginik kiffani qinnugai? Pissarsiat qulingi taakku kikkunnut imaluunniit kimut iluaqutaappat? Tamanna akissutissarsiumallugu suna pillugu Jehovap Malakias aqqutigalugu ukiunik naatsorsuilerfitta siorna ukiut hundredellit taallimassaanni oqaatsit taakku anissimanerai paasiniaqqaartariaqarparput.
Pissarsiat qulingi pilliutillu
8. Inatsisitigut angeruseq naapertorlugu Israelikkut timikkut pigissaarnissaannut suna aalajangiisuusimava?
8 Malakiasip nalaani Guutip innuttai siumukarsimanngillat. Tamatumunnga ilaatigut pissutaasimavoq pilliutinut pissarsiallu qulinginik tunisisarnermut isiginninnerat. Taamani Israel Mosesip inatsisaasa angerutaasut ataanniippoq, Jehovalu angeruseq tamanna pilersikkamiuk neriorsuisimavoq Israel angerutsiminik eqqortitsippat anersaakkut timikkullu pigisatigut pilluaqqusaatikkumaarlugu. Tassa Israel ajunngitsumik ingerlassaguni pinngitsoorani inuiattut aalajaattariaqarpoq. — 5 Moses 28:1-19.
9. Sooq Jehovap piumasarisimavaa itsaq Israelikkut pissarsiamik qulinginik tunissuteqartarlutillu pilliuteqartassasut?
9 Mosesip inatsisaasa ataanni Israel naalaffimmut pilliuteqartarnissamut pissarsiallu qulinginik tunniussisarnissamut ilaatigut pisussaasimavoq. Pilliutit ilaat Jehovap tunisiviani ikikkarneqartarsimapput, ilaallu palasinut pilliisunullu agguaanneqartarsimallutik. Tamatigulli pilliutit ilaat Jehovamut pilliutigineqartarsimapput. (3 Moses 1:3-9; 7:1-15) Mosesip israelikkut pissarsiat qulingi pillugit ima nalunaarfigisimavai: „Nunassinni narsami naatitat orpiillu paarngaasa qulingi tamaasa [Jehovap] pigai. Taakku illernartitaallutik [Jehovamut] pigisassanngortitaapput.“ (3 Moses 27:30) Pissarsiat qulingi levikkunnut illernartuummi kingornalu naalaffimmi kiffartortunut tunniunneqartarsimapput. Levikkut palasiunngitsut pissarsiamik qulingi Aronikkunnut palasinut aamma ingerlateqqittarsimavaat. (4 Moses 18:21-29) Israelikkut pissarsiamik qulinginik tunniussisarnissaat sooq Jehovap piumasarisimavaa? Siullermik, taamaalillutik Jehovap ajunngissusianik pinngaartitsinertik ersersissinnaaniassammassuk. Aappassaanik, taamaalillutik Levikkut pisussaaffimminnik, Inatsisinik ilinniartisinerminnik, allamut saasarneqaratik nakkutiginnissinnaanissaannik tapersersussammatigik. (1 Israelikkut 17:7-9) Taamaalilluni pallorfiginninneq ilumoortoq tamarmik iluaqutissaannut tapersersorneqarsimavoq.
10. Israelikkut pissarsiamik qulinginik tunissuteqanngitsooraangata pilliinngitsooraangatalu qanoq pisoqartarsimava?
10 Naak pissarsiat qulingi pilliutillu kingorna Levikkunnit atorneqartaraluartut, taamaattoq tassarpiaapput Jehovamut tunissutit. Taamaattumik pitsaasuusussaasimapput taassumunnga tunniunneqarnissaminnut qinngaqqunnaratik. (3 Moses 22:21-25) Israelikkut pissarsiamik qulingi tunniutinngitsooraangatigik imaluunniit pitsaanngitsunik pilliigaangata qanoq pisoqartarsimava? Tamatumunnga pillaatissamik aalajangersimasumik Mosesip inatsisaaniittoqanngilaq, kingunipiloqartarsimavorli. Jehovap pilluaqqusinini unitsittarsimavaa, Levikkullu atortussatigut tapersersorneqarunnaaraangamik inuussutissarsiorniarlutik naalaffimmi suliassatik qimattarsimavaat. Tassa taama pisoqaraangat Israel tamarmi eqqugaasarsimavoq.
„Eqqarsaatiginiarsiuk qanoq ittunik atugaqartusi“
11, 12. (a) Israel Mosesip inatsisaanik sumiginnaagaangat qanoq kinguneqartarsimava? (b) Jehovap israelikkut Babylonimit utertikkamigit sumik suliassippai?
11 Israelip oqaluttuarisaanerani erserpoq ilaasa maligassaallutik Mosesip inatsisai, ilaatigut pissarsiat qulingi pillugit inatsit, eqqortinniartarsimagaat. (2 Israelikkut 31:2-16) Inuiaalli ataatsimut isigalugit inatsisinik sumiginnaasuusimapput. Ukiumi 607-imi u.n.s. ajorsartitaallutik Babylonimut aallarussaanerminnik Jehovap ilaginnaanera tikillugu Jehovamik angerutsiminnik uniortitsiuarsimapput. — 2 Israelikkut 36:15-21.
12 Tamanna perorsaatissiissutaavoq sakkortooq, ukiulli 70-it qaangiummata Jehovap innuttani nunaminnut uterteqqippai. Esajasip Paratiisi pillugu siulittuutaasa ilarpassui israelikkut angerlamut uternerata kingorna siullermeersumik eqquussimapput. (Jesaja 35:1, 2; 52:1-9; 65:17-19) Jehovalli taamani innuttaminik utertitsineranut pissutaasoq pingaarneq tassaanngilaq nunarsuarmik paratiisinngortitsinissaat, kisianni naalaffimmik sanaqqiinissaat pallorfiginninnermillu ilumoortumik pilersitseqqinnissaat. (Esra 1:2, 3) Israelikkut Jehovamut naalappata pilluaqqussutinik nassataqassaaq Jehovallu pilluaqqusinera timikkut anersaakkullu pisuunngortissavai. Taamaattumik 537-mi u.n.s. angerlarnermik kingunitsianngua juutit Jerusalemimi tunisiviliorput naalaffillu sulissutigilerlugu. Sakkortuumilli akerlilersorneqaleramik uniinnarput. (Esra 4:1-4, 23) Tamatuma kingunerisaanik Jehovap pilluaqqusineranik Israel misigisaqanngilaq.
13, 14. (a) Israelikkut naalaffiup sanaqqinnissaa sumiginnarmassuk susoqarpa? (b) Naggataatigut qanoq ililluni naalaffik sanaqqinneqarpa, sutigulli allatigut israelikkut suli sumiginnaappat?
13 Ukiumi 520-mi u.n.s. Jehovap pruffiitit Haggaj Zakariasilu aallartippai Israelikkut naalaffimmik sanaqqilernissaannik kajumissaariartortillugit. Haggajip inuit erseqqissaaffigai pigisatigut ajornartorsiornerat Jehovap illuanik ilungersuussinngippallaarnerannik pissuteqartoq. Ima oqarpoq: „Taamaattumik ima oqarpoq katersaarsuit [Jehovaat]: Eqqarsaatiginiarsiuk qanoq ittunik atugaqartusi: Amerlasuunik siaruarterisaraluarlusi annikitsuinnarnik katersuisarpusi. Nerisarpusi qaarsillassanasili, imertarpusi imerusuissanasili; atisalersortarpusi uunnassanasili, sulisartullu akissarsiatik aningaasivinnut alinnikunut ilisarpaat. Ima oqarpoq katersaarsuit [Jehovaat]: Eqqarsaatiginiarsiuk qanoq ittunik atugaqartusi. Qaqqanukaritsi qisunnik aallerlusi naalaffiliorlusilu; tamanna nuannaarutigiumaarpara naalannassuseralu saqqummiukkumaarlugu.“ — Haggaj 1:5-8.
14 Haggajimit Zakariasimillu kajumissaarneqarlutik israelikkut qanoq ittunik atugaqarnertik eqqarsaatigilerpaat, naalaffillu sananeqarpoq. Ukiulli 60-it missaanniittut Nehemiasip Jerusalemimut tikeraarami paasivaa israelikkut Jehovap inatsisaanik sumiginnaaqqilersimasut. Pissuseq tamanna aaqqippaa. Aappassaanilli tikeraaqqimmat aamma pissutsit ajorseqqereersimapput. Ima allappoq: „Aamma paasivara Levikkut pisassarisatik pisimanngikkaat taamaattumillu taakku tussiartartullu naalaffimmi kiffartortuusussat tamarmik immikkut nunaatiminnut nuussimasut.“ (Nehemja 13:10) Ajornartorsiut tamanna aaqqinneqarpoq ’Judakkullu tamarmik karrinik pissarsiat qulingi, viinnissat tunguat uulialu peqqumaasivinnukaattalerpaat’. — Nehemja 13:12.
Jehova tilliffigineqartarsimavoq
15, 16. Sooq Jehovap Israel Malakias aqqutigalugu ilungersortumik oqaaqqissaarpaa?
15 Aamma Malakias taamanikkut siulittuisarsimagunarpoq, Israelillu ilumuunngissusianut tunngasunik amerlanerusunik oqaluttuarpoq. Jehovap Israelimut oqaasii taassuma allassimavai: „Ernerup ataatani ataqqisaraluarpaa, inussiallu naalakkani mianerisaraluarpaa, uangali ataataasunga kia mianerinerpaanga? Uanga katersaarsuit [Jehovaat] taama oqarpunga ilissinnut atinnik nikaginnittunut. Aperivusi: ’Qanoq ililluta atit nikagisimanerparput?’ Tassa nerisassat mingunnartut pilliiviutinnut aattarassigit. Aperivusi: ’Qanoq ililluta mingutsissimanerpatsigit?’ Tassa ima oqartarassi: ’[Jehovap] nerrivia nikanartuuvoq.’ Nersutaatit tappiitsut pilliutigisarassigit tamanna assuarnannginnerpa? Nersutaatit tusiattut nappaateqartullu uannut sassaattarassigit tamanna assuarnannginnerpa?“ — Malaki 1:6-8.
16 Taamatut paasiuminartumik allanneratigut Malakiasip ersersippaa naak israelikkut pilliuteqartaraluarlutik pilliutimik pitsaanngissusiatigut ingasattumik ataqqinninginnertik ersersikkaat. Malakias aamma allappoq: „Siuaasassili ulluiniilli peqqussutigisannit nigortarsimavusi ileqqoreqqusakkalu maleruarsimanagit. Uannut saanniarniaritsi, taava uanga ilissinnut saassaanga, oqarpoq [Jehova].“ Israelikkut paaserusussimavaat qanorpiaq iliussanerlutik, taamaattumillu aperisimallutik: „Qanoq ililluta saanniassagatta?“ Jehovap akisimavai: „Inuup Guuti tilliffigissanerpaa? Ilissili tilliffigaassinga.“ (NV) Qanoq ililluni Israel Jehovamit, pisuussutit tamarmik pilerfiannit, tillissinnaagami? Jehova ima akivoq: „Pissarsiat qulinginut naalaffimmullu tunissutissanut tunngasutigut!“ (Malaki 3:7, 8) Aap, pissarsiamik qulinginik tunissuteqanngitsoornermikkut pilliuteqanngitsoornermikkullu israelikkut Jehovamit tillittarsimapput!
17. Israelimi pissarsiat qulinginik tunisisarneq pilliisarnerlu sumik siunertaqarpat, pissarsiallu qulingi pillugit Jehova qanoq neriorsuiva?
17 Oqaluttuarisaanermut kingumut qiviarnerup tamatuma ersersippaa Israelimi pissarsiat qulinginik tunissuteqartarnissaq pilliuteqartarnissarlu qanoq pingaaruteqartigisimasut. Aaqqissuussaq tamanna, pallorfiginninnermik ilumoortumik atortussatigut tapersersueqataasoq, aqqutigalugu tunisisup pingaartitsinini ersersissinnaasarsimavaa. Taamaattumik Jehovap Israel ima kajumissaarsimavaa: „Pissarsiat qulingi ilanngarnagit aattarniarsigit naalaffiup toqqorsiviinut.“ Tamanna naalappassuk Jehovap neriorsuunni manna eqqortissavaa: „Taava qilaap suppivii ammassavakka pilluaatissiissutinillu killiligaanngitsunik kueraaffigissallusi.“ (Malaki 3:10) Jehovap pilluaqqusinerata pisuungortissavai.
’Naalakkamit ilumoortumit’ eqqartuunneqartut
18. (a) Kia tikiunnissaanik Jehova mianersoqqusiva? (b) Qanga naalaffimmut tikiunneqarpa, kikkullu tikiuppat Israelimullu qanoq kinguneqarpa?
18 Malakias aqqutigalugu Jehova mianersoqqusisimavoq tikiukkumaarluni innuttanilu eqqartuukkumaarlugit. „Inngiliga aallartissavara aqqutissara siunikkut iluarsaqqullugu, uangalu, Naalagaq ujagarsi, tassanngaannaq naalaffiutinnut tikiukkumaarpunga. Aggerumaarpoq inngiliga angerfigeqatigiissitsisussaq.“ (Malaki 3:1) Naalaffimmut tikiunnissamik oqqersuut tamanna qanga piva? Malakiasip aqqutissamik iluarsaasussamik aallartitsinissamik siulittuutaa Jesusip Matîuse 11:10-mi issuarpaa Johannesimullu Kuisisumut atorlugu. (Malaki 4:5; Matîuse 11:14) Ukiumi 29-mi u.n.k. eqqartuussiffissaq nalliussimavoq. Kinamiun inngili angerfigeqatigiissitsisussaq alla Jehovamik, Naalakkamik, naalaffimmukaqatiginnittussaq? Tassaavoq Jesus nammineq, marloriarlunilu Jerusalemimi naalaffik tupannartumik minguiarsimavaa aningaasanik taarsiisartut unneqqaserluttut aniatillugit. (Mákorse 11:15-17; Juánase 2:14-17) Ukiuni hundredelinni siullerni eqqartuussineq tamanna pillugu Jehova siulittuutaasumik ima aperisimavoq: „Kiali ulloq tikiuffissaa attassinnaavaa, kina atasinnaava taanna saqqummerpat?“ (Malaki 3:2) Israel atasinnaasimanngilaq. Oqimaalutarneqarsimavoq paasineqarsimallunilu oqippallaartoq, ukiumilu 33-mi u.n.k. Jehovap innuttaasut toqqakkatut tunuartitaavoq. — Matîuse 23:37-39.
19. Ukiuni hundredelinni siullerni sinneruttut qanoq ilillutik Jehovamut uterpat, qanorlu pilluaqqusaappat?
19 Malakiasili aamma ima allappoq: „[Jehova] ingikkumaarpoq aatsitsissalluni sølvimillu akuiaassalluni. Levikkut eqqiarumaarpai kuultitut sølvitullu akuiarlugit iluartumik [Jehovamut] pilliisinnaaqqullugit.“ (Malaki 3:3) Tamanna naapertorlugu ukiuni hundredelinni siullerni Guutimut kiffaanerartut amerlanersaat tunuartitaasimapput, ilaalli minguiarneqarsimapput Jehovamullu ornigussimallutik taassuma iluarisaanik pilliillutik. Taakku tassa Jesusimut, aallartitamut angerfigeqatigiissitsisussamut, tusarnaartut. Ukiumi 33-mi piinsip ulluani taakkua ilaat 120-t Jerusalemimi init ilaanni katersuupput. Anersaamit illernartumit nakussatsinneqarlutik iluartunik pilliuteqartalerput, amerliartupallallutillu. Sivitsunngitsoq Romamiut naalagaaffissuanni tamarmi sumi tamaaniilerput. (apustilit suliait 2:41; 4:4; 5:14) Taamaalillutik sinneruttut Jehovamut utersimapput. — Malaki 3:7.
20. Jerusalem naalaffillu aserorneqarmata Israel Guutip pia nutaaq qanoq piva?
20 Israelip sinneri taakku, juutiunngitsunut Israelip sorlaanullusooq ikkunneqartunut ilaalersut, tassaalerput ’Israel Guutip pia’ nutaaq, inuiaat kristumiunit anersaakkut kinguaassiarititaasut. (Galâsiamiut 6:16; Rûmamiut 11:17) Ukiumi 70-imi u.n.k. Jerusalem naalaffillu Romamiut sakkutuuinit aserorneqarmata uinikkut Israelimut ’ulloq uutsitsivittut ikumasutut ittoq nalliussimavoq’. (Malaki 4:1; Lúkarse 19:41-44) Anersaakkut Israel Guutip pia qanoq piva? Jehovap ’qajassuuppai, soorlu ataatap ernini kiffartortini qajassuuttaraa’. (Malaki 3:17) Ilagiit kristumiut tanitaasut Jesusip siulittuutaasumik mianersoqqussutaa tusarnaarsimavaat. (Matîuse 24:15, 16) Aniguipput Jehovallu pilluaqqusinerata anersaakkut pisuunngorsartuarpai.
21. Malaki 3:1 aamma 10 pillugit apeqqut suna suli akineqanngila?
21 Taamaalilluni Jehovap aqqa qutsissisitaasimavoq. Ullumikkulli Malaki 3:1 qanoq ililluni eqquuppa? Malaki 3:10-milu ’pissarsiat qulinginik ilanngarnagit toqqorsivimmut aatsisaqqusineq’ kristumiut qanoq qisuariarfigisariaqarpaat? Tamanna ilanngutassiap tulliani sammineqassaaq. (wD 1/12 92)
Nassuarsinnaaviuk?
□ Iluamik oqaatigalugu pisuussutinut tamanut kina pilerfiua?
□ Sooq anersaakkut pigissaarneq timikkut pigissaarnermit pitsaanerua?
□ Israelimi pissarsiat qulinginik tunisisarsimaneq pilliisarsimanerlu sumik siunertaqarsimappat?
□ Qanga Jehova, „Naalagaq“, Israel eqqartuukkiartorlugu naalaffimmut tikiussimava, qanorlu kinguneqarpa?
□ Ukiunik naatsorsuisalerfitta kingorna ukiuni hundredelinni siullerni Jehovap naalaffimmut tikiunnerata kingorna kikkut Jehovamut utersimappat?
[Qupp. 12-mi assiliartaq]
Angerfigeqatigiissitsisussaq, Jesus, Jehovamit aallartitaasoq, ukiuni hundredelinni siullerni eqqartuussiartorluni naalaffimmut tikiussimavoq