Kikkut Guutimut naalatsigitissappat — sooq?
„[Jehova], nalunngilara inuup ingerlavissani nammineq aalajangigassarinngikkaa, angutillu aalajangigassarinngikkai qanoq ingerlanissani alloriartarnissanilu.“ — JEREMIA 10:23.
1. Attaviitsuuneq qanoq ittoq pingaartinneqarsimava?
ALLAKKAT inuit allassimasaasa tusaamasaanerpaat ilaat tassaavoq attaviitsuunissamik nalunaarut 1700-kkunni Amerikap avannaani tuluit nunasiaasa 13-t nunamit attavigisimasaminnit Tuluit-Nunaannit atajunnaarumallutik nalunaarusiaat. Kiffaanngissuseqalerusupput. Attaviitsuussuserlu kiffaanngissuserlu malitsigiipput. Naalakkersuinikkut aningaasatigullu attaviitsuussuseq iluaqutaasinnaavoq. Ukiuni kingullerni nunat ilaat Europap kangianiittut naalakkersuinikkut attaviitsunngorsimapput. Aammali miserratigineqarsinnaanngilaq nunani taakkunani attaviitsuussutsip ajornartorsiutit arlallit nassatarisimammagit.
2, 3. (a) Attaviitsuuneq suna kissaatiginanngilluinnarpa? (b) Tamanna inuit siulliit marluk qanoq ilillutik ersersissimavaat?
2 Naak attaveqannginneq assigiinngitsutigut kissaatiginarsinnaagaluartoq attaveqannginneq ataaseq kissaatiginanngilaq. Sunaava? Tassa inunnik Pinngortitsisumut, Jehova Guutimut, attaveqannginneq. Tamanna pilluaqqussutaanani perloqqussutaavoq. Sooq? Inuup Pinngortitsisini attaviginagu inuunissaa siunertarineqarsimanngisaannarmat, soorlu Jeremiasip oqaasiisa qulaani issuarneqartut takutilluaraat. Allatut oqaatigalugu, inuk Pinngortitsisuminut naalatsigitittussaavoq. Pinngortitsisutsinnut naalatsigitinneq taassumunnga naalanneruvoq.
3 Tamanna inunnut siullernut erseqqissarneqarsimavoq. Mosesimik allakkat siulliit 2:16, 17 naapertorlugu Jehovap ima peqqusimavai: „Naatsiiviup orpii tamaasa neriffigisinnaavatit, kisianni orpik ajunngitsumillu ajortumillu nalujunnaarutaasoq neriffigissanngilat, neriffigigaluarukkumi toqussaatit.“ Pinngortitsisuminut naalatsigitikkumannginnami Adamip kinguaaviisalu tamarmik ajorti, naalliuutit toqulu atortariaqalersimavaat. — 1 Moses 3:19; Rûmamiut 5:12.
4, 5. (a) Guutimut naalatsigitikkumannginneq sunik kinguneqarsimava? (b) Ileqqussanut inatsit suna qaangiinnagassaanngila?
4 Pinngortitsisumut naalatsigitikkumannginneq sianiitsuliorneruvoq ileqqussanullu tunngasunut eqqunngitsuliornerulluni. Tamanna silamiut akornanni inatsisaatsuliornermik, pinerluttuliornermik, nakuusernermik, kinguaassiuutitigullu kanngunartuliornermik nappaatinik kinguaassiuutitigut tunillaattartunik tunillatsinnertalimmik kinguneqarsimavoq. Aammalu, inuusuttut Jehovamut, angajoqqaaminnut nunallu inatsisaanut naalatsigitikkumannginnerat inuusuttut pinerluttuliortarnerannut pisooqataanerpaasimannginnerpa? Attaviitsuujumaneq tamanna inuppassuit allakkajaamik pikataasumillu atisalersortarnerisigut oqaasipiluttarnerisigullu malugineqarsinnaavoq.
5 Kisianni Pinngortitsisup ileqqussanut inatsisaa manna qaangiinnagassaanngilaq: ’Tammaqinasi, Guuti mitaatigeqqunngilaq, inuk siaruartikkani naapertorlugit katersuiumaarmat. Uinimminummi siaruarterisoq uinimmit aserujassummik katersuiumaarpoq.’ — Galâsiamiut 6:7, 8.
6, 7. Amerlasuut naalatsigitikkumannginnerannut suna pissutaanerpaava, assersuutillu suut tamanna takutippaat?
6 Naalatsigitikkumannginneq tamanna qanoq ililluni pinngoqqaarsimava? Namminissarsiorneq pingaarniarnerlu pissutaapput. Taakku pissutigalugit Eva, arnaq siulleq, pulateriaarsummit salloqittarneqarsimavoq paarnarlu nerineqaqqusaanngitsoq nerillugu. Anneruniajuissimagaluaruni Guutisut ilisinnaanissani — tassa nammineerluni ajunngitsunik ajortunillu aalajangiisinnaanissani — kajungerisimanavianngikkaluarpaa. Namminissarsiorsimanngikkaluarunilu Pinngortitsisumi, Jehova Guutip, ersarissumik inerteqqutaa kissaatigisimassanngikkaluarpaa.
7 Adamip Evallu ajortuliornerata kinguninngua pingaakujunneq namminissarsiornerlu pissutigalugit Kainip nukkani Abel toquppaa. Aamma inngilit ilaat namminissarsiorlutik inissisimaffitsik qimallugu timilersimapput timip pii nuannaarniutiginiarlugit. Pingaakujunnerup namminissarsiornerullu Nimrod aqussimavaat, taassumalu kingorna silarsuarmi naalakkersuisut amerlanersaat taamaassimapput. — 1 Moses 3:6, 7; 4:6-8; 1 Juánase 3:12; Jûtarse 6.
Sooq Jehovamut naalatsigitittariaqartugut
8-11. Guutimut naalatsigitinnissatsinnut pissutissaalluartut sisamat suuppat?
8 Sooq Pinngortitsisitsinnut, Jehova Guutimut, naalatsigitittariaqarpugut? Pingaarnerpaamik silarsuarmi kisimi Oqartussaammat. Taanna eqqortumik tamanut Naalagaasussaavoq. Taanna Eqqartuussisigaarput, Inatsisiliortoralugu Kunngigalugulu. (Jesaja 33:22) Taanna pillugu eqqorluartumik ima allassimasoqarpoq: ’Suut tamarmik taassuma isaanut saqqumillutillu uleersimapput, tassa naatsorsuiffigisassarput.’ — Eprîarit 4:13.
9 Aamma Pinngortitsiserput Ajugaqanngitsuummat, taassumunnga iluatsitsisumik assortuisoqarsinnaanngilaq; kialuunniit taassumunnga naalatsigitittariaqarnini sumiginnarsinnaanngilaa. Naalatsigitikkumanngitsut qaquguluunniit peerneqarumaarput, soorlu Farao peerneqarsimasoq soorlulu Satan Diaavulu piffissanngorpat peerneqarumaartoq. — Tussiaat 136:1, 11-15; sarĸúmersitat 11:17; 20:10, 14.
10 Pinngortitat sianissusillit tamarmik Guutimut naalatsigitittariaqarput, Pinngortitsisertik kiffartuutissallugu pinngortitaagamik. sarĸúmersitat 4:11-mi ima allassimavoq: ’Jehova Guuterput, ilinnut pigititassaapput naalannaat ataqqinaallu pissaanerlu, illit suut tamaasa pinngortikkakkit, illillu peqqusakkut ipput pinngortitaallutillu.’ Taanna tassaavoq Marriortorsuaq, inuillu piumasaanik naammassinnittut marriukkatut ipput. — Jesaja 29:16; 64:7.
11 Sumiginnassanngilarput Pinngortitsiserput sunik tamanik ilisimasaqarmat taamaattumillu suna iluaqutigisinnaaneripput nalunngilaa. (Rûmamiut 11:33) Inatsisiliorsimavoq ’ajunngitsunik atugaqarsinnaaqqulluta’. (5 Moses 10:12, 13) Pingaarnerpaamillu, ’Guuti asassutaagami’ ajunnginnerpaamik kissaappaatigut. Jehova Guutimut, Pinngortitsisitsinnut naalatsigitissalluta pissutissaqarluaqaagut! — 1 Juánase 4:8.
Jesus Kristus, Guutimut naalatsigitinnikkut maligassaq naammalluinnartoq
12, 13. (a) Jesus Kristus qanoq ililluni Guutimut naalatsigitissimava? (b) Jesusip oqaasiisa suut takutippaat maniguuttuusoq?
12 Qularutissaanngilaq Jesus Kristusip, Jehovap ernituaata, Guutimut naalatsigitinnermut naammalluinnartumik maligassissimammatigut. Filípimiut 2:6-8-mi apustili Paulusip tamanna nassuiarpaa: ’Guutip taattua [Jesusip] pigigaluaramiuk Guutisut issutsi paggatigisatut isumaqartinngilaa, pissutsili iperarpaa kiffap taattua atillugu inuillu assigilerlugit; inuttullu pissuseqarluni malunnarsigami imminik nikanarsarpoq naalaannarluni toqumut allaat, massami [nappakkami naalliutsitaaffimmi, NV] toqumut allaat.’ Nunamiikkallarami Jesusip arlaleriarluni eqqartorpaa isumaminik qanoq-iliorsinnaanani; attaveqanngitsutut iliorneq ajorpoq, tamatigulli Ataataminut qilammiusumut naalatsigitittarpoq.
13 Juánase 5:19, 30-mi ima allassimavoq: ’Taava Jesusip saappai oqarfigalugit: „Ilumut, ilumut oqarfigaassi: erneq isumaminik qanoq-iliorsinnaanngilaq, kisianni Ataataq taamaaliortoq takuguniuk; taanna qanoq-ilioraangat ernertaaq taamaalioraraaq. Isumannik qanoq-iliorsinnaanngilanga. Tusakkakka malillugit eqqartuussisaraanga, eqqartuussutigalu iluarpoq, peqqusara pinnagu aallartitsisima peqqusaa piniarakku.’“ Unnuami killuutigineqarfissamini arlaleriarluni ima qinusimavoq: ’Uanga peqqusattut pinnani illit peqqusattut pili.’ — Matîuse 26:39, 42, 44.
Guutimut naalatsigitittut itsaq inuusimasut
14. Noa sutigut Guutimut naalatsigitissimava?
14 Inuit Guutimut naalatsigitikkumasut itsarsuaq inuusimasut ilaat tassaavoq Noa. Pingasutigut assigiinngitsutigut naalatsigitinnera takuneqarsinnaasimavoq. Siullermik angutaavoq iluartoq, naligisami akornanni assuarnaatsoq, Guuti naalallugu inuusoq. (1 Moses 6:9) Aappassaanik umiarsualiorsimavoq, ’Guutip peqqusineratorluinnaq iliorluni’. (1 Moses 6:22) Pingajussaanik ’iluarnermik oqaluussilluni’ ulersuaqarnissaq pillugu mianersoqqusisimavoq. — 2 Pîtruse 2:5.
15, 16. (a) Abrahamip qanoq ililluni Guutimut naalatsigitinnera maligassaalluarpa? (b) Sara qanoq ililluni naalatsigitissimava?
15 Abrahamissaaq Guutimut naalatsigitinnikkut maligassaalluarpoq asseqanngitsoq. Guutip ima peqqusinera naalappaa: „Aallarit nunannit.“ (1 Moses 12:1) Urimi (itsarsuarnitsanik misissuinerit naapertorlugit illoqarfimmi pingaaruteqarsimasumi) atukkani ilorrisimaarnartut qimattariaqarsimavai ukiunilu 100-ni nunaginngisamini angalaannartutut inuusariaqalersimalluni. Ingammillu Guutimut naalatsigitinnera erserpoq ernini Isak pilliutiginissaanut erliginnginnamiuk. — 1 Moses 22:1-12.
16 Abrahamip nulia, Sara, aamma Guutimut naalatsigitinnikkut maligassaalluarpoq. Nunaginngisaminni angalaannartutut inuusimanerat qularnanngitsumik artornartortaqarsimassaaq, kisianni naammagittaalliorsimaneranik eqqartuisoqanngilaq. Abrahamip pisimasuni marlunni kunnginut Guutimik nalusunut najaginerarmani Sara Guutimut naalatsigitippoq. Tamatigut suleqataasimavoq, naak kunngit taakkua nuliarpassuinut ilanngutitinneqapajaarsimagaluarluni. Isummamigut uini Abraham ’naalakkamisut’ taasimavaa, tamatumalu takutippaa Guutimut naalatsigitinnera ilumoortuusoq uummammillu pisoq. — 1 Moses 12:11-20; 18:12, NV; 20:2-18; 1 Pîtruse 3:6.
17. Sooq oqarsinnaavugut Isak Guutimut naalatsigitissimasoq?
17 Abrahamip ernerata Isakip Guutimut naalatsigitinnera puigussanngilarputtaaq. Juutit oqaluttuarsiaat malillugit Isak 25-t missaannik ukioqarpoq ataatani, Abraham, pilliutigeqqulluni Jehovamit peqquneqarmat. Piumasimagaluaruni Isak ataatani imminit ukiunik 100-nik utoqqaanerusoq akiorsinnaasimassagaluarpaa. Taamaaliunngilarli. Naak Isakip uumasumik pilliutissaqannginnera tupigusuutigigaluarlugu ataatami pilliivimmut ilimmani, qilersorlunilu maniguulluni akueraa. Taamaaliorneqarpoq savik atorneqassagaluarpat piumassuserinngisaminik qisuariarnissaa pinngitsoortinniarlugu. — 1 Moses 22:7-9.
18. Mosesip qanoq ililluni Guutimut naalatsigitinnera maligassaalluarpa?
18 Ukiut arlallit tamatuma kingorna Moses Guutimut naalatsigitinnermik maligassiilluarpoq. Tamanna takuneqarluarsinnaavoq Biibilimi Moses ’nunarsuarmi inunnit tamanit anneruniajuinnerpaasutut’ allaatigineqarmat. (4 Moses 12:3) Ukiuni 40-ni puilasuitsumi naalalluni Jehovap peqqussutai naammassisimavai, taamaaliorpoq naak inuit 2-3 millionillit naalasseriitsut nakkutigisariaqarlugit, tamatumalu erseqqissaqqiinnarpaa Moses Guutimut naalatsigitittuusoq. Allassimavoq ’Moses [Jehovap] peqqussutaa maleruaqqissaarlugu iliortoq’. — 2 Moses 40:16.
19. Jobip oqaaserisimasaasa suut takutippaat Jehovamut naalatsigitittoq?
19 Inuk Guutimut naalatsigitittoq uatsinnut maligassaalluartoq alla tassaavoq Job. Jehovap Satan Jobip pigisaanik tamanik aseruinissaanik, meeraanik toqutsinissaanik ’perlutsinneqarnissaanillu ajuarsuarnik aluinit kasseranut’ akuersigallarnerata kingorna Jobip nuliata ima oqarfigisimavaa: „Assuarnaassutsit suli aalajangiusimaniinnarniarpiuk? Guuti perloqquinnaruk, toquinnaruit pitsaanerummat.“ Jobilli Guutimut naalatsigitilluni ima akivaa: „Arnatut silaatsutut oqalupputit! Ajunngitsut Guutimit pisut tigusinnaasaratsigit ajortut aamma tigusariaqannginnerpavut?“ (Job 2:7-10) Eqqarsariaaseq tamatumunnga assingusoq Job 13:15-imi oqaasiani erserpoq ima allassimasoqarmat: „Guutip toqukkaluarpanga allaat neriuffigissavara.“ (Quppernerup ataani ilanngussaq) Naak Jobip pinngitsuutitaanissani eqqarsaatigingaarsimagaluaraa, puigussanngilarput Jehovap naggataatigut tuppallersaasuusaartut ilaannut ima oqarsimanera: „Illit ikinngutitillu marluk assut kamaappassi kiffattut Jobitut iliornasi eqqortumik oqaluuserinnginnassinga.“ Aap, Job ilumut Guutimut naalatsigitittutut maligassaalluarpoq. — Job 42:7.
20. David qanoq ililluni Guutimut naalatsigitissimava?
20 Allakkani Hebriiarisuuni maligassaalluartoq alla eqqartorsinnaavarput, tassa David. Kunngi Saulip uumasutut malersorluni piniarmani, David Saulimik toqutsinissaminut marloriarluni periarfissaqarsimagaluarpoq taamaalilluni ajornartorsiutini anigorsinnaasimagaluarlugit. Davidilli Guutimut naalatsigitinnerata taamaaliortinngilaa. 1 Samuel 24:7-imi allassimavoq David ima oqartoq: „[Jehovap] naalakkannik tanitaminik ajoqusiitinngilluinnarilinga. Ajoquserniarsinnaanngilarami tassaammat [Jehovap] tanitaa.“ (Aamma takuuk 1 Samuel 26:9-11.) Aamma kukkusimagaangami ajortuliorsimagaangamiluunniit Guutimut naalatsigitilluni naveerneqarnini akuerisarpaa. — 2 Samuel 12:13; 24:17; 1 Israelikkut kinguaariit 15:13.
Paulusip Guutimut naalatsigitinnera maligassaalluartoq
21-23. Pisimasuni suni apustili Paulusip Guutimut naalatsigitinnini takutippaa?
21 Kristumiut Allagaataat Griikerisuut-ni Guutimut naalatsigitinnermik maligassaalluartoq tassaavoq apustili Paulus. Taassuma naalakkani Jesus Kristus malissimavaa, soorlu kiffartuussinermini sutigut tamatigut taanna malittarsimagini. (1 Korintumiut 11:1) Naak Paulus apustilinit allanit tamanit Jehova Guutimit atorneqarnerugaluarluni namminerisaminik iliuuseqanngisaannarsimavoq. Lukasip oqaluttuaraa Guutimik nalusut kristumiunngortut kipineqarnissaat nalornissutigineqalermat qatanngutit Antiochiamiittut ’Paulus Barnabasilu ilatillu allat saqitsaatigisaq tamanna pillugu Jerusalemimut apustilinut utoqqaanernullu pavunnaqqugaat’. — apustilit suliait 15:2.
22 Ajoqersuiartorluni angalanini pillugit Paulus Galâsiamiunut agdlagkat 2:9-mi ima allassimavoq: ’Saammaannerlu uannut tunniussaq Jakobip Kefasillu Johannesillu, taakkua sukarsuusorineqartut, ilisarigamikku uangalu Barnabasilu ilagiissutsitsinnut nalunaaqqutissamik talerpitsigut eqippaatigut, uagut Guutimik nalusunut oqalussasugut taakkulu kipineqartunut oqalussasut.’ Paulusip allat siunersiortarsimavai namminissarsiornani.
23 Tamatumunnga naleqquttumik naggataamik Jerusalemimiikkami Paulus utoqqaanertanit siunnersorneqarnini akueralugu naalaffimmukarpoq Inatsisinilu peqqussutigineqartut maleruarniarlugit tamanut takutillugu Mosesip Inatsisaanut tunussisuunani. Taamaaliornera inupilunnit kamassaarisunit saassunneqarneranik kinguneqarmat, utoqqaanertat taakku naalakkamigit kukkusimava? Naamerluinnaq, soorlumi apustilit suliait 23:11-mi atuarsinnaagipput: ’Unnuarormalli Naalakkap pallippaa oqarluni: „Tuppallerit; soorlumi Jerusalemimi nalunaajaassutigigimma, taamattaaq Romami nalunaajaassaatit.“’
24. Naalatsigitinneq pillugu suut ilanngutassiami tulliuttumi sammineqassappat?
24 Ilumut, Biibilip Guutimut naalatsigitinnissatsinnut pissutissaqarluartippaatigut, aamma siornatigut taamaaliorsimasunik maligassaqartippaatigut. Ilanngutassiami tulliuttumi qanoq ililluta Jehova Guutimut naalatsigitissinnaanersugut, taamaaliornissatsinnullu ikiuutissat aamma pilluaqqussutissartaat misissussavavut. (wD 1/2 93)
Qanoq akissavit?
□ Attaviitsuuneq suna kissaatiginanngilluinnarpa?
□ Naalatsigitikkumannginnermut suna pissutaanerpaava?
□ Sooq Jehovamut naalatsigitittariaqarpugut?
□ Guutimut naalatsigitittut maligassaalluartut kikkut Biibilimi eqqartorneqarpat?
[Qupp. 19-mi assiliartaq]
Naalagarsuaq silamiuusoq siulleq, Nimrod, ulersuaqarnerup kingorna Guutimut naalatsigitikkumanngitsuni siullersaavoq
[Qupp. 22-mi assiliartaq]
Noa Guutimut naalatsigitinnikkut maligassaalluarpoq assuarnaatsoq — 1 Moses 6:14, 22