’Suna najuunnissannut nalunaaqutaassava?’
„Qaqugu tamakku taamaalissappat, sunalu najuunnissannut pissutsillu aaqqissuussaanerata naggatissaanut nalunaaqutaassava.“ — MATÎUSE 24:3, NV.
1, 2. Inuit siunissaq soqutigigaat sutigut takuneqarsinnaava?
INUIT amerlanersaasa siunissaq soqutigaat. Aamma illit soqutigaajuk? Atuakkiamini Future Shock-imi (Siunissamut siooraneq) Professori Alvin Tofflerip oqaatigisimavaa ’peqatigiiffiit amerliartuinnartut siunissamik sukumiisumik paasiniaasalersimasut’. Imalu nangippoq: ’Siunissaq pillugu paasiniaasartoqatigiiliortoqartarpoq; Tuluit Nunaanni, Frankrigimi, Italiami, Tysklandimi USA-milu siunissaq pillugu atuagassiat saqqummertalerput; ilisimatusarfinni siumut missiliuussinermik ilinniartitsineqartalerpoq.’ Toffler ima isummerpoq: „Soorunami siunissamik ilisimanneqqissaartoqarsinnaanngilaq.“
2 Atuakkami Signs of Things to Come-imi (Piumaartussanut nalunaaqutit) allassimavoq: „Itumak atuarlugu, krystalkuglit atorlugit, ullorissat najoqqutaralugit imaluunniit nallukattanik siulittuisarneq I Ching-ilu (kangiamiut siulittuisartut atuagaataat) tassaapput siulittueriaatsit assigiinngitsut paasiuminartut paasiuminaatsulluunniit atorneqartartut inuttut siunissaq ilisimasaqarfigiumallugu.“ Inuilli periaasii tatiginagit pitsaanerussaaq Jehova tatigigutsigu — taanna uppernartunik aallerfissaammat.
3. Sooq pissutissaqarluarpugut Guuti tatigissallugu siunissaq pillugu paasisaqarusukkutta?
3 Guuti ilumoortoq ima nalunaarpoq: „Ilumut eqqarsaatikka eqqorlugit pisoqassaaq, pilersaarutikkalu pinngitsoornatik naammassineqassapput.“ (Jesaja 14:24, 27; 42:9) Aap, Jehovap inuiaat piumaartussanik nalunaarfigisinnaavai, ilaatigut inuit oqaaseqartitani aqqutigalugit. Pruffiitit taakkua ilaat ima allassimavoq: „[Jehova] qanoq iliortarinngilaq pilersaarutini kiffaminut pruffiitinut saqqummerseqqaartinnagit.“ — Amos 3:7, 8; 2 Pîtruse 1:20, 21.
4, 5. (a) Sooq Jesus siunissaq pillugu paasissutissiisinnaava? (b) Jesusip apustilii sumik katitersimasumik apeqqutissaqarpat?
4 Jesus Kristus tassaavoq Guutip pruffiitiisa pingaarnerpaartaat. (Eprîarit 1:1, 2) Maanna Jesusip siulittuutaasa ilaat pingaarnerusut ullutsinni pisunut tunngasut misissoriartigik. Siulittuummi tamatumani aamma qanittukkut piumaartussat eqqartorneqarput, aaqqissuussaanerup ajortup maanna atuuttup atorunnaarnissaa nunarsuarmillu paratiisiusumik Guutimit taarserneqarnissaa.
5 Jesusip uppernarsarsimavaa pruffiitiulluni. (Mákorse 6:4; Lúkarse 13:33; 24:19; Juánase 4:19; 6:14; 9:17) Taamaattumik paasinarpoq apustilii Uuliap Qaqqaani Jerusalem isikkivigalugu Jesus issiaqatigalugu siunissaq pillugu ima aperimmata: „Qaqugu tamakku taamaalissappat, sunalu najuunnissannut pissutsillu aaqqissuussaanerata naggatissaanut nalunaaqutaassava?“ — Matîuse 24:3, NV; Mákorse 13:4.
6. Matîuse 24, Mákorse 13 aamma Lúkarse 21 imminnut qanoq attuumassuteqarpat; apeqqullu suna soqutigisariaqarparput?
6 Apeqqutaat Jesusillu akissutaa Matîuse kapitali 24-mi, Mákorse kapitali 13-imi aamma Lúkarse kapitali 21-mi nassaarineqarsinnaapput.a Oqaluttuat taakku imminnut tapertariipput assigiivinnatilli. Assersuutigalugu Lukasip kisimi eqqaavaa ’toqorarneq nalliuttarumaartoq’. (Lúkarse 21:10, 11; Matîuse 24:7; Mákorse 13:8) Aperisinnaavugut Jesusip tusarnaartini inuutillugit piumaartussaannaat siulittuutiginerai, imaluunniit ullutsinni siunissatsinnilu piumaartussat aamma pinerai?
Apustilit paasisaqarusupput
7. Apustilit ingammik suna apeqqutigaat, Jesusillu akissutaa qanoq annerusumik isumaqarpa?
7 Toqutaanissani ullualunnik sioqqullugu Jesusip eqqartorpaa Guutip Jerusalem, juutit illoqarfiisa pingaarnersaat, ajattorsimagaa. Illoqarfik naalaffissuarlu tassaniittoq aserorneqarumaarput. Taava apustilit ilaat aperipput suna Jesusip ’najuunnissaanut pissutsillu aaqqissuussaanerata naggatissaanut nalunaaqutaassanersoq’. (Matîuse 23:37–24:3) Qularnanngitsumik ingammik juutit aaqqissuussaanerat Jerusalemilu eqqarsaatigaat, piumaartussat sunik nassataqarnissaat paasilluinnarsimannginnamikku. Akigamigilli Jesusip ukioq 70 u.n.k. tikillugu piumaartussat, Romamiut Jerusalemimik aseruinissaat kisiaanngitsoq aammali siunissami ungasissumi piumaartussat, eqqarsaatigai. — Lúkarse 19:11; apustilit suliait 1:6, 7.
8. Ineriartorneq suna Jesusip ilaatigut siulittuutigaa?
8 Soorlu iivangkiiliuni pingasuni atuarsinnaagipput, Jesusip eqqartorpai inuiaat pikitsitsiumaartut inuiaqatiminnut, naalagaaffillu naalagaaffeqatiminut, kaannersuit, nunap sajuttarneri, eqqarnaarnartut qilammilu takusat. Ukiuni Jesusip nalunaaqummik tamatuminnga eqqartuineranit (ukiumi 33-mi u.n.k.) Jerusalemillu aserorneqarnissaanut (ukiuni 66-70 u.n.k.), pruffiitioqqusersut Kristusioqqusersullu takkukkumaarput. Kristumiut Jesusip tusarliussaanik oqaluussisut juutinit malersorneqassapput.
9. Jesusip siulittuutaa qanoq ililluni ukiuni hundredelinni siullerni eqquussimava?
9 Nalunaaqutip ilai tamakku ilumut pisimapput, soorlu oqaluttuarisaanermik ilisimatuup Flavius Josefusip uppernarsaraa. Allassimavoq Romamiut suli saassussitinnagit Messiasioqqusersut pikitsitsilersimasut. Judæami allanilu nuna assut sajuttarsimavoq. Romamiut naalagaaffissuanni arlalinnik sorsuttoqartarsimavoq. Kaannersuaqarsimava? Aap. (Naleqqiuguk apustilit suliait 11:27-30.) Naalagaaffilli oqaluussissutigineqarsimava? Ukiup 60-ip 61-illuunniit u.n.k. missaanni Paulusip Kulorsamiunut allaffiginninnerata nalaani Guutip naalagaaffianik ’neriugisaq tusagassap nuannersup pia’ Afrikami, Asiami Europamilu siuaruarluareersimavoq.b — Kulorsamiut 1:23, NV.
„Taavalu“ naggatissaq nalliutissaaq
10. Sooq griikerit oqaasiat toʹte malugisariaqarparput, oqaaserlu tamanna qanoq isumaqarpa?
10 Jesusip pisussat ilaat tulleriinnissaat malillugu eqqartorpai. Ima oqarpoq: ’Naalagaaffimmik iivangkiiliu tamanna oqaluussissutigineqassavoq . . .; taavalu naggatissaq nalliussavoq.’ Ilaatigut oqaaseq „taava“ isumaqarsinnaavoq „taamaattumik“ imaluunniit „kingorna“. (Mákorse 4:15, 17; 13:23) Kisianni Matîuse 24:14-imi griikerit oqaasiat toʹte ’taava’-mik nutserneqarpoq.c Griikerit oqaasiinik ilisimatuut nassuiarpaat toʹte tassaasoq „piffissamik uparuartorniut“, „tulliulluni pisoq“ imaluunniit „kingorna pisoq“ pillugu atorneqartoq. Taamaalilluni Jesusip siulittuutigisimavaa Naalagaaffik oqaluussissutigineqassasoq taavalu (’tamatuma kingorna’) ’naggatissaq nalliussasoq’. Suup naggatissaa?
11. Jerusalemip aserorneqarnissaani piumaartussat Jesusip qanoq erseqqissarpai?
11 Jesusip siulittuutaa siullermik eqquuppoq ukiuni juutit aaqqissuussaanerata naggatissaata siornani. Sorsunnerit, nunap sajuttarneri, nerisassaaleqineq ilaallu ilanngullugit Jesusip siulittuutigisai ukiut 30-t ingerlaneranni pisimapput. Kisianni Matîuse 24:15-imiit, Mákorse 13:14-imiit aamma Lúkarse 21:20-miit allaatigineqarput naggatissap siunitsiannguagut piumaartussat. — Malugiuk qupperneq 14-imi titarneq kittorarnilik.
12. Romamiut sakkutuui qanoq ilillutik Matîuse 24:15-imik eqquutitseqataasimappat?
12 Juutit ukiumi 66-imi u.n.k. pikitsitsinerat qisuariarfigalugu Romamiut sakkutoorpassui Jerusalemimut aallarput Cestius Gallusimit siulersorneqarlutik, illoqarfillu juutit illernartutut isigisaat ungullugu. (Matîuse 5:35) Naak juutit akisillutik saassussigaluartut Romamiut illoqarfik isaaffigaat. Taamaalillutik ’inimut illernartumut pipput’ soorlu Jesusip Matîuse 24:15-imi Mákorse 13:14-imilu siulittuutigigaa. Taava ilimaginngisamik pisoqarpoq. Illoqarfik ungoreeraluarlugu Romamiut tassanngaannartumik tunuarput. Kristumiut ingerlaannaq paasivaat Jesusip silittuutaa eqquutilersoq, Romamiullu tunuarmata Judæamit qimaasinnaalerput qaqqanut Jordanip akianiittunut. Oqaluttuarisaanermik ilisimatuut taamatut pisoqarsimanera uppernarsarsinnaavaat.
13. Kristumiut qanoq ilillutik Jesusip qimaaqqussutaa maleruarsinnaasimavaat?
13 Soorli uffa Romamiut Jerusalemimit tunuartut kristumiut qimaasariaqarsimappat? Pisimasut takutimmassuk Jesusip oqarsimaneratut Jerusalemip ’nungutitaaffissaa qanillisoq’. (Lúkarse 21:20) Aap, nungutitaajumaartoq. Jesusip siulittuutigaa ’naalliunnartoqangaassasoq silarsuaqaleqqaarneranit mannalu tikillugu naleqanngisaannartumik kingornaluunniit naleqassanngitsumik’. Ukiut pingasut affarlu tamatuma kingorna, ukiumi 70-imi u.n.k., Jerusalemimi ilumut ’naalliunnartoqangaalersimavoq’ Romamiut sakkutoorpassui Titusimit siulersorneqartut pisuullutik. (Matîuse 24:21; Mákorse 13:19) Kisianni sooq Jesus oqarsimava tassaajumaartoq naalliunnartoq ’naleqanngisaannartoq kingornalu naleqassanngitsoq’?
14. Sooq oqarsinnaavugut Jerusalemimi ukiumi 70-imi u.n.k. pisimasoq tassaasoq naalliunnartoq ’naleqanngisaannartoq kingornalu naleqassanngitsoq’?
14 Ukiumi 607-imi u.n.s. Jerusalem Babylonimiunit aserorneqareersimavoq, ukiunilu hundredelinni maanna atuuttuni illoqarfimmi tamatumani ingasattumik sorsunneqarsimavoq. Ukiumili 70-imi u.n.k. pisimasoq tassaavoq naalliunnartorsuaq naleqanngitsoq. Qaammatit tallimat missingisa ingerlaneranni Titusip sakkutuuisa juutit ajugaaffigaat. 1.100.000-t toquppaat, 100.000-illu missaat tigusaralugit. Aammalu Romamiut illoqarfik aseruippaat. Tamatuma takutippaa juutit pallorfiginninnermik aaqqissuussaanerat siornatigut akuerisaagaluartoq naalaffimmik qiterisaqartoq maanna atorunnaarsitaalluinnartoq. (Eprîarit 1:2) Aap, ukiumi 70-imi u.n.k. pisimasoq tassaavoq ’naalliunnartoq silarsuaqaleqqaarneranit mannalu tikillugu [illoqarfimmut inuiaqatigiinnullu] naleqanngisaannartoq kingornaluunniit naleqassanngitsoq’. — Matîuse 24:21.d
Siulittuutigineqartutut suli pisussaqarpoq
15. (a) Jesusip Jerusalemip aserorneqarnerata kingorna piumaartut suut siulittuutigai? (b) Matîuse 24:23-28 eqqarsaatigigutsigu, Jesusip siulittuutaata eqquunnera pillugu qanoq isummertariaqarpugut?
15 Jesusilli ukiuni hundredelinni siullerni naalliunnartoqarnissaa siulittuutigiinnanngilaa. Biibilimi takutinneqarpoq naalliunnartup kingorna suli piumaartussaqartoq, tassami Matîuse 24:23-imi aamma Mákorse 13:21-mi oqaaseq toʹte (’taava’) atorneqarpoq. Ukiup 70-ip u.n.k. kingorna susoqassava? Juutit aaqqissuussaanerannut naalliunnartup kingorna Kristusioqqusersut pruffiitioqqusersullu allat takkukkumaarput. (Naleqqiukkit Mákorse 13:6 aamma 13:21-23.) Jerusalemip ukiumi 70-imi u.n.k. aserorneqarnerata kingorna ukiut hundredellit ingerlaneranni inunnik taama ittunik saqqummertoqartarsimavoq, inuilli anersaakkut eqqumasut Kristusip najuunnissaanik ilimagisallit tammartitaasimanngillat. (Matîuse 24:27, 28) Ukiumili 70-imi u.n.k. naalliunnartup kingorna pisimasut tamakkua takutippaat Jesusip eqquutitsinerup siulliup kingorna aamma kingusinnerusukkut piumaartussat eqqartorsimagai.
16. Lúkarse 21:24-p suna siulittuummut ilannguppaa, tamannalu qanoq pingaaruteqarpa?
16 Aappassaanik: Matîuse 24:15-28 aamma Mákorse 13:14-23 Lúkarse 21:20-24-mut naleqqiukkutsigik malugissavarput Jesusip siulittuutaani Jerusalemip aserorneqarnerata kingorna piumaartussat pineqarnerannut aamma allamik takussutissaqartoq. Eqqaamajuk Lukasip kisimi ’toqorarnerit’ eqqartorai. Aamma taassuma kisimi Jesusip oqaasii makku issuarpai: ’Jerusalem Guutimik nalusut tullaarissavaat Guutimik nalusut ullussaat naammatsitserlugit.’e (Lúkarse 21:24) Ukiumi 607-imi u.n.s. Babylonimiut juutit kunngiisa kingullersaat peersissimavaat tamatumalu kingorna Jerusalem, Guutip naalagaaffianut assersuutaasoq, tullaarineqarpoq. (2 Kunngit 25:1-26; 1 Israelikkut oqaluttuarisaanerat 29:23; Hesekiel 21:25-27) Lúkarse 21:24-mi Jesusip eqqartorpaa taamaattuassasoq Guutip naalagaaffimmik pilersitseqqinnissaanut piffissanngortitserlugu.
17. Jesusip siulittuutaata siunissamut ungasissumut tikkuarneranut takussutissat pingajussaat suua?
17 Pingajussaanik: Jesusip kingusinnerusukkut eqquutitsinissaq tikkuaraa aamma matumannga paasivarput: Allakkat naapertorlugit Messias toqusussaallunilu makittussaavoq, taavalu Guutip talerpiata tungaani issiassaaq akeqqani naalagaaffigissallugit Guutimit aallartinneqarnissani tikillugu. (Tussiaat 110:1, 2) Jesusip eqqartorsimavaa Ataatami talerpiata tungaani issiajumaarluni. (Mákorse 14:62) Apustili Paulusip uppernarsarsimavaa Jesusip makissimasup Jehovap talerpiata tungaani kunnginngornissani Guutillu akeraanut akuliunnissani utaqqigaa. — Rûmamiut 8:34; Kulorsamiut 3:1; Eprîarit 10:12, 13.
18, 19. sarĸúmersitat 6:2-8-ip iivangkiiliuni siulittuut pillugu sumik paasitippaatigut?
18 Sisamassaanik: Jesusip aaqqissuussaanerup matuma naggatissaa pillugu siulittuutaa ukiuni hundredelinni siullerniinnaanngitsoq eqquuttussaasoq takusinnaavarput sarĸúmersitat kapitali 6 misissorutsigu. Ukiut qulillit arlallit ukiup 70-ip u.n.k. kingorna apustili Johannesip qimussersut takorlooruminarsisillugit allaatigai. (sarĸúmersitat 6:2-8) ’Naalakkap ullua’ — tassa najuunnissaa — pillugu siulittuutip tamatuma takutippaa ukiut hundredellit 20-issaat maanna atuuttut inuuffigisavut sorsunneqarfiussasut (versi 4), nerisassaaleqineqarfiussasut (versit 5 6-ilu) aamma ’toqorarneqarneqarfiussasut (versi 8). Tamanna ersarissumik Jesusip iivangkiiliuni oqaatigisimasaanut naleqqulluarpoq, takutippaalu siulittuutaa ’Naalakkap ulluani’ annerusumik eqquukkumaartoq. — sarĸúmersitat 1:10.
19 Inuit paasisimasaqarluartut misiutiginngilaat nalunaaqut katitersimasoq Matîuse 24:7-14-imi aamma sarĸúmersitat 6:2-8-mi siulittuutigineqartoq 1914-imiit nunarsuaq tamakkerlugu sorsunneqalernermiit takuneqarsinnaasimasoq. Jehovap Nalunaajaasuisa nunarsuaq tamakkerlugu oqaluussissutigaat Jesusip siulittuutaa maanna aappassaanik annerusumillu eqquukkiartortoq, soorlu sorsunnerit naakkittaatsut, nunap sajuttarneri aseruisut, kaannerit avaanngunartut nappaatillu amiilaarnarsiartuinnartut takutikkaat. Nappaatit pillugit U.S.News & World Report-imi (juulip 27-ani, 1992) ima allassimasoqarpoq: „AIDS-imik nappaalanersuaq inuit millionilikkuutaat toqqutigaat erniinnarlu tassaajumaarpoq oqaluttuarisaanermi toqorarnerit ajornerpaartaat akisuunerpaartaallu. Ukiuni 1300-kkunni inuit 25 millionillit ’toqu qernertoq’ toqussutigisimavaat. Ukiumili 2000-imi inuit HIV-viruseqartut, 30 millionit 110 millionillu akornanniissapput, ullumikkut 12 millionit pallimavaat. (Virus taanna AIDS-imik kinguneqartarpoq.) Katsorsarneqarsinnaalinngippat tamarmik toqussapput.“
20. Matîuse 24:4-22 qanoq ililluni siullermik eqquussimava, eqquunneralu alla suna ersarippa?
20 Taava Jesusip apustilit apeqqutaannut akissutaa qanoq isummerfigisariaqarparput? Siulittuutaani ersarissumik eqqartorneqarput Jerusalemip aserorneqarnerata siorna nalaanilu pisimasut, aammalu ukiup 70-ip u.n.k. kingorna piumaartussat ilaat. Tamakkua amerlanersaat aappassaanik annerusumillu eqquutissapput, aaqqissuussaanerlu manna ajortoq naalliunnartoqangaarnissami nungutitaassaaq. Tassa Jesusip Matîuse 24:4-22-mi aammattaaq Mákorsemi Lúkarsemilu siulittuutai tamarmik ukioq 33-miit u.n.k. ukiumi 70-imi u.n.k. naalliunnartoq tikillugu eqquussimapput. Versilli taakku aamma aappassaanik eqquutissapput, tassami siunissami naalliunnartussaq annerusoq piumaarmat. Eqquunneq annerusoq tamanna ullutsinni pisoq ullut tamaasa takusarparput.f
Sumut?
21, 22. Siulittuutip qanoq ililluni takutippaa suli piumaartussaqartoq?
21 ’Guutimik nalusut ullussaasa naammatsinnissaata’ tungaanut pruffiitioqqusersut tammartitsiniaasarnissaannik eqqartuinini Jesusip siulittuutiminut naggasiutiginngilaa. (Lúkarse 21:24; Matîuse 24:23-26; Mákorse 13:21-23) Nangilluni piumaartussat allat annilaarnartut nunarsuaq tamakkerlugu malugineqartussat siulittuutigai. Tamakku Inuup ernerata pissarsuulluni naalannartorsuullunilu tikiunnissaanut attuumassuteqarput. Mákorse 13:24-27 naapertorlugu siulittuut ima nangippoq:
22 ’Ullunilu taakkunani naalliunnartup tamatuma kingornagut taava seqineq taarsissaaq qaammallu qaamajunnaarluni. Ullorissallu qilammit nakkarumaarput qilaallu pissaaneri aalajumaarlutik. Taavalu inuup ernera isigiumaarpaat nuiatigut aggersoq pissarsuulluni naalannartorsuullunilu. Taavalu inngilini aallartissavai, qinikkanilu katersorumaarpai anorlersarfinnit taakkunannga sisamanit nunap isuanit qilaallu isua tikillugu.’
23. Sooq ilimagisinnaavarput Matîuse 24:29-31 ukiut hundredellit siulliit kingunerujussuatigut aatsaat eqquuttussaasoq?
23 Juutit ukiumi 70-imi u.n.k. aaqqissuussaanerata aserorneqarnerata kingorna Inuup ernera, Jesus Kristus makissimasoq takussaasumik tikiussimanngilaq. Matîuse 24:30-milu eqqartorneqartutut nunami naggueqatigiit tamarmik isigisimanngilaat, inngilillu qilammiusut kristumiunik tanitaasunik nunarsuarmi sumi tamaaniittunik katersuisimanngillat. Taamaattumik Jesusip siulittuutaa tupinnartoq tamanna qaqugu eqquutissava? Ullumikkut eqquukkiartornerpa imaluunniit siunissami qanittumi eqquunnissaa ilimanarpa? Tamanna paaserusuttariaqarparput, Jesusip kajumissaarutaa Lukasip ima eqqartormagu: ’Tamakku pilerpata aarloritsi, niaqqusilu makitissigik, utertinneqarfissarsi qanillimmat.’ — Lúkarse 21:28. (wD 15/2 94)
[Quppernerup ataani ilanngussat]
a Kapitalit taakkua ilaat qupperneq 14-15-imi takuneqarsinnaapput; allassimaffiit assigiissutaat titarnerit kittorarnillit immikkoortippaat.
b Oqaluttuarisaanermik ilisimatuut pisimasunik tamakkuninnga eqqartuinerannik issuakkat takukkit Vagttårnet, 1. maaji 1970, quppernerit 199-201-ni.
c Oqaaseq toʹte Mattæusip 80-it sinnerlugit atorsimavaa (kapitali 24-mi qulingiluariarluni) Lukasillu iivangkiiliumini 13-eriarluni atorsimavaa. Mákorsip iivangkiiliuani toʹte arfinileriaannarluni atorneqarpoq, ’nalunaaqummut’ atatillugu sisamariarluni.
d Atuakkiortoq tuluk Matthew Henry allassimavoq: „Kaldæamiut Jerusalem aserormassuk naalliunnartorsuusimavoq, maannali amilaarnarneroqisumik pisoqarpoq. Juutit . . . tamarmik nungutitaanissaminnik aarlerinartorsiorput.“
e Amerlasuut paasisimavaat Lúkarse 21:24-p kingorna allamik pisoqassasoq. Dr. Leon Morris ima allassimavoq: „Jesusip nangilluni Guutimik nalusut ullussaat-nik eqqartuinini ingerlatiinnarpaa. . . . Ilisimatuut amerlanersaat isumaqarput Inuup ernerata tikiuffissaa pineqartoq.“ Professori R. Ginns allassimavoq: „Inuup ernerata tikiunnissaa — (Mt 24:29-31; Mk 13:24-27) Guutimik nalusut ullussaat eqqartorneqarmata tamanna pingaarnersaalerpoq; [Lukasip] Jerusalemip inuerunnissaata kingorna piumaartussat allaatigai.“
f Professori Walter L. Liefeld ima allassimavoq: „Isumaqartoqarluarsinnaavoq Jesusip siulittuutai marloriarlutik eqquutissasut: (1) Ukiumi 70-imi naalaffimmut tungatillugu pisimasutigut taavalu (2) siunissami ungasinnerusumi pisussatigut, naggatissamut tungasorpaluttumik allaatigineqartutigut.“ Oqaaseqaammi J. R. Dummelowimit aaqqissorneqartumi ima allassimavoq: „Allassimaffinni tamakkunani paasiuminaatsut ilarpassui ajornartorsiutaajunnaassapput paasigutsigu Naalakkatta piumaartussat marluk, ataasiinnaanngitsoq, eqqartorai, siulleq aappassaanut assersuutaasoq. . . . Ingammik [Lukasip] Guutimik nalusut ullussaat eqqortoramigit . . . takutippaa Jerusalemip aserorneqarnerata silarsuullu naggatissaata akornanni piffissaajumaartoq naluneqanngitsoq.“
Eqqaamavigit?
□ Jesusip Matîuse 24:3-mi apeqqummut akilluni siulittuutaa qanoq ukioq 70 u.n.k. tikillugu eqquussimava?
□ Griikerit oqaasiata toʹte-p qanoq ikiorsinnaavaatigut Jesusip siulittuutaa paaseqqullugu?
□ Sooq oqarsinnaavugut ukiuni hundredelinni siullerni naalliunnartoq naleqanngisaannarsimasoq?
□ Lukasip immikkut ittut marluk suut ullumikkut uatsinnut pingaaruteqartut eqqartorpai?
□ Matîuse 24:4-22-mi siulittuut aappassaanik annerusumillu eqquukkumaartoq sumik takussutissaqarpa?
[Qupp. 14, 15-mi nalunaarsugaq]
MATÎUSE 24
4 ’Jesusilli akivai oqarluni: „Misissoritsi kimilluunniit tammartinneqaqqunasi. 5 Amerlasuummi tikiukkumaarput atera atorlugu oqarlutik: ’Kristusiuvunga,’ amerlasuunillu tammartitsiumaarput. 6 Sorsuttunik tusarumaarpusi sorsunnernillu kalerillusi; mianersoritsi, annilaaqinasi, tamakku tamarmik taamaalissammata, naggatissarli tassaanngikkallarpoq.
7 Inuiaammi pikitsitsiumaarput inuiaqatiminnut, naalagaaffillu naalagaaffeqatiminnut; kaannersuarlu nalliuttarumaarpoq nunalu tamatigut tamaana sajuttarluni. 8 Tamakkuli tamaasa eqqanaarnartup aatsaat aallaqqaatigai.
9 Taava naaliunnartumut pisikkumaarpaasi toqukkumaarlusilu, inuiaqatigiillu tamarmik uumissussavaasi atera pillugu. 10 Taavalu amerlasuut mamiatsassapput pisittaqattaallutillu uumissoqatigiillutillu. 11 Pruffiitioqqusersullu amerlasuut saqqummerumaarput amerlasuullu tammartillugit. 12 Iluaatsuliornerillu amerliumaarmata asanninneq amerlasuuni nillertunngorumaarpoq. 13 Naggatissamulli aalajangersoq annakkumaarpoq. 14 Naalagaaffimmillu iivangkiiliu tamanna oqaluussissutigineqassaaq inuit najugaanni tamarsuarmi inuiaqatigiit tamarmik nalujunnaarutissaannik; taavalu naggatissaq nalliussaaq.
------------------------------------------------------------------
15 Taamaattumik maajunnartoq nungutitsisoq pruffiitikkut Danielikkut oqaatigisaq inimi illernartumi ittoq takulerussiuk, (tamakkuninnga atuartup qarsupiinnarnaveerligit), 16 taava Judæamiittut qaqqanut qimaalit, 17 illullu qaaniittoq aqqanngikkili illuminit sumik aallerumalluni. 18 Nunaatiminiittorlu utinngikkili atisani aajumallugit. 19 Eqqanarli naartusut milutsitsisullu, ullut taakku nalliuppata. 20 Qinugitsili qimaaffissarsi ukiuunerani sapaammiluunniit eqquuteqqunagu. 21 Taamaanneranimi naalliunnartoqangaassaaq silarsuaqaleqqaarneranit mannalu tikillugu naleqanngisaannartumik kingornaluunniit naleqassanngitsumik. 22 Ullullu taakku ikilisinneqanngippata inummik ataasimilluunniit annattoqanngeqqajaqaaq; qinikkalli pillugit ullut taakku ikilisinneqassapput.
------------------------------------------------------------------
23 Taava imaluunniit oqarfigippasi: ’Ata, Kristus maaniippoq!’ imaluunniit: ’Uaniippoq!’ taava upperissanngilasi. 24 Kristusioqqusersummi pruffiitioqqusersullu saqqummerumaarput, angisuunillu nalunaaqutiliorlutik tupinnartuliorumaarput, qinikkat allaat tammartissagaluarlugit ajornanngippat. 25 Ata, siumut tamakkuninnga oqarfigereerpassi. 26 Taamaattumik imaluunniit oqarfigippasi: ’Ata, puilasuitsumiippoq;’ taava ornigutissanngilasi; imaluunniit: ’Ata, ininnguaniippoq;’ upperissanngilasi taava. 27 Soorlumi innaallanneq kangianit pisartoq kitaanullu innaallattarluni, taamaattaaq inuup ernerata tikiuffissaa ikkumaarpoq. 28 Qillulimmummi qillorniat katersoraraat.
------------------------------------------------------------------
------------------------------------------------------------------
29 Ullulli taakkua naalliunnartut kinnguninnguatigut seqineq taarsissaaq qaammallu qaamajunnaarluni, ullorissallu qilammit nakkarumaarput qilaallu pissaaneri aalajumaarlutik. 30 Taavalu inuup ernerata nalunaaqutaa qilammi takussaassaaq; taavalu nunami naggueqatigiit tamarmik nimaarumaarput, isigiumaarpaallu inuup ernera qilaap nuiaasigut aggersoq pissarsuulluni naalannartorsuullunilu. 31 Inngilinilu nipitoorsuarnik qarlortaasisartut aallartissavai, taakkualu qinigai anorlersarfinnit sisamanit, qilaap isuanit isuatalu aappaanit katersorumaarpaat.“’
5 ’Jesusillu oqaluffigilerpai: „Misissoritsi kimut tammarteqqunasi, 6 amerlasuut tikiukkumaarmata atera atorlugu uangaatillutik; amerlasuunillu tammartitsiumaarput. 7 Sorsuttunilli tusarussi sorsunnernillu kalerrillusi, taava annilaaqinasi, tamakku taamaalissammata, naggatissarli tassaanngikkallarpoq.
8 Inuiaammi pikitsitsiumaarput inuiaqatiminnut, naalagaaffillu naalagaaffeqatiminut; nunalu tamatigut tamaana sajuttarumaarpoq, kaannerlu nalliuttarumaarpoq. Tamassa eqqanaarnartup aallaqqaatai.
9 Ilissili mianersoritsi, killisiuiffinnut naalagiartarfinnullu kunnginullu sassartinneqassaasi uanga pillunga taakkua nalujunnaarutissaannik. 10 Iivangkiiliulu inuiaqatigiinnut tamanut oqaluussissutigineqarallassaaq. 11 Taava aallarullusi pisippasi qanoq oqalussasusi siumut isumakulussanngilasi; kisianni taamaalisukkut qanoq tunineqarussi taama oqalugitsi ilissi oqaluttuunnginnasi anersaarli illernartoq oqaluttuummat. 12 Qatanngunni qatanngutaata toquteqqussavaa, qitornilu angutaata, angajoqqaatillu qitornaasa akerartussavaat toqullugillu; 13 tamarmillu atera pillugu uumissussavaasi. Naggatissamulli aalajangersoq annakkumaarpoq.
------------------------------------------------------------------
14 Maajunnartorli nungutitsisoq inissarinngisaraluaminiittoq takulerussiuk, (tamakkuninnga atuartup eqqarsaatiginiarligit!) taava Judæamiittut qaqqanut qimaalit, 15 illullu qaaniittoq illumut aqqanngikkili isernanilu sumik illuminit aallerumalluni, 16 nunaatiminiittorlu utinngikkili annorassani aajumallugit. 17 Eqqarnarli naartusut milutsitsisullu, ullut taakku nalliuppata. 18 Qinugitsili ukiuunerani nalliuteqqunagu, 19 ulluni taakkunani naalliunnartoqangaassammat Guutip pinngortitaasa pinngortitaaleqqaarnerannit mannalu tikillugu naleqanngisaannartumik kingornaluunniit naleqassanngitsumik. 20 Ullullu taakku Naalakkap ikilisinngippagit inummik ataatsimilluunniit annattoqanngeqqajaqaaq; qinikkalli qinersimasani pillugit ullut taakku ikilisippai.
------------------------------------------------------------------
21 Taavalu imaluunniit oqarfigippasi: ’Ata, Kristus maaniippoq,’ imaluunniit: ’Ata, uaniippoq,’ taava upperissanngilasi. 22 Kristusioqqusersummi pruffiitioqqusersullu saqqummerumaarput, nalunaaqutiliorlutillu tupinnartuliorumaarput qinikkat allaat tammartissagaluarlugit ajornanngippat. 23 Ilissili misissoritsi; ata, tamanik siumut oqarfigereerpassi.
------------------------------------------------------------------
------------------------------------------------------------------
24 Ullunilu taakkunani naalliunnartup tamatuma kingornagut taava seqineq taarsissavoq qaammallu qaamajunnaarluni. 25 Ullorissallu qilammit nakkarumaarput qilaallu pissaaneri aalajumaarlutik. 26 Taavalu inuup ernera isigiumaarpaat nuiatigut aggersoq pissarsuulluni naalannartorsuullunilu. 27 Taavalu inngilini aallartissavai, qinikkanilu katersorumaarpai anorlersarfinnit taakkunannga sisamanit nunap isuanit qilaallu isua tikillugu.“’
8 ’Akivaali: „Misissoritsi tammartitaaqqunasi, amerlasuut tikiukkumaarmata atera atorlugu uangaanerarlutik taamaaffissaalu qanillinerarlugu. Taakku maleqinasigik. 9 Sorsuttunilli pikitsitsisunillu tusarussi, taava annilaaqinasi tamakku taamaaligallassammata, naggatissarli qilamik pinngikkallassaaq.“
10 Taava oqarfigai: „Inuiaat inuiaqatiminnut pikitsitsiumaarput, naalagaaffillu naalagaaffeqatiminut; 11 nunalu tamatigut tamaana sajungaartarumaarpoq, kaannersuarlu toqorarnerlu nalliuttarumaarput, ersinartorsuillu nalunaaqutillu angisuut qilammit piumaarput.
12 Tamakkuli tamarmik siornatigut tigujumaarpaasi qinugalusilu, naalagiartarfinnullu parnaarussivinnullu pisikkumaarpaasi, kunnginullu nunallu naalagaanut sassartikkumaarpaasi, atera pillugu. 13 Tamannali nalunaajaassutigiumaarparsi. 14 Taamaattumik uummammiuginiarsiuk, siumut eqqarsaatigeqqunagu qanoq illersuutissassinnik akissasusi, 15 uanga tuniumaarassi qanermik ilisimanermillu akerartortissi tamarmik assortorneq assuarinerluunniit ajugassaannik. 16 Angajoqqaassili qatanngutissilu eqqarlisilu ikinngutisilu allaat pisikkumaarpaasi, ilasilu toqukkumaarpaat, 17 tamarmillu atera pillugu uumissussavaasi. 18 Nutsassili ilaannilluunniit tammmartoqassanngilaq. 19 Nikallujuissutsissigut tarnisi pigissavasi.
------------------------------------------------------------------
20 Jerusalemili sorsuttorpassuit ilugaat takulerussiuk, taava ilisimassavarsi nungutitaaffissaa qanillisoq. 21 Taava Judæamiittut qaqqanut qimaalit, Jerusalemillu iluaniittut tassannga anilit, nunaannarmiittullu tassunga isernaveerlit. 22 tassaappummi ullut akiniaaffiit, allassimasut tamarmik eqquuffissaat. 23 Eqqanaq naartusut mulitsitsisullu ullut taakku nalliuppata; naalliunnartoq nunami angissaqimmat, kamannerlu inuiannut ukununnga nalliukkumaarluni. 24 Panallu kiinaagut orlorarumaarput Guutimik nalusunut tamanut aallarussaajumaarlutik;
------------------------------------------------------------------
Jerusalemilu Guutimik nalusut tullaarissavaat Guutimik nalusut ullussaat naammatsitserlugit.
------------------------------------------------------------------
------------------------------------------------------------------
25 Nalunaaquteqarumaarporlu seqinermi qaammammilu ullorissanilu, nunamilu inuiaqatigiit qussalallutillu ernumangaassapput, imarlu mallillu ittuttorsuanngorpata, 26 inuit ersinermit inuillu najugaannut piumaartussanik ilimasunnermit tumannguppata; qilaammi pissaaneri aalajumaarput. 27 Taavalu inuup ernera isigiumaarpaat nuiakkut aggersoq pissarsuulluni naalannartorsuullunilu. 28 Tamakkuli pilerpata aarloritsi, niaqusilu makitissigik, utertinneqarfissarsi
[Qupp. 10-mi assiliartaq]
Ukiumi 70-imi u.n.k. naalliunnartoq tassaavoq Jerusalemimut juutillu aaqqissuussaaneranut naalliunnartoq naleqanngisaannartoq