’Oqarfigitigut: Qaqugu tamakku taamaalissappat?’
„Siumut oqaatigisakka eqquutereerput, nutaat maanna nalunaarutigaakka, tusarliuppakka naalersutut puttutinnginneranni.“ — JESAJA 42:9.
1, 2. (a) Siunissaq pillugu Jesusip apustilii qanoq aperisimappat? (b) Nalunaaqut katitersimasoq Jesusip akissummini eqqartugaa qanoq eqquussimava?
JEHOVA Guuti ajoqersuisuuvoq, tassaavoq „qangarsuarli nalunaarutiginnittoq qanoq pisoqarnissaanik“. (Jesaja 46:10) Soorlu ilanngutassiap siuliani takutinneqartoq, apustilit Jesusimit tamakkuninnga paasitinneqarusupput ima aperigamikku: ’Oqarfigitigut, qaqugu tamakku taamaalissappat? Sunalu nalunaaqqutaassava tamakku tamarmik naammassineqassappata?’ — Mákorse 13:4.
2 Akillugit Jesusip ’nalunaaqut’ katitersimasoq eqqartorpaa juutit aaqqissuussaanerata qanittukkut naggatissaanut takussutissanik imalik. Tamanna eqquussimavoq ukiumi 70-imi u.n.k. Jerusalem aserorneqarmat. Siulittuutaali siunissami ungasinnerusumi aamma annerusumik eqquutussaavoq. ’Guutimik nalusut ullussaat’ 1914-imi naammata nalunaaqut annerungaartoq takuneqalerpoq, tamatumalu takutippaa aaqqissuussaaneq ajortoq maanna atuuttoq qanittukkut ’naalliunnangaartumi’ naajumaartoq.a (Lúkarse 21:24) Inuit millionilikkuutaat ullumikkut inuusut uppernarsarsinnaavaat nalunaaqut tamanna sorsunnersuartigut pisartutigullu nuanniitsutigut maanna ukiuni 1900-kkunni eqquukkiartortoq. Pisimasut tamakku tassaapput Jesusip siulittuutaata inaarutaasumik eqquukkiartorneri, ukiumi 33-miit 70-mut u.n.k. pisimasutigut siumut assersuutigineqartoq.
3. Nalunaaqut alla eqqartorlugu piumaartussat suut Jesusip siulittuutigai?
3 Lukasip oqaluttuamini Guutimik nalusut ullussaat eqqartoreeramigit nangilluni piumaartussat allat siulittuutigai, soorluttaaq Mattæusip, Markusip Lukasillu eqqartoraat, ilaatigut ’pissutsit aaqqissuussaanerata naggatissaanut’ nalunaaqutit ataqatigiit saniatigut nalunaaqut’ suli alla. (Matîuse 24:3, NV) (Qupperneq 15-imi allassimaffinni tamanna ataatigut titarneqarpoq.) Mattæus ima allassimavoq: ’Ullut taakkua naalliunnartut kinguninnguatigut seqineq taarsissaaq qaammallu qaamajunnaarluni, ullorissallu qilammit nakkarumaarput qilaallu pissaaneri aalajumaarlutik. Taavalu inuup ernerata nalunaaqqutaa qilammi takussaassaaq; taavalu nunami naggueqatigiit tamarmik nimaarumaarput, isigiumaarpaallu inuup ernera qilaap nuiaasigut aggersoq pissarsuulluni naalannartorsuullunilu. Inngilinilu nipitoorsuarnik qarlortaasisartut aallartissavai, taakkualu qinigai anorlersarfinnit sisamanit, qilaap isuanit isuatalu aappaanit katersorumaarpaat.’ — Matîuse 24:29-31.
Annikilliornartoq qilammilu nalunaaqutit
4. Qilammi saqqummersussat Jesusip siulittuutigisai pillugit suut apeqqutaalerpat?
4 Qaqugu tamakku eqquutissappat? Iivangkiiliut pingasut taakkua tamarmik qilammi nalunaaqutinik eqqartuipput: Seqineq qaammallu taarsissasut ullorissallu nakkaassallutik. Jesusip oqaasii malillugit tamakku ’ullut naalliunnartut’ kingorna piumaarput. Taamaattumik ima aperisinnaavugut: Jesusip naalliunnartoq ukiumi 70-imi pisoq eqqarsaatiginerpaa imaluunniit annikilliornartussaq uagut suli utaqqisarput? — Matîuse 24:29; Mákorse 13:24.
5. Ullutsinni annikilliornartoq pillugu qanoq isumaqartoqarsimava?
5 Guutimik nalusut ulluisa 1914-imi naaneranniit Guutip innuttaasa ’annikilliornartussaq’ assut soqutigisimavaat. (sarĸúmersitat 7:14) Ukiuni arlalinni isumaqarsimagaluarput annikilliornartoq tamanna sorsunnersuup siulliup nalaani aallartissimasoq, taava kipitinneqarallartoq naggataatigullu ’sorsunnissami Guutip ajugaqanngitsup ullussarsuani’ naajumaarluni. Taamaappalli ukiuni qulilinni ingerlagallartussani ’silap matuma naggatissaani’ sunik pisoqassagami? — sarĸúmersitat 16:14; Matîuse 13:39; 24:3; 28:20.
6. Jesusip qilammi saqqummersussat pillugit siulittuutaa qanoq eqquuttussaasorineqarsimagaluarpa?
6 Isumaqartoqarsimavoq ukiuni ingerlagallartuni tamakkunani nalunaaqut katitersimasoq, ilaatigut Guutip innuttaasa oqaluussisarnerat, takuneqarsinnaassasoq. Aamma upperineqarpoq qilammi saqqummersussat siulittuutigineqartut ukiut aallarniutaasut 1914-18-ikkut kingorna ilimagineqarsinnaasut. (Matîuse 24:29; Mákorse 13:24, 25; Lúkarse 21:25) Qilammi takussaasut tassaasorineqarsimapput satellittit, rakettit, qinngornerit navianartut qaammatiliartaatillu.
7. Annikilliornartussaq qanoq ililluni nutaamik nassuiarneqarsimava?
7 Kisianni Vagttårnet-imi 1. maaji 1970-imeersumi Jesusip silittuutaa, ingammik annikilliornartussaq eqqarsaatigalugu, misissorneqaqqippoq. Takutinneqarpoq ukiuni hundredelinni siullerni pisimasut eqqarsaatigigaanni imaassinnaanngitsoq ullutsinni annikilliornartussaq 1914-18-imi aallarnerneqariarluni, ukiuni qulilinni arlalinni kipitinneqarallariarluni kingusinnerusukkullu nangeqqinneqarluni. Atuagassiami ima allassimavoq: „’Annikilliornartussaq’ naleqassanngitsoq suli siunissamiippoq, tassaajumaarmat eqqunngitsumik upperisarsiornerup (kristumiuuneraqatigiit ilanngullugit) silarsuarmi tamarmi naalagaaffissuata nungutitaanissaa taavalu Harmagedonimi ’sorsunnissap Guutip ajugaqanngitsup ullussarsuani’ nalliunnissaa.“
8. Ullutsinni annikilliornartussamik paasinninneq nutaanerusoq tamanna naapertorlugu Matîuse 24:29 qanoq paasisaqariaqarsorineqarpa?
8 Kisianni Matîuse 24:29-mi allassimavoq ’ullut taakkua naalliunnartut kinguninnguatigut’ qilammi saqqummersoqarumaartoq. Qanoq paasisariaqarpa? Napasuliaq Alapernaarsuiffik-imi 1. decembari 1976-imeersumi allassimavoq ’naalliunnartoq’ tamanna tassaasinnaasoq ukiumi 70-imi u.n.k. pisimasoq. Oqarsinnaanerpugulli ullutsinni qilammi saqqummersut ukiumi 70-imi u.n.k. pisimasut ’kinguninnguanniittut’? Soorunami ukiut hundredellit tamakku Guutimut sivikikkaluarput. (Rûmamiut 16:20; 2 Pîtruse 3:8) Kisianni siulittuut tamanna, ingammik Matîuse 24:29-31, misissornerugutsigu allaalluinnartumik nassuiaatissarsisinnaavarput. Tamatuma takutippaa qanoq ’ullaap qaammalernera qaammarissiartortoq’. (Ussatit 4:18)b Misissoriartigu sooq nassuiaaneq nutaanerusoq naleqqulluartuussasoq.
9. Jesusip qilammi saqqummersussanik oqaasii Allakkani Hebriiarisuuni sumik tunuliaqutaqarpat?
9 Seqernup qaammatillu taarsinissaannik ullorissallu nakkarnissaannik siulittuummik Jesusip apustilimi ilaat sisamat oqaluttuussimavai. Juutiugamik oqaatsit tamakku Allakkanit hebriiarisuunit ilisimavaat, assersuutigalugu Sefanja 1:15-imit, tassani Guutip eqqartuussiffissaa ima allaaserineqarmat: „Ulloq piuneerussaafissaq, aserugaaffissaq, ulloq taartoq taggarissoq, ulloq nuiasoq putsersimasoq“. Aamma pruffiitit hebriiariusut allat seqernup taarsinissaanik qaammatillu ullorissallu qaamajunnaarnissaannik siulittuuteqarsimapput. Guutip Babylonimut, Edomimut, Egyptenimut naalagaaffimmullu avannaaniittumut Israelimut tusarliussaani oqariaatsit taamaattut aamma nassaassaapput. — Jesaja 13:9, 10; 34:4, 5; Jeremia 4:28; Hesekiel 32:2, 6-8; Amos 5:20; 8:2, 9.
10, 11. (a) Qilammi pisussat suut Joelip siulittuutigisimavai? (b) Joelip silittuutaata ilai suut ukiumi 33-mi u.n.k. eqquussimappat, suullu eqquussimanngillat?
10 Peterip apustilillu allat pingasut Jesusip oqaasii tusaramikkik qularnanngitsumik Joelip siulittuutaa eqqaavaat. Joel 3:1-4-mi ima atuarpugut: „Kingunerilerpat anersaara kuiumaarpara inunnut tamanut; ernisi panisilu pruffiititut oqalussapput. . . . Nalunaaqutinik saqqummersitsiumaarpunga qilammi nunarsuarmilu — aammik innermillu putsunillu napasunik. Seqineq allanngussaaq taarnerinnaalerluni, qaammallu aanngorluni, [Jehovap] ullussaa pingaaqisoq siooranangaaqisorlu nalliutinngikkallartillugu.“ Kapitali 4, versi 15-imi ima allassimavoq: „Seqineq qaammallu taarsissapput ullorissallu qaamassuseerullutik.“
11 Soorlu apustilit suliait 2:1-4, 14-21-mi allassimasoq ukiumi 33-mi piinsip ulluani Guutip ajoqersukkat 120-t, angutit arnallu, anersaamik illernartumik kuivai. Apustili Peter nalunaarpoq tamanna tassaasoq Joelip siulittuutaata eqquunnera. Kisianni allassimaffiup Peterip issuagaata sinnera, seqineq taarsissasoq, qaammat aanngussasoq ullorissallu qaamassuseerutissasut, aamma eqquuppat? Naamik, tamakku ukiumi 33-mi aamma ukiuni tulliuttuni 30-ni juutit aaqqissuussaanerannut naggataasuni eqquutinnngikkallarput.
12, 13. Qilammi saqqummersussat Joelip silittuutigisai qanoq ilillutik eqquussimappat?
12 Tassa Joelip siulittuutaata naggataatungaani ’Jehovap ullussaa pingaaqisoq siooranangaaqisorlu’ pineqarpoq — tassa Jerusalemip aserorneqarnera. Vagttårnet-ip normuani, 15. februaari 1967-imi, ukiumi 70-imi Jerusalemimi annikilliornartoq pillugu ima allassimavoq: „Ilumut Jerusalemimut innuttaanullu tassaasimavoq ’Jehovap ullua’. Ulloq tamanna ’aammik innermillu putsunillu napasunik’ ulikkaarsimavoq, ullukkut seqineq illoqarfimmut taarmik uleqqasumut qaamasimanngilaq, qaammallu aattut kuisatut issimavoq; unnuakkut qaammat eqqissinartumik siilvitut ittumik qaamasimanngilaq.“c
13 Aap, soorlu siulittuutini allani eqqartoriikkatsinni paasigipput, Jehovap eqqartuussutini naammassigaangagit Joelip siulittuutigisaatut qilammi takussaasunik pisoqartarpoq. Seqernup, qaammatip ullorissallu taarsinerat juutit aaqqissuussaanerata naggatissaata ingerlanerani pisimanngilaq; aap, sakkutoorpassuit Jerusalemimut isaaneranni pisimavoq. Taamaattumik pissutissaqarluarpugut ilimagissallugu Joelip siulittuutaata ilaa kingulleq eqquutissasoq Jehovap pissutsit aaqqissuussaaneranut matumunnga eqqartuussutini naammassilerpagu.
Qilammi nalunaaqutit sioqqullugit naalliunnartoq suna?
14, 15. Joelip silittuutaata qanoq ikiorsinnaavaatigut Matîuse 24:29 paaseqqullugu?
14 Joelip siulittuutaata (soorluttaaq siulittuutit allat assingusunik oqaasertallit) ukiuni hundredelinni siullerni eqquussimanerat eqqarsaatigigaanni oqaatsit Matîuse 24:29-miittut paasinarnerulerput. Paasivarput Jesus oqarmat seqineq qaammallu taarsissasut ullorissallu qilammit nakkassasut, pineqanngitsut naggatissap nalaani, ukiut qulillit arlallit ingerlaneranni, piumaartussat — soorlu assersuutigalugu avataarsualiartaatinik aallartitsisarneq qaammatiliarnerillu. Aap, Jesusip pisaa ’Jehovap ullussaanut pingaaqisumut siooranangaaqisumullu’, aseruinissamut piumaartussamut, attuumassuteqarpoq.
15 Taamaattumik paasinarnerulerpoq allassimasoq ’ullut taakkua naalliunnartut kinguninnguatigut’ qilammi pisoqarumaartoq. Jesusip naalliunnartoq ukiumi 70-imi u.n.k. pisimasoq pinngilaa. Aap, tamatuma kingunersuatigut, ’najuunnissamini’ neriorsuutigisaasumi silarsuarmut matumunnga annikilliornartussaq piumaartoq pivaa. (Matîuse 24:3, NV) Annikilliornartussaq tamanna suli utaqqivarput.
16. Naalliunnartoq suna Mákorse 13:24-mi eqqartorneqarpa, aamma sooq?
16 Taavami Mákorse 13:24-mi allassimasut makku qanoq paasisariaqarpat: ’Ullunilu taakkunani naalliunnartup tamatuma kingornagut taava seqineq taarsissaaq qaammallu qaamajunnaarluni’? Oqaatsit ’taakkunani’ aamma ’tamatuma’ tamarmik griikerit oqaasianik e·keiʹnos-imik naggueqarput, tassaasoq upparuartorniut piffissami ungasissumiittoq pillugu atorneqartartoq. E·keiʹnos atorneqarsinnaavoq qangasuarli pisimasoq pillugu imaluunniit siunissami ungasissumi piumaartussaq pillugu. (Matîuse 3:1; 7:22; 10:19; 24:38; Mákorse 13:11, 17, 32; 14:25; Lúkarse 10:12; 2 Tásalûníkamiut 1:10) Mákorse 13:24-mi ’naalliunnartoq tamanna’ eqqartorneqartoq tassaanngilaq Romamiut naalliunnartoqartitsinerat, tassaallunili pissutsit aaqqissuussanerata maannakkut atuuttup naalernerani Jehovap akuliunnissaa.
17, 18. sarĸúmersitat qanoq ilillutik annikilliornartussap ineriartornissaanik paasissutissiippat?
17 Matîuse 24:29-31-mi, Mákorse 13:24-27-imi Lúkarse 21:25-28-milu allassimasunik paasinninneq nutaaq tamanna sarKúmersitat kapitali 17-imit 19-imut allassimasunut naleqqulluartuuvoq tassanilu uppernarsarneqarluni. Qanoq ililluni? Aap, iivangkiiliuni oqaluttuarineqartut takutippaat annikilliornartussaq angisooq tassuuguinnaq aallartissanngitsoq naassananilu. Annikilliornartussaq aallartippat suli inoqarumaarpoq ’inuup ernerata nalunaaqutaanik’ takunnittunik tamatumunngalu qisuariartunik — nimaarumaarput, aamma, soorlu Lúkarse 21:26-mi eqqartorneqartoq, ’ersinermit inuillu najugaannut piumaartussanik ilimasunnermit tumangussapput’. Taama ersitigissapput namminneq suujunnaarnissaminnut ’nalunaaqut’ takusinnaassagamikku.
18 sarKúmersitat tunngavigalugit paasinarsivoq annikilliornartussaq tamanna pilerumaartoq ’nersutip’ naalagaaffinnit tamanit pilersitap ’nassuni’ atorlugit, tassa sakkutooqarnikkut pissaanini atorlugu, ’uersartorsuaq’ Babylon Angisooq saassullugu aserorpagu.d (sarĸúmersitat 17:1, 10-16) Tamanna pereerpat suli inuppassuit amiakkuussapput allaatigineqarmat kunngit, niuertut umiarsuarmiut allallu qanoq ilillutik eqqunngitsumik upperisarsiornerup aserornera qissatigissagaat. Qularnanngitsumik amerlasuut paasissavaat eqqartuunneqalerlutik. — sarĸúmersitat 18:9-19.
Suut piumaarpat?
19. Annikilliornartussaq pilerpat suut ilimagisinnaavavut?
19 Matîuse-imi, Mákorse-mi, Lúkarse-mi aammalu sarKúmersitat 17-19-imi allassimasut tamakku ikiortigalugit qanittukkut piumaartut pillugit paasisaqarluarsinnaavugut. Guutip piffissarititaani aalajangersakkami annikilliornartussaq aallartissaaq eqqunngitsumik upperisarsiornerup silarsuarmi tamarmi naalagaaffissua, Babylon Angisooq saassunneqarpat. Ingammik kristumiuuneraqatigiit, Jerusalemimut unneqqaserluttumut assingusut, sakkortuumik saassunneqarumaarput. ’Ullut naalliunnartut taakkua kinguninnguatigut’ ’seqinermi qaammammilu ullorissanilu nalunaaqquteqarumaarpoq, nunamilu inuiaqatigiit qussalallutillu ernumangaassapput’. — Matîuse 24:29; Lúkarse 21:25.
20. Qilammi piumaartussat suut ilimagisinnaavavut?
20 Seqineq taarsissasoq, qaammat qaamajunnaassasoq, ullorissat qilammit nakkassasut qilaallu pissaaneri aalajumaartut, qanoq paasisariaqarpa? Annikilliornartussap aallartilernerani upperisarsiornikkut ’qaamanerit’ angisuut ilarpassui — tassa palasit — qularnanngitsumik ’nassunnit qulinit’ sarĸúmersitat 17:16-imi eqqartorneqartunit qulaarneqarumaarput suujunnaarsitaajumaarlutillu. Naalakkersuinikkut pissaanillit qularnanngitsumik aamma aalajumaarput. Aammali qilammi takussaasumi ersinartut takuneqarsinnaassappat? Aap, qularnanngilaq — qilammi pisunit Josefus naapertorlugu juutit aaqqissuussaanerata naggataani pisimasunit ersinangaarnerusussat. Soorlu nalunngikkipput Guutip itsaq ilaannikkut pissaanini takutittarsimavaa pisut taamaattut pilersillugit. — 2 Moses 10:21-23; Josva 10:12-14; Eqqartuussisut 5:20; Lúkarse 23:44, 45.
21. ’Nalunaaqut’ suna piumaarpa?
21 Nangillutik piumaartussat eqqartorneranni iivangkiiliunik allattut taakkua pingasut tamarmik maanna oqaaseq grækerisooq ’taava’-mik nutserneqartoq atorpaat takutinniarlugu pereersimasup kingorna alla pissasoq. ’Taavalu inuup ernerata nalunaaqqutaa qilammi takussaassaaq.’ (Matîuse 24:30; Mákorse 13:26; Lúkarse 21:27) Sorsunnersuup siulliup nalaaniit Jesusip ajoqersugaasa ilumoortut Jesusip takussaanngitsumik najuunneranik nalunaaqqutit ataqatigiit takusimavaat, inuit allat amerlanersaasa takusinnaanngikkaat. Matîuse 24:30-mili nalunaaqut alla eqqartorneqarpoq, ’inuup ernerata nalunaaqutaa’, tamannalu inuiaqatigiit takunngitsoorsinnaassanngilaat. Jesus nuiatigut takussaanani tikiuppat inuit taassuminnga assortuisut nunarsuaq tamakkerlugu tikiunnera (griikerisooq: er·khoʹme·non) akuerisariaqalissavaat, tassami tikiunnera kunngitut pissaaneranut tupinnartunik ersiuteqarumaarmat. — sarĸúmersitat 1:7.
22. ’Nalunaaqut’ Matîuse 24:30-mi eqqartorneqartoq qanoq qisuariarfigineqassava?
22 Matîuse 24:30-mi tulliulluni piumaartoq takutinniarlugu oqaaseq taanna toʹte aamma atorneqarpoq. Inuiaqatigiit paasilerlugu qanoq pineqassallutik, kappialallutillu nimaassapput. Qularnanngitsumik paasissavaat nungutitaassallutik. Guutilli kiffai allaalluinnartunik atugaqassapput — niaqqutik makitissinnaassavaat paasigamikku aniguisinneqarnissartik qanillisoq! (Lúkarse 21:28) Aamma sarĸúmersitat 19:1-6-imi oqaluttuarineqarpoq qilammi ilumoortumik pallorfiginnittut uersartorsuup suujunnaarsitaanera qiimmattarlutik nuannaarutigissagaat.
23. (a) Jesusip qinikkat qanoq iliorfigissavai? (b) Tanitat qilaliartinneqarnissaat pillugu qanoq oqarsinnaavugut?
23 Jesusip siulittuutaa ima nangippoq, soorlu Mákorse 13:27-mi atuartugut: ’Taavalu [toʹte] inngilini aallartissavai, qinikkanilu katersorumaarpai anorlersarfinnit taakkunannga sisamanit nunap isuanit qilaallu isua tikillugu.’ Maanna Jesusip 144.000-it ’qinikkat’ sinneri suli nunami inuusut saappai. Pissutsit aaqqissuussaanerata maanna atuuttup naggatissaata aallartilernerani ajoqersukkat tanitaasut taakku katersorneqarsimapput Guutimit ataasiussuseqalersinneqarlutik. Sulili allanik pisoqassaaq, Mákorse 13:27-mi aamma Matîuse 24:31-mi piumaartussat tulleriiaarnerat malillugu. ’Qinikkat’ sinneri ’nipitoorsuarnik qarlortaasisartunit’ nunap isuinit katersorneqarumaarput. Qanoq ilillutik katersorneqassappat? Qularnanngitsumik taakku Jehovamit inaarutaasumik ’naqissuserneqassapput’, ’qaaqqusatullu, qinikkatut ilumoortutullu’ ersarissumik kinaassuserneqassallutik. Taava Guutip piffissarititaani qilammut katersorneqassapput tassani kunngiussallutik palasiussallutillu.e Tamannalu suleqataasa ’amerlangaartut’ ’nalunaaqutserneqartut’, nuannaarutigissavaat. Taakku ’annikilliornartumit angisuumit’ aniguissapput nunarsuarmilu paratiisiusumi naassaanngitsumik pilluaqqusaassallutik. — Matîuse 24:22; sarĸúmersitat 7:3, 4, 9-17; 17:14, 20:6; Hesekiel 9:4, 6.
24. Matîuse 24:29-31 naapertorlugu piumaartussat qanoq tulleriissappat?
24 Apustilit oqarmata ’Oqarfigitigut . . . ’, Jesusip akissutaa taakkua paasisinnaanngisaannik ilaqarpoq. Inuutillutilli takusimavaat siulittuutaata eqquukkiartornera siulleq. Jesusip akissutaani ingammik misissorsimavavut siulittuutip ilai siunissami qanittumi eqquuttussat. (Matîuse 24:29-31; Mákorse 13:24-27; Lúkarse 21:25-28) Maannakkut allaat aniguisinneqarfissarput qanillisoq takusinnaavarput. Ilimagisinnaavarput annikilliornartussap aallartilernissaa, taavalu Inuup ernerata nalunaaqutaa, taavalu Guutip qinikkanik katersuinissaa. Kiisalu Harmagedonimi Jehovap eqqartuussummik naammassinnittuutitaa kunngi sorsuttoq Jesus Kristus ’ajugaalluinassaaq’. (sarĸúmersitat 6:2) Jehovap akiniaanini naammassippagu piffissaq ’silarsuup matuma naggatissaa’-nik taaneqartoq — tassa Naalakkap Jesusip ullua 1914-imiit ingerlasoq — naggaserneqassaaq.
25. Lúkarse 21:28-p siunissami eqquunnissaa qanoq ililluta peqataaffigisinnaavarput?
25 Qanortoq Guutimit ajoqersortittuarit, imaalisinnaaqqullutit: ’Tamakkuli pilerpata aarloritsi, niaqqusilu makitissigik, utertinneqarfissarsi qanillimmat.’ (Lúkarse 21:28) Aap, tamatta — qinikkat amerlangaartullu — tupinnartumik siunissaqarpugut, Jehovap aqqi angingaartoq illernarsisippagu! (wD 15/2 94)
[Quppernerup ataani ilanngussat]
a Jehovap nalunaajaasuisa nuannaarlutik tamanna uppernarsarsinnaavaat, takutillugu qanoq Biibilimi siulittuutit ullutsinni pisartutigut eqquussortut.
b Paasissutissat amerlanerusut nassaarineqarsinnaapput atuakkami Guds tusindårsrige er kommet nær, quppernerni 296-322-imi aamma Vagttårnet, 15. decembari 1982, quppernerit 16-20.
c Oqaluttuarisaanermik ilisimatuup juutiusup Josefusip Romamiut sakkutoorpassuisa Jerusalemimut saassusseqqaarnerat (ukiumi 66-imi u.n.s.) oqaluttuarisimavaa ima: „Unnuap ingerlanerani silapilulersimavoq; anoraasuarnerit sialussuarlu, kallerup innaallanneri malittuinnaat, kallerup seqqorneri siooranartut nunallu sajunnera qanngulussuarlu. Pinngortitat akuliuffigineqarnerat tamanna inuppassuit nungutinneqarnissaannut nalunanngitsumik nalunaaqutaavoq, tassaasorineqarsimavorlu ajunaarnissarsuarmik ilimasaarineq.“
d Jesusip ’naalliunnartoqangaarnissaanik’ siulittuutaata eqquunnera siulleq tassaasimavoq juutit aaqqissuussaanerata aserorneqarnera. Kisianni versini ulluvut kisiisa pillugit taannaasorsiut atorsimavaa, oqarami ’naalliunnartoq tamanna’. (Matîuse 24:21, 29; Mákorse 13:19, 24) sarĸúmersitat 7:14-imi piumaartussaq tamanna ’annikilliornartoq angisooq’-mik taaneqarpoq.
e Takuuk „Spørgsmål fra læserne“, Vagttårnet 15. aggusti 1990-imeersoq.
Eqqaamavigit?
□ Joel 3:1-4 aamma 4:15 ukiuni hundredelinni siullerni qanoq ilillutik eqquussimappat?
□ Matîuse 24:29-mi naalliunnartoq suna eqqartorneqarpa, qanorlu ililluta nalunngissinnaavarput?
□ Matîuse 24:29-mi qilammi saqqummersussat suut eqqartorneqarpat, tamannalu qanoq ililluni naalliunnartup kinguninnguani pisinnaava?
□ Lúkarse 21:26, 28 sunissami qanoq eqquutissava?
[Qupp. 16, 17-mi assiliartaq]
Naalaffiup sumiiffia
[Suminngaanneernera]
Pictorial Archive (Near Eastern History) Est.