Silarsuup anersaava assortorpiuk?
’Uagut anersaaq silamiusoq pisaarinngilarput, kisianni anersaaq Guutimit pisoq.’ — 1 Korintumiut 2:12.
1, 2. Bhopalimi Indiamiittumi gassimik aniasoorneq qanoq alianartumik nassataqarsimava, gassili toqunarnerungaartoq suna silarsuarmiippa?
DECEMBARIP unnuaani nillertumi 1984-imi Bhopalimi Indiamiittumi tupannartumik pisoqarpoq. Illoqarfimmi tassani kemikalialeriffeqarpoq, unnummilu tamatumani gassimik toqqorsiviit ilaanni ajortumik ingerlalersoqarsimavoq. Tassanngaannaq methyl isocyanat silaannarmut anialersimavoq. Anorimit tinginneqarluni gassi toqunartoq illunut anngussimavoq ilaqutariillu sinittut poorlugit. Ajunaartut tuusintilikkuatanik amerlassuseqarput, ajoquserneqartullu suli amerlanerupput. Suliffissuaqarnikkut aatsaat taama ingasatsigisumik ajutoortoqarpoq.
2 Bhopalimi pisimasoq tusaramikku inuit amiilaaqaat. Gassip anianera tamanna toqunaraluaqisoq taamaattoq ’gassimik’ silarsuaq tamakkerlugu inunnik najuussorneqartumik anersaakkut toqquteqartut suli amerlanerungaarput. ’Gassi’ tamanna Biibilimi taaneqarpoq ’anersaamik silamiusumik’, imaluunniit ’silarsuup anersaava’-nik. Tassaavoq ’silaannaq’ toqunartoq apustilip Paulusip anersaamut Guutimit pisumut illua’tungiuliussaa ima oqarami: ’Uagut anersaaq silamiusoq pisaarinngilarput, kisianni anersaaq Guutimit pisoq, Guutip uatsinnut tunniussai ilisimaqqullutigik.’ — 1 Korintumiut 2:12.
3. ’Silarsuup anersaava’ suua?
3 ’Silarsuup anersaava’ sunarpiaava? The New Thayer’s Greek English Lexicon of the New Testament naapertussagaanni oqaaseq „anersaaq“ (griikerisut pneuʹma) isumaqarpoq „ileqqoq imaluunniit sunniineq kikkut tamarmik isumaannik sunniisoq matusisorlu“. Inuk ajunngitsumik ajortumilluunniit anersaaqarsinnaavoq, imaluunniit ileqqoqarsinnaavoq. (Tussiaat 51:12; 2 Timûtiuse 4:22) Aamma inuit ataatsimoortut anersaaqarsinnaapput, imaluunniit nuimanerusumik ileqqoqarsinnaapput. Apustili Paulus ikinngutiminut Filemonimut ima allassimavoq: ’Naalakkatta Jesusip Kristusip anersaarsi najorliuk.’ (Fîlimût 25) Taamatuttaaq — annerungaartumik — silarsuarmi ileqqoqarpoq malunnarnerusumik, tamannalu Paulusip oqarneratut tassaavoq ’silarsuup anersaava’. Vincentip Word Studies in the New Testament-a naapertussagaanni „oqariaatsip pivai najoqqutassat ajortut silarsuarmik ajortunngorsimasumik ajornerulersitsisut“. Pineqarpoq ileqqoq ajortilippalaartoq silamiut eqqarsariaasiannik inuillu iliuusiinik sakkortuumik sunneeqqasoq.
4. Silarsuup anersaavata kina aallaavigaa, anersaarlu tamanna inuiannut qanoq sunniuteqarsimava?
4 Anersaaq tamanna toqunartuuvoq. Sooq? ’Silap matuma naalagaanik’, Satanimik, aallaaveqarami. Taanna taaneqarsimavoq ’silaannarmut anersaamullu naalasseriinnerup qitornaani maanna suniissumut naalagaasoq’. (Juánase 12:31; Evfisumiut 2:2) ’Silaannarmit’, imaluunniit ’anersaamit naalasseriinnerup qitornaanik sunniisumit’, qimaanissaq ajornarpoq. Inuiaqatigiinnimi sumi tamaani nassaassaavoq. Najuussorutsigu ileqqui siunertaalu pigiuliutissavavut. ’Uinik malillugu inuunissamik’, tassa ajortilittut naammalluinnanngissuseq malillugu inuunissamik kajumissaarisuuvoq. Toqumik kinguneqassaaq, ’uinimmi malillugu inuusoq toqujumaarpoq.’ — Rûmamiut 8:13.
Silarsuup matuma anersaava ingalassimajuk
5. Bhopalimi ajunaarnersuarmi naluanaajasoqqanoq silatuumik ilisiorsimava?
5 Bhopalimi ajunaarnersuarmi Jehovap nalunaajaasuisa ilaat nilliatitsisunit gassillu toqunartup tipersuanit issanngunartumit itertinneqarpoq. Tuaviinnaq ilaquttani makiteriarlugit aqqusinermut aniatippai. Suminngaanniit anorlernera maluginialaariarlugu inuit uivertut akornisigut ilaquttani illoqarfiup avataani qattunermukaappai. Tamaani silaannarmik minguitsumik taseq qanittumiittoq aqqusaarlugu supoortumik najuussuisinnaapput.
6. ’Silarsuup anersaava’ sumut qimarratigisinnaavarput?
6 Silarsuup matuma ’silaannaa’ toqunartoq najuussornaveersaarumalllugu qattunermik qimarnguffigisinnaasatsinnik nassaassaqarpa? Taamaannera Biibilimi oqaatigineqarpoq. Ulluvut makku pillugit pruffiiti Esajas ima allassimavoq: „Ullussani kingullerni qaqqaq Jehovap iluata inigisaa aalajaalluni qaqqanit allanit portunerulerumaarpoq qattorngit tamaasa portussutsimigut akimussallugit. Tassunga inuiaat ornigutissapput, inuiaqatigiippassuillu taasunga ingerlaartut oqassapput: ’Qaa, majuarta [Jehovap] qaqqaanut, Jaakup Guutiata illuanukarluta; aqqutigeqqusaminik ajoqersussavaatigut ingerlavigeqqusamigut ingerlasinnaaleqqulluta.’ Tassami piumaarpoq Sionimit Guutip ajoqersuutiginiagaa, Jeruusalaamillu [Jehovap] oqaasia.“ (Jesaja 2:2, 3) Minguitsumik pallorfiginnittarfik qutsissumiittoq, ’Jehovap qaqqaani illu’, nunarsarmi matumani silarsuup matuma anersaavanik toqunartumik najuussuinaveersaarluni qimarnguissatuaavoq. Tamaani Jehovap anersaava kristumiut aalajaatsut akornanni naammattumik najuussugassaavoq.
7. Amerlasuut qanoq ilillutik silarsuup anersaavanit aniguisimappat?
7 Silarsuup matuma anersaavanik najuussuisimagaluartut Bhopalimi nalunaajaasup misigisimasaata assinganik misigisaqarsimapput. ’Naalasseriinnerup erneri’ silarsuup matuma silaannaanik, anersaavanik, najuussuisut eqqartoreeramigit apustili Paulus ima oqarsimavoq: ’Taakku ilagalugit uaguttaaq tamatta siornagut angalasartugut uinitta pilerissusii malillugit uinngullu eqqarsaatittalu piumasaat naammassisarlugu, pissuseqarpugullu kamannermut qitornaalluta arlavut ilagalugit; Guutilli nallittuingaartup asannissusersuarminik asagamisigut uaguttaaq pinerlunnitsinni toqungagallartugut Kristusimut ilanngutilluta uummartippaatigut.’ (Evfisumiut 2:3-5) Pissutsit aaqqissuussaanerata matuma silaannaanik toqunartumik najuussuisut anersaakkut toqungapput. Qujanartumilli Jehovap ikiuineratigut ullumikkut millionilikuutaat qaqqaanut ussagarput pissutsimillu ajortumit tamatumannga qimaallutik
’Anersaap silamiusup’ ersiutai
8, 9. (a) Suup takutippaa silarsuup anersaavanut mianersortuartariaqartugut? (b) Satanip anersaavata qanoq ililluni nakkartissinnaavaatigut?
8 Silaannaap Satanimit pisup toqunartup avatangeqqajuarpaatigut. Mianersortuartariaqarpugut anersaakkut nakkartitaalluta silarsuarmut uteqqinnginniassagatta. Tamatumani sianigeqqissaarneq pisariaqarpoq. (Lúkarse 21:36; 1 Korintumiut 16:13) Assersuutigalugu eqqarsaatigeriassagit kristumiut tamarmik Jehovap ileqqussatigut najoqqutassiai nalunngilaat ileqqorlunnerillu soorlu allasiornerup, kanngunartuliornerup aammalu anguteqatigiit arnaqatigiillu atoqatigiittarnerata akuerisaanerannut isumaqataajuamanngilluinarlutik. Taamaakkaluartorli ukiut tamaasa 40.000-it missaanniittut Jehovap peqatigiissortaanut ilaasortaajunnaarsinneqartarput. Sooq? Amerlanertigut ileqqunik minguttuunik taama ittunik sammisaqarsimanertik pissutigalugu. Qanoq ililluni tamanna pisinnaava?
9 Tamatta naammalluinnanngitsuunerput pissutaavoq. Uinipput sanngiippoq, uummatitsigullu eqqunngitsumik kissaateqariataartarnerput akiorniartuartussaavarput. (Nalunaajaasup oqaasii 7:20; Jeremia 17:9) Kissaatillu eqqunngitsut tamakku silarsuup anersaavanit sakkortusarneqartarput. Kanngunartuliorneq silarsuarmi inunnit amerlasuunit eqqunngitsutut isigineqanngilaq, liorneq eqqunngitsutut isiginngilaat, Satanip silarsuaata eqqarsariaasia tassa ’nammineq iluarisannik iliorniarit’. Eqqarsariaatsit taama ittut tusaaniartarutsigik silamiutut eqqarsartaaseqaleriartuaarnissarput ilimanaateqartorujussuussaaq. Sivitsunngitsoq eqqarsaatit minguttuut eqqunngitsumik kissaateqalersissavaatigut naggataatigullu ajortuliortilluta. (Jâko 1:14, 15) Taamaappat Jehovap qaqqaanit minguitsumit atersimassaagut Satanillu silarsuaanut atsissumut ajortunngorsimasumullu aqqarsimassalluta. Piumassutsiminik silarsuarmiiginnartoq kinaluunniit inuunermiik naassaanngitsumik kingornussinavianngilaq.— Evfisumiut 5:3-5, 7.
10. Satanip silaannaata ilisarnaataanut suna ilaava, sunalu pillugu kristumiut ingalattariaqarpaat?
10 Silarsuup anersaava avatitsinni sumi taamani takussutissaqarpoq. Assersuutigalugu inuit avatangiisivut ataqinninngitsumik ileqqorluttumillu inooriaaseqarput. Politikerit atorsinnaanngitsut imaluunniit upperisarsiornikkut siuttut kanngunartumik inoriaaseqartut piumatuullu pakatsissutigigamikkik allaat ilumoorsaarnartut ataqqinninngitsumik oqaluuserisarpaat. Kristumiut taamatut ileqqoqarumanngillat. Ileqqorissumik quiasaarsinnaassuseqarnerput ilutigalugu anersaaq mitallerpaluttoq ilagiit iluannut eqqunnaveersaartariaqarparput. Kristumiut oqaluttaasiatigut Jehovamik mianerinninneq uummatikkullu minguissuseq ersittariaqarput. (Jâko 3:10, 11; naleqqiuguk Ussatit 6:14.) Inuusuttuugutta utoqqaaguttaluunniit ’alianaatsunik oqaaseqartaannartariaqarpugut, tarajorsimasunik, kimulluunniit qanoq akissutissatsinnik ilisimaqqulluta.’ — Kulorsamiut 4:6.
11. (a) Silarsuup anersaavata ilisarnaataa alla suua? (b) Sooq kristumiut tamatuminnga ersersitsisunit allaaneruppat?
11 Silarsuup matuma anersaavata ilisarnaataasa ilagaat uumissuineq. Silarsuaq uumissuinermik akersuunnernillu ammip qalipaataasigut, nagguitsigut, inuiaassuutsikkut allaallu inuttut assigiinngissutsinik tunngaveqartunik ulikkaarpoq. Guutip anersaavata qulangigaani pissutsit ila pitsaaneroqaat! Paulus ima allassimavoq: ’Ajortumik iliortoq ajortumik akileqinasiuk. Inuit tamarmik takkuanni ileqqorissaarniaritsi. Ajornanngippat sapinngisassinnik inuit tamaasa eqqissiveqatiginiarsigik. Nammineq akiniaaqinasi, asasakka, kamannerli assaarsiuk, allassimammat: „Akiniut uanga pigaara, uanga akiliiumaarpunga, oqarpoq Jehova.“ Taamaattumik qinngarsortit kaappat nerleruk, imerusuppallu immiguk; taamaalioruit aamat ikumasut niaquanut katersorumaarpatit. Ajortoq ilinnut ajugaatinnaveeruk, kisianni ajortumut ajunngitsoq sakkugalugu ajugaaniarit.’ — Rûmamiut 12:17-21.
12. Sooq kristumiut pigisanik pingaartitsivallaartuulernaveersaartariaqarpat?
12 Silarsuup anersaava aamma pigisanik pingaartitsinissamik kajumissaarisuuvoq. Niuernerup silarsuaanit sunnerneqarlutik inuppassuit pinik, atisanik biilinillu nutaanik uitsatiginnittuartuupput. ’Isinut pilerinartunut’ inussiaataapput. (1 Juánase 2:16) Inuit illutik aningaasaatitillu najoqqutaralugit nalilerneqartarput. Kristumiut Jehovamik minguitsumik pallorfiginninnerup qaqqaani qutsissumiittut taamatut isiginneriaaseqanngillat. Nalunngilaat pisuussutit ataavarsinnaanngitsut. (1 Timûtiuse 6:9, 10) Jesusip ajoqersukkani matuminnga eqqaamaqqusimavai: ’Peqangaaraluarluni pigisani inuup inuussutigisarinngilai.’ — Lukarse 12:15.
13. Silarsuup anersaavanut aamma suut ilisarnaataappat?
13 Silarsuup matuma ’silaannaa’ peqqinnanngitsoq aamma allanik takussutissaqarpoq. Ilaat tassa pikitsitsiumatussutsip anersaava. (2 Timûtiuse 3:1-3) Malugisimaviuk inuppassuit oqartussaasunik suleqatigiumannissuseerussimasut? Malugisimaviuk suliffinni sulisut ilaat nakkutigineqanngikkaangamik uninngaannartartut? Inuit inatsisinik unioqqutitsisimasut qassit nalunngiligit — immaqa akileraarutitigut peqquserlullutik suliffimminniilluunniit tillillutik? Suli atuartuuguit sapinngisannik iliuuseqarnissannut kajumissuseerutitinneqarnikuuit atuaqativit ilinniagaqarnikkut angusilluarsimasunik nikaginninnerat pissutigalugu? Tamakku tamarmik silarsuup anersaavata kristumiut assortortariaqagaata takussutissarai.
Silarsuup matuma anersaava qanoq ililluni assortorneqarsinnaasoq
14. Kristumiut kristumiuunngitsunit sukkut allaaneruppat?
14 Silarsuarmili inuugatta qanoq ililuta silarsuup anersaava assortorsinnaavarput? Eqqaamasariaqarparput timikkut sumiikkaluaraangattaluunniit anersaakkut silarsuarmut matumunnga ilaannginnatta. (Juánase 17:15, 16) Silarsuup matuma anguniagai uagut anguniagarinngilavut. Pissutsinik isiginnittaaserput allaaneruvoq. Uagut inuuvugut anersaamut tunngasunik soqutigisallit, eqqarsartarlutalu oqaluttarpugut ’oqaatsinik inuit ilisimatuut ajoqersuutigisaannik pinnata, kisianni oqaatsinik anersaap ilernartup ajoqersuutigisaanik’. — 1 Korintumiut 2:13.
15. Silarsuup anersaava qanoq ililuta assortorsinnaavarput?
15 Gassimik mingutsitaaffiusumiilluni inuup paasiguniuk qanoq iliussava? Anersaartuusersinnaavoq imaluunniit qimaasinnaavoq. Satanip silaannaanit ingalassimanninniarnermi aamma taamaaliortariaqarpoq. Eqqarsartaatsitsigut silarsuup matuma silaannaanit sunnerneqarfigisinnaasavut sapinngisatsinnik alisimaniarpavut. Kukkusunik ilagisartagaqarnaveersaarpugut, aliikkusersuutillu nakuusernermik, kanngunartuliornermik, anersaarsiornermik, pikitsitsiniarnermik uinngulluunniit suliaanik allanik imallit ingalassimaniarpavut. (Galâsiamiut 5:19-21) Taamaakkaluartorli silarsuarmi inuugatta tamakku tamakkiisumik ingalassimasinnaanngilavut. Taamaattumik anersaakkut anersaartuuteqassagutta silatusaarnerussaaq. Anersaakkut puavut aalajangersimasumik ataatsimiigiartarnitsigut, nammineq atuaqqissaartarnitsigut qinusarnitsigullu immissavavut. Taamaappat Satanip silaannaa anersaakkut puatsinnut iseraluarpat akiornissaanut Guutip anersaavata nakussatsissavaatigut. Tussiaat 17:1-3; Ussatit 9:9; 13:20; 19:20; 22:17.
16. Guutip anersaavanik pigisaqarnerput qanoq ililluta ersersissinnaavarput?
16 Guutip anersaavata kristumiu ikiortarpaa silamiunit allaanerunissaanut. (Rûmamiut 12:1, 2) Paulus ima allassimavoq: ’Anersaap inerititai tassa asanninneq tipaatsunnerlu eqqissinerlu kamajuinnerlu avaaginninnerlu angajoqqaatsernerlu ilumoornerlu qanilaarnerlu piitaajuinnerlu.’ (Galâsiamiut 5:22, 23) Aamma Guutip anersaavata kristumiu itinerusumik paasinnissinnaanissaanik ikiortarpaa. Paulus ima oqarsimavoq: ’Guutip ilumiugisai kialuunniit ilisimanngilai, kisianni Guutip anersaata.’ (1 Korintumiut 2:11) ’Guutip ilumiugisai’ ilaatigut tassaapput utertitsissut, Guutip naalagaaffia Jesus Kristusimit aqunneqartoq, inuunermik naassaanngitsumik neriuut silarsuullu matuma erniinnaq suujunnaarsinneqarnissaa pillugit ajoqersuutit ilumoortut. Guutip anersaavanit ikiorneqarlutik kristumiut ajoqersuutit ilumoortut tamakku nalunngilaat ilumoortutullu akueralugit, taamaammallu inuunermik isiginnittaasiat silamiut isiginnittaasiannit allaaneruvoq. Jehovamik kiffartuussinertik maannakkut nalerisimaarutigaat, naassaanngitsumillu taamaaliornissartik siunniusimallugu.
17. Kina silarsuup anersaavanik assortuinikkut maligassaalluarnerpaava, qanorlu ililluni?
17 Jesus silarsuup matuma anersaavanik assortuinermik maligassat pingaarnersaat tassaavoq Jesus. Kuisinnerata kinguninnguagut Satanip pingasoriarluni usseriaraluarpaa Jehovamut kiffartorunnaarsinniarlugu. (Matîuse 4:1-11) Jesusip ataasiaannarluni Satan pallorfigisimasuuguniuk silarsuarmut tamarmut naalagaassuseq angusinnaasimagaluarpaa. Jesus ima oqarsimasinnaagaluarpoq: ’Ajunngilaq, pallorfigissavara, taava silarsuarmut naalagaassuseq angoreerukku kingorna peqqissimissaanga Jehovamullu kiffartornermut uterlunga. Silarsuarmut naalakkatut inuiaat iluaqutissaannik iliuuseqarnerujuussusinnaagaluarpunga sanasutut Nazaretimiutut iliuuseqarsinnaanninngarnit.’ Jesusili taamatut eqqarsanngilaq. Jehovamit naalagaassutsimik tunineqarnissani utaqqissallugu piumassuseqarpoq. (Tussiaat 2:8) Pisumi tassani, inuunerminilu sutigut tamatigut, Satanip silaannaata sunniiniarnera toqunartoq assortortuarpaa. Taamaattumik silarsuarmut anersaakkut mingutsitamut ajugaasinnaasimavoq. — Juánase 16:33.
18. Silarsuup anersaavanik assortuinerput qanoq ililluni Guutimut nersornaataava?
18 Apustili Peter oqarsimavoq Jesusip tumai atuaqqissaasssagivut. (1 Pîtruse 2:21) Pitsaanerusumik maligassaqarnerpugut? Ulluni kingullerni makkunani inuiaat silarsuup anersaavanit sunnerneqarlutik ajortunngoraluttuinnarput. Nuanningaaramili silarsuup taama ittup qeqqani Jehovamik pallorfiginninneq qutsissisitaq minguittuaannarmat! (Mika 4:1, 2) Ilumut Guutip anersaava Guutimik pallorfiginninnermukaasuni millionilikkuutaani takuneqarsinnaavoq, silarsuup anersaava tamanik matuseqqasoq assortorlugu Jehovamillu nersuillutillu unnersiutiginnillutik! (1 Pîtruse 2:11, 12) Kunngip Jehovap tanitaata silarsuarmik ajortumik matuminga suujunnaarsitsinissaa aammalu Satanimik inngilipiluinillu qilersuinissaa tikillugu pallorfiginninnermi qutsissisitamiittuaannarnissarput aalajangiusimaniartigu. (sarĸúmersitat 19:19–20:3) Silarsuup matuma anersaava piujunnaassaaq. Nuannerunangaarami! (wD 1/4 94)
Nassuiarsinnaaaviuk?
□ Silarsup anersaava suua?
□ Silarsuup anersaava inunnut ataasiakkaanut qanoq sunniuteqartarpa?
□ Silarsuup anersaavata ilisarnaatai suuppat, qanoq ililluta ingalassinnaavavut?
□ Guutip anersaavanik pigisaqarnerput qanoq ililluta ersersissinnaavarput?
□ Silarsuup anersaavanik ingalassimannittut qanoq pilluaqqusaassappat?
[Qupp. 16, 17-mi ungalusaq]
Silarsuup anersaava Satanimeerpoq
Silarsuup anersaava ingalanniarlugu Jehovamik pallorfiginninnermut qutsissisitamut qimaagit