Eqqortumik upperisarsiorneq akisussaaffimmik nassataqarpoq

’Pilluarput Guutip oqaasianik tusartut toqqorlugulu.’ — LÚKARSE 11:28.

1. Eqqortumik upperisarsiorneq nanigunikku inuit qanoq ittut tamanna inuunerminnut tunngavigilerumassavaat?

EQQORTUMIK upperisarsiornermik nassaarnerinnaq naammanngilaq. Eqqortoq ilumoortorlu asagutsigu, nassaaralugu, inuunitsinnut tunngavigilerumassavarput. Eqqortumik upperisarsiorneq isumaliutersornerinnaanngilaq, inooriaasiuvorli. — Tussiaat 119:105; Jesaja 2:3; naleqqiuguk apustilit suliait 9:2.

2, 3. (a) Jesusip qanoq erseqqissarsimavaa Guutip piumasaanik iliornissap pingaaruteqarnera? (b) Eqqortumik upperisarsiornermik ilisimasallit tamarmik sumik akisussaaffeqarpat?

² Jesus Kristusip Guutip piumasaanik iliornissap pingaaruteqarnera erseqqissarsimavaa. Qaqqami oqaluutsini naggaserlugu Jesus oqarsimavoq imminut Naalakkamik taasiumaartut (tassa kristumiutut nassuertut) tamakkeratik Naalagaaffik iserfigisinnaassagaat; Ataataata piumasaanik iliortut kisimik iserfigisinnaassavaat. Allat, oqarsimavoq, ’iluaatsuliorumatuujugamik’ ajattorneqarumaarput. Sooq iluaatsuliorumatuunik taaneqarpat? Biibilimi allassimammat Guutip piumasaanik iliorumannginneq ajortuliornerusoq, ajortuliornerlu iluaatsuliornerulluni. (Matîuse 7:21-23; 1 Juánase 3:4; naleqqiuguk Rûmamiut 10:2, 3.) Inuup immaqa eqqortumik upperisarsiorneq nalunngilaa, immaqa tamatuminnga ajoqersuisut nersortarlugit tamatuminngalu maleruaasut ajunngitsumik eqqartortarlugit, aammali nammineq maleruassallugu akisussaaffigaa. (Jâko 4:17) Akisussaaffik tamanna akueriguniuk pitsaanerusumik inuuneqalissaaq, nuannaarnerlu allatigut anguneqarsinnaanngitsoq misigissallugu.

³ Ilanngutassiap matuma siuliani eqqortumik upperisarsiornerup ilisarnaataasa ilaat arfinillit misissorsimavavut. Tamakku ikiortigalugit eqqortumik upperisarsiorneq ilisarisinnaavarput. Tassaappullu tamatsinnut unamminiarnartuusut periarfissiisullu. Qanoq ilillutik?

Guutip oqaasia qanoq qisuariarfigaajuk?

4. (a) Soqutiginnilerlaat Jehovap nalunaajaasui ilagisaleraangamikkik nalunaajaasut Biibilimik atuisarnerat pillugu suna malugisarpaat? (b) Anersaakkut nerisinneqarluartaramik Jehovap kiffai qanoq sunnertittarpat?

⁴ Jehovap nalunaajaasui ilagalugit soqutiginnilerlaat atuaqqissaaleraangamik paasilertarpaat ajoqersuutigineqartut ilumut Biibiliminngaaneersut. Apeqquteqaraangamik ilagiit upperisamik nassuerutaannik, inuit ileqqutoqaannik inuilluunniit nuimasut isumaannik issuaaffigineqartanngillat. Guutip oqaasia pingaarnerpaatinneqarpoq. Rigssaliliaraangamik malugisarpaat tassanissaaq Biibili ilinniutaasoq pingaarnerpaaq. Sallusuissummik ujaasisut erniinnaq paasisarpaat Jehovap nalunaajaasuisa nuannaartuunerat ingammik pissuteqartoq Guutip oqaasianit anersaakkut nerisinneqarluartarnerannik. — Jesaja 65:13, 14.

5. (a) Jehovap nalunaajaasuinik isiginnittunut suna unamminiarnartuua? (b) Taakkua qanoq ilillutik nalunaajaasut nuannaarnerat peqataaffigisinnaavaat?

⁵ Illit tamanna paasilerukku qanoq qisuarissavit? Nammineq malugilerukku avataanit isiginnittuinnaajumajunnaassaatit. Biibilimi allanneqarsimavoq oqaaseq naammassinnagu ’tusaaginnartut’ imminnut salloqittartut. (Jâko 1:22) Imminnut salloqittarput paasisimannginnamikku qanorluunniit oqalukkaluarlutik Guutimut naalanngitsoornermikkut takutillugu Guuti asanngikkitsik. Upperneq nassuerutigigaluarlugu suliaqanngikkaanni upperneq toqungavoq. (Jâko 2:18-26; 1 Juánase 5:3) Akerlianik Jehova asallugu ’suliassamik naammassinnittoq taanna qanoq iliornermini pilluarumaarpoq’. Aap, soorlu Jesus Kristusip nassuiarsimagaa, ’pilluarput Guutip oqaasianik tusartut toqqorlugulu.’ — Jâko 1:25; Lúkarse 11:28; Juánase 13:17.

6. Guutip oqaasia ilumut pingaartikkutsigu periarfissat suut atorluarumassavavut?

⁶ Pilluarneq tamanna allissaaq Guutip piumasaanik paasisaqarnerujartortillutit ilinniarsimasatillu atortillugit. Qanoq ilungersortigisumik Guutip oqaasia atuaqqissaarniarpiuk? Inuit atuarsinnaanngikkaluartut ti-tusindilikkuutaat atualersinnaanissartik ilungersorlutik sulissutigisimavaat, pingaartumik Allakkat Illernartut atuarsinnaajumallugit inuillu allat tamakkuninnga ajoqersorsinnaajumallugit. Allat ullaat tamaasa makiaartarput Biibili biibililersaarutillu, soorlu Napasuliaq Alapernaarsuiffik, ullut tamaasa atuarumallugit. Biibili atuartartillugu allassimaffiillu biibililersaarutini issuarneqartut qupperartillugit Jehovap inatsisai peqqussutaalu maluginiariakkit, tassuunalu najoqqutassiat uagut atorsinnaasavut paasilerlugit. Allassimaffinni tamakkunani Guuti, taassuma siunertaa inunnullu iliuuserisimasai pillugit paasissutissat eqqarsaatigeriakkit. Tamakku uummammiuliunniarlugit piffissaq atortaruk. Eqqarsaatigeriaruk qanoq ilillutit unnersuussutit Biibilimeersut inuuninni atorluarnerusinnaallugit. — Tussiaat 1:1, 2; 19:8-12; 1 Tásalûníkamiut 4:1.

Jehovamut tunniusimalluinnarpit?

7. (a) Guutip ataasiullunilu pingasuussusianik ajoqersuut inuit Guutimik pallorfiginninniarnerannut qanoq sunniuteqarsimava? (b) Inuup Jehova pillugu sallusuissut ilikkaraangagu qanoq pisoqartarpa?

⁷ Inuit arlalinnik millionillit iluaallassutigisimavaat ilikkarsimagamikku Guuti ataasiullunilu pingasuunngitsoq. ’Paasiuminaatsuuneranik’ nassuiaatip naammagisimaartilersimanngisaannarsimavaat. Guutimi paasiuminaatsoq qanoq ilillutik qanilliartorfigisinnaassagamikku? Ajoqersuut tamanna pissutigalugu (atialu oqaluffimmi eqqaaneqarneq ajuimmat) Ataataq sumiginnartarsimavaat taamalu Jesus Niviarsiarlu Maria (Guutip arnaanik taaneqartoq) pallorfiginerulersimallugit. Jehovallu nalunaajaasuisa ilaata Biibili atorlugu Guutip aqqanik, Jehovamik, takutimmatik takullugu nuannaarsimaqaat. (Tussiaat 83:19) Arnaq Venezuelamiu Guutip aqqanik takutinneqarami ima qiimmatsatsigisimavoq nalunaajaasoq inuusuttoq sallusuissummik erlinnartumik tamatuminnga takutitsisoq ingerlaannaq eqitaarsimallugu angerlarsimaffimminilu Biibilimik atuaqqissaaqateqatiginissaanik akuersilluni. Inuit taakkua ilinniaraangamikku Jesusip Ataatani ’Guutiga’-mik ’Guutersi’-millu kiisalu ’kisimi ilumut Guutiusoq’-mik taasimagaa paasilertarpaat Biibilimi Guuti pillugu allassimasut paasiuminaanngivissut. (Juánase 17:3; 20.17) Jehovap pissusii ilikkaraangamikkik kajungerilerlugillu, qinnuigisalersarpaat taassumunngalu iluarisaarusulersarlutik. Qanoq kinguneqartumik?

8. (a) Jehova asagamikku taassumunngalu iluarisaajumallutik inuit millionillit arlallit qanoq iliorsimappat? (b) Kristumiutut kuisinneq sooq pingaaruteqartigaa?

⁸ Ukiut kingulliit qulit ingerlaneranni nunarsuaq tamakkerlugu inuit 2.528.524-it inuunertik Jehovamut tunniulluinnarsimavaat tamannalu takutinniarlugu imermut morsutsitaanikkut kuisissimallutik. Illit taakkununnga ilaavit, imaluunniit kuisinnissannut piareersarpit? Kuisinneq tassaavoq kristumiup ilumoortup inuunerani pisut pingaarnerit ilaat. Jesusip malinnitsini peqqusimavai inunnik inuiannit tamaneersunik ajoqersuganngortitsiortoqqullugit kueqqullugillu. (Matîuse 28:19, 20) Malugisariaqartuuvortaaq Jesus kuisimmat Jehova nammineq qilammit ima oqarsimammat: ’Illit tassa ernera asanartoq, illit nuannaraakkit.’ — Lúkarse 3:21, 22.

9. Jehovamut ajunngitsumik attaveqartuassagutta qanoq iliortariaqarpugut?

⁹ Jehovamut ajunngitsumik attaveqarneq eriagineqangaartariaqarpoq. Tunniulluinnarlutit kuisissimaguit Jehovamut attaveqarninnik ajoqusiisinnaasut tamaasa ingalassimaniakkit. Inuunermi erloqissutit nunallu piinik isumakuluutiginninneq pissutigalugit attaveqarneq tamanna tunulliunnaveeruk. (1 Timûtiuse 6:8-12) Ussatit 3:6-imi unnersuut manna maleruaruk: „[Jehova] eqqarsaatigiuartaruk sumiikkaluaraangavilluunniit, taava ingerlavissatit nalimmatsissavai.“

Kristusip asanninneranit qanoq sunnertitsigivit?

10. Jehova pallorfigigaluarlugu sooq Jesus sumiginnanngilarput?

¹⁰ Naak Jehova Guuti ilumoortutuaq pingaartikkaluarlugu soorunami Jesus Kristus sumiginnartariaqanngilarput. sarĸúmersitat 19:10-mi ima allassimavoq: ’Jesusimik nalunaajaaneq tassaavoq siulittuinerup anersaava.’ Mosesimik allakkanit siullerniit sarĸúmersitat tikivillugit siulittuutini isumassarsiarititaasuni annikitsualuit amerlasuut takutilluartarpaat Jesus Kristus Jehovap siunertaanut qanoq pingaaruteqartigisoq. Annikitsualuit tamakku ilikkarutsigik tamaat isigalugu paasisaqalissaagut kristumiuuneraqatigiit eqqunngitsumik ajoqersuutaannit kusanaallisinneqarsimananilu paasiuminaassisinneqarsimanngitsumik.

11. Arnap Polenimiup Biibilimi Guutip ernera pillugu ajoqersuutigineqartut ilikkaramigit qanoq qisuariarpa?

¹¹ Guutip ernera pillugu sallusuissummmik paasisaqalerneq sunniuteqartorujussuusinnaavoq. Danutap, arnap Polenimiup, tamanna misigisimavaa. Ukiuni arfineq-pingasuni Jehovap nalunaajaasui attaveqarfigisimavai, ajoqersuutigisaat nuannaarutigalugit, taamaattoq eqqortumik pallorfiginninneq naapertorlugu inooriaaseqalernani. Taava atuakkamik Inuk inuit inuusimasut pingaarnerpaartaat-mik, Kristusip inuuneranik paasinartumik oqaluttuartumik, tunineqarpoq.a Unnoqisoq atuagaq ammarpaa kapitali ataasiinnannguaq atuarniarlugu. Qaalerneranili aatsaat atuagaq naagamiuk ilivaa. Qissaserpoq. „Jehova, isumakkeerfiginnga,“ taama qinnuigaa. Asanninneq Jehovap erneratalu ersersitaat atuakkani tunngavigalugit aatsaat paasillualerpaa. Paasilerpaa Guutip kamagittarluni ukiuni arfineq-pingasuni ikiorumalluni neqeroorutigisaa qujasuilluni tigunngitsoorsimallugu. 1993-imi Jesus Kristusimut uppernini tunngavigalugu Jehovamut tunniulluinnarluni kuisippoq.

12. Jesus Kristus pillugu eqqortumik ilisimasaqarneq qanoq inuunitsinnut sunniuteqarpa?

¹² ’Jesus Kristus pillugu eqqortumik ilisimasaqarneq’ pisariaqarpoq kristumiutut sulilluarlunilu inerititaqassagaanni. (2 Pîtruse 1:8) Illit qanoq annertutigisumik Naalagaaffimmik tusarliussamik inunnut allanut oqaluussinermut peqataasarpiuk? Pissutsit amerlasuut periarfissatsinnut aalajangiisuupput. (Matîuse 13:18-23) Pissutsit ilaat allanngortinneqarsinnaanngillat; allat allanngortinneqarsinnaapput. Qanoq ililluta paasisinnaavarput pissutsit suut allanngortissinnaallugit, taamaaliorlutalu? Apustili Paulus ima allassimavoq: ’Kristusimmi asanninnerata pinngitsaalivaatigut.’ Allatut oqaatigalugu, inuunerminik uagut pilluta pilliutiginninnermigut Jesusip asanninnera ima asseqanngitsigimmat tamatuminnga pingaartitsinerput alliartortillugu uummatikkut assut killinneqariartuaassaagut. Taamaalilluta paasissavarput nammineq anguniakkatsinnik noqqaassuteqarutta pilerissutsivullu naammassinniarlugit inuugutta pissutsissamisuussanngitsoq. Akerlianik suliassaq Kristusip ajoqersukkaminut peqqussutigisimasaa inuunitsinni salliutittariaqarparput. — 2 Korintumiut 5:14, 15.

Silarsuarmit immikkoortut — qanoq annertutigisumik?

13. Sooq upperisarsioqatigiit silarsuarmut ilaasut attaveqarfigerusunngilavut?

¹³ Kristumiuuneraqatigiit upperisarsioqatigiillu allat silarsuarmut matumunnga ilaaniarlutik qanoq iliorsimasut ilisimaneqarluarpoq. Oqaluffeqarfiit assigiinngitsut nunat ilaanni pikitsitsiniaqatigiinnik aningaasatigut tapersersuisarsimapput. Palasit ilaat qoqassiillutik sorsuttartunngorsimapput. Ullut tamaasa nutaarsiassani tusarneqarsinnaavoq nunani assigiinngitsuni upperisarsiortut imminnut sorsuuttut. Aammik kuiseqataapput. (Jesaja 1:15) Silarsuarlu tamakkerlugu palaseqatigiit naalakkersuinermut sunniuteqarniartarput. Eqqortumilli pallorfiginnittut tamakku peqataaffigerusunngilaat. — Jâko 4:1-4.

14. (a) Silarsuarmut ilaassanngikkutta suut ingalassimasariaqarpavut? (b) Qanoq ililluta silarsuarmiut isumaqarfiginninnerannit iliuusiannillu sunnertinngitsoorsinnaavugut?

¹⁴ Silarsuarmik immikkoorneq aamma allanik nassataqarpoq. Silarsuup matuma aningaasanik pisiarineqarsinnaasunillu asanninneq, pingaarniarneq nuannaarniutinillu kissaateqartuarneq ilisarnaatigai, soorluttaaq allanut soqutigittaanneq, sallusarneq, oqaasipilunneq, oqartussaasunik ataqqinninnginneq imminullu naalakkersinnaannginneq ilisarnaatigigai. (2 Timûtiuse 3:2-5; 1 Juánase 2:15, 16) Nammalluinnanngitsuugatta ilaannikkut tamakkuninnga sanngiissuteqarsinnaasarpugut. Sanngiissutsit taamaattut pinngitsoorniarlugit qanoq iliortariaqarpugut? Eqqaamasariaqarparput sooq silarsuaq taama ilisarnaateqartoq, tassa ’silarsuaq tamaat ajortup pissaaneqarfigimmagu’. (1 Juánase 5:19, NV) Naak ileqqoq aalajangersimasoq kajungernarsinnaagaluartoq, naallu inuppassuit allat taamaaliortaraluartut, paasigutsigu Jehovap akerartortaa, Satan Diaavulu, taamaaliortitsisartoq takusinnaavarput qanoq maajunnartigisoq. — Tussiaat 97:10.

Illit asanninnerit qanoq annertutigiva?

15. Qanoq ilillutit asaqatigiinnermik namminissarsiunngitsumik malugisaqarnerit ikiortigalugu eqqortumik upperisarsiorneq paasisimaviuk?

¹⁵ Jehovap nalunaajaasui ilagilersimagakkit qularnanngitsumik asaqatigiinnerannit sunnertipputit, silarsuup anersaavanit allaalluinnarmata. Asanninneq namminissarsiunngitsoq pingaartinneqarmat Jehovamik pallorfiginninneq minguitsoq guutisioriaatsinit allanit allaavoq. Immaqa tamatuma Jehovap nalunaajaasuisa eqqortumik upperisarsiortuunerannik qularunnaarsissimavaatit. Jesus Kristus nammineq oqarsimavoq. ’„Matumannga tamarmik ilisarissavaasi ajoqersugarigissi: asaqatigiikkussi.’ — Juánase 13:35.

16. Qanoq ililluta asanninnerput alliartortissinnaavarput?

¹⁶ Pissutsip tamatuma aamma takutinnerpaa illit Kristusimut ilumoortumik ajoqersugaasutit? Asanninnerit alliartortissinnaaviuk? Qularnanngitsumik tamatta taamaaliorsinnaavugut. Rigssalimi allat inussiarnisaarfigissallugit naammanngilaq. Uatsinnillu asannittut kisiisa asagutsigik silarsuarmiunit allaanerunavianngilagut. ’Tamanilli annerusumik asaqatigiigitsi ilungersorlusi,’ Biibilimi taama kajumissaarneqarpugut. (1 Pîtruse 4:8) Kikkut asanerusinnaavavut? Kristumiu qatanngut angut arnarluunniit uatsinnit allaanerusumik tunuliaqutalik immaqalu iluarerpianngisatsinnik iliuuseqartartoq? Napparsimasoq utoqqalisorluunniit ataatsimiinnernut najuussinnaanngitsoq? Aapparput? Immaqaluunniit angajoqqaavut utoqqalisut? Ilaasa anersaap inerititai, ilaatigut asanninneq, pissuserilluaraluarlugit, eqqarleq napparsimaruluttoq innarluutililluunniit isumagisussanngoraangamikku misigilersarput soorlu pissutsit tamakku aallaqqaataanit ilinniaqqittariaqalersimallugit. Soorunami naak taama atugaqaraluarutta inoqutitta avataanniittut aamma asasariaqarpavut.

Naalagaaffik pillugu oqaluussineq — qanoq pingaartitsigaajuk?

17. Nammineq Jehovap nalunaajaasuinit pulaarneqartarnerput iluaqutigisimagutsigu qanoq iliorumasariaqarpugut?

¹⁷ Inoqatitsinnut asanninneq ingammik ersersittarparput Guutip naalagaaffia pillugu oqaluussiffigigaangatsigik. Suliassaq tamanna Jesusip siulittuutigisaa upperisarsioqatigiit ataasiinnaat sulissutigaat. (Mákorse 13:10) Tassa Jehovap nalunaajaasui. Sulineq tamanna uagut nammineq iluaqutigisimavarput. Maannalu uagut immikkut pisinnaatitaaffeqarpugut allat ikiussallugit. Tamatuminnga Guuti isumaqatigigutsigu suliassaq tamanna inuunitsinni salliutittariaqarparput.

18. Atuakkamik Jehovas Vidner — Forkyndere af Guds rige-mik atuarnerput oqaluussinermut peqataanissatsinnut qanoq sunniuteqarsinnaava?

¹⁸ Naalagaaffik pillugu tusarliussap nunarsuup isua tikivillugu siaruarterneqarsimaneranik oqaluttuaq pissanganartoq atuakkami Jehovas Vidner — Forkyndere af Guds rige-mi (kalaallisuunngortitaanngitsoq) oqaluttuarineqarpoq. Periarfissaqaruit atuarniariuk. Atuartillugulu maluginiaqqissaariaruk nalunaajaasut qanoq ilillutik assigiinngitsutigut Naalagaaffik nalunaajaassutigisimagaat. Taakkua maligassiaat malinniarsinnaaviuk? Tamatta periarfissarpassuaqarpugut. Jehovamut asanninnitta periarfissatta atorluarnissaannut kajumissisillisiguttoq.

19. Akisussaaffik eqqortumik upperisarsiornermik ilisimasaqarnerup nassatarisaa akuerigutsigu qanoq iluaqutigissavarput?

¹⁹ Jehovap piumasaanik iliortilluta apeqqut manna akisinnaavarput: Innuneq sumik siunertaqarpa? (sarĸúmersitat 4:11) Inuuneq imaqanngitsutut misigiunnaarsimavarput satsillutalu ingerlajunnaarsimalluta. Jehova Guutimut uummatikkut iluunngarluni kiffartornerunngitsumik allamik taama angusaqarluarnartigisoqanngilaq imaluunniit nalerisimaarnartigisoqanngilaq. Siunissarlu nuanningaartoq neriorsuutigineqarpoq! Taassuma silarsuassaani nutaami naassaanngitsumik nalerisimaarnartumillu inuusinnaassaagut, piginnaassutsivut tamakkiisumik atorluarsinnaallugit Guutip inuiannut asannittumik siunertaa naapertorlugu. (wD 1/6 94)

[Quppernerup ataani ilanngussaq]

Qanoq akissavit?

□ Sooq pisariaqarluinnarpa Biibili Guutip oqaasiatut akuerissallugu Jehovalu Guutitut ilumoortutuatut ataqqissallugu?

□ Eqqortumik upperisarsiornermi Jesusip utertitsisuunera pillugu sumik ajoqersuuteqarpa?

□ Sooq kristumiut silarsuarmit immikkoortariaqarpat namminissarsiunngitsumillu asannittuliortarlutik?

□ Eqqortumik upperisarsiornermi Naalagaaffik pillugu oqaluussineq qanoq pingaaruteqartigaa?

[Qupp. 16-mi assiliartat]

Akisussaaffik eqqortumik upperisarsiornerup nassatarisaa akuerissagaanni kuisinneq pingaaruteqarluinnarpoq. Qaammatit tamaasa silarsuaq tamakkerlugu inuit 25.000-it missaat kuisittarput

Rusland

Senegal

Papua New Guinea

U.S.A.

[Qupp. 17-mi assiliartat]

Sallusuissummik Biibilimeersumik inunnut allanut ingerlatitseqqinneq eqqortumik pallorfiginninnermut ilaasariaqarpoq

U.S.A.

Brasilia

U.S.A.

Hong Kong