’Inuiaat tamarmik’ nalunaajaaffigineqarput

„Naalagaaffimmillu nutaarsiassaq nuannersoq tamanna nunarsuarmi inuit najugarisaanni tamarsuarmi inuiaat tamarmik nalujunnaarutissaannik oqaluussissutigineqassaaq; taavalu naggatissaq nalliutissaaq.“ — MATîUSE 24:14, NV.

1. Jesusip oqaasii Matîuse 24:14-imi allanneqarsimasut sooq ajoqersugaasa tupigusuutigisimassavaat?

AJOQERSUKKAT juutiugamik Jesusip oqaasii tamakku tupigusuutigisimajunnarsimavaat. Juutit, Guutip innuttai illernartuusut, Guutimik nalusunik minguttuutut isigisaminnik oqaloqatiginninnissaannik eqqarsaat, juutinut takornartaalluinnarpoq, allaat maajunnarluni.a Aap, juutip peqqissaarluartup Guutimik nalusut angerlarsimaffiannut isernissaq eqqarsaataaniinngilarluunniit! Ajoqersukkat juutiusut Jesus, taassuma asanninnera suliassiissutaalu pillugit suli ilinniagassaqaqaat. Aammattaaq Jehovap nakerisarsiunnginnera pillugu ilinniagassaqaqaat. — apustilit suliait 10:28, 34, 35, 45.

2. (a) Nalunaajaasut oqaluussinerat qanoq annertutigilersimava? (b) Nalunaajaasut iluatsitsisimanerannut pissutaasut pingasut suut eqqaaneqarsinnaappat?

² Jehovap nalunaajaasuisa inuiaqatigiinni tamani, ilaatigut ullumikkut Israelimi, nutaarsiassaq nuannersoq oqaluussissutigisarpaat, aatsaallu maanna nunani taama amerlatigisuni oqaluussisalersimallutik. 1994-imi nalunaajaasut 4,5 millionit sinnerlugit nunani 230-t missaanniittuni oqaluussisarput. Inunnik soqutiginnittunik Biibilimik atuaqqissaaqatiginninnerit 4,5 millionit aquttarpaat. Taamaaliortarput naak sumi tamaani paqumigineqaraluarlutik, amerlanertigut inuppassuit nalunaajaasut ajoqersuutaannik pissutigisaannillu ilisimanninnginnerannik pissuteqartumik. Soorlu kristumiut siulliit pillugit oqartoqarsimasoq nalunaajaasuttaaq pillugit ima oqartoqarsinnaavoq: ’Immikkoorniaqatigiit taakku tamaginni assortorneqartut ilisimavavut.’ (apustilit suliait 28:22) Iluatsitsisumik kiffartornerat sumik pissuteqarpa? Siumukarluarsimanerat minnerpaamik pingasunik pissuteqarpoq — Jehovap anersaavanit siulersorneqaramik, Kristusip ilinniartitseriaasii malinniartaramikkik kinguneqarluartumillu inunnik attaveqatiginninnissamut ikiuutissat pitsaasut atortaramikkik.

Jehovap anersaava nutaarsiassarlu nuannersoq

3. Sooq naammassisimasavut nammineq perruualaarutigisinnaanngilavut?

³ Jehovap nalunaajaasuisa iluatsitsinertik perruualaarutigaat, soorlu namminneq piginnaassutsimikkut naammassineqarsimanersoq? Naamik, Jesusimi ima oqarsimavoq: ’Taamattaaq ilissi ilissinnut suliareqqusat tamaasa suliarigussigik ima oqaritsi: „Kiffaavugut atunngitsut, uatsinnut suliarisariaqartut suliaraavut.“’ Kristumiutut tunniulluinnarsimasutut kuisimasutut Jehovap nalunaajaasuisa Guutimut kiffartornermik akisussaaffik akuerisimavaat, qanorluunniit inuttut atugaqaraluarunik. Ilaat ajoqersuiartortitatut piffissaq tamaat oqaluussisarput imaluunniit immikkoortortaqarfinni Biibililersaarutinillu naqiterivinni kiffartorlutik. Allat kristumiutut kajumissutsiminnik beteliliornernut allanillu sanaartornermut peqataasarput, pioneritut kiffartorlutik imaluunniit pisinnaasartik naapertorlugu nutaarsiassamik nuannersumik oqaluussisartuullutik. Arlaannattaluunniit uagutsinnut suliassarititaasumik suliaqarnerput, ’imminut suliarisariaqartut suliaralugit’ perrualaarutigisinnaanngilaa. — Lúkarse 17:10; 1 Korintumiut 9:16.

4. Silarsuaq tamakkerlugu kristumiut oqaluussinerannut assortuineq qanoq ililluni ajugaaffigineqartarpa?

⁴ Jehovap anersaava, pissaaneraluunniit sulissutiginnittoq, angusimasatsinnut tamanut pissutaavoq. Aamma pruffiitip Sakariasip nalaani taamaappoq: „Imaappoq [Jehovap] Serubabelimut oqaasia: ’Inuit pissaaneratigut pinnani inuillu nakuussusiatigut pinnani uanga anersaakkut pissaaq,’ oqarpoq katersaarsuit [Jehovaat].“ Taamaalilluni silarsuaq tamakkerlugu nalunaajaasut oqalussisarnerannut akerlilersuineq ajugaaffigineqartarpoq, inuit ilungersuuteqarneratigut pinnani Jehovalli siulersuineratigut illersuineratigullu. — Sakarja 4:6.

5. Jehova qanoq ililluni Naalagaaffik pillugu tusarliussap siaruarterneranut peqataava?

⁵ Naalagaaffimmik tusarliussamik ilassinnittut pillugit Jesus oqarsimavoq: ’Pruffiitit allagaanni allassimavoq: „Tamarmillu Guutimit ajoqersorneqarsimassapput.“ Kikkulluunniit Ataatamit tusarlutik ilinniartut nungullutik ornittarpaannga. . . . Tamanna pillugu oqarfigigaluarpassi uannut pisinnaasoqanngitsoq Ataatannit taamaalisinneqanngikkuni.’ (Juánase 6:45, 65) Jehovap uummatit eqqarsaatillu atuarsinnaavai, nalunngilaalu kikkut, naak suli ilisarinngikkaluaraanni, asanninnini ajunngitsumik qisuariarfigiumaaraat. Aamma inngilini atorlugit kiffartuussineq tamanna immikkut ittoq siulersorpaa. Taamaattumik Johannes takorluukkamini inngilit peqataanerat takullugu ima allassimavoq: ’Inngililu alla takulerpara qilaap missaagut timmisoq, iivangkiiliumik ittuinnartumik oqaatigisassaqartoq nunamiusunut tamanullu inuiaqatigiissunut immikkullu naggueqatigiisunut immikkullu oqaasilinnut immikkullu inuiaasunut.’ — sarĸúmersitat 14:6.

Anersaakkut pisariaqartitsinermik nassuerutiginnittariaqarneq

6. Inuk nutaarsiassamik nuannersumik ilassinnissaguni qanoq isumaqartariaqarpa?

⁶ Kia nutaarsiassamik nuannersumik ilassinninnissaanik Jehovap periarfissiinissaanut aalajangiisuusoq alla Jesusip eqqartorsimavaa: „Pilluarput anersaakkut pisariaqartitsinerminnik miserratiginninngitsut.“ (Matîuse 5:3, NV) Inuup imminut naammagisimaartup imaluunniit sallusuissummik ujaasinngitsup anersaakkut pisariaqartitsinini nassuerutigisanngilaa. Nunap imaluunniit timip pii kisiisa soqutigai. Imminut nuannarinermit akornuserneqartarpoq. Taamaattumik illumiit illumut naapitatta ilarpassuisa tusarliussaq itigartittarmassuk inuit qisuariarnerannut pissutaasut assigiinngitsut eqqarsaatigisariaqarpavut.

7. Sooq inuppassuit sallusuissut tusarusunngilaat?

⁷ Amerlasuut tusarusunngillat uteriillutik upperisarsiorneq kingornussarisimasartik aalajangiukkamikku oqaloqatigiissutigerusunnagulu. Allat upperisarsiornerit imminnut tulluartuusorisatik kajungerfigaat — ilaasa eqqumiitsut nuannaraat, allat guutisiorneq killitsisimanartoq pingaartippaat, allallu inunnik naapittagaqarusuinnarlutik ilagiit arlaannut ilaasarput. Ullumikkut inuppassuit Guutip maleruaqqusaanut akerliusumik inooriaaseqarput. Immaqa kanngunartuliortarlutik inuupput, taamaattumillu oqartarlutik: „Soqutiginngilara.“ Allat ilinniarluarsimasuunerarlutik Biibili tunuartittarpaat ilisimatuussutsimut naapertuuttuunnginnerarlugu. — 1 Korintumiut 6:9-11; 2 Korintumiut 4:3, 4.

8. Tusaajumannginneq sooq aallussilluarnitsinnut sunniuteqartariaqanngila? (Juánase 15:18-20)

⁸ Inuit amerlanersaasa tusaajumannginnerat pissutigalugu uppernikkut sanngiillisariaqarnerpugut kiffartuussinermilu annannissamik kinguneqarsinnaasumik tamatuminnga aallussilluarunnaarluta? Paulusip Romamiunut oqaasii isumalluaatigisinnaavavut: ’Sussammat ilaat uppinngikkaluarpata? Uppinngissusiata Guutip ilumoorsusia soraarsissanerpaa? Ajornaqaaq. Imaassavorli: Inuit tamarmik sallugaluarpata Guuti sallusuitsuuvoq, soorlu allassimasoq: „Iluartuutinneqaqqullutit oqaatsikkut, ajugaaqqullutillu eqqartuutikkuit.“’ — Rûmamiut 3:3, 4.

9, 10. Nunani amerlasuuni assortuineq ajugaaffigineqarsimasoq qanoq paasinarsiva?

⁹ Qiimmaallaatigisinnaavarput eqqarsaatigigutsigu nunat amerlasuut siornatigut tusarumanngiffiusimagaluartut maanna pitsaap tungaanut saassimammata. Jehovap inngilillu nalunngilaat inuit eqqortumik uummatillit sumiittut — Jehovalli nalunaajaasui kiffartornerminni naammagittarlutillu qasusuittartariaqarsimapput. Assersuutigalugu ukiut 50-it matuma siorna nunat ilaat katuuleqarfiusut oqaluussiffigiuminaatsorujussuusimapput — soorlu Argentina, Brasilia, Colombia, Irland, Italia, Mexico, Portugal Spanialu. 1943-mi nalunaajaasut ikittuinnaapput, silarsuaq tamakkerlugu 126.000-innaallutik, taakkualu ilaat 72.000-it USA-miillutik. Ilisimaatsuussuseq paqumisunnerlu nalunaajaasunut qarmatut akimorneqarsinnaanngitsutut issimapput. Taamaattorli ullumikkut nunat tamakku oqaluussinermi kinguneqarluarfiunerpaanut ilaapput. Aamma nunani kommunistiusimasuni taama pisoqarpoq. Tamanna ersareqaaq 1993-imi Ukrainemi Kievimi ataatsimeersuarnermi 7.402 kuisimammata.

¹⁰ Nutaarsiassaq nuannersoq inoqatiminnut oqaluttuariniarlugu periaatsit suut nalunaajaasut atorsimavaat? Aningaasatigut iluaqutissat neqeroorutigisimanerpaat, soorlu ilaat oqartartut? Piitsut ilinniartitaanngitsullu kisiisa pulaartarnerpaat, soorlu allat oqartartut?

Nutaarsiassamik nuannersumik tusarliinermi periaatsit kinguneqarluarnartut

11. Jesus qanoq ililluni kiffartornermigut maligassaalluarsimava? (Takuuk Juánase 4:6-26.)

¹¹ Periaaseq nalunaajaasut ajoqersuganngortitsiniarnermi manna tikillugu atortagaat Jesusip ajoqersugaasalu tunngavilersimavaat. Angerlarsimaffinnut, niueriartortarfinnut, tatsip sinaanut, qaqqanut, allaat naalagiartarfinnut — sunulluunniit inoqartunut — Jesusip inuit, pisuut piitsullu, ornittarsimavai. — Matîuse 5:1, 2; 8:14; Mákorse 1:16; Lúkarse 4:15.

12, 13. (a) Paulus qanoq ililluni kristumiunut maligassaalluarpa? (b) Jehovap nalunaajaasuisa qanoq ilillutik Paulus malinniarsimavaat?

¹² Nammineq kiffartornini pillugu apustili Paulus eqqortumik ima allassinnaasimavoq: ’Ilisimavusi ullormit Asiamut tikiuteqqaarfinnit ilissinniiffiga naallugu ilissinni qanoq ittunga, Naalagaq kiffartorfigigiga . . . qanorlu sumik iluaqutaasumik nipangiussaqanngitsunga, tamaasali ilissinnut oqaatigigikka ajoqersorlusilu inuit tutsaanni illunilu.’ — apustilit suliait 20:18-20.

¹³ Jehovap nalunaajaasui illumiit illumut oqaluussillutik apustilit maligassiaat maleruartaramikku silarsuaq tamakkerlugu ilisimaneqarput. Tv-kkut oqaluussineq akisooq, qarsupittoq inunnullu toqqaannartumik attaveqarnanngitsoq atornagu nalunaajaasut inuit, pisuut piitsullu, kiinarsillugit ornittarpaat. Guuti taassumalu oqaasia pillugit oqaloqatigisarpaat.b Aningaasat imaluunniit nunap pii atorlugit ussassaarineq ajorput. Inuit eqqarsalerumasut oqaloqatigalugit takutittarpaat inuiaat ajornartorsiutaannut aaqqiissutissatuaq tassaasoq Guutip naalagaaffiata naalakkersuinissaa nunarsuatsinni pissutsinik pitsaanerulertitsiumaartoq. — Jesaja 65:17, 21-25; 2 Pîtruse 3:13; sarĸúmersitat 21:1-4.

14. (a) Ajoqersuiartortitat pionerillu amerlasuut qanoq ilillutik pitsaasumik tunngaviliorsimappat? (b) Jehovap nalunaajaasuisa Japanimi misilittagarisimasaat qanoq ilinniutigisinnaavarput?

¹⁴ Nunani sapinngisamik amerlasuuni suliassaq ingerlanniarlugu ajoqersuiartortitat pionerillu oqaluussiffissanik nutaanik sumiiffinni amerlasuuni pilersitsisimapput. Tunngaviliorsimapput, nalunaajaasullu nunap inuiisa taava suliassaq ingerlateqqittarpaat. Taamaattumik oqaluussineq oqaluussisartut allamiut ikiortigerujussuanngikkaluarlugit ingerlajuaannarsinnaasimavoq aaqqissuulluagaajuaannarsinnaasimallunilu. Tamatumunnga assersuutaalluartoq tassaavoq Japan. 1940-kkut naalerneranni ajoqersuiartortitat Tuluit Nunaanneersut Australiameersullu tappavunga aallarsimapput, Japanimiut oqaasii ilinniarlugit, pissutsinut sorsunnersuup kingorna kinguarsimarpaluttunut sungiussiniarsarisimallutik illumiillu illumut oqaluussisalerlutik. Sorsunnersuup kingulliup nalaani nalunaajaasut Japanimi inerteqqutaallutillu malersorneqarsimapput. Taamaattumik ajoqersuiartortitat oqaluussisartunik Japanimiunik suliniartunik ikittuinnarnik naammattoorsipput. Ullumikkulli 187.000-nngorsimapput ilagiinni 3.000-init amerlanerusuni. Qanoq ilillutik iluatsitsisimappat? Ajoqersuiartortitaq ukiut 25-t sinnerlugit tassani kiffartorsimasoq ima oqarpoq: „Inuit oqaloqatiginissaat ilinniassallugu pingaartorujussuuvoq. Oqaasii sapinngikkaanni aatsaat inuit ilisarilluarneqarsinnaapput inooriaasiallu paasineqarsinnaalluni. Japanimiunut asanninnerput takutittariaqarparput. Maniguulluta inuiaqatigiinnut akuliunniarsaraagut, soorunami kristumiutut naleqartitavut sumiginnanngikkaluarlugit.“

Kristumiut ileqqui aamma nalunaajaataapput

15. Nalunaajaasut qanoq ilillutik kristumiutut iliuuseqarsimappat?

¹⁵ Tusarliussarli Biibilimeersuinnaanngitsoq inuit qisuariarfigisimavaat. Aamma kristumiussuseq iliuutsikkut ersertoq maluginiarsimavaat. Allaat pissutsini artornartuni, soorlu naalagaaffiup inuisa imminnut sorsuunnerini naggueqatiginngisanillu toqoraanersuarni, nalunaajaasut asaqatigiinnerat, aaqqiageeqatigiinnerat ataasiussusiallu maluginiarneqartarpoq. Sorsunnerni tamani nalunaajaasut kristumiutut attaviitsuujuaannarsimapput taamaalillutillu Jesusip oqaasii eqquutillugit: ’Inassummik nutaamik tunivassi, asaqatigeeqqullusi; soorlu uanga asagissi, taamattaaq ilissi asaqatigiissaasi. Matumannga tamarmik ilisarissavaasi ajoqersugarigissi: asaqatigiikkussi.’ — Juánase 13:34, 35.

16. Misigisimasap suup takutippaa iliuutsikkut kristumiutut asanninneq qanoq ersertartoq?

¹⁶ Ungasinngitsukkut angut utoqqasaaq najuukkamini aviisimut allagaqarsimavoq sanilini, „aappariit Inussiarnersukkut“-nik taasani, tullermillu asanninnikkut maligassiaat pillugit. Oqaluttuaraa nuliani toqulermat sanilimi assut isumassorsimagaanni. „Toquneraniilli . . . assorsuaq ikiorsimavaannga,“ taama allassimavoq. „Soorlu ’qitornarsiartaarigaannga’, . . . illumi suliassanik angutillu 74-inik ukiullip ajornartorsiutigisartagaanik ikiortarpaannga. Tamannalu immikkut ittuuvoq taakku qernertormiuummata uangalu qaamasuullunga. Taakku Jehovamut nalunaajaasuupput uangalu katuuliusimasuullunga.“

17. Qanoq iliornissaq pinngitsoorniartariaqarparput?

¹⁷ Misigisimasap tamatuma takutippaa assigiinngitsutigut nalunaajaateqarsinnaasugut, aamma ulluinnarni iliuutsitsigut. Aap, Kristusip maligassiaanik iliuuseqanngikkutta kiffartornerput farisiiarit kiffartornerattut issagaluarpoq, sunniuteqarani. Taakku Jesusip ima eqqartugai malikkusunngilavut: ’Taamaattumik ilissinnut maleruaqqusaat tamaasa maleruarsigik taamaaliorlusi, suliaalli malissanngilasi. Oqaraluarlutimmi taamaaliortarinngillat.’ — Matîuse 22:37-39; 23:3.

’Inussiaq’ katersaasoq ikiuutissanik pitsaasunik pilersuisoq

18. Inuit ilumoorusuttut qanoq ililluta biibililersaarutit iluaqutigalugit ikiorsinnaavavut?

¹⁸ Nutaarsiassap nuannersup inuiaqatigiinnut tamanut oqaluussissutigineqarneranut pingaaruteqartoq alla tassa atuagassiat Napasuliaq Alapernarsuiffiup Peqatigiiffiata biibililersaarutai sumi tamaani pissarsiarineqarsinnaammata. Paasisaqarusuttut tamarmik akineqarnissaannut atorsinnaasunik atuakkanik, atuagassiaaqqanik, naqitaaqqanik atuagassianillu peqaqaagut. Musliimi, hindusiortoq, buddhasiortoq, taosiortoq juuterluunniit naapikkutsigu atuagaq Menneskets søgen efter Gud (kalaallisuunngortitaanngitsoq), naqitaaqqat atuagassiaaqqalluunniit assigiinngitsut atorlugit oqaloqatigilersinnaavarput, immaqalu Biibilimik atuaqqissaaqatigilersinnaallugu. Nammineq pinngoriartuaarsimanermik tapersersuisoq pinngortitsineq pillugu apeqqutissaqarpat atuagaq Livet — hvordan er det kommet her? Ved en udvikling eller en skabelse? (kalaallisuunngortitaanngitsoq) imaluunniit atuagassiaaraq Guutip ilumut soqutigaatigut? atorsinnaavarput. Inuusuttoq ima aperippat: ’Inuuneq sumik siunertaqarpa?’ atuagaq Unge spørger — Svar der duer (kalaallisuunngortitaanngitsoq) imaluunniit atuagassiaaraq ’Inuuneq sumik siunertaqarpa?’ takutissinnaavarput. Inuk immikkut ittumik ajornartorsiutilik — isumatsannermik naalliutilik, qasusooqqasoq, pinngitsaalisaalluni arneriffigineqarsimasoq avissimasorluunniit — naapikkutsigu atuagassiaateqarpugut ajornartorsiutit tamakku pillugit atoriaannaasunik unnerssuussutilinnik. Aap, ’inussiaq aalajaatsoq’ katersaasoq Jesusip siulittuutigisimasaa ilumut ’piffissaq eqqorlugu inuussutissanik tunisisarpoq’. — Matîuse 24:45-47, NV.

19, 20. Albaniami naalagaaffik pillugu suliassaq qanoq ililluni siuarsarneqarsimava?

¹⁹ Inuiaqatigiippassuilli oqaluussiffigissagaanni biibililersaarutit tamakku oqaatsinut amerlasuunut nutserneqartariaqarput. Qanoq ililluni Biibili biibililersaarutillu oqaatsinut 200-nit amerlanerusunut nutserneqarsinnaasimappat? Albaniami pisimasup takutippaa ’inussiap aalajaallunilu silatuup’ katersaasup qanoq ililluni nutaarsiassaq nuannersoq siuarsarsimagaa naak pissutsit artornaraluaqisut ukiumilu 33-mi piinsip ulluani pisimasutut tupinnartuliakkut oqaatsit allat ingerlaannaq pisinnaalerneqanngikkaluartut. — apustilit suliait 2:1-11.

²⁰ Ukiualuit matuma siorna Albania nunatut komministiusutut guuteqannginneraaffivissuartut kisiartatut isigineqarsimavoq. Atuagassiami National Geographic-imi 1980-imi allassimavoq: „Albaniami [upperisarsiorneq] inerteqqutaavoq, 1967-imi ’silarsuarmi naalagaaffittut guuteqannginneraaffittut siullertut’ nalunaarutigineqarmat. . . . Albaniami inuusuttut guuteqannginneraaneq kisiat nalunngilaat.“ Maanna kommunistiussuseq atorunnaarsimammat Albaniamiut anersaakkut pisariaqartitaminnik nassuerutiginnittut Jehovap nalunaajaasuisa oqaluussinerat ilassivaat. 1992-imi Tiranëmi nalunaajaasorpaaluit inuusuttut nutserisut Italiamiutut tuluttullu paasisimasallit katersortinneqarput. Qatanngutinit angutinit piginnaanilinnit nunanit allaneersunit tikeraarneqarput computerinik atuinissamut ilinniartinneqarlutik. Siullermik naqitaaqqat Napasuliaq Alapernaarsuiffik-lu nutsilerpaat. Misilittagaqarnerujartortillutik biibililersaarutit allat iluaqutaasussat nutsertalerpaat. Maannakkut nunami tamatumani (3.262.000-inik inulimmi) nalunaajaasut 200-t missaanniipput, 1994-imilu eqqaaniaalluni nalliuttorsiornermut 1984-it najuussimapput.

Tamatta akisussaaffeqarpugut

21. Ullut qanoq ittut inuuffigaavut?

²¹ Silarsuarmi pisartut pingaarnerpaaffissaat qanilliartorpoq. Pinerluttuliornerit nakuusernerillu, nunap inuisa imminnut sorsuunnerini toqoraanerit, pinngitsaaliilluni arnerinerit, kanngunartuliornerit tamakkualu kinguneri nappaatipiluit, oqartussaasunillu ataqqinninnginneq alliartortuarmata silarsuaq inatsisaatsuuffiulersimavoq naalakkersorneqarsinnaananilu. Ullut inuuffigisavut ulersuup siornanisut ipput, soorlu Mosesimik allakkat siullianni allaatigineqartoq: „[Jehovalli] paasigamiuk nunami inuit ajussusiat annertusiartuinnartoq, piumasaallu pilersaarutaallu ajortuinnaasut, inunnik pinngortitsisimanini peqqissimissutigilerpaa uummammigullu anniaatigilerlugu.“ — 1 Moses 6:5, 6; Matîuse 24:37-39.

22. Jehovap nalunaajaasui tamarmik sumik kristumiutut akisussaaffeqarpat?

²² Noap nalaanisut Jehova iliuuseqarumaarpoq. Naapertuilluarlunili asannittuullunilu nutaarsiassap nuannersup mianersoqqussutillu inuiaqatigiinnut tamanut oqaluussissutigineqarallarnissaat kissaatigaa. (Mákorse 13:10) Tamatumani Jehovap nalunaajaasui akisussaaffeqarput — Guutip eqqissineranik peqalernissaminnut piukkunnartut ujartussaavaat Guutillu maleruaqqusaanik eqqissinartunik ilinniartillugit. Erniinnaq Guutip piffissaa nallerpat oqaluussinermik suliassaq naammassineqarluarsimassaaq. ’Taavalu naggatissaq nalliutissaaq.’ — Matîuse 10:12, 13; 24:14; 28:19, 20.

[Quppernerup ataani ilanngussat]

Eqqaamavigit?

□ Ullumikkut nalunaajaasut qanoq ilillutik kiffartornerminni iluatsitsisimappat?

□ Suna pillugu inuppassuit kristumiut tusarliussaat tusarumaneq ajorpaat?

□ Oqaluusseriaaseq apustilit atorsimasaat suna nalunaajaasut atortarpaat?

□ Sunniuteqarluartumik kiffartorumalluta ikiuutissat suut atorsinnaavavut?

□ Mákorse 13:10 naapertorlugu tamatta qanoq iliortariaqarpugut?

[Qupp. 19-mi ungalusaq]

NUNA 1943-MI NALUNAAJAASUT 1993-MI

Argentina 374 102,043

Brasilia 430 366.297

Chile 72 44.668

Colombia ?? 60.854

Filippinerit Sorsunnersuaq kingulleq — nalunaaruteqanngilaq 116.576

Frankrig Sorsunnersuaq kingulleq — nalunaaruteqanngilaq 122.254

Irland 150? 4.224

Italia Sorsunnersuaq kingulleq — nalunaaruteqanngilaq 201.440

Mexico 1.565 380.201

Peru Nalunaaruteqanngilaq 45.363

Polen Sorsunnersuaq kingulleq — nalunaaruteqanngilaq 113.551

Portugal Nalunaaruteqanngilaq 41.842

Spania Nalunaaruteqanngilaq 97.595

Uruguay 22 9.144

Venezuela Nalunaaruteqanngilaq 64.081

[Qupp. 17-mi assiliartaq]

Nunani katuuleqarfiusuni amerlasuuni, ilaatigut Spaniami, Jehovap nalunaajaasui amerliartorput

[Qupp. 18-mi assiliartat]

Nunarsuaq tamakkerlugu Jehovap nalunaajaasui sulipput