Paaseqatigiilluarneq utoqqaanertat ilagiinnilu kiffartortut akornanni

UKIUMI 33-mi piinsip ulluata kingunitsianngua ilagiinni kristumiuni pilersinneqaqqammersuni ajornartoortoqalerpoq. Uillarnernut ajornartoortunut ikiuutissanik aaqqissuussisoqarsimavoq. Kingunerileraali ’griikerisut oqaasillit epriiarinut oqalorujulerput, ullut tamaasa ajorsartunut tunissutaasartut tunioraatigineqaraangata uillarnertatik minnerutinneqartarmata’. — apustilit suliait 6:1.

Tamanna apustilit tusarpaat. ’Taakkuli aqqaneq-marluk ajoqersukkat iluunngaasa ataatsimut qaaqquaat oqarlutillu: „Iluassanngilaq Guutip oqaasia isumakkeerlugu nerisunullu kiffartorluta. Taamaattumik qatanngutivut ukorsii, ilassinnik angutinik arfineq-marlunnik tusaamasaalluartunik anersaamillu ilisimassummillu ilumioqangaartunik qinerleritsi isumagisariaqartumut tamatumunnga ivertitassatsinnik.“’ — apustilit suliait 6:2, 3.

Tamatumuuna ilagiinni kristumiuni aaqqissuussinermut atatillugu najoqqutassaq pingaartoq ersersinneqarpoq. Angutit akisussaassusermik misigisaqartut tigussaanerusunik suliaqartinneqarput, allat anersaakkut tunnganerusunik suliaqartinneqarlutik. Aamma itsaq Israelimi taamaassimavoq. Aron kinguaavilu palasitut Guutimut pilliuteqartartussatut toqqagaasimapput. Jehovalli aalajangersimavaa levikkut taakkununnga ikiortaassasut ’tupermi naapeqatigiittarfimmi atortut tamaasa nakkutigalugit’. (4 Moses 3:5-10) Taamatuttaaq ullumikut nakkutilliisut ilagiinni kiffartortunit ikiorneqartarput.

Utoqqaanertat ilagiinnilu kiffartortut suliassaat

Biibilimi utoqqaanertat ilagiinnilu kiffartortut annertuumik piumaffigineqarput. (1 Timûtiuse 3:1-10, 12, 13; Títuse 1:6-9) Ingiarniuttuunngillat, ataaserli pillugu tamarmik sulillutik: ilagiit ineriartortinneqarnissaat. (Naleqqiuguk Evfisumiunut agdlagkat 4:11-13.) Ilagiinnili suliassaat assigiinngillat. Pitrusip agdlagai siugdlit 5:2-mi nakkutilliisut ima oqarfigineqarput: ’Guutip savaatai ilissinniittut paarisigik, misissuisuullusi pinngitsaalinermit pinnasi piaarinermilli, assuarnartumik akissarsiniarnasi kajumillusili.’ Suliassaq illernartoq tamanna qanoq suliarinerlugu Guutimut akisussaaffigaat. — Eprîarit 13:17.

Ilagiinnimi kiffartortut? Ilinniartitsisinnaassuseq eqqarsaatigalugu utoqqaanertatulli Biibilimi piumaffigineqanngillat. Suliassaat utoqqaanertat suliassaannit allaanerupput. Qularnanngitsumik ukiuni hundredelinni siullerni tigussaasutigut suliassarpassuaqarsimassaaq. Tassaasinnaavoq Biibili assilillugu allaffissanik pisiniarneq, imaluunniit Biibili assilillugu allanneq.

Nalitsinni ilagiinni kiffartortut peqatigiissortat iluanni pingaartunik suli suliassarpassuaqartarput, soorlu ilagiit naatsorsuutaat oqaluussiffissallu, atuagassianik atuakkanillu agguaassineq naalagaaffilersaartarfimmillu aserfallannaveersaartitsineq. Ilagiinni kiffartortut piginnaaneqarnerusut allaat immaqa ilinniartitsinermut atorneqartarput, soorlu atuakkamik atuaqqissaarnermik aqutsisutut, kiffartornermut tunngasunik ataatsimiinnermi pisassaqartinneqartarlutik tamanullu oqalugiartinneqartarlutik.

Utoqqaanertat ilagiinnilu kiffartortut isumaqatigiillutik suleqatigiikkaangata ilagiit pisariaqartitaat — anersaakkut peqatigiissortaqarnikkullu — pitsaasumik matussutissinneqartarput. Taamaakkaangat ilagiinnut ilaasortaasut nuannaarsinnaasarlutillu nukittusinnaasarlutillu anersaakkut siumukarsinnaasarput. Paulus tanitanut Efesusimiittunut qanoq allassimasoq eqqaamajuk: ’Taassumannga aallarnerluni timi iluunngarmi katiterneqartoq ataasinngortitaallunilu ujallut tamaasa ikiortigalugit, ilami tamarmik immikkut uuttugarsiaasa sunniineri missiliorlugit, timip alliartornissaatut naammassiartorpoq asanninnikkut imminik ineriartortilluni.’ — Evfisumiut 4:16.

Utoqqaanertat ilagiinnilu kiffartortut tamatumunnga assingusumik aaqqiagiinnissartik anguniartariaqarpaat, tassa iluminni paaseqatigiillutik, ’nipeqatigiillutik’, suleqatigiillutik ataasioqatigiillutillu. Aaqqiagiinnerli immini pilerneq ajorpoq. Ineriartortinniarneqartariaqarpoq sernissorneqartariaqarlunilu.

Utoqqaanertat qanoq iliorsinnaasut

Pingaartorujussuuvoq paasissallugu utoqqaanertat ilagiinnilu kiffartortut akornanni attaveqatigiinneq naalakkat kiffaasalu akornanni attaveqarnertut, imaluunniit sulisitsisut sulisullu akornanni attaveqarnertut, inngimmat. Paaseqatigiinneqarluassappat utoqqaanertat ilagiinni kiffartortut Guutimut kiffaaqatigimissut isigisariaqarpaat. (Naleqqiuguk Korintumiunut agdlagkat siugdlit 3:6-9.) ’Ataqqeqatigiigitsi ingiaqattaallusi,’ Rûmamiunut agdlagkat 12:10-mi taama allassimavoq. Utoqqaanertat ilagiinni kiffartortunik nikaginnittumik iliorfiginninnaveersaartarput nikassaanaveersaartarlutilluunniit. Suleqatiginnikkusussusiat tunuartinneq ajorpaat tikilluaqqusarluguli. Ilagiinni kiffartortut ataqqinnittumik iliorfigineqaraangamik pissusii ajunngitsut saqqummeralersarput ilagiinnilu suliassaminnik nuannaarutiginninnerulersarlutik.

Utoqqaanertat eqqaamasariaqarpaat Guutip savaataanut paarsisuunissaminnik peqquneqarnertik aamma ilagiinni kiffartortunik isumassuinissaminnik ilaqarmat. Ilagiinni kiffartortut soorunami kristumiutut inersimalluartuunissaat naatsorsuutigineqartarpoq. Ilaannikkooriarlutilli kristumioqatimittut allatulli inuttut soqutigineqarnissartik pisariaqartittarpaat. Ilagiinni kiffartortut anersaakkut siumukarnissaat utoqqaanertat ilumoorlutik soqutigisariaqarpaat.

Apustilip Paulusip Timoteus inuusuttoq naapikkamiuk piginnaaneri suli atunngisai erniinnaq malugai angalaqatigissagaanilu kissaatigilerlugu. (apustilit suliait 16:3) Timoteus Paulusip angalaqataatut kiffartulerpoq taamaalillunilu nalilerujussuarmik ilinniartinneqarluni. Ukiualuit qaangiuttut Paulus kristumiunut Korinthimiittunut ima allassinnaasimavoq: ’Tamanna pillugu Timoteus Naalakkami qitornarisara asanartoq ilumoortoq ilissinnut aallartippara, taassuma Kristusimi ingerlavigisannik eqqaasissagaasi soorlu tamaginni ilagiissuni tamani ajoqersuisartunga.’ — 1 Korintumiut 4:17.

Ilissi utoqqaanertat, ilagiinni ilaaffigisassinni ilagiinni kiffartortut tamakkiisumik atortarpisigik? Atuaqqissaarnikkut ilagiinnullu oqalunnikkut inuttut ilinniartinnerisigut siumukarnissaannik ikiortarpisigik? Paarsisutut pulaaqattaaraangassi ilagiinni kiffartortut piginnaassusillit ilaserisarpisigik? Oqaluussiartoqatigisarpisigik? Jesusip talantinik assersuusiaani naalakkap kiffani aalajaatsoq ima oqarfigaa: ’Qujanaq kiffaasutit ajunngitsoq ilumoortorlu.’ (Matîuse 25:23) Aamma ilissi ilagiinni kiffartortut maniguullutik suliassaminnik pitsaasumik suliarinnittut nersualaartarpisigik? (Naleqqiuguk Ussatit 3:27.) Taamaaliortanngikkussi taava qanoq ilillutik misigisinnaassavaat suliniarnertik pingaartinneqartoq?

Attaveqatigiilluarneq aamma suleqatigiilluarnissamut pingaaruteqartorujussuuvoq. (Naleqqiuguk Ussatit 15:22.) Ilagiinni kiffartortut suliassaannik agguaassinermi arsaarinninnermiluunniit qajassuarpallaarnaveersaartariaqarpoq. Utoqqaanertat qinunikkut isumaliutigisariaqarpaat qatanngutip angutip piginnaaneri qanoq ililluni pitsaanerpaamik atorneqassasut. (Naleqqiuguk Matîuse 25:15.) Qatanngut suliassinneqaruni suliassamik nassuiaateqqissaarneqartariaqarpoq. Ussatit 11:14-imi ima mianersoqqussuteqarpoq: „Inuiaat siulersorluarneqanngikkaangamik aserortussaasarput.“

Qatanngut oqaluussiffissanik imaluunniit atuagassianik atuakkanilluunniit nakkutiginneqqullugu qinnuigiinnarnissaa naammanngilaq. Ilagiinni kiffartortut ilaat nutaamik suliassinneqarsimasut eqqorluanngitsumik allattugarpassuaqarsimapput. Tamanna nukillalaarnartorujussuuvoq! ’Tamatigut ippinnanngitsumik nalinginnanngitsumillu [torersumillu] ilioritsi,’ Korintumiunut agdlagkat siugdlit 14:40-mi taama kajumissaaruteqarpoq. Utoqqaanertat qatanngutinik angutinik ilinniartitsisariaqarput, iliuusaasartunik nalinginnarnik paasitillugit, iliuutsillu tamakku namminneq maleruarnerisigut maligassiuillutik. Utoqqaanertat isumagisarpaat qaammatit pingasukkaarlugit ilagiit naatsorsuutaannik misissueqqissaartoqarnissaa. Periaaseq tamanna sumiginnarneqarpat ajornartorsiutinik pilersoqarsinnaavoq, ilagiinnilu kiffartortut peqatigiissortaqarnikkut suleriaatsinut ataqqinninnerannut millisaataassalluni.

Qatanngutimmi suliassani aallulluanngippagu? Ingerlaannaq suliassamik arsarnagu utoqqaanertat oqaloqatigisariaqarpaat. Immaqa ilitsersuunneqarsimannginnera pissutaavoq. Qatanngutip suliassani ajornartorsiuteqarfigiuarpagu immaqa allamik suliarilluarnerusinnaasaanik suliassaqartinneqarsinnaassaaq.

Aamma utoqqaanertat maniguunnermik ersersitsisarnermikkut paaseqatigiilluarnermut ilasaaqataasinnaapput. Filípimiunut agdlagkat 2:3-mi kristumiut kajumissaarneqarput ’saqitsaagajunnermit piunngitsumillu ataqqineqarumanermit pinnatik qanilaarlutik ilatik imminnit annerutinniassagaat’. Taamaattumik utoqqaanertaq suleqataajumassuseqartariaqarpoq torersuutitsisussap ataatsimiittarfimmi aalajangersimasumi inissarseqquppani, eqqarsarnanilu utoqqaanertaagami naalattussiaanani. Qatanngutip immaqa qatanngutit ataatsimiittarfimmi sumiiffinni assigiinngitsuni inissinnissaannik kajumissaarinissamik siunnersuut maleruaannarpaa.a Ilagiinni kiffartortoq imminut suliassiissutigineqarsimasumut atatillugu aalajangiisimappat aalajangerneq taama ittoq utoqqaanertat pisariaqanngitsumik sumiginnarniassanngilaat.

Ilagiinni kiffartortut aaqqiagiillutik suleqatigiittut

„Taamatuttaaq ilagiinni kiffartortut ilumoorsaartuusariaqarput,“ apustili Paulus taama allassimavoq. (1 Timûtiuse 3:8, NV) Suliassatik ilumoorunnerisigut — kiffartornerminnut illernartumut ilaasutut isigalugit — sukanganartoqalernissaa pinngitsoortinniarlugu iliuuseqarsinnaasorujussuupput. Ilagiinni kiffartortutut suliassat angorniorlutit suliarisarpiuk? (Rûmamiut 12:7, 8) Ilinnut suliassiissutigineqarsimasup naammassiniarnissaanut pikkorinnerulerniarlutit suliniuteqarsimavit? Tatigineqarsinnaavit? Suliassanik tigusinissannut piumassuseqarpit? Afrikami nunat ilaanni ilagiinni kiffartortut ilaat ilagiinni pingasunik suliassaqartitaavoq. Taassuma isummani ersersilluarpaa ima oqarluni: „Suliassaqarneruliinnarpunga, sulinerlu ajoqutissarsiffiuneq ajorpoq.“ Aap, suliaminnut tunniusimasut nuannaarutissarsinerpaasarput. — apustilit suliait 20:35.

Aamma aaqqiagiinneq nukittorsarniarlugu iliuuseqarsinnaasorujussuuvutit utoqqaanertat tamakkiisumik suleqatiginerisigut. ’Siulersortisi naalassigik tusartarlugillu,’ Eprîarinut agdlagkat 13:17-imi allassimavoq, ’tarnisi piggammatigik aperineqarunik akisussaallutik; tipaatsullutik taamaaliorsinnaaqqullugit anersaameqqunagillu, tamanna iluaqutigissannginnassiuk’. Soorunami utoqqaanertat naammalluinnanngitsuupput, immaqalu kukkunerinik nassaarfigissallugit ajornanngitsuaraavoq. Isornartorseqqajaajuarnerli tatiginninnginnermik pilersitsisarpoq. Isornartorsiueqqajaanerup nuannaarunnaarsissinnaavaatit, ilagiinniittunillu allanik ajoqusiisinnaavoq. Apustili Peter ima unnersuussisimavoq: ’Ilissi inuusuttusi, utoqqaanerit naalassigik, tamassimi ilissinnut nikanartinnermik assuuseritsi . . . Taamaattumik nikanartinniaritsi Guutip assai pissarsuit atangerlugit, taassumunnga taamaaliffissami akitsiseqqullusi.’ — 1 Pîtruse 5:5, 6.

Kiffartuutinik immikkut pisinnaatitaaffiusunik qaangiinnarneqarsimasutut misigiguit siunnersuut tamanna atorluarsinnaavat. Immaqa ’ilagiinni paarsisuuffissannik’ anguniagaqarsimavutit, toqqagaanngitsoorsimallutilli. (1 Timûtiuse 3:1) Maniguuttumik pissuseqaruit utaqqiinnarsinnaassuseqassaatit. (Upputit 3:24) Utoqqaanertat kamaannissaannut taarsiullugu — taamaaliornermi qularnanngivissumik suleqatigiinnermik ajoqusiissammat — aperisinnaavatit sukkut siumukarniarsinnaanerlutit. Unnersuunneqarusussutsit akuersaarnerillu anersaakkut ineriartornittut qularnanngivissumik isigineqassaaq.

Maniguunneq anneruniarumatunnginnerlu Guutimeersut ilagiinni kiffartortup inuttut atugarisatigut ilinniagaqarsimanikkullu qutsissumik inissisimaffeqartup oqimaaqatigiissumik isumaqarnissaminut iluaqutigisinnaavai. Utoqqaanertanut takoqqusaarnissani imaluunniit piginnaassutsiminik takoqqusaarutiginninnissani ussernartorsiorfigisinnaavaa. Ussatit 11:2-mi eqqaasinneqarpugut ’qanilaartut ilisimassut pigigaat’. Qatanngutip qanilaartup, imaluunniit anneruniajuitsup, piginnaasami killeqarnerat nalunngilaa. Nipaalluni sulinissaminut utoqqaanertallu tapersersorniarlugit piginnaanerminik atuinissaminut piumassuseqartarpoq. Aamma anneruniajuissusiata ikiussavaa paasitillugu silamiut ilisimassusiannik pigisaqarnerup assigiinnanngikkaa anersaakkut ilisimassuseqarlunilu inerilluarsimasumik immikkoortitsisinnaassuseqarneq — pissutsit utoqqaanertat immaqa naammattorsuarmik pigisaat. — 1 Korintumiut 1:26–2:13; Filípimiut 1:9.

Ersarippoq utoqqaanertat ilagiinnilu kiffartortut pingaartumik inissisimaffeqartut. Peqatigiillutik ilagiinniittut tamaasa ineriartuutissaannik iliuuseqarsinnaasorujussuupput. Pisariaqarporli paaseqatigiilluarlutik suleqatigiinnissaat ’tamatigut nikanartillutik, qanilaarlutik, kamajuillutik asaqatigiissutullu kamageqatigiillutik; anersaakkut ataasiussusertik aalajangiunniaqqissaarlugu eqqississummik ataatsitut nimersimasutut’. — Evfisumiut 4:2, 3. (wD 15/8 94)

[Quppernerup ataani ilanngussaq]

[Qupp. 21-mi assiliartat]

Utoqqaanertat ilagiinni kiffartortut kiffaqatimissut isigaat naalatsimissut isiginagit