Ilagiinni kiffartortut pingaartumik kiffartorput
1 „Tassaapput angutit tunniulluinnarsimasut upperluartut Guutip naalagaaffianut kiffartuussisut allallu uppernermikkut aalajaattuunissaannut ikiuisimasut.“ Taama allaqqasoqarpoq ’Organisationsbog’-imi, qupperneq 55-imi ilagiinni kiffartortut pillugit. Ilumoorpoq ilagiinni kiffartortuusut maliagassaalluartumik maligassiuigamik. Taakku utoqqaanertallu qanimut suleqatigigaanni ilagiit ’timip alliartornissaatut naammassiartorput asanninnikkut imminnik ineriartortillutik.’ — Evf. 4:16.
2 Ilagiinni kiffartortut qatanngutinut iluaqutaasunik assigiinngitsorpassuarnik suliaqartarput. Naatsorsuutit, atuagaateqarfik, pisartakkat, oqaluussiffigisartakkallu isumagisarpaat; nakkutilliisarput, nipilersuutit naalagaaffilersaarfiullu aserfallatsaalinissaat isumagisarlugit. Teokratiimik Atuarfimmi oqaluussinermullu tunngasunik ataatsimiinnermi pisassaqartarput. Immaqa ilaat oqalugiartarput imaluunniit ilagiit ataatsimiinnerini aqutsisuusarlutik. Soorlu timimi pisatatut ilagiinni kiffartortut tamatta pisariaqartitatsinnik isumaginnittarput. — 1 Kor. 12:12-26.
3 Ilagiinni kiffartortuusut utoqqaanertallu ataqqeqatigiillutik paaseqatigiillutillu suleqatigiikkaanngamik, ilagiinniittut aamma taamaalioqquneqarput. (Kul. 2:19) Sapaatit-akunneri tamaasa aalajaallutik pisassamik suliarisarnerisigut, allanillu soqutiginnillutik pisarnerisigut ilagiit anersaakkut siumukarnissaannut ilasaaqataasarput.
4 Qanoq ililluta ilagiinni eqiasuillutik kiffartortunik qujamasunnerput takutissinnaavarput? Suliassaat nalunngittariaqarpavut pisariaqartitsigaangatalu suleqatigilluarnissaannut piareersimasariaqarluta. Oqaatsikkut suliakkullu sulinerat qujamasuutigalugit takutittarsinnaavavut. (Uss. 15:23) Uagut pilluta suleruloortartut ilumoortumik nersortariaqarput. — 1 Tás. 5:12, 13.
5 Guutip oqaasiata ilagiinni kiffartortut qanoq inissisimanissaat sunik piukkunnaateqassanersut aalajangersarsimavai. (1 Tim. 3:8-10, 12, 13) Illernartumik kiffartornerat ilagiit pinngitsoorsinnaanngilaat. Angutit taamaattut qiimmarsartuarneqarnissartik pisassaraat ’Naalakkap suliaanik naammassisaqangaartuaannaramik’. — 1 Kor. 15:58.