Biibili — Qanorpiaq naleqarpa?
„BIIBILI atuagaavoq eqqumiitsoq, paasisassaanngitsorlu,“ angut illumini pulaarneqartoq taama oqarpoq. Pulaagaq alla ima oqarpoq: „Nalunngilara Biibili atuagaasoq immikkut pingaarutilik, ilisimasaqarfigerpianngilarali. Paasiuminaatsorujussuuvoq.“
Aviisimi The Toronto Star-imi allassimavoq: „Kristumiut amerlasuut Biibili . . . naluaat.“ Arnaq katuuliusoq ima oqarsimavoq: „Biibiliuteqarama ajunngitsumik misigisimavunga. Ilunnik eqqissinartuutitsivoq.“ „Biibili pujorsiutitut ippoq inuunerup anorersuartaatigut isumannaatsumut siulersuisoq,“ aalisartoq taama oqarsimavoq. Hindusiortuusimasoq ima oqarpoq: „Biibili tassaavoq Guutip oqaasia inuiannut anersaakkut naalliuutit katsorsaatissatut tunissutaalluni.“
Biibilip naleqassusia pillugu assigiinngitsunik isumaqartoqarpoq. Qanorpiaq naleqarami?
Biibili tassaavoq silarsuarmi atuakkat pingaarnerpaartaat siammarsimanerpaartaallu. Ajornartorsiutit inuit atorsimasaasa atorumaagaasalu artornarnersaannut akissutissat Biibilip quppernerini allanneqarsimapput. Unnersuussutaasa atoriaannaassusiat asseqanngilluinnarpoq. Tassani ileqqussanut tunngasutigut najoqqutassat akimorneqarsinnaanngillat. Tusarliussaa sunniinertuullunilu iluaqutaasorujussuuvoq. Atuagaq tamanna asseqanngitsumik nalilik atuagaasivimmit tiguneqartariaqarpoq misissoqqissaarneqartariaqarlunilu.
Biibili ammarsinnaavarput tatigalugu eqqorluinnartuullunilu ilumoortuusoq. Oqaluttuarisaanermi pisimasut tassani eqqartorneqartut ilumoornerat oqaluttuarisaanermik ilisimatuussutsip uppernarsarsimavai. Itsarnisarsiortut nassaarisimasaasa takutittarpaat Biibili tatiginartuullunilu ilumoortuusoq. Biibilimik allattut 40-t missaanniittut isertuanngissusiata takutippaa tassaasut angutit ilumoorlutillu unneqqarissut. Allakkat tamarmik imminnut ataqatigiissusiata paasinarsisippaa tassaanngitsoq inuinnaat allassimasaat. Tassani eqqartorneqartut pisimasuiupput. Inuit tassani oqaluttuarineqartut ilumut inuusimapput. Illoqarfiit sumiiffiillu eqqartorneqartut piviusuupput. Saniatigullu Biibilimi siulittuuteqarpoq immikkut ittunik Jehova Guutip Biibilimik atuakkiortuussusianik uppernarsaasunik. — 1 Pîtruse 1:21.
Ilinniartitsisorsuatta isumagisimavaa piumasaminik siunertaminillu ilisimasaqalerusuttut tamarmik tamatuminnga pissarsinissaat. Aap, Jehovap ersarissumik paasitippaatigut inuit tamarmik oqaatsiminik atuaqqissaarnissaat ’sallusuissummillu ilisarsilernissaat’ piumasarigini. (1 Timûtiuse 2:3, 4; Ussatit 1:5, 20-33) Taamaaliornissaq tassaavoq inuunitsinni suliasassat pingaarnerpaartaasa ilaat. Eqqorluartumik ilisimasaqalernissaq tamatta akisussaaffigaarput. Kristumiut siulliit tamanna paasilluarsimavaat. Taakkua ilaat ima allassimavoq: ’Imaattorlu qinnutigisarpara: asannissusersi ilisarsinermik sianinernillu tamanik ilaqangaaleriartuinnaqqullugu, sorliit iluarnersut misilittarsinnaaqqullusigik.’ — Filípimiut 1:9, 10.
Pingaartumik Biibili aqqutigalugu Pinngortitsisup inuiaat piumasaminik siunertaminillu paasitissimavai, tassanilu nassuiarneqarpoq uagut inuttut ataasiakkaatut qanoq ililluta siunertami tamatumani inisissimaffeqartugut. Pereersimasut oqaluttuarineqarput siunissarlu siumut allaatigineqarluarpoq. Biibilimi ajoqersuutit ilumoortut nassuiarneqarput ersarissumillu paasitinneqarpugut suut upperissagivut suullu upperissanngikkivut. (apustilit suliait 17:11; 2 Timûtiuse 3:16, 17) Inuunermi najoqqutassat maleruartariaqakkavut eqqartorneqarput inuillu iluatsitsinissamut pilluarnissamullu siulersorneqarput. (Matîuse kapitali 5-7) Guutip naalagaaffia inuiannut tamanut neriuutissatuatut erseqqissaarneqarpoq takutinneqarlunilu naalagaaffik tamanna tassaasoq Guutip aqqanik illernarsisitsisussaq taassumalu qilammilu nunamilu kisimi oqartussaassusianik qutsissisitsisussaq. Biibilimilu nassuiarneqarpoq qanoq ililluta inuunermik Tunisisumut Jehovamut qanimut ajunngitsumillu attaveqarsinnaasugut.
Aammalu Biibili kisiat ikiortigalugu inuit tunissummik annerpaamik tunineqarumaarput — nunarsuarmi paratiisiusumi inuttut naammalluinnartutut naassaanngitsumik inuunissamik. (Rûmamiut 6:23) Jehovap ernituata ima oqarfigisimavaatigut: ’Tassaavorli inuuneq naassaanngitsoq: illit ilisaralutit kisivit ilumut Guutiusutit, aallartitallu Jesus Kristus ilisaralugu.’ (Juánase 17:3) Aap, atuakkap taama naleqartigisup kajumissaarsinnaavaatigut inuuneq naassaanngitsoq anguniarlugu qanoq iliortariaqarnitsinnik ilinniaqqulluta. Biibili tassaavoq atuagaq paasineqartussiaq, soorlu ilanngutassiap tulliuttup takutikkaa.