Guutip savaataanik asannittumik paarsineq
’Guutip savaatai ilissinniittut paarisigik.’ — 1 PÎTRUSE 5:2.
1, 2. Jehovap pissusiini suna ersarinnerpaava, ow does it manifest itself?
ALLAKKANI ILLERNARTUNI tamatigut ersarippoq Guutip pissusia ersarinnerpaaq tassaasoq asanninneq. ’Guuti asassutaavoq,’ 1 Juánase 4:8-mi oqaatigineqarpoq. Asanninnini suliamigut ersersittarmagu 1 Pîtruse 5:7-imi oqaatigineqarpoq ’isumassoraatigut’. Jehovap innuttaminik isumassueriaasia Biibilimi assersuunneqarpoq savanik paarsisup savaatiminik saamasumik isumassuineranut: „Takuammi, Guuti Naalagaasoq [Jehova] . . . Savaatini paarsisutut paarai, savaaqqat talerminik katersorpai pakkullugillu, savallu miluttunik piarallit siulersorlugit.“ (Jesaja 40:10, 11) David toqqissisimasimassaqaaq ima oqarami: „[Jehova] paarsisigaara, sumik ajorsaateqanngilanga.“ — Tussiaat 23:1.
2 Tulluaqaaq inuit Guutip iluarisai Biibilimi savanut assersuunneqarmata, savammi paarsisuminnut isumassortiminnut nujuitsuupput, maniguuttuullutik naalattuullutillu. Savanik paarsisutut asannittutut Jehovap innuttani savatut pissusillit isumassugarilluinnarpai. Isumassuinini tamanna ersersittarpaa timikkut anersaakkullu isumassornerisigut silarsuullu ajortup matuma ’ulluini kingullerni’ ajornakusoortuni unnersuuttarlugit silarsuassaminut nutaamut siulersorlugit. — 2 Timûtiuse 3:1-5, 13; Matîuse 6:31-34; 10:28-31; 2 Pîtruse 3:13.
3. Jehovap savaatiminik isumassueriaasia tussiaasiortup qanoq allaatigaa?
3 Jehovap savaatiminut asannilluni isumassuinera malugiuk: „[Jehovap] isaasa sammivigaat iluartut, ikioqqullutik nillianerat siutaasa tusartarpaat. . . . Iluartut kappialagaangata [Jehovap] tusartarpai aniguisillugillu annikilliuutigisaannit tamanit. [Jehovap] qanippai neriuutaarussimasut, annaattarpai sapiissuseerutitaasimasut. Iluartup perlussiuutai amerlaqaat, [Jehovalli] tamakkunannga tamanit annaattarpaa.“ (Tussiaat 34:16-20) Paarsisuunerup innuttaminut savatut ittunut tuppallersaanera ila angimmat!
Paarsisup ajunngitsup maligassiaa
4. Guutip savaataanik isumassuinermi Jesus qanoq pingaaruteqarpa?
4 Guutip ernera, Jesus, Ataataminit ajunngitsumik ilinniarsimavoq, Biibilimimi taaneqarpoq ’paarsisumik ajunngitsumik’. (Juánase 10:11-16) Taassuma Guutip savaataanik isumassuilluarnera sarĸúmersitat kapitali 7-imi eqqartorneqarpoq. Versi 9-mi Guutip ullumikkut kiffai eqqaaneqarput ’amerlangaartut . . . inuiaqatigiit immikkullu naggueqatigiissut immikkullu inuiaasut immikkullu oqaasillit tamarmik ilaat’. Taava versimi 17-imi ima allassimavoq: ’Savaaqqap [Jesusip] . . . paariumaarmagit tasiorlugillu imermik puilasunut inuunerup piinut; Guutillu qulliit tamaasa isaannit allarterumaarpai.’ Guutip savaatai imermik puilasunut sallusuissutip piinut inuunermik naassaanngitsumik nassataqartunut Jesusip siulersorpai. (Juánase 17:3) Malugiuk Jesus taaneqarmat „Savaaraq“-mik, erserluni savatut pissuseqartuusoq, Guutimut maniguunnermigut naalatsigitinnermigullu maligassiuillartuulluni.
5. Jesusip inuit qanoq misigiffigisarpai?
5 Jesus nunarsuarmi inuit akornanni inuusimavoq, pissutsillu artornartut inuit atugaat takusimallugit. Atugarliornerat qanoq qisuariarfigisimavaa? ’Inuppassuilu takugamigit nalligingaalerpai, paarinerlugaallutillu isumakkiigaammata savatut paarsisoqanngitsutut.’ (Matîuse 9:36) Savat paarsisoqanngitsut uumasunit nujuartanit naalliutsinneqartaqaat, aammali savat paarsisoqaraluarlutik paarinerlugaasut taama atugarliortigisarput. Jesusili isumassuilluartorujussuuvoq, imami oqarsimavoq: ’Ornissinga tamassi erloqisusi nanertugaasusilu, qasuersissavassi. Nammaatara ilissinnut pisissiuk ilinniarfigalungalu, qanilaarama uummatikkullu makitajuikkama; taava tarnissinnut qasuerfissarsiumaarpusi. Nammaatarami iluaqaaq, nammakkiussaralu oqeqaluni.’ — Matîuse 11:28-30.
6. Jesusip erloqissutillit qanoq isumassortarpai?
6 Biibilimi siulittuutigineqarsimavoq Jesusip inunnik asannittumik iliorfiginnittarnissaa: „Guutip [Jehovaasup] anersaava ilunniippoq tanitarigaminga. Aallartippaanga . . . neriuutaaruttut neriuuteqalerseqqullugit, . . . aliasuttut tamaasa tuppallersaqqullugit.“ (Jesaja 61:1, 2; Lúkarse 4:17-21) Piitsut aliasuttullu Jesusip nikaginngisaannarsimavai. Jesaja 42:3-miittorli eqquutissimallugu: „Sullortooq naffalik napivissanngilaa iperarlu qamilersoq qamivissanagu.“ (Naleqqiuguk Matîuse 12:17-21.) Artorsaateqartut sullortuutut naffalittut ipput, qullertut orsuerutilerluni qamilersutut illutik. Atugarliuutaat paasillugit Jesusip misiginneqatigisarsimavai nukissaqalersillugillu neriuuteqalersittarlugit, anersaakkut timikkullu ajorunnaarsittarlugit. — Matîuse 4:23.
7. Jesusip inuit imminut malinnittut sumut siulersorpai?
7 Inuit savatut pissusillit Jesus ornigartarsimaqaat. Ajoqersuutai kajumissinangaarmata kiffat taassuminnga tigusarinnikkiartortitaagaluit uteramik ima oqarsimapput: ’Inummik taassumatut oqaluttoqanngisaannarpoq.’ (Juánase 7:46) Upperisarsiornikkullu siuttut ilumoortuusaarniartut ima naammagittaalliorsimapput: ’Takuasi tamarsuarmik malippaat.’ (Juánase 12:19) Jesusili imminut ataqqinartinnianngisaannarsimavoq. Inuit Ataataminut siulersortarsimavai. Ilinniartittarsimavai Jehova kiffartuuteqqullugu taassuma pissusiinik nuanningaartunik asanninnertik tunngavigalugu: ’Jehova Guutit asassavat uummatikkut iluunngarlutit tarnikkullu iluunngarlutit nukisillugit tamakkerlugit isumakkullu iluunngarlutit.’ — Lúkarse 10:27, 28.
8. Guutip innuttaasa taassumunnga naalannerat silarsuarmi naalakkersuisunut inuit naalannerannit qanoq allaanerua?
8 Jehovap naalannaataa tassa kisimi oqartussaassusia innuttaanit savatut pissusilinnit taassumunnga asanninnermik tungaveqartumik tapersersorneqarami. Kajumillutik taassumunnga kiffartornissartik qinersimavaat pissusii nuannersut ilisimagamikkik. Silarsuarmi siuttunut naalatsigitittunit ila allaanerummata, taakkumi naalatsigitittarput sioorallutik, imaluunniit pinaaserlutik, imaluunniit siunertapiloqarlutik! Ilagiinni katuulluni Romalerisuni paaviusoq pillugu oqaaserineqarsimasut Jehovamut Jesusimulluunniit atorneqanngisaannassapput: „Amerlasuunit nersorneqarpoq, tamanit mianerisaavoq, ataatsimilluunniit asaneqanngilaq.“ — Vicars of Christ — The Dark Side of the Papacy, Peter De Rosamit.
Israelimi paarsisut peqqarniitsut
9, 10. Israelitoqqami ukiunilu hundredelinni siullerni upperisarsiornikkut siuttut qanoq ittuusimappat?
9 Jesus assiginagu Israelimi taassuma nalaani upperisarsiornikkut siuttut savanut paarisaminnut asannissuseqarsimanngillat. Siulimissut Jehovap ima oqaatigisaatut issimapput: „Israelikkut paarsisaat unnerluutigalugit takorluukkersaarfigikkit oqarlutit: Ima oqarpoq [Jehova]: Eqqanaq Israelikkunnik paarsisuuniaraluartut imminnuinnarli isumagalutik. Paarsisut savat paarisassarinnginerpaat? . . . Sanngiitsut nakussatsinngilasi napparsimasullu katsorsarnagit, ikiligaasut mattusersunngilasi siammagaasullu katersornagit. Tammartut ujanngilasi, nukittuullu naalliutsillugit tullaaraasi.“ — Hesekiel 34:2-4.
10 Siuaasatik assigilluinnarlugit ukiuni hundredelinni siullerni juutit upperisarsiornikkut siuttui manngertunik uummateqarsimapput. (Lúkarse 11:47-52) Tamatumunnga tunngatillugu Jesusip assersuusiaraa juuti ujajaaffigineqartoq, unatarneqarlunilu toqungajattoq aqqusernullu sinaanut qimaannarneqarluni. Palasi Israelikkuusoq saneqquppoq, juutili takugamiuk aqqusernup illua’tungaanut sanguvoq. Aamma Levikkuusoq taamaaliorpoq. Taavali Israelikkuunngitsoq, Samariamiu asissugaasoq, takkuppoq pinerlineqarsimasorlu naakkinnittuliorfigalugu. Ikii mattusersorpai, nammineq qatigattuujutiminut qaqitillugu akunnittarfiliaallugulu paaqqutaritillugu. Akunnittarfiutilik akilerpaa oqarfigalugulu uteqqikkumaarluni saniatigullu aningaasartuutaajunnartut akilerumaarlugit. — Lúkarse 10:30-37.
11, 12. (a) Upperisarsiornikkut siuttut ajussusertik Jesusip nalaani qanoq ersersissimavaat? (b) Upperisarsiornikkut siuttut naggataatigut Romamiunit qanoq pineqarpat?
11 Jesusip nalaani upperisarsiornikkut siuttut ima ajortunngorsimatigipput Jesusip Lazarus toqusunit makitimmagu palasiunerit farisiiarillu Sanhedrinimut ilaasortanik katersortitsisimallutik oqarlutillugu: ’Qanoq pissaagut? Inuk taanna amerlasuunik nalunaaqqutiliormat. Ilaginnaannarutsigu tamarmik upperfigilissavaat, taavalu Romamiut nunarpullu innuttavullu tigujartussavaat.’ (Juánase 11:47, 48) Jesusip angummut toqungasumut atatillugu ajunngitsuliaa soqutiginngilaat. Namminneq atorfitsik eqqarsaatigineruaat. Taamaattumik ’ullormit tassannga isumalioqatigiittarput Jesus toqukkumallugu’. — Juánase 11:53.
12 Ajussutsiminnut tapiliullugu palasiunerit ’isumalioqatigiipput Lazarusissaaq toqukkumallugu, taanna pissutigalugu juutit ilarpassui tassunnarmata Jesus upperfigilerlugu’. (Juánase 12:10, 11) Atorfitsik sernissorniarlugu namminissarsiorlutik ilungersorneri iluaqutaanngillat, Jesusimmi ima oqarfigisimavai: ’Ata, illorsi ilissinnut qimagaassavoq inueruttoq.’ (Matîuse 23:38) Oqaatsit taakku eqquutitillugit kinguaariit taakku suli inuutillugit Romamiut takkupput ’nunaat innuttaallu tiguarlugit’ toqullugillu.
Ilagiinni kristumiuni paarsisut asannittut
13. Kikkut savaatiminik paarsiartortissallugit Jehova neriorsuisimava?
13 Savanut peqqarniitsunut namminissarsiortunullu taarsiullugit Jehovap Paarsisoq Ajunngitsoq, Jesus, savaatiminut isumassuisunngortissimavaa. Aamma neriorsuisimavoq savaatiminik paarsisussanik Jesusip ataaniittussanik pilersitsiumaarluni: „Paarsisussaannik ivertitsiumaarpunga, taakkualu paarissavaat; taava ersiunnaarlutik sioorajunnaassapput.“ (Jeremia 23:4) Taamaattumik soorlu ukiuni hundredelinni siullerni taamaattoq ullumikkut ilagiinni kristumiuni ’illoqarfinni tamani ilagiit utoqqaanertassaannik ivertitsisoqarsimavoq’. (Títuse 1:5) Utoqqaanertat anersaakkut pingaartitsisut piginnaanernik Allakkani eqqartorneqartunik eqqortitsisut ’Guutip savaataanik paarsisussaapput’. — 1 Pîtruse 5:2; 1 Timûtiuse 3:1-7; Títuse 1:7-9.
14, 15. (a) Pissuseq suna ajoqersukkat pigiliukkuminaatsissimavaat? (b) Qanoq ililluni Jesusip takutippaa utoqqaanertat maniguullutik kiffartortuusariaqartut?
14 Savanik paarsinerminni utoqqaanertat ’tamanit annermik’ taakkuninnga ’ilungersorlutik asannittariaqarput. (1 Pîtruse 4:8) Jesusilli ajoqersugaasa qaffannissaminnik kissaateqarpallaalersimasut tamanna ilinniarfigisariaqarsimavaat. Ajoqersukkat ilaasa marluk anaanaat Jesusimut oqarmat: ’Oqarna ernikka uku marluk naalagaaffinni issiaqqullugit arlaat talerpippit tungaani aappaalu saamippit tungaani,’ ajoqersukkat allat ajuallassimapput. Jesusip ima oqarfigisimavai: ’Ilisimavusi inuiaqatigiit siulersortaasa naalagaaffiginiartaraat, annertaasalu naalakkersortaraat. Ilissinnili taamaassanngilaq; kisianni ilissinni angisuunngorumasup kiffartuullisi. Ilissinnilu siulliujumasoq ilaminut kiffaannaagili.’ — Matîuse 20:20-28.
15 Allami ajoqersukkami ’kina annerusoq’ assortuussutigimmassuk Jesusip ima oqarfigisimavai: ’Siulliujumasoqarpat taanna tamanit kingulliussavoq, tamarmillu kiffarissavaat.’ (Mákorse 9:34, 35) Isumakkut maniguunneq kiffartorumassuserlu inuttut pissutsiminnut ilaalersinniartariaqarpaat. Tamannali ajoqersukkat ajornartorsiutigiuarsinnarpaat, Jesusimmi toqunissaa aqaguttoq unnuakkut, unnukkorsiortitsinerani kingullermi, kina arlartik annerunersoq ’saqitsaassutigilersimavaat’! Tamanna pisimavoq uffa Jesusip takutereeraatik utoqqaanertaq qanoq savaatinik kiffartuussisariaqartoq; imminut nikanartippoq taakkualu isigaat asallugit. Oqarfigai: ’Uanga taava isikkasi uffarakkit, naak naalagaralungalu ajoqersortigigissinga, taamattaaq ilissi isikkassinnik uffaqatigiissaasi. Maligassamimmi pivassi imaalioqqullusi soorlu ilissinnut iliortunga.’ — Lúkarse 22:24; Juánase 13:14, 15.
16. Utoqqaanertat pissuserisariaqagaasa pingaarnersaat pillugu Watch Tower-imi 1899-imi qanoq allaaserisaqarpa?
16 Aamma Jehovap Nalunaajaasuisa utoqqaanertat taama ittuusariaqarnerat ilinniartitsissutigiuaannarsimavaat. Ukiut hundredengajaat matuma siorna, apriilip 1-iani 1899-imi, Watch Tower-imi apustilip Paulusip 1 Korintumiut 13:1-8-imi oqaasii sammineqarput, imalu allaatigisaqarluni: „Ilisimasaqarneq oqallorissuserlu pingaarnerpaajunngillat, pingaanrerpaarli tassa uummatikkut iluunngarluni asanninneq inuunermillu tamarmik sunniisoq, timitsinnullu tamarmiusumik aqutsisoq misilinneqarfiulluinnartoq — nalunaaqutaalluinnartoq Guutimit siulersorneqarnitsinnut. . . . Ilagiinni kiffartortuni tamani, illernartumik kiffartuuteqartunut, ilisarnaativiusussaq pingaarnerpaamik tassaasariaqarpoq asanninnerup anersaava.“ Aamma allassimavoq angutit maniguunnatik asannissuseqaratillu kiffartortut tassaasut „ajoqersuisut tatigisassaanngitsut, iluaqutaanatik ajoqutaaginnartut“. — 1 Korintumiut 8:1.
17. Utoqqaanertat pissuserisariaqagaat Biibilimi qanoq erseqqissarneqarpat?
17 Tassa utoqqaanertat savanut ’naalagaaniartuusussaanngillat’. (1 Pîtruse 5:3) Akerlianilli siulersortariaqarpaat ’ajunngitsumik iliorfiginnittarlutik isumassuigajullutillu’. (Evfisumiut 4:32) Paulus ima erseqqissaasimavoq: ’Atiniarsigik imaattut: nallittuingaarneq avaaginninnerlu nikanartinnerlu qanilaarnerlu kamajuinnerlu; . . . Tamakkuli tamarmik qaasigut atiniarsiuk asanninneq; tamanna iluarluinnassutsip nimeraa.’ — Kulorsamiut 3:12-14.
18. (a) Savaatinut iliuutsimigut Paulus qanoq maligassiusimava? (b) Sooq savaatit pisariaqartitaat utoqqaanertat sumiginnartussaanngilaat?
18 Paulusip tamanna ilikkarsimavaa, oqarpormi: ’Saamalluta akornassinniippugut; soorlu arnap qitornani milutsittarai, taama asangaarlusi nuannarisaqarpugut aviffigiumallusi, Guutip iivangkiiliuinnaanik pinnata, inuunitsinnilli allaat, tassa uatsinnut asanarsigassi.’ (1 Tásalûníkamiut 2:7, 8) Tamatumunnga naapertuuttumik aamma ima oqarsimavoq: ’Nikallortut tuppallersarsigik, sanngiitsut illersorsigik, tamanullu kamajuillusi.’ (1 Tásalûníkamiut 5:14) Savat ajornartorsiutinik sunilluunniit imminnut saaffiginnissuteqaraluarpata utoqqaanertat Ussatit 21:13-imi allassimasoq eqqaamasariaqarpaat: „Piitsut nillianerannik tusaajumanngitsoq nammineq suaartaraluaruni akineqassanngilaq.“
19. Sooq utoqqaanertat asannittut pilluaqqussutaappat, savallu asanninnermut taama ittumut qanoq qisuariartarpat?
19 Utoqqaanertat asannillutik savaatinik paarsisut savanut ataasiakkaanut pilluaqqussutaapput. Jesaja 32:2-mi ima siulittuuteqarpoq: „Tamarmik assigissavaat anorersuarmut oqquiffik, sialussuarmullu oqqiffik, inoqajuitsumi kuunnguit kuuttut, nunami imissaaleqisumi qaarsorsuup alanngortaa.“ Nuannaaqaagut nalunnginnatsigu ullumikkut utoqqaanertatta ilarpassuisa assersuut nuannersoq tamanna eqqortikkaat. Najoqqutassap matuma maleruarnissaa ilikkarsimavaat: ’Qatanngutigiissutut asaqatigiigitsi ungagiillusi. Ataqqeqatigiigitsi ingiaqattaallusi.’ (Rûmamiut 12:10) Utoqqaanertat asanninnermik maniguunnermillu taama ittumik ersersitsisaraangata savaatit akisillutik ’suliaat pillugu ataqqingaarlugillu asasarpaat’. — 1 Tásalûníkamiut 5:12, 13.
Nammineq piumassutsimik ataqqinninneq
20. Sooq utoqqaanertat nammineq piumassutsimik ataqqinnittariaqarpat?
20 Jehovap inuit nammineq piumassusilerlugit pinngortissimavai namminneq aalajangiisinnaanngorlugit. Utoqqaanertat naak unnersuussisussaagaluarlutik ilungersortumillu oqaassisussaagaluarlutik allat inuunerannut uppernerannullu akisussaanngillat. Paulus ima oqarsimavoq: ’Uppersutsissinnut naalagaanianngikkaluarpugut, tipaatsussutsissinnilli suleqatigaatsigut aalajangerlusi upperassi.’ (2 Korintumiut 1:24) Aap, ’kialuunniit nammineq nammagassi nammassavaa’. (Galâsiamiut 6:5) Jehovap inatsisimi najoqqutassiamilu iluini annertuumik kiffaanngissuseqartippaatigut. Taamaattumik utoqqaanertat Biibilimi najoqqutassianik unioqqutitsisoqanngikkaangat namminneq maleruagassaliornaveersaartariaqarput. Aammalu nammineq isummatik inatsisitut saqqummiunnaveersaartariaqarpaat imaluunniit isummatik allanit isumaqatigineqanngippata ajuallattariaqarnatik. — 2 Korintumiut 3:17; 1 Pîtruse 2:16.
21. Paulusip Filemonimut iliuuseqarnera sumik ilinniarfigineqarsinnaava?
21 Malugiuk Paulusip Romami parnaarussivimmiilluni Filemon, Kulossaemi Aasiaaqqamiittumi inussiaatilik, qanoq iliuuseqarfigisimagaa. Filemonip inussiaataa Onesimus Romamut qimaasimavoq, kingornalu kristumiunngorluni Paulus ikiorsimallugu. Paulus Filemonimut ima allassimavoq: ’Taanna uanniiginnaqqugaluarpara, sinnerlutit kiffartuuteqqullunga iivangkiiliu pillugu qilersugaatillunga, siunersisimanatilli qanoq iliorumanngilanga ajunngitsuliassat ajornartoornermik pissuteqaqqunagu, kisianni kajuminnermik.’ (Fîlimût 13, 14) Paulusip Onesimus utertippaa, Filemonilu qinuigalugu taanna kristumiutut qatanngutitut pissagaa. Paulusip nalunngilaa savaatit nammineq piginagit; Guutilli pigigai. Nammineq savaatinut naalagaanngilaq kiffaallunili. Paulus Filemonimut peqqusinngilaq; ’kajuminnerminilli’ pinissaa, imaluunniit nammineq piumasaminik iliornissaa, ataqqivaa.
22. (a) Utoqqaanertat suliassartik qanoq isigisariaqarpaat? (b) Jehovap peqatigiissortani qanoq ittut ineriartortippai?
22 Guutip peqatigiissortai amerliartuinnartillugit utoqqaanertat amerliartuinnartut ivertinneqartarput. Utoqqaanertat nutaat misilittagaqarnerusutulli paasisariaqarpaat suliartik kiffartuutinut maniguuttunut ilaammat. Taamaappat Guutip peqatigiissortai silarsuassamut nutaamut siulersugai taassuma piumasaatut ingerlaannarsinnaassapput — aaqqissuussaalluarlutik asanninnermilli misiginneqataanermillu pilliuteqaratik. Peqatigiissortai inunnut savatut pissusilinnut, ’Guutimik asannittut iluaqutissaannut’ Guutip sunik tamanik ataqatigiisitsineranut uppernarsaatinik takunnittunut, kajungernarsiartuinnassapput. Peqatigiissortat asanninnermik tunngaveqartut taamaannissaat ilimagisariaqarpoq, ’asanninnermi soraarnavianngilaq’. — Rûmamiut 8:28; 1 Korintumiut 13:8.
Qanoq akissavit?
□ Jehovap innuttaminik isumassuinera Biibilimi qanoq allaatigineqarpa?
□ Guutip savaataanik isumassuinermi Jesus qanoq pingaaruteqarpa?
□ Israelimi upperisarsiornikkut siuttut Biibilimi qanoq allaatigineqarpat?
□ Utoqqaanertat suna pissuserinerpaasariaqarpaat?
□ Sooq savaatit nammineq piumassusiat utoqqaanertat ataqqisariaqarpaat?
[Qupp. 16-mi assiliartaq]
Jesus, ’paarsisoq ajunngitsoq’, naakkinnittuusimavoq
[Qupp. 17-mi assiliartaq]
Upperisarsiornikkut siuttut ajortunngorsimasut isumalioqatigiipilussimapput Jesus toqunniarlugu