Inuit naalliuutaat atuuttuassappat?
SARAJEVOMI aqqusinermi niuerniartorpassuit akornannut qaartartumeerineqareersorlu takusassat tataannartut; Rwandami toqoraanersuaq aqqunartiterinerlu; Somaliami meeqqat perlilersut nerisassaaleqillutik kappialasut; Los Angelesimi nunap sajoreernerani ilaqutariit tupassimaqisut annaasaminnik naatsorsuisut; Bangladeshimi qarsutsinersuup aseruatiterineranit eqqorneqartut naakkinaqisut. Pisartut naalliunnartut taama ittut ulluinnarni tv-kkut, atuagassiatigut aviisitigullu saqqummiunneqartarput.
Inuit naalliuutaat ajoraluartumik inuit ilaasa Guutimut uppissuseerunnerannut pissutaasarput. „Ajussutsip atuunnera tassaajuarsimavoq uppernermut akornutit annerpaartaat,“ USA-mi juutit upperisarsioqatigiit saqqummersitaanni taama allassimasoqarpoq. Allattut innersuussutigaat nazistit toqutassanut inissiarsuini, soorlu Auschwitzimi, qaartartumeerinernilu, soorlu Hiroshimami, toqoraanersuit. „Guutip naapertuilluartup pissaanillillu inunnik pisuussuteqanngitsunik taama amerlatigisunik toqoraanersuarmik qanoq ililluni ilaginnaaginnarsinnaaneranik apeqqut upperisarsiortunut ilerasuutaallunilu paatsiveerusimaassutaavoq,“ aamma taama allapput.
Taama ittunik tusagassarpassuaqarnera ajoraluartumik inuit sungiutiinnarsimagamikku misigissutsimikkut attortissutigerpiarneq ajulersimavaat. Ikinngutit qanigisallu eqqorneqanngikkaangata allat naalliunneri amerlasuutigut misiginneqataaffigineqarneq ajorput.
Kisianni ingammik asasatsinnut misiginneqataasinnaassuserput Pinngortitsisitsinnut tunngasumik ilinniarfigisariaqaraluarparput. Biibilimi oqaatigineqarpoq inuk ’Guuti assilillugu’ pinngortitaasoq. (1 Moses 1:26, 27) Tamanna ima paasisariaqanngilaq Guutitut isikkulerlugu pinngortitaasoq. Aap, Jesus Kristusimi nassuiaasimavoq ’Guuti anersaajusoq’ aamma ’anersaaq uineqaranilu saaneqanngitsoq’. (Juánase 4:24: Lúkarse 24:39) Guuti assilillugu pinngortitaasugut isumaqarpoq Guutip pissusiisa assinginik ersersitsisinnaassusiligaasugut. Taamaattumik inuit naalliuttunik misiginneqataasinnaassuseqarmata isummertariaqarpugut inuup Pinngortitsisaa, Jehova Guuti, misiginneqataasuusoq pinngortitamilu inuit naalliuutaannut misiginneqataalluinnartuusoq. — Naleqqiuguk Lúkarse 11:13.
Guutip misiginneqataanerminut ersersitsissutaanut ilaavoq naalliunnartunut pissutaasoq allaganngorlugu nassuiaatigisimagamiuk, tassa oqaatsimini, Biibilimi. Biibilimi erseqqissumik takutinneqarpoq Guutip inuk pinngortissimagaa inuunermik nuannaarutiginninnissaa siunertaralugu, naalliunnissaa siunertarinagu. (1 Moses 2:7-9) Aamma Biibilimi qulaarneqarpoq inuit siulliit Guutip aqutsineranut naapertuilluartumut naalakkumannginnertik pissutigalugu imminnut naalliunnartunik atugaqartilersimasut. — 5 Moses 32:4, 5; Rûmamiut 5:12.
Taamaakkaluartoq suli Guuti inunnut naalliuttunut misiginneqataassuseqarpoq. Tamanna erseqqilluarpoq, neriorsuisimavormi naalliunnartut atuukkunnaarsikkumaarlugit. ’Takussagissi Guutip ineqarfia inunniittoq, taakkunanilu ineqarumaarpoq innuttariumaarlugillu, Guutillu nammineq najorumaarpai; qulliillu tamaasa isaannit allarterumaarpai, toqulu peqarunnaassavoq, aliasuttoqarunnaarlunilu nilliasoqarunnaarlunilu aliasuttoqarunnaassavoq, siulliit peermata.’ — sarĸúmersitat 21:3, 4; takukkittaaq Jesaja 25:8; 65:17-25; Rûmamiut 8:19-21.
Oqaatsit nuannersut tamakku uppernarsarpaat inuit naalliunnerat Guutip arajutsisimanngikkaa naalliunnartullu peernissaat aalajangiusimagaa. Sunarpiarliuna pissutaalluni naalliunnartut aallaqqaammulli atuutilersimasut, aammalu sooq ulluvut makku tikivillugit atuunnissaat Guutip akuerigallarsimavaa?
[Qupp. 2-mi suminngaanneernera]
Cover: Alexandra Boulat/Sipa Press
[Qupp. 3-mi suminngaanneernera]
Kevin Frayer/Sipa Press