Iluartunik makititsineqarumaarpoq
’Guuti neriuffigaara . . . toqusut makikkumaartut, iluartullu iluaatsullu.’ — APUSTILIT SULIAIT 24:15.
1. Adam Evalu ajortuliormatali pissutsit qanoq ittut inuiaat atugarilersimavaat?
„PIGINNAANERIT tamaat atorlugu iliorniarit toqusut inaanni ornikkanni suliassaqanngimmat pilersaarusiorfissaqaraniluunniit, ilisimasassanillu ilisimassummilluunniit pissarsiassaqarani.“ (Nalunaajaasup oqaasii 9:10) Oqaatsit naatsunnguit naleqqulluartullu taakku atorlugit kunngip Salomonip silatuup pissutsit siuaasavut siulliit, Adam Evalu, ajortuliormatali kinguaariit tamavimmik atugarilersimasaat oqaatigai. Toqup inuit kikkut tamaasa — pisuut piitsullu, kunngit inuinnaallu, uppertut uppinngitsullu — eqqorsimavai. Ilumummi kikkunnut tamanut ’toqu naalagaalersimavoq’. — Rûmamiut 5:17.
2. Aalajaatsut ilaasa naggatissap nalaani maani suna immaqa pakatsissutigisimavaat?
2 Naak nakorsaatitigut ilisimatuussutsikkut siuariartorneqaraluartoq ulloq manna tikillugu toqu kunngitut naalagaavoq. Tamanna tupaallannanngikkaluarpoq, inoqarporli immaqa akeratoqarsuarmut tamatumunnga qanillinerminni pakatsisimasunik. Sooq? 1920-kkunniilli Napasuliaq Alapernaarsuiffiup Peqatigiiffiata tusarliussaq „Inuit maannakkut inuusut millionilikkuutaat toqunngisaannassapput“-mik qulequtalik oqaluussissutigisarsimavaa. Millionilikkuutaat taakku kikkuugamik? ’Savat’ Jesusip savat savaasallu pillugit siulittuutimini eqqartugai. (Matîuse 25:31-46) Siulittuutigineqarpoq inuit savatut pissusillit taakku naggatissap nalaani saqqummerumaartut, taakkulu nunarsuarmi paratiisiusumi naassaanngitsumik inuulernissamik neriugisaqarput. ’Savat’ taakku Jehovap siunertaani qanoq inissisimaffeqarnerat Guutip innuttaasa piffissap ingerlanerani paasiartuaarsimavaat. Paasilersimavaat ullussani kingullerni inuit naalattut taakku ’savaasanit’ avissaartiterneqassasut, taaneqartullu kingulliit suujunnaarsinneqareerpata nunarsuaq Naalagaaffiup oqartussaaffigisaa imminnut piareersimatitaasoq kingornukkumaaraat.
Savatut pissusilinnik katersuineq
3. Guutip innuttai 1935-miilli sumik suliaqalersimappat?
3 1935 aallarnerfigalugu ’inussiap aalajaatsup’ suliamini pingaarnerpaatillugu inuit savatut pissusillit ujarsimavai Jehovallu peqatigiissortaanut eqqussorlugit. (Matîuse 24:45, NV; Juánase 10:16) Inuit ilinniartinneqarusussusillit taakku paasivaat Jesus maanna Jehovap naalagaaffiani qilammiittumi naalakkersuilersimasoq, pissutsillu aaqqissuussaanerata ajortup matuma naggatissaa silarsuarmillu naapertuilluartumik pilersitsinissaq qanilliartorasuartut. (2 Pîtruse 3:13; sarĸúmersitat 12:10) Silarsuassami nutaami tamatumani Esajasip oqaasii tuppallernartut eqquutissapput: „[Jehovap] toqu nungutissavaa piujunnaarsivillugu.“ — Jesaja 25:8.
4. Savanut allanut ilaasut ilarpassui Harmagedonimi Jehovap kisimi oqartussaassusianik akitsisitsinissamik takunninnissaminnik qilanaarinnissimagaluartut susimappat?
4 Satanip silarsuaata atorunnaarnissaa qanittuararsuummat savatut pissusillit kristumiuusut Babylonimut Angisuumut Satanillu silarsuaata sinneranut annikilliornartussarsuarmi Jehovap kisimi oqartussaassusiata akitsisinneqarnissaanik angumersinissartik kissaatigeqaat. (sarĸúmersitat 19:1-3, 19-21) Amerlasuunulli tamanna eqquussimanngilaq. Toqunngisaannartussanut „millionilikkuutaanut“ ilaanissaminnik neriuuteqarsimagaluartut ilaat maanna toqoreersimapput. Ilaat sallusuissut pillugu parnaarussivinni tigusanullu katersuutsitsivinni toqutaasimapput imaluunniit upperisarsiornikkut ingasaassinianit toqutaatinneqarsimallutik. Allat ajunaarnermik imaluunniit pissusissamisoortumik taasagaannik — napparsimanermik utoqqalinermilluunniit — toqquteqarsimapput. (Tussiaat 90:9, 10; Nalunaajaasup oqaasii 9:11) Qularnanngitsumik aamma ilavut allat naggatissaq nalliutsinnagu toqujumaarput. Taavami toqusimasut qanoq ilillutik silarsuassap iluartut najugassaattut neriorsuutigineqarsimasup piviusunngornera takusinnaassavaat?
Makititaanissamik neriuut
5, 6. Nunami inuunissaminnik neriugisallit Harmagedonip siorna toqusut qanoq siunissaqarpat?
5 Apustilip Paulusip Romamiut nunamut naalagaatitaannut Feliximut oqalunnermini tamanna akisimavaa. Soorlu apustilit suliait 24:15-imi allassimasoq Paulus nakimaalluni ima nalunaarsimavoq: ’Guuti neriuffigaara . . . toqusut makikkumaartut, iluartut iluaatsullu.’ Makititsinissamik neriuutip tamatuma ajornerpaamik nalaanneqarnitsinni allaat sapiissuseqalersissinnaavaatigut. Neriuut tamanna pissutigalugu ikinngutivut asasavut napparsimalersut toqunissaminnillu nalujunnaartut nikallorluinnartanngillat. Nalunngilaat qanorluunniit pisoqassagaluarpat aalajaannerminnut akissarsiassartik piumaarlugu. Qatanngutit angutit arnallu sapiitsut qinuginnittunit toqutaalersut makititaanissamik neriuut pissutigalugu nalunngilaat qinuginnittut qanorluunniit ilioraluarunik ajugaasinnaanngitsut. (Matîuse 10:28) Ilagiinni toqukkut annaasaqaraangatta aliasuutigisarparput. Savanulli allanut ilaappat tamanna ilutigalugu nuannaarutigisarparput naggatissani tikillugu aalajaattuarsimammat maannalu qasuersaalerluni, qularutiginagu Guutip silarsuassaani nutaami siunissaqarluni. — 1 Tásalûníkamiut 4:13.
6 Aap, makinnissamik neriuut uppernitsinnut ilaavoq pingaartorujussuaq. Soorliuna makinnissamik neriuummut uppernerput taama sakkortutigisoq, aamma kikkut tamatuminnga neriuuteqarpat?
7. Makinneq sunaava, allassimaffinnilu suni erseqqissarneqarpa?
7 Griikerit „makinneq“-mut oqaaseraat a·naʹsta·sis, isumaqavissoq „nikuippoq“. Ingammik toqusunit makinnermut atorneqartarpoq. Soqutiginartumik oqaaseq „makinneq“ Allakkani Hebriiarisuuni nassaassaanngilaq, makititaanissamilli neriuut erseqqilluinnartumik eqqartorneqarpoq. Assersuutigalugu Jobip naalliuleruttorfimmini eqqaasimavaa: „Guuti, toqqorumasinnaagaluarummatoq toqusullu inaanni isertorlunga . . . killilimmik utaqqiffissaqarteriarlunga kingumut eqqaaginga!“ (Job 14:13) Aamma Húsia 13:14-imi nutsigaq pisoqaq naapertorlugu ima allassimavoq: ’Uneriffimmit kingumut pissavakka; toqumit utertissavakka. Nungussutigissavarma, toqu-aa; perluutigissavarma, uneriffik-aa.’ Apustilip Paulusip Korintumiunut agdlagkat sujugdlît 15:55-imi oqaatsit taakku issuarpai ersersillugulu toqumik ajugaaffiginninnissamik siulittuut makititsinikkut piviusunngortinneqarumaartoq. (Soorunami allassimaffimmi tamatumani Paulusip eqqartugaa tassaavoq qilammut makititaanissaq.)
Uppertut ’iluartuutitaasut’
8, 9. (a) Inuit naammalluinnanngitsut iluartunut makititaasunut qanoq ilillutik ilaasinnaappat? (b) Inuunermut neriugisatsinnut toqup kipitissinnaanngisaanut suna tunngaviua?
8 Paulus Feliximut oqalunnermini, immikkoortumi 5-imi issuarneqartumi, oqarpoq iluartunik iluaatsunillu makititsineqarumaartoq. Iluartut makititaasussat kikkunuku? Inoqanngilaq inunnguutsiminik iluartuusumik. Tamatta ajortiliulluta inunngorsimavugut, inuunerpullu naavillugu kukkujuartarpugut — tamannalu pissutigalugu toqu marlutsigut pisassaraarput. (Rûmamiut 5:12; 6:23) Taamaakkaluartorli Biibilimi ’iluartuutitaasut’ eqqartorneqarput. (Rûmamiut 3:28) Tassaapput inuit naammalluinnanngitsuugaluarlutik ajortiminnik Jehovamit isumakkeerfigineqarsimasut.
9 Oqariaatsimi tamatumani pingaarnerpaamik pineqarput kristumiut tanitaasut qilammi neriugisaqartut. Rûmamiunut agdlagkat 5:1-imi apustili Paulus oqarpoq: ’Taava uppernikkut iluartuutitaagatta Guuti eqqissiveqatigaarput Naalakkatsigut Jesus Kristusikkut.’ Kristumiut tanitat tamarmik uppernertik pissutigalugu iluartuutitaasimapput. Sumut uppernertik? Soorlu Paulusip Romamiunut allakkamini nassuiaqqissaaraa Jesus Kristusimut uppernerat pineqarpoq. (Rûmamiut 10:4, 9, 10) Jesus inuttut naammalluinnartutut toqusimavoq, taava toqusunit makititaasimavoq qilaliarsimallunilu inuttut inuunermi nalinga iluaqutissarput sassaakkiartorlugu. (Eprîarit 7:26, 27; 9:11, 12) Pilliut tamanna Jehovap akuerimmagu Jesusip inuiaat ajortimit toqumillu inussiaajunnaarsippai. Pilliummut tamatumunnga uppernermik ersersitsisut tamanna assut iluaqutigaat. (1 Korintumiut 15:45) Tamanna tunngavigalugu angutit arnallu aalajaatsut inuunermik akeqqatsinnit naakkittaatsumit, toqumit, kipitinneqarsinnaanngitsumik neriugisaqarput. — Juánase 3:16.
10, 11. (a) Kristumiut tanitat makititaaffissaq suna pissaraat? (b) Guutip kiffaasa kristumiussuseq sioqqullugu inuusimasut makititaaffissaq suna neriugisarisimavaat?
10 Jesusip pilliutaa utertitsissutaasoq qujanartumik iluaqutigalugu tanitat aalajaatsut taassumatut anersaatut toqujuitsunngorlutik qilammut makititaanissaminnik qularnaatsumik neriugisaqarput. (sarĸúmersitat 2:10) Taakkua makititaanissaat sarĸúmersitat 20:6-imi ima eqqartorneqarpoq: ’Pilluarlunilu iluarpoq makiffimmi siullermi pissaqartoq; taakkununnga toqup aappaa piginnaassuseqanngilaq, kisianni Guutip Kristusillu palasertarissavaat, kunngioqatigissavaallu ukiut tuusintillit.’ Tassa qilammut makititaanissaq. Malugiulli tamanna Biibilimi eqqartorneqarmat ’makiffittut siullertut’, allamik makiffeqarnissaa ersersillugu.
11 Eprîarinut agdlagkat, kapitali 11-mi, Guutip kiffarpassui kristumiussuseq sioqqullugu inuusimasut Jehova Guutimut uppernermik sakkortuumik ersersitsisimasut Paulusip eqqartorpai. Taakku aamma makititaanissaq upperisimavaat. Israelip oqaluttuarisaanerani tupinnartuliakkut toqusunit makititsisarsimanerit kapitalimi tassani versimi 35-mi Paulusip eqqaavai ima oqarluni: ’Arnat toqusortatik makittut tiguaat; allat anniartitsivimmut nallartitaagamik iperarneqarsinnaagaluarlutik piumanngillat ajunnginnerusumik makiffissaqalerumallutik.’ Nalunaajaasut aalajaatsut itsaq inuusimasut taakku makiffissamik, makititsinermit Eliasip Elisallu naammassisimasaannit ajunnginnerusumik, qilanaarisaqarsinnaasimapput. (1 Kunngit 17:17-22; 2 Kunngit 4:32-37; 13:20, 21) Silarsuarmi Guutip kiffaasa uppernertik pissutigalugu naalliutsitaaffiginngisassaanni arnallu asasaminnik toqukkut qimagaaffiginngisassaanni makititaanissartik neriugisaraat. Aap, silarsuassami nutaami aamma uagut neriugisatsinni makititaanissartik qilanaarisimavaat. (Jesaja 65:17-25) Silarsuassaq nutaaq tamanna pillugu uagutsitut Jehovap taakku paasisaqartitsigisimanngilai. Taamaakkaluartorli silarsuassap nutaap atuutilernissaa nalusimanngilaat, tassanilu inuulerusullutik.
Nunarsuarmi makititaanissaq
12. Aalajaatsut kristumiussuseq sioqqullugu inuusimasut iluartuutitaasimappat? Nassuiaruk.
12 Angutinik arnanillu aalajaatsunik kristumiussuseq sioqqullugu inuusimasunik tamakkuninnga silarsuassami nutaami tamatumani makititsinissaq iluartunik makititsinissamut ilaasutut isigissavarput? Aap, taamaassorinarpoq, Biibilimimi taakku iluartutut eqqartorneqarput. Assersuutigalugu ajoqersukkap Jakobip itsaq angut arnarlu iluartutut isigineqartut eqqaavai. Angut tassa Abraham, inuiaqatigiinnut Israelikkunnut nagguiusoq. Taanna pillugu ima allassimasoqarpoq: ’Abrahamip Guuti upperigamiuk iluarsuseqartitaavoq. Guutillu ikinngutaanik taaneqarpoq.’ Arnaq tassa Rahab, Israelikkuunngitsoq Jehovamut uppernermik ersersitsisoq. Taanna ’iluartuutitaasimavoq’ Israelikkunnullu ilaalersimalluni. (Jâko 2:23-25, NV) Aap, angutit arnallu itsaq inuusimasut Jehovamut taassumalu neriorsuutaanut uppernermik sakkortuumik ersersitsisimasut toqussartillu tikillugu aalajaassimasut uppernertik tunngavigalugu Jehovamit iluartuutitaasimapput, qularnanngitsumillu ’iluartunut makititaasunut’ ilaassallutik.
13, 14. (a) Qanoq ililluta nalunngilarput kristumiut nunarsuarmi inuunissaminnik neriugisaqartut iluartutut nalunaarutigineqarsinnaasut? (b) Taakkununnga tamanna qanoq isumaqassava?
13 Taavami ullumikkut inuit savatut pissusillit, inuit nunami inuunissaminnik neriugisaqartut Jehovamullu tunniulluinnarsimasut naggatissallu nalaani toqusut? Iluartunut makititaasunut ilaassappat? Aap, taamaassorinarpoq. Aalajaatsorpassuit taakku apustilip Johannesip takorruukkami takusimavai. Malugeriaruk qanoq allassimasoq: ’Kingorna takunnikkama, ata, amerlangaartut kisinneqarsinnaanngitsut, inuiaqatigiit immikkullu naggueqatigiissut immikkullu inuiaasut immikkullu oqaasillit tamarmik ilaat, issiavissaarsuup saani savaaqqallu saani qeqartut, takisuunik qaqortunik atisaqartut, palmillu avalequtaannik tigumiaqartut; nipituumillu torlulapput oqarlutik: „Annaassut Guutitta issiavissaarssuarmi issiasup Savaaqqallu pigaat.“’ — sarĸúmersitat 7:9, 10.
14 Malugiuk qanilaartut taakku annaanneqarnissartik qularinngilluinnaraat, annaassullu Jehovamut Jesusimullu, ’Savaaqqamut’, pigitikkaat. Aammalu Jehovap Savaaqqallu saanni qeqarput, tamarmik qaqortumik atorlutik. Sooq qaqortumik? Anersaap qilammiup Johannes ima oqarfigaa: ’Atisatik takisuut Savaaqqap aavanik errorpaat qaqorsarlugillu.’ (sarĸúmersitat 7:14) Qaqortoq minguissutsimut, iluarsutsimut, Biibilimi assersuutigineqarpoq. (Tussiaat 51:9; Daniel 12:10; sarĸúmersitat 19:8) Amerlangaartut qaqortumik atisaqarnerat isumaqarpoq Jehovap iluartutut isigigai. Qanoq ililluni tamanna ajornanngila? Atisatik Savaaqqap aavanik errorsimagamikkik. Jesus Kristusip aavanut kuisamut uppernerminnik ersersitsipput taamaattumillu Guutip ikinngutaatut iluartuutitaallutik annikilliornartumi angisuumi aniguinissartik qilanaarisinnaallugu. Tassa kristumiup tunniulluinnarsimasup aalajaatsup ’amerlangaartunut’ ilaasup annikilliornartoq angisooq sioqqullugu toqulersup qularutiginngissinnaavaa iluartunut nunarsuarmi makititaasunut ilaajumaarluni.
15. Iluartut iluaatsullu tamarmik makititaasussaammata taava iluartunut suna ajunngequtaassava?
15 Makititsinissaq tamanna sarĸúmersitat-ni, kapitali 20-mi, versimi 13-imi, ima allaatigineqarpoq: ’Immallu toqusut imminiittut tunniuppai, toqullu toqusullu inaata toqusut imminniittut tunniuppaat; eqqartuunneqarpullu nungullutik suliatik naapertorlugit.’ Taamaalilluni Jehovap ulluani eqqartuutiffissarsuarmi ukiunik tuusintinik sivisussusilimmi inuit Guutip eqqaamasai tamarmik — iluartut iluaatsullu tamarmik — toqusunit makitinneqassapput. (apustilit suliait 17:31) Soorunami iluartunik taaneqartunut oqinnerussaqaaq. Uppertuullutik inooreersimapput. Jehovamut qanimut attaveqareersimapput taassumalu siunertaasa piviusunngornissaannik tatiginnittooreersimallutik. Nalunaajaasut iluartut kristumiussuseq sioqqullugu inuusimasut toqusunit makikkunik pissangallutik paaserusussaqaat Jehovap ’kinguaassamut’ atatillugu neriorsuutai qanoq ilillutik eqquussimasut. (1 Pîtruse 1:10-12) Nalitsinneersullu ’savanut allanut’ ilaasut Jehovamit iluartutut isigisaasut ilivermit makitinneqarunik paratiisi, aaqqissuussaanermi matumani nutaarsiassamik nuannersumik oqaluussissutiginninnerminni eqqartortarsimasartik, qimerluussallugu pissangagissaqaat. Taamanikkussaq nuannerunaqaaq!
16. Nalitsinni toqusimasut ullormi eqqartuutiffissami qanoq ilinerani makititaassagunarpat?
16 Ullormi eqqartuutiffimmi ukiunik tuusintinik sivisussusilimmi piffissap qanoq ilinerani aalajaatsut, Satanip aaqqissuussaanerata ukiuini kingullerni toqusimasut, makititaassappat? Biibilimi tamanna oqaatigineqanngilaq. Ingasaassinerussannginnerpali isumaqassalluni iluartutut isigineqartut nalitsinni toqusut siusissukkut makititaassasut taamaalillutillu amerlangaartut Harmagedonimi aniguisimasut ilagalugit kinguaariinnik siusinnerusukkut toqusimasunik tikilluaqqusiortoqataasinnaassallutik? Taamaannissaa ilimanaannaavoq!
Neriuut tuppallernartoq
17, 18. (a) Makinnissamik neriuut qanoq tuppallernartuua? (b) Jehova pillugu qanoq oqarnissatsinnut killinneqarpugut?
17 Makiffissamik neriuut ullumikkut kristumiunut tamanut nakussatsinnarlunilu tuppallernartuuvoq. Aalajaattuaannarutta nalaatsornikkut pisup suulluunniit aamma akeqqap kialuunniit akissarsiassatsinnik angusinngitsoortissinnaanngilaatigut! Assersuutigalugu Jehovap Nalunaajaasuisa atuagaanni ukiumoortumi 1992-imoortumi quppernermi 177-imi takuneqarsinnaapput Etiopiami kristumiut sapiitsut uppernerminnik aalajangiusimannittuarnertik pissutigalugu toqutaasimasut assingi. Assit ima oqaasertalerneqarsimapput: „Makititaaffimmi takussallugit qilanaarisavut.“ Taakkuninnga allarpassuarnillu toqu tikillugu aalajaattuarsimasunik ilisarisimannilernissaq immikkut pisinnaatitaaffissuuvoq!
18 Taavami asasavut anersaakkullu qatanngutivut utoqqalinertik timikkulluunniit sanngiinnertik pissutigalugu annikilliornartussarsuarmi uumaannanngitsoortut? Aalajaattuarsimagunik makinnissamik neriuut tunngavigalugu nuanningaartumik siunissaqassapput. Aamma uagut Jesusip pilliutaanut utertitsissutaasumut sapiilluta uppertuaannarutta nuanningaartumik siunissaqassaagut. Sooq? Paulus assigalugu ’iluartut iluaatsullu makinnissaannik’ neriugisaqaratta. Neriugisarput tamanna pillugu Jehova qamannga pisumik qutsavigaarput. Neriugisatta tamatuma tussiaasiortutut ima oqarnissatsinnut killippaatigut: „Inuiaat allamiut oqaluttuussigit naalannassusianik, inuiaqatigiillu tamaasa tupinnartuliaanik. [Jehova] angingaarpoq unnersiutigineqangaassallunilu.“ — Tussiaat 96:3, 4. (wD 15/2 95)
Nassuiarsinnaaviuk?
□ Allassimaffiit suut nunami makinnissamik neriugisarput aalajaallisarpaat?
□ Sooq kristumiut ullumikkut iluartutut nalunaarutigineqarsinnaappat?
□ Makinnissamik neriugisatta qanoq ililluni sapiissuseqalersillutalu aalajangersimalluinnartippaatigut?
[Qupp. 10-mi assiliartaq]
Paulus assigalugu kristumiut tanitat qilammi makititaanissaminnik neriugisaqarput